عندما يقول ناس الهيلاهوب كلام لا يدخل العقل

http://www.youtube.com/watch?v=xm0z6L9md9E&feature=related
إلا كان يكون هلال مريخ وفريق قومي غير العارفنهم ديل..
يتبع .....

قالوا :
هلال مريخ شرفونا الفريق القومي عزونا
أها نقول المريخ جاب كاس خارجي وين شرفنا الهلال والفريق القومي ؟؟؟
لا وشنو :
بقينا أسود الملاعب ..
وهل للحملان أن تكون أسود ؟؟
مبالغة .

وما خايفين برشلونة
هاهاهاهاهاهاهاها
والله أخير منكم الصحافة الرياضية ..

أما أكذب ما جاء على لسانهم قولهم :
وما سائلين في ماردونا ..
أبلغ من الموووبالغة ذاتو ..
وحاة الخوة ماردونا لو شاف لعبكم دا يحردا ليكم عديل كدا .

قالوا :شباب النيل من السودان يدرسوا كورة مسؤولة
وين الكلام دا ؟؟؟؟؟
وأضافوا :لياقة كمان رشاقة ضمان
قطع شك الكاميرا الخفية ..

استاذنا العزيز طلحة
ماتستغرب .. الكلام ده طبعا كتبه ليهم شاعر
والشعراء يتبعهم الغاوون.

يا فاضلابي سلامات
ياخ ما عندنا كلام في أنو الشعراء يتبعهم الغاوون لكن كمان الشعراء ديل ما يرموها صاقعة كدا ..
معقولة ياخ نحن ما سائلين في برشلونة وكمان مارادونا؟؟؟؟؟؟؟
وحاة الطلاق دي كان شفتها قدامي ما أصدقا .

Quote: معقولة ياخ نحن ما سائلين في برشلونة وكمان مارادونا؟؟؟؟؟؟؟

إنت فى ناس الهيلاهوب والشعراء ولا فى الرشاشات ,, الـ يسمعهم اليومين دى
يحلف يقول برشلونة لو لعب معاهن بدل مازيمبى يطقطقوه زيو زى النسور.

والله الهلالاب ديل الايامات دي قاعدين يبالغوا عديل
بالذات خليل الجاب لينا كذب وتلفيق المصريين ردموا لينا هنا دا ..
أعتقد انو المنبر محتاج غسل بعد عفن الفراعنة الجابو خليل دا .
من ناحية ثانية
غايتو أنا إنطلاقا من الفيديو الفوق دا ح اعتبر ناس الهيلاهوب ديل زيهم وزي الجرايد الرياضية واحد
ما في فرق إلا أنو ديل ربما يكون ما متابعين الحاصل .

وبعدين مادة الفيديو نفسها فيها قصور وعيوب جعلتا خارج نص الواقعية تماما
لأنو ما ممكن تتكلم عن المريخ الجاب كأس مانديلا وتجيب لي قون لفيصل عجب وهيثم طمبل وتكرر
اللقطة أكثر من مرة في حين يوجد أرشيف لكل مباريات المريخ في البطولة التى حصل على لقبها
عام 1989 ..
والحال نفسو ينطبق على كورة الهلال والأهلي إذا كان يقصد هلال 87 أما إذا كان يقصد فوز
هلال ناس هيثم مصطفي على أهلي الحضري فاعتقد أن الفوز دا عادي يحدث كثيرا ولا يستحق كل هذه الإحتفائية
خاصة إذا ما قورن بوصول الهلال للنهائي الأفريقي .
أما الفريق القومي العزونا ديل فوالله ما شايف ليهم لا معزة ولا (صورة) معزة ..
كان أوفق لو لم تر هذه المادة النور لأنها مادة أي كلام .

الاخ طلحة

لك التحايا

بالله شوف الزول دا ياخى اسع اللحن دا ما بيشفع ليهم يقولوا الدايرين يقولوهو

على اليمين مع اغنيتهم دى انا طرت لافوق و دقيت ليك كف ( كف دى لمن لا يعرفها هى الصفقة) يجنن كان محتاج للنعام آدم( الله يرحمه ) يقوم ينقر له نقرة نقرتين بالحنين بتاعه و تكتمل البهجة

أها نقول المريخ جاب كاس خارجي وين شرفنا الهلال والفريق القومي ؟؟؟

أما فى دى ضيعتنا يا خوى سنة 70 دى انا دخلت النهائى من بعد الفطور طوالى و بعد المبارأة طلعت راسى لافى طشيت من مكان المواصلات تجى تحسبوا لينا كاس داخلى لانه اخدناهو فى استاد الخرطوم

لك الشكر فبالرغم من هلاليتنا التى لا نهادن فيها الا اننا نسعد بما نقرأه لك فى هذا المكان

سلامات يا حيدر بشير
ما قلنا حاجة في الصوت واللحن والفنيات دي لكن الكلمات أجارك الله والموضوع كلو على بعضو طبيز ساي..
الفيديو دا ما عارفو أيام صالحين واللا بعدو لكن المتأكد منو أن الجماعة ديل بعد الزول دا فات منهم
قعدوا في السهلة ساي .
من جهة تانية ياخ كأس المنتخبات التلاتة داك ما تعدوا لينا وبعدين ذاتو كان في زمن الناس يا دوب بتعلموا
تاتى الكورة.