المصطلحات السودانيه لوصف الاعراض المرضيه

امس مشينا لدكتور عظام لفحص نتائج معينه
وكعادة دكاترتنا الظريفين انهم بيحبوا يتونسوا
وبصراحه الدكتور البشوش والوناس مهضوم اكتر من الجادى ومركب وش
اها كلمه من هنا لهنا ومعاى امى واخويه الكبير
طرح مدى معاناة الدكتور فى تفسير بعض المصطلحات البيتداولها المرضى السودانيين لأعراض مرضهم
مثل:-
خمة نفس - شحتافة روح
لصراحه اضطريت اكتبها عشان اتذكرها واجى اناقشها
لكن بالجد ضحكت لمن الله غفر لى وما عرفت زاتو يعنى شنو شحتافة روح

كله كوم ووجع النوايط كوم ,
تعبني كثير يا غاليه عشان استوعبه . :)

بعض شرح مرافقي المرضى يحتاج مفسر احلام و عدد اثنين قارئه كف ! ,
موفقه وللامام ..

ههههههههههه
وجع شنو
هههههههههههههههه
والله يا دوك شهاب الله يعينكم
شعبنا شعب لذيذ جد حتى فى المرض
قالوا فى مريضه سودانيه مشيت مصر وبتقول لدكتور عندى رطوبه
الدكتور يشيل ويتذكر دا يكون مرض شنو
المعروف للمصريين الرطوبه بتجى للحيطه ما للبنأدمين وقاموا دقوا تليفون لدكتور سودانى وعرفوا انها قاصده الروماتيزم
:)))))))))))))

الأخت رانيه سلامات ..

و شكراً على الخيط اللطيف ..
و التحية للصديق شهاب ..

لعلك حيث استغربت وجع النوايط ، ستموتين من الضحك ، حين تسمعين مصطلحات مثل :
وجع الشراشيف ..
و الجضمارة ..
و لقد كانت من الطرائف حيث عملت بإحدى قرى الجزيرة ، أن جاءتني امرأة مسنة بصحبة ابنتها ، فرجبت بها ، و سألتها عن شكواها ، فأفادتني بالآتي :
( و الله يا دكتور .. جسمي دا ما فيهو حته سليمه .....كلوتي دي ، متْل الخاتفا ( ك لِ ب ).. و البطن دي تبقبق متْل البليله .. و الكرعين ديل التقول العقارب البتراضعن .. )) ..
أها رايك في الحاله دي التشخيص بكون شنو ؟؟
الحقيقه منذ ذلك اليوم شعرت بأنه يجب أن يكون في المقرر في الجامعات كورسس عن التعابير المحلية للمرض ، و المفاهيم الثقافية في بلدنا للمرض ، و مسبباته .. و هو ما يوجد بعض ملامحه في كورس بجامعة الجزيرة ، يعتبر مدخل للطالب لدراسة الطب ، اسمة introduction to medicine ..
شكراً لكِ ..

هههههههههههههه

من أين أتى هؤلاء الاطباء؟(على وزن من أين أتى هؤلاء؟.. لطيب الذكر الطيب محمد صالح)

دي كلمات واااااضحة ما دايره درس عصر الا للحناكيش

خمة نفس: هي ضيق في الصدر يظهر في صورة تسارع الشهيق والزفير، قد يكون بسبب اتفاخ البطن او غيره.
شحتافة روح: ضيق وانزعاج غير واضح الملامح او غير معروف السبب احيانا.

وجع النوايط. هو وجع النوايض: وهي الكلى.. جمع كلية: ويستخدمه السودانيين لدى أي احساس بطعنة او وجع في جانب البطن.. وليس المقصود وجع الكلى في حد زاتها.. مقصود محل الكلى.. فقد يكون من التهاب في الكلية او اي منطقة مجاورة لها.

.كلوتي دي ، متْل الخاتفا ( ك لِ ب ): يا ابوابي الحاجة دي تقول: ان كليتها تؤلمها وتشبه الألم مثل انغراس أسنان ال###### في بطنها هي او في قطعة لحم.
البطن دي تبقبق متْل البليله: دي واضحة، هنالك اصوات وكركرة قد تكون غالبا غازات في البطن او هيجان في المصران.
الكرعين ديل التقول العقارب البتراضعن : ههههههه.: الحاجة رجلينها ما شايلاتنها تب، فترانة وتحس بوهن.. يعني في نتاحة في الكرعين.. ما تقولوا لي ما بتعرفوا النتاحة..



ياخي والله المفروض تدوني الزمالة الفخرية للجنة أطباء السودان ،، كمترجم لهذه المصطلحات

الأخ أشرف السر
تحياتي ، و المحبة ..

و الله أنا بمجرد ما انتهيت من مداخلتك دي قررت أدخّل شرحك دا جوّه المقرر الحا نعملو للطلبه ... طبعاً دا في الكلية ( الخاصة ) الح أ عملا أنا !!!!!!!!!!!........ و ح نجيبك تدرّرس معانا ، و نديك بالدولار..
رايك شنو ..
لاكين قول لي رنا يخلي لينا أبونا الشير ، و حيكومته، لأنه مؤكّد الجماعه الشيوعيين ديل لو جو الحكومه ح يقفلو الكليات الخاصه ، و يقطعو رزقنا أنا و انتَ .. الله يكفينا شرّهم .. ( وجه مرتعب )..

اخي الابوابي



يا زول تب جاهز للدولار الاخدر..

بس

Quote: لاكين قول لي رنا يخلي لينا أبونا الشير ، و حيكومته، لأنه مؤكّد الجماعه الشيوعيين ديل لو جو الحكومه ح يقفلو الكليات الخاصه ، و يقطعو رزقنا أنا و انتَ .. الله يكفينا شرّهم

في ذمتك دي.. ابونا حفظه الله وأيده،، وحيكومته الرشيدة.. ان ما بقيت تمساحن كبير وبطنك ماااااهلة بدوك فرصة لأي نشاط استثماري؟
او خدمي؟

والله يكفينا شرهم وشر من هو اشر منهم..
(لا أعتقد بوجود من يفوقهم شرا.. فهم يفوقون سوء الظن العريض) (وش مدبرس اكتر من دا

معليش نسيت مصطلحين فوق:

الجضمارة: هي الاسهال المترافق مع لوايه (مغص شديد).

الشرشوف: هو المنطقة العلوية الوسطى من البطن

دَبَسْ(بفتح حرف الدال والباء وتسكين حرف النون)= تورم
دبس فى الرجلين، دبس فى الرقبة،...

الهايفات: ناس طب الاسنان ممكن يورونا الاسم الصحيح لتلك الاسنان التى تظهر عند الاطفال.
الحبوبات يقمن ب كَى لثة الطفل حتى يتمكن الطفل من استخراج الاسنان بسرعة بلا متاعب.
بالطبع ياتى بعدها الطفل بتسمم الدم ومن اعلاماته اسهال وحمى كنتيجة للكى.


بعض مناطق السودان- لا اود التخصيص- يطلق على تورم الصفن (كيس الخصية)اسم كُوكا.

مرض السفلس -من الامراض المنقولة جنسيا التى كانت منتشرة بكثرة فى السودان- يطلق عليه الساس.
لمرض السفلس مضاعفات تظهر بعد سنوات وسنوات. ومن المهم جدا عند اخذ التاريخ المرضى السؤال عنه. المشكلة
لو سألت المريض عن السفلس لا يعرفه ولكن عندما تسأله عن الساس يبادرك بالاجابة.




وشكرا للبوست

شكرا ombadda

بالنسبة لقولك

Quote: دَبَسْ(بفتح حرف الدال والباء وتسكين حرف النون)= تورم دبس فى الرجلين، دبس فى الرقبة،...

اوافقك القول فيه..
واضيف انه في بعض المناطق يخصص للورم الناتج عن حساسية فقد يكون الورم مثلا في فروة الرأس أو في أي منطقة أخرى
ويفضلون علاجه بثب زيت السمسم البارد (تبريده بوضعه ليلا في اناء مفتوح) عشان التفكير ما يتجه للتلاجات

الغدة: يقال فلان أو فلانة عندها"غدة" ويقصد به تورم الغدة الدرقية بسبب نقص اليود أوغيره.
الدوبال :مرض التليف الكبدي
بولهرس، بولهرسى: بلهارسيا
الطُمام: هو الغثيان
المصران: مرض القولون العصبي
الفشفاش: هو الرئتين.
العِرق: هو الوريد.
الحليق: التهاب اللوزتين
أبو الشِهِيِّق: هو الفواق أو الفاق ويقصد به اضطراب الحجاب الحاجز عندما يضغط على القفص الصدري والرئتين مسببا اندفاع الهواء بقوة من الرئتين..
التتوير: هو إنبات الأسنان اللبنية عند الأطفال فالطفل يتور أو تتور
المرارة: الحويصلة الصفراوية وكل الامراض المتعلقة بها
السهراجه و الوجواجه: الحمى الخفيفة.
الوِرده: هي الحمى ويقال للشخص " ميرود"
عيني بترف: رفرفة العين هي حركة الجفون حركة لا إرادية .. وتفسرها الحبوبات ببشارة أو رؤية شخص عزيز غائب.
الوتاب :ونقول فلان موتب تب، يعني مسمم سواء لدعته أفعى او عقرب.

مُكوفِر: الكُوفار هو اضطراب يصيب معدة الشخص المعتاد على أكل المخمر من
الطعام كالكسره مثلا... وعند تغيير نمط الطعام يصيبه الكوفار أو الكوفاره.
مَعَسَّم: العسم هو التشنج.. ويستعمل لوصف تشنج عضلات الظهر
الفليِتة: بنفس معنى التعسم.
مشموطه: التقلص العضلي المؤلم
الطايوق: النخاع الشوكي.





= شكلنا ماشين على قاموس يحوى كافة الأمراض والأعضاء ومسمياتها..
استعدوا بس...
ترباية حبوبات.. تقولوا شنو

قالت للدكتور: عندي خمة نفسه وشحتفة روم وعندي امبتاتة حيل وباليل قاع اورد وبتدمم
............
قوقليا قالو شحتفة الروح حاله تصيب النساء

ود كرار

سلامات

Quote: قوقليا قالو شحتفة الروح حاله تصيب النساء

لا نخالف شيخنا المبروك قوقل..
لكن نقول الشحتافة او الشختفة المخصصة لجنس النساء هنا.. تصيب النسوان السمينات، لما الواحدة تمشي مشوار طويل على رجلينا
وتكون الواطه حر شديد.. فتجي الواحدة داخلة البيت وهي مصابة بالعطش والارهاق
قتقول ليك: روحي مشحتفاني شدييييييييد..
وهي تقصد الفتر + احساسها بالضيق نتيجة للعرق والحر الشديد

كنت بتكلم مع واحد وفي معرض كلامو قال لي والله عندي اش قدي تاعبني تعب شديد خلاس !!!

طبعا حاولت اظهر ليهو اني ما فهمت المعني بسؤاله عن الاسباب فبادر بقوله انو عندو دبره وبيشعر بورم والم في حته تانيه... طبعا مجرد ما قال دبره ... وقع لي ما يعنيه وما يعني باش قدي هذه ...










تختلف المصلحات دي من منطقه لمنطقه فمثلا زي كلمة الجرايه تماثل الجضماره لكن بدون الم يعني اسهال يخلي الواحد يجري علي الخل
_________________________________
المدخل لدراسة الطب وتعضيده بمقرر مهارات الاتصال مهم جدا يا دكتور الابوابي خاصة لمجتمع السودان فيه اختلاف الثقافات يلعب دور مهم جدا في تميز الطبيب السوداني

Quote: قالت للدكتور: عندي خمة نفسه وشحتفة روم وعندي امبتاتة حيل وباليل قاع اورد وبتدمم

نفس المريضة قالت للدكتور:
قاع أمزرق
----------------------
كان عندها إسهال

سلام يا رانية ليك ولضيوفك الظرفاء

بوست ظريف ودمو خفيف

حلي الفزورة دي يا رانية

واحدة مشت للدكتور قالت ليو يا دكتور

انا قعورد سعورد قعادوخ وقعاقع

والله يا دكاتره قتلتونى بالضحك
بركه التخصصى محاسبه
واحد + واحد = اتنين
لا خفتشه لا نفتشه
لكن دا قامووس حيكون ابداااااااااااااع
انا فى كلام اصلوا ما فهمتوا بجيكم فيه برااااااااااحه لشرح
والله سعيده البوست عمران بالعباقره اللذيذين
تسلموووووووووا وما تبعدوااااااااااااااااا

سمويه السكره
(طبعا اسم ماما ساميه برضو وبندلعها سمويه)
انا قعورد سعورد قعادوخ وقعاقع؟؟؟؟
يا زوله دى ساهله
قالت له انا كنت قاعده فى امانة الله وسعيييييييييييده لطيش قوم ايه بقى فجعتا شكل القاعده فيه طقطق ووقعت منه
:)))))))))))))))

الكادر الطبى
احمد +اشرف+ امبده +عثمان +السنوسى
بالجد اضفتوا يا غاليين للموضوع معنى ومفهوم ومضمون وبسمه
بتمنى تشاركونا مواقفكم اللذيذه مع المرضى

انا لو اكلت فطيره بتجينى خميره وعندى ربرابه فى قلبى.
heartburn
palpitation

عمنوّل عشة وكت جاتا الوردة مشت لي حكيم شفخانة الحلَّة... الحكيم قال ليها: لازم تمشي حكيم الاسبتاليا الفي البندر، اتخمخمت وفاتت. أها وكت سعلا موجوعه من شنو قت ليهو: قاعورد، عندي شحتفت روح، وخمة نفس، والقلب طاحونة ود الكريل التح التح ، والفقر شوال عيش خاتنو فوقن، والبوادرين الجريوات البنهشن فوقن، والخشم عرديب، واللضنين يسون صنننننننن

بتعرفي (أب عِديلات) يا رانية؟

Quote: لا ما بعرفو

طيب ولا (أب فرار)؟

يا موسى الراجل ما تجي تكره الناس ديل الطب
بوست لذيذ بس انا مزنوق زنقة غسال يوم الوقفة
امسك لي ضنب الكوكو دا لحدي ما اجيك
.
.
بوست لذيذ يا رانية

يا عبده الغسيل ما خلص ولا شنو
:)))))))))))))))
يا زول ماسكين ومنتظرين

تسلم يا فرده

اشرف ازيك اولا
ثانيا اب عديلات هو الممص الهو بينفخ الزول
واب فرار قالوا لى احتمال سحائى
ههههههههههههههههههههه


بديت اغش من الناس الحوالينى
ما ظريفه ابقى طيشه طول الخط كده

نادر يا فلته
عليك الله ترجم لى الكلمات التاليه
- الورده
- قاعورد
- ود الكريل التح التح الى نهاية الجمله

مصريين تحسسونى بالجهل اللغوى العندى
بالغتوااااااااا معاى
:)))))))))))))))))

خميره دى يا محمد مرادف حموضه ولا شنو
لكن الربرابه دى قطع شك بتكون قريبة هبابه
:)))))))))))))))))))))))))

حاجه مشت الدكتور مع زوج بنتها,الدكتور قال ليها:
عندك تاريخ مرضي للحاله دي يا حاجه؟
الحاجه ما فهمت
اها يا حاجه الاعراض البتحصل ليك شنو؟
مافهمت
طيب يا حاجه بتشعري بي شنو؟
برضو ما فهمت

زوج بنتها إتضايق قام قاليها:
يا حاجه الدكتور قصدو البيوجعك شنو
طوالي الحاجه قبلت علي الدكتور و قالت:
و الله يا دكتور بيوجعني تحشر الرجال في الكلام الما بيخصهم.

ســـلآم يا رآنية.
عندي إنضرابة، وبطني ممشياني، ومن الوآطة تفلل
النحار يقول يا ليل.

وآحد داقس مشى للدكتور بيشكي من بطنو. الدكتور بعد كشف
عليهو قال ليهو: يا حاج امش جيب لينا الفُسحة.
قال ليك عمّك ده تلآتة يوم يفتشو عليهو، آخر النهاية لقوهو
قاعد يتفسح في شارع النيل.

برضو:
عندي ابكباس، وفلآن شايلو حمار النوم...

تحياتي...

ازيك يا معاويه
زولك دا اخير من الجاب علبة الماكنتوش
:))))))))))))))))))))

ومن الوآطة تفلل النحار يقول يا ليل.

اشرح ما تحته خط

اخى صلاح
دى نكته فى السلك ماشيه اسرقها اختها فى الفيسبوك
:)))))))))))))))))))))))))))

مرحبا رانيا وضيوفها الكرام ,

بوست جميل ودمو خفيف :-)


لفت انتباهي مسمى (التتوير) عند الأطفال من مداخلة د.أشرف السر , بمعنى التسنين عند الأطفال ,

ودي تسميه ذكيه جدا , بالانجليزي المرحله دي اسمها eruption وده يكاد يكون نفس المعنى رغم بساطة

الاسم بالطريقه السودانيه , وطبعا بيعني بزوغ الأسنان أو تتويرها , بالله شوفوا أهلنا البسيطين ديل أذكياء كيف ؟؟

عندي ملاحظه لدكتور ombadda , الهايفات ديل يطرشني فيهن , النبي فيك يادكتور وصفن لي ديل ياتن ؟؟ هههههه

محتمل مقصود بيهم الأسنان اللبنيه عموما , على أساس انهم حيتبدلوا ويقوم غيرهم ؟؟ عشان كده اعتبروهم هايفات ؟؟

برضو تسميه ذكيه !! :-)

أها انا اللفظ المحيرني وماقدرت لي هسا أعرف الحته دي وين في الجسم بالضبط , مقولة : بلابيطي وقعن !! ههههه

الله يكفيكم شر البلابيط الواقعه , وسلامتكم كلكم من كل شر :-)


احتراماتي ..

دوك نبراس يا روعه
جميله شديد المعلومه الاضفتيها هنا

لكن موضوع الوقعن ديل قربت اقع فيها الواطه
ههههههههههههههههههههههههههههههههه
الكلمه دى ممكن تتفهم غلط فى الدول المجاوره
ههههههههههههههههههههههه

تسلمى على التواجد عيونى

سلامات عزيزتي رانية

بوست ظريف
ودكاترتنا ما شاء الله عليهم ابدا ماقصروا..

حاجيات تموت الزول بالضحك..


مودتي

رانية سلامات
البوست لذيذ ودمو خفيف

هسا انا كان راسى مخموش (بفتح الميم والخاء) علا انفك بنضميكم السمح دا ..

اها الراس المخموش دا كيفنو ...؟

تحياتى

Quote: اها الراس المخموش دا كيفنو ...؟ تحياتى

لو عندك مع خمشة الراس كوفار و نوفار يبقى عندك مشكلة في المعدة لكن لو خمشة الراس براها كده ..معناها عندك مايقريناو ما يعرف ب(الشقيقة).


سلام صاحبة البوست

ياسناء يا شقيقة
قلتلى كوفار ونوفار مع الخمشة = يا معدة يا شقيقة ؟؟
اها كان بقت معاهن عقيل فى الكريعات وعثيم فى الضهر وفاق
شنو امشى الاردن مثلاً ؟؟

يازولة هرشتينى بالحاجات الماعرفم انا ديل (كوفار ونوفار)
فشنو :-
اللهم لك الحمد والشكر على نعمة الصحة وتمام العافية
اللهم اشفى مرضانا وكل مرضى المسلمين

Quote: دَبَسْ(بفتح حرف الدال والباء وتسكين حرف النون)= تورم دبس فى الرجلين، دبس فى الرقبة،..

رانيا وضيوفها وتحديدا امبده سلام..زمان ابوى الله يرحمه كان بقول حاجتين ما عندهن دواء الدبس والعواره وبوصفك للدبس يا امبده لو حسب كلام الحاج زيه وزى العواره الانا متاكد انها ما بتتعالج تبقى مصيبه ولا شنو..

Quote: بركه التخصصى محاسبه واحد + واحد = اتنين لا خفتشه لا نفتشه

طيب يا رانية خدي:
ديانة: عملاء دائنين
تلجين: بيع الأصل الثابت بقيمته الدفترية واحيانا أقل (حسب رأي اللجنة و.....التجار)
مقايطة: (تنطق بالطاء وليس الضاد) شراء قطعةارض مثلا مقابل خرفان + سيارة + اسمنت + فول مدته منتهية + تأشيرة بمهنة راعي.... غايتو الثقافة السودانية دي حاحة في منتهى الروعة

نعود إلى مسار البوست الطبي
ابو اللغود: تورم اللوزتين
ابو الضباح: جرح طولي يصيب الرقبة
قمت الصباح ولقيت عيني مقموطة: قفل كامل للعين أو العينين بافرازات لزجة (لن تستطيع فتحها ولو بزردية)
المخروقة: لوحة الكتف
الحبن: نوع من الأورام
الكتكوتة: السعال الديكي، من ضمن العلاج البلدي الموصوف لهذا المرض....شرب لبن الحمير

احد الأخوان ذكر أن المصريين استغربوا من كلمة (الرطوبة)، الأردنيين يسمون الأضراس (طواحين)، وانا مستغرب ايه نوع الأكل البياكلوه المحتاج ...طواحين؟؟
،

عندنا واحد من أصحابنا مستهبل مشى مرةالعيادة قال للدكتور عندي وجع أم فتفت!!!!!! لانه قال من الله خلقني ما سمع لي زول قال عندي وجع أم فتفت ليه بس؟؟؟

اخى كمال
هو مشى يشتغل الدكتور ولا شنو
:)))))))))))

اخى بركات
هى طبعا فيها لكن اصلوووووو ما بتحصل وصف الامراض
:))))))))
انت حسى ختيت ليك اضافات رهيييييييييييبه
خصوصا الطواحين
ههههههههههههههههه

دكتور محمد
الموضوع دا داير حضور مستعجل لامبده


منور

عشان تانى تتشوبر يا احمد
:))))))))))
يحلك الحله بله من الخمشه

كان كده يا سناء الموضوع طلع من يدى

كوفار وبنجابدها لكن نوفار دى شنو
؟؟؟؟؟؟؟؟؟؟؟؟؟؟؟


تسلمى يا غااليه

مخموووووش عديل يا احمد
دى قريبه من مدووش ممممش
:)))))
منور بطلتك

عزيز يا فرده
والله الدكاتره طلعوا بيعانوا اكتر من المريض
:)))))))))00

أنا شخصيا عندى مشكله لحدى اسه
لما امشي الدكتور ما بعرف الفرق شنو بين الاسهال و الإمساك
فالدكتور بتعب معاي جدددددا

بتبااااااااااااااااااالغ فى دى يا ناصر

اصلو ما جادى


فكرتنى باختى لمن احب اعذبها اقولها صفر - واحد بيدينا كم
:)))))))))))))))))))))))))))

Quote: لما امشي الدكتور ما بعرف الفرق شنو بين الاسهال و الإمساك

يا ناصر الامساك ياهو اليابوسه ... والاسهال ياهو الجرايه اذا كان بدون الم يعني تشيل ابريقك وتعني الخلا اما لو كان فيهو لوايه كمان ياهو الجضماره بذات رقبتها


لو كان الجرايه في شكل زراق وتكررت عدة مرات في اليوم فاحتمال كبير تتعرض للبو وهو فقدان السوائل وبعض العناصر الهامه









_________________________________________
البو هو في الاصل الشئ الفارغ يعني زي الماسوره

اهاااااااااااا يا سنوسي
عشان جنس الكلام ده
أنا. بمشي الدكتور بدفع قروشي
بقول ليهو بطنى ما كويسه
و بعد كده هو يحل مشكلتو

السنونسى ما قصرت تب مع ناصر
:)))))))))))

Quote: ودي تسميه ذكيه جدا , بالانجليزي المرحله دي اسمها eruption وده يكاد يكون نفس المعنى رغم بساطة

كمان ما تنسي يا نبراس (الانكراشة)
الخواجة اللص سرقها وسماها Scratch

Quote: واب فرار قالوا لى احتمال سحائى

"قالوا لي"!!
و"احتمال"!!
عيييييك!!
أنصحك يا رانية مستشارينك الما متأكدين من أب فرار ديل أختيهن

إذن (الحولينك) ديك يا رانية محتاجين حجر رشيد عشان يفكو طلاسم الإعلان دا:

Quote: لكن بالجد ضحكت لمن الله غفر لى وما عرفت زاتو يعنى شنو شحتافة روح

لو كنت المسؤول لسحبت منك الجنسية السودانية واخليك ( بدوووووووووووووون)

زمان يا رونو لما امي تمشي معاى الدكتور بتوصيني كتييييييير بتقول لي كتر ليه امراضك وكتر ليهو كلامك عشان يديك دواء كتييييييييييييييييييييير واهم حاجة تقول للدكتور ( عندي خمة نفس )

طيوبه يعنى معقول ابقى بدون
حالتى حبيبه سودانيه
:((((((((((
لكن ماما ما قصرت معاك بنووووووووووووب
:)))))))))))))))))

Quote: ابو الضباح: جرح طولي يصيب الرقبة

أبو الضباح: جرح من تآكل أسفل اصابع الأرجل وما فيه دم وأظنه من فطريات وهو لا يبرأ بسهولة وبشوف الناس بغسلوه بالكلونيا

Quote: المخروقة: لوحة الكتف

بل هي الحوض

Quote: الحبن: نوع من الأورام

أظنه كيس دهني ودائما يقوم في الملاين.

أمراض بالدارجي
السكري : المرض البارد
الشلل: الفالج
السل: التيبي
الفاق: أبو الشهيق
الحساسية:الدبس
الصداع النصفي: الشقيقة
الاسهال: الزرقة
الزكام: النزلة
الاستسقاء: الطوحال - الروى
الدسنتاريا: العُصرة
شد عضلي: قطيعة - فليتة
خلع: فكك
القاوت: مرض الملوك
الجرب: البُرجُب
الاستفراغ: الطُراش

رانيا سلام عليك
عندى ليك اسامى كتار عشان تتثقفى اكتر
وجع الفقر بكسر الفا وفتح القاف يعنى وجع رقبه
عندى زمله حاره فى معرش اكتافى دا
الزمله دى والله انا زاتى غلبتنى اترجما ليك
معرش اللكتاف اعلى الكتف تحت الرقبه
البافى بجى عمك ود البوش يتمو ليك

الاخت الحنكوشة/ رانية

سلام

مرة كان عندنا طبيب حنكوش.. جاء ليهو عمنا عجوز..

الدكتور: مالك يابوي؟ ان شاء الله؟
العجوز: خير يا ولدي إلا امبارح بطني تلوّي وتلوّي..
وشوية كدي بديت أجري وأجري.. الليل ده كل أجري..
الدكتور: باستغراب!! يا حاج كيف تجري الليل كله بحالتك وحتى سنك ما بتساعد على كدا؟!!
العجوز: يا ولدي نسوي شنو إلا نقبل على دواكم ده!!

الدكتور الحنكوش يطقطق القلم في اسنانه بس نجدته الممرضة.. وقالتلو.. الحاج بيسهل طول الليل!!


تحياتي

فكرتنى يا عبد العزيز بحتوته حكيتها لى مرة اخويه
لكن لصراحه ما عارفه تتحكى كيف
الكلمه محرجه شدددددددددددديد
:))))))))))))
لو فى زول بيعرف اهلنا فى الغرب بيقولوا شنو مرادف لابلع الحبه حيفهم قصدى
ههههههههههههههههههههههه

Quote: البافى بجى عمك ود البوش يتمو ليك

اخونا خالد المحرب
امس قلت لرانية مزنوق زنقة ترزي يوم الوقفة
وهي ما زالت نتظرة الهدوم اتخيتن واتسغلت وانكون ونمشي بيهن العيد
وان كان ولا بد خد دي من طرف الخرتاية
حبوبتنا بلعت لي حبوب سلفا استلهبت ( حبوب السلفا بتستلهب عندما تعرض في الهواء )
وسوت ليها وردة ودبس في السداغات
جات حبوتنا التانية تشوفا ولقت الناس قرروا اودوها الحكيم
قالت ليهن هوووووي يا جنيات ما تودوها الحكيم
جيبوا ليها ببيسي كولا بتعالجا عشان كونو الببسي كولا فيها الدواشات
ا

اخير تكمل غسيلك يا عبده
:)))))))))))))))))))))
شنو الرطانه الجيت طرشتها بهنا دى
هههههههههههههههههههههههه

لغالى خالد
زمله من الزمه احتمال
:))))))
برجى معاك ود البوش لتيمامه

Quote: لغالى خالد زمله من الزمه احتمال :)))))) برجى معاك ود البوش لتيمامه

رانيا عليك امان الله كلامك اصلى ما فهمتو
دحين شوية ترانسليشن

اخى محمد
المفروض نسحب الرخصه من الدكتور الاول الغلط فى مسميات الامراض
:)))))))))
واستفسار صغمبوتى
ملاين دا شنو؟؟؟؟؟

يا اشرف مصررين وملحيين ان اب فرار هو السحائى
:))))

Quote: ملاين دا شنو؟؟؟؟؟

لا لا حالتك والله مستعصية يا رانيه!!!

قولي: الملاين دي شنو؟ او شني؟

الملاين: هي نقاط التقاء المفاصل، كالابط، والتقاء عظم الفخذ بالحوض من الناحية الداخلية.



اب فرار هو السحائي دي مية في المية صحيحة

هو اعتراضو كان على كلمة احتمال يكون..
والله اعلم

اب نحار: حرقة او حموضة المعدة

ابو الضباح: التهاب جلدي بين الاصابع.. قد يؤدي لالتصاقها مع بعض

اش قدي او اشقدي او الحولال: هو هو الورم الذي يرافق ألم حين الاضابة بجرح وينتج عن انتفاخ الغدد




-- ونواصل قريبا بإذن الله

ام الصٍبيّان (تصغير صبي): مرض الصرع.. وخصوصا عندما يصيب الاطفال.

اللستة: اللثة،، يجيك يقول (عندي التهاب في اللستة).

المويه البيضاء (مرض عيون): اظلام عدسة العين.عندما تفقد عدسة العين شفافيتها تدريجيا وبالتالي يقل مستوى الرؤية.

الموية السوداء او الزرقاء (الجلوكوما): هي ارتفاع في ضغط العين

Quote: ام الصٍبيّان (تصغير صبي): مرض الصرع.. وخصوصا عندما يصيب الاطفال.

عزيزنا اشرف ...اها ام الصبيان دي عندنا هناك في الصحراء بتعني مرض الذهان ...

وهي حاله قريبه من الزول يكون (مشوطن)




وبعدين سمعت با ام قشيط ؟؟ والقندال*..










__________________________________________
القندال هو عملية ادخال الاصبع جوه الفم (الصقع) وجبد الراس لفوق مع وضع الارجل لتثبيت الشافع لحدي ما يقدف ويطرش وتمارسها الحبوبات

ام فريحانه: وهي حالة تاتي للطفل الرضيع او من هم دون الخامسه واحيانا الكبار وهي الضحك الذي يسبب بعض الاعراض المرضيه مثل ضيق النفس والام العضلات المحيطه بالتجويف الصدري والشعوربالتعب العام












________________________________________________
مرات بتسببها (كلكلة) الشفع بغرض الاضحاك

ازيكم يا حلوين
كيف امسيتم
لكن ما ملاحظين الامراض اغلبها ام واب
يعنى مافيش مره كده عم ولا خال حتى جار
:)))))))))))))

سنوسى ام الصبيان فى عالم الجن قالوا بيكون راكبك جنى او عفريت
:)))))))))))))))))
تسبب اسقاط الاجنه لدى الحوامل
وبتتسبب فى عنوسة المصاب كان مراه كان رجل



شوفته كيف
فى دا ماخدين كورسات كتيره ناس الفنجان والودع ما قصروا

يا شروفه مالك علينا
بركه البقيت اعرف ارح كاكى ويالاكى
يعنى حبه حبه بتلقانى بغنى بالرطانه
شيل الصبر بث
:))))))))))))))))))))))

الرد 19





قولت اودعه قبال نرحل لبيت الجديد
:((((((


شاكره وممتنه لشاركونى فيه
والافادونى فعلا بمعانى المصطلحات
اها يا دكاتره
وداعناكم الله والرسول
واعانكم الله على تفسير الامراض
وجعلكم ذخراااااااااا للوطن والمواطنين وبكرى
:))))))))))))))))))))))))