في امر ورجغة مدير موية الخرطوم وحديث البلوفة...!!!

Post: #1
Title: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 06:43 PM
Parent: #0

في البداية من الضروري الاشادة بمفردة (ورجغة) تلك فلقد لاقت هوي في نفسي هذه الايام وقبل ما تتهادي في مخيخي الايسر وجدت امامي اكبر ورجغة هندسية في عالم اليوم في حديث مدير مياء الخرطوم في تصريح الغريب وعجيب في امر (تقفيل بلوفة الموية) للاحياء السكنية من قبل جهات سياسية معارضة ...
وهذا التصريح يعتبر تصريح ذو خطورة عليا كونه مرتبط بمورد حيوي واساسي ومهم اهمية قصوي كون اي زول في هذه الخرطوم بشرب موية علي مدار اليوم..وكون الماء هي عصب الحياة والحديث عن امرها وامورها يحتاج الي جدية عالية وشفافية اعلي وامانة علمية وانسانية..!!!

وسنتابع

Post: #2
Title: Re: في امر ورجغة مدير موية الخرطوم وحديث البلوفة...!!!
Author: osman righeem
Date: 05-11-2011, 06:48 PM
Parent: #1

في التمانينيات عرف عن الجبهة القومية الاسلامية انه كان لها نشاط

واسع في التلاعب في السلع التمونية لخلق ازمات و ضائقة معيشية

ولقد اعترف بعض نشطاء الجبهة بهذا السلوك فلو مدير الموية في الخرطوم

هو خالد جردل (رئيس اتحاد طلاب الخرطوم وقنها ) فبكون في باله لسه

حكاية لواري الفحم

Post: #3
Title: Re: في امر ورجغة مدير موية الخرطوم وحديث البلوفة...!!!
Author: احمد الامين احمد
Date: 05-11-2011, 06:52 PM
Parent: #2

إعادة نشر:
Quote: خالد حسن مدير مياه الخرطوم
كضاب ومستهبل
فى العام 2009 تم
إستضافته فى قناة الجزيرة
برنامج (حديث الناس) التابع للنشرة
الإقتصادية حول مشكلات مياه فى ام بدة جنوب تحديدا
وتم فى البرنامج حديث مباشر مع مواطنين ومواطنات من ابدة
أكدوا أن مواسيرهم فى البيوت ( بتشخر) دون إنزال ماء
لعدة أيام رغم دفعهم لفواتير الماء بصورة منتظمة
فكان رد المهندس الإنقاذى المستهبل حسن كمايلى:
توجد مياه فى امبدة لكن المشكلة مواطنين ام بدة
يريدون مياه موصولة من النيل مباشرة!!!
فقال له المذيع :
من حق اى مواطن أن يشرب المياه التى يرغب فيها
وتحديد مصدرها إن توفر...
فأبتسم المهندس الإنقاذى ( بذات بسمة على عثمان ومن قبله
المرابى الترابى اللذين تربى فى بؤرتهما للكذب والدجل )
قائلا للمذيع أنظر لخلفية الاشجار خلفى فى الصورة
إنها خضراء ممايدل على وجود ماء بالخرطوم وطبعا خلفية الاشجار
خلفه كانت الاشجار المحيطة بكلية القرأن الكريم التى تظهر
فى خلفية الصور من قناة الجزيرة عبر البث المباشر للخرطوم....
فضحك المذيع وقال له :
الاشجار يمكنها ان تنمو على ماء امطار ومياه غير نقيه
لكن الانسان من حقه شرب مياه نقية...
قبحا لرجال الإنقاذ ...

Post: #4
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 06:53 PM
Parent: #2

Quote: في التمانينيات عرف عن الجبهة القومية الاسلامية انه كان لها نشاط

واسع في التلاعب في السلع التمونية لخلق ازمات و ضائقة معيشية

ولقد اعترف بعض نشطاء الجبهة بهذا السلوك فلو مدير الموية في الخرطوم

هو خالد جردل (رئيس اتحاد طلاب الخرطوم وقنها ) فبكون في باله لسه

حكاية لواري الفحم

نعم وبكل اسف نفس هذه العقلية هي الان من تتحكم في مياء البلاد والعباد
وتذهب وبكل استهتار الي نفس التبرير العجيب المخزن في مخيخه الايسر ولم يتطور كما لم يتطور وعيه الهندسي فعمد الي الاستهبال ومحاولة غشغشة الناس باطروحات موغلة في التسطيح (بايب فيتر) خبرتو يومين في الموية ما بقول كلام غريب وعجيب ومستهتر زي ده خليك من مهندس درس ما درس

Post: #5
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 07:02 PM
Parent: #4

شكرا يا احمد وتحياتي...
خالد بلوفة عاوز يلعب بولتيكا ويستهبل
شبكة المياه عبارة عن مصدر وخطوط رئيسة ومن ثم خطوط فرعية ثم (الاند يوزر) اي المستخدم الاخير سوي كان منزل او غيره.. ومن ثم تحكم ومراقبة وتفتيش عبر محطات كبري وصغري واصغر تتواجد وهي جزء اساسي من هذه الشبكة
يعني لو حصلت مشكلة في موية من مويات المنطقة (س) فان بكل سهولة وعبر نقاط هذه المراقية والتفتيش يمكن معرفة مكان الخلل بكل سهولة ويسر وعبر خبرات فنية لا تحتاج الي مهندس نحرير بل تيم من اتيام الفنين يمكنهم العمل بكل سهولة في هذا الامر وتوضيبه واصلاحه.... هكذا هي الشبكة في كل نقتها التي يحاول خالد عبر الاستهبال والتغبيش ان يرسلها الي اردب سمسم واللعبثة والورجغة عليها..
وهي شبكة متكاملة وموضبة توضيب علمي مدورس ومعروف وساهل وبسيط جدا..

Post: #7
Title: Re: في امر ورجغة مدير موية الخرطوم وحديث البلوفة...!!!
Author: دينا خالد
Date: 05-11-2011, 07:15 PM
Parent: #5

Quote: جهات سياسية منظمة تقف وراء شح المياه،
بإقفال الـ (بلوفة) في الشبكة،

كريم ازيك
غايتو المسئولين دبل يوم بكتلوا المواطنين بى تصريحاتهم دى
لوووووووووب .. بقفلوا البلوفة ؟؟؟

هم السياسيين كان عارفين البلوفة بى وين دا كان حالهم ؟؟؟

ــــــــــــــــــ
وطيب ناس الامن وين ؟ ما يقبضوهم
يعرفوا يقبضوا الناس فى المظاهرات السلمية ؟
والتى لا تؤثر على الحاجات المعيشية للناس !!

Post: #9
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 07:32 PM
Parent: #7

Quote: هم السياسيين كان عارفين البلوفة بى وين دا كان حالهم ؟؟؟

لوووووول

Quote: وطيب ناس الامن وين ؟ ما يقبضوهم
يعرفوا يقبضوا الناس فى المظاهرات السلمية ؟
والتى لا تؤثر على الحاجات المعيشية للناس !!

وهلا يا دينا
ودي الجزئية الاخطر والاهم والاكثر عصلجة في ورجغة خالد بلوفة ده..
في حاجة اسمها الامن المائي ومصدر كبير وعريض ومهم وحيوي زي ده لمن تحصل فيهو لعبثة و تلاعب
اول حاجة مفروض تتعمل هي اعلان (حالة الطوراي القصوي) فالمواطن معرض لخطر داهم وهنالك ايادي تعبث بالماء عصب الحياة..ولكن ناس خالد بلوفة ومن لف لفهم من بني كوز حتي هذه الطواري القصوي عندما يكابسهم زول في كراسيهم المنها بورجغو دي..
قمة الاسفف والاستهبال والاستهتار بارواح الناس وقمة الامسئولية علي كل المستويات
السياسي
الهندسي
الانساني
وكل الود

Post: #8
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 07:18 PM
Parent: #5

يا رغيم خالد حسن ده لمن جينا الجامعة كان رئيس اتحاد الطلاب السودانين
ولقينا صور في النشاط خالد ده رافع يدو فووووووق مع نميري
واها وبعدين ديشليون سنة ونيف صحينا ذات مساء ولقيناهو مورجغ بلووووفة فوووق برضو مع البشيرويا سبحان الله او كما قال ابو ضفيرة

Post: #6
Title: Re: في امر ورجغة مدير موية الخرطوم وحديث البلوفة...!!!
Author: محمد عبدالرحمن
Date: 05-11-2011, 07:07 PM
Parent: #4

قبل ايام نشرت وكالة الانباء التابعة للمؤتمر الوطنى خبر
فيهو (ورجقه ) كتيرة جدا ..الشيء الوحيد الممكن تفهمو منو
انو هناك سيده تسمى حواء جنقو تمارس التنصير فى معسكرات
النازحين ..وصراحة محتوى الخبر وطريقة صياغتو و(حبكتو)
حاجة تخجل ..وتخليك تجزم انو الزول الكاتب الخبر دا ماعندو
علاقة باى حاجة ..وقبل ماتكتمل الدهشة والضحكة اتفاجانا
بتصريح السيد المهندس مدير المياه بولاية الخرطوم ..كون
ان هناك مخربون يعيثون فسادا فى البلاد ..وتمتد اياديهم
العابثة لبلوف المياه وتمارس فيها التخريب ..خاصة البنات
البجن راكبات رقشات ديل ..
على فكرة الهرجلة والورجغة البعمل فيها المؤتمر الوطنى دى
شيء طبيعى جدا ..بتناسب مع مستوى قيادة المؤتمر الوطنى
ناس نافع وقطبى وكرتى وكمال عبيد وامين حسن عمر ..بالله تاملوا
فى الاسماء دى ..كل خبرتهم السياسية انهم كانوا قيادات فى
جهاز الامن ..وياريت الامن ذاتو مكربنو ...خيال مآتة (راسو
عديل ) البحكم فينا دا ..يااخوانا النظام دا انتقل للرفيق
الاعلى واصبح من الاموات ..واكرام الميت فى ديننا الحنيف
هو دفنه ..فتقدموا لتشييعه لمثواه الاخير ..وحدووووه يامؤمنين...

نجلس القرفصاء ياهندسة لناخذ دروس التامين الهندسى ..لنا
وللمدير ومن لف لفه ...

Post: #10
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 07:40 PM
Parent: #6

Quote: البجن راكبات رقشات ديل ..
على فكرة الهرجلة والورجغة البعمل فيها المؤتمر الوطنى دى
شيء طبيعى جدا ..بتناسب مع مستوى قيادة المؤتمر الوطنى
ناس نافع وقطبى وكرتى وكمال عبيد وامين حسن عمر

نعم يا محمد والروجغة او الورجقة دي وليد التهتك الاداري والسياسي والليلة جابت ليها تهتك هندسي عجيب وغريب والناس ديل ماعندهم اي خبرات في شوون البلاد والعباد وداقشين القصة دي عنقلة واستهبال وتامين القصة تكبير وتهليل ولادحة كما في نافع واستهبال كما امر خالد ورجغة ده ..وكتل حيل وكلام ميت كما في امر امين حسن عمر.. وبلطجة كما في الهارب المرفوت غوشششششش واخرين...

ونستابع في امر الورجغة من عدة زوايا وجهات
حتي نضرب هذا المدير المستهبل ضرب غرائب الابل الكيزانية المورجغة

Post: #11
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 07:47 PM
Parent: #10

الموية البتجي للمستخدم عبر شبكة الموية كما في امر شبكة الخرطوم وغيرها..
ملاحظة وجود خلل في سريان الماء في حاجة اسمها (الكنترول) او التحكم في المياء بيعرف وبحدد الموية الماشة الديم كم..والماشة ابو سعد كم... وبعرفها مشت ولا عصلجت في حتة من الحتات ومجرد معرفة الخلل فهنالك (طوراي المياه) ودي مفروض تكون شغالة 24 ساعة وجاهزة موية ونور وفنين ...يعني لو انت في بيتك وما لاحظت الموية قاطعة لاي سبب من الاسباب فالكنترول القاعد في مكتبو ده وبصرف قروش من جبين هذا الشعب مفروض يعرف الحاصل علي مويتكم في ابو سعد شنووووووو...ويقوم بابلاغ الطواري او الصيانة او حسب الترتيبات الادارية في هيكلية ادارة الشبكة...

Post: #12
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 07:58 PM
Parent: #11

نجي الي البلوفة دي زاااتها القال خالد ورجقة ده.. قفلوها الساسة المجرمين ديل..
علي طول وعلي كل امتدادت شبكة موية من مويات مدنية من المدن..
البلوفة او نقاط (مفرق) المواسير بتكون متواجدة وبمستويات مختلفة وباحجام ماسورية مختلفة مهام توزيعية محددة ومعروفة ومدورسة... وهي في الغالب تكون مامنة تامين عالي علي مستوي التحكم في فتحها وفي قفلها
وما كل زول من طرف حتي داخل الادارة المعنية بالموية يحق لها ان يفتحها او يقفلها وحتي المشي للعمل فيها يتم باذونات عمل موقعة من مهندس مسئول مسئولية تامة.. ...ولو انت مقاول بتاع طريق او بتاع اي مصيبة فيها حفر وعندك شغل علي مسافة قريبة من هذه النقاط وذلك الخط مفروض تمشي لادارة الموية ويدوك الاذن بالاقتراب حسب مواصفات شبكات المياه التي تضمن سلامة السريان وسلامة الماء في داخل الشبكة وحمايتها من اي خراب او تلف او لعبثة...
فهل خالد بلوفة العامل فيها مدير مدير ومدور فينا ورجغة ورجغة عندو سيتسم زي ده
اداري
وفني
وتاميني
ولا بس ورجغة في الفاضي وبدلة وكرفتة ومدير مورجغ

Post: #13
Title: Re: في امر ورجغة مدير موية الخرطوم وحديث البلوفة...!!!
Author: الشفيع وراق عبد الرحمن
Date: 05-11-2011, 08:08 PM
Parent: #12

كيكي سلام
باختصار انا برضو ما مصدق حكاية البلوفة دي
وكمان ما مصدق انك متوقع يكون في الخرطوم سيستم وكنترول زي الوصفته ده

Post: #17
Title: Re: في امر ورجغة مدير موية الخرطوم وحديث البلوفة...!!!
Author: محمد عبدالرحمن
Date: 05-11-2011, 08:21 PM
Parent: #13

البمنع شنو يالشفيع ؟

الخرطوم فيها الفلل الرئاسية ..وفيها فلل الخاصة المصممة
على احدث مايكون ..احواض السباحة والاثاث الصينى والرخام
والسيراميك المستورد بالطائرات ..الفلل التى يقف على
ابوابها الحراس والسيكورتى قارد لزوم البرستيج ..الخرطوم
ياالشفيع يركب بعض خاصتها الهمر والمرسيدس والبورش و
احدث ماانتجته مصانع السيارات فى العالم ..الخرطوم ترسل
اولاد الخاصة للدراسة ببريطانيا وامريكا على حساب الفقرا
والغبش ..لو كان هناك عدل لذهبت ا موال الخاصة وممتلكاتهم
التى نهبوها بغير وجه حق لذهبت لتامين حق الفقراء والغبش
فى تناول مياه شرب نقية ..فقط مياه شرب ..لا اكثر واقل ..
هل تعجز كل هذه الاموال المنهوبة عن توفير مياه شرب نقية
لمواطنى الخرطوم ؟ ..أقول الخرطوم ..لان بعض المناطق فى السودان
لاتعرف حتى الآن المياه التى تتقطر من المواسير ...
وهل تعجز كل هذه الاموال عن تطبيق هذا السيستم الذى تحدث
عنه كيكى ؟..لم يتحدث عن سيستم لاطلاق اقمار صناعية ..تحدث
عن نظام لتامين وتوفير مياه الشرب لدولة تعيش فى
عصر العولمه وليس العصر الحجرى ...

Post: #14
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 08:11 PM
Parent: #12

والبلوووفة دي زاااتها في روحها مكانها واحداثيات تكوينها في الشبكة ما كل زول كشمشة مفروض يكون عارف محلها لانو دي وااحدة من الموجدات المتواجدة في شكل (خرط) بتعامل معها التيم الفني العامل في ادارة هذه الشبكة وفي دائرة فنية ضيقة.. ولانها علي مستويات عديدة في مهامها (يعني في بلوفة ممكن مثلا تشوت لمنطقة شمال الخرطوم.. خط ووواحد مثلا..
ومن هذه البلوفة بتمشي خطين لشمال شرق الخرطوم وواحد لشمال غرب الخرطوم
وشمال شرق الخرطوم يتفرع لعدة خطوط
وشمال غرب ايضا..
ويعني لو انا عاوز افقل خط بري مفروض اكون عارف بالتحديد الخط الماشي لبري ده وووووووين بلوفتو وسط كل هذه الشبكة البلوفية عشان اقفل برررري مثلا وما اقفل امتداد ناصر... كونهما في بلوفة من البلوفات مشتركات في نقط التحكم...
وهذه الورجغة الخالدية بتعكس ايضا اتهام واضح لموظفيه ومهندسية بالتورط في هذه الكذبة الرخيصة بتمرير معلومات اساسية واستراتجية لجهات سياسية معادية..
لانو القليلين من المهندس هم من يعرف اسرار مثل هذه الشبكات التصميمية ويرسل ايضا اتهام للشركة المصصمة والمنفذة ببيع معلومات في غاية الاهمية الاستراتيجية للامن المائي العاصمي
ونستابع

Post: #15
Title: Re: في امر ورجغة مدير موية الخرطوم وحديث البلوفة...!!!
Author: ود الباوقة
Date: 05-11-2011, 08:17 PM
Parent: #14

كيكي

الشبهة الجنائية ما زالت موجودة

ومافي شيء مستبعد من حزب شغلو كلو ام غمتي

Post: #18
Title: Re: في امر ورجغة مدير موية الخرطوم وحديث البلوفة...!!!
Author: د.محمد حسن
Date: 05-11-2011, 08:31 PM
Parent: #15

الاخ عبدالكريم
تم اضافة مصطلحك هنا
الــــمــــورجــغــــــــــون

Post: #25
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 09:24 PM
Parent: #18

Quote: الاخ عبدالكريم
تم اضافة مصطلحك هنا
الــــمــــورجــغــــــــــون

تحياتي يا دكتور
وشكرا علي رابط المورجغون وانه عصر وزمان الورجغة والمورجغون يا دكتور
وهذا زمان المهازل فالتمرح

Post: #24
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 09:16 PM
Parent: #15

Quote: الشبهة الجنائية ما زالت موجودة

ومافي شيء مستبعد من حزب شغلو كلو ام غمتي

هلا يا ببقبق
وانا متاكد انو الورجغة دي في المنبر بتمشي في راس ثلاثة بس وصدق حدسي
1- ود الباوقة
2- المكاشفي
3- معتز قريش..
ومادام في شبهة جنائية القاعدين ليها شنووو والراقص ليها البشير شنووو وموية البلاد والعباد حاصل فيها لعبثة
جيبو المجرم ده وفورا وطالما خالد ورجغة حددو كجهة سياسية فضروري وفي اطار الشفافية الشعب يعرف منو البلع بحياة ومائه وفوررررررررا...
وغير كده دي ورجغة واستهبال ولعب علي الدقون وعدم مسئولية.. سخف كبير موسف تماما يا باوقة

Post: #57
Title: Re: في امر ورجغة مدير موية الخرطوم وحديث البلوفة...!!!
Author: abas
Date: 05-12-2011, 09:03 AM
Parent: #15

كيكي

الشبهة الجنائية ما زالت موجودة

ومافي شيء مستبعد من حزب شغلو كلو ام غمتي

يا جماعه الزول ده دحين نصيح ولا مشربنو عمل

ولا الحاصل عليه شنو

يا ود الباوقه خليك شويه ما تبقي زي صاحبك تخلي الناس تضحك علي روددك دي ياخ ما لك ما كنت كويس الحصل عليك شنو ياخ

Post: #16
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 08:20 PM
Parent: #14

Quote: باختصار انا برضو ما مصدق حكاية البلوفة دي
وكمان ما مصدق انك متوقع يكون في الخرطوم سيستم وكنترول زي الوصفته ده

هلا يا الشفيع
وكون ماتصدق كلام خالد ده كلام مسسئول وهندسة مالية يمنيها بدون شك..
الكنترول والتحكم في الموية بالطريقة البسيطة الشرحتها دي يا الشفيع متواجد في كل شبكة بتاعة موية في العالم فلازم
مصدر
شبكة
تحكم
مراقبة
ودي حاجات اساسية لو ما اتلقت مافي موية بتمشي في ماسورة في اي بلد من البلدان الا مطرة
---
معاك ما بتوقع ايضا ان تكون هناك سيتسم متطور ومراقب بكافة ودقة عالية كما في باقي البلاد المتطورة
ولكن طالما هناك شبكة من الشبكات ومهما كان مستوي تخلفها فان الاشياء الاربعة الفووق دي مافي غني عنها وقادرة بمستوي من المستويات من تمشية الموية في المواسير حتي المستخدم الاخير...
والا خالد ده مدير بتاع شبكة مورجغة ومواسير مدفونة زيها وزي اي كوابل ميتة
ودي تبقي جزئية ايضا ذات نقة اخررررري.... وووووووووين التطوير ووووين الاهتمام بمياء البلاد والعباد
وووووين الاموال التي انفقت علي تطوير هذه الشبكة وعييييييييييييييييييييييييييك

Post: #21
Title: Re: في امر ورجغة مدير موية الخرطوم وحديث البلوفة...!!!
Author: الشفيع وراق عبد الرحمن
Date: 05-11-2011, 08:59 PM
Parent: #16

Quote: .يعني لو انت في بيتك وما لاحظت الموية قاطعة لاي سبب من الاسباب فالكنترول القاعد في مكتبو ده وبصرف قروش من جبين هذا الشعب مفروض يعرف الحاصل علي مويتكم في ابو سعد شنووووووو...ويقوم بابلاغ الطواري او الصيانة او حسب الترتيبات الادارية في هيكلية ادارة الشبكة...

يا كيكي
انا ساكن في حي فاخر نسبياً في الرياض، وما عندنا زي سيستمك ده، ممكن تكون الخطوط الرئيسية لكن الفرعية وخط العميل، لا اظن

Post: #27
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 09:33 PM
Parent: #21

Quote: انا ساكن في حي فاخر نسبياً في الرياض، وما عندنا زي سيستمك ده، ممكن تكون الخطوط الرئيسية لكن الفرعية وخط العميل، لا اظن

هلا يا الشفيع
والقصة ما ظن واعتقاد..
1-وبلوفة التحكم عند العميل ياها البلوفة الجنب الحيطة بتاعة ببيتك (ممكن تكون بره او في طرف الحيطة من جوووه) وخط العميل بطلع من الخط الفرعي وفي العادة ما بمشي لمسافة كبيرة ويتم التحكم فيه بالبلف بتاع البيت
2- الخط الفرعي طالع من الخط الرئيسي ومافي شبكة في العالم او اي بايب مدفون في التراب ده بدفن بدون ما تعمل ليهو نقاط تحكم ومراجعةوتفتيش والا تكون دي ماهندسة وتكون ورجغة ودفن (بايب وكراعو برره)..
طالما هنالك شبكة للموية بالشبكة للموية عندها مكونات تصميمة معينة ومعروفة محسوبة ومكونات هذه الشبكة محددة التوصيف والمهام...وبدون هذه المكونات بكون الشي ده ما شبكة ...
فبالله ما تزيد الورجغة يا الشفيع وخلينا ننوم الليلة علي ورجغة خالد بلوفة دي..

Post: #51
Title: Re: في امر ورجغة مدير موية الخرطوم وحديث البلوفة...!!!
Author: الشفيع وراق عبد الرحمن
Date: 05-12-2011, 06:41 AM
Parent: #27

اها يا كيكي خليناك نمت وجيناك مع صباحات الرحمن
انت زول مهندس، اديناك كلام هندسي
كلامك الاخير عن الكنترول ما عندنا فيهو كلام وبالتاكيد يوجد محبس او بلوفة في كل نقطة

سؤالي ليك، كيف بتاع الكنترول يعرف انو الموية عند العميل قطعت؟
عشان هو يعرف لازم يكون في رموت سنسر،،،،صاح؟
وعشان يكون في رموت سنسر لازم يكون في فيدباك
وعشان الفيدباك يصل الكنترول لازم يكون في شبكة اتصال
وعمل شبكات اتصال راجعة من كل نقطة عميل شغلة متطورة جدا جدا وما اظنها موجودة حتى في (حي بروة) عندكم
ممكن الكنترول يعمل مونترنق للتدفق في الشبكة الرئيسية بحساب الكمية، ولكن لشبكة العميل مستحيل بدون الكلام الذكرته ليك ده
ولو عندك تصور جيبه

صباحاتك خير وسرور

Post: #60
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 09:37 AM
Parent: #51

Quote: سؤالي ليك، كيف بتاع الكنترول يعرف انو الموية عند العميل قطعت؟
عشان هو يعرف لازم يكون في رموت سنسر،،،،صاح؟
وعشان يكون في رموت سنسر لازم يكون في فيدباك
وعشان الفيدباك يصل الكنترول لازم يكون في شبكة اتصال
وعمل شبكات اتصال راجعة من كل نقطة عميل شغلة متطورة جدا جدا وما اظنها موجودة حتى في (حي بروة) عندكم
ممكن الكنترول يعمل مونترنق للتدفق في الشبكة الرئيسية بحساب الكمية، ولكن لشبكة العميل مستحيل بدون الكلام الذكرته ليك ده
ولو عندك تصور جيبه

صباحاتك خير وسرور

هلا يا الشفيع ..
ونعم كلامك صحيح علي مستوي (الاند يوزر) كفرد كلام في محلو وعشان كده(الدسك) بتاع الشبكة للتفاهم مع العميل الفرد هو الطواري وبالذات في شبكات زي بتاعتنا في الخرطوم دي..ولكن الخطوط الفرعية (كخط حي من احياء الخرطوم او حتي مجموعة من وحدات سكنية في هذا الحي) بسهولة جدا وعبر نقاط مراقبة الضغط يمكن معرفة وقراية (الضغط والبلوك) لانو بوثر علي ضغط المياء في الانبوب..وهي نقاط متوزعة بتصميم محسوب...والاشكال في الخط الفرعي باثر في ضغطه علي الخط الرئيسي..
الشبكة بالتاكيدوعلي مدار اليوم من المفترض يحصل (فيد باك) للكنترول بالضغط الموجود في الشبكة من نقاط تحكم اساسية معروفة وظائفها والمسارات التي تغذيها والضغط (المثالي) فيها وده جزء من الاستفادة من الرقابة في التحكم والاطمئنان علي انو الشبكة كلها (وزن الضغط المثالي) لكل مسار او فرع من فروع الشبكة...
الجيوش العرمرم بتاعة (خالد بلف) دي مفروض وعلي مدار ساعات اليوم فيها تيم جاهز وبعمل علي حماية الشبكة دي ومراقبتة ضغط الخطوط فيها
علي المستوي الرئيسي وعلي المستوي الفرعي وعلي مستوي العميل عبر نافذة (الطواري)

Post: #71
Title: Re: في امر ورجغة مدير موية الخرطوم وحديث البلوفة...!!!
Author: الشفيع وراق عبد الرحمن
Date: 05-12-2011, 08:32 PM
Parent: #60

اذا لا خلاف يا حبيب
Quote: (خالد بلف)

تدهور مريع من (جردل) لي (بلف)
الراجل ده بالمناسبة تقريبا دفعتي وهو للامانة راجل خلوق وشغيل سكنا جنب بعض واطاقشنا كتير جدا
وانا على يقين انه لا ينام الليل بسبب المشاكل دي

Post: #72
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 09:06 PM
Parent: #71

Quote: تدهور مريع من (جردل) لي (بلف)
الراجل ده بالمناسبة تقريبا دفعتي وهو للامانة راجل خلوق وشغيل سكنا جنب بعض واطاقشنا كتير جدا
وانا على يقين انه لا ينام الليل بسبب المشاكل دي

هلا يا الشفيع
وخالد ده لمن جينا الجامعة كنتو اتخرجتو انتو وكان اول صورة تواجهك في النشاط هي صورته الشهيرة مع نميري..
جردل دي ما حضرناه وماعندي خبر تفاصيلها ولكن (بلف) دي حتسير بها الركبان وبالمناسبة حتظل في الذاكرة الحية ...
وتصريحه ده يا الشفيع ما تصريح زول (شغيل) ده تصريح زول عاوز يلقي ليهو اقرب شماعة من طرف ويلصق فيها المشاكل والفشل...وده بيني وبينك ما سلوك زول شغيل
وتحياتي

Post: #23
Title: Re: في امر ورجغة مدير موية الخرطوم وحديث البلوفة...!!!
Author: محمد البشرى الخضر
Date: 05-11-2011, 09:04 PM
Parent: #16

المؤسف يا كيكي ان مثل التصريح دا قائله عارفه محض ورجغة لكن رغم كدا بقولو وممكن يعيدوا تاني وتالت و الصحافة تنشر ليه كمان
دا إن دل على شيئ فيدل على استهانة الحكومة بالشعب و استوطاء حيطته لدرجة حتى عدم الاهتمام بتنميق الكذبة او تجميل وجهها
وعدم القائها بالا لأي رد فعل محتمل من الشعب حتى فيما يمس حاجاته الاساسية و حقوقه الماواعي بيها
موية شراب دي لا سياسة لا ديمقراطية لا حرية تعبير دا حق اساسي اعتى الدكتاتوريات بتوفرو للشعب كواجب وليس منحة
وطارت رقاب مسؤلين زي اخونا دا لما قصروا فيها في دكتاتوريات افظع من الانقاذ في الكتلة الشيوعية و الصين و العراق سابقا
لكن هنا تعال شوف الاستهانة بينا وصلت لياتو درجة

غايتوو نقول شنو
الله غالب بس

Post: #29
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 09:40 PM
Parent: #23

Quote: دا إن دل على شيئ فيدل على استهانة الحكومة بالشعب و استوطاء حيطته لدرجة حتى عدم الاهتمام بتنميق الكذبة او تجميل وجهها

هلا ياعمك واشواقي
وتصريح مذل وخطير جدا علي مستويات عديدة...وفعلا فيهو استهتار عالي بالمواطن الغلبان المسكين ده ياااخي
واستهبال كبير..
وسيمر مرور الكرام وممكن بكرة تلقي مطلق هذا يجعجع بيهو في التلفزيون ويجد من يصفق له ويصدقه
وهذه هي الدكتاتورية يا عمك تزل وتستهبل وتبزل كل الاشياء من اجل مصلحة السلطة الحاكمة

وتحياتي

Post: #19
Title: Re: في امر ورجغة مدير موية الخرطوم وحديث البلوفة...!!!
Author: اشرف السر
Date: 05-11-2011, 08:38 PM
Parent: #14

اضربهم ضرب غرائب الابل المورجغة يا كيكي
و
معا من اجل كشف كافة المورجغين بكافة مقاسات البلوفة
من مورجغ موية الخرططوم

إلى اكبر مورجغي العالم
المورجغ الراقص

Post: #30
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 09:50 PM
Parent: #19

Quote: اضربهم ضرب غرائب الابل المورجغة يا كيكي
و
معا من اجل كشف كافة المورجغين بكافة مقاسات البلوفة
من مورجغ موية الخرططوم

إلى اكبر مورجغي العالم
المورجغ الراقص

هلا يا ابو الشوووش
وسنضربهم حتي تصيح ديوك الورجاغ
ديل مستهلبين وعاوزين يستكردوا الشعب المسكين ده
ويطلقوفي الفضاء اطروحات مستهبلة وفطير يخفون بها خيبتهم وفشلهم الذريع في ادارة البلاد والعباد
حتي علي مستوي مويتهم... تخيل المووية الوااااحدة دي

Post: #20
Title: Re: في امر ورجغة مدير موية الخرطوم وحديث البلوفة...!!!
Author: Nagat Sid Ahmed Elshiekh
Date: 05-11-2011, 08:39 PM
Parent: #14

Quote: ويعني لو انا عاوز افقل خط بري مفروض اكون عارف بالتحديد الخط الماشي لبري ده وووووووين بلوفتو وسط كل هذه الشبكة البلوفية عشان اقفل برررري مثلا وما اقفل امتداد ناصر... كونهما في بلوفة من البلوفات مشتركات في نقط التحكم...

سلام يا كيكى ،

عاوزة أعرف البلوفة الخاصة بمنطقة امبدة جنوب القفلها منو لمدة كم وعشرين سنة بالنهار ؟ومنو القاعد يفتحها باليل؟؟

ياخى البلوفة دى محلوجة وخاتين ليها جلبة ، وما لاقين زول يصلحها،

المهم ربك يستر من البلوفة بتاعة دماغنا ما تتحلج مع الورجقة دى،

Post: #22
Title: Re: في امر ورجغة مدير موية الخرطوم وحديث البلوفة...!!!
Author: عبد المنعم سيد احمد
Date: 05-11-2011, 08:59 PM
Parent: #20

قمة الاسفف والاستهبال والاستهتار بارواح الناس وقمة الامسئولية علي كل المستويات
السياسي
الهندسي
الانساني

Post: #26
Title: Re: في امر ورجغة مدير موية الخرطوم وحديث البلوفة...!!!
Author: جعفر محي الدين
Date: 05-11-2011, 09:33 PM
Parent: #22

كيكي مساء الورجغة
الورجغة الحاصلة في وراجيغ الخرطوم بتتطلب مننا
تخصيص عام كامل من عمل الأحزاب الوطنية للتوعية
فقط التوعية توعية المواطنين بحقوقهم الأساسية
ومن ثم تخصيص عام آخر لدحض ورجغات الجبهجية العقيمة

قاتل الله المورجغين

Post: #34
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 10:15 PM
Parent: #26

Quote: كيكي مساء الورجغة
الورجغة الحاصلة في وراجيغ الخرطوم بتتطلب مننا
تخصيص عام كامل من عمل الأحزاب الوطنية للتوعية
فقط التوعية توعية المواطنين بحقوقهم الأساسية
ومن ثم تخصيص عام آخر لدحض ورجغات الجبهجية العقيمة

قاتل الله المورجغين

هلا يا جعفر وتحياتي
وفعلا يااخ والورجغة الحاصلة دي دايرة ليها دعك ودرش شديد حتي تزال اثار تورجيغها
من مخيخ هذا الوطن الذي ورجغه هؤلا الكيزان ورجغة ما حصلت من اول مورجغ في العالم ده..

وانه زمن الورجغة والدغمسة

Post: #32
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 10:06 PM
Parent: #22

Quote: قمة الاسفف والاستهبال والاستهتار بارواح الناس وقمة الامسئولية علي كل المستويات
السياسي
الهندسي
الانساني

هلا يا عبد المنعم
ونعم انها اعلي مراحل الاستهبال وتني ماعارف الجبهجية ديل يقولو شنو بعد الاستهبال التاريخي ده

Post: #28
Title: Re: في امر ورجغة مدير موية الخرطوم وحديث البلوفة...!!!
Author: معاوية عبيد الصائم
Date: 05-11-2011, 09:38 PM
Parent: #20

Quote: عاوزة أعرف البلوفة الخاصة بمنطقة امبدة جنوب القفلها منو لمدة كم وعشرين سنة بالنهار ؟ومنو القاعد يفتحها باليل؟؟

متاكد مية فى المية ......حسبو عكاشة وخضر حسين ...بتوجيه من مورتا..

واشراف ما يسمى بكيكى (البلفنجى)

Post: #33
Title: Re: في امر ورجغة مدير موية الخرطوم وحديث البلوفة...!!!
Author: الصادق سلفاب
Date: 05-11-2011, 10:10 PM
Parent: #28

Quote: الشبهة الجنائية ما زالت موجودة

ومافي شيء مستبعد من حزب شغلو كلو ام غمتي

غايتو يا ود الباوقه الكلام ده لو فعلا انت مصدقه ومقتنع بيهو تبقي مصيبه
و لو انك بتحاول تلتف علي الحقائق وبتحاول تمرر تبرير خالد بلوفه ده
تبقي كارثه ......

Post: #35
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 10:19 PM
Parent: #28

Quote: حسبو عكاشة وخضر حسين ...بتوجيه من مورتا..

البلوفة بتاعة امدرمان والكلاكلات كلها بتكون في مخيخ الثلاثي ده الايسر والايمن
وحقو يقبضو عليهم فورا

Post: #31
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 09:59 PM
Parent: #20

Quote: عاوزة أعرف البلوفة الخاصة بمنطقة امبدة جنوب القفلها منو لمدة كم وعشرين سنة بالنهار ؟ومنو القاعد يفتحها باليل؟؟

هلا يا نجاة
واضحك الله سنونك ياااخ
وبالجد ضحكت في حكاية البلوفة البفقلوها بالنهار وبجو بفتحوها بالليل دي..
وتاني اي شعب فضل يعمل حساب البلوفة بتاعة حلتو
وشباب التغيير ديل بدل ما بفقلو السلطة العادلة تغيير تغيير ومظاهرات مظاهرات يحسن ليهم يبطلو الفصاحة دي ويحرسو البلوفات
والشعب يريد حراسة البلوفات

Post: #36
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-11-2011, 10:26 PM
Parent: #31

Quote: غايتو يا ود الباوقه الكلام ده لو فعلا انت مصدقه ومقتنع بيهو تبقي مصيبه
و لو انك بتحاول تلتف علي الحقائق وبتحاول تمرر تبرير خالد بلوفه ده
تبقي كارثه ......

تحياتي يا الصادق
وود الباوقة رائد ورجغة اسفيرية كبير وخالد بلوفة ده بكون حسسع لطش التصريح المورجغ ده من كيبورد ود الباوقة
لانو حتي ولو ما قالو خالد فان ود الباوقة ممكن عادي يششوت فيهو بوست متزغزغ
ويكثر فيهو الهييييييييع

Post: #37
Title: Re: في امر ورجغة مدير موية الخرطوم وحديث البلوفة...!!!
Author: محمد أحمد الريح
Date: 05-11-2011, 10:43 PM
Parent: #36

Quote:

قمة الاسفاف والاستهبال والاستهتار بارواح الناس وقمة اللامسئولية علي كل المستويات

بالله شوف صورة مدير المياه فى صفحة جريدة الرأي العام وتشوف الدقن الكاذبة ونظرات الإستهبال الواضحة!!!

فعلاً ورجغة!

مع التحية والشكر على الشرح الوافى ياهندسة.

Post: #38
Title: Re: في امر ورجغة مدير موية الخرطوم وحديث البلوفة...!!!
Author: Nagat Sid Ahmed Elshiekh
Date: 05-11-2011, 11:11 PM
Parent: #37

Quote: متاكد مية فى المية ......حسبو عكاشة وخضر حسين ...بتوجيه من مورتا..

واشراف ما يسمى بكيكى (البلفنجى)

التحية لكيكى البلفنجى للاشراف الدقيق ،

والمثل بقول ادى العيش لخبازو ، عشان ما تحصل ورجقة والبلوفة تكون محروسة بدل من التبرير العوير للمدير.

Post: #39
Title: Re: في امر ورجغة مدير موية الخرطوم وحديث البلوفة...!!!
Author: مرتضى احمد عبد القادر
Date: 05-11-2011, 11:40 PM
Parent: #38

Quote: من جهته إتهم المهندس خالد حسن إبراهيم مدير هيئة مياه ولاية الخرطوم، جهات سياسية منظمة تقف وراء شح المياه، بإقفال الـ (بلوفة) في الشبكة

نداء إلي كل سياسي منظم قافل ليهو بلف النبي فيك افتحو

Post: #40
Title: Re: في امر ورجغة مدير موية الخرطوم وحديث البلوفة...!!!
Author: مرتضى احمد عبد القادر
Date: 05-12-2011, 00:19 AM
Parent: #39

يعلن شباب حي الباطنية شارع بت العضيضه حملة تحت شعار (بلفك تحرسو وتفتحو ) سارع بالإنضمام للحملة

أنا كدا أبريت ذمتي قدام الحكومة شوفو حسبو خضر ديل اسي بكونو قفلو البلوفة ومشو نامو

Post: #42
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 05:26 AM
Parent: #38

Quote: والمثل بقول ادى العيش لخبازو

وفي مثل دارفوري يا بيكاسو بقول
بلوفة كان خرب ورجاقو سسسسسساهل

Post: #41
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 05:16 AM
Parent: #37

Quote: بالله شوف صورة مدير المياه فى صفحة جريدة الرأي العام وتشوف الدقن الكاذبة ونظرات الإستهبال الواضحة!!!

فعلاً ورجغة!

هلا وتحياتي يا سعادتك
وهذا المدير ابو دقن سليل دكتاتوريات ومساكك حكاية دكتاتور دكتاتور منذ ان كان طالبا في الجامعة منذ زمانات جعفر نميري..
وفجاة كده لقينا مدير لمياه الخرطوم وكما يبدو بان كل شغل شبكة موية الخرطوم (ورجغة في ورجغة) طالما هذا المدير صاحب التصريح المورجغ هو من يديرها..
وانه فقه الورجغة يا سعادتك وزمانات المهازل

Post: #43
Title: Re: في امر ورجغة مدير موية الخرطوم وحديث البلوفة...!!!
Author: خالد العبيد
Date: 05-12-2011, 05:39 AM
Parent: #41

كتب ود الباوقة :
Quote: كيكي

الشبهة الجنائية ما زالت موجودة

ومافي شيء مستبعد من حزب شغلو كلو ام غمتي

كيزان ورجغة
جابت ليها جنايات
مع انو معلق صورة هارون جنايات في بروفايلو

ورجغة البلوفا دي ذكرتني حكاية
والله يا كيكي
عايز احكي ليك قصة البوبينا
لكن برفدوني من البورد!!

يا بكري رجع الماسنجر!!

Post: #44
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 05:39 AM
Parent: #41

Quote: أنا كدا أبريت ذمتي قدام الحكومة شوفو حسبو خضر ديل اسي بكونو قفلو البلوفة ومشو نامو

هلا يا مورتا
وحبابك يا قافل بلوفة الشعوب
وعلي السادة حسبو وخضر التوجه وفورا وفتح البلوفات التي (سكروها) او قفلوها في نواحي الكلاكلة و ام درمان
ونحن كقافلي بلوفة من خارج الحدود ظلننا يوماتي رحيل نردد نشيدنا المحبب(يا بلف انا تهت من تعب السفر)...

وبعدين يا مورتا بدل تجو تكوركو وتجقلبو هنا (خجونا) خجونا
بطلو الفصاحة دي واحرسووو البلوف وخلو في الانتخابات الجاية دعايتكم الانتخابية مبنية علي عدد نوبات حرس البلوفة في نواحي الحارة الرابعة وحددو ليهم نوع البلف الحرستو ونصف قطر الماسورة الفيها البلف وسرعة الموية عند البلف...

وبمناسبة الحارة الرابعة في الثورة دي يا مورتا سمعت بزول اسمو (ميوووو)
يا سسسلام علي (ميوووو) ده ياخي

Post: #45
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 05:49 AM
Parent: #44

Quote: ورجغة البلوفا دي ذكرتني حكاية
والله يا كيكي
عايز احكي ليك قصة البوبينا
لكن برفدوني من البورد!!

هلا يا خالد
وتصدق حكاية البوبينا دي قريت التشويق بتاعك من الصبااااح في بوست خضر وسال ليها لعابي تماما
وشكلي ح اسكك زنقة زنقة ما سنجر ماسنجر عشان اسمعها
وممكن اشتريها منك بحكاية (الجان الاضانو تقيلة) القاعد في بيت المرة العجوزة لزوم التبادل التجاري و(البلفي)
-----
ود الباوقة مورجغ كبير وزي ورجغة زولهم ده بتعجبو وممكن يدق فيها طار سنة ونص..
وانا عندي اقتراح لناس الانقاذ ديل يعينو ود الباوقة مدير للكهرباء عشان يحصل هاروموني ورجغي ما بين الموية والكهرباء
وينتعش الاقتصاد

Post: #46
Title: Re: في امر ورجغة مدير موية الخرطوم وحديث البلوفة...!!!
Author: خالد العبيد
Date: 05-12-2011, 05:53 AM
Parent: #45

اها اديني ايميلك هنا
لكن اوعك تجيب اسمي
سمح!!
[email protected]

Post: #50
Title: Re: في امر ورجغة مدير موية الخرطوم وحديث البلوفة...!!!
Author: ahmed haneen
Date: 05-12-2011, 06:22 AM
Parent: #46

كيكي المورجغ

سلامات

ياخي خالد ورجغة افشل مهندس يتخرج من جامعة الخرطوم ..

تعال احكي ليك قصة وجع القلب ..

قبل شهرين الموية قطعت تب ولا نقطة في بحري ( الختمية والمزاد)

مشينا ناس الطوارئ وهم في بداية شارع المزاد وراء سينما بحري الوطنية

اي في حي الوابورات

لقيناهم قاموا من العشاء وبغسلوا في ايديهم .. قلنا الحمد لله

اهو الجماعة عندهم موية ...

قمنا حكينا ليهم وشكينا ليهم ...

سجلوا البلاغ .. والتلفونات .. وقالوا تيم الطوارئ خارج المكتب حيجيكم..

مضت اربع وعشرون ساعة .. لا تيم طوارئ جا ولا الموية جات ..

طبعا صاحبك لايوق رجعنا ليهم تاني..

فين البلاغ .. فتشوا في الدفتر .. قالوا خلاص اوكي حيجوكم الليلة يعملوا

تفتيش .. قلنا هانت ...

ونحن مارقين من مكتب الطوارئ ..

نادانا واحد من العمال ..

قال ما تتعبوا نفسكم ساكت انتو ما شايفين الحفر القدامكم دا

دا خط رئيسي وكبير .. تم تحويل الموية الكثيرة الي كافوري

وخط بحري الختمية دا بقا فاضي ومويتو شوية ما بتصلكم ..فتامل ..

ثم همس قائلا .. الناس ديل ظاتو اكان ما عصرتو ليهم ما بجيييكم ...

Post: #47
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 05:57 AM
Parent: #45

من الاشياء التي يجب النقة فيها في امر منصب مدير موية الخرطوم هل هذا المنصب منصب (سياسي) او منصب تقني بمواصفات ومعايير محددة وخبرة هندسية ومعرفة عميقة وانضباط مهني عالي..
وهل خالد هذا يدري ويعي بانه كمدير لادارة الموية في العاصمة القومية مسئوليته سقاية كل سكانها بما فيها (الساسة والمعارضين ) ديل

وسنعود

Post: #48
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 06:07 AM
Parent: #47

Quote: اها اديني ايميلك هنا
لكن اوعك تجيب اسمي
سمح!!

done

Post: #49
Title: Re: في امر ورجغة مدير موية الخرطوم وحديث البلوفة...!!!
Author: معاوية محمد الحسن
Date: 05-12-2011, 06:11 AM
Parent: #45

كيكي
سلام واحترام
قصة اغلاق البلوفة دى الهدف منها ياكيكي رفع الحرج عنه على التقصير امام المسؤلين ورميه فى المعارضة .
واذا كان القصة اغلاق بلوفة لماذا عرضوا على السكان احضار تناكر مايفتحوا البلوفات والموية تنساب فى المواسير .
ولماذا لايكون هناك مركز للتحكم فى المياه يراقب الكترونيا لمعرفة البلوفة المقفولة و التسرب فى المواسير .
ياخي هؤلاء الناس لازالوا يعتقدون ان الشعب السوداني لا عقل ويصدق هذه التبريرات الفطيرة
تصدق اليوم اعلنوا ان الغاء زيارة البشير ليوغندا نسبة لارتباطات اخري .
وين ناس هيييييع

Post: #52
Title: Re: في امر ورجغة مدير موية الخرطوم وحديث البلوفة...!!!
Author: Alshafea Ibrahim
Date: 05-12-2011, 07:17 AM
Parent: #49

تحياتي ياهندسة...
بس عصرت شديد عليهم ... ما تحكها زيادة ...
والله العظيم لو ما البلف طرشق وأنفجر ومويتو طالعة نافورة ... الجماعة المساكين ناس الحفر .. يحفروا كيلو عشان يلاقوا محل الخراب ... قال مندسين ومورجغين ومخربين ... يازول الكيزان ديل ناس لما رب العباد يخلق الواحد منهم بنزع منو كثير من الصفات والسمات لا تبدأ بالاخلاق والمسئولية والذمة ولا تنتهي بالكذب والدجل وغيرو ...
تحياتي لضيوفكم .. المشككين والمورجغين ..
الشفيع ابراهيم

Post: #53
Title: Re: في امر ورجغة مدير موية الخرطوم وحديث البلوفة...!!!
Author: EMU إيمو
Date: 05-12-2011, 07:55 AM
Parent: #52

عبد الكريم تحياتي

إذا إفترضنا صحة حديث مدير مياه الخرطوم
انه بفعل فاعل أغلقت محابس خطوط الضخ الرئيسية.
لماذا لم يتسبب ذلك في تلف الخطوط المهترئة بسبب الضغط العالي؟
ولماذا لم يلاحظوا ذلك عند ساعة الضغط التي توضع على الخط عند غرفة التحكم؟

هناك ظاهرة هيدروليكية تسمى(water hammer) تحدث عند إغلاق المحابس أثناء عملية الضخ مسببة موجة
شد خلف المحابس قد تأدي إلى إنفجار الخط أو في حال مقاومة خط الضخ يرتفع الضغط في المواسير ويظهر ذلك
عند غرفة التحكم . وهي نقطة راحت على مدير مياه الخرطوم

Post: #54
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 08:45 AM
Parent: #53

Quote: قصة اغلاق البلوفة دى الهدف منها ياكيكي رفع الحرج عنه على التقصير امام المسؤلين ورميه فى المعارضة .
واذا كان القصة اغلاق بلوفة لماذا عرضوا على السكان احضار تناكر مايفتحوا البلوفات والموية تنساب فى المواسير .
ولماذا لايكون هناك مركز للتحكم فى المياه يراقب الكترونيا لمعرفة البلوفة المقفولة و التسرب فى المواسير .
ياخي هؤلاء الناس لازالوا يعتقدون ان الشعب السوداني لا عقل ويصدق هذه التبريرات الفطيرة
تصدق اليوم اعلنوا ان الغاء زيارة البشير ليوغندا نسبة لارتباطات اخري .
وين ناس هيييييع

هلا يا معاوية
وحبابك يا صديقي..
وانه عصر الفهلوة ولعب الملوص الهندسي بالمكنة السياسية والموسف الخرمجة دي حاصلة في اهم حاجة في حياة الانسان السوداني وهي الماء عصب الحياة..
تخبط وعشوائية وسلفكة واستهبال كبير ياااخ
وناسين انو وعي الشعب ده فعلا اتقدم تقدم كبير في كل شي وهم لسسع مصرين علي غشغشة الشعب ده واللعب علي دقونه
والبشير اصبح في اقامة جبرية ورغم كل هذا يحاول ان يكابر ويزايد ويسرق الزيارات والموسف ايضا انه منصب روحه رئيس للسودان
ولاحظ موية اهل السودان يمارسون فيها اللبعثة
ومنصب رئيس السودان ايضا يمارسون فيه الابتزال
وكل شي في السودان صار اسير الاعيبهم ومغامراتهم واستهبالهم المقيم

Post: #56
Title: Re: في امر ورجغة مدير موية الخرطوم وحديث البلوفة...!!!
Author: ASHRAF ABUELHASSAN
Date: 05-12-2011, 09:00 AM
Parent: #54

الفاضل عبد الكريم
ســـلامات

Quote: كيكي

الشبهة الجنائية ما زالت موجودة

ومافي شيء مستبعد من حزب شغلو كلو ام غمتي

شوف جنس الورجغة ده ؟؟؟؟؟

مثل هذه التبريرات تصيب الواحد بالاشئمزاز
والمشكلة انهم بصروا عليها وممكن جدا يكرروها لحدى ما يقنعوا الديك ذاتو ؟؟؟؟

Post: #65
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 01:52 PM
Parent: #56

Quote: شوف جنس الورجغة ده ؟؟؟؟؟

مثل هذه التبريرات تصيب الواحد بالاشئمزاز
والمشكلة انهم بصروا عليها وممكن جدا يكرروها لحدى ما يقنعوا الديك ذاتو ؟؟؟؟

هلا يا اشرف وتحياتي
ورجغة تقيلة وتنويم مغنطيسي بفاليوم عيار اربعة وعشرين قيراط استهبال وتغبيش هذا هو ود الباوقة ومن لف لفهم..
والكيزان يقتادون علي مثل تلك الاوعية كونهم يصدقون كل اكذوبة بدون تفكير او تامل
ومثل هذه الرسائل والتصريحات بتكون في الاساس موجهة للقطاعات التي لا تتامل كثيرا وتصدق كل ما تقوله الحكومة عبر اجهزتها الاعلامية وعبر وزرائها..
ولكن علي مين علي مين والشعب سنين

وتحياتي وتقديري يا اشرف

Post: #64
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 11:17 AM
Parent: #53

Quote: إذا إفترضنا صحة حديث مدير مياه الخرطوم
انه بفعل فاعل أغلقت محابس خطوط الضخ الرئيسية.
لماذا لم يتسبب ذلك في تلف الخطوط المهترئة بسبب الضغط العالي؟
ولماذا لم يلاحظوا ذلك عند ساعة الضغط التي توضع على الخط عند غرفة التحكم؟

هناك ظاهرة هيدروليكية تسمى(water hammer) تحدث عند إغلاق المحابس أثناء عملية الضخ مسببة موجة
شد خلف المحابس قد تأدي إلى إنفجار الخط أو في حال مقاومة خط الضخ يرتفع الضغط في المواسير ويظهر ذلك
عند غرفة التحكم . وهي نقطة راحت على مدير مياه الخرطوم

هلا ياايمو
والف شكر وتقدير علي الكلام العلمي الهندسي الممنهج ولكن اين لمثل خالد (بلوفة) ان يفهم هذه الجزئية وهو في كل ما يرد هو ضرب خصومه السياسيين وحتي واتي ذلك خصما علي الامانة العلمية والعلم والهندسة
ومدير الموية بتصريحه ذلك يفضح جهله الهندسي ويفضح ايضا ادوات والية عمل موسسته التي يديريها ويصرف عليها المليارات بدعوي التحديث وتارة بدعوي التجديد..
وتحياتي وكل التقدير

Post: #61
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 10:28 AM
Parent: #52

Quote: بس عصرت شديد عليهم ... ما تحكها زيادة ...
والله العظيم لو ما البلف طرشق وأنفجر ومويتو طالعة نافورة ... الجماعة المساكين ناس الحفر .. يحفروا كيلو عشان يلاقوا محل الخراب ... قال مندسين ومورجغين ومخربين ... يازول الكيزان ديل ناس لما رب العباد يخلق الواحد منهم بنزع منو كثير من الصفات والسمات لا تبدأ بالاخلاق والمسئولية والذمة ولا تنتهي بالكذب والدجل وغيرو ...
تحياتي لضيوفكم .. المشككين والمورجغين

هلا يا الشفيع وحبابك في مدارات ورجغة مدير الموية ومن لف لفه من بني كوز المورجغين
وخالد بلف بالجد اتي امرا جلل وانا في راي التصريح ده استحقار واستخفاف بينا احنا هذا الشعب الفضل
وهي رحلة من رحلات الاستخفاف بدات ومنذ حضور الناس ديل للحكم منذ عشرين سنة ونيف..
والغريبة وباصرار عجيب لسسع لاصقين وبكل التفاف واستهبال داخلين بحمد ومارقين بخوجلي وكانو ما حصلت اي حاجة
ولك الله يا وطني

Post: #55
Title: Re: في امر ورجغة مدير موية الخرطوم وحديث البلوفة...!!!
Author: tabaldy
Date: 05-12-2011, 08:51 AM
Parent: #1

Quote: والماشة ابو سعد كم

خمسة في المية عشان ما نظلمهم
لأنو الموية في المنطقة المذكورة بتجي الساعة اتنين صباحاً
الوقت داك تقريباً ناس المعارضة وبتاعين السياسة بكونوا تعبوا من حراسة البلوفة وتقفيلها
فبمشوا ينوموا ونقعد نساهر نحنا عشان نملا عدة البيت
من أكبر برميل مروراً بكل "حلل" المطبخ البريست وتمبل باي وغيرا من أواني وجرادل و... كيزان وأباريق.
عليكم الله لو في زول بعرف الناس البعملوا كدا في البلوف يكلمهم يروقوا شوية
عشان نحنا تعبنا من السهر
بيان هام:

نحنا ناس أبوسعد وما جاورها نعلن إدانتنا لمثل هكذا مسلك
وإننا سهرنا الليل وكملنا
وحتى ######نا صبح عطشان

نيابةً عنهم
واحد متضرر من تقفيل البلوفة
وشاكوش ميزيانا

ملحوظة:
كتبت كلمة ك ل ب اتشفرت أوتوماتيك
وكتبت ك و ز ما حصل
يظهر الكيبورد فيهو مشكلة في حرفي اللام والباء
ما في حرف الكاف

في بديل ليهم؟
أرجو المساعدة

انتهى التنويه

Post: #58
Title: Re: في امر ورجغة مدير موية الخرطوم وحديث البلوفة...!!!
Author: جعفر محي الدين
Date: 05-12-2011, 09:08 AM
Parent: #55

Quote: إذا إفترضنا صحة حديث مدير مياه الخرطوم
انه بفعل فاعل أغلقت محابس خطوط الضخ الرئيسية.
لماذا لم يتسبب ذلك في تلف الخطوط المهترئة بسبب الضغط العالي؟
ولماذا لم يلاحظوا ذلك عند ساعة الضغط التي توضع على الخط عند غرفة التحكم؟

هناك ظاهرة هيدروليكية تسمى(water hammer) تحدث عند إغلاق المحابس أثناء عملية الضخ مسببة موجة
شد خلف المحابس قد تأدي إلى إنفجار الخط أو في حال مقاومة خط الضخ يرتفع الضغط في المواسير ويظهر ذلك
عند غرفة التحكم . وهي نقطة راحت على مدير مياه الخرطوم

التحية لك يا ليمو
ولكن صدقني هذا المستوى الراقي من التعامل مع المياه والناس البتشرب المياه
لا وجود له في عقلية حكومة الإنقاذ التعيسة .

Post: #59
Title: Re: في امر ورجغة مدير موية الخرطوم وحديث البلوفة...!!!
Author: سيف اليزل الماحي
Date: 05-12-2011, 09:10 AM
Parent: #55

.

موش قبل كده في واحد " مهندس من أياهم" جابوهو مدير لمحطة بري الحرارية قام فرمل تشغيل المكاين
عشان يوفر المواد البترولية ، اتسبب في حريق المكاين وعاشت بعض نواحي الخرطوم في الظلام.

.

Post: #62
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 10:33 AM
Parent: #59

Quote: قال ما تتعبوا نفسكم ساكت انتو ما شايفين الحفر القدامكم دا

دا خط رئيسي وكبير .. تم تحويل الموية الكثيرة الي كافوري

وخط بحري الختمية دا بقا فاضي ومويتو شوية ما بتصلكم ..فتامل ..

ثم همس قائلا .. الناس ديل ظاتو اكان ما عصرتو ليهم ما بجيييكم ...

هلا يا حنين وحبابك يامورجغ
وشبكة مدفونة مواسيرها في بطن التراب ده ومطلوقة سااااكت ولمن تعصلج يجو يكوركو ويكضبو ويقول ليك قفلو البلوفة..
وناسين وهم في قمة استهتارهم بان (شبكة الموية) دي بالتحديد اكثر حاجة مفروض يكون فيها ضبط وربط ودقة ومتابعة وصيانة وحماية
وتحكم بصرامة وجدية علي كل المستويات لانها حاجة حيوية لايليق ان يتلعبث فيها الحرامية واللصوص والمرتشين والجاهلين

Post: #63
Title: Re: في امر ورجغة مدير موية الخرطوم وحديث البلوفة...!!!
Author: ود الباوقة
Date: 05-12-2011, 10:46 AM
Parent: #62

كيكي

غايتو لو الحزب المعني قام بهذا الفعل القميء

يكون قد وضع حدا لنهايته السياسية ليوم الدين

وشكرا

Post: #68
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 04:45 PM
Parent: #59

Quote: موش قبل كده في واحد " مهندس من أياهم" جابوهو مدير لمحطة بري الحرارية قام فرمل تشغيل المكاين
عشان يوفر المواد البترولية ، اتسبب في حريق المكاين وعاشت بعض نواحي الخرطوم في الظلام.

هلا يا سيف وتحياتي..
والجماعة ديل بالولاء ده بجيبو ليهم اكيش زول وبمسكوهو شغلانية كوعها من بوعها بكون ما جايب خبرها
وبعد الامور تعصلج اهو بقعد يتلفت ويكوجنها زي كوجينة بتاع موية الخرطوم ده..
وامر في غاية الاسف وابتزال حقيقي لموارد البلد ده

Post: #66
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 02:04 PM
Parent: #55

Quote: من أكبر برميل مروراً بكل "حلل" المطبخ البريست وتمبل باي وغيرا من أواني وجرادل و... كيزان وأباريق.
عليكم الله لو في زول بعرف الناس البعملوا كدا في البلوف يكلمهم يروقوا شوية
عشان نحنا تعبنا من السهر

هلا يا تبلدي
ويا سسسسسسلام ياخي جننتني جني بالتمبل باي دي ياااخ
وطولت بالجد ما سمعتها او شفتها او اكلت حاجة طالعة من جوفها
فشكرا لك ولبلوفة ابو سعد التي جعلت من كل هذا ممكنا
والمجد والخلود لاهالي ابو سعد
وقول ليهم يبقو عشرة علي البلوفة حتي ولو يحوطوها عن اشهر فكي في السودان
وانه عصر البلوفات وحي ماعندو بلوفة شغالة تشششششش ومحروسة فهو حي وحلة ماعندها شخصية..

وفي امر الكا والباء
فدي دايرة ليها ورجيع كيزاني نحرير ينظر لينا فيها ويحل لينا اشكال الشخبطة ده

Post: #67
Title: Re: في امر ورجغة مدير موية الخرطوم وحديث البلوفة...!!!
Author: عمار يس النور
Date: 05-12-2011, 04:12 PM
Parent: #66

كيكي سلام

الموضوع لا عاوز هندسة و لا جامعة الخرطوم

الموضوع مسئولية و أمانة و إحساس بحوجة المواطن للأساسيات الحياة.

الله يرحم عم أدم إن كان حيا او ميتا.

عم ادم كان مسئول من شبكة المياه في معهد بخت الرضا حتى بداية التسعينات.

كانت الشبكة لا تقطع اكثر من ثلاث ساعات.

و قبل ما يقطع المياه يخرج بعجلته و صفارته يلف كل الاحياء السكنية في المعهد ينفخ في الصفارة منبها الجميع.

و بعد ده يجيب ناس اليومية و يبدأ الشغل بهمة و نشاط.

عم أدم كان يحفظ كل الشبكة ، يعرف أماكن البلوفة و المواسير و حمولتها و قطرها من غير اي خرائط.

مرة من المرات سألت أحد المسئولين الكبار في المعهد وقلت ليهو حقو تقعدوا مع ادم ده عشان تعملوا خرط لشبكة المياه في المعهد خوفا من اي طارئ يحصل لا قدر الله. قال ما تخاف الخرائط كلها موجودة من زمن الإنجليز و هم الدربوا عم أدم قبل 40 سنة.

و الله ناس الإنقاذ ديل لو رجعونا لي حالنا قبل 23 سنة ما عاوزين منهم اي حاجة و عافين ليهم كل السحت الذي أكلوه.

Post: #69
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 05:05 PM
Parent: #67

Quote: و الله ناس الإنقاذ ديل لو رجعونا لي حالنا قبل 23 سنة ما عاوزين منهم اي حاجة و عافين ليهم كل السحت الذي أكلوه.

يا سسسلام يا عمار يااخي والمجد والخلود لسيرة عم ادم ده
والناس ديل يا عمار كوجنو كل الاشياء
وفي هذا السودان هناك الالوف مثل عمنا الجميل ادم هذا وفي كل المجالات وفي ازمنة السودان بخيره كانت تتكامل الاشياء ما بين خبرتهم وفراستهم وما بين المعرفة والعلم عند ابناء هذا الوطن المتعلمين والامور بتمشي بسلاسة واحترام متبادل وحب كبير للعمل وامانة
ولكن ديل جو هدموو كل الاشياء ووضعو كوادرهم التي لا تفقه في نبض الاشياء وصار حالنا يرثي عليه في كل المجالات..
شردوا الخبرات وضايقو الناس حتي هرب الجميع من الموسسات الحيوية وانفردو فيها يسمونها تخريب وورجغة
واستهبال وكلو بكل حسرة من موارد هذا الشعب الجميل الذي لا يستاهل مثل هذه السلطة وهؤلا القوم الظالمين

وتحياتي واوشواقي يا عمار

Post: #70
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-12-2011, 05:51 PM
Parent: #69

Quote:
غايتو لو الحزب المعني قام بهذا الفعل القميء

يكون قد وضع حدا لنهايته السياسية ليوم الدين

هلا يا بقبق
يا زول بطل مزغزغة وحدد اولا الحزب العمل كده منووووو...؟؟
وحدد اركان الجريمة ومكانها وبلوفتها وبطل ورجغة
ويا باوقة ياخ خلي عندك مخيخ ايمن مادام ما عندك مخيخ ايسر
وما يغشوك الافندية بتاعين الكيزان ويقولو ليكم هجم النمر هجم النمر وتقومو متخلعين
وارتقي يا عمك
ارتقي ياااخ

Post: #73
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-13-2011, 11:08 AM
Parent: #70

Quote: يا جماعه الزول ده دحين نصيح ولا مشربنو عمل

ولا الحاصل عليه شنو

يا ود الباوقه خليك شويه ما تبقي زي صاحبك تخلي الناس تضحك علي روددك دي ياخ ما لك ما كنت كويس الحصل عليك شنو ياخ

هلا يا عبس
وتحياتي..
وود الباوقة منوم تنويم مغنطيسي شديد ومفاجي
وصعب يطلع من مدارات وورجغة بني كوز فهي بالنسبة له كمثل الماء الي السمك

Post: #74
Title: Re: في امر ورجغة مدير موية الخرطوم وحديث البلوفة...!!!
Author: عماد شمت
Date: 05-13-2011, 02:54 PM
Parent: #73

كيكي ياهندسة ..ياخي ما تفتح للراجل ده بلف الكدوس خليهو يتمزمج شوية ..

كلما ندخل عليك نلقاه مشفط لكن مافي دخان فالبلف مقفول!!

انتوا الجردل ده قيرواني!!!

ضرب علمي اضربهم ضربهم بلا

تحياتي للعريس

Post: #76
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-13-2011, 03:12 PM
Parent: #74

Quote: كيكي ياهندسة ..ياخي ما تفتح للراجل ده بلف الكدوس خليهو يتمزمج شوية ..

كلما ندخل عليك نلقاه مشفط لكن مافي دخان فالبلف مقفول!!

انتوا الجردل ده قيرواني!!!

ضرب علمي اضربهم ضربهم بلا

تحياتي للعريس

هلا يا عمدة
وابوكدوس معشوق الرياح ده يا عماد مافي طريقة نفك ليهو (البلف) ويشفط الا الحرامية واللصوص
ديل يغادروا الملاعب يعود لينا كلنا الوطن المغتصب
وعشان كده نجده مسرع وتيرة الضرب والسلخ شوقا الي ذلك اليوم
يوم (بلف الوطن كلو بيتفك) ونشغط دخاخنين مع ابو كدوسي ده من بلوفة الشعب الاتقفلت عشرين سنة ونيف دي اااخ

وتحياتي وتقديري
وتحياتك ستصل الي العريس الذي نفض الكيس

Post: #75
Title: Re: في امر ورجغة مدير موية الخرطوم وحديث البلوفة...!!!
Author: عثمان جلال الدين
Date: 05-13-2011, 03:03 PM
Parent: #73

Quote: [نبض الاشياء

حلوة ياكيكي.. مع تحياتي لبربرة ود الباوقة..
أردم أردم ونحن من خلفك..

Post: #77
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-13-2011, 03:16 PM
Parent: #75

Quote: حلوة ياكيكي.. مع تحياتي لبربرة ود الباوقة..
أردم أردم ونحن من خلفك..

هلا وغلا يا ابو عفان
وشوق الشوق يعلم الله ويعلم شيخي شكر الله
ونعم يا ابو عفان سنردم ونردم حتي تصيح ديوك الحرية

Post: #78
Title: Re: في امر ورجغة مدير موية الخرطوم وحديث البلوفة...!!!
Author: ود الباوقة
Date: 05-13-2011, 03:17 PM
Parent: #75

http://www.sudaneseonline.com/cgi-bin/sdb/2bb.cgi?board=330

كيكي

اقبض البلموني دا00000000000000

Post: #79
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-13-2011, 03:31 PM
Parent: #78

Quote: http://www.sudaneseonline.com/cgi-bin/sdb/2bb.cgi?board=330

هلا يا بقبق
ودي شنو الورجغة دي... خاتي لي لنك المنبر
وشنووو حكايتهم انتو يا زول اليومين دي
كلكم كده شغالين ورجغة تقيلة...

لو قاصد بوستك بتاع الموية القلت عاوز رجال الدين يشوفو ليك حل
فانا بقول ليك الحل عند فكي الموية دي الا تبركو ليها فكي تندل حتن بعدين امورها تمشي تمام

Post: #80
Title: Re: في امر ورجغة مدير موية الخرطوم وحديث البلوفة...!!!
Author: أمين محمد سليمان
Date: 05-13-2011, 03:43 PM
Parent: #79

سلام يا كريم
ده عمودي الليله في أخيرة الأحداث :
كلام والسلام
أمين محمد سليمان
[email protected]
-----------------

حنك الحكومه !
في اليوم التالي لنشر خبر مفاده أن مدير هيئة مياه ولاية الخرطوم قد إتهم جهات سياسية منظمة تقف وراء شح المياه بإقفال الـ (بلوفة) في الشبكة قائلا إن هنالك أيادٍ عابثة صاحبة غرض تفتعل الأزمة لإستغلالها سياسياً .
استدع وزير الكهرباء و المياه مدير هيئة مياه ولاية الخرطوم بصوره عاجلة ، و دار بينهما الحوار التالي :.
- يعني يا باشمهندس ما لقيت ليك حنك غير ده ؟
- و الله يا سعادتك ما لقيت، الناس كانت زعلانه و كان لازم أخش بحنك سريع عشان نتخارج من الورطة دي .
الوزير بصوت عالي جدا تطايرت علي اثره الأوراق المرصوصه بعناية في طاولة مكتبه :
يعني عشان إنت تتخارج ) تطمبجها( علينا كلنا ؟ قبل شويه ضربو لي وزير الداخلية و مدير الأمن زعلانين ، قالو لي دايرين تتخارجو تفكوها فينا و تطلعونا قاعدين ساي ؟
- ما فهمت الكلام ده يا سعادتك ...
- يعني إنت لما تقول إنو في جهات سياسيه قفلت البلوفه مش معناتها ناس الأمن و الشرطه و باقي الجهات الأمنية قاعدين ساي ؟
- والله اصلو ما فكرت في القصه دي .
- خلاص أقعد فكر لينا في حنك تاني يخارجنا من الحنك الاول و إلا بلوفتنا نحن ذاتا بقطعوها من الشبكه !
و بعد فترة صمت لم تدم طويلا :
- لقيت ليك الحل !!
-...........
- شوف يا سعادتك ، السودانيين ديل ما تشوف جعجعتهم الكتيره دي : بصدقو أي كلام ، نعلن ليهم إنو ( تعويضا عن إنقطاع المياه في الفتره السابقه في بعض أحياء الولاية قررت هيئة مياه ولاية الخرطوم امداد كل منزل في الأحياء المتضرره بماسورة خاصه لتوصيل عصير ليمون مباشرة للمنزل) ....
الصمت إمتد لفتره أطول هذه المره ، قبل أن يبدده الوزير :
- و افرض الناس في واحد من البيوت دي ما بحبو عصير الليمون ؟
- نحنا حا نعلن إنو في خيارات تانيه : كركدي ، تبلدي ، عرديب : و الخيارات كلها لازم تكون منتجات وطنية عشان توجه الدوله العام .
- يديك العافيه يا باشمهندس ، ده الحنك الصاح !!

Post: #81
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-13-2011, 03:53 PM
Parent: #80

Quote: نحنا حا نعلن إنو في خيارات تانيه : كركدي ، تبلدي ، عرديب : و الخيارات كلها لازم تكون منتجات وطنية عشان توجه الدوله العام

هلا يا نوتة
وحلوة وملعوبة ومشحونة بدراما عالية
وجميل جدا يا امين ان تصل هكذا كتابات للقاري السوداني عبر الصحف اليومية فهي بتساعد كثير وكثير جدا في تفكيك الضبابية ودولتها التي طال امدها في الارض السودانية
ومتع الجماهير يا نوتة وواصل هييك كتابات خفيفة وظريفة وهادفة

Post: #82
Title: Re: في امر ورجغة مدير موية الخرطوم وحديث البلوفة...!!!
Author: أحمد الشايقي
Date: 05-13-2011, 11:37 PM
Parent: #81

يا أخ كيكي

بعد هذه المغالطات خرج والي الخرطوم بتصريحات واضحة اعترف فيها بمشكلة المياه في الولاية بجميع ابعادها ونسب ذلك إلى قدوم فصل الصيف واعترف كذلك بتكرار المشكلة في كل صيـف

يعني هذا أن الكذبات حول البلوفة وغيره لم يكن لها أي داع ومشكلة المياه في الخرطوم معروفة جداً وكانت قائمة في أماكن كثيرة في العاصمة

المؤسـف أن ذوي اللحى من قيادات المشروع الحضاري الاسلامي لا يتوقفون عن الكذب

أحمد الشايقي

Post: #83
Title: Re: في امر ورجغة مدير موية الخرطوم وحديث البلوفة...!!!
Author: Nader Abu Kadouk
Date: 05-14-2011, 00:36 AM
Parent: #82

كيكي يا حاقد

معقوله بس تشكك في كلامإ الوزير

إنت معروف ما بتدور الكيزان إبقي روايتك مخجوجه.....

وهاي يكه................

Post: #84
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-14-2011, 05:19 AM
Parent: #82

Quote: يعني هذا أن الكذبات حول البلوفة وغيره لم يكن لها أي داع ومشكلة المياه في الخرطوم معروفة جداً وكانت قائمة في أماكن كثيرة في العاصمة

المؤسـف أن ذوي اللحى من قيادات المشروع الحضاري الاسلامي لا يتوقفون عن الكذب

هلا يا احمد وتحياتي...
ودائما حبل الاستهبال قصير وكل الشعب السوداني عارف وناس الخرطوم خصوصا عارفين اسباب المشكلة بتاعة الموية شنووو
وبني كوز ديل بكضبو وبشوفو السوق بتاعة الكضب وعندما لا تلفق الكضبة يعودون وبكل دم بارد الي الاعتراف بالخطا علي ان يعودو الي كذبة اخري في مدار اخري
انها دولة السبهلل والورجغة يا احمد
ومافيش فايدة كما قال سعد باشا

Post: #85
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-14-2011, 05:23 AM
Parent: #84

Quote: كيكي يا حاقد

معقوله بس تشكك في كلامإ الوزير

إنت معروف ما بتدور الكيزان إبقي روايتك مخجوجه.....

وهاي يكه................

اووووووووه كدوك
مشتاقين يعلم الله وشيخي شكر الله...
وفعلا ياااخ انا شيوعي مورجغ وحاقد علي اصلب العناصر لاصلب المواقف
وزمان كنت بقفل بلوفة البركس

Post: #86
Title: Re: في امر ورجغة مدير موية الخرطوم وحديث البلوفة...!!!
Author: Nagat Sid Ahmed Elshiekh
Date: 05-14-2011, 12:42 PM
Parent: #85

Quote: وزمان كنت بقفل بلوفة البركس

كيكى سلام، بالله لو أمكن تشوف لينا بلوفة أمبدة دى البقفلة منو من الشباب؟؟؟؟؟؟؟؟؟؟؟

Post: #87
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-14-2011, 01:35 PM
Parent: #86

Quote: كيكى سلام، بالله لو أمكن تشوف لينا بلوفة أمبدة دى البقفلة منو من الشباب؟؟؟؟؟؟؟؟؟؟؟

هلا يا نجاة
وحكاية بلوفة امبدة بالذات الناس ديل الا يخصصو ليهم (وداعية) ويدوها راتب ومنصب استشاري في هيئة
مياه الخرطوم... وكل ما تتقفل بلوفة من البلوفات (يعملو ليها مس كول) والودعاية تكشح الودع وتحدد الجهات المغرضة التي قفلت البلوفة في حي من الاحياء...

Post: #88
Title: Re: في امر ورجغة مدير موية الخرطوم وحديث البلوفة...!!!
Author: nazar hussien
Date: 05-14-2011, 03:24 PM
Parent: #87

Quote: (بايب فيتر

ريحتني راحة....

في ذمتك في قطر ما بسموه باي فيتر (نق تربيع)

Post: #89
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-14-2011, 03:53 PM
Parent: #88

Quote: ريحتني راحة....

في ذمتك في قطر ما بسموه باي فيتر (نق تربيع)

هلا يانزار
وتصدق كتبتها (باي فيتر) وتاني مشيت عدلتها وقلت (باي فيتر) دي بعرفوها ناس قطر بسسسسس
هو بالله الموضوع عاام وشامل..؟؟
فعلا في قطر بسموها 0(باي فيتر)
وصحبي المجرم الكبير الطيب الدويم لاعب الموردة السابق
كل ما يلقاني مطرف في كراكير الدوحة بشبكني
وووووين يا (باي فيتر)
بقول لي انت باشمهندس شنننو يا زول
انت (باي فيتر)وبس

Post: #90
Title: Re: في امر ورجغة مدير موية الخرطوم وحديث البلوفة...!!!
Author: Nagat Sid Ahmed Elshiekh
Date: 05-14-2011, 05:40 PM
Parent: #89

هلا يا نجاة
وحكاية بلوفة امبدة بالذات الناس ديل الا يخصصو ليهم (وداعية) ويدوها راتب ومنصب استشاري في هيئة
مياه الخرطوم... وكل ما تتقفل بلوفة من البلوفات (يعملو ليها مس كول) والودعاية تكشح الودع وتحدد الجهات المغرضة التي قفلت البلوفة في حي من الاحياء...

كيكى أنا الواجعني شديد البلوفة دى بفتحوها باليل وبقفلوها بالنهار للمساكين ديل كيف؟؟ على العليهم يساهروا باليل عشان يملوا عدة البيت كلها لحدى الكبابى استعدادا لليوم الطويل ومسخن من غير موية وكل المواسير تغط فى نوم عميق ومعاهو شخير كمان،

وعشان كمان نكذب المدير الماقدير فى تصريحو العوير أنو البلوفة اتقفلت بفعل فاعل بعد ما ناس برى طلعوا الشارع،

برضو عاوزين نعرف المعارضين الشغالين باليل ديل منو لفتح البلوفة بتاعة ام بدة جنوب وقفلها مع أذان الصبح يعنى نظام ورديات ليلية لقفل وفتح بلوفة ام بدة.

الكلام دا لسعادة المدير وفى انتظار أجابة حاسمة ومنطقية لبلوفة ام درمان المتليفة من زمان بعيد كما قال أخونا صلاح قريبة وأقرا بوجود الياف فى الناقل ، بنقبل الاجابة من الناطقين بأسم المدير من أعضاء البورد المدافعين للورجاقين.

Post: #91
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-14-2011, 08:39 PM
Parent: #90

Quote: كيكى أنا الواجعني شديد البلوفة دى بفتحوها باليل وبقفلوها بالنهار للمساكين ديل كيف؟؟ على العليهم يساهروا باليل عشان يملوا عدة البيت كلها لحدى الكبابى استعدادا لليوم الطويل ومسخن من غير موية وكل المواسير تغط فى نوم عميق ومعاهو شخير كمان،

هلا نجاة
وشعب مغلوب علي امره وفعلا سخانة وكهرباء قاطعة وباعوض ومواصلات وكتاحة وموية شاخرة وبلوفتها في غضب الله
وبمي كوز يا نجاة لو يدهم وعاثوا في هذا الارض فساد وتضليل كبير وتغبيش وسلفكة ثم استهبال وكان حواء السودان انجبت قطيع من الشعب الذي لا يفقه كوعه من بوعه ولا يستحق الحياة الكريمة... الحياة الكريمة من موارده التي سطي عليها الدقانة اللصوص..
جوقة المورجقين (حطب النار) هم ومن لف لفهم من السلعلع الذين طبلوا وزمبروا وعلي تطويل عمر هذه العصابة ليهم يوم وسيطاردهم هذا الشعب علي الواقع وعلي الاسفير وفي كل الكراكير زنقة زنقة... وحقوق بلوفة الغلابة التي تم اهمال وابتزال امرها بجانب جبال من الحقوق ستوخذ كاش وبعضها يوخد في شكل دقون ستحلق قرقاش

Post: #92
Title: Re: في امر ورجغة مدير موية الخرطوم وحديث البلوفة...!!!
Author: عزالدين عباس الفحل
Date: 05-15-2011, 05:23 AM
Parent: #91

الاخ الفاضل عبدالكريم الامين احمد

حياك الله

اسعد الله صباحك يا باشمهندس ،
رغم ضيق الوقت ،
وافتراق الثواني ،
ممرت علي عجل ببوستك الحيوي ،
وانت تنظر بعدسة سياسية غاتمة ،
دعنا ننظر بعيون الهندسة .
اولا :-
تفتقر العاصمة المثلثة الي وجود مستودعات للمياه ،
اي لا يوجد المخزون الكافي للمياه وقت الذروة ،
و هي فصل الصيف والخريف ،
ثانيا :-
معظم مضخات المياه في المحطات تحتاج الي صيانة دورية ،
وهي في الغالب اعطال كهربائية ،
ومسالة الصدأ غير وارة لظروف المناخ ،
ثالثا :-
جميع خطوط المياه الممتدة منذ زمن الاستعمار ،
تهالكت و شاخت ،
وأصيبت بالهستريا المزمنة ،
ولا ننسي المواد المرسبة كالشب ،
والمعالجة كالكلور كلها امور مكلفة وباهظة الثمن ،
بعد ذلك لا ننكر الدور الذي قام به المهندس خالد حسن ابراهيم ،
في حل قدر كبير من تلك المشاكل الفنية ،
المعقدة ،
فهو انسان كف و نشيط ،
و ودود ،
لكن اكرر نحتاج الي وجود خزانات اسمنتية ضخمة السعة لتخزين المياه ،
ولا ننسي أن العاصمة الخرطوم أمتدت حتي وصلت الوادي الاخضر ،
و لك وافر الاحترام،
والتقدير ،

عزالدين عباس الفحل
ابوظبي

Post: #93
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-15-2011, 05:46 AM
Parent: #92

Quote: ممرت علي عجل ببوستك الحيوي ،
وانت تنظر بعدسة سياسية غاتمة ،
دعنا ننظر بعيون الهندسة .

تحياتي يا عباس
والف شكر وتقدير
وشكرا علي الحضور والتعليق...
وعدسة السياسة الغاتمة هي العدسة التي (نظر بها) المهندس خالد الي امر مشاكل المياه في الخرطوم
ولذا نجده اخرج تصريحه في قالب ومدلول سياسي وسياسي جدا عندما وصف امر البلوفة وقفلها بانه تم من قبل قوي سياسية..
ولو نظر خالد بالعدسة الهندسية التي نظرت بها انت واوردت الكثير من الشواهد الحية لما احتجنا لهكذا بوست او ذلك تصريح سياسي في كل لغته...
ومن يحتاج ان يري بعين الهندسة هو مدير المياه يا عباس
فهو في وظيفة في كل اشيائها يجب ان تضج بالهندسة ويجب علي لغته ان تكون هندسة هندسة في ليس سياسة في هندسة
هو مكلف بادارة واحدة من اخطر المرافق التي تهم مواطن العاصمة السودانية وفي مرفق حيوي ودونه الموت عطشا...ولاشنو يا عباس!!
-----
وفي هذا البوست قلنا في مثل هذه الامور تجب ان تكون الريادة والسطوة للهندسة وليس للسياسة او لا شي اخر
من اجل مصلحة المواطن بمختلف مشاربه السياسية والفكرية فالماء للجميع ومن الموسف ان يرمي الخلل والفشل في السياسيين المختلف معهم
وكانهم هم واسرهم وابنائهم واهلهم كائنات لاتشرب ماء

وتحياتي

Post: #94
Title: Re: في امر ورجغة مدير موية الخرطوم وحديث البلوفة...!!!
Author: Nagat Sid Ahmed Elshiekh
Date: 05-15-2011, 06:18 AM
Parent: #93

Quote: ومن يحتاج ان يري بعين الهندسة هو مدير المياه يا عباس
فهو في وظيفة في كل اشيائها يجب ان تضج بالهندسة ويجب علي لغته ان تكون هندسة هندسة في ليس سياسة في هندسة
هو مكلف بادارة واحدة من اخطر المرافق التي تهم مواطن العاصمة السودانية وفي مرفق حيوي ودونه الموت عطشا

فهو في وظيفة في كل اشيائها يجب ان تضج بالهندسة ويجب علي لغته ان تكون هندسة هندسة في ليس سياسة في هندسة

فهو في وظيفة في كل اشيائها يجب ان تضج بالهندسة ويجب علي لغته ان تكون هندسة هندسة في ليس سياسة في هندسة

تسلم يا كيكى .

Post: #96
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-15-2011, 10:25 AM
Parent: #94

Quote: تسلم يا كيكى .

هلا يا بيكاسو وحبابك
واخونا عباس بالغ
مخلي خالد القافل البلوفة سياسيا لييه انا مااعرفش..؟؟

Post: #95
Title: Re: في امر ورجغة مدير موية الخرطوم وحديث البلوفة...!!!
Author: ود الباوقة
Date: 05-15-2011, 06:18 AM
Parent: #93

كيكي البلفوني

كيفك

Post: #97
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-15-2011, 10:31 AM
Parent: #95

Quote: كيكي البلفوني

كيفك

هلا وحبابك
يا مورجغ

Post: #98
Title: Re: في امر ورجغة مدير موية الخرطوم وحديث البلوفة...!!!
Author: Nagat Sid Ahmed Elshiekh
Date: 05-15-2011, 12:30 PM
Parent: #97

Quote: هلا يا بيكاسو وحبابك
واخونا عباس بالغ
مخلي خالد القافل البلوفة سياسيا لييه انا مااعرفش..؟؟

سلام يا هندسة،

ورجقة فى ورجقة وراجيق البلد كترت.

تسلم ياخى وفى انتظار المهندسين الاكفاء لكشف الورجقة من المسعولين والمعينين بالولاء وهى لله.

وربنا يفك أسر بلوفة ام بدة المكروبة قوى وتوجد بداخله ألياف متراكمة تمنع من انسياب المياه .

Post: #100
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-15-2011, 06:29 PM
Parent: #98

Quote: تسلم ياخى وفى انتظار المهندسين الاكفاء لكشف الورجقة من المسعولين والمعينين بالولاء وهى لله.

وربنا يفك أسر بلوفة ام بدة المكروبة قوى وتوجد بداخله ألياف متراكمة تمنع من انسياب المياه .

ده زمان الورجغة يا نجاة
هندسة ورجغة
وسياسة ورجغة
وانتخابات ورجغة
وكلو ورجغة في ورجغة (تربيع)..
وبلوفة ام بدة نسال الله وشيخنا شكر الله ان يفك ساجورتها ياااخ
وانا بقترح يختو فيها (شرك) لاني كديكارتي سابق شاااكي بان البلوفات ده بقفولها الدقانة ديل زااااتهم بالليل وبالصباح برمو القصة دي في قوي سياسية رعديدة
ومعا من اجل بلوفة ام بدة

Post: #99
Title: Re: في امر ورجغة مدير موية الخرطوم وحديث البلوفة...!!!
Author: MOHAMMED ELSHEIKH
Date: 05-15-2011, 12:54 PM
Parent: #97

اهو نورجغ لي قدام معاكم

Post: #101
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-15-2011, 06:32 PM
Parent: #99

Quote: اهو نورجغ لي قدام معاكم

هلا يا ود الشيخ
ومرحب بك في مدارات الورجغة

Post: #102
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-16-2011, 09:40 AM
Parent: #101

اقبض...!!
تاني ورجغة البلوفة عملت كركبة في نواحي بري..
Quote: أهالي بري يتظاهرون للمرة الثانية إحتجاجاً على إنقطاع المياه
نشر بتاريخ May 15, 2011
(الصحافة – حريات)
أغلق مئات المتظاهرين من أهالي برى للمرة الثانية، الطريق الرئيسي (شارع المعرض) ، واحرقوا إطارات السيارات في منتصف الطريق احتجاجا على انعدام مياه الشرب.
وأفاد شهود عيان ، بان المئات من اهالى المنطقة الغاضبين احتشدوا في الطريق الرئيسي (شارع المعرض) ، وأضرموا النيران في إطارات السيارات، وأغلقوا الطريق لعدة ساعات، وعطلوا حركة السير بالكامل، وهددوا بالخروج للشوارع مرة أخرى حال عدم استجابة السلطات لمطالبهم.
وحضر ضابط شرطة برتبة عقيد إلى المكان والتقى بالمتظاهرين، طالبا منهم فتح الطريق أمام حركة المرور، ووعدهم بعودة الإمداد المائي للمنطقة في فترة أقصاها خمسة أيام،ورفض المتظاهرون، وعود السلطات مطالبين بحل عاجل لمعضلة انقطاع وانعدام المياه، وسارعت ثلاث سيارات تابعة للدفاع المدني بولاية الخرطوم وهى تحمل مياه الشرب للمحتجين وإطفاء الإطارات المحترقة، لكن المحتجين رفضوا المياه التي أحضرتها السلطات ووصفوها بأنها غير صالحة للاستعمال الادمى وهى مختلطة بالجازولين،وطالبوا بحضور والي الخرطوم عبد الرحمن الخضر، لاطلاعه على المشكلة، وتلقى وعود جادة منه وبشكل فوري، واصفين ما تقوم به سلطات الولاية بـ(المماطلة والتسويف) » وعدم الجدية والمسؤولية تجاه قضايا المواطنين.
وأعرب المحتجون عن بالغ سخطهم من مبررات هيئة مياه ولاية الخرطوم، التي عزت قطوعات المياه وتوقف الإمداد المائي بأنها بفعل فاعل ونزع البلوفة، متهمين الهيئة بتحويل شبكة المياه والخطوط إلى جهة سكن احد ابرز قيادات الحكومة وعدد من الوزراء.
وقال احد المحتجين لـصحيفة (الصحافة) انه بعد أن اقتلعت الحكومة ( أراضينا عنوة تريد أن تقتلنا عطشا لكن أهون لنا أن نموت في الشوارع بكرامة من أن نموت عطشا) .

Post: #103
Title: Re: في امر ورجغة مدير موية الخرطوم وحديث البلوفة...!!!
Author: Nagat Sid Ahmed Elshiekh
Date: 05-16-2011, 02:49 PM
Parent: #102

Quote: أغلق مئات المتظاهرين من أهالي برى للمرة الثانية، الطريق الرئيسي (شارع المعرض) ، واحرقوا إطارات السيارات في منتصف الطريق احتجاجا على انعدام مياه الشرب.

سلام ياكيكى، أبشركم خيرآ، فى أطارات أخرى مقنطرة وجاهزة للحرق ،قريبآ سوف ننقل لكم الأخبار ،دا فى حالة عدم استجاب الوالى لتوفير المياه فى مناطق واحياء قد تم وعدهم فى هذا الشهر الكريم، وسوف تبداء انشاء الله حرب البلوفة المقفولة وثورة العطشى.

Post: #104
Title: Re: في امر ورجغة مدير موية الخرطوم وحديث البلوفة...!!!
Author: عبدالكريم الامين احمد
Date: 05-16-2011, 03:58 PM
Parent: #103

Quote: سلام ياكيكى، أبشركم خيرآ، فى أطارات أخرى مقنطرة وجاهزة للحرق ،قريبآ سوف ننقل لكم الأخبار ،دا فى حالة عدم استجاب الوالى لتوفير المياه فى مناطق واحياء قد تم وعدهم فى هذا الشهر الكريم، وسوف تبداء انشاء الله حرب البلوفة المقفولة وثورة العطشى.

هلا يا نجاة
واذن انها ثورة وحرب البلوفة المقفولة العظمي
وان من زمان عاااارف الكيزان ديل بتجي بلوفة في الاخر وبتجيب خبرهم....
والمجد والخلود لهذا الشعب البطل
والعار لكل بني كوز الذين قفلو بلوفات هذا الشعب ليس في الماء فقط بل في كل مناحي الحياة

وسنتابع