أقسم بالله بأن هذا الرجل لا يستحق أن يكون أب!!!!!!

تحياتي إخوتي الأعزاء
طلعت الصباح عشان أجيب أغراض البيت اليومية
مريت علي السوبر ماركت جمبو طوالي ملحمة جزارة
وأنا عايزة اطلع سمعت صوت طفل بصرخ بشدة
جيت مع الناس الأتلمت نشوف الحاصل شنو
لا حول ولا قوة إلا بالله..
راجل لا بخجل ولا بستحي طويل عريض فارد عضلاتو
نافش ريشو ومنفوخ بضرب في الولد والله العظيم ضرب ... الحمار يجري منه
الموضوع شنو؟ هو في موضوع طفل عمره ما يتعدا الست سنوات
الناس بقت تكوريك يازول داير تكتل الولد
الرجل رده عليهم هوي آناس أبعدوا مني ما فيكم الأتعرضني ولدي ومخير فيهو
أنا المسكينة قرب يجيني انهيار من هول المشهد
الولد مغطي وشو بي ايديهو من كتر الكفوف
وشوفوا المصيبة الخلتني أبكي
اقسم بالله الراجل إتجرد من إنسانية الأدميين
تعرفوا عمل شنو
لفح السكين من الطربيزة وعايز يمسك الولد من رقبته ...... يا الله منظر إرهاب حقيقي
طوالي خمشوا واحد من الواقفين ورماهوا بره الطين الشغال فيها دي
واتنين شالوا الولد طلعوا بيهوا .... الجدير ذكرو الرجل ده في كامل قواه العقلية
ولا مجنون ولا سكران ولا محشش
حسبي الله ونعم الوكيل فيهو
أما أنا.......
هذه الأم الحنون
رزقني الله ببنتين هم كل حياتي أفديهن بعمري
تمنيت لو لدي ولد
نعم هذا الطفل البريئ الجميل
ارادت له الأقدار أن يكون هذا أباه
أين أمك أيها المظلوم
رجعت البيت وحتى كتابة هذه الأسطر لم تجف دموعي
لا تعليق بل أتركه لكم .................................................

طبعا ده اصلا ما اسلوب في التعامل مع الاطفال وفي البلدان المتحضرة الاب ده الليلة كان الشرطة سجنته واتحاكم زي المافي حاجة
اكن في بلدنا عااادي تشوفي مناظر زي دي
نحن زمان لما ودونا المدرسة اهلنا بقولوا للاستاذ (اللحم هولك والعضم هولنا) يعني الولد ده مسموح ليك تدقه زي ما عايز بس ماتكسر عظم وحتى كان كسر عظم مافي زول بقول حاجة ده خلاف انه اي زول في الحلة ممكن يدقك عااااادي لانه اي كبير بعتبرك ولده وهو بوجهك للطريق الصحيح

Child abuse


الاخت رشا

سلام

للأسف بلدنا ما فيها قوانين خالص الا التي تحمي النظام..

Quote: لفح السكين من الطربيزة وعايز يمسك الولد من رقبته ...... يا الله منظر إرهاب حقيقي

ده إرهابي

في منظر السكين في مرة من الإضرابات الفاشلة في المدرسة الثانوية العامة المدرسة أحضرت أولياء الأمور وجلد الطلبة في الطابور كل طالب خمسة جلدات، قام أحد أولياء الأمر تناول السكين التي كان يلبدها في ذراعه وحلف يمين إلا يقطع أصبع ولده عقابا له...
ناظر المدرسة والمدرسين قبضوا عليه وهو يناتل حالف باليمين لازم يقطع أصبع الولد ...
ما خلاص يا عمنا الولد وإنجلد...
وهو مصر لازم القطع لازم القطع...
والأساتذة جزء منهم ملتف حوله والآخر عامل ساتر للطالب ما ينقطع أصبعة الذي يكتب به
والطلبة واقفين طابور جف ريقهم نشف للمنظهر المهول والراجل ميت في السكين رافعها فوق ويدافر...
وأخيراً أقنعه الناظر بأن يؤجل القطع اليوم ... لأنه يوم الجلد
والقطع خليه لما يرجع البيت ...
الطالب المغدور لم يظهر في المدرسة ثاني يوم ولا بعد ذلك اليوم والأخبار تقول أنه ما رجع البيت في ذلك اليوم مخافة من القطع وغادر غلى مدينة أخرى

تسلمي يا رشا
رغم آلام الضرب الجسدية المبرحة
إلا أن آلامه النفسية أكبر وأرسخ


أسوأ ما يمكن أن يحدث لطفل هو أن يضربه أحد أو حتى يوبخه بعنف أمام الآخرين
الحكاية دي بتسبب للطفل إحراج لا يمكن تصوره وبتخلق عندو كره لذاتو وضعف في شخصيتو


ما بقدر أقول ليك أنا بجاهد قدر شنو عشان ما أوبخ ابني قدام زول عدا ناس البيت طبعاً
أما الضرب فلا أستطيع أن أرفع يدي لأضربه مهما كان السبب
والحمد لله بيني وبينو علاقة بتسمح لي إني اقول ليهو دا غلط بدون ما أضطر لضربو
بس بلجأ لوسائل عقاب فعّالة وناجعة أكتر، وفي نفس الوقت تكون آمنة نفسياً وجسدياً

أمي وأبوي ما إستخدموا معانا الضرب كوسيلة
فبالتالي لن أستخدمه أنا كذلك ..

Quote: لفح السكين من الطربيزة وعايز يمسك الولد من رقبته ...... يا الله منظر إرهاب حقيقي طوالي خمشوا واحد من الواقفين ورماهوا بره الطين الشغال فيها دي واتنين شالوا الولد طلعوا بيهوا .... الجدير ذكرو الرجل ده في كامل قواه العقلية ولا مجنون ولا سكران ولا محشش

سلام يا رشا والله حاجة غريبة سكين كمان؟؟؟

انتى عارفة فى مشكلة كبيرة بين أم الطفل والزول المجنون دا،
التعامل دا ما طبيعى يعنى انعكاس لمشكلة،

والمشكلة الح تتولد فى المستقبل الطفل دا ح يضبح ليهو طفل فى المدرسة لو ما حصلوهم كا أسرة.

أخوي عبد المجيد: سلام
الشايفاهو أنا لحدي الليلة مفهوم الضرب ده
بيعتبر ثقافة في اذهان بعض الأباء والأمهات
الشي البستغرب ليهو كيف يمكن لسياسة الضرب
أن تولد فهما عند الطفل وأن تخرج لنا عالما مثلا
والله أنا شفت بي عيوني وأنا طفلة في الأبتدائي
جارتنا بتربط بتها زميلتي كانت اعمارنا 11 سنه
دي بتربطها علي حلق باب خشب والضرب بي
عكاز ابوها اه من يمه يابابا
شفت الأرهاب موجود من زمان
تقديري

أخي/ عبد العزيز
تحياتي
ده بضرب في ولده نتيجة شي داخلي فجر الثورة دي
تقول شنو لما واحد في حافلة ركاب يعاكس بت ناس محترمة
ومش معاكسة لفظية ...................
تقوم البت توجه ليهو إساءات
وتديهو كف معتبر يقوم يديها بنيه إنما
ده كلو وركاب الحافلة شاهد ما شافش حاجة
قوانين ياته دي ؟ كل التقدير

أخي/ المسافر
ليك سلام
اسلوب الضرب بورث كراهية الطفل لأبويه
وما بتكون في علاقة بينهم في المستقبل
غير أنو الطفل بكون عدواني
شكرا لتواجدك

عزيزتي/ تيسير
دمتي يا غالية
أم حنون وجميلة
ياتيسير الراجل ده ما أظنه سمع بأنو في ناس محرومين من الأطفال
ولا سمع بأطفال الأنابيب
وناس بتدفع كل ما تملك عشان طفل وااااااااااااااحد
قسمة ساكت
يحفظ وليداتك ويخليك غيمة حب ومحنة ليهم
دمتي

أختي العزيزة / نجاة
وأنا راجعة البيت كنت بفكر
مستحيل الراجل الحيوان ده يعمل كده ساي
أكيد يكون في سبب واحد من اتنين
إما مفلس ع الحديدة
أو في شي بينو وبين المرا
الولد بعدين ما بضبح ولد في المدرسة يانجاة
أنا خايفة يضبح أبوهو نفسه
مشكورة يا غالية

أدفع عمري ليرحمني ربي بأخت لمحمد إبني .

الزميلة رشا : نقول سبحان الخالق
وش الطفل بنشيل بيهو التوتر من يومنا
لإزالــــة التوتر متِع عينيكـ بوجه طفلــة " فيديو"

أبو/محمد
أسأل الله الكريم رب السموات ورب العرش العظيم
أن يرزقك بدل البنت أتنين( توأم)
وتسميهم علي بناتي الدكتورة / علا / والمهندسة رؤى
ووعدا مني ادعو ليك في صلاتي
الأولاد هم طعم الحياة
لك تقديري الخالص
أم/ علا ورؤى

ألأخت/رشا...أم/ علا ورؤى

لك ولأسرتك الجميلة كل تقدير وإحترام.

موقف مؤذى شديد..وكثير من االناس بتفتكر أن الضرب بربى..وهذا ما تربوا عليه.

أجمل مافى العلاقة أن تكون هناك ثقة بينك وبين أطفالك .هذه الثقة تولد فيهم حاجات كثيرة جميلة.

منهج التربية السليمة مفقود عندنا فى السودان إلا من رحم ربى.

أتعامل مع أسرتى عمومآ بالتاءات أدناه.

تسمع.تضحك. تكلم.تلمس .تلعب....

مع حالص إحترامى لك وللمتداخلين.

أم علا

لوكي الصبر

ربنا يهدي الجميع

و ما ياهو ده حال البلد البيجنن

الأخت العزيزة / رشا

ده موضوع خطير جداً ومؤلم وقاسي ! .. ومافي أسوأ في هذا الوجود من ظلم ذوي القربى ! هنالك جرائم وإنتهاكات وتجاوزات مستترة خلف جدار العلاقة الأسرية ! وغطاء العائلة وذوي القربى ! وأبشع أنواع العنف ،، بلاشك ، هو العنف الأسري الذي يتم من وراء حجاب .. وقد يكون على مرأى ومسمع من الناس لأنه يكتسب شرعية متوارثة ومتعارف عليها ! وللأسف الشديد ، مبررة ويسندها المجتمع ! كالذي حدث أمام الناس وأمام ناظريك !...

إكتفى الناس بحماية الطفل مؤقناُ ،، دون النظر إلى ما سوف يحدث له فيمابعد ! حين الدخول إلى زنزانة البيت ! وما بداخلة من وحوش ، وقسوة ، وجحيم !

هنالك عدة أسباب : أولها غياب الوعي المجتمعي الذي يكفل حماية النساء والأطفال ! وثانيها ، عدم وجود قوانين رادعة ، تحمى الرعية من الراعي ! وتدافع عن النساء والبنات والأولاد والأطفال !

ثالثاً عدم وجود مؤسسات مدنية تتكفل برعاية الحقوق ...

يوجد الآن في أغلب البلدان المتحضرة،
مؤسسات متقدمة لحماية الأسرة والطفل ! :

يوجد عندنا هنا مؤسسة كبرى أنشئت حديثاً تحت مسمى :

المجلس الأعلى لرعاية الأسرة

هذه مؤسسات تملك سلطات فاعلة ومؤثرة ،، ويمكنها التدخل لحماية النساء والأولاد والأطفال من التغول !


أشكرك جداً يارشا لأهمية الموضوع .

الاستاذة رشا

لك التحية الطيبة


كثير من الناس انعم الله عليهم بنعم لا يشكرونها منها الاطفال

لابد من تشريع يحمى الاطفال من كل الناس حتى الوالدين

أخي/اسماعيل
في إعتقادي سياسة الضرب في مجتمعنا
من الموروثات عند بعض الأسر
إلا من رحم ربي
والكتيرين بنسوا انو بصير شرخ كبير
بين الطفل والشخص البضربوا
وطبيعي بكبر وهو فاقد الثقة بنفسه
تقديري

أخي/ د عثمان
أسعد بلا حدود لمداخلاتك
في مجتمعنا حاجات كتيرة
سببها التربية
تحياتي الطيبات


الأخ / مأمون
قلت لي عن الظلم
الطفل يحرم ده ظلم
يضرب ده ظلم
الظلم شي قبيح
وما بصدر إلا من شخص قبيح
وربنا مع المظلوم دايما
الف شكر ع المرور


أخي/ الطيب
هناك أشخاص من البشر
يحملون فقط أسمائهم
يتحركون كما الحيوان
أسرى لمعتقداتهم العقيمة
مثل أن يعذب شخص فلذة كبده
وهو يجهل بأن شكر الله عبادة
يشكرون الناس .......وإن فعلوا
ويبخلون بالشكر لله
هؤلاء أنصاف البشر
مشكور أخي