Post: #1 Title: لمن القمرة ، كانت بت قــلبي اليمين..! Author: Kabar Date: 04-24-2011, 08:07 AM
بهاك..
بهاك ، عطـــّر غنايّ ،و مشاني فيك زفـة عبير ، رويانة من نضح غيمة، شليقة ، منسابة في ورق السفر.. تريانة بي لون الكلام ، نبض الورد ، عبق الشجن..
بهاك..
شداني في حض المسافة ، ضحكة وتر ، غرقانة في نبض الحكي ، لملم ،شتات الجبل البنفسج..و صراخ الليل الغُبار ، رماني في دفق المعاني ،السايبة من نفس الحقيقة ، شاترني فيك اٍيقاع اللحظة الفانية، المسكونة بعرق الجنون و صدف الريح الموهومة بالنواح..
بهـاك.. عبــّاني منك.. و خبــــّاني في جوف التمــني.. في رعشة المســاْ البيشابي لهمس الضـُحا ، غـرّقني في بحر النبض ، و اتناثر جواي ، فواصل بوح مكتولة بالضحك الكـآبة..
بهاك..! ختاني في سكتك دفقة جرح ، شكل خطوة مجدولة في شبق المهــابة ، صـوّر الليل البسافر في الغمام ، و متاكي في بحر الضو النزيف.. فجـّر الشوق الهواجس ، و رسم لونك.. شهقة مدار ، ضحكة شمس عريانة في الحفيف..!
كبر
Post: #2 Title: Re: لمن القمرة ، كانت بت قــلبي اليمين..! Author: Kabar Date: 04-24-2011, 08:08 AM Parent: #1
ذات..
ذات صمت ، علمني البعد عنك.. ملامح الجرح الأولى .. ثم قال لي ، نورس الرغبة الحميم : كفاك ، كف عن الحلم..!
كبر
Post: #3 Title: Re: لمن القمرة ، كانت بت قــلبي اليمين..! Author: Kabar Date: 04-24-2011, 08:10 AM Parent: #2
ذات حزن ..
بديت اركض في ملامحك ، لقيتك معاي ، جوه في جوف النبض ، خـُطاك ترشح بالعبير .. و كان مكتومة في نبض النبض ، تقاسيم كلمة ، خانت كتف السكوت..! و ماتت ، غرقانة في بحر التردد..!
كبر
Post: #4 Title: Re: لمن القمرة ، كانت بت قــلبي اليمين..! Author: Kabar Date: 04-24-2011, 08:14 AM Parent: #3
يا قمــر..
يا قمر ، رُش الضو.. قول للنيل ، صفوة غُناك خلي الزمن ، يبقى اخضر ، ينسج همس الفرح من بهاك و النجيمة ترحل ، في حضن الغيمة ، تسأل الليل ، عن صفاك و المحـّنة ، ترجع ، تشيل الضحكة من شهقة سناك و التعب البيشابي ، يمشي يرحل ، يبعد بعيد عن خـُطاك
ياقمر ، ما ترُش الضو ، و قول للورد سر غناك..!
كبر
Post: #5 Title: Re: لمن القمرة ، كانت بت قــلبي اليمين..! Author: Kabar Date: 04-24-2011, 08:17 AM Parent: #4
ما ، لقيتك..
مرة ، شــُفتك في اخر المـدى ، ملفوفة بي توب الســراب و شديت عليك وتر الرحــيل و زادي من جمر العــذاب خـُضت في بحر المتاهـــه.. ادمت خـُطاي حر اليبــاب.. و ما لقيتك..!
سرحت جوه ، في جوف الظنون ، تهت في وهج المواسم.. و ضعت في شبق الجنون.. و ما لقيتك..!
سألت عنك ، جنون الريد ، و هدير الريح سألتك عنك ، صدى النبض ، في قلبي الجريح سقت الخطا في زحمة دروب.. و سكنت في حزني الضريح.. و ما لقيتك..!
شــلتك آهــة ، جوه في رمل المسافه ، سقيتك خاطري ، و من صدقي ، ضل الرهافــه كاتلت فيك ، قوافل الخروج ، و رهاب جني الخرافه ، و رجعت ، سبحت في بحر الحروف ، رسمتك ، كلمه من وهج الحصافة و سألت عنك ، سري الغريب ، تعبي الدفين ، موجه المخافــه.. و ما لقيتك..!
كبر
Post: #6 Title: Re: لمن القمرة ، كانت بت قــلبي اليمين..! Author: بله محمد الفاضل Date: 04-24-2011, 08:20 AM Parent: #4
أي يا اخي أصرف لينا الكلام الحنين دا الله يرضى عليك
فترنا وحات الرسول من وجع القلب من عمايل السياسة دا لو فضل في القلب باقي نبض أصلاً
بجيك تب
وواصل بدون فواصل بالله عليك
بالمناسبة صباحك خير وغير
Post: #7 Title: Re: لمن القمرة ، كانت بت قــلبي اليمين..! Author: Kabar Date: 04-25-2011, 08:00 AM Parent: #6
صديقي بله ..حبابك صباحك ورد.. كتر خيرك على المرور من هنا..و يا ريت تجيب معاك ناس الحنين اياهم.. هي مساحة.. سوف تضئ رغم عنت الأشياء..
و نشوفك.. كبر
Post: #8 Title: Re: لمن القمرة ، كانت بت قــلبي اليمين..! Author: Kabar Date: 04-25-2011, 08:01 AM Parent: #7
ذات مــوج..
النيل ، غادر مســارو ، و سابني ف غابة النحــول الفــرح.. خــاني و مشــى.. و الفراش عاف صدر الزهــور البرق الســاهي ، غشاني في لمحة حزن ،و هجــّاني في عزيف الريح العجول و الشــوق ، الشــوق قــرّاني صورتك ، و المطر قـــرّبني منك .. لا الصــباح البينا ، طــلّ ولا الحزن الفيني غامر ، يقدروا يفرّحوا ذاكرتي بيك..
كبر
Post: #9 Title: Re: لمن القمرة ، كانت بت قــلبي اليمين..! Author: Kabar Date: 04-25-2011, 08:09 AM Parent: #8
ياجمــــــيله..
يا جميلة ، زي ضحكة قمر ، يا حنينه ، زي صفو الرحابه القاك متين ، و الخطوة في دربك ، ديمة ، مكتولة في ســرابا و الحقول المن فوتك انتي ، لسه ملفوفه بي يبــابا القاك متين ، عطر الورد شالك صدق ، خطاك في جوف الكتــــابه
كبر
Post: #10 Title: Re: لمن القمرة ، كانت بت قــلبي اليمين..! Author: Kabar Date: 04-25-2011, 08:10 AM Parent: #9
ذات خـــوف..
ذات خــوف.. لا لقيتك في خاطري ســابله ، ولا كتل ضجيج الثواني ، ضحكة غنــــّاي لا الزمن قــرّب خطاي منك ، لا صورتك فارقت مســار الخــواطر..
كبر
Post: #11 Title: Re: لمن القمرة ، كانت بت قــلبي اليمين..! Author: Ishraga Mustafa Date: 04-25-2011, 08:52 AM Parent: #10
حين تكون الكتابة ضد الخوف... كما يغنى العميرى ياقمر
ياكبر!!
Post: #12 Title: Re: لمن القمرة ، كانت بت قــلبي اليمين..! Author: Amira Elsheikh Date: 04-25-2011, 09:11 AM Parent: #11
استاذنا كبر بعيد عن غبار السياسة .. حنين وشجن ودفق انساني جميل يملا الزول ويفيض...
لك الود
Post: #13 Title: Re: لمن القمرة ، كانت بت قــلبي اليمين..! Author: Kabar Date: 04-26-2011, 07:12 AM Parent: #12
اشــراقة يا صديقتي.. حبابك.. كتر خيرك على العميري.. حاجة تخليك تفرد الذاكرة حواري صغنونة..و تقعد تطارد فيها ما تجود به غابة الأشواق.. غزالة تسكك.. و غزالة تسكها.. لم تعتر ليك الدمعة..!
كبر
Post: #14 Title: Re: لمن القمرة ، كانت بت قــلبي اليمين..! Author: Kabar Date: 04-26-2011, 07:13 AM Parent: #13
أميرة..حبابك يا صديقتي.. كتر خيرك على المرور من هنا.. هي مساحة.. قلنا نخليها تساسق شوية.. يمكن تجم المساسقة التانية..
كبر
Post: #15 Title: Re: لمن القمرة ، كانت بت قــلبي اليمين..! Author: Kabar Date: 04-26-2011, 07:14 AM Parent: #14
فيــضك..!
فيضك وهج ، غمر جروف كل الخواطر.. حضن مسامات الهم ، سقاها الضو.. انشرح نبض المدارات القصية ، اتلملم سحاب الفجر ، و جانا يركض ، خاطرو النــدى.. شاف عيونك ، غــزالتين ، و زمن مجروح بالفرح.. لقيتك في زمن غريب ، مكتوبة في ذاكرة الأماسي الندية .. قريتك وكت المغيب ، و تليتو شروق نبضك لصمت الأفق .. الحزن جواي حاضر ، شكلك غابة من النور المهيب.. و الخطوة نحوك بتزيد عمر..