حـكـايـتـي مـع كُـمـسـآري الـقـطـر الـرُبـاطـآبـي ...

( 1 )
رغم إنها كانت جميلة ومستحيلة عشقها جميع الناس وسهروا الليالي يحلمون بالوصول
إليها، إلآ انني لم أعشقها ولم تكن لديّ الرغبة في إقامة علآقة معها.
عطبرة هي حبي الأوّل والآخير. ما فكرت يوماً في ان ابارحها أو أرحل عنها، تلقيت
مراحلي التعليمية في مدارسها. لم يكن لي كبير غرد في تحصيل العلم. المواد التي
احببتها ما كنت برضى بغير النمرة الكاملة فيها، والمواد المكجنا كان في زول جآب فيها
صفر زيّ بحرد مِنو عدييييل كده. عشان كده ما كان عندي كبير غرد لا في الجميلة
ومستحيلة، لا في الحنينة السُكّرة. لكن قدماي ساقتني للحنينة السُكّرة إزعاناً لرغبة الوالدة
عليها رحمة الله التي رفضت إتفاقي معها علي إكمال الثانوي العالي والبقاء بعطبرة.

( 2 )
غادرت عطبرة مرغماً بصحبة مجموعة من أبناءها للإلتحاق بالحنينة السُكّرة. بعد ان إنتهينا
من إجراءآت التسجيل، حقبت شنطتي ومرقتها في كِنانة لزيارة صديق لي كان يعمل في مصنع
السُكّر هناك. بعد ان قضيت 12 يوم في كنانة رجعت للخرطوم ومن موقف الباصات ذهبت
لأخي في مكان عمله، وهناك عرفت انه ذهب إلي عطبرة، ومن هناك علي محطة السكة الحديد.
ارجيت القطر في المحطة، ويا سطح جآك زول. مرقتها في عطبرة من غير ان أحضر محاضرة
وآحدة في الجامعة، أو حتي اشوف قاعة المحاضرآت. بقيت كتير جداً أمرق من البيت ماشي
الجامعة يواتيني القطر في محطة الخرتوم اخفس فوق راسو، ويا اتبرا جآك زول. أها، بعد دآك
إشتغلت في مصلحة المخازن والمهمات حتي شويّة بديت ايقّن علي الخرتوم.

( 3 )

في العام 87، وقد بدأت تباشير العيد الكبير تهل، جهّزت نفسي للسفر لمدينتي الحبيبة عطبرة لقضاء
العيد بين الأهل. في محطة بحري قابلت عدد من ابناء عطبرة في قطار الشوق. الشي الغريب في
الأمر، لقيت الجماعة كلهم مجمعين علي السفر في بطن القطر!!!؟ علماً بأنهم من مرتادي السطوح.
يا جمآعة!!! والله السفر المافوق السطح ده لآ سفر لآ حآجة. الحاصل شنو؟؟؟.
قالوا لي: يا زول نحن جايبين معانا كوشتينة وعندنا تزاكر. اقطع لك تزكرة وتعال معانا.
قلت ليهم: لو كنت عارف من بدري كنت جبت تصريح من المصلحة. انا بركب معاكم لكن تزكرة
ما بقطعا، وبعرف شغلي مع الكمساري كويّس.

( 4 )

تحرك القطر، وربعنا الكوشتينة فوق شنطة سمسونايت من النوع الكُبار، وتعال شوّف الونسة،
والقرقرآب، والتعليقات، وتخفيف الدم لزوم كان في جكس وكده. ضاربين بهجة صح. فجأة اشوف
ليك الكمساري من هناااااااك ومعاهو البوليس جايين. بالرااااااحة إنسرقت من وسط الجماعة،
وكنا رآكبين في تالتة الممتازة. العربات الممتازة دي زماااان جابوها ناس النميري، وفعلاً كانت
ممتازة لكننا لم نحافظ عليها، وبكل اسف لم نحافظ علي السكة الحديد. في العربية كان القزاز بتاع
الباب مكسور، وفي مجموعة من الشباب وآقفين جنب الباب. اها، انا تسللت من خلآل فتحة الباب
الكان فيها القزاز لخارج القطر، وبقيت خارج العربية قاعد فوق السلم، وسامع الكمساري ضارب
حِجة مع الجماعة وقطّعم تزاكر. بعد فات الكمساري تسللت لداخل العربية، ومشيت واصلت
كشتينة مع الجماعة مخلوطة بخفة دم لزوم مغازلة الجكس وكده.

الرجاء الإنتقال للجزء ( 5 ) أسفل الصفحة لقرأة الحكاية بالترتيب... آسف للدقسة...

( 6 )
اها، بعد إنتهوا من المرور قفلوا رآجعين لقمرتهم وانا معاهم. القطر عن بكرة ابيه أتفرّج في
زرتي. لمان جينا فايتين بجنب أصحابي حاولوا يحلو المعضلة لكن الكمساري رفض وقال
لهم بمساخة شديدة جداً: اوّل هو اخير منكم بشنو؟؟؟ نِهارت مو دآير يقطعلوا تسكرة. والجكس
يكحلن فيني بطرف العيون، ومكنكِشاااااات بالضحك. غاتو إتمرمطة جنس مرمطة!!!، وإتبهدلتة
جنس بهدلة!!! بس المخير الله في مُلكوا العظيم يا قول حبوبتي.
دخلنا القمرا. الجماعة إحتلوا مقاعدهم وانا وآقف والبوليس منضرب في صفحتي تقول انا كاتل
مدير السكة الحديد. الجماعة عندهم تمرهندي ونبق فِرش، قعدوا يمزمزوا وانا إتفرّج. التمرهندي
شكلوا مُغري، ونفسي دخلت فيهو. قلت وحآت ربي دي رظآلة وزلعة مِني، هسّع دا وكت تمرهندي
ونبق؟؟؟!!!

( 7 )
الكمساري قال لي: هسّع اكان اخيرلك تقطع لك تسكرة زي رفاقتك، واللآ اخيرلك البهدلة دي؟؟؟
مِن الآكسنت بتاعو عرفت إنّو رُباطابي.
قلت ليهو: هسّع بقطع.
قال لي: بعد شنو؟. عآن ها البقطع!!! وكت فيك فايدة هن قدُر ما كان تقطع مع رفاقتك.
ويمزمز في التمرهندي والنبق. دخلّت إيدي في جيبي عشان اطلّع القروش. طوالي قال لي:
خل قروشك في محلهِن زوووول دايِرِن ما في.
بيني وبين نفسي قلت: بالله شوف الزول المسيخ دا!!! قروشك؟ ما قروش السكة الحديد!!!.
المفتش ما حرّك خشمو بكلمة. كلّ حركات خشمو كانت محصورة في طحن التمرهندي والنبق،
وهو يستمع.
بالرغم من مساخة الكمساري، مرقت القروش من جيبي وقلت ليهو: هآك اقطع لي تزكرة.
قال لي: يقققققطع نفسك. إنت وكت بتعرف للنفر دا، ما قطعتها قبل تدخل في القطر مآلك ؟؟؟
ما عرفت اقول حاجة، وانا مادي ليهو القروش وهو ياكل في التمرهندي.
قال لي: إنت قالولك القطر دا السكة حديد ساوياهو وقِف ؟ نِهارت جيّت إتفوججت وسويتلك لعب
كشتونة مع رفاقتك بلآ تسكرة!!!
بيني وبين نفسي قلت: يا جماعة دي مصيبة شنو الوقعت فيها دي؟!!! البتحلني من الزول دا شنو؟
قلت ليهو: خلآس هآك اقطع لي تزكرة.
طوالي قال لي: ما خلآس... القال لك خلآس منو؟ إنت وكت داير تقطع لآبد في السلم عشان شنو؟
مرّت لحظة صمت لا تسمع فيها إلآ مضغ التمرهندي والنبق قطعها الكمساري وقال لي: المرّة دي
انا بقطع لك التسكرة، لكن تاني كان شُفتك حايم في القطر دا بلآ تسكرة بخزّق لك عويناتك ديل.
قلت: الحمد لله، ومديت ليهو القروش.
قبل يقطع التزكرة، المفتش نضم لأوّل مرّة، وسألني: إنت من وين؟
قلت ليهو: من عطبرة.
قال لي: ود منو في عطبرة؟
قلت ليهو: ود محمد عثمان المدير.
طوالي المفتش قال: يا سلآلآلآلآلآم، إنت ود المرحوم المدير؟؟؟
عندها سمعت الكمساري يترحم علي والدي، ورايته يغلق دفتر التزاكر.
المفتش قال لي: اقعد.
قلت ليهو: لا، خليني وآقف.
قال لي: طيّب امسك مني التمرهندي والنبق ديل، وما ترجِعِن.
مسكت التمرهندي والنبق.
المفتش قال لي: كان دآير تقعد معانا هنا اقعد، وكان دآير تمشي تقعد مع رفاقتك امش.
قلت ليهو: بمشي اقعد مع رفاقتي، لكن لآزم اقطع تزكرة.
الكمساري قال لي: يا سلآلآلآلآم ود المدير!!! امش اقعد مع رفاقتك التسكرة خلها.
قلت ليهو: والله العظيم ما اقطع تزكرة ما امرق من هنا.

( 8 )
الكمساري قطع لي التزكرة. دفعت حقها، ومرقت والعبرة تكاد تقتلني. جدعت للجماعة التمرهندي
والنبق فوق الشنطة، وما تبقى من مسافة لعطبرة شعرت كأنها دهوّر، ومن يومها قررت ان لا
اصرّح بإسم الوالد في مثل هذه المواقف...
ربي ارحمهما كما ربايني صغيرا...


ود المدير...

( 5 )
في المرور التاني أشوف ليك جماعتي جايين من هناااااك، والمرّة دي معاهم المفتش كمان.
طوااااالي مشيت علي السلم، وانا قاعد فوق السلم سامِعُن بيتكلموا مع الجماعة. فجأة اخدولهم
صنّة طوييييلة، وانا قعدت السلم سخّنت معاي والسفاية بقت تشيل وتكتح في وشّي، لكن
لُكت الصبر لحدي ما إطمأنيت إنهم فاتوا، رفعت راسي وسألت الجماعة الواقفين جنب الباب:
الجماعة ديّل فاتوا ؟؟؟
فإذا بالكمساري يقول لي: لا، لا ما فُتنا. تعال لي بجوّة يا المبروك.
في تلك اللحظة تمنيت الوآطة تنشق وتبلعني.
اها، الجماعة ساقوني معاهم في المرور، وبقيت زي معروضات الجريمة. العسكري باقي فوقي
عشرة التقول كاتل أبوهو، والكمساري اوآت يلقالوا زول ما قاطع تزكرة يقولوا:اها بتقطع واللآ
ترافق إخيّك دا؟؟؟.
الناس في القطر يشيلوا ويبحلقوا فيني، والجكس بتحِت تِحِت يضحكوا سااااكت، وانا بيني وبين
نفسي اقول: يا جماعة دي شقاوة شنو الوقعت فيها دي ؟؟؟ ما كنا مستورين في السطوح
لا عساكر لا كماسرة. البوليس لآعب معاي مآن تُو مآن، وفي حآجة كبيرة قالت للكمساري:
أجآد ولدي تخليهو. قال ليها: يا حآجة ده وقعتو طِيّنة معاي. كل هذا والمفتش يتبسم بهدوء في
ثقة تآمة. الكمساري كلما يمر علي ناس للتحصيل يقول: تمام، تزاكركم تمام، مُش زي زولنا
ده، وطوالي يروح حاكي قصتي. لقيناهو لآبد في السلم. نبشني نبيشة صح.

قال : و الله إني أشم ريح أتبرا
قالوا له : لا زلت في عشقك القديم

***

معاوية : أنا هاهنا أجلس القرفصاء

....








أها










....

قطار الشوق متين ترحل تودينا نزور بلدا حنان اهلا ....

جيناكم يا حبايب

يا ود المدير بمناسبة كمساريك الرباطابي
عندي ليك نكتة
الكمساري و المفتش غرموا ليهم رباطبي في القطر
بمبلغ تمانية جنية
الرباطابي اداهم عشرة جنية وو منتظر الباقي
الكمساري قال ليهو ما عندي فكة و انا راجع بديك باقي قروشك
الرباطابي قال لا لا انا داير الباقي هسع
المفتش قال ليهو ما تخاف الكمساري دا امين برجع ليك قروشك.
الرباطابي قام قال للمفتش هو كان امين نان انت مباريهو لي شنو !!!! ?
تحياتي


يعيش يعيش الكبرياء

الاخ معاوية المدير
تحياتى لك وضيوفك الكرام والجميلة عطبرة.
عطبرة مدينة لها فى الخاطر مكان خاص
ولها فى الذاكرة طعم رايع.
الجميلة كانت لنا مرتع الصبا.
علاقات الناس كانت فيها حميمة وكانوا
يعرفون بعضهم معرفة جيدة.


لا زلت اذكر حميد ابوشامة ومحمد حسب الرسول
وسيف حسبو.
لهم ولك ولها اجمل تحية.

آسف جداً علي تأخيّر الردود علي المداخلآت،
الود المقداد كسر يدو في الكورة، فاضطريت
اقضي كلّ اليوم في المستشفى.
معذرة للجميع...

Quote: الود المقداد كسر يدو في الكورة، فاضطريت اقضي كلّ اليوم في المستشفى.

معاوية

ســلام..

كفارة للود المقداد وربنا يجبر الكسر

اما حكايتك مع الكمساري دي بنرجع ليها مرة تانية

كمساريك دا زول طيبان لو سمعتا حقاتي الاتنين ديل

حتفطس من الضحك .... والله صحي

تحاياي

تحية
متابعة
احب عطبرة

بحيكم راجع إن شاء الله تعالى.
لكم مني عظيم الشكر...

Quote: قال : و الله إني أشم ريح أتبرا قالوا له : لا زلت في عشقك القديم *** معاوية : أنا هاهنا أجلس القرفصاء

مرحبتين حباب الريّس.
الحاسة السابعة لا تُخطئ، فهاهي في الركب أراها وابهت، فأُتبعها نظري حتي
تبتلعها صحراء العتمور، فأفيق من غفوتي، وقد شممت رائحة الأُصطُبّة والفلنكة
بأُنففي، وسمعت ازيز القاطرات باُذنيّ، فأخذتني تباريح الهوى إلي هناك حيث
مسرح الأرآم في حاج الريّح، ورائحة حبر الجرائد والمجلآت منبعثة من مكتبة
المرحوم عوض الله دبورة. ابكدوك كان احسن زول بيعمل كدارآت، والحارث
كان بيعمل أحلى تسالي، اما كُشك اليافطات والليمون والشعير اسكت خليهو
سآكت. بتتذكر باسطة عبد الفتاح يا ابو جهينة؟؟؟
الغربة لئييمة قيدتني يا ابو جهينة، فها انا ذا في القيد اناتل
ما خار عزمي ابداً. أسأل الله ان نلتقي هناك فوق الرصيف...

Quote: .... أها

Quote: .... أها

أها، يا الوليد مرحبتين حبابك،
وحبابك عشرة في حوش بكري.
قبل كدي ما قعدت مع حبوباتك مقلنّك
بالمقالآت، وكل مرّة يقولنلك، أها عارف...؟؟؟

Quote: قطار الشوق متين ترحل تودينا نزور بلدا حنان اهلا ....

سلآم يا شاكر.
كوستي هي عطبرة، وعطبرة هي كوستي.
المدينتان توقظهما صفارة الورش، ويطربهما
ازيز الوابورات.
مشكور يا رجل...

Mawia Salam




salamat almgdad

saif

.....

Quote: أها، يا الوليد مرحبتين حبابك، وحبابك عشرة في حوش بكري. قبل كدي ما قعدت مع حبوباتك مقلنّك بالمقالآت، وكل مرّة يقولنلك، أها عارف...؟؟؟

نان يا ود المدير يا أخوى أنا لافحا من وين ؟
مـــا من "المقليل " دا ذات نفسو .

أتمتع جدا بكل حكاوى القطر و السفر
و عـــــــــــــــــطبرة.

المعنى أخوك "أتبراوى" تب ، لكن من مدنى.



ألف سلامة على ولى العهد و ربنا يجبر كسرو


تحية و مودة .







.....

ود المدير

السلام عليكم

ربنا يكتب سلامه المقداد ورينا يعجل بالشفاء



اثرت في شجونا بهذه اللافته فقد عمل الوالد رحمه الله بتلك المؤسسه قبل ان يجير عليها الزمن والانقاذ

عمل الوالد رحمه الله ميرغني الخليفه امين مخزن بقسم النجارين

معاوية الدير ... سلامات ..
متعك الله بالصحة والعافية وراحة البال..
نتابع بشغف ونعيد القراءة ونضحك ،، ثم نضحك ..

Quote: جيناكم يا حبايب

Quote: جيناكم يا حبايب

أهلاً بيك يا بركات نزلت أهلاً وحللت سهلاً.
نرحب بيك في رحاب اتبرا وحوش بكري.
مشكور علي المرور...

Quote: يا ود المدير بمناسبة كمساريك الرباطابي عندي ليك نكتة الكمساري و المفتش غرموا ليهم رباطبي في القطر بمبلغ تمانية جنية الرباطابي اداهم عشرة جنية وو منتظر الباقي الكمساري قال ليهو ما عندي فكة و انا راجع بديك باقي قروشك الرباطابي قال لا لا انا داير الباقي هسع المفتش قال ليهو ما تخاف الكمساري دا امين برجع ليك قروشك. الرباطابي قام قال للمفتش هو كان امين نان انت مباريهو لي شنو !!!! ? تحياتي

سلآمات يا فيصل.
وآحد من اهلنا الرباطاب عامل فيها حريف داير يزوغ من الكمسار زيّ.
ركب في القطر وقال لمان يجي الكمساري يقولوا ركبت من الكربة.
صاحبنا دقس نام والقطر إتعطّل لفترة من الزمن، لمان جاء الكمساري
قال ليهو تزكرتك يا حاج. قال ليهو ما عندي تسكرِة. الكمساري قال ليهو
نقطعك تزكرة. ركبت من ويّن؟. زولنا قال ليهو من الكربة. الكمساري
قال ليهو يا حاج الكربة لسّع ما وصلناها. قام بخُلعة شديدة جداً قال
للكمساري، أها، اعرِفني رِكِب من ويّن؟؟؟

Quote: الاخ معاوية المدير تحياتى لك وضيوفك الكرام والجميلة عطبرة. عطبرة مدينة لها فى الخاطر مكان خاص ولها فى الذاكرة طعم رايع. الجميلة كانت لنا مرتع الصبا. علاقات الناس كانت فيها حميمة وكانوا يعرفون بعضهم معرفة جيدة. لا زلت اذكر حميد ابوشامة ومحمد حسب الرسول وسيف حسبو. لهم ولك ولها اجمل تحية.

التحية لك أخي فوزي بابكر.
ما زالت عطبرة تتمتع بحميمية العلآقات بين الناس، وتواصلت
الأجيال فيها علي نفس النسق رغم تدمير السكة الحديد.
رغم تدمير السوق القديم إلا أنني عندما اذهب إلي اتبرا اروح
اتحسس أطلآل الأماكن القديمة أقف عليها، فتحملني الذكريات
إلي تلك الأيام الجميلة العالقة في اعماق الذآكرة.
لك مني جميل الشكر أخي فوزي، وأسأل الله ان نلتقيك في
رحاب المدينة القاطرة اتبرا...

الف كفارة واجر وعافية يا ابو المقداد للمقداد
وربنا يكتب السلامة
تحياتى للولاد وامهم ....اريتك طيب



اها برجع تانى للسكة حديد
باقى انت عارف ال الصائم
ناس سكة وياها شغلتهم



تحياتى..ومبرو ك لهيثم الجعلى الصائم
وبلغ الولاد (التباريك)

Quote: معاوية ســلام.. كفارة للود المقداد وربنا يجبر الكسر اما حكايتك مع الكمساري دي بنرجع ليها مرة تانية كمساريك دا زول طيبان لو سمعتا حقاتي الاتنين ديل حتفطس من الضحك .... والله صحي تحاياي

ود البشاري كيف حالك؟
كفّر الله سيئاتك. الجنا قال لآزم يلعب في ريال مدريد، وكل يوم
مكسور ليهو عضم. قلت ليهو ناس ريال مدريد ديل لمان تصلهم
إلا يسووك شوربة.
عليك الله تعال أحكي، في الزايلة دي خلنا النتونّس.
والله صحي...

Quote: تحية متابعة احب عطبرة

حيآك الله وأبقاك يا ود البوش يا صديق.
نحن كذلك نحبك ونحب كل من يحب
عطبرة، ودعوى خاصة ليك يا ود البوش
لزيارة عاصمة الحديد والنار.
دائماً تشرفنا بحضورك الجميل...

Quote: salamat almgdad saif

تسلم يا السيف من كل شر وبلاء.
الزول ما صدّق اللونق ويّكند طوالي
بيدو المكسورة شتت كالقري.
يا سيف المخازن والمهمات دي عالم براهو
قضيت فيها اجمل فترات حياتي بالخرتوم،
وهي تحمل ملآمح كتيرة جداً من اتبرا.
تحياتي للأولآد...

سلامات يا ودالمدير و الله يرفع كرستيانوا المدير.
و الله انالو فى محل الكمسارى ده و سمعت لهجت
الرباطاب بتاعتك دى كنت شغلتك كمسارى معاى.

تحياتى
خالد عبدالله الخضر

Quote: نان يا ود المدير يا أخوى أنا لافحا من وين ؟ مـــا من "المقليل " دا ذات نفسو . أتمتع جدا بكل حكاوى القطر و السفر و عـــــــــــــــــطبرة. المعنى أخوك "أتبراوى" تب ، لكن من مدنى. ألف سلامة على ولى العهد و ربنا يجبر كسرو تحية و مودة .

الوليد حبابك ألف، وربنا يسلمك
من كل شر وبلاء.
أها عارف، اتبرا دي لآمة جميع انواع الطيف
نعمنها فيها السكة الحديد، فالنسيج الإجتماعي
بتاع عطبرة منسوج ومغزول من خيوط كلّ
مدن السودان...

Quote: ود المدير السلام عليكم ربنا يكتب سلامه المقداد ورينا يعجل بالشفاء اثرت في شجونا بهذه اللافته فقد عمل الوالد رحمه الله بتلك المؤسسه قبل ان يجير عليها الزمن والانقاذ عمل الوالد رحمه الله ميرغني الخليفه امين مخزن بقسم النجارين

حباب ود الخليفة.
الله يسلّمك، وأنت تعطر ايام جمعتنا برحيق النبوئة.
أسأل الله لوالدك الرحمة والمغفرة.
حقيقة يا ود الخليفة لولا مجتمع المخازن والمهمات لما طاب لي المقام في
الخرتوم، فقد عوضتني المخازن والمهمات الكثير مما فقدت بمفارقة عطبرة
وكان مجتمعها مجتمع عطبرة بصورة مصغرة. الحديث عنها يحتاج لبوست
منفرد.
اشكرك علي الطلّة.
رحم الله الوالد، وموتانا وجميع موتى المسلمين...

عندي قريبي قال مرات كان بكون قاطع تذكرة ويسطح
سألوه ليه قال "ما دودة ياخ!"

ألف سلامة للمقداد يا معاوية

Quote: معاوية المدير ... سلامات .. متعك الله بالصحة والعافية وراحة البال.. نتابع بشغف ونعيد القراءة ونضحك ،، ثم نضحك ..

يديك العافية يا عبد الله الشيخ، وأسأل الله ان يديم عليك
البسط. إن شاء الله دِيّمة مبسوط، ونحن مبسوطين
لبسطك. كتّر خيرك كتير علي الطلّة.
لك جزيل شكري...

Quote: الف كفارة واجر وعافية يا ابو المقداد للمقداد وربنا يكتب السلامة تحياتى للولاد وامهم ....اريتك طيب اها برجع تانى للسكة حديد باقى انت عارف ال الصائم ناس سكة وياها شغلتهم تحياتى..ومبرو ك لهيثم الجعلى الصائم وبلغ الولاد (التباريك)

يا ابو النسب سلآم،
ولدكم ده عامل لينا إزعاج بالكورة تعال شيلو شوف ليهو طريقة
معاكم البلد دي بلا تلج ما فيها شي، وآطة يلعبوا فوقا ما في.
فعلاً ناس الصايم كلهم في السكة الحديد، ولو كانت ثُورّث
لورثوها. والله صحي.
الود هيثم تأهّل للدرجة الرآبعة. ألف مبروك...

Quote: سلامات يا ودالمدير و الله يرفع كرستيانوا المدير. و الله انالو فى محل الكمسارى ده و سمعت لهجت الرباطاب بتاعتك دى كنت شغلتك كمسارى معاى. تحياتى خالد عبدالله الخضر

قريبنا وصديقنا ود الخِدِر!!!
يا زول تعال مارق من الفِجة الدبها شايل جناهو
فوق ضهرو دي، الصقط دا بيلحقك أُمات طه.
كريستيانوا بتاعكم ده قال حدو ريال مدريد، قلت ليهو
والله يا ولدي كان لحقت اتمرنت معاهم سااااكت
أبوك ضهروا بينعدل.
يا ود الخِدِا إنت كان ماك خابرني أنا الرباطاب
عندي معاهم لحمة.
اشواقي الكتيرة...

Quote: عندي قريبي قال مرات كان بكون قاطع تذكرة ويسطح سألوه ليه قال "ما دودة ياخ!" ألف سلامة للمقداد يا معاوية

تسلم يا اشرف الحلبي.
يا زول هي دودة نصآح، نآن!!!
وآحد من اولآد الخرتوم كا بيجي يقضي الإجازة معانا في عطبرة.
الجماعة سجلوا ليهو زيارة في الخرتوم. لمان جو راجعين عطبرة،
هو وابوهو كانوا مودعنهم في محطة بحري. أها، بعد الجماعة
إسنتروا فوق راس القطر، والقطر بدأ يتحرّك صاحبنا قال لي ابوهو
مع السلآآآآآآمة، وراح ناطي مع الجماعة فوق السطح.
تصدق تمّ قرايتو معانا في اتبرا.
والله صحي...

سلامات يا معاوية,

والله البرد كملناتب و بيقينا ما فينا حيل خالص. ربك يعظم الاجر.
بعدين عبدلاب, شكرية,رباطاب, انقرياب فرقت شنوا ما النيل ابونا
و الجنيه سودانى.
معليش انا عايش بى شريط قديم عن السودان و السودانيين, و إن شاء
الله يظهر من يثبت العكس.

عندما أعلنت المدارس العليا في الشمالية إضرابا عاما تضامنا مع مدارس الخرطوم
خيرت بين ان اذهب للبلد في المحس أو ان أقبل على الخرطوم وصخب المدينة
وهناك في محطة الباخرة في مدينة الدبة ألقينا حقائبنا عند المرسى إنا ومجموعة المشاغبين
بالمدرسة العليا انتظار لباخرة دنقلا كريمة المتجهة جنوبا لكريمة وبعد انتظار لساعتين وصلت الباخرة كربكان لمحطة الدبة دلفنا مسرعين لنحجز مكانا في الجزء الأمامي من الصندل حيث الهواء الطبيعي البارد وهناك فرشنا بطانية للعب الويست وجلسنا أربعة حسب الجر وأربعة آخرون في انتظار الدور لا يحمل احدنا قيمة التذكرة الا من آتاه الله من المال أوفره، فالباخرة ليست كالقطار حيث يمكن مشاهدة الكمساري من بعيد ويمكن ترتيب الهروب بكل سهولة. تمسي بنا الباخرة وتصبح وهي تمخر عباب البحر (النيل) في اتجاه عكس التيار تشاهد شطآن النيل بنخيلها الوارفات على نسق واحد سبحان من صور مناظر بديعة.

وفي كل محطة تقف فيها الباخرة نسرع خارجين لنسد حاجة البطن نجلس جماعات اما ستات القراصة والشاي وندفع شيرينق حيث كلنا يعلم ما بجيب الآخر ونكمل باقي الشبع من رطب النخيل ونرجع ثانيا إلى مقرنا بالصندل حيث يحمل كل منا ثلاثة عشر كرتا من الكوتشينة في جيبه حيث تتم مواصلة اللعب. ونحن على هذا الحال حتى تصل الباخرة
إلى مروي ومن ثم كريمة........... نواصل

Quote: سلامات يا معاوية, والله البرد كملناتب و بيقينا ما فينا حيل خالص. ربك يعظم الاجر. بعدين عبدلاب, شكرية,رباطاب, انقرياب فرقت شنوا ما النيل ابونا و الجنيه سودانى. معليش انا عايش بى شريط قديم عن السودان و السودانيين, و إن شاء الله يظهر من يثبت العكس.

سلآمات يا خالد،
والله مشتاقين.
يا خالد الشريط لا قديم ولا حآجة، ياهو زااااتو،
فالإنتماء ليس عنصري إنما هو كتمايز المهاجرين
والأنصار وسودانيتنا هي الأصل.
يا ود الخِدِر عليك الله تعال مارق علينا في الغرب بنجيهك.
باقي الأيام ديل نحن زي السعودية في السبعينيات القرشن
عندنا راقدات هبطرش. إرتفاع اسعار البترول حرّك محافظة
البرتا، والأشغال بقت رآقدة. بس إنت تعال، وكل شي بيبقى تمام
التمام...

Quote: يا ود الخِدِر عليك الله تعال مارق علينا في الغرب بنجيهك. باقي الأيام ديل نحن زي السعودية في السبعينيات القرشن عندنا راقدات هبطرش. إرتفاع اسعار البترول حرّك محافظة البرتا، والأشغال بقت رآقدة. بس إنت تعال، وكل شي بيبقى تمام التمام...

ود المدير سلامات وكيف الوليد و إن شاء الله بلغ العافية..؟
و إنت لسه متفائل إنوانا ممكن اسافر اكتر من كده فى عمر ذى ده
وفتش للرزق, الإجازه من الحيكومة تلاتة اسبابيع, نشوف بيها
العيال فى اوتاوا و لا نمشى بيها السودان و لا كمان ازيدك
من الشعر بيت, نعالج بيها الركب و الرجلين و ما حسبت ليك
المناسبات الإ جتماعية ياخى ما تمرضنى اكتر من كده.
بترولكم إن شاء الله يخدر حمد و خوجلى لكن انا من سلالة القرش
ما بيفك لجاما, ها زول جلد التمساح بدبغ..!!
كدى ما تخلينا نفيكها فى العامة و تصل على لانوا فى زول داير
تلفونك و انا الهائم و درتوا.

Quote: إلى مروي ومن ثم كريمة........... نواصل

في إنتظارك يا زمراوي الولي لمواصلة السياحة
الجميلة. كم تمنيت ان ازور الشمالية لكن حدي
فيها وقف عند ابوحمد، وما زالت الأمنية تراودني.
جزيل الشكر علي مرورك، وفي إنتظارك تواصل...

شايقية ورباطابية راكبات الحافلة ماشات بكا ..
الشايقية طقطقت للكمساري ونزلت، الرباطابية اتأخرت..
الكمساري قال ليها: نازلة؟
قالت ليه : لا بدور اقدمها للباب!

Quote: كمان ازيدك من الشعر بيت, نعالج بيها الركب و الرجلين و ما حسبت ليك المناسبات الإ جتماعية ياخى ما تمرضنى اكتر من كده.

طيّب تعال زيارة شوف الحال يا ود الخِدِر
يمكن يعجبك. الرُكب والكرعين، لوّمك بي
كان الجنا لعب في الريال نجيهن ليك تب.

سلّم علي شيخ إمام الطيّب، باقي جا
فايتنا خوووو، ومرقا في السكين
الصفرا...

Quote: شايقية ورباطابية راكبات الحافلة ماشات بكا .. الشايقية طقطقت للكمساري ونزلت، الرباطابية اتأخرت.. الكمساري قال ليها: نازلة؟ قالت ليه : لا بدور اقدمها للباب!