ماسورتكم طلعت ماسورة يا ناس الموية !!

زمااان قبل تالاتين سنة تقريبا ، كنا اذا فتحت الماسورة في الحمام وما عملت حسابك ممكن تقع من ضغط الموية المندفع ، دلوقت اذا حاولت تركب ماسورة لبيتك ، ممكن ببساطة ضغطك يرتفع ، وتروح فيها عديييل كدة !!


بدت قصتي مع ناس ( هيئة المياه ) لمن بديت (خلال إجازتي السابقة للسودان) في إجراءات توصيل المياه لقطعة الارض بمنطقه جبرة ، وكنت طبعا عندي فكرة مسبقة انهم ناس عجيبين ومتعبين ، لكن ما كنت فاكر الموضوع ح يصل الحد ( الغير ) معقول ..
وصلت مكتب ( المويه) في الصباح بدري قلت عشان اكون اول زول ، اقدم الاوراق المطلوبة حتى ولو قضيت اليوم كلوا مافي مشكلة ، المهم انجز بقدر المستطاع الموضوع ..
اول المشاكل اكتشفت انو المكاتب فاضية مافي زول زاتوو تسألو عن طبيعة الاجراءات والمطلوب شنو ، المهم انا كنت مستعد بكل الاوراق المطلوبة وغير المطلوبة .....لكن اقدم شنو ولمنو دي المشكلة ..
قضيت تقريبا نص اليوم مع ستات الشاي والقهوة في انتظار الباشمهندس المسؤول عشان اعرف المطلوب شنو !!
نهاية اليوم وصل المهندس ، وقابلني بحرارة شديدة اشعرتني بالارتياح وخففت عليّ شوية ، فقدمت الاوراق المطلوبة ليهو ، فطلب مني العودة بكرة عشان يمشي معاي شخص يشوف الموقع ويقيس المسافة من آخر مكان للشبكة لغاية القطعة بتاعتي ، ويّقدر الاشياء المطلوبة ..فبإختصار طلعوا ثلاثة اشخاص كل واحد منهم في يوم منفصل وعايز حقو بتاع الطلعة ( اتعاب طلعة ) ، فدفعت ووصلته ماشي وجاي وشاي وفطور وووووالخ
المهم التقديرات طلعت 90 متر من آخر الشبكة للقطعة ، فرجعنا للمهندس وشاف التقديرات والمسافات في الورقة ( الكروكي) فطلع ورقة ( فلسكاب) كبيرة وكتب قائمة بطول مأساتي :

1/ مطلوب 15 مساورة ( انبوب) بطول 5متر للواحدة من نوع ( بي في سي) 6 بوصة
2/ منهول من ناصية الشارع
3/ بلف 6 بوصة ( امية)
4/ 00000الخ والقائمة تطول ...




فقدم لي القائمة بإبتسامة غبشا : امشي جيب الحاجات دي وتعال عشان نشوف الباقي شنو ؟

طبعا حاولت اناقش في انو ليه انا اجيب خط كامل ( امية ) عشان اوصل بس الموية . قال لي لو ما جبتها ما ح تقدر توصل ، اكسب زمنك وجيب الحاجات دي ، لانو نحن ما عندنا منها اي شئ !!
سألتو : نهائي ؟؟
اجاب : نهائي !!
عرفت انو الموضوع محسوم ومنتهي والموضوع موضوعي والمشكلة مشكلتي ، فأشيل شيلتي براااااي !!

خلال يومين كنت وفرت كل الاغراض المطلوبة ، ووضعتها في الموقع ..

- اها يا اخوانا انا جبت الحاجات كلها ..
- ايواا خلاص شوف ليك ناس عشان يحفروا ليك الخط بتاع الانابيب دي عشان تدفنا !!
- الحفارييبن برضوا اجيبهم انا يا اخوانا ؟؟
- ايوة امال ح يجيبهم منو ؟؟
- وديل بكم ح يحفروا ؟
- والله انت واتفاقك معاهم !!
- اجيبهم من وين ؟
- من اي محل ، لكن لو عايز ناس يحفروا ليك كويس ومضبوط ، انا ح اجيب ليك ناس تمام وخبرة .
- طيب اشوف وارجع ليك يا باشمهندس .
- خلاص شوف وتعال لي ، انا بجيهك تب !!

اكتشفت انو انا اتحمل تكلفة الحفر والدفن إضافة طبعاً للمواد كلها .

وبعد المشاورات مع بعض المعارف والعارفيين ببواطن الامور ، نصحوني بضرورة المشي معاهم زي ما عايزين ومحل ماعايزين ، عشان الامور تمشي من غير ( لكلكة) ، ففوضت أمري لله ، فسلمتهم الامور كلها ( مقاولة) حفر وتركيب ودفن وتوصيل ووووووو 00وكلوا على حساب العبد لله !!
فوصلت الموية أخيراً بعد اسبوعيين تقريباً بتكلفة بلغت حوالي 000ر500ر3 جنية ( بالقديم ) طبعاً!!!


الغريبة بعد ما خلصت الموضوع وشعروا انهم اتعبوني شديد واحد فيهم قال لي : والله انت محظوظ المربع بتاعك ده الموية فيهو كويسة
- يعني شنو كويسة ؟؟!
- يعني ما بتقطع كتير !!!