الخميس قراية المطاميس

با نصب بي خفض بو رفع اب جزم
با نصبتين ب خفضتين ب رفعتين
با جاب الف بي جيب يا بوا حاب واو والف
بليلة اللربحا والاسبوع انتهى
والخميس قراية اولاد المدارس المطاميس
.
.
.
هل هذه كانت دعوة لترك مقاعد الدراسة ؟
يا ربي هل هل يفتكرني او الغرام حالا نساهو
البوست دا عبارة عن كلام زول راميهو جمل ضنبو مقطوع
يعني ضهربة وام هلا هلا
العندو ام هلا هلا حبابو والله

ود البوش

سلام

دكتور حسن داموس باعوا حمارو البمشي بيهو المدرسة


عشان يخلي المدرسة المانافعة

اصر ان يواصل سار حتي وصل
=======================================================
تعرف لي زمن عايز اكتب عن رحيل حبوبتك بتول بت امحمد اللمين

لانها جهجهت بكات اخوالك واهلنا كلهم في معيجنة

اسال الله ان يتقبلها القبول الحسن

Quote: دكتور حسن داموس باعوا حمارو البمشي بيهو المدرسة

.
.
انا ابوي قال لي ما عندنا ليك حمار تمشي بيهو المدرسة اياها الحمارة الزرقا العاقر الوحيدة دي
مشيت جبت حمارة عباس صديق لانو خلاس كمل الابتدائي وقبلوه في طابت الجنوبية
قام ابوي الله ارحمو قال لي خلاس خليها معاهن الصيفية وجيبا الرشاش عشان ما عندنا ليها عليقة
رجعتها لعمي الصديق الله يرحمو قام قال لي لو ما تخليها معاك الصيفية حمارتي في الرشاش ما بديها
اها شلتها ومشيت بيها المحيريبا اجيب الرغيف ابيعو
طق طق طق طري طري كان ما طري ما تشتري
الضاق حلاتو باع نعلاتو
ابيع الرغيف عشان اجيب حق عليقة الحمارة وعليقتي
.
.
لكن يا ود عوج الدرب الحمارة دي دغلة دغالة يوم بالت فوق شنطتي والكتب والكراسات شربت ببول الحمارة
.
.

Quote: حبوبتك بتول بت امحمد اللمين

الله يرحمها ويغفر ليها كانت فالحة ونجيضة
عليك الله اكتب عنها وسوف اثري لك البوست بالسكلي والردحي ....
.
.
مشكرين يا سيف على غفشاتك الممتازة

حذف للتكرار

يا عبدالله و الله رجعتني لي زمن قديم و حلو
أيام خلوة شيخنا عبدالوهاب في السيالة في عطبرة
و ولده يقرينا
با جاب ألف
بي جيب يا
بو جاب وا وألف

يا سلام زمن كرامةالبليلة و الدواية و المحاية
شكرا" ليك

و قرايتك صاح بي أم هلا هلتا :)

aydaroos
عايد الروس سلامات
.
.
شرفت اللم يكون يا عيدروس ؟
والجنيات حاموا ليك الحلة كلها ويرددون :
المابدينا حق الشرافة بالعقرب النتافة
المرة تطلق
والراجل اتعلق
والجنا اجني من السماء مفلق
وشوووووووووو اكبو ليكن العيش في القفة ولا الجردل
عيش فتريتة
عيش قدم الحمام
عيش ود الفحل
وكلووووووووو لبليلة اللربحا
وكنيش كنيش تجيب المطر والعيش
.
.

بعد اجي من الخلوة ابوي الله يرحمو طوالي اناديني
عبدالله تعال اقرأ ( الم يكون )
وكرررررررر اقراها ليك
لم يكن الذين كفروا من اهل الكتاب والمشركين منفكين حتى تاتيهم البينة ... الى اخر السورة
وبكرة برضو نفس السؤال وبعد بكرة نفس السؤال
قمت قلت لابوي : يا با انت مافي سورة غير الم يكون دي
قال لي يا ولدي كنت داير اتأكد من حاجة وخلاس اتأكدت
اصريت عليهو اوريني الحاجة دي
قال لي : السورة دي المنافق لو جن ما يحفظها .... !!!!!!!
ولو حفظا الليلة بالقوة بكرة ما اقدر
عشان كدا سألتك منها تلاتة ايام متتالية
.
.
والنصيحة كنت احفظها عن ظهر قلب وانا طفل
لكن الليلة .... الله اكفينا شر النفاق
.
.
-

عندما يشرف اح الطلاب اهله بحفظ بعض السور الهامة يتم تكريمه وعلى والده احضار وجبة دسمة للفكي
وطلاب الخلوة يرددون بصوت منخفض دون اسماع الفكي ولكن الشاذ منهم والذي لايرغب في الخلو اقولها
بطول حسو واطلب الله جري لبيتن :
جدادة سمينة تغدي فكينا والفضلة تجينا
سيدنا آكل ولا اقوم
قوم تاكل ام دلدوم
.
.
سيدنا اديتنا الجوع
سيدنا خلوتنا ام كوع
.
.
ايام لها الواح
والفاتولة جاب الواحولة
ما اياهن ديل ذاتن
.
.
والليلة وين لي وين يا عينيا انا عجبوني كالو العين يا عينيا انا

لاف الف
واليا نقطتين من تحت

يا عوض عكاشة
الوست كيف الليلة لاني لو قعدت على الجهاز دا اكتر من كدا بقوم انضم كتر
الليام دي كلامي بقى كتير خلاس نعل ما مسكني الزهايمر
كمان بقيت اتونس براي
اسع دي ذاتا مش ونسة ذاتية ؟
اونس ولا اقوم ؟
جيب معاك زميل حريف واوعك من حميدة

نحنا عندناكانت:
الم تر كيفا
كسره رهيفة
سوتا كلتوم
يا سيدنا ناكل ولا نقوم
قومو ... تاكلو الدا (الداء)
سنسنتين بالما (بالماء)

أو هكذا كانت

Quote: الم تر كيفا كسره رهيفة

الم ترى يا عايد الروس ان منهج الخلاوي يكاد يكون موحدا في كل مناطق السودان
رغم ان كل فكي له كينونته وطريقته الخاصة
فكيف توحد ذلك
وكذلك الالعاب
شدت
حرينا
الرمة وحباسا
حولب لب
ور
ور ور وررررررررررر
وحتى الالفاظ
الروس الروس
حباب التروس
من الدفسا للقطع نفسا
اجيني القطع نفسا
لوووووووووووول قطع اخدر

Quote: كمان بقيت اتونس براي

كُر يا يايابا كُر !!

أكلم أريج ؟!

مالك ياعبدوش ياخ ؟

Quote: البوست دا عبارة عن كلام زول راميهو جمل ضنبو مقطوع

الخميس يوم رفع البوستات

تضحك ساهييييييييييي يا البشاري عشان ما ضقت رمية الجمل
كان عمرك طال بشوف ضبحو عديييييييل يا مرمي
هههههههههههههههههههه

يا ناس المحاية و الدواية
و الدواية كنا بي نعملها كألآتي:
1- شعر ذنب حصان(للقادرين) ، ضنب غنمايه للزينا.
2- صمغ من شجر الغرض أو السدر
3- سكن من قعر الدوكة (السكن هو ناتج حرق الخشب المتكثف تحت الدوكة)

تخلط المكونات أعلاه مع الماء و توضع في دواية و من ثم نكتب
بها علي لوح الخشب (اللوح)، وبعد داك نمسح الكتابة بي الطباشير
أو الحجر الجيري.

أها عمي حسن عيدروس، أصر يسوقني معاهو الخلوة، ود سيدنا (بي يقاربو في العمر)
كتب فب الواطه و عاين ليهو، قال ليهو "قول أليف" ... عمي حسن
طوالي قال ليهو "حبوبتك أم شلاليف* .. تقد القرعة و تقول يا لطيف"
... و سيدنا سمعو وشال عليهو العكاز .. وعمي حسن قام صوف
و من ديك ما عتب الخلوة، إداني الذكريات الجميلة و هرب للعوم في البحر.

*حبوبتك أم شلاليف بتاعة عمي حسن دي فيها إيحاءات عنصرية لا إتفق معها

اخونا عيدروس صاحب اللوح والمحاية
.
.

Quote: الدواية كنا بي نعملها كألآتي: 1- شعر ذنب حصان(للقادرين) ، ضني غنمايه للزينا. 2- صمغ من شجر الغرض أو السدر 3- سكن من قعر الدوكة (السكن هو ناتج حرق الخشب المتكثف تحت الدوكة)

مكونات الدواية هي نفسها الليلتنا في الجزيرة علا ضنب الحصان دا ما عندنا لاغني لا فقير ( هو ناس الخلوة كلهن فقرا )
اولاد الراحات بقعدوا في الدكاكين وناس نحنا نبح الليل والنهار با نصب وبي خفض
.
حكاية عمك حسن دي ضحكتني حتى كدت ان اشقلب على قفاي ...... وتعتبر ضحكة الاسبوع قبل الليل ما افلل ....
.
.
احكي يا عيدروس احكي يا حكاي
اكرر حبي الشديد لعطبرة لكن ما عارف لشنو .... اظنو في سر انا ما عارفو .... لكن ح ازور عطبرة واقعد فيها عشان اشوف السر دا شنو
.
.
شكري وتقديري لهذه النفحات القرآنية

Quote: e: كمان بقيت اتونس براي كُر يا يايابا كُر !! أكلم أريج ؟! مالك ياعبدوش ياخ ؟

العلي انا هين يا نادية
لو كنت املك ناصية الحروف كما تملكين علاتشوفوا ليكن حلة غير الحلة دي
شكرا ندوش لمرورك الجميل جمال روحك الفنانة فن جد
تحياتي
.
.
.
هي اريج منتظرة زول اكلما .... اي حرف اكتبو ترسل اشارة
مس كول تلاتة مرات معناها اشارة حمراء
مرتين صفرا
مرة واحدة سيف سايد

سلااااااام آآآآآآزول
كيفنكم و كيفن أهلكن و بهايمكن ...

الباء جاب ألف
البو جاب واو
البى جاب ياء


أنا جابنى عنوان البوست الليكن ده

" المطاميس " دى متل حقت أهلنا " المواطيس " !!!!

فتكم عافية علااا راجعلكن تانى بعد ما أقضيــلى شغلتنة مهمةً بلحييييل ...













املاء

ش

اوووووووووو اخونا شكري ماطوس
ياخ مشتاقين شوق شديد خلاس
حافظ الم يكون ولا ما حافظا يا شكري ؟
.
.
الفكي عندكن كان بجلد بالخيدرانا في راحة الكرعين ؟ ولا كيف ؟
بليلة اللربحا عندكن كيف ؟
عايزين المقارنات لكن الخلاوي في السودان كلو اتخيل لي منهجها واحد موحد
.
.
شكري وتقديري يا شكري

سلآمات يا ود البوش،
اجاد أخوي
تمرق عيدروس ده من هنا، كان رويحتي
تندلى من فوق الحراز...

عذاب بس يا ود المدير :)
حليلهم كلهم ياخ

Quote: عذاب بس يا ود المدير :) حليلهم كلهم ياخ

صدقت يا عيدروس،
سلم لي علي العقاب زنقة زنقة،
الحِلة التحت والفوق، العمرت، الكريماب، النواوآب،
ناس جدك عيدروس، السارة، والكرارآب، ولعِن خليوة
كمان...

اخونا الجميل معاوية المدير
الله يسلمك يا معاوية
عيدروس دا زول ظاهر عليهو وناس وحكاي
وعطبرة يحلو الحكي عنها ولها مكانة خاصة في قلب كل سوداني
.
.
ونس يا معاوية والدنيا خميس والخلوة خلوتكن

الخلوة اللتنا من الطين شكلها مربع وفيها شباك عريض
أو ممكن تقول كوة لانو ما مركب فبها شباك خشب ولا حديد
و الهوا ضارب بيجيب ليك الروائح المحببه من دكان ود الشيخ.
الواطه تراب مفروشات فيها بروش من سعف النخل ونحنا قاعدين عليها
الكرعين في شكل معين قدامك، و اللوح في الحجر، واليد بي الجنبه
شايله قلم القصب، ونحنا نتلولح شمال و يمين
عشرة أو يزيد من الحيران يتلولحو في إيقاع خفي و رزم
شمال يمين ... شمال يمين ... شمال يمين
و مركز اللوليح ماشي في شكل مثلث مركزو سيدنا
علي عرشه في مقدمة الخلوة ،و العرش بنبر ما عارف فيهو
تقروقة جلد ولا شملة ولا شنو (الذاكرة خربت).
و سيدنا قاعد علي العرش مغمضا" عينيه و يتلولح
قائدا" أوركسترا الحيران.
"سيدنا سيدنا ، تبت يدا"
و يرد سيدنا " تبت يدا ابي لهب و تب"
" سيدنا سيدنا، القارعة ما القارعة"
و يرد سيدنا " و ما أدريك ما القارعة"
مغمضٌ عينيه، مستغرق في إيقاعه و لولحته، لم أري سيدنا
يخطئ او يسهو ، وفجاءة عندما يصل احد الحيران ألي طاقته
في الكتابة والحفظ، يلتفت اليه سيدنا و يقول ليه" خلاص قوم، فتح الله عليك"
و الويل الويل لمن حسب أن إغماضة العينين و الأستغراق
مع النغم الداخلي تمنعان سيدنا من رؤيته وهو يعبث
له الويل و الفلقة و ما أدراك ما الفلقة.

سلام....حضرنا للتحية

Quote: سلام....حضرنا للتحية

اختنا Hayat Hussien
وعليك السلام ومنك السلام واليك
حضروكا يشرف والله
اها ما دام جيتي احضري معانا بليلة الخلوة لكن اعملي حسابك من الحصحاص في اخر الحلة
امي الله يطول عمرا دائما تقول لينا تربية العيال قرش حصحاص
.
.
ولك تحية خاصة كما تعلمين اختي حياة حسين الصادق

اها ما دام جيتي احضري معانا بليلة الخلوة لكن اعملي حسابك من الحصحاص في اخر الحلة
امي الله يطول عمرا دائما تقول لينا تربية العيال قرش حصحاص



والله يا عبدالله اخوي امك الله يديها العافية جابت التايها

جنس حصحاص هو بس ربك المستعان


تحياتي واحترامي

Quote: و سيدنا قاعد علي العرش مغمضا" عينيه و يتلولح

مغمض العينين سيدنا ولكنه مركز تركيزا لو اخطأ احدهم في آخر ركن من الخلوة يصححو
.
.
يقال ان هارون الرشيد استقدم مدرس فارسي ليدرس ابنه القرآن واللغة
فبدأ معه اول درس بالتدريج وبدأ معه بتحفيظ سورة المسد
فيقول الدرس تبت يدا
فقول التلميذ : تبت يدان
فتضجر المدرس واخبر والده بانه لايرغب في تدريسه لانه غبي اقول له تبت يدا فيقول تبت يدان
فضحك هارون الرشيد وقال له هذا الطفل يتحدث اللغة العربية على سجيتها
فلابد ان يقول تبت يدان بدلا من تبت يدا لانه في اعتباره بان الجملة كاملة وتبت فعل ويدان فاعل
ولكنك ان قلت له تبت يدا ابي لهب لقال لك تبت يدا ابي لهب
وهنا عرف الفارسي الفرق بين الماذر تنق والقراية ام دق
.
.
شكرا عيدروس لاتحافك البوست واثرائه بهذه الذكريات المحببة الى نفوسنا