Post: #1
Title: لازم تعود لينا يا محمــود
Author: مرتضى احمد عبد القادر
Date: 04-19-2011, 01:32 AM
محمود عبد العزيز( الحــوت) الصوت القوي ونديان صوت لا مثيل له وطريقة أداء مميزه لحد بعيد عطاء مستمر لأكثر من عقدين من الزمان له عدد ضخم من الألبومات تغنى بالكثير من الأغنيات وله عدد كبير من الأعمال الخاصه له جمهور كبير ومتجدد جمهور وفي و محب للحوت حد الحب وحد الوفاء جمهور لم يتوقف عن إدهاشي في تعبيره عن هذا الحب الما إعتيادي ورغم التراجع الكبير في مستوى محمود الفني لكنه مازال فنان الشباك الاول مستمرا في كسر صمت ليالي الخرطوم بحفلاته العامه بفضل ذلك الصوت وفضل هذا الجمهور الوفي ورياد اللذان يجعلان محمــود قادرا على الإستمرار والعطاء و يجب أن يكونا محفزاً له على العودة لمستواه الفني الذي كان، لا يمر إسبوع دون أن تلحظ إبتسامة وحيدة على جدران الخرطوم الحزينة متمثلة في إعلان لحفل عام للفنان محمود عبد العزيز فصارت إعلانات حفلاته وحيدة تصارع إعلانات علاج البواسير وعلاج وجع الضرس (العلاجو جمب العربية) و يافطات الحمامات العامة في كافة مواقف المواصلات بولاية الخرطوم و أسواقها وإن كنت أشفق على هذا الحـوت كثرة الظهور في الحفلات العامه واعتقد أنه من الأفضل له أن يباعد بينها ليعطي نفسه فرصة لتجويد اعماله ويعطي وقت أكثر للبروفات التي بالتأكيد ستعيده لنا سيرته الأولى لكني لا أخفي سعادتي عند كل مرور بإعلان جديد له كونه ما زال قادرا على العطاء بعد ذلك الظهور الباهت على شاشة النيل الازرق في رمضان الماضي.
|
Post: #2
Title: Re: لازم تعود لينا يا محمــود
Author: مرتضى احمد عبد القادر
Date: 04-19-2011, 01:36 AM
Parent: #1
قبل شهر تقريبا وعند مروري بإعلان لحفل عام للحـوت رجعت بي الذاكرة (احد عشر عام والجمهور والحوت حاضرين) وهو تاريخ آخر حفل عام كنت قد حضرته للحــوت رغم أني لم إتوقف عن سماع هذا الحوت بتاتا ولكن لمحمود في الحفلات طعم آخر ولشدة ما اسرفت في ذكريات حفلاته وما أحسست به من إستمتاع بتلك الذكريات قررت حضور ذلك الحفل وقد كان ذلك بصحبة بعض الاصدقاء الذين كان بينهم من لم يحدث له شرف حضور حفل للحــوت رغم حبهم الشديد له وإدمانهم السماع له، فكانت تلك الليله الجميله الغريبه واالتي ساحكي لكم بعض مشاهداتي عنها وعن ما تلتها في حضرة الحــوت فقد عاودني الحنين و وجدت نفسي بعد اسبوع واحد من ذلك الحفل حاضرا لحفل آخر قال لي أحد أصدقائي الذي حضر معي الحفلان ( يبدو ليا الحوت دا سرو باتع وكان باريناهو يضيعنا) لم أجبه حينها بالجمله التي دارات في ذهني (يعني شنو كان ضعنا في بلد السجم دي البتضيع فنان فلته زي محمود) ليس لشي سوى أملي أن يعود ذلك المحمود ولا يضيع من أيدينا هذا الفنان العجيب
بجي (وبحكـــي ليكـــم) عن الحفلتين كان الله هون
|
Post: #3
Title: Re: لازم تعود لينا يا محمــود
Author: حسبو عكاشة
Date: 04-19-2011, 12:41 PM
Parent: #2
| Quote: (احد عشر عام والجمهور والحوت حاضرين) وهو تاريخ آخر حفل عام كنت قد حضرته للحــوت |
حفلة كانت عجيبه, لا فليق لا ضرب بالكراسي
الناس كانت رااايقه و الحوت منداح غنا لينا لمن قلنا بس
--
موش ياها الحفله القاصده سنة 2000 في مسرح الاهلية و معانا مُجدد ولا ما ياها؟
|
Post: #4
Title: Re: لازم تعود لينا يا محمــود
Author: مزمل خيرى
Date: 04-19-2011, 01:43 PM
Parent: #3
يامرتضى ..
ياريت رابط حفظ للغنية الحلوة دى لحدى
مايجى اخونا عمر الفاروق ويندااااح .!
|
Post: #7
Title: Re: لازم تعود لينا يا محمــود
Author: مرتضى احمد عبد القادر
Date: 04-19-2011, 10:24 PM
Parent: #4
| Quote: يامرتضى .. ياريت رابط حفظ للغنية الحلوة دى لحدى مايجى اخونا عمر الفاروق ويندااااح .! |
إتفضل يا مزمل http://www.sudanvoice.net/v2/nnnnnnnnnnn3.mp3 وراجنك وراجين إندياح عمر الفاروق
|
Post: #5
Title: Re: لازم تعود لينا يا محمــود
Author: مرتضى احمد عبد القادر
Date: 04-19-2011, 07:07 PM
Parent: #3
| Quote: موش ياها الحفله القاصده سنة 2000 في مسرح الاهلية و معانا مُجدد ولا ما ياها؟ |
ياها زاااااته يا حسبو كدي احكي ليك الحفله البعد 11 سنة دي
يومها وصلت مبكرا رغم أن الحضور كان أكثر من نصف المسرح وتسمع صوت محمود يغني هنا وهناك وكأن الجمهور يصبر نفسه بتشغيل أغنياته المسجله على هواتفهم المحمولة التي يقاطعها كل حين صفير او صوت جهور متضجر من تأخير الحوت وبعد أن أكتمل حضور الجمهورعلى المسرح بما يقارب النصف ساعه دخلت الفرقة الموسيقيه وباشرت ترتيب آلاتها وجلستها وسط اصوات الجمهور والصفافير التي أخذت تمتزج مع اصوات الآلات الموسيقيه التي تتأهب وإذا به يظهر متحركا نحو خشبة المسرح فيهرع ما يقارب ثلث الجمهور نحوه ملتفين حول خشبة المسرح حاملين كاميراتهم يهمون بتصويره والجمهور يهتف بصوت واحد محمـــــــــود محمــــــــود ونسي تماما تضجره من تأخير محمود في الحضور ليبدا الحفل وأنا غارق في محاولات تفسير كل هذا الحب و لم أستغرق في ذلك سوى بضع دقايق فقد أصابتني العدوى و وجدت نفسي واحدا من هؤلاء المريدين للحوت قدس الله سره
(والله زمـــــن يا حسبو (الخطوة من دونك) التي إبتدر بها محمود الحفل رغم أنها من الأغنيات التي لا تستهويني مثلها مثل بعض اغنيات محمود الخاصه لكنه بأدائه لها بإحساس عالي وصوت عجيب بقت لي زيها وزي (بعد الفراق) الكنت بتمنى أسمعه في ذلك اليوم
ياحسبو الحــوت دا فنان عجيب وتكمن سر عظمتو في حب الناس ليهو وحبو هو للناس اديني صنه بجي تاني كان الله هون واديك لقطه لقطتين من الحفلتين
|
Post: #6
Title: Re: لازم تعود لينا يا محمــود
Author: khaleel
Date: 04-19-2011, 08:13 PM
Parent: #5
هلا وغلا مورتا
سنة 88
استمعت لمحمود في اغنيته الخاصة
حلوة الصدف وسمحة الظروف
ساعتها ايقنت ان هذا الفتي سيكون له شان كبير
في الفن السوداني
|
Post: #8
Title: Re: لازم تعود لينا يا محمــود
Author: مرتضى احمد عبد القادر
Date: 04-20-2011, 00:40 AM
Parent: #6
هلا هلا خلي Quote: هلا وغلا مورتا
سنة 88
استمعت لمحمود في اغنيته الخاصة
حلوة الصدف وسمحة الظروف
ساعتها ايقنت ان هذا الفتي سيكون له شان كبير
في الفن السوداني |
وقد كان ذلك يا خلي ونتمنى عودتو كامل البهاء يكمل مشوارو ويطرب نفسو ويطربنا
|
Post: #9
Title: Re: لازم تعود لينا يا محمــود
Author: مزمل خيرى
Date: 04-20-2011, 11:31 AM
Parent: #8
يامورتا .. الود دا بالجد كان زمان ود فلتة ..
ياخ فى أول التسعينات كنا بنمشى حفلاتو النهارية فى المكتبة القبطية
والفندق الكبير من الساعة 11 صباحاً بنكون حجزنا الكراسى القدام وطبعاً بيكون
معاه فنان تانى بس الناس كانت بتجى عشانو وهو بيجى الساعة خمسة ويطلع المسرح
نكون قاعدين متسمرين من 11 لحدى 5 مساء بدون كلل أو ملل .. عشان نستمتع بالصوت
الطروب دا من قريب ..!
ياخ دا لمن كان يغنى لينا سمحة الصدف وحلوة الظروف كنا بنعيش فى دنيا تانية ..
يامورتا والله حالة محمود هسع ماعاجبـانى كلو كلو .. ربنا يهديهو بس .!
ياسلااااام عليك يامحمود لمن كنت محمود .!
__
أين أنت ياعمر الفاروق .؟
|
Post: #10
Title: Re: لازم تعود لينا يا محمــود
Author: عمر الفاروق
Date: 04-20-2011, 12:01 PM
Parent: #9
والله غلبني ..
اتعقدت من التكرار والإعادة ..
الح نقولوا ح نعيدو ..
محمود عبد العزيز ..
اوووووووووووووووو من الصحابي ..كما يحلو لنا مناداته وكما يحب سابقاً ..أسة ما بعرفو ليكم :)
يا جماعة محمود ده لا بتقدر فنان ولا بتقدر تقول مغني ..
محمود ده ما اسمو فلتة زمانو ..
فمحمود فلتة الزمن الفات والزمن الجاي ..
عبقرية الصوت دي ماركة مسجلة لي محمود ..
طريقة الاداء مختلفة ..
بصمة ..
الزي محمود ده لازم صوتو ينتهي ..لازم يتعب ..لازم ينهار ..
ما عشان مهمل ..ما عشان ما مهتم بي روحو لالالالالالا ..
لانو محمود ظاهرة كونية ..
زيو زي مزنب هالي داك ..
بب رب كرب جف ببح ..
ما بتفهم اي شي تاني ..
اححححححححي يا جماعة ..والله الكتابة في محمود دي قصة براها ..
يا مزمل ياخ صدق ولا ما تصدق من اخر مرة اتلاقينا كان بتين ؟ شهر 9 مش؟
انا جبت الشرايط القديمة معاي ووصلت الرياض وداب ما فهمت الحاصل ركبت شريط محمود ومن وقتها لحددددي الليلة الشريط ده ما طلع من العربية ..
من بين العشرة شرايط اخترت واحد من تسجيلات محمود زمان كان هو الاوضح في التسجيل بيناتهم ..ايام بيبدا بي لقيتك في زمن ضايع وبعدها شات خلاص يا قلبي كان خاصم ومن بعدهم يا عمر وهو يادوووب بيقول الاغنية عمل جديد من الحان الكردفاني ..
الجمبة التانية شايت فيها البنريدو تايه ..جايي ليه تعمل إيه ..وكم مرة وصيت ليك ..ومن ثم ختمها بي حنيني إليك ..
والله يا مزمل انا كل لحظة بسمع الشريط ده بي طريقة مختلفة ..
كل مرة بسمع محمود ده بي فهم تاني..
والله جااادي وبي حليفتا ..
قررت انزل الاعمال دي هنا واجي اقعد انظر فيكم واقدددكم ..لكن تاني استكترت محمود فيكم :)
قلت البد بيهو برااااي ..
يا محموووووووووود ياخ ..ربنا يديك الصحة والعافية ..
ياخ انت زول حلو وقلبك نضيييييييييف ..
انت يا زول يا طيب..
بالمناسبة متابع مع صديقي عثمان محي الدين صاحب مشروع سحر الكمنجة واداني خبر جمييييل..
محمود دعاهو عشان يشتغل معاهو في حفل وتحديدا يشتغل ليهو المقطع بتاع شغل الكمنجة في ما تشيلي هم لأن صاحب الفكرة العبقرية والمنفذ هو عثمان محي الدين فكان رد الجميل بالجميل..
وكمان تم بيناتهم تعاون في عمل شهدت انا ميلاده إسمو " حرب الكلام" كلمات والحان عثمان محي الدين ومحمود ح يغنيها ..
مع اني قادر افهم من الصعب تقبل محمود بي العمل الجديد فهكذا انا هكذا انتم رسخ فيكم محمود زمان ..
اقول ليكم حاجة غريبة ؟
سمعتو محمود بي تركيز عااالي كده واتمعنتو الاداء وهو بيغني يا مدهشة ؟؟
عليكم الله جيبو الشريط ده واسمعوهو بي رواقة واقعدو اتمعنو في محمود ده بيعمل في شنو بعيدا عن المؤثرات الصوتية ..
مش اغنية خفيفة ؟
لكن محمود صب فيها عصارة ابداع حقت تلتمية سنة ضوئية ..
ركزو معاهو لما يقول احترامي في رغم بعدي برسل سلامي..في اخر الاغنية ..
اسمعوهو في سيب عنادك وهو بيغني اثرتني بدلالا وقالت لي لاااااااالا ..
استمتعو اكتر بي محمود الرايييق في اغنية واحدة تؤكد عبقرية حوتا لمن يضرب في الوتر الرايق الما حق الكوراك وهو بيشتغل اغنية سكت الرباب ..عليييكم الله اسمعوها ..
عايزن تسمتعو بي الكوراك في الغنا وتعرفوهو فرق؟
أسمعوهو في شذى الايام ..
عايزين تعرفوهو غير سمح الغنا في خشم سيدو ؟ أسمعو في ربيع الحب بتاعت زمان ..
واسمعوهو في بعد إيه ..
تخريمة :
محمود ..إنت كويس؟
|
Post: #11
Title: Re: لازم تعود لينا يا محمــود
Author: عبد الحي علي موسى
Date: 04-20-2011, 12:35 PM
Parent: #10
لازم تعود يا محمــود
لازم تعود يا محمــود
لازم تعود يا محمــود
فالطوفان أغرقنا.
Quote: فمحمود فلتة الزمن الفات والزمن الجاي ..
|
نعم محمود فلتة الزمن الفات والزمن الجايي.
تحياتي للجميع
|
Post: #15
Title: Re: لازم تعود لينا يا محمــود
Author: مرتضى احمد عبد القادر
Date: 04-20-2011, 01:42 PM
Parent: #12
شكرا على اللنك الساقني برضو للنك بتاع بوست كيكي ودنيا عجيبه يا عصام وفيما يتعلق بموضعين اللنك الحوت ممتع روحو وعايش عشان نفسو والناس البتحبو حربي وطيب وجميل وبحب الناس بس لا بنكسر لا بيتدهنس لا بيكسر تلج لا بريد يكسرو ليهو تلج زول فطرتو سليمه وزول بالموصفات دي طبيعي يحصل ليهو كدا في هادي البلاد
| Quote: فنان و مجنون و غنّاى و معولق و برضو نحبو |
بالضبط كدا يا عصام بس كمان يرجع لينا يحفظ غناهو تمام ويبطل يسرح مثلا في غنية لهيب الشوق الجبتها لينا بعد الإنترو الموسيقي الحلو دا والصولو الجميل الإتلعب فيهو والجمهور الكبير ومقدار الحب الباين في إنفعالو مع الموسيقى و محمود وكل الحاجات دي بتوديك حته فوق خالص يجي محمود الوداك فوق زاتو يدق بيك الدلجه بسرحتو وعدم حفظو للاغنية و بلف ويدور بفتش في المقطع الراح ليهو
ياخ اول لقطه يظهر فيها الحوت في الفيديو بتاع لهيب الشوق تقدر تحس فيها الزول دا قدر شنو جميل
|
Post: #13
Title: Re: لازم تعود لينا يا محمــود
Author: مرتضى احمد عبد القادر
Date: 04-20-2011, 01:01 PM
Parent: #10
الله يعدله عليك يا عمر الفاروق فشيتني عديل محمود فنان فلته و زول حلو جدا وبني آدم قلبو نضيف لحد بعيد وإنسان فطرتو سليمه وديل كلهم مع بعض سر محمود وسر محبة الناس ليهو
|
Post: #14
Title: Re: لازم تعود لينا يا محمــود
Author: مزمل خيرى
Date: 04-20-2011, 01:10 PM
Parent: #13
ياعمر ..
كفيت وو فيت ..
رابط بة مجموعة من الاغنيات لحوتة ..
أهداء لمورتا وعمر وكل الماريين ..
http://www.sm3na.com/singer832.html
|
Post: #16
Title: Re: لازم تعود لينا يا محمــود
Author: الوليد محمد الامين
Date: 04-20-2011, 02:33 PM
Parent: #14
سلامات يا مرتضي
الحق هو ما قاله عصام جبرالله
| Quote: هذه البلاد ظالمة لعشاقها يا مورتا و قاتله لصناع الجمال و محبي الحياة فيها |
لكن نسوي شنو في ومع البلد دي ....
|
Post: #17
Title: Re: لازم تعود لينا يا محمــود
Author: عمر الفاروق
Date: 04-20-2011, 03:36 PM
Parent: #16
يا جماعة ياخ محمود ده كائن عجييييب..
كم أحب هذا المخلوق ياخ ..
والله كلامنا ده كلو تنظير في حقك يا حوتة ..
ما بنقدر نوفيك وكفيك ..
إنت زول ما طبيعي ..
ماااااااااااااا طبيعي ياخ ...
اقفلو البوست ده الله يرضى عليكم ..
|
Post: #19
Title: Re: لازم تعود لينا يا محمــود
Author: مرتضى احمد عبد القادر
Date: 04-20-2011, 11:32 PM
Parent: #14
| Quote: لازم تعود يا محمــود فالطوفان أغرقنا. |
إنشاء الله يرجع يا عبد الحي ويكون دوما بخير ويسعدنا
| Quote: رابط بة مجموعة من الاغنيات لحوتة .. أهداء لمورتا وعمر وكل الماريين .. |
تسلم كتير يا مزمل
| Quote: لكن نسوي شنو في ومع البلد دي .... |
مافي شي غير نقول لمحمــود نحن بنريدك يا دكتور وليد
|
Post: #18
Title: Re: لازم تعود لينا يا محمــود
Author: احمد محمد بشير
Date: 04-20-2011, 07:32 PM
Parent: #1
لازم .. يعود الحوت
و
لازم نشكرك يا - مرتضي احمد
عملنا (داون لود) للغنية المبالغة الموجودة في البوست
ربطنا الكمبيوتر عبر "الوصلة" مع المسجلة, وشغلنا السماعات الكبيرة
والان نستمع, وكل ما الاغنية تنتهي بتعيد نفسها مرة اخرى
جميع افراد العزابة بيشكروكــ.
ما تتخيل الجو عندنا كيف مع هذه الرائعة.
|
Post: #20
Title: Re: لازم تعود لينا يا محمــود
Author: مرتضى احمد عبد القادر
Date: 04-21-2011, 00:23 AM
Parent: #18
Quote: لازم نشكرك يا - مرتضي احمد
عملنا (داون لود) للغنية المبالغة الموجودة في البوست
ربطنا الكمبيوتر عبر "الوصلة" مع المسجلة, وشغلنا السماعات الكبيرة
والان نستمع, وكل ما الاغنية تنتهي بتعيد نفسها مرة اخرى
جميع افراد العزابة بيشكروكــ.
ما تتخيل الجو عندنا كيف مع هذه الرائعة. |
والله ما حتتخيل أنا إتبسطته قدر شنو يا احمد بالجو الحلو الخلقتو ليكم الغنية وهاك الغنية دي خصيصا للعزابة
حب الناس
|
Post: #21
Title: Re: لازم تعود لينا يا محمــود
Author: حسبو عكاشة
Date: 04-21-2011, 01:14 AM
Parent: #18
| Quote: ياحسبو الحــوت دا فنان عجيب وتكمن سر عظمتو في حب الناس ليهو وحبو هو للناس |
الحوت انسان يا مورتا
مجموعة (محمود في القلب) برعاية محمود ذات نفسو بعملو تكريم لأُسر الفنانين المتوفين
كل اثنين من كل اسبوع بالنادي العائلي
|
Post: #22
Title: Re: لازم تعود لينا يا محمــود
Author: مرتضى احمد عبد القادر
Date: 04-21-2011, 11:26 AM
Parent: #21
| Quote: برعاية محمود ذات نفسو بعملو تكريم لأُسر الفنانين المتوفين |
 الغنية الشغاله فوق لمداخلتك دي ما متأكد إذا كانت في تأبين للخالدي ولا في حفل صادف ذكرى رحيلو غايتو في تسجيل تاني بيتكلم فيهو بعفيتو وحلاوتو المعهوده عن الخالدي قبل الغنية والبغني معاهو دا ولد الخالدي
|
Post: #23
Title: Re: لازم تعود لينا يا محمــود
Author: وليد عبد اللطيف
Date: 04-21-2011, 12:45 PM
Parent: #22
مرتضى ... سلامات
تقدر تقول محمود بوب مارلي السودان
هذا الشاب بيغني اكثر من ثلاثون عام وكل عام صوته يزيد حلاوة وتعتيق
عودة محمود لازم لانه خاتمة الفنانين العمالقة وعمل بصمته الفنية في تاريخ الاغنية السودانية
وهذا يكفيهو ان يتربع بينهم
وبالمناسبة زول حبوب ويساعد في ظهور الفنانين الشباب وهو اول من عمل على ظهور صديقنا فرفور وقدمة للجمهور
في حفلاته الخاصة كثيرا كنت اكون بينهم ..
|
Post: #24
Title: Re: لازم تعود لينا يا محمــود
Author: حسبو عكاشة
Date: 04-21-2011, 03:06 PM
Parent: #23
| Quote: الغنية الشغاله فوق لمداخلتك دي ما متأكد إذا كانت في تأبين للخالدي ولا في حفل صادف ذكرى رحيلو غايتو في تسجيل تاني بيتكلم فيهو بعفيتو وحلاوتو المعهوده عن الخالدي قبل الغنية والبغني معاهو دا ولد الخالدي |
الغنية الشغاله دي كانت في نادي التنس و كانت متزامنة مع مرور سنه علي رحيل الاستاذ الكبير الخالدي و البغني معاه فعلا دا ولد الخالدي
في نفس الحفلة محمود اتبرع لأسرة الخالدي بقطعة أرض
|
Post: #25
Title: Re: لازم تعود لينا يا محمــود
Author: مرتضى احمد عبد القادر
Date: 04-22-2011, 01:51 AM
Parent: #24
| Quote: يا جماعة ياخ محمود ده كائن عجييييب.. كم أحب هذا المخلوق ياخ .. |
يا عمر كدي خليني أحكي ليك اللقطه دي وحنبطل تنظير وبعداك نتفاهم في موضوع نقفل البوست دا على كدا
في آخر حفل لمحمود في الفواصل الصغيرة بين الأغاني الجمهور كان بيطالب بأغنية (الفات زمان) بصورة متكررة فمحمود اتكلم وقال (للاسف الغنية دي شاعره وملحنه منعوني اغنيها وبعتذر ليكم) وقبل على الفرقة الموسيقيه لكن الجمهور واصل يهتف (الفات زمان) فقبل على الجمهور وقال بإبتسامة و طريقه عفويه جدا (والله جد) واثناء ما الجمهور بدا ينفعل ويصفر محمود واصل كلامو بإبتسامه و قال (لكن حنغني الفات زمان والجاي كمان وأي شي إنتو دايرنو و مالو كان غرمونا ومالو كان سجنونا) وقبل على الفرقه والمزيكا بتاعة االفات زمان دورت
الفــات زمــان
|
Post: #26
Title: Re: لازم تعود لينا يا محمــود
Author: مرتضى احمد عبد القادر
Date: 04-22-2011, 02:11 AM
Parent: #23
سلامات وليد
Quote: عودة محمود لازم لانه خاتمة الفنانين العمالقة وعمل بصمته الفنية في تاريخ الاغنية السودانية
وهذا يكفيهو ان يتربع بينهم
وبالمناسبة زول حبوب ويساعد في ظهور الفنانين الشباب وهو اول من عمل على ظهور صديقنا فرفور وقدمة للجمهور
في حفلاته الخاصة كثيرا كنت اكون بينهم .. |
|
Post: #27
Title: Re: لازم تعود لينا يا محمــود
Author: محمد عبد الماجد الصايم
Date: 04-23-2011, 08:18 AM
Parent: #26
يا حليلو محمود .. لو عامل حساب الناس البتسمع
ليهو ما كان عمل الحركات الأرعة دي كووولها!!
حليلو والله
|
Post: #28
Title: Re: لازم تعود لينا يا محمــود
Author: مرتضى احمد عبد القادر
Date: 04-25-2011, 03:24 PM
Parent: #27
ود الصايم حبيب البي محمود ليهو فترة مجتهد جدا إنو يرجع زي ما كان وأحسن ربنا يوفقو و يديهو الصحه والعافية
غايتو لو مارجع يا حليلنا نحنا ديل
بعد الفراق
|
Post: #29
Title: Re: لازم تعود لينا يا محمــود
Author: محمد حيدر المشرف
Date: 04-25-2011, 03:53 PM
Parent: #28
محمود براهو يا مورتا !!
محمود ونحنا وسودان سمح فى البال ..
هرمنا .. هرمنا
وما اقتسمنا مع الليل تفاصيلنا الجميله
|
Post: #31
Title: Re: لازم تعود لينا يا محمــود
Author: محمد عبد الماجد الصايم
Date: 05-04-2011, 11:55 AM
Parent: #30
اخترت إنت طريق طويل .. سكّتنا ما زي سكّتكـ!
لازم تعود .. يا محمووود!
|
Post: #32
Title: Re: لازم تعود لينا يا محمــود
Author: مرتضى احمد عبد القادر
Date: 05-04-2011, 02:48 PM
Parent: #31
Quote: محمود براهو يا مورتا !!
محمود ونحنا وسودان سمح فى البال .. |
أكيد ما براهو وعودتو بتدينا حبة أمل يا مشرف إنو الحاجات الحلوه ممكن ترجع.
صبري طه محمود مستواهو إتدنى شديد في السنين الأخيرة وما دايره ليها نقاش بس لو متابع من بداية 2011 ولي الليله دي حتحس إنو في امل يرجع حوته الزمان
ود الصايم نكتو من وين البوست دا  عندك عندي غنية من حفلات محمود الأخيرة بس النمشي ونجيك
|
Post: #33
Title: Re: لازم تعود لينا يا محمــود
Author: مرتضى احمد عبد القادر
Date: 05-05-2011, 10:41 AM
Parent: #32
إستلم يا ود الصايم
شذى الأيام 2011
|
Post: #34
Title: Re: لازم تعود لينا يا محمــود
Author: محمد عبد الماجد الصايم
Date: 05-17-2011, 12:08 PM
Parent: #33
مشكور جداً يا مورتا!
|
Post: #35
Title: Re: لازم تعود لينا يا محمــود
Author: محمد عبد الماجد الصايم
Date: 06-28-2011, 09:49 AM
Parent: #34
لازم تعود لينا يا مورتا .. عشان ترجع لينا محمود!!
|
|