Post: #1
Title: هاك سف وأدي اُمك اتسف ولا قوني على الانداية ... !!!
Author: الرفاعي عبدالعاطي حجر
Date: 05-14-2011, 11:48 AM
هكذا صار حال سودانييزاونلاين
إختلط الحابل بالنابل وكل يقول
ما شاء وقتما شاء وكيفما اتفق
والله كريم ... قصة العنوان ربما
معلومة ولا تحتاج كثير شرح ...
فلكم ان تسفوا وتدوا بنيات المنبر
يسفن ونتلاقى في الاكبر .
جاااطت الدنيا هنا جوطة ما بعدها الحاصل شنو ؟؟؟
................................................حجر.
|
Post: #2
Title: Re: هاك سف وأدي اُمك اتسف ولا قوني على الانداية ... !!!
Author: Hisham Ibrahim
Date: 05-14-2011, 01:24 PM
Parent: #1
مالو عنوانكـ دا شين كدا يا حجر ياخ ...
نسال الله السلامه ،،
غايتو في ناس كدا عندهم بوستات بتشبه منابر تانيه غير منبرنا دا ...
بوستات لا تساوي شيئاً ،،
ما أظنكـ عاوز نمازج مش كدا ؟
|
Post: #3
Title: Re: هاك سف وأدي اُمك اتسف ولا قوني على الانداية ... !!!
Author: خدر
Date: 05-14-2011, 01:46 PM
Parent: #2
يبقي الغثاء ويذهب ما ينفع الناس
شكرا يا حجر , عبرت عني
|
Post: #4
Title: Re: هاك سف وأدي اُمك اتسف ولا قوني على الانداية ... !!!
Author: موسي الراجل
Date: 05-14-2011, 01:58 PM
Parent: #2
حجر سلام
فى اندايه اكتر من البيت الحقته لافه دى
برضو احسن من السافين التراب
وسامعين البو و نعيق الغراب
ناس هاجرت وناس البلد اغراب
محتارين لابصيره ولا مضراب
ديل نحنا نبكى على زمن الاندايه
قبل فرز السحن
و وقوع المحن
و البلد لسه ما تمحن
وبنات ابليس ماصحن
|
Post: #5
Title: Re: هاك سف وأدي اُمك اتسف ولا قوني على الانداية ... !!!
Author: تبارك شيخ الدين جبريل
Date: 05-14-2011, 02:25 PM
Parent: #4
انا قلبى قال ليّ ... حجر دايكون بيتكلم عن سودان ما قبل الأسلمة والإستعراب السياسية وتبعية الغرب الإستعماري ... يعني زمن السودان كان سودان والمريسة كانت الغذاء الرئيسي والتمباك كان الترفيه الوحيد ...
لاكين جانا زمن ذم المريسة والتمباك تعبيراً عن السخط والعياذ بالله ...
اللهم إنا نحمدك على جزيل نعمائك ... ولا حول ولا قوة إلاّ بالله ...
... المهم ....
|
Post: #6
Title: Re: هاك سف وأدي اُمك اتسف ولا قوني على الانداية ... !!!
Author: يوسف محمد يوسف
Date: 05-14-2011, 09:53 PM
Parent: #5
Quote: جاااطت الدنيا هنا جوطة ما بعدها الحاصل شنو ؟؟؟
|
يا صديقى حجر
الانادى زمان كانت محروسه بـ " بوليس السوارى " .. يعنى تعمل ازعاج ينادو ليك السوارى .. يقلعك من جوا الانداية لى برا ... تكتر الشغب يديك عكاز عكازين و يربطك بعمتك فى سرج الحصان و ما يفكك الآ داخل القسم !!
اللطيف فى الموضوع انو الانداية كانت بتقفل الساعة الخامسة مساء بـ " صفارة " طويلة من بوليس السوارى .. كملت قرعتك تطلع برا ما كملتها برضو تطلع برا .. وبعدين بوليس السوارى بنتظر لحد ما آخر واحد يخرج .. وبعد داك يكون ماشى ورى الجماعة الطاشمين .. تعمل ازعاج فى الطريق يركبك عكاز .. تكتر " الحراسة " طوالى و تانى يوم " محكمة العمد" .. يعنى مافى اى جوطة الزمن داك .. حتى فى الانادى !!
ايه رأيك فى بوليس سوارى هنا ؟؟
|
Post: #7
Title: Re: هاك سف وأدي اُمك اتسف ولا قوني على الانداية ... !!!
Author: حسن حماد محمد
Date: 05-14-2011, 10:04 PM
Parent: #1
Quote: يعني زمن السودان كان سودان والمريسة كانت الغذاء الرئيسي والتمباك كان الترفيه الوحيد ...
|
ياتبارك مالك علينا مرجعنا للزمن السمح داك
يالله من البوقنية وشية الجمر
تحياتى حجر
|
Post: #8
Title: Re: هاك سف وأدي اُمك اتسف ولا قوني على الانداية ... !!!
Author: الرفاعي عبدالعاطي حجر
Date: 05-15-2011, 01:49 PM
Parent: #7
سلام لكم من الاول ولى عند الآخر
القصة قصة حواجز انكسرت تب ما بتعرف المثقف
من القاص من الكاتب من الصعلوك من الغفير الى
الوزير لا حدود ولا خطوط كل يقول ما يريد وعلى كيفو
والماعاجبو يشرب من البحر والناس على دين ملوكها
فالفوضى عمت القرى والحضر ...
وبرضو شكراً
وبرضو نرجع للمثل
هاك سف واد امك التسف ولاقوني على الانداية ....
سعادتك وتبارك وهيثم ياحليل الانادي بالله أقرأوا
للطيب محمد الطيب كتابه الأنداية وتأملوا اي
انداية نقبع فيها الان .
.................................................حجر.
|
Post: #9
Title: Re: هاك سف وأدي اُمك اتسف ولا قوني على الانداية ... !!!
Author: تبارك شيخ الدين جبريل
Date: 05-16-2011, 11:48 AM
Parent: #8
ونحن من متين كان عندنا الحواجز الإجتماعية القاعد تتكلم عنها دي؟
تدخل بيت بكا ولاّ بيت عرس ... ما بتعرف البغسل ليك يدينك دا حرامي بتلب فى البيوت ولاّ من حملة الدكتوراة ....
ما ياهو حالنا من الله خلقنا ... لا عندنا حواجز طبقية لا عرقية لا حواجز نوع ... عندنا القبلية القبيحة ديك ... وممكن تتجمّل ...
لأنو ما عيب الزول يفتخر بى قبيلتو ... العيب يحقر بالقبايل التانية ... وفى الآخر كلنا اولاد قبايل ...
... المهم ....
|
Post: #10
Title: Re: هاك سف وأدي اُمك اتسف ولا قوني على الانداية ... !!!
Author: الرفاعي عبدالعاطي حجر
Date: 05-16-2011, 01:01 PM
Parent: #9
تبارك ازيك
على اقل تقدير الحدود موجودة
بين ان تسف وبين ان تسف قدام
ابوك دا ما حد يااخوي .
...............................؟؟؟
|
|