يــا ود الـــباوقة... البعوضة فطستنــــــــا!

كلم لينا عمر البشير يرشوا لينا العاصمة دي بمبيدات للبعوضة والذباب.
إن شاء الله بي طيارة أباتشي.
أو يرشونا نحن ذاتنا عشان نرتاح.
ياخي الناس ما قادرة تنوم وحقن الملاريا والحمى حرقنهن حريق.
بدل البقر البتمشي مصر والسلاح البيمشي غزة والقروش البتمشي تشاد خليهم يرشوا لينا البعوضة دي.
أو يرشونا نحن.

انت الوداك تنوم في المجاري شنو

هههههه

بعدين ود الباوقة مالو ومالك

البعوضك تفطسك تفطسك ( شن طعمك )

برضو وجه ضاحك ( قليلا )

مجاري شنو يا بق بق ياخ. إنت قايلني صحي مشرد؟؟
ياخي نايمين عند اهلنا البعوضة مقطعانا.
بعدين هي وين في مجاري عشان ننوم فيها؟؟
المجاري كلها اندفنت واتردمت (زي الردم بتاعك داك) زمااااااان. وكل خريف يقولوا رصدنا كم مليون لتنظيف المجاري وتقوم الملايين تتلحس والمجاري في حالتا.

شماسي

حدد موقعك في العاصمة

مع الشكر

Quote: شماسي حدد موقعك في العاصمة

داير ترسل لي ناس علاء الدين يودوني ورا الشمس؟

إنت عايز بموقعي شنو. العاصمة كلها بعوضة.

يعني عايز ترش فوق بيتنا بس؟
طيب أنا في الثورة الحارة 20
وخطيبتي ساكنة في أم بدة العاشرة
بس رشوا الحتتين ديل.
والباقين إن شاء الله يلحقوا اليابانيين.

أسي عليك الله يا بق بق دي فرقها من الأباتشي شنو؟؟

..

أسمع لو ما قدرت تكلم عمر البشير كلم الوالي صاحبك التاني
وقول ليهو

لقد نزفنا..... لقد نزفنا من البعوض.

Quote: إن شاء الله بي طيارة أباتشي. أو يرشونا نحن ذاتنا عشان نرتاح.

سلام شماسي
ياخوي الفضل فيكم دا نحن محتاجنوا في فتح الخرطوم.
اوعها بتاعت بورتسودان الماعرفوها لليوم؟؟؟؟؟

Quote: وكل خريف يقولوا رصدنا كم مليون لتنظيف المجاري وتقوم الملايين تتلحس والمجاري في حالتا.

والله المرصود ياخوي للجيوب المنتفخه ماليكم انتم تعال شوف قلاع الاسمنت والمزارع الفخمه ديك ؟
وقول يخوت وقصور حرم في هولندا ماشفتها ؟؟
عليك الله شفت مجاري في امبده والثوره؟؟؟

Quote: داير ترسل لي ناس علاء الدين يودوني ورا الشمس؟

يارجل خليهم يستعدوا للطوفان القادم الارزقية.
لك الود
شــــــــــــطة

Quote: حدد موقعك في العاصمة مع الشكر

والله يا باوقيشن الزول ده غلطان ..ساكن فى الاطراف والعشوائى
كلمتو سبعة وسبعين مرة ...وقلت ليهو ارحل على نواحى كافورى
او امتداد المجاهدين..بالعدم يسكن فندق (روتانا) كحل مؤقت؟

عموما ياود الباوقة كلم الجماعة فى مزراع (البقر ) يصرفوا ليهو
عدد واحد شوال (بعر البقر) ويعمل بيهو بخور فى نص الحلة
شان البعوض (المسلط ده يعرف (قيمة ) بعر بقر كافورى كيف..



(بعر بقرنا ولا بف باف النصارة )...والله يابق بق القسمة رمتكم
فى شعب طلبنجى ..معليش استحمل شوية ..

Quote: عموما ياود الباوقة كلم الجماعة فى مزراع (البقر ) يصرفوا ليهو عدد واحد شوال (بعر البقر)

الحبيب معاوية الصائم
سلامات

والله حليتها تب بمقترحك الجميل دا.
بس نحن عندنا بقرات تبرعوا بيهن بنطالب بالبعر يرجع لينا.
واول باخره تدخل الجمارك يكون ودالباوقه واقف علي التخليص.
عشان يساعد اخونا ؟؟؟
مودتي
شـــــــــــــطة

شماسى لك التحية..

Quote: طيب أنا في الثورة الحارة 20 وخطيبتي ساكنة في أم بدة العاشرة بس رشوا الحتتين ديل.

ألأنانية ليك شنو إنت وخطيبتك بس....وكان رشوكم من الملاريا بتجيكم ألحساسية.....عمومآ يرشنا الله بحبو ...

تحياتى لودالباوقة...

شماشى الطرد وصلنى من اهلى ..انا بره السودان
تقوم تصل ناس المحلية وتدفع الرسوم بتاعت اونيك
15 وتشوف كارو ودور البخور ...والله كريم







هسى طبعا ود الباوقة بكون فكر فى (استيراد كمية ضخمة) من بلد (المنشاة)

يا اسماعيل

والله ما قصة أنانية لكن طالما بقى فيها "ترشيد" للرش قلنا أحسن نتخارج أنا والختيبة.
عليك الله أسي الطيارة دي أصلها لمن رشت ما ترش البلد كلها.لكن الكيزان كعادتهم لا يهدرون موارد البلاد. وجنهم وجن الخمج.

ما قصرتوا ياشطة وود الصايم

البعر ذاتو اليجيوهو لينا بنرضى بيهو
بس ما يكون عليهو دمغة.

ياخي أنا بامشي أسكن في المزرعة ذاتا. ما عندي مانع.

والله ناس بق بق ديل البعر ذاتو ما حيدونا ليهو.

واحد شافع بلدياتنا قاعد ياكل ليهو في منقاية قام واحد قال ليهو أديني قطعة منها.
قال ليهو لأ.
داك قال ليهو طيب أديني لحسة
قال ليهو لأ.
قال ليهو خلاس أديني الكرورة (وكانت قد أصبحت بيضاء بعد اللحس الشديد)
داك قال ليهو
لا.. داير أزرعا.

يا ود الصايم

أستلمت الطرد ولقيتو بعر بني آدميين.
شفت ال###### دا.

ا ل و س خ

يا حكومة احمي المواطنين من الانوفليس
رشوا المبيدات في جميع اقاليم السودان
لو ما قادرين تحموا المواطن السوداني ادونا عرض اكتافكم
اقطعوا وشكم
ارحلوا ايها الموميات

البعر لقيتو زي دا يا ود الصايم

زي دا تقوم تولعو يجوك ناس فجر الأدويسا يرشوك.

أحسن البعوضة ياخويّ

أين أنت يا بق بق

أسي عليك الله القروش البضيع فيها وزير الثقافة دا في حفلاتو دي ما كان عدمت البعوضة والضبان نفاخ النار؟؟؟


ياخي وزيركم دا رايحو ليهو حفلة. من يومو المسك الوزارة وهو مدور هجيج وأمبارح مرقا في الجنينة.

هي لله هي لله
هي شنو يا أهل الله
المهم يا شماسي يا أخوي هي مشكلة عويصه نعاني منها تجيب بطانية أو تتغطي بالملايه الحر يفسخك تطلع مقدمة صنقورك ساكت ويا حالات لو عندك صلعة أو جلحات حتي إلا وتراخ تعضيك الباعوضه وكأنها في إنتظارك وفي نوع تاني كده ما يزن إلا في الأضان يعني يسمعك مقطوعة ما عندي أى معني وإنت في حاجه للهدوء والنوم وشويتن يهوهو ###### ناس فلان وبعدين يتنحنح عمك ويقول الصلاة خير من النوم "ونعم بالله وصدق رسول الله والصلاة خير من النوم" لكين النام منو أصلاً يا عمك أهو بنحاول نعمل ميتين لكين لا الحر برحمنا ولا الباعوض مريحنا.
على كل قالوا هنا حلول عديدة لمكافحة الباعوض
أول هذه الحلول للأسف هو إقتناء بندقية ليزر "إتخيل بالله" ودي طبعا حركة أمريكية وحروب فضاء والكلام الكبار دا ودي أنساها
والحل الثاني قالو جانا من المملكة المتحدة وهو حل إلى حد ما نتن تصور قالو ريحة القدم ممكن تجذب نوع معين من العناكب هذه العناكب تتغذي على البعوض المسبب للملاريا ، أها تقوم تلبس ليك شراب أو مركوب أو كبك لمدة أسبوع ما تخارجو من كراعك ولمن تجي تنوم بعد أسبوع بالتمام والكمال تمرق النعلات أو الشراب وإنت وحاسة شمك. بس خطورة العملية تكمن في العناكب دي بعدين أتخلص منها كيف يعني أوديها وين.
أنا غايتو مع حل الزميل معاوية عبيد الصايم فهو حل عملي وواقعي وبعدين متوفر بشقيه البقري وغير البقري وكل نوع له نهكته وقوته الخاصة. المشكلة لو أدمن البعوض بعد حين من الدهر ريحة بخور التيمان إياه أها في الحالة كدي إلا في تشتري بقرة فاقع لونها.

Quote: أها تقوم تلبس ليك شراب أو مركوب أو كبك لمدة أسبوع ما تخارجو من كراعك ولمن تجي تنوم بعد أسبوع بالتمام والكمال تمرق النعلات أو الشراب وإنت وحاسة شمك

عارف يا ملا
الواحد يجيب ليهو مركوب فاشري تكون البقرة العملوا من جلدها المركوب ميتة ليها اسبوع ونقوم تلبسو أسبوع كامل وتكون حايم بيهو في زنكي أم درمان داك وسط الطين وفضلات الذبائح وتجي ترقد.

المشكلة إنك الليل كلو صاحي أول ما الشمس تشرق تجر السرير على محل الضل تقول آخد لي غفوة يقوم يستلمك الضبان.

Quote: أنا غايتو مع حل الزميل معاوية عبيد الصايم فهو حل عملي وواقعي وبعدين متوفر بشقيه البقري وغير البقري وكل نوع له نهكته وقوته الخاصة

والله حل عملي وخاصتن لو جبنا بعر القذافي دا. وتحوطا من ناس فجر الأوديسا تقوم تولع ليك طلح فوق راس البيت عشان تجهجه طيارات الناتو.

Quote: البشير يخاطب اليوم العالمي لدحر الملاريا بالأحد الخرطوم: أماني إسماعيل يخاطب الرئيس عمر البشير الأحد المقبل، الإحتفال باليوم العالمي لدحر الملاريا وذلك بقاعة الصداقة، في وقت يلتئم فيه مؤتمر مديري الملاريا بالولايات رقم (22). وأكد مصدر مسؤول بوزارة الصحة الإتحادية، أن الإحتفال يأتي لتجديد الإلتزام السياسي للدولة وبمشاركة الولايات وذلك بعد مرور عشرة أعوام من إعلان أبوجا الذي حضره (44) رئيس دولة من بينهم الرئيس عمر البشير، الذي حقق العديد من المبادرات التي أدت إلى إنخفاض الملاريا بنسبة (59%) من عام الأساس ونقص معدل الوفيات بنسبة (63%) من عام الأساس. وقال إنه سيتم تدشين برنامج أعمال المكافحة لدحر الملاريا الذي تنظمه الولايات وذلك بتوزيع (66) عربة من الدعم الفني المقدم من الصندوق العالمي لدحر الملاريا والإيدز والدرن (القلوبال فند)، ولفت إلى أنه من خلال الإحتفال سيتم تدشين حصة الدعم الفني من الناموسيات المشبعة، بجانب عقد مؤتمر مديري الملاريا بالولايات بهدف مراجعة وتقييم أعمال المكافحة للولايات والوقوف على تنفيذ توصيات المؤتمر (21) الذي إنعقد في مدينة بورتسودان مطلع العام الحالي.

جريدة الراي العام

يقول ليك دحر ويجي يقول ليك توزيع ناموسيات.

ياجماعة الملاريا دي بيدحوها بدحر البعوضة والبعوضة بيدحروها بنظافة البيئة وتجفيف المياه الراكدة ورش المدن بمبيدات.
ولو دا كلو غلبكم ولعو البعر بس.

يا وليد ناسك ديل أديهم مخيخ من مخيخاتك ياخي إن شاء الله السفلي

واحدة من طرائف الخواجات ومحن علمائهم أوصت بأن نقوم بمزازاة الباعوض وعدم تمكين ذكر الباعوض من أنثي الأنفوليس لأن الأنثي بتكون في هذه الحالة في حاجة إلى دم الناس لا فرق بين الدم البقري والدم الشربات وذلك من أجل صحة البيض قبل الفقس أها فكرت في الأمر مراراً ولقيت من المستحيل على شخصي أن يقوم بتقمص دور بوليس الآداب وأقعد أكارد في الباعوض عشان ما يتزاوج وبالتالي تبور أنثي الأنفوليس وما تبيض ولو بالتبني الأمر الذي ينفي حاجتها إلى أن تشرب الدم وتقول حرم ، والمنطق يقول كورس ملاريا معروف خير من مكاردة الباعوض في الليلة الظلماء.

Quote: أوصت بأن نقوم بمزازاة الباعوض وعدم تمكين ذكر الباعوض من أنثي الأنفوليس

يا ملا..

كمان آخر عمرنا دايرنا نبقى شرطة نظام عام وللبعوضة كمان.
قادر الله

طيب أسي البعوضاية دي الواحد لو عايز يكشها (من كشة) يكشها كيف؟؟؟

شوف دا
دراسة علمية : بعوض معدل وراثيا لمكافحة الملاريا


لكن والله أنا شايف أحسن من البعر (كما أفتى ود الصايم نفعنا الله بعلمه) ما في حل