واتفرتق الحلم السمح

بعد فوتة الجنوب

كلام على لسان صاحبنا

شارلس لاسو

وما مشى بعيد والله

مع خالص الحزن والتقدير

ورينى كيف اقعد معاك
دايرنى اقعد كيف حداك
ايدينا قالدات البلد
عينينا حارسات الولد
دايرنى كيف ابقا اليمين
وانت الشمال
وانت قاعد فوق بروجك
انت ساكن فى علاك
وانا فى طريف الواطا
واقف لى سنين
لا ضقت ممكن
ولا مشيت جيهة المحال
انت المحلق فى عروجك
لاجم براقك بالدهب
ماسك طريقك وماشى فوق
وانا البساسق فى الضهب
دايرنى كيف اقعد معاك
وأنا المستتف
بالدرادر والتعب
أنا المكتف
بى حبال هم المواجع
بى غبار حظى الكعب
انت لى قدام تجابد
وانا فى قفاك جارى وبنادى
اشقا واكابد
وديمه راجع
ديمه كايس بى وراك
انت المكنكش فى سعادتك
ومخلى لى كيمان شقاك
دايرنى كيف اقعد معاك
وزى ما قالو فى الأمثال
الجاياك ما بتختاك
من ازمان
ومن أجيال
ترانى حداك
شن سوينا
شن سويت
والبلد المكتفه بى بالكتال
لا اتفكت
ولا عرفت وصال
لا اتحلت
ولا شافت جمال
وانا بين حرامك والحلال
من كبرت ومن وعيت
رامينى فى جب الضلام
كان مرضت وكان عييت
كان تعبت وكان شقيت
يانى قاعد
بين حلالك والحرام
ناسينى فى جب الهلاك
ودايرنى كيف اقعد معاك
يا محنة االبلد الكبير
الناس مضاريه فى حواك
يا وجعة النيل السقاك
يا زفرة الوجع الغزير
الناس مشتته فى هواك
اتفرتق الحلم السمح
اطايرت
غنوات نخيلو
اضايرت
موجات سقايتو
وحدَ نيلو
اتشلهتت فيهو المسادير والمدايح
وحار دليلو
يا وجعة البلد المربط بالضلام
الليلة قمرك نورو رايح
خليتو وين عشم السنين
ودرتو كيف حلم القمح
ضيعت كيف فرحو الضنين
واتفرتق الحلم السمح
يا وجعة البلد المربط بالضلام
الليلة قمرك نورو رايح
وين الخريف
وين الدعاش المنو فايح
وين الغناوى الطيبة ديك
معنى الوئام
وين الحكاوى الطيبة ديك
فرح القلوب الابتسام
ضو النفوس الانسجام
دين المحبين السلام
الكان حدانا
وفى رجانا
وكنا مستنين صفاك
دايرنى كيف اقعد معاك