بالله انت شايقى؟؟؟؟؟؟(بوست تكيى للهيئى الدبلماسيي والناس الحنينى)

غالبا ما يجد اهلنا من غير الشايقة صعوبة فى التفاعل مع الحان الطنمبور خصوصا اهل المدن لكنهم مع ذلك يستمتعون جدا بالاشعار الشايقية دون حتى ان يعرفوا انها شايقية فى هذا البوست ساقوم بنقل اى قصيدة شايقية اوقعها قوقل فى يدى ولنستمتع بها جميعا


**************************
كان فى عسكرى حركة شايقى واقف فى اشارة وجات عربية قطعت الاشارة قدام صفر ليها وقف العربية عايز يغرما لما وصلا لقا السايق مشلخ شايقى مشاه وقال ليه نان ما تقول هيئيى دبلماسيي

من شبا سلام

اول قصيدة بالله انت شايقى

بالله إنت شايقي!!؟

سؤال يا بت غريب

أنا أيِّ شايقي

و بالتحديد بقولك بلدي أرقي

و كان دار تعرفي اصلي

في النيل و الجروف الخدرا في نوح السواقي

في نِغيم طمبور يبكي الليل و في لبس العراريق و الطواقي

و كان فتشتي في قلب الحسان من جُوة تلقي

أنا أيِّ شايقي

و جنسي شايقي و دمي شايقي

و جدي شايق

و كان دار تعرفِ اصلي أصبري لي دقايق

و خليني اللّدوِّر عجلة التاريخ و أسرد للحقايق

دنقل عيال منصور جعل و رباط و شايق

لا نهاية الدنيا أولاد عم شقايق

أنا أيِّ شايقي و كمان قاري العلم و عارف الكِتابي

كلامي سمح و أكلي قمح و من النيل شرابي

و بملا العين و أزيد شبرين و أهز عضلات شبابي

و أشق أعداي عديل و كتين أشم ريحة ترابي

أنا أيِّ شايقي و الشايقية مازجي دماي في ذاتي و عروقي

كان مكضبة أقيفي أفصل ليكي إيدي و هاكي ضوقي

أنا أمي مهيرة بت عبود و شيخي الميرغني الختمي الطريقة

و جدي شايق سيد الشايقية جدد ليها شوقي

أنا أيِّ شايقي و شايقي أيِّ

بسوم الروح و أقدِّمة لي حياة العز ضحية

و ما بهاب الموت مادام عيني حية

في وقت السِلِم بزرع و ألِم فوق كتفي طورية

و ساعة الحارة في وسط الصفوف تلقيني شايل البندقية

أنا أيِّ شايقي و شايقي أيِّ

و دة ياهو كلامي مهما قريت و اتعلمت و أصبح شاني سامي

و دة ياهو كلامي حتى ان كان بقيت سفير

و لّا كمان بقيت لجلاج أناطق الطير محامي

دة ياهو كلامي حتى ان كان بقيت عميد و قايد جيش نظامي

و دة ياهو كلامي حتى ان كان بقيت ريِّس و أصارع الموج ورا مِي

و دة ياهو كلامي حتى ان كان بقيت غوّاي و زي قيس في غرامي

دة ياهو كلامي أنا اصلي شايقي و ما بغير من كلامي

لما أقول أنا شايقي ما بقصد تِكِبِّر و إني أعلى من الثُريّا

لما أقول أنا شايقي ما بقصد أقسِّم و طني و أدعو العنصرية

لما أقول أنا شايقي بقصد إني سوداني و بسوق ستين سرية

و لما أقول إني شايقي بقصد إني بحمي حماي و احتضن الحرية

أنا أيِّ شايقي و شايقي أيِّ

و السودان عموم يا بت وطنّا ان كان نضمنا عديل

ولّا ان كان كسرنا الكِلمة حتى ان كان رطنّا

جُوارنا أمان و قلوبنا حُنان و أبيض من قطنا

و نحن المن زمان معروف نكِرم الضيف ولو نربط بطُنّا

أنا أيِّ شايقي و شققت العُقاب جيت من كريمة

زادي كسرة متمرة و حبّات جِريمة

لبسي جبة مبرقعة و غبشة و قديمة

و للبنادر جيت و كان أكبر جريمة أنا قلبي ما بدلتو بس بدّل هدومي

و ماني صايع ساكت آآآآ بت لا تلومي أنا أصلي أفندي في طرف الحكومة

عاد وحات اسم الله في شايقيتي فد يوم ما بزيِّف

و حبي للشايقية من ما قُمتة درفوناً خِفيِّف

و لما أبقى شايقي و بين ضلوعي دوام يفر قلبي الرِهِّيف

و لهجة الشايقية حلوة و في لساني يمين تكيِّف.

قصيدة اشارات الوداع ل عوض على حامد


هو كـان شايف اشـارات الــوداع فـي الـعـيـن
قدر جاي وامل راحل حزن قدر الفراق والبين

نـذر قدرو المداقر عمـرو لازم عمـرو يـتـودر
نـتر جـرحو بيبشر دمـو بـاكـر دمـو بـتـقـطر
عـرف فـرحـو السقـاه حـنـانـو والراجيهو بتاخر
شـعـر حـلـم السـنـيـن الـعـاشـو قـدام عينو بتبخر

حس هو لما ضم ايديهو بشوق العمر بجري
وحس كمان ضياع آمالو فاجئو في القلب بدرى
كانو عيونو كان بتقول وداع يا حبنا العذري
غمد اكان يضاري دموع وتخزلو دمعة منحدري

بسم رغم الفراق الجاي ياها عيونو زي اول
ضحك امل الزمان ضاميهو رغم انو الالم طول
سخر من الحياة الودارة عمرها مابتناول
ثبت حتحت دموعو الحري عن عينيهو ما تحول

رجع لايام زمان لا قاهو في درب العمر صدفة
ايديهو الرادة ياها ايديه تضمو وبينا يدفا
عيونو الحزن ما هداها بل زاده الوجع يدفا
قليبو في يوم فراقو الابدي فارق حتى بالالفة

فضل جنب الحبيب ساهم فضل ساهر قريب منو
شرب على قدر ما اداه الله من القليب حنو
فضل في كل ثانية يريدو ابدا ما انشغل عنو
دفع كل العمير والعافي كان يفداه لكنوا

حبس كل الكلام في جوفو خلي عينو تتكلم
كتم بوح الانين واللوعة نار في حشاه بتالم
صبر لما النهاية المرة حانت وبالمصير سلم
مسك قلم اليقين من حبو رغم اساهو يتعلم

الرواسي
حاتم حسن الدابي
**************

مدر مدر يا رواسي نحن بعاد لحقنا القيفة
انت مدبج ونحن نقاسي
برد امشير والموج والزيفة

مركبك الماليها مطارق تمشي تقيف تسرح بي كيفة
مرة مغارب ومرة مشارق وانت تخاف الريح وحفيفة
ساوها زينة وفوقا بيارق وأنت مدبج توب وقطيفة
فيها المات والضاربو الفالق والسالمين في حالة مخيفة


كل الناس ترزح في كفة وأنت وناسك فوق الدفة
الدايشين والراسهم لفة والشاخصين في المدى للضفة
ساو طبالك فوقهم الفه جوة الموية وريقهم جفة
من العطش النص اتوفى وباقي النص الفضل جيفة


ضاقوا المر والحال استعصى الشغال واللاحق الحصة
الواصال للرحم اتقصه والهداي مو لاقي الفرصة
الرساي سافر ما وصى خلى محمد واحمد وحفصة
الأطفال العرفو القصة سدت جو حلوقهم غصة
من الجوع الدم اتمصة وأصبح كل الحلم رغيفة


كل الراكب شاف أحلامو دون احساس ماتت قدامو
فن كتابو وكسر اقلامو لا الولدين لا جار ما لامو
هزموه اخوانو البي الجوع نامو وكم خريج ما لاقي وظيفة


يا الفكيتها وقلت لها سيري وعارف أنو الدنيا دميري
لا في في ضفاف لا شفنا جزيري لا في الحيري لا في الطيري
كسرت جناحها وقلت لها طيري اتملكت الكانت ميري
يا السودت الناصع وجيري ايد الحق صابوني وليفه


قبلك كم متعلم وقارئ عكس الريح فكولو الصاري
مشدوهين متعشي وحاري ريسها شلته البحاري
كم سنوات علاما البارئ واقفي وهم شايفنها جاري
بقينا هلاك والقيف مضاري لا حجار لا دوحة وريفة

حسك عينك ما تتمادى وتنسى الراكب عندو ارادة
الأهوال الشافها وخاضها كان في مدرسة ولا عيادة
شفنا الأيد الكانت اجوادة يا مبتورة ويا شحادة
وياما رقاب كانت سدادة علمت الله من التعريفة


يا ريسنا قدر مديرك فك الدفة وادها غيرك
احفظ نفسك ترضي ضميرك وقف اوع تواصل سيرك
كان طاوعتنا شن بيضيرك عرض اكتافك وفك البريك
لا هني شكرا وكتر خيرك وكل انسان في الارض خليفة

يا محسنين لله
للشاعر حسن الدابي..


قومة من النباه ما ضاقلو قوت الفاه
غير كلمتين فى اليوم إعتادن الحلقوم
من الصباح للنوم يا مـحسنين لله
تبدأ الصباح بالآه ومنك زمن تواه
وتتمسى يا الله من شدة المأساه
ترقد رفقت الشاه حالاً صعب رضاه..

جواها صوت مخنوق ما بيسمعوا المخلوق
وبالاً شتيت ممحوق وأنه أسى وخازوق
بحت لسان مريوق ينادى مـعـتـصـمـاه
يا محسنين لله
حبل المروه الكان ممدود من الجيران
وأعـمـــامـه والخلان بالمطرقة وسندان
يا حليل رجلنا زمان بس فضلو الأشباه..

قبال ثلاثة سنين يتمت من الوالدين
ومن بعـــــدو بسنتين راح الكفيل وحنين
خلا لها دمعة عين وخلا لها خمسة أفواه..

صبارة قادرة تطيق كل الآلم والضيق
وتغلب نشاف الريق والمصلا والابريق
وقلبـــاً وفى وصـــــديق لا ضل يوم لا تاه..

إلا الصغيرونين يتبـــــاكو هم دايرين
فى لحظة وحين مـا بيعوفـوا المن وين
والحــوجة سيفه سنين يقتل رقاب الجاه..

سالت دموع أنهار جسر الصمود إنهار
عارفى العدم جبار مر ما بيراعى صغار
إلا الفقر مـو عار بس للوجوه شواه..

ضايقى العذاب كم نوع وعارفى السؤال ممنوع
شبعانه فوقو الصوع ورويانه نوح ودموع
الله يجازى الجوع كم كم حنالو جباه..

تب يا زمن مـحاق من ضلك الرقـــــاق
يا قاسى يا فراق يا اللى الفرح سراق
حنضل أساق دقاق مـا بيحملنو شفاه..

عطش السنين فى الجوف طرد السئم والخوف
فرش دواخلى حـروف روينا بالمعــــــــروف
ولا قلة المصـــــــروف لا الحـــــوجــة تتوطاه..

طارق جبريل وناس شبا سلام كيفك يا إبن عمى
البوست دا بتاعك مرتين مرة لانك هيئى ديبلوماسيى ومرة لانك احن اهل البورد

نورا - حميد



هيْ .. أقيفِنْ .. ‏
نورا فِيكِنْ ؟ . ؟ ‏
نورا ... نقّاحة الجِّروفْ .. ‏
نورا ... حَلاّبة اللِّبيني .. ‏
للصغيرين والضِّيوفْ ‏
نورا ساعة الحَرْ يولِّعْ .. ‏
تنقلِبْ نسمة وتطوفْ ‏
تَدِّي للجيعان لقيمة ‏
وتَدِّي للعطشان جغيمة ‏
والمَخَلِّي الحال مَصَنقِرْ .. ‏
في تَقَاة اللّيل تَندْقِرْ .. ‏
تدِّي لي باكر بسيمة ‏
تَكْسي للماشين عَرَايا ‏
وفوقا ينقطّعْ هديمه ‏
‏
‏*** ‏
ما عِرفتِنْ ... نورا إنْتِنْ .. ؟ ‏
قولِنْ إنتن شِنْ عِرفْتِنْ ؟ ‏
‏ ‏ ‏
نورا بِتْ الواطة ‏
أخيتي .. ‏
نورا اخُتْ كُلّ الغلابة ‏
نورا حاحاية الشّقاوة .. ‏
نورا هَدّاية الضّهابة ‏
الأراضي اليَاما أدّتْ .. ‏
نورا ... بقّتْ من تُرابه ‏
وماشي في الأعماق سحابه ‏
مشتهنِّها .. والله جابه ‏
الله جابه ... الله جابه ‏
للجنوب طبلاً‎ ‎‏ يَهَدْهِدْ .. ‏
ليل مشاعر ناس تعابة ‏
وللشّمال طنبور يَسَكِّتْ .. ‏
دمعة الميتين كآبة ‏
‏
‏*** ‏
ما عِرِفْتِنْ نورا إنتِنْ .. ؟ ‏
قولِنْ إنتن شِنْ عِرِفْتِنْ ؟ ‏
‏
‏*** ‏
نورا .... ‏
‏ عايز تقرأ .... قالتْ ‏
فوقا حيطة الدِّنيا مَالتْ ‏
خَتّتْ الكرّاس وشَالتْ ‏
منجلاً .... صَالَتْ بو جَالَتْ ‏
لامِنْ إنجرحت بو شالَتْ ‏
لي التراب فوق إيده كَالَتْ ‏
‏
‏*** ‏
ومَرّة يوم في الدُّونْكَا لِدْغَتْ ‏
جاء الفقير بالليل حَوَاهَا ‏
ويوم ملاها الهم قطايع .. ‏
جاء البصير بالنّار كَوَاهَا ‏
ونورا ... ما قِدْرَتْ تمانع .. ‏
تقنع النّاس المعاها ‏
مرة شافت في رؤاها ... ‏
طيرة ... تاكل في جناها ‏
حيطة تِتمغّى وتفلّعْ .. ‏
في قَفَا الزّول البناها ‏
في جنينة سيدي سِمْعَتْ .. ‏
شتلة تصقع لي الوَرَاها ‏
الأرض .. ‏
‏ لابُدَّ ‏
‏ ترجع ... ‏
للتِّعِب فوقا ورعاها ... ‏
غيمة ... والنِّيل موجو لاها ‏
والعطش شقّقْ شفاها ‏
الشّمس طَبَقت ضُحَاهَا ‏
الخليقة لقت إلاها ‏
نار .... ‏
عقاب إنسان مكسّر .. ‏
فوق تَلَكِّيات متاهة ‏
وضَوْ من الله .. رهاب مكتّفْ ‏
في وتيد اللّيل معاها ‏
بين ربوع حَضَره وخلاها ‏
فَسّرَتْ لي النّاس رُؤاها ‏
وقالوا .... جَنّت .... ومو براها ‏
ونورا زادت فوق شقاها ‏
‏ ‏
و صَدّتْ الأيام .... تحُشْ ‏
تبني لي عصفورة عُشْ ‏
في السّواقي تشوف عزاها ‏
لما شوقه يسوِّي .. أُشْ !!! ‏
تملا ... تزرعْ ‏
ترعى .. تقرع ‏
للنهار في الليل تخُشْ ‏
عِرْفَتْ الشّقَا والشّقَاوة ‏
إلاّ .... ‏
ما عرفت تغُشْ !!! ‏
‏
‏*** ‏
شايلة طولة البال من الله .. ‏
ومن أراضينا الإثارة ‏
وماشي تكدح طول نهاره ‏
وترجى لما الليل يَفلِّلْ .. ‏
تسرِق ألمي عشان خداره ‏
عشان صغاره .. ‏
عشان خداره ‏
عشان صغاره .. ‏
‏ ‏
ولما ترجع لي دياره ‏
تنزف أحلام الفقارى ‏
من عويناته الحيارى ‏
‏
‏*** ‏

لي غُبار الحال تقُشْ ‏
فوقو لي الآمال ترُشْ ‏
نورا .... ‏
تقعد ‏
‏ صاحيي تحلم .. ‏
بي بيوت بي نور ودُشْ ‏
وبالمحبة تشُق دروبه .. ‏
ولي قلوب الكل تخُشْ ‏
نورا ... ‏
‏ تحلم بي وجود ‏
ما مشت بينو القيود ‏
أفضل أفضل بي الكتير .. ‏
بي وطن من غير حدود ‏
‏
‏*** ‏
نورا تحلم بي عوالم ‏
زي رؤى الأطفال حوالم ‏
لا درادر .. ‏
لا عساكر .. ‏
لا مظاليم ‏
لا مظالم ‏

‏*** ‏
نورا تحلم .. ‏
ولما تحلم ..... نورا ترجِفْ ‏
ولما ترجف .... نورا تحلم .. ‏
ولما ريح الواقع المُرْ .. ‏
لي عشيش أحلاما ينسِفْ ‏
نورا ..... تنزِفْ ‏
وفي الوجود .. وجدانه يهتفْ ‏
حالة .. تقرِفْ .. ‏
حالة تكسِفْ .. ‏
حالة تكسِفْ .. ‏
حالة تقرِفْ .. ‏
وتبدا تقضِفْ .. ‏
ولما تقضِفْ ‏
‏ بالا يهتِفْ .. ‏
وتملا باله أحلام بتلصِفْ ‏
يوم حا تنصِفْ ‏
يوم حا تنصِفْ ‏
نورا .. ‏
لسّه بعيد .. ‏
هناكَ .. ‏
وتبدأ تحلم .. ‏
ولما تحلم نورا ترجِفْ ‏
ولما ترجف نورا تحلم ‏
صاحيي تحلم .. ‏
وصَاحْ بتحلَمْ ‏
صاح بتحلَمْ ‏
بتحلم صاحْ .. ‏

طير الرهو اسماعيل حسن

والله والله يا طير الرهو
قسماً عديل ما فيه لو
دمع الحبايب ذي نغيم الساقية
في الوادي البعيد وتسوي جو
والله يا طير الرهو..ء
ما كت مصدق اني بلقاك يارهو
اشكو ليك من جور زماني ..
كيف رماني ..شوف براك ..شوف الزمن
كيفن بسو..ء
حتى باقي الزاد كمل
والليل ..طويل طولاً غريب مافيه ضو
والريح تنوح فوق الدروب
وآخوفي من صوت الرياح
وكتين تنوح وتسوي او
زيك غريب و الغربة طالت يا مسيكين
متلي يا طير الرهو
التراب ملينا عيشته
اريتني زيك
كل يوم يحضني جو
في بحور الريد نسافر
والمراكب كاسحة..ما دام ريحنا نو
نمشي لي أرض الحبايب يا حلاتن
في المغيرب والدنيا ضو

يا سلام لما نسالم ... طائر مغرد
.يستحيل.......شل العواطف
في قليب عاشق .مغرد...ء
زي تميرا في الشمال لمن يفيض
النيل يفرهد
تنتشي الدنيا وتزغرد
النسيمة الحلوة تطبقنا
وتنقر بابنا كو كو
يا سلام ..يا سلام

نوري

مالت ومال جريدا

Quote: أنا أيِّ شايقي و شايقي أيِّ و دة ياهو كلامي مهما قريت و اتعلمت و أصبح شاني سامي و دة ياهو كلامي حتى ان كان بقيت سفير و لّا كمان بقيت لجلاج أناطق الطير محامي دة ياهو كلامي حتى ان كان بقيت عميد و قايد جيش نظامي و دة ياهو كلامي حتى ان كان بقيت ريِّس و أصارع الموج ورا مِي و دة ياهو كلامي حتى ان كان بقيت غوّاي و زي قيس في غرامي دة ياهو كلامي أنا اصلي شايقي و ما بغير من كلامي لما أقول أنا شايقي ما بقصد تِكِبِّر و إني أعلى من الثُريّا لما أقول أنا شايقي ما بقصد أقسِّم و طني و أدعو العنصرية لما أقول أنا شايقي بقصد إني سوداني و بسوق ستين سرية و لما أقول إني شايقي بقصد إني بحمي حماي و احتضن الحرية أنا أيِّ شايقي و شايقي أيِّ و السودان عموم يا بت وطنّا ان كان نضمنا عديل ولّا ان كان كسرنا الكِلمة حتى ان كان رطنّا جُوارنا أمان و قلوبنا حُنان و أبيض من قطنا و نحن المن زمان معروف نكِرم الضيف ولو نربط بطُنّا أنا أيِّ شايقي و شققت العُقاب جيت من كريمة زادي كسرة متمرة و حبّات جِريمة لبسي جبة مبرقعة و غبشة و قديمة و للبنادر جيت و كان أكبر جريمة أنا قلبي ما بدلتو بس بدّل هدومي و ماني صايع ساكت آآآآ بت لا تلومي أنا أصلي أفندي في طرف الحكومة عاد وحات اسم الله في شايقيتي فد يوم ما بزيِّف و حبي للشايقية من ما قُمتة درفوناً خِفيِّف و لما أبقى شايقي و بين ضلوعي دوام يفر قلبي الرِهِّيف و لهجة الشايقية حلوة و في لساني يمين تكيِّف.

العزيز/ رغيم

سلام

الكلم مرتب جميل وفايت الحد.. يندس جواك بمشاعر واحاسيس نخل الارض البيغازل في السماء..


محمد الحسن سالم حميد... الزول ده غير وتصنيف غير..
زول تعجز الحروف فيه.. ما بتلحقو كلمات الوصف والاطراء..


تحياتي

تحية للهيئي الدبلوماسيي

من القرير لؤلؤة الشماليي


متابعة و حضور للنهايي

سامية وناس قرير العز القرير القلعة والعامراب والجناين والمدرسة الاميرية ليكم قصيدة هدية شتيلة قرير


شتيلة قرير *
شتيلة قريرا الفجر نبحن بوابيرا
حليل تغريد عصافيرا بلاها أصبحنا في حيرة
حرام نقلك من الجيرة انتي يازهرتنا النضيرة
دهب زادوه تجميرا لفة خاتم ضميرا
شبيهة البدر المنيرة ليك تاجوج ماها سيرة
نازلة العقلات ضفيرة تداعب رمان صديرا
نظرتك قاسي تفسيرا فيها انذارات خطيرة
ست الكل يا أميرة روحي كفاها تدميرا
ضاقت وغلبت بصيرا خلاص اتحقق مصيرا
يا صلاح أم شديرةتعود ونشم من عبيرا
فراقكم زادني تعكيرا وبلاك ما عندي تفكيرا
جدي البرعن أراكن سبيبك ولا ليل ساكن
إنت طبيبي بس لكن رحل كت في القرير ساكن
يفوح المسك من فاه مضمر واحسرتاه
الفريع الهتف نداه تموع تتنى ما لاه
عيني ما رأت نومة بقت لك سبب الحكومة
تفضلي نوري يالتومة قريرنا معاكي شن لومة
ربنا مالك الممالك يحرق الكومر الشالك
ياظبية جنان مالك فارقت القرير مالك
شبيهة الصيد في البوادي محكم عودك النادي
فاطرك برقو عبادي الرزق يا جاهلة جبادي
فراقك قاسي ألمني سواد عينيكي جنني
على الأحباب ماب تحني فقد عقلي بقيت أغني
ليك برسل تحياتي بضمنه موتي وحياتي
أتكرن وأمشي فلاتي عليك يازهرة الشاطي
فريع المحلب القايد عشانو أقاسي الشدايد
سهامو رماني أوف صايد ألمي الراح جاني عايد
بصلي وبعبد الباري أقيم ليلي وأصوم نهاري
عشان الشاغلة أفكاري الشلوخة قضيب الكباري
حليل الروقة والبسمة حليل الضامرة منقسمة
شلوخ خديها مترسمةقامت وكل شي قسمة

عبد العزيز سلامات وشكرا جميلا على مرورك الجميل

Quote: نوري مالت ومال جريدا

ديامى سلامات ليك ولى نورى الجناين

رغيم....اسم من التاريخ...مسنود من حضارة اكسوم...عطفا علي ما اتانا من تلاقح الشموس الحضارية...

انظر ماذا قال ود حد الزين...سينيناتن بلا شخب الحليب الصافي يرهج في الكبابي...وريقن يمه ..زي خمر التمور ..المن زمان طامرنه في جوف الخوابي ...رقابن وين رقاب الريل ..علي الحدب البعيد شرفن علي هوهيو كلابي ...وعودن يمه متل الخيدران فدعوهو .. لي وجعي وعذابي ...

تعود بنا يا رغيم الي الفجراوي قبل ان تطل شموس البعاد بهجيرها اللافح.....


(يا شعوب العالم.....).شكرا

إبداااع ياعيال شايق

حضور ومتابعة

من ابورنات سلام ...

تحية.....كليمات زي نخلات علي جدول التذكار....يفوح منها عطر الجروف وتتدلي منها ثمارالشجن رافدا للخيال سابحا معه الي النجيمات البعيدة...

( العرجون يصارع في الدفيفيق شوفي في قلب الجريد هتان ينقط في العسل يا ريت شرابي

..ولونن يمه زي لون القمح ضروهو شوف ضراني كيف؟

الله بيضاريك يا الضرضر صوابي ...دريباتن عقاب التيه ومافي خبير يشق الليل علي بلد ..الدوابي ...مهورن غالي ما بقدر عليهن

وحاتك انتي ما بقدر عليهن ....كمان شوفي المصيبو نفيستي فيهن ...منو البقدر يمد ايديهو لي كيس المرابي )...


سلام ايها الناس الحنان

ود رغيم
تحياتي
ومعاك هييي دبلوماسي من السقاي مركز مروي
وعزيزنا حميد قضي معنا ايام رائعة هنا بقطر
ومتابعة لحد الاندهاش لاشعار اهلنا الرائعين
ونستأذنك لنقل قصيدة انت شايقي لموقع السقاى

معاوية سلامات وكيف احوالك السقاى ديل اهلنا وعندنا فيهم لحمى انا اخوال ابوى من السقاى ناس محمد خير شنان وعلى سعد
واديك هدية مقطع من اجمل قصائد حميد الرجعة للبيت القديم


الرجعة للبيت القديم


أنا ماشي ...
راجِع ...
لي بِيُوت
تفتح لِي أدُقْ
أو
ما أدق
من غير تقول
الزول مِنُو
ولا حتَّى
علّ الداعي خِير
لا مالَك
الجابك شِنُو
لي بيوت بجِيهن
في أيِّ يوم
إن جيتا ليل
إن جيت دغُشْ
طوَّالي
أدفْر الباب
وأخُشْ
مرَّات أضِيق
قاصر الطريق
من بيت لبيت
وفي بيتنا
كُرْبُشْ
زي نسِيمة
معدي شِيمة
لا أُوش لاكُش
خابراني
كلُّوب الفريق
زولاً رفيق
الليل
وونّاس الدُغش
لاقطعت نوم
النائمين
لا الباري للحيشان
تقُش
عند شُوفتي
تجري على هِدم
في محلها
الشوق يترسم
تنجَهْني
حتَّان بالاسم
تندَهْني
عُقْبان تبتسم
بسمة بنيَّات ناس غُبش

محمد الكامل سلامات
اجمل ما فى الشعر الشياقى بعد حنيته الضاربة انه بيوصف ليك المنظر كأنو قدامك بكل التفاصيل الصغيرة شوف هنا وصف حميد لى حالة الشجن الاعترت السرة بت عوض الكريم بيجيك احساس انو السرة قاعدة فى العنقريب القدامك وانت بتشوف فيها لما شالت العود وشختت بيه فى الواطة وانها هى بتحكى ليك انت قصايد تقول فديو كليب
وهاك هدية السرة بت عوض الكريم لحميد



السرة بت عوض الكريم

جات داخلة .. زي مرقة غضب من جوف حليم .. في زمن صعب
رمت السلام .. زي شنطة من كتف المسافر .. بي تعب
زي رُدخة رب .. الله يا رب
قعدت على طرف الع(.........)يب المحازي الواطة ..
ضايرت التراب ، كسر العويش الفوقو .. شالت باصبعا وشختت شخيت
الله يا رب
عايننا فيها نكوس سبب .. للكفرنة وفورة الزهج .. من دروة البال الوهيط
ما عودتنا تدس عوج .. تكتم فرح .. زي حالة الزول البسيط
صنقعنا في قعدتنا .. راجعت الوشوش ..
دنقرنا عن رفعة وشيها المتعب الجاد الرحيم
الطيب السمح المعافى .. رهاب رهاب ينشاف وسيم
إنوهطت فوق الع(.........)يب القديم
من تاني ضايرت التراب ، كسر العويش الفوقو شالت باصبعا وشختت شخيت
وقالت : تصدقو آ ولادي بقيت
أبيت الليل أفكر في التميرات القدر فوق راسا ما خمّت صبيط
غلبا الجرورة الفوق ضهرنا تنزلا ..
تطلق وشينا مع الجماعة ..
شن دهانا دي كم سنين والحال وقف قطّ وحلف ما فيهو لو نقاط بسيط
كان بوشنا في حش التمور .. الليلي دوشنا مع اللقيط
أي لا حكت دي ولا بقت .. ما كنا قايلين في حياتنا يجينا أقسى من المضى
ساعة مروق الإنجليز قلنا الظلم فات وانقضى
تاريهو كمتر .. وقام دقون .. حلفا وعشر .. معيوقة نال
دمسيس ... ضريسا .... وشوك جمال
الله يا رب كربك كرب
عاولى التمور .. الواطة بور .. الناس حطب
بابور شهور غلبان يدور .. مافيش مطور .. ويجيك بعد ده علم طلب
الله يا رب العالمين
الما جحدنا نعمتو في الشوف والسمع راحة الولادة ولا قلوبنا قسن ولا غيرنا دين
في الجابو ما قصر حمد .. في الشالو ما قلنالو وين ماشيبو وين
عدلت نعال مقلوبة في الجيهة اليمين .. حدرت شمال
زمناً مو دا الحيكومة كانت بت حلال
بي حالا .. بي حرب الجنوب ..
بي قلة المال في الجيوب
كانت رخية العيشي .. إلا ترا العوين الكبرو .. كبرو مليسين
علمن يطير .. إن كان هو ما فدّر عوج ..
ما فادنا شيء ومحق القبيل لمينا هين .. في هين .. في هين
يا حليل رجالاً سكتن غدراً غشاهن بالقفا .. ولي الليلة سيفن في الجراب يهرج سنين
دا زمن قواسي .. زمن ضلالة .. اوانطجية .. زمن حقارة .... زمن مهين
لاقين هواكن ضروا .. ضر .. يا عسكرياً ما انتعظ .. كتل الرقاب بيودي وين
ضر .. يا جلاليباً رهاف .. ذمماً خفاف .. ضر يا ضرر .. ضر .. يا دقين
منصلبطين عرق النبي .. وبالنار بتلعبوا يا عوين
لي الحول قريب .. درب السلامة .. تخوجوا بي درب الحرب
غتي قلب واللا الحرب .. بقرة حلب .. والأرض صين
ما كان عمل .. ما كان دا دين
يا أرزقية تخمجوا دم .. والدم مو موية .. ومانا طين
منصلطين في الناس دحين .. لامن يجي اليوم الفصل والحق يبين
وين تمشوا وين تنسلوا .. وين
كان طال وكان قصر الزمان .. الحين بحين
كب يا رجالاً سكتن غدراً غشاهن بالقفا .. ولي الليلة سيفن في الجراب يهرج سنين
وإنأوهت .. وحسيت بأعماق الشوارع والتواريخ المجيدة إنأوهت .. وأدتني عين
صنت شويتين .. كوركت .. هيى يا بنيه وكتنا راح .. يا بت شمشنا إدهدهت ..
شوفيلي شافع ود فطين جاء من الطحين
الله فترنا من الطحين
وكان الوقت زالف عصر .. عين الشمش مشغوله بي دوشة سحاب
عرق المراكبية البعاد راحل مع ريحة التساب
ما تدري مارقي من البيوت الحلة .. واللا من التراب
الناس تقول مدقوقة طالعة على الحقاب
مفلوقة بي حجر الصعاب المرة .. نازلة على البحر مشروقة بي موية السراب
الفرة .. مشنوقة عقاب .. بالمرة من كتر العذاب
الحرة في طايوقه داب
يا المرة كيف بقت الرقاب مسيوقة بي قيد السلاب
منشرة من نشر الحجاب في عروقا .. وإشتد الخراب
من بعدما انبلج الفرج من ضيقا .. خدعوها بي حيلة كتاب
رفعوه فوق سن الحراب
ودهت الهزائم خلقتا
فالناس بدل عن نقتا
التلقى فكة ريقتا
وبدل القصور الفي خيال .. التبقى ماهلة كريقتا
وما جاتا راحة طلقتا .. إلا التعمر طلقتا
بي بندقيتاً حقتا .. بي ها الشوارع وبقتا
تنسدا منك دقتا .. ودم فلقتا .. ومر شرقتا .. ونار شنقتا
يا دقن دينك سرقتا
قطعت وضوها انشرقت .. مسحت وشيها إنشهقت
قال نست ما تاكت العوضة التحت .. عن مرقتا
دارت تقوم .. مسك الع(.........)يب الحنين طرقتا
رجفت بشيش عن نتقتا
رجفت بشيش من الغضب واللا التعب .. فتر السنين ..
واللا الكبر دا الما قدر يمسح سماحة خلقتا
زي نيتا البيضة الشعر .. وزي موج بحر كان الجبين
مديت يميني أساعدا ..
ردت يسارا تباعدا
وقالت لي : أبوي وفر ضراعك للبلد
وادخر مروتك آ ولد
لي يوم بحين
احفض كرامتك تحفضك .. الموت ولا العيش المهين
الموت نفاد الما نفد .. الموت حياة الميتين
أختاها جنة مع الفقر .. وادخل جحيم المتعبين
وإن ما قدرت على دا أبوي .. رب لك دقين
وصنت .. رب لك دقين
وضحكت .. حمدنا الله الحنون .. جيداً خلقنا بلا دقون
وضحكنا زين
ساقت حديثا .. على الخراب الشوفتو ما دايرالا عين عقب متاقانا الرياح
رفعت قران شوك الصنط .. ساسوية جاية من المراح ..
يا خيري ودي المستراح
والشوكة تحت الدوكة .. يا داك الركين
الشوك بمرق الشوك .. شوكاً فينا شين
مراقو رب العزة .. شعباً ما بيلين
الجاي حيكومتنا .. لكن الزمن دبوية .. داير النهمة .. وينكم يا الخزين
ما قلّ حاشى صبرنا .. لكن لا متين
دعكت عيونا وصنقعت .. كان الغيوم إنجمعت تقلت على الريح النصيح
كان المطور شو ترعت .. زي باكي فوق دم الحسين
لكن ده وين .. والتاني وين
وإنلوعت .. معقول في ناساً ما وعت لي الليلي بالم .. بين بين
وكيف وإنتو نوحنا من الدعت .. مومنا من جحر الدقون الكاكي يلدغ مرتين
والتالتة قرصة أبو الحصين
حسيت بأنها دمعت .. وشهقت عيونا الدمعتين
حسيت بأني متل حجر .. جدعوهو في نص البحر .. قام البحر بنى فوقو طين
حسيت بأعماق الشوارع .. التواريخ البعيدة إنأوهت .. وأدتني عين
الجاي حيكزمتنا .. كيف .. ومتين .. ووين ؟
ومرقت متل دخلة غضب .. صدر المسامح والحليم
في أيام عجاف
دي السرة بت عوض الكريم
مرة ما بتلاوز .. لا بتخاف .. زي الضفاف
الما بتهاب ضنب التماسيح والكلاب .. قومة البحر واللا الجفاف
مرة من قديم .. مرة بت قبائل .. قالوا لا .. وإختارو في الحق الجحيم
من رفقة الفسل الخلا .. وكانت نعم تدي النعيم
مرة من صميم ضهر الغلابة الما بتنكس راسا .. غير ساعة الصلا
أو ترمي تيراب في التراب .. أو تستشف وجه السديم
السرة بت عوض الكريم
ما فيها من عادة الحريم .. غير السماحة القدمت قدم الضهب حافضنو في حقاً قديم
في أقصي كيم
ما فيها من طبع الرجال .. غير الأيادي الخشنة زي قولة النصيحة وقت يكدب في الصميم
ساعة يكون الحكم ضيم
تسعين سنة .. ويا السرة بت عوض الكريم
بصرك بصير .. سمعك سميع .. نضمك نضيم
بالك محلو صبي وسليم
تسعين سنة .. عودك أمداً ما انحنى .. شامخ بلا البان القديم
تسعين سنة .. ومن فتنتك .. استغفر الله العظيم
جوك الرجال يا السرة بت عوض الكريم من وين وين
لا الكلو طين أغراك .. لا السمح الوسيم
آ السرة صددتي المشايخ والعمد .. مرسالا ليك ..
ضيعت بي أنفه البشارة عليهو ... كيف قلبك صمد يا بت قصاد المغريات ..
الجان يجن والهام يهيم
والبشروك بالجنة من فقرا البلد .. أسقوك بالغفلة المحايات .. ما نفع
رتباً كبار .. قلتيلا .. لا
شعراء ومغنين .. خت فيك دوداي غناهو .. ما شفع
الجان يجن والهام يهيم
والإنجليزي أسلم في شان خاطر هواك .. ساعة طلعتي تجيبي عود السيسبان
إتصيدك آ السرة بت عوض الكريم ... مرقنو كرعين الحصان
والجاكي ناط .. كتفتي بالليل في اللمين .. مع الفجر طلبك عفو وسترة
وعفيت وسترتي .. يا السرة القوية .. بقتلو توبة سوية من هتك العرض
يا بت ها كيف بعد الحسن .. ما تاورك قلبك على زول في ا
لأرض
ستين سنة ..
ويا بت بلا النيل وحدك واقفاها .. و النيل إنحنى
ستين سنة
ما جهجك فقد الحسن .. لا يفقهك فجع الجنا
فجع الجنا الويحيد تحت خيل ميجر السجم الرماد
الإنجليزي وقت مرورو على العباد
وجناكي ناش عين الحصان بالنبلة .. ناش طربوشو
قيح العسكري إنحم .. وحم بالسوط جناك في إطن المسيمح ما اتلفت
والهاشم الواقف وقع .. والدم هدر ..
وكان زي محمر في الكجر
بي إيدو قابض نبلتو .. وفي التانية غامت للحجر
صرخت صليحة وشكعت فوق قيحة .. كلْبينا الزرق ومن يوما داك ما شافتن
صيحة البطان قيح البقل .. نهمت غنا غضب البنات عن زفتن
فس .. يا كديس الإنجليز .. ###### الترك يطفر من الفارة وينيص
يا مكري .. صبرك .. يا رخيص
الفافنوس .. البوص .. لحاية الهردبيس
تمر البلد شال شيلا جد إلا الحصا تبل مارقة صيص
كوسلك بلد .. بلدك واباك .. رفسك رفيس
نفضك نفض .. بلدك تضادي .. ولا مغيث
قلبت عليك بطن الرجال .. شقيش تقبل .. يا إنسان رخيص
يا قيحة .. حظك في الحياة وفي الميتة مافي .. وموت تعيس
عفنت كرشتك دون ترب .. منفوخة للغربان فطيس
وفوق سكة الماظ الصعب .. هاشم - حلالي - قدل عريس
هيلة آ رجالاً عرستن .. شمش المشارق ليها ميس
هيلة آ رجال .. هتفت نفيسة وحرّقت توبا الوحيد
عقدت شديد .. قرقابا حافيي ودون قميص
جرت الكرارق زي برق .. لفحت من السحارة لي هاشم حريرة وقرمصيص
وكان الفريق إنخم ما فضل بشر ..
ما هزا زلزال الفجيعة المرة .. والدماع طفر
دايرات يولولن الحريم .. صنت وقت صوتك نهر
وكيفن زفتي وشيي ونعلت قفاهو .. شيخ الحلة عن قال لك قدر
ولميتي هاشمك ونبلتو .. وفي إيدو الحجر
صبغ الحريرة .. القرمصيص .. الدم ملاك ..
لميتي زي لمة ملاك ..
آخر عمل خير في البشر
جاك الصبر من وين .. ولا قلبك رجف .. لا آهة .. لا دمعاً طفر
رشرشتي بي إبريق أبو .. وبي دمو نبلتو والحجر
خيط الحريرة القرمصيص .. كفنتي بي رفت القماش ..
الساكوبيس الخاتا لي يوم الطهورة ..
مرقتي لاقوكي الرجال بين الغلب إنقلبو
ومتحزمين زي يوم أبو
دمع الرجال هزاكي
آه خارت قواكي
طفرت دموعك والحريم كسرن عليك
قلدوك رجالات الفريق فوقك ضي الشمش إتكا
وبعض المراضى المقرفين قلدوكي لي شي بلا البكا
وكانت دي أول مرة يتبكي في الفريق ..
وبي حرقة زي كل الرجال الخيرين ..
درفون ضرب بالنبلة طربوش إنجليز ..
عور حصان الإنجليز ..
لا انزح لا زاغ لا جرى
وكانت دي أول مرة شافع في الفريق بي حرقة .. ذي كل الرجال
الناس تشقلو ود لحد في مقبرة
سبلتي ما انقطع الدرب .. دفقتي بي قرعو الطشت .. فنيتي في البير النحاس
جا طشت جديد .. وقرع جديد .. ونحاس جديد .. وما انترو ناس
ناساً تقلب الدنيا.. لو لاقية راس
دور والمعاك ما انفرقو ..
وين وشك الصعب الصلب .. إن صر في الريح بعذقو
وإن صر في الموج غرقو
يا بت كضب ..
معروفة ما من قوة تحمي الفرح واللا الترح حين إندلاقو على القلب
لي دور حديث المنغلين ما إندل من فورتو وهبد
دماً صعد من ها الترب .. لا بد من ينزل مطر .. رحمة وسعد
ما بروح سراب .. هاشم نجمة الفنجرة .. نشهد على إنك ولد
طمنت بي فعلك بلد .. من إولها ولي آخرها
رجعت أبوك من القبر .. قصرت لسنات الكتر .. سكت خشم المسخرة
هزيت رجال جوغة غريق ..
بس كيف نضيق ضيقاً عميق
يبقى الحجر فلخة جبل .. والنبلة تصبح منجنيق
أو بندقية معمرة
ساق نخلة في الطين الطري نازف تشق المقبرة
وقصب التواريخ ينبري ودمك عمار المحبرة
نشهد على إنك ولد .. بركان جسارة وفنجرة
زي ما شهدنا على أبوك .. فرسان قبيلتك من ورا
ويا السرة بت عوض الكريم .. إنك مره
ولدك جدع ما بندبوا ..
حي في وليداتنا .. الدشر لعبن .. طعيم النوم أبو
ولدك بخيت .. ما دام رقد في صدر أبو
ولدك شفيعنا مع النبي .. ولدك يمين يكفينا كلنا مغفرة
وهنا دا الدرب .. حرة قلب.. صرة وشي
ولدك وعدنا بكل شي
وما في إيدنا حاجة نخسرا
يا السرة بت عوض الكريم ..
مع إنو كم سنوات ولا بحراً طمح .. لا سمانا كانت ممطرة
كان كل ما نحفر .. يلاقينا الترا
عن جينا لي دفن الترب .. حسينا كم ملك إندفن
جات غيمة من دون الوقت .. جات نسمة هبهبت الكفن
بي دمو نبلتو والحجر .. خيط الحريرة .. القرمصيص
دخرينا نام آ السرة .. في صدر الحسن
فاتونا بي قدم الصلاح .. سبقوك على جنة عدن
وسابوكي نخلة وسط رياح .. بين الزمن
لكن ضراعك هو الضراع .. على رغم أقداراً قسن
ماسكي الشباطين في الصراع .. لا بودة لا سوس لا وهن
تعبر قليبك زي شعاع .. ما غيرت لونو المحن
ضلك متل بالك وهيط ..
عبرت مراكبك بي شراع صبر إحتمالك كم محيط
ورونا في الزمن العبيط .. يا تربة .. يا كل الوطن
مافيش وسيط إلا الصراط المستقيم
السرة بت عوض الكريم
الله .. أيا مره من قديم
سلطان وعن ساعة الفزع مملوك نشيط
عادية زي قولة سلام .. حلوة لسان .. لكن إذا تغضب سليط
مره ما بتفرط في الزمن .. وفيها الزمن لحظاتو أبن
ساعة مروق الإنجليز .. ضبحت غنيماية اللبن
طلعت على ناس القبور ..
كشحت ورا طرف القبب عيشا المجودا للطيور ..
ومن زمزميتا والدموع .. رشت قبر هاشم عقب قبر الحسن
والباقي لي كل القبور
في توبا صرت هين من القبرين بعد ما انبركت ..
بركة عشق .. بركة شكر .. بركة وفا
غيبة الشمش جبرت خطاها على الرجوع .. والقلب من شوق ما اكتفى
ولسع في غيمة من الدموع تبراها لي طرف الفريق ..
شيلة نفس تطلع مطر .. ختة نفس تطفي الحريق
آ السرة يا دوب يندمل بين الضلوع جرحاً غريق
فاتو إنجليز فوق دمها .. وعين إنجليز
مبروك وحمديل السلامة يذكرك ليلة الحسن سار لك عريس
أو من ضراوتو يذكرك كتل المنيحيس التعيس
ناس تملا في الأزيار .. وناس في كل كيم واقدالا نار
ناس نازلة في الحيشان تقش ..
ناساً ترجع في المضى .. والجايي سودانية مش
السرة ليلها قلب نهار .. الواطة غبشة الناس غبش
والروح خدار من حلتها .. النوم فر طار
باكر دغش شدت على ضنب الحمار
حموها للميجر تخش
عقبت على بيتو العصر .. قصرت مع بتو الحديث
دهت المشايخ والعمد .. سفهت عمايل الإنجليز
ظلم الحكم ياهو الحكم .. كان من جوامع كان كنيس
يبرا السما .. وتبرا آمحمد سيدي .. ويبرا المسيح
ورجعت بلا الموية الروت .. حيضانها لي جدول فسيح
لي دور معلقة للبخور في بيتها عامر بالمديح
لي دور تزغرد ما انقرش يا السرة .. حسها كيف نصيح
لي دور مع الشاي والزلابية مع الضبيح ..
الجوكي بالخرفان سمان .. والجار له تور
لي دور كوبيقاتك تدور
ما قصر الطمباري .. جاك ملك الدليب
رحلت بروش الزاوية عندك في الفريق
آ السرة ما فضى عنقريب
آ السرة بينات الخلوق .. مراتاً الليل آ بحوق
لي دور علي كتف الفرح .. تتعب عيونك وتستريح
لي دور تكلك قاح تكية .. آ السرة دارك ماج ضريح
ويومين بعد سقت الخدار بي إيدا .. جيهت العقاب
قامت معاها تسع رجال .. بي نوبة فوق ضهر البخار
قالت عليها نذر قديم .. واقع عليها نذر عزيز
إن حية في الدنيا ونصيحي .. إن كان تشوف بي عينا فوت الإنجليز
إن كان تطق زغرودة في ضل العلم ..
خلوها تدخل للختم .. حرموها يكفيها الضريح
شوف عين تشوف الأزهري .. وبي ما يكون .. صح النذر .. ما راح وهم
دماعا رقرق في العيون .. عن ساعة المحجوب نضم
وإنشر عِن زروق بزم
ما كان تكون آ قيحي حي .. وأنا أفش مغستي وأصفي دم
من تاني يا رخم الوخم
ما دام حرتناها الأرض .. سندنا .. تيربنا .. بوغنا .. ومسحنا قمحنا .. هسع في وحم
هاشم ولا أسفاً عليك .. وعلي رفاقتك لا ندم
ما دام بقينا أسياد بلد .. ما فتو يوم أبداً قسم
والفوتك يا الإنجليز .. يعقب علي باقي السجم
آفاتن أولاد الحرام .. أكبر من آفات العجم
دي السرة بت عوض الكريم .. سرة عقاب
سرة تواصل بيننا بين رحم التراب
والجاية في الزمن الرحيم
مره من قديم
ما فيها علقنة الرجال .. ما فيها دلقنة الحريم
مره بت قبائل .. قالوا لا .. واختاروا في الحق الجحيم
ومن رفقة الفسل الخلا .. وكانت نعم تدي النعيم
مره من صميم ضهر الغلابة الما بتنكس راسا غير ساعة الصلا
أو ترمي تيراب في التراب .. أو تستشف وجه السديم
جات داخلي زي مرقة غضب من جوف حليم .. في زمن صعب
ومرقت متل دخلة غضب ..
يا السرة ليم ..
آ السرة ليم
آ السرة ليم

سلامات رغيم .
انبهار للنهايه بما افردته لنا .

ونكته ناس الهيئه الدبلماسي ...حلوه جدا .

اديك تحيه من اوسلي : لحمة امي الشايقيه المشلخه للوراء ...ختم وطابعه ظى ما بقولو

ومعاه غناوى حنية شاعرنا وودخالنا ود الحبيب .


واديك كمان تحيه من اراك ود ابراهيم : محل ما ـولد حبيب الراحل ابوى ابراهيم عليه رحمة الله وغفرانه.


وناس ود ابراهيم جدودى من ناحية حبوبتنا والدة المرحوم والدى ...ربنا يرحمهم ...تركو لنا ارثا انسانيا رائعا .

محاسن يا بت شيوخنا وبيك وعبرك تحيات اجلال واحترام للشيخ الزاهد والعالم المبجل رجل الاراك ود الفكى ابراهيم فهو رجل يكن له كل اهل المنطقة الكثير من الود والاحترام لانو رمز لينا فى بساطتنا وتواضعنا وفيهو الدين البشبهنا دين البساطة والرحمة والتواضع ما دين دقون الضلال

تحية .....يا سلام يا رغيم....كأنك تشاركني جرعة من حليب صافي او ماء زلال من سعن يداعبه الهواء برائحة الليمون والحناء والبرم...

نحن ناتج تلك البئية بتفاصيلها المتنوعة الذاخرة...الدفيق...السعن...اللداية...القراصة...نحن ابناء الترابلة....المنجل المغروس في ذاكرة التاريخ ...والشعار المرفوع للنماء...(والسواقي تدور ...لحن كالطنبور)...والغناء للحبيبة وللارض والانسان الباذخ ...المتوافق مع الاخرين...وافر الضراع...عالي الهمة...من زمان بعيد....يجود ويظل كذلك...(يبدو الغير علي ذاتهم ...يقسمو اللقمة بيناتهم ..حتي ان كان مصيرهم جوع)


يديك العافية

على محمد بشير سلامات لى ناس اب رنات والبنية العسولة ال فى الصورة دى باقى قريبتى

امير سلامات وشكرا على الطلة البهية

قصيدة اه يا غبش لى رائعنا حميد



آه يا غبش
ما عندي ليكم غير نغيم .. برجوه ينفض لي غبار زمن القسا .. الكتاحة
يهد عرجون نخل صبر الغلابة الطال ..
يحت يخرت .. تباريح الأسى الممدودة فوق نور الدغش
يا نورة آه ..
يحرد كنائسنا المسيح .. يعرش مدارسنا الصدى
ييبس يباس حلق العصافير الوديعة من البكا
إندردر الصوت البعيد أسيان تصر من دون صدى
ينكفرن الفجر الصبوح .. يحمي الزهيرات الندى
تختا الدراويش الضريح .. يسكن خلاوينا الجنون
يهجر جوامعنا الإله
يا نورة آه
تطرح غيوم الشوق تئن .. تشرق تموت خيل كلمة الحق التناهد في الشفاه
يعقر بسيمة الصح مع لوبي الجروف
تغرز ضريعات الحروف
ينشف مراح الأمسيات .. تتمطق الأرض المروق والأغنيات
اللي الشروق .. والأرض والحب والمطر
تضهب تتوه .. وكتين يضيع عرق الجباه الشم .. شمار في مرقة
آه يا نورة آه
من دربك التور نفس خيل الصبر .. فتر خطاوي الشوق وراه
يا نورة آه
ساعة الشموس الغر .. تهضلم تلحق الصح في المغارب
تدفر الضو الكهارب
وفي وشيك تدفر المدن الضبابية السرابية الكآبة
وحائط التيه والطشاشات فوق قفيك
يا أم عوارض .. مو دعاشة .. ماها شبورة وتقيف
جاي ليك يا نورة غيمة .. تملا ماعونك خريف
يملأ عينيك ويفضل .. يروي جواك العطاشة
مو دعاشة
يا مطر عز الحريق
يا مصابيح الطريق
يا المراكبية البتجبد من فك الموج الغريق
يا الجزاير النتحويبا .. لما إنشعوز بحرنا
يا المراسي النتحويبا .. لما إنشعوز بحرنا
يا نشوق روحنا ودمرنا
يا المحطات الحنينة القصرت مشوار سفرنا
يا ما شايلك بين حايم
أيوة شايلك بين حائم
في الأرض تكون قضية .. في السما الاحمر غمايم
بي برد نغما السلامي .. رطبت حلق الحمائم
طنبر النخل التبلدي .. راقص الأبنوس وصفق
لعبت الصقرية موجة
خلت النيل هاجلو هوجة
بشرت بالخير بلدنا .. شالت الشبال نسائم
جددت زلفي القديم .. أمشي بالماشيبو أقاوم
لا بتكبر راسي فورة .. لا بتصغرني الهزائم
جنس يا نورة ابن آدم حلمو في عالم مسالم
لا الليالي الماها ليا .. لا الشماتات العليّ
لا البنوك المخملية
لا تفاهات الحضارة ..
لا عفاريت المدينة .. لا العمارات السوامق .. فوق ضهر ناساً فقارى
لا الهتاف الفاوة ضارى
غطى بالي من الفوارق .. لا الألوف الطمطمية
لا البرندات الوسيمة .. ولا الأسامي الأجنبية
بتمحى من عيني ملامحك .. وإنتي جاية المغربية
جاي دايخي المغربية ..
وشك المقبول مكندك .. سامسونايتك زمزية
كونشبر .. مرزبة مقطع
ريشة فانوساً مدردح
قلت بيهن لي زمانك .. يا زمان الحجة عندك
يا زمان الآفة حدك .. لا تطا الوردة الصبية
يا نفس فجر القصائد .. يا بلادي
القطع قلب الروادي
باللواج الجاي وغادي
ده ما هو صوتك .. لاها صورتك
دي بترقش ناديي فوق صدر الجرائد .. ماها صورتك
لا هو صوتك .. لاها صورتك
إنتي يا الفي إطن الصحارى
شفع العرب الفتارى
البفنو الشايلا إيدن .. ويجرو كابسين القطارة
يجرو باريين القطارة
لا سراب الصحراء موية .. لا حجار سلوم موائد
إنتي في الغابة اليصارع .. جوفو للآهات تلكي
يا مدفق غيم رجاهو .. لكن الأيام كركي
في خلا حالنا اليمحن .. ويملأ بالسهد الوسائد
إنتي غيمة .. شديرة .. خيمة .. إنتي جاهنا ..
والتقا الطلقت وشينا .. فرقت غمة جباهنا
فرجت في الحارة ضيقنا
فرحت شفع فريقنا
والمواعيد الحزينة .. وإتجاهنا
يا النغيم البقّ فينا .. وشدّ لي وتر إنتباهنا
يا تباشير يا بشارة
إنتي يا ضرعاً تكرمش .. شان يرضعني الجسارة
إنتي في منفاي رفيقة .. وفي حشا الأشواق حرارة
يا هدى الناس الحيارى
يا ندى الفجر اليبلل صور عوينات الفقارى
جاي ليك .. آه جاي ليك .. يا نورة آفة
آفة للسوس الجا ينقر .. عود عشيماً داخرو فيك
وأصلي لمن أدور أجيك .. لا بتعجزني المسافة
لا بقيف بيناتنا عارض .. لا الظروف تمسك في إيدي
ولا من الأيام مخافة
يا نفس فجر القصائد .. ما ضهب في بعدي عنك
واصلي متغرب عشانك .. راضي بالبيجيني منك
ما بكيت شح الليالي
لا شكيت نُح .. شلتو حالي
رغم إنو الحال بيفسخ .. إلا كُت في الحارة بنده
يا وطن عز الشدائد

معاك يا قريبي خطوة خطوة
يا ريت تبدأ شاعر شاعر وتدخل على التاني
يعني حسن الدابي مثلا وانت ماشي لي محمد سعيد دفع الله لي السر عثمان وحميد

سلام وتحيةولاثراء البوست اهديكم مقطعين من شعر الشمال
_




سبيبن ديمة بالحزم الكبار مبهول مردم
فوق قفاهن وا حلالي
صدورن طامحة زي موية الدميرة
الهايجة تكشح في العوالي
عيونن واسعة تبلع مية
زي ولدك تشرك للموحد والضلالي
وساعة اقيف قدامن
انكس راسي بقدري وجلالي
مشيهن سوه زي سرب الغزال
لكن نفورن ماغزالي

عدادن مابخبرو
الا وين ما امشي الاقاهن قبالي
وقصاصن ماب يفرق بين دريبن
وبين دريبات القماري
بخورن في سماء البندر
يدوخ عشرة زي ولدك متل مسك العشاري
رقيصن ينهزنو بلا الفلو
اللماتو غابن منو في ضل الضهاري

د. محمد بادي

_________________________-

رقابن
وين رقاب الريل
على الحدب البعيد
شرفن
على هوهيو كلابى

وعودن يمه
متل الخيدران
فدعوهو
لى وجعى وعذابى

لونن يمه
زى لون القمح
ضروهو
شوف
ضرانى كيف
الله بيضاريك
يا الضرضر صوابى

مهورن
غالى
مابقدر عليهن
وحاتك انت
مابقدر عليهن

كمان شوفى
المصيبه
نفيستى فيهن
منو البيقدر
يمد ايديهو
لكيس المرابى
____________-
اسماعين حسن

طارق عديلة نبدا بحميد لانو تعابيرو اكتر ادهاشا وغارقة شديد فى لهجتنا المحلية

****************
عبد البديع شكرا على القصيدة الجميلة

سلام من كورتي وجواري سلام

الاخ / رغيم بوست جميل جداً

وتحية وسلام لكل اهلي الشايقية

وتحية وسلام لكل الاخوان المتداخلين

ومعاك في هذا البوست وما طالعين من هنا



أبو كريم