Post: #1 Title: إطمئنوا.. مها عبد العزيز بخير Author: علاء الدين صالح Date: 04-25-2011, 06:26 PM Parent: #0
وكذلك الرائعة وجدان صُباحي
الحمد لله
Post: #2 Title: Re: إطمئنوا.. مها عبد العزيز بخير Author: جمال السنوسي Date: 04-25-2011, 06:27 PM Parent: #1
شنو يا زول
خير ان شاء الله
طمنا اكتر
Post: #3 Title: Re: إطمئنوا.. مها عبد العزيز بخير Author: علاء الدين صالح Date: 04-25-2011, 07:02 PM
Quote: شنو يا زول
خير ان شاء الله
طمنا اكتر
إطمئن يا جيمي جات سليمة والحمد لله ومها تجاوزت المرحلة الخطرة والله يا جيمي نزلَت مني دمعتين فرح مها ما هينة ووجدان ما ساهلة يا جمال
Post: #4 Title: Re: إطمئنوا.. مها عبد العزيز بخير Author: علاء الدين صالح Date: 04-25-2011, 07:57 PM Parent: #3
الرائعة مها عبد العزيز.. نجمة الغد (سابقاً) إن صح التعبير، والمبدعة المتألقة حالياً.. إستمعت لها في عمل جديد خاص من خلال حلقة برنامج نجوم الغد (بانوراما) الأخيرة الأسبوع الماضي.. العمل الجديد الخاص من ألحانها.. وياله من لحن.. ومن كلمات الشاعرة الرائعة وجدان صباحي.. ويا لها من كلمات.. أما الأداء فكان ملائكياً صداه.. مليء بالشجن وكأنَّ كئوس النرجسية المشعشعة بأرقى الأحاسيس قد إنسكبت عليه.. أسلوب لحني جديد ومتفرِّد يُبشِّر بسودان جديد متقدِّم في مجال الأغنية.. إنه عمل إبداعي نسائي خالص مائة بالمائة.. جعله بكل المقاييس يرتاد زُحل الفن الراقي وثريا الجمال والروعة.. كلمات أفقدتني البوصلة ولحن تغلغل في داخل أعماقي وأداء أسكرني..
فأدمعَت عيناي فرحاً
Post: #5 Title: Re: إطمئنوا.. مها عبد العزيز بخير Author: علاء الدين صالح Date: 04-25-2011, 08:18 PM Parent: #4
فعايز أقول ليكم شنو.. مها عبد العزيز بخير وعافية.. ووجدان صباحي برضو.. وغيرهن.. والأغنية السودانية بألف خير طالما حواء السودانية بكل هذا الألق الإبداعي..
وإطمئنوا.. ونوموا قفا
Post: #6 Title: Re: إطمئنوا.. مها عبد العزيز بخير Author: علاء الدين صالح Date: 04-25-2011, 08:24 PM Parent: #5
(إطمئنوا..) كلمات الرائعة: وجدان صباحي ألحان وأداء الرائعة: مها عبد العزيز _____________________
إطمئنوا............. نفس إحساس التحدي ونفس نبضات التمني وحتى تكويني الهُلامي وأجمل الكلمات أظِنو إطمئنوا............. ياني زهرة بلون بنفسج شايلة عطر الكون وحيدة وياني زولة بعقل فارِه ضاعت أحلاما وسعيدة ويانى يانى.. لا أتبدلَتْ جوّاي مساحة ولا أظنو تتغير الأركان عنيدة إطمئنوا............... شامخة فى ذاتي ودواخلي يانعة فى ريدي البكِنّو هاطلة أمطار من تسامُح جارفة إحساس البِحِنو ومهما طالت بَيْ مسافة فى النهاية طريق بتِمو وإطمئنوا.............
Post: #7 Title: Re: إطمئنوا.. مها عبد العزيز بخير Author: علاء الدين صالح Date: 04-25-2011, 08:45 PM Parent: #6
أغنية (إطمئنوا) كلمات الشاعرة: وجدان صباحي لحن وأداء الفنانة: مها عبد العزيز
Post: #8 Title: Re: إطمئنوا.. مها عبد العزيز بخير Author: علاء الدين صالح Date: 04-25-2011, 10:22 PM Parent: #7
لحن راقي جداً يا مها.. إحساس مُرهف يؤهلِك بجدارة للتحليق عالياً فوق أمكنة المعهود.. إختيار عالي الجودة لكلمات هادية وبديعة.. لكِ مني ألف تحية تقدير وإعجاب
Post: #10 Title: Re: إطمئنوا.. مها عبد العزيز بخير Author: Yassir Tayfour Date: 04-25-2011, 10:51 PM Parent: #8
يا علاءنا مشتاقون يا هالك تأملت اللحن والكلمات بصوت محمود عبد العزيز، فتمنيت الأغنية له.. ___ الكلمات ما فيها كلام، ولكن أداء مهما أداني إحساس بمعتز صباحي، وأنا لا احسه ؛)
Post: #13 Title: Re: إطمئنوا.. مها عبد العزيز بخير Author: علاء الدين صالح Date: 04-26-2011, 02:16 PM Parent: #10
Quote: يا علاءنا مشتاقون يا هالك تأملت اللحن والكلمات بصوت محمود عبد العزيز، فتمنيت الأغنية له.. ___ الكلمات ما فيها كلام، ولكن أداء مهما أداني إحساس بمعتز صباحي، وأنا لا احسه ؛)
ابن طيفور.. صديقي الوغد الذي أحببت شوقي إليك يمور أعلم في قرارة نفسي أنك محمود الهوية نانسيُ الهوى ولو قلت لي أن أداء مها واهتزازها الصوتي قد وهبك إحساس أبوبكر سالم بلفقيه.. لكفيتني شر مذمّتك فيما يلي يا صديقي يعني ألم تجد تشبيهاً لمها غير معتز صباحي الذي أكره؟؟ تباً لك
Post: #9 Title: Re: إطمئنوا.. مها عبد العزيز بخير Author: Rawia Date: 04-25-2011, 10:23 PM Parent: #7
والله ماعرفتها الا من صوتها معقولة؟ عمومًا من أجمل الاصوات وأرقها بتذكرها كويييس مع بشير عباس بتردد أغاني البلابل بالتوفيق يامها
Post: #11 Title: Re: إطمئنوا.. مها عبد العزيز بخير Author: Hussein Mallasi Date: 04-25-2011, 10:53 PM Parent: #9
لحن خليجي بامتياز و أدته مها عبد العزيز - أيضاً - بامتياز.
Post: #15 Title: Re: إطمئنوا.. مها عبد العزيز بخير Author: علاء الدين صالح Date: 04-26-2011, 06:56 PM Parent: #11
Quote: لحن خليجي بامتياز و أدته مها عبد العزيز - أيضاً - بامتياز.
ملّاسي إحتراماتي ومودَّتي ارْجِعِ السمع كَرَّتَيْن عزيزي ملّاسي ينقلِب إليك اللحن سودانياً خالصاً. لو اعتبرنا أن منهج إدخال نصف التون (ولنقُل السلم السباعي) في الأعمال الموسيقية السودانية وتقنية الهرمنة يؤديان إلى طمس الهوية الخماسية التي إمتازت بها الألحان السودانية لجنينا على الأغنية السودانية بتنوعها التراثي ولمحونا لونيات الغناء الكردفاني وأغاني شرق السودان التي تستنبط في ميلوديتها من السلالم السباعية، ولأصدرنا الحكم جزافاً أن معظم الإرث الذي تركه لنا الراحل المقيم أحمد الجابري من رصيد غنائي غني بأنصاف التون وموغل في السباعية.. مجرد أداء صوتي سوداني لأغاني (مصرية)، ناهيك عن شرحبيل وعبد القادر سالم وغيرهم. إن طابع الأغنية السودانية هو المزج بين السلم الخماسي والسباعي لأنه لا ينفصل عن هوية السودان الأفروعربية.
Post: #12 Title: Re: إطمئنوا.. مها عبد العزيز بخير Author: علاء الدين صالح Date: 04-26-2011, 12:04 PM Parent: #9
Quote: والله ماعرفتها الا من صوتها معقولة؟ عمومًا من أجمل الاصوات وأرقها بتذكرها كويييس مع بشير عباس بتردد أغاني البلابل بالتوفيق يامها
راوية تحياتي رغم إني ما سمعت أعمال مها الجديدة (وألحانها) الأخرى.. لكن شكل اللحن دا أظهر جمال حسها الموسيقي وموهبتها التلحينية وتصميمها على التميُّز بالخروج من النفق القديم ومحاولة النقش على هرم الجديد في عالم الأسرار الموسيقية أمنياتي لها أيضاً بالتوفيق والتفوّق
Post: #14 Title: Re: إطمئنوا.. مها عبد العزيز بخير Author: طارق الكوتش Date: 04-26-2011, 05:23 PM Parent: #12
تعرف مشيت لمها اخرى والبوست جهج باكاتنا
....
علاء سلامات يا رجل وناسف انو ماقدرت اقابلك تانى بسبب سفر مفاجئ للسودان ... اتمنى انو امورك تكون طيبه ورحلتك لدبى كانت موفقه ...
Post: #16 Title: Re: إطمئنوا.. مها عبد العزيز بخير Author: علاء الدين صالح Date: 04-27-2011, 09:51 AM Parent: #14
Quote: علاء سلامات يا رجل وناسف انو ماقدرت اقابلك تانى بسبب سفر مفاجئ للسودان ... اتمنى انو امورك تكون طيبه ورحلتك لدبى كانت موفقه ...
كوتش ياخ والله مشتاقين جداً أكبر توفيق من عند الله في رحلتي بتاعت دبي إنّي لاقيتكم واتعرَّفتا على ناس جميلين زيَّكم يا طارق تحيّاتي ومودَّتي الخالصة لكل الشباب المعاكم
Quote: تعرف مشيت لمها اخرى والبوست جهج باكاتنا
يا عمكـ هسا كلامك دا هو الحيجهجه باكات حكومتنا الإتحادية ما تقول كمان اليومين ديل في بوادر معارضة مسلّحة من داخل الأراضي الأثيوبية؟
لحن راقي جداً يا مها..
