عاجل جداً جداً إلى معاوية حسين وجمال محمود والمعلمين بتاعين الكمبيوتر أجمعين..مطلوب مساعدة

المساعدة مطلوبة على الهواء الآن الآن وليس غداً...

صديقي المتابع المتصفح..عنده جهاز كمبيوتر عليه برامج أصلية ..تحديداً ويندوز 7 أصلي اشتراه من الإمارات

أها لما رجع السودان ونزل البرنامج..اتضح إنه عنده مشكلة تقريباً معطلة ليهو أعماله وهي مشكلة التحديثات المباشرة

أظنها بالإنجليزي Online Updates بالتالي الـ Drivers المتصلة بنظام التشغيل ويندوز كلها تقريباً رافضة الأبديت..

السبب غريب جداً ولكنه منطقي... قال ليك عشان البلد تحت الحصار الاقتصادي...لا يسمح للمستخدم الموجود في هذا البلد الأمين

إنزال التحديثات المطلوبة...

أها .. الحل شنو؟؟؟

بسرعة بالله ... كل من لديه إجابة ..يشوتها هنا في الهواء الطلق وبالخطوات لو ممكن..

شيل الصبر يا عمك..الجماعة ديل ما حا يقصروا معاك.. خليك بس فاتح البوست دا..طيب؟؟


وطبعاً لكم الشكر برضو على الهواء..

انصحك بأن تذهب الي بحري المؤسسة هناك محل كمبيوتر اسمو evo zone وشيل معاك 100 الي 80 جنية

والامور حتكون 100 الم100













....

سلامات
نستغل البوست دا

عندي فايل اكروبات فيه 12 شهادة عايزة اعمل ديليت لكم واحدة اعملها كيف؟

Quote: فايل اكروبات فيه 12 شهادة عايزة اعمل ديليت لكم واحدة اعملها كيف؟

الاخت : د.نجاة محمود

لك التحية

هل هو ملف واحد وبه عدة صفحات ومن ضمنها 12 صفحة شهادة وتريدين حذف ال 12 صفحة والاحتفاظ بالباقى ؟

اذا كانت الاجابة بنعم

يجب تحويل ملف الاكروبات الى ملف وورد ومن ثم يتم حذف المطلوب حذفه وتعديل الملف حسب الرغبة وبعدها يتم تحويل الملف مرة اخرى الى ملف اكروبات

اتمنى ان تكون هذه الاجابة وافية ومطلوبة

تقديرى واحترامى

.

الاخ Mahmoud Mustafa Mahmoud

لتفعيل خاصية التحديث للويندوز اتبع الشرح على الصورة أدناه :



اما بخصوص تحديث الدريفرات طبعا كل جهة مصنعة لكرت معين لديها تحديث خاص بها ولا يشترط ان يتم التحديث من خلال تحديثات الويندوز يعنى مثلا لو هو عنده كرت الصوت كرييفت اكيد سيجد التحديث فى موقع الشركة المصنعة .

تحياتى

والشرح بالفيديو :

ولتحميل فيديو الشرح :

فيديو الشرح

شكراً يا جمال يا ابني..

كريم كعادتك...ولسه فيك الخير أكيد..

شوف حبيبي..الزول دا عدتو كلها تقريباً ذات أصول أمريكية..من HP وإنت طالع..

أها ناس الإتش بي تحديداً قاعدين يختوها واضحة جداً..


"إنت قاعد في بلد أنحنا مقاطعنو ،، فلو سمحت ما تحاول تنزل أي حاجة

وأجهزتك أعتبرها جرادل ممكن تعملها "فاظات" أو زهريات في المكتب" أو حاجة بالشكل دا..

هسي زولي دا قاعد يفكر جادي ياخدها من قصيرها...ويقنع من تلتمية درهمو دي..ويرجع يشتغل ويندور إكس بي..


في الحالة دي ،، ما هي أسهل طريقة لعمل هذا ، أقصد تنصيب الويندوز إكس بي ليحل محل الويندوز 7


علماً بإنه كمبوترو مقسم جاهز كذا درايف ..يعني سي ودي وهلمجرا...


نرجو المساعدة العاجلة والمستمرة طالما لم يتم توفير حل لمشكلة المقاطعة الاقتصادية؟؟


شكراً لك سابقاً ولاحقاً...وش وضهر.. مع صادق الاحترام والتقدير،،

لا يحتاج ينزل اكس بى لانو الويندوز 7 هو النظام الامثل حاليا اما بالنسبة للتعريفات فموقع ال HP عنده كل التعريفات فى الموقع ويمكن بكل سهولة ينزلها واذا عندو اى كرت غير معرف خليه يدنى اسم الكرت وان ان شاء الله حانزل التعريف وارفعه مرة ثانية لاى موقع رفع الملفات .

وحتى ممكن يعمل ريكفرى للجهاز ويرجع زى ما كان اول يوم اشترى فيه الجهاز

ولو احتاج الامر ارسل لى تلفون صديقك على المسنجر وساقوم بإرسال نسخة ويندوز 7 له فى السودان ومجانا

تحياتى

الكلام دا ما منطقي ولا وقع لي في راسي اصلا ..!

Quote: الكلام دا ما منطقي ولا وقع لي في راسي اصلا ..!

معاوية يا معلم..

جمعتك مباركة يابا..

أنا كنت عاااااااااارف إنه صاحبي دا حيجيب لي الكلام..

هسي الحل شنو طيب؟؟

يمكن أنا ما قدرت أعبر عن المشكلة بصورة دقيقة

أو هو "الله يهديهو" ما قدر يعبر لي عنها بصورة دقيقة..

في الحالتين هو الضايع...

لكن عشان تتحمس يا معاوية..الزول دا

والله بالإسم قال لي معاوية حسين بتاع سودانيز دا بيكون عنده حل..

تجي تقول جنس كلامك دا؟؟ أفو أفو أفو..


كدي قلبها جاي جاي.. جايز يكون فيها حل..

ولك الشكر طواااااالي..

محمود

سلام يا محمود

اولا حاجه مافي علاقه بين الدرايفرات وتحديث الويندوز ..الويندوز تابع لي ميكروسوفت والدرايفرات كل درايف عندو شركة براها ..

المشكلة حسب فهمي ليها انا ..زولك دا اشتري ويندوز ضارب (ما اصلي) وجا ينزل الويندوز دا في جهاز قديم شركات الدرايفرات ما عملت تحديثات للدرايف عشان يشتغل مع ويندوز 7 ..

السودان دا كلو تقريبا شغال بي وينوز والمسنجر والاوفيس وما سمعت يوم زول ما قدر يعمل ابديت للويندوز او يدخل المسنجر او يستخدم الاوفيس من ميكروسوفت بسبب المقاطعه الاقتصاديه

نأسف لعدم توصيل الرسالة الكاملة..

أدناهـ شرح المشكلة كما وردني بالإيميل من صديقي..

Quote: انا اشتربت جهاز DELL من دبى وسطبوه لى من هناك وكما اشتريت معاه سى دى ويندوز 7 اصلية خلال شهر اظن لازم يعمل تنشيط ما تحديث (الظاهر لمن سطبو الجهاز ما عملو اكتفيت) وذلك باستخدام البرودكت كى الموجود ضمن مواصفات الجهاز وهنا بتظهر المشكلة بدى رسالة انه لا يمكن اجراء التنشيط لانه هذه الدولة جغرافيا هذا الكود لا يعمل فيها فيجب ارجاعها الى البلد الذى تم شراءه منها ثم بيعطى حلول بشراء واحد جديد او تغيير الكود وتبعا للمشكلة دى الابديت ما بيتم وبيقيف فى حتة معينة ومن يوم ظهور هذه المشكلة وبمجرد فتح الجهاز بتكون فى رسالة فى سطح المكتب بانه هذا الويندوز غير اصلى وبدات تظهر كثير من المشاكل فى الجهاز. معليش للتطويل بس حسب نصيحة من استشرت هنا يجب شراء اسطوانه ويندوز اخرى لان هذه ليس منها فائدة ارجو شاكرا النصيحة وفى ميزان حسناتكم ان شاء الله

وطيب ما تقول كدا من الصباح ياخي...


سطبوه دي إن شاء الله تكون جاية من setup... مصيبة لكن يا صاحبي..

يلا إن شاء الله يكون عندكم حل..

تحياتي وتقديري والشكر نيابةً عن صديقي..


جمال محمود ح أرسل ليك تلفون الزول دا في السودان.. ما نعدمك إن شاء الله يابا..

سلام

مريت بمشكلة مشابهة اثناء اجازتي وهي تحديثات في الويندوز والياهو ماسنجر وفعلا جاتني رسالة بموضوع المقاطعة وبمجرد رجوعي من الاجازة وشبكت الجهاز علي النت حصلت التحديثات اوتوماتيكيا

Quote: الكلام دا ما منطقي ولا وقع لي في راسي اصلا ..!

محمود ازيك ياخ
بتفق مع الكلام الفوق لانو عندى كومبيوتر بنفس المواصفات القلتها وبيعمل ابديت للويندوز زى السلام عليكم.
هشام

شكرا هشام ..

يا محمود وضيفه الكريم ..في العادة اي جهاز جديد بيكون مدمج معاو السيريال الاصلي في دباجه خلف الجهاز ..الدباجه دي قاعدة ؟ اي جهاز جديد من بدايه الفيستا (2006 ) بيكون معاو ريكوفري في الدرايف D او بعض الاجهزة (الايسر) بيكون في الـ C الريكوفري دا قاعد ؟

الحبيب معاوية حسين..

جهودك مقدرة والله..جاري التنسيق مع مكتب صديقي لتوفير المعلومات اللازمة..

الحبيب جمال محمود..

راجع الماسنجر بالله..

فوق عشان الما شاف يشوف..

وما زلنا انتظاراً..

طيب عشان نكون عمليين..هل هنالك من لديه اقتراح يمكن تنفيذه على ارض الواقع وبمقابل مادي؟؟

يعني مثلاً إذا فيكم زول أو زولة..بيعرف ليهو زول أو زولة..بتاع/ة كمبيوتر خطير/ة ،،

يمكنه/ها القيام باللازم ميدانياً في زيارة مدفوعة الأجر..يكون مية مية حسب كلام صديقي..

وكفى الله المؤمنين شر المقاطعات والحصارات وكدا..

جمال محمود شايفك زي مكبر اللفة ..

والعجب معاوية..العجب اليجبدك في خط ستة قول آمين..

عسى ما شر..

اتحلت وبطريقة بروفيشنال كمان.. ومع الوكيل مباشرةً..



شكراً .. سعيكم مشكور...

لكن يا صديقي الفنان الجميل هشام كمال.. "حقو تعرف" على قول عمار السنوسي

إنه فعلاً في مشاكل زي دي..ولكن يواجهها الإنسان فقط عندما يتعامل مع نسخ أصلية

واتفاقية خدمة نظامية وملزمة..

وعا الأصل دور يا فنان.. لك محبتي التي تعرف..

ويا صاحية لا ساقط ولا منحد..ونحن إذا عزلنا طريقة للفنان..

ما كان جرى اللي جرى..

شكراً لكل من مر من هنا..

وبس..

Quote: يجب تحويل ملف الاكروبات الى ملف وورد ومن ثم يتم حذف المطلوب حذفه وتعديل الملف حسب الرغبة وبعدها يتم تحويل الملف مرة اخرى الى ملف اكروبات

ليس هنالك اي داع لهذه اللفة الطويلة.
هنالك برامج كثيرة يمكنها ان تقوم بحذف صفحات من ال PDF أو إضافة صفحات له أو دمج ملفين PDF و مثال لهذه البرامج :
ٍSmart PDF Converter Pro

من الادوات الموجودة في هذا البرنامج:
Split PDF
Merge PDF
Extract PDF
Set Password
Remove Pages
Insert Pages

فى جميع الاحوال شوف برنامج هوت سبوت, اعمل كونكت, اول ما الايكون يبقى اخدر
اديهو ابديت طوالى.. مرات الكمبيوترات دى الا تضرب من الاخدر دا برضو