Post: #1
Title: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: AMNA MUKHTAR
Date: 05-28-2011, 09:47 AM
الانتفاضة فى السودان صارت عسيرة ..فالمواطنين هدهم الفقر والحر والعطش ..
اذا بدلا عن ان ننتظر انتفاضة الداخل ..
لماذا لا ينتفض السودانيون فى الخارج ضد ممثلى المؤتمر الوطنى ويحاصروا سفاراته ؟
كل شعوب المنطقة الان تفعل ذلك ، فما الذى يمنعنا نحن ؟
الى الأمام ..زنقة زنقة .
|
Post: #3
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: tmbis
Date: 05-28-2011, 09:59 AM
Parent: #1
انا اديك فكرة بدل الكلام العاضي حقك دا :
..
إنت في المكان القاعده فوقو دا .. رايك شنو .. تمشي اقرب سفارة يا اقرب قنصلية .. وتشيلي معاك اسطوانة غاز
وبق .. بق .. تولعي في نفسك زي الزول بتاع تونس داك ..
يللا تجي تراجي تجيب لينا الخبر.. علي هذه الشاكلة :
سجمي وووووب علي .. ألمناضلة امونـة بقــت ..
يللا بعداك كان الثورة اشتعلت .. ليك علي بسميها ثورة الشك .. يا ثورة آمنة اسطوانة..
وليك علي انا اول واحد بطلع من المنبر بتاع سودانيزاونلاين .. واحرق ليك ناس الأمير الكوشي .. وابو باب بمبي .. وابو حروف كبيرة ..
قال ايه .. السودانيون لماذا لا يحاصرون ..
إنت جادة ..؟
|
Post: #6
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: محمد عبد الماجد الصايم
Date: 05-28-2011, 10:04 AM
Parent: #3
| Quote: سجمي وووووب علي .. ألمناضلة امونـة بقــت .. |
خبر السواد!!
|
Post: #4
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: العوض المسلمي
Date: 05-28-2011, 10:01 AM
Parent: #1
| Quote: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟ |
كدي في الأول خلينا نتفق إنو السفارات دي هي في الأساس سفارات جمهورية السودان بغض النظر عن من يحكمه ..!
أما عن سؤالكة فهوغير مبرر لأسباب كتيرة منها أن الكثير من إخواننا بالخارج هم مؤيدون للنظام .. والبقية الباقية تشغلهم معايشهم عن محاصرة سفاراتهم !!!؟
والحاجة المهمة جداً والكل الناس بتعرفها إنو سفاراتنا بالخارج وطاقمها العامل تربطها علاقات وطيدة جداً بالجاليات المقيمة في تلك البقاع ..
عليه أري أن دعوتك لا تبرح هذا المكان قيد أنملة .. فلو كانت دعوتك موجهة الي رفع مذكرة للفت نظرهم لشئ محدد لكان أجدي وأنفع ..
تحياتي .
|
Post: #15
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: محمد عبد الماجد الصايم
Date: 05-28-2011, 11:30 AM
Parent: #13
| Quote: يا ود الصايم مش قلنا ليك غير الصورة البتحنن دى .. |
دي تعليمات ولّ طلبات .. عشان نعرف نتصرف وكـدا؟
|
Post: #7
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: adil amin
Date: 05-28-2011, 10:15 AM
Parent: #4
Quote: قال ايه .. السودانيون لماذا لا يحاصرون ..
إنت جادة ..؟ |
المبنج تمبس بتاع المريخ
سلم وليك وحشة...
اقتراحك ده موضة قديمة
انظر حولك عدة الفصل السابع والمحكمة الجنائية جنبك في لبييا
واوكامبو وصل الدوحة
بعد ده حقو الانقاذ تتقشف وتبيع طائرة الرآسة مش كده!!!
يظهر جرعة المورفين الانقاذي ارتفعت عندك شوية
بعد 9/7/2011
ما القاك في البورد.....
الاخت امنة مختار
تحية طيبة
ازمة السودانيين في الخارج وخاصة الذين يعيشون في مستويات جيدة من اكاديميين وفي دول مؤثرة...يعيشون في نرجسية من نوع خاص..يعني لا عندوا مشروع يقدمو ولا يحترم مشاريع الاخرين.. ولا شغال بالسودان ولا السودانيين يعني سقط متاع خمس نجوم
لا يتعظون من اخطاءهم ولا يتسفيدون من تجارب الاخرين..وعايزين الشعب المحطم يصادم ليهم الانقاذ ويجو عشان يعيدوا مسلسل النخبة السودانية وادمان الفشل
النائب والسنتور اللبناني معلوف قال نحن شكلنا لوبي لبناني في ادارة بوش تمكنا من طرد السوريين من لبنان
....
وهسه خدمة البث المباشر المهمة حيكون ضيفها نافع علي نافع
يعني هيمنة اعلامية بره وجوة.....وذى ناس تمبس ديل ذلك مبلغهم من العلم
|
Post: #8
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: adil amin
Date: 05-28-2011, 10:22 AM
Parent: #7
الاخت امنة مختار
تحية طيبة
هسه ذى ندوة دالي المهمة في واشنطن ما شفنها في فضائية الحرة او اي ميديا مؤثرة
ولا يوجد في الحرة اصلا برنامج خاص بالسودان رعم ان هذه الفضائية صنعت خصيصا لنشر الديموقراطية في الشرق الاوسط)
السودان يعاني من ازمة وعي (تمبس نموذجا)
وانا بشعر بالرثاء لمن اشوف اطروحات الدول التي تحت التغيير وقوتها برهان غليون(سوريا) واشوف اطروحات السودانيين حتى على مستوى هذا البورد
فعلا
شعب عملاق يتقدمه الاقزام
|
Post: #9
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: tmbis
Date: 05-28-2011, 10:24 AM
Parent: #7
Quote: المبنج تمبس بتاع المريخ
سلم وليك وحشة...
..... وذى ناس تمبس ديل ذلك مبلغهم من العلم |
.. Quote: انظر حولك عدة الفصل السابع والمحكمة الجنائية جنبك في لبييا
واوكامبو وصل الدوحة |
.. Quote: يظهر جرعة المورفين الانقاذي ارتفعت عندك شوية
بعد 9/7/2011
ما القاك في البورد..... |
يا امونـة .. معليش .. انا قبيل قلت ليك .. بقي بصحنك فاصبحينا ..
لكن لقيت ليك خيار تاني ..
صاحبنا بتاع فرانسيس دينق والاستنارة .. وإلخ دا .. أحسن واحد ممكن يولع ليك .. انا بدردقو ليك من هنا وإنت جهزي المنقد حقك والحطب والكيروسين .. والله زي دا كمان ببق جنس بقـه ..
..
لوووك .. لوووك .. لوووك .. كلام سااااي .. الواحد فيكم يدخل البورد دا وزنو خمسة وتسعين كيلو .. بوست واحد يبرينا ويبري العباد ويبري نفسو ويطلع بي طلطاشر كيلو جلافيط .. ضف لذلك عضام الجمجمة ..
والله يا عادل لمبـه ليك وحشة شديدة جدا ..
حسع يعني بعد يوم تسعة سبعة .. ح نشوفك متبين في مدينة واو .. وعندك حيران دينكا هناك .. وعندك بهايم في ضهر بيتك ؟؟
غايتو الله يحيينا بس .. النشوف استنارتكم دي موديانا ووين ..؟
|
Post: #11
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: adil amin
Date: 05-28-2011, 10:40 AM
Parent: #9
Quote: لوووك .. لوووك .. لوووك .. كلام سااااي .. الواحد فيكم يدخل البورد دا وزنو خمسة وتسعين كيلو .. بوست واحد يبرينا ويبري العباد ويبري نفسو ويطلع بي طلطاشر كيلو جلافيط .. ضف لذلك عضام الجمجمة ..
|
تمبس
سلام
هذا اثر الانقاذ في الكائنات الحية..بتحلج الجينات الكوشية للكائن السوداني وتجعله يملا دماغه بكل ما هو مبتذل..عليك الله انت ما بتحس بالعار لمجرد انتماءك للمؤتمر الوطني؟؟ ومخازيه اليومية الاتبرا منها حتى الاخوان المسلمين الاصليين(الغنوشي).... والبورد ساحة تشبه الخرطوم زمان في حتات عشش فلاتة وفي حتات انغولا وفي حتات حوش بانقا الجديدة..شعبيتك الزائفة في سودانيز اون لاين دي ما تغشك ساكت...امشي شارك في منتديات غير سودانية واتبين لينا هناك..عشان نشوف الدر النفيس بتاعك ده
ذهب المضطر نحاس
وقاضيكم بمقعده المسروق يقضي بين الناس
بعد 9 /7 تلقاني بادي في الاعراب اسال عن احوالكم
ترونه بعيدا ونراه قريبا
بعدين امنة مختار
عندها مشروع ومحترم جدا وبتقدموا في البورد ده وهي زيها زي اي سوداني من حقها ان تؤثر وتسهم في التغيير نحو الافضل...وذى كل الدنيا التي تتغير من حولنا يا مغييب...
انت عندك شنو؟
قاعد معاك هنا سنين ما طلعت منك بجملة مفيدة واحدة تدل على انك بتفهم في السياسة...
حارس لينا ودا وسواعا ويغوثا ويعوقا ونسرا ديل
|
Post: #21
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: tmbis
Date: 05-28-2011, 01:41 PM
Parent: #11
| Quote: عليك الله انت ما بتحس بالعار لمجرد انتماءك للمؤتمر الوطني؟؟ ومخازيه اليومية الاتبرا منها حتى الاخوان المسلمين الاصليين(الغنوشي)... |
والله يا لمبــة، من اهم انجارات الانقاذ دي .. إنو طلعت لينا ناس نضامين ساااي ..
الواحد يشبكك الاستنارة .. والله الخلقني .. وهو قاعد ساااي قرعوبه بس ما عندو اي حاجة للشعب .. ومغيب عن الشعب
اتبرا منها شنو .؟
حسع كان اتبرا قدر الكتبتوهو دا والله كان قامت سبعطاشر ثورة .. بعد الثورة الكم وتلتين بالوادي ..
العار الذي احسه الآن الآن .. إنو واحد مسكين زيك كدا .. كل يوم مالينا فقر .. الكيزان .. الاسلام السياسي .. الله الخلقني ..
وآخـر حاجة عايز يحرق نفسو قدام اي قنصلية يا ممثلية .. ويجيك يقوليك انتو شعب مغييب ..
ناس الثورات ماتو تحت الدبابات .. وواحدين حرقو نفسم بالنار ..
إنت شابكني تحس بالعار يا كوز ..؟
اتحداك امشي احرق نفسك .. شوف كان ما انقلبتا ليك جمهوري انا ما اكون تمبس
ياخ هخو واحد بيروح قدام قصر الشباب ويجيبوهو في نشرة الساعة تسعة بالليل خرج ولم يعد واوصافه كالاتي .. عايز يجي يعمل لينا ثورة ..؟
Quote: بعدين امنة مختار
عندها مشروع ومحترم جدا وبتقدموا في البورد ده وهي زيها زي اي سوداني من حقها ان تؤثر وتسهم في التغيير نحو الافضل...وذى كل الدنيا التي تتغير من حولنا يا مغييب...
انت عندك شنو؟ |
انا ما عندي الحبه دي ..
وعشان كدا قلنا لي آمنة تسوقك وتمشو الاتنين كدا تلهلبو لينا قدام برلمان عشان تلهبو الشعب معاكم
إنت مالك .. بتخاف من النار .. واللا كلامك كلامك خشم سااي .؟
|
Post: #12
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: أمير فتحي
Date: 05-28-2011, 10:43 AM
Parent: #9
آمنه مختار
إستشاره ثوريه مجانية :
دي المرحلة الخامسة من عمر الثورات الناجحه وتأثيرها واحد في الميه على النظام
وأسوأ إحتمال إنو الجماعة الحيعملو كدا حييفقدو إقاماتهم ويرحلو من أمن السفارات في تلك المنافي
إنتي دايره تورطي الناس دي ولا شنو ؟
|
Post: #10
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: Abdullah Idrees
Date: 05-28-2011, 10:37 AM
Parent: #7
Quote:
ازمة السودانيين في الخارج وخاصة الذين يعيشون في مستويات جيدة من اكاديميين وفي دول مؤثرة...يعيشون في نرجسية من نوع خاص..يعني لا عندوا مشروع يقدمو ولا يحترم مشاريع الاخرين.. ولا شغال بالسودان ولا السودانيين يعني سقط متاع خمس نجوم
لا يتعظون من اخطاءهم ولا يتسفيدون من تجارب الاخرين..وعايزين الشعب المحطم يصادم ليهم الانقاذ ويجو عشان يعيدوا مسلسل النخبة السودانية وادمان الفشل
|
كلام صحيح مية المية ... مين بعرف دالي اسي في السودان ؟؟؟ لا اعتقد عدا الجمهوريين وقدامى خريجيي جامة الخرطوم ان بقي منهم احد في السودان ..
تحياتي جميعا
|
Post: #14
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: AMNA MUKHTAR
Date: 05-28-2011, 11:26 AM
Parent: #10
| Quote: إنت في المكان القاعده فوقو دا .. رايك شنو .. تمشي اقرب سفارة يا اقرب قنصلية |
انت عارفنى انا هسه قاعدة وين ..؟
يمكن فوق راسك المقوس دا .
|
Post: #17
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: قاسم المهداوى
Date: 05-28-2011, 11:37 AM
Parent: #14
سلااام يا امونة
نحن غايتو بدينا مستمرين فى الاحتجاج
قاسم
|
Post: #16
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: Mohammed Awad
Date: 05-28-2011, 11:36 AM
Parent: #10
يا امولة والله أنا شايف كلام تمبس دا معقول جدا
خصوصا للأطفال اللي في سن حضرتك طبعا
ليك علي اقلب ليك الحكومة دي من الداخل اول ماتنجزي
وماتنسي بالله الوصية حقتك عشان سارقي الثورات ديل مامضمونين
تجيك تراجي تعمل فيها وريثة الحكم وتقوم تضبح لينا الكديسة بعيد عنك
-------------
والله ياتمبس اتلومت
جمجمة شنو يا عمك؟ الناس ديل عرفنا ليهم قعر
لكن راس دا مالاقانا....باقي ليك ينفع باسم؟
|
Post: #19
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: AMNA MUKHTAR
Date: 05-28-2011, 11:50 AM
Parent: #16
Quote: كدي في الأول خلينا نتفق إنو السفارات دي هي في الأساس سفارات جمهورية السودان بغض النظر عن من يحكمه ..!
أما عن سؤالكة فهوغير مبرر لأسباب كتيرة منها أن الكثير من إخواننا بالخارج هم مؤيدون للنظام .. والبقية الباقية تشغلهم معايشهم عن محاصرة سفاراتهم !!!؟
والحاجة المهمة جداً والكل الناس بتعرفها إنو سفاراتنا بالخارج وطاقمها العامل تربطها علاقات وطيدة جداً بالجاليات المقيمة في تلك البقاع ..
عليه أري أن دعوتك لا تبرح هذا المكان قيد أنملة .. فلو كانت دعوتك موجهة الي رفع مذكرة للفت نظرهم لشئ محدد لكان أجدي وأنفع ..
تحياتي . |
نعم هى سفارات جمهورية السودان المستولى عليها بوضع اليد ..
من قبل مافيا المؤتمر الما وطنى ...
.اللا نحن جبناهم ولا اخترناهم .
قلت لى كثير من اخواننا بالخارج مؤيدون للنظام ..؟
أمال الناس الطفشوا من البلد كلللهم ديل راحو وين ؟!؟
وعلاقات شنو البتربط طاقم سفاراتكم بالخارج مع الجاليات السودانية غير التجسس والتحسس..
سفاراتكم من يومها غير خدمية ، ومهمتها الأساسية التربص بالمهاجرين والمغتربين ..
وما أدراك ان دعوتى هذه لن تبرح هذا المكان قيد أنملة ولاقيد نملة,,
الناس اساسا بدت تطلع ..وتخطط لمحاصرة السفارات قبل بوستى ده..
وما هذا البوست الا ( تحية ) لهذه الحراكات البدأت أصلا..ومستمرة ...وحا تستمر ..
|
Post: #20
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: AMNA MUKHTAR
Date: 05-28-2011, 12:01 PM
Parent: #19
Quote: ازمة السودانيين في الخارج وخاصة الذين يعيشون في مستويات جيدة من اكاديميين وفي دول مؤثرة...يعيشون في نرجسية من نوع خاص..يعني لا عندوا مشروع يقدمو ولا يحترم مشاريع الاخرين.. ولا شغال بالسودان ولا السودانيين يعني سقط متاع خمس نجوم
لا يتعظون من اخطاءهم ولا يتسفيدون من تجارب الاخرين..وعايزين الشعب المحطم يصادم ليهم الانقاذ ويجو عشان يعيدوا مسلسل النخبة السودانية وادمان الفشل |
أخى العزيز عادل أمين ..
يعنى قصدك لا بطقعوا لا بجيبو الحجار ..
بس الناس ديل ما كلهم كدا ..بالتأكيد فى بعضهم قدم اسهامات كثيرة ، اطلعنا على بعضها فى هذا البورد..
بس مشكلتنا انو نحنا أهملنا فعلا الفضائيات ، والفضائيات صار لها دور عظيم فى دعم الثورات وتغطيتها .
ولكن صحى كلامك البقارن نشاطنا بنشاط الأخوة العرب ، بالذات السوريين شغالين شغل نضيف ومؤسس وغاية فى الذكاء ..
متابعة نشاطهم لأن لى علاقات مع بعضهم ، حقيقة ناس فى غاية التصميم ويجيدون التخطيط والمناورة ، رغم محاصرة النظام الرهيبة لهم .
|
Post: #22
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: tmbis
Date: 05-28-2011, 01:57 PM
Parent: #20
Quote: انت عارفنى انا هسه قاعدة وين ..؟
يمكن فوق راسك المقوس دا . |
قاعده ووين يعني في جزيرة سرنديب ..؟
مكانك دا لو ما فيهو سفارات فيهو قنصليات .. لو ما فيهو قنصليات .. شوفي ليك اي طرمبة بنزين يا صينية بتاعت حركة لمي ليك خمسة ستة تنفار .. واحرقي نفسك .. دي دايره ليها طنظير كمان بي راسك الفاضي دا ..؟
Quote: ولكن صحى كلامك البقارن نشاطنا بنشاط الأخوة العرب ، بالذات السوريين شغالين شغل نضيف ومؤسس وغاية فى الذكاء ..
|
.. خلاص عليك الله إنت وتراجي وعادل لمبة دا .. اشتغلو لينا شغل نضيف .. خلو الفلسفه بتاعتكم دي .. وادونا النجيضة ..
واحد يجي يشبكك امشي مركز منو كدا ما عارف للاستنارة ..
والتانية تجي تشبكك الثورات العربية ..
حسع بقيتو في الاشقاء العــرب .. ما من زمان شابكننا افارقه وهردبيس بتاع كلام ..
..
بعدين تعالي هنا دا .. حسع ما ياهم المصريين والتوانسة .. العملوهو في نفسهم خاذوق ما يطلع تاني ..
|
Post: #23
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: محمد على حسن
Date: 05-28-2011, 02:44 PM
Parent: #22
تمبس عشان تمتع روحك اقرا القصة دي
إنتهازي تائب ... قصة قصيرة جداً
الاستاذة امنة والضيوف
المعذرة بالرغم من ان المداخلة لها علاقة بموضوع البوست ولو بصورة غير مباشرة
|
Post: #24
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: العوض المسلمي
Date: 05-28-2011, 04:29 PM
Parent: #23
Quote: وما أدراك ان دعوتى هذه لن تبرح هذا المكان قيد أنملة ولاقيد نملة,,
الناس اساسا بدت تطلع ..وتخطط لمحاصرة السفارات قبل بوستى ده..
|
لو عايزة تعرفي ما أدراني ممكن تعملي بحث في قوقل عن ثورة 30 يناير والثورات التي أُعلن عنها بعدها ..!
مشكلتك يا أمنة عايشة في عالم حقك براك وبتتخيلي حاجات وبتصدقيها .. وهكذا الخ
وعشان أثبت ليك صحة كلامي دا .. أها وريني ياتو سفارة مُحاصرة لحدي ما حضرتك جيتي تحيهم بهذا البوست ؟؟!
وحتي تفسير عادل أمين الذي ربطه لك بالنرجسية وإنهم ماعندهم حاجة يقدموها ( السودانيين بالخارج )
هو زي كلامي الفوق دا بس هو جابو ليك ملفوف وعليهو حبة كاتشب ومايونيز وأنا قدمتو ليك حاف ولا يخلو من الشطة :)
المهم ..
الكثير من أخواننا بالخارج يتمنون للوطن التقدم والإذدهار ويدعون الله أن يحفظه من الفتن ما ظهر منها وما بطن ..
مش زي حالتك إنتي ومن لف لفك تتمنون أن يصبح البلد أكواماً من الرماد .!!
تحياتي
|
Post: #25
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: بدر الدين اسحاق احمد
Date: 05-28-2011, 08:06 PM
Parent: #24
كدا فى الاول نشوف سياسة بسمارك الخارجية بعد داك نرجع الى سياسة بسمارك الداخليــة
....
دا الاستنارة بلمبــة الرتينــة ...
|
Post: #26
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: ود الباوقة
Date: 05-28-2011, 08:14 PM
Parent: #25
| Quote: وبق .. بق .. تولعي في نفسك زي الزول بتاع تونس داك .. |
والله يا تامبا بتبالغ
تقول ليك محاصرة السفارات تقول ليها احرقي نفسك
حتى محاصرة السفارات تحث فيها السودانيين وهي قاعدة تتفرج
شفت النضال دا كيف
نضال 7 نجوم
غايتو الله يصبرنا عليكم بس
|
Post: #27
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: ناصر البطل
Date: 05-28-2011, 08:44 PM
Parent: #1
اقتراح ظريف و الله
او
حاجه قيافه و كده
رايك شنو طيب نكون عمليين؟
أنا و انتى بكره الصباح الساعة 9 صباحا نتلاقي قدام السفاره السودانية
او انتى اتقدمى كنموزج و ان بلحقك بعد ما أقضى اقراضي؟
|
Post: #28
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالبوا باسقاط النظام ؟
Author: adil amin
Date: 05-29-2011, 09:59 AM
Parent: #27
تمبس شباب عزة الانقاذ المغييب...انت مش التعلمجية في معسكرات الدفاع الشعبي بقولو ليكم جكو والجلالة( انا الطيرة الجات جديدة)
وانت مالك ما بقيت ذى وائل غنيم قاعد ذى قلتك لي ما عملت صفحة فيس بوك...تضامنا مع ام ###### اشهر ست عرقي في ام درمان الكشتا شريعة قدوقدو
وليه ما حركت شباب المؤتمر الوطني عشان يصححوا مسار حزب المؤتمر الوطني حزب الموقوذة والنطيحة والمتردية وما اكل السبع عجايز وصلوا ارزل العمر لكي لا يعلمو من بعد علم شيئا ويمارسوا في الفساد والاستبداد
....
بعدين رغم جهلك النشط ما مواكب
مرحلة الحرق البنار قديمة
قلت ليك للمرة المليون ركز معاي شوية
الانقاذ الدنا عذابها يقلوعها الخواجات...
المرحلة الحالية مرحلة القذافي دي مرحلة الفصل السابع وحلف والنيتو والمحكمة الجنائية الدولية وصلت الدوحة...عشان ما تمشو تزعجو شيخ حمد تاني ...
واحسن تبيعو طائرة الراسة تقشفا مع الاستغناء عن المستشارين وولاية شمال دار فور
بعدين يا فرحان نحن ما منتظرين سقوط الكيزان ولكن منتظرين ميلاد دولةالسودان الحقيقية في الجنوب...
بعدين يا مبنج بعد 9/7/ حينهض طائر الفينيق من الجنوب....وتزبل دولة ضنب العرب في الشمال التي تبعت النموذج المصري الفاشل وحيفضل في حزب المؤتمر بس انت والبشير وخاله ونافع (طربيزة وست جيدة)
ونحن برنامجنا ببدا بعد نهاية الفكر ذى الابعار ودين شيخ عار يمارس التنويم بالتناوب...ما مستعجلين ابدا ...
وانت يا تمبس حنختك في متحف التاريخ الطبيعي وندق يافطة(كائن انقاذي منقرض 1989-2011 ق.م)
انت اكيد ما سمعت بفنان رائع اسمو ابو عركي البخيت واغنية العمل(كل زول بحمل رسالة امينة صادقة بعيد مداها التاريخ بيحسب كل خطواته المشاها)
والناس البغيبم الواقع بنصفهم التاريخ مات ماركس في القرن 19 وافكاره سادت القرن العشرين وكذلك سيكون امر جون قرنق ومحمود محمد طه
وارشيف البورد ده كمان
في ناس حيستجلوا متسكعين ساكت زيك كده
وناس ااصحاب مشاريع ذى امنة مختار(حزب الخضر)
والاحزاب الفي السودان القديم دي ماخلقا الله ذى نهر النيل...صنعوها ناس وافكار ومشاريع...والتغيير قادم اما تتغير او تنقرض
والمرحلة ليس الصراع من اجل البقاء الباهظ التكاليف في السلطة ولكن المرحلة مرحلة الخروج الامن منها وانا ما شايف ناسك ديل من انصار الخروج الامن...لذلك سيخرجون خروج مذل تمشي به الركبان وبيني وبينك الزمن
|
Post: #30
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالب
Author: AMNA MUKHTAR
Date: 05-31-2011, 09:20 PM
Parent: #29
Quote: الاخت امنة مختار
تحية طيبة
هسه ذى ندوة دالي المهمة في واشنطن ما شفنها في فضائية الحرة او اي ميديا مؤثرة
ولا يوجد في الحرة اصلا برنامج خاص بالسودان رعم ان هذه الفضائية صنعت خصيصا لنشر الديموقراطية في الشرق الاوسط)
السودان يعاني من ازمة وعي (تمبس نموذجا)
وانا بشعر بالرثاء لمن اشوف اطروحات الدول التي تحت التغيير وقوتها برهان غليون(سوريا) واشوف اطروحات السودانيين حتى على مستوى هذا البورد
فعلا
شعب عملاق يتقدمه الاقزام |
|
Post: #32
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالب
Author: AMNA MUKHTAR
Date: 06-02-2011, 01:58 PM
Parent: #31
Quote: هذا اثر الانقاذ في الكائنات الحية..بتحلج الجينات الكوشية للكائن السوداني وتجعله يملا دماغه بكل ما هو مبتذل..عليك الله انت ما بتحس بالعار لمجرد انتماءك للمؤتمر الوطني؟؟ ومخازيه اليومية الاتبرا منها حتى الاخوان المسلمين الاصليين(الغنوشي).... والبورد ساحة تشبه الخرطوم زمان في حتات عشش فلاتة وفي حتات انغولا وفي حتات حوش بانقا الجديدة..شعبيتك الزائفة في سودانيز اون لاين دي ما تغشك ساكت...امشي شارك في منتديات غير سودانية واتبين لينا هناك..عشان نشوف الدر النفيس بتاعك ده
ذهب المضطر نحاس
وقاضيكم بمقعده المسروق يقضي بين الناس
بعد 9 /7 تلقاني بادي في الاعراب اسال عن احوالكم
ترونه بعيدا ونراه قريبا
بعدين امنة مختار
عندها مشروع ومحترم جدا وبتقدموا في البورد ده وهي زيها زي اي سوداني من حقها ان تؤثر وتسهم في التغيير نحو الافضل...وذى كل الدنيا التي تتغير من حولنا يا مغييب...
انت عندك شنو؟
قاعد معاك هنا سنين ما طلعت منك بجملة مفيدة واحدة تدل على انك بتفهم في السياسة...
حارس لينا ودا وسواعا ويغوثا ويعوقا ونسرا ديل |
|
Post: #37
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالب
Author: Tragie Mustafa
Date: 06-10-2011, 09:01 AM
Parent: #36
سامحينا على الغياب يا آمنه عن هذا البوست
يجب فعلا محاصرة سفارة النظام بالخارج.
|
Post: #38
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالب
Author: AMNA MUKHTAR
Date: 06-12-2011, 09:47 PM
Parent: #37
Quote: تمبس
سلام
هذا اثر الانقاذ في الكائنات الحية..بتحلج الجينات الكوشية للكائن السوداني وتجعله يملا دماغه بكل ما هو مبتذل..عليك الله انت ما بتحس بالعار لمجرد انتماءك للمؤتمر الوطني؟؟ ومخازيه اليومية الاتبرا منها حتى الاخوان المسلمين الاصليين(الغنوشي).... والبورد ساحة تشبه الخرطوم زمان في حتات عشش فلاتة وفي حتات انغولا وفي حتات حوش بانقا الجديدة..شعبيتك الزائفة في سودانيز اون لاين دي ما تغشك ساكت...امشي شارك في منتديات غير سودانية واتبين لينا هناك..عشان نشوف الدر النفيس بتاعك ده
ذهب المضطر نحاس
وقاضيكم بمقعده المسروق يقضي بين الناس
بعد 9 /7 تلقاني بادي في الاعراب اسال عن احوالكم
ترونه بعيدا ونراه قريبا
بعدين امنة مختار
عندها مشروع ومحترم جدا وبتقدموا في البورد ده وهي زيها زي اي سوداني من حقها ان تؤثر وتسهم في التغيير نحو الافضل...وذى كل الدنيا التي تتغير من حولنا يا مغييب...
انت عندك شنو؟
قاعد معاك هنا سنين ما طلعت منك بجملة مفيدة واحدة تدل على انك بتفهم في السياسة...
حارس لينا ودا وسواعا ويغوثا ويعوقا ونسرا ديل |
|
Post: #40
Title: Re: لماذا لا يحاصر السودانيون فى الخارج سفارات المؤتمر الوطنى ..ويطالب
Author: tmbis
Date: 06-13-2011, 10:43 AM
Parent: #39
عادل لمبة ..
وآمنة تخصصات ..
شنو شايفكم الاتنين .. عاملين فيها سياسييين .. كبيرين.
ياخ من الآخر كدا انا اليومين دي أو لي فترة طويلة جدا .. مشغول .. وشغال .. وعندي موسم عامل زي موسم الهجرة إلى الشمال ..
يعني ما قاعد ادخل البورد دا .. لانو عندي اهتمامات أخرى .. وعندي ناس في الفسبوك قاعد اتابع القضايا المصيرية حقتم وكدا . وفي نفس الوقت قاعد اسال الله إنو اشوف لي واحد أو واحدة فيهم جا بي هنا داخل وكسر الحصار المفروض ..
دا بالاضافة لي إنو .. إنت يا عادل كان ما بطلت الوهم حقك دا .. انا ما بقدر اتعامل معاك ..
عارف ليييه ..؟
لانك بعيد كل البعد من المدنية .. ياخ زول بروح في قلب العاصمة القومية .. وجمب قصر الشباب والاطفال .. ويلقوهو حايم ليهو جوه تاكسي .. ويجيك يشبكك الهوية والجهوية .. وناس الانقاذ وانا بعمل ليكم استنارة ..
والله فعلا البورد دا .. وطن من لا وطن له ..
يعني عايز تعمل ثورة جوة الخرطوم ..؟؟ وتفتح وتنور بي ناس الخرطوم .. والله تبقى عليك قصة بتاع الموز .. الجا شايل موزو وقعد يلفلف في شارع العرضة ..
أمــا
امونة شن بتشوفي .. أو امونـة ملهمة النضال لشعبي .. فانا على قناعة تامة جدا بي انها .. زولة الله ساكت .. زولة باطن بس .. يعني بي صورة أوضح .. بطنـة غريقة.. وبتدس الحاجات.
يعني مثلا حسع آمنة دي + عادل امين او مصطفى امين دا .. + بشاشا + تراجي يللا ديل كلهم مع بعض كدا .. ممكن يكونو ملهبي ثورات لشعبي
ضيف ليهم كمان الباقر جكس ..
حسع عليكم الله .. ديل يعني مثلا يوما ما .. ح يحركوا الشعب السوداني دا .. علشان يعمل ثورة ..؟
بعدين تعالو هنا ..
المصريين ديل الحسع دي جايين .. تختوهم استاندرد ليكم وثورات وبتاع .. ديل مش ياهم نفسهم الختوها ليكم في حديقة المهندسين وكتلوكم ورشوكم بالموية ..؟
انت يا امونة ما كنت معاهم لييه .. علشان حسع دي الواحد كان يبكي عليكي كل سنة ويضع اكاليل الورد والزهر على نصبك التذكاري في جنينة عبود ببحري؟
يعني المصريين ديل حسع دي بقو ليكم طاعمين كدا ليييه ..؟
ملحوظة:
1- كان عندنا قروب في الفيسبوك اسمو قروب معجبي سياسة بكري في سودانيزاونلاين .. جات واحدة قالت هي مصرية ومهتمة بالشأن السوداني .. وشبكتنا ليك كلام كبار .. وانا بعتقد وانا بفتكر وما حصلش وفي النهاية قالت هي مهتمة بالشأن السوداني ..
وانا آدمن منير طبعا .. قمت وديته ليك الشارع طوالي .. قلت ليها بلاش بفتكر بلاش (بمبـار) معاك .. طبعا القروب دا الآن اصبح اسمو قروب الرائع اساسي.. بعدما استولى عليهو بي وضع اليد..
2- الملاحظ انو المصريين الخاتنهم معلمين ليكم ديل .. عملو ثورتم دي في ميدان التحرير .. وماتو هناك .. لحدت ما شالو حسني مبارك ..
ياخ انا عايز امونـة دي .. وعادل لمبـة وبشاشا والباقر جكس .. وتراجي .. عايز ديل يجو يعملو لينا اعتصام في ميدان .. اي ميدان .. إن شاء الله ميدان (عقــرب) .. لكن ما يملونا فقر ويشبكونا مظاهرات في ميامي .. ومظاهرات في فرانكفورت .. ومظاهرات في استوكهولم ..
عالم وهم جدا ؟؟ يخمو فيكم ويلقطو لينا فيكم سااي من طرف ..
|
|