Post: #1
Title: إبني (علي ) ودماغه العالية!!
Author: معاذ حسن
Date: 04-11-2011, 07:02 PM
Parent: #0
أثار الإبن (علي) حفظه الله إهتمامي بالرؤس والفواخير او (الدقانيس)
فقد خرج الى الدنيا يحمل رأسا عجيب التكوين أحبطني منذ الأيام الاولى لولادته... وانا الذي كنت أحلم بأن يكون باكورة انتاجي صبيا وسيما قسيما فاذا به يخرج بهذا الرأس الذي يبدو مثل بيضة السلحفاة.... لا تحسب اني قد رأيت بيضة سلحفاة من قبل ولكنها على اية حال شيء جدير بأن يبدو غريبا (مقوقسا )مثل راس إبني (علي).
أخذت يوميا اذا حملت (الواد) اقلب راسه من كافة الزوايا متسائلا في نفسي من اين له بهذا الدماغ العجيبة!!.... وهل سوف يستمر الوضع هكذا أم انها سوف تتغير مع الأيام!! ....نقلت مخاوفي الى طبيب الأطفال الذي عاين دماغ الواد جيدا بينما انا أراقبه تعبيرات وجهه جيدا... من زاوية حادة جدا.. أجاب الطبيب ببرود: كل شيء طبيعي لا داعي للقلق!! .
قبل أسبوعين قصدت محل الحلاقة وبينما انا جالس تحت يدي الحلاق تسليت - كما هي عادتي- بالتفرج عن نفسي في المرآة الأمامية وأخذت أرصد التطورات التي حدثت في وجهي والتي لم تعد تسرني كثيرا..., حانت مني التفاتة خاطفة الى المرآة الخلفية....فصدمت !!
نسخة مكبرة من (الدقنوس) الذي يشبه بيضة السحفاة يطالعني في المرآة الخلفية لشخص من الجالسين تحت يدي الحلاقين في المحل.... الله!! من هذا الذي يحمل دماغا شبيها بدماغ ابني (علي) الفريد من نوعه!! .نزعت فوطة الحلاق وإلتفت بسرعة الى الخلف لأواجه صاحب الدماغ التي تشبه بيضة السلحفاة .... فاذا به يستدير ايضا ليقابلني وكانت المفاجاة أن واجهت نفسي!!.
يا ربي .كيف عشت كل هذا العمر دون ان اعرف انني أحمل دماغا تبدو من الخلف مثل الخصية اليسرى لحصان عجوز!!
وقفت الى المراة أدور وأدور وانظر شزرا الى فاخورتي من مختلف الزوايا ....تماما كما كنت افعل مع فاخورة (الواد) ,ومن هنا بدأ اهتمامي بالفواخير.
من ضمن قراءاتي الكثيرة في هذا الشأن الذي اصبح شغلي الشاغل قرأت
في مكان ما مقالا ملخصه انه مهما تغيرت عبر الأزمان الصفات الوراثية المنقولة من جيل الى جيل فان أمرا واحدا لا يتغير بسهولة.... وهو حجم وشكل وتكوين الرأس .
ذلك يعني ان الدقنوس الذي تحمله على هامتك هو ذاته شكلا ومضمونا الدقنوس الذي حمله جدك الرابع والثلاثون (عبد السلام الفتلوب).
وهو ذاته الذي حمله جدك المائة وخمسون المدعو (أركانجلو كمشكا )
وهي ذات الفاخورة الذي حملها يوما جدك الثلاثمائة وأربعون والذي لم يهتم والداه بأن يطلقا عليه إسما بسبب انهم عاشوا في الغابة معتبرين انفسهم من جملة المعيز والأوابد ولم يجدوا مبرر- وقتها- لإطلاق أسماء على أنفسهم.
لم أكتفي بالقراءة في مجال الفواخير بل شرعت في اجراء مسحا على عينات مختارة من الفواخير... ورسم خريطة فاخورية وطنية واخرى عالمية.
على أية حال – وأخص هنا اخواني بورداب الرياض- اذا تقابلنا ورأيت اني انظر الى هامتك جيدا فلا تحسب اني معجبا بقصة شعرك ..بل تيقن تماما انك تتمتع بفاخورة مثيرة للاهتمام !!
اما اذا رايتني ألف وأدور حولك ..فاعلم اني انما اختلس نظرات من الخلف لفاخورتكم المبجلة بعد ان حرت في تصنيفها !!
سبب التعديل: وانت مالك.
|
Post: #2
Title: Re: إبني (علي ) ودماغه العالية!!
Author: معاذ حسن
Date: 04-12-2011, 07:09 AM
Parent: #1
أفخر الفواخير يتمتع بها الاتراك ومن جاور بلادهم اذ يتمتعون برأس شبه مربع مبني على خلفية مسطحة تماما مما يمنحهم نوما مريحا هادئا لا شك.
أما فواخيرنا الوطنية فمتنوعة جدا
ولكن السمة الغالبة هي الفاخورة النيلية وهي بضاوية مشطوفة الى اعلى
|
Post: #3
Title: Re: إبني (علي ) ودماغه العالية!!
Author: doma
Date: 04-12-2011, 07:20 AM
Parent: #2
يا معاد حسن تحياتي
انا غايتوا بيضه السلحفا دي ما شفتها دحين الحقنا بالصور
لنري انا كانت لنا نفس الفاخوره
|
Post: #4
Title: Re: إبني (علي ) ودماغه العالية!!
Author: Emad Abdulla
Date: 04-12-2011, 07:40 AM
Parent: #3
كلو من راس ولدك .. جابت ليها تمتمة في المداخلات كمان .
معليش ..
|
Post: #5
Title: Re: إبني (علي ) ودماغه العالية!!
Author: Emad Abdulla
Date: 04-12-2011, 07:43 AM
Parent: #3
معاذ ياخي الله يخليك - بعد راسك الكعب ده -
و أنا زيك كده .. مغرم بملاحظة الريسين ، و كافة البلاوي و عندي ليها مراجع إثنية من ملاحظاتي في خلق الله .
السوريين راسهم غريبة .. كل السوريين ، ريسينهم مجلوطة من ورا .. بلا دومات ( جمع دومة : و هي زينب الفحل :) ) .. للتعتر لي طلع عندي ولدي عبدالله براس سورية جلية الملامح ، فهو مسهوك من ورا و جلوطة . بقيت في كل المناسبات العايلية اعاين في ريسين اهلي : اعمام خيلان خالات الخ .. ما لقيت زول عندو كمثل راس هذا الولد .
اما الاكبر منه عمرا " أحمد " فراسو مطاولة .. أي و الله . و عندها نظام مطة طويلة فجائية كده من الخلف . اتهمت امهم بالخلقنة - فهي من جهة بحر ابيض او أزرق ما عارف .. و قاعدة بلا تاريخ حضاري جيوإثني و لا ابو النوم . و زي ماك عارف طبعا إنه نحنا كدناقلة فنحن جنس سامي و بلا طفرات جينية خلاقية .. نحنا مية المية ( لولا فشيقة في الكرعين تظهر مرة مرة بين كل كم جيل كده و دي مردها لصعودنا الاهرامات العظيمة أبان بنيانا ليها في ايام الاسرة اربعطاشر العظيمة ، و اللي هسه كلكم نافخين سدوركم و عاملينها حقتكم ) ..
المهم يا معاذ يا ابني الود لازم تشوف ليهو حل في الراس العورة ده ..
كده ح يجيب ليك الكلام .
أنا غايتو متصرف يعني متصرف في الاتنين العندي ديل ، و ياني العامل ليهم حقن كولاجين بالجنبات ، ذلك حتي تستقيم الدورانية بتاعت الراس ، و امرق أنا من شيل حال جينات أجدادي العظام .
إن شا الله ربنا يواليكم بالعافية .
|
Post: #6
Title: Re: إبني (علي ) ودماغه العالية!!
Author: SHIBKA
Date: 04-12-2011, 07:53 AM
Parent: #5
عماد
| Quote: إن شا الله ربنا يواليكم بالعافية . |
الله يوالي ريسينكم بالعافية اصح
|
Post: #7
Title: Re: إبني (علي ) ودماغه العالية!!
Author: SHIBKA
Date: 04-12-2011, 07:54 AM
Parent: #6
معاذ
Quote: يا معاد حسن تحياتي
انا غايتوا بيضه السلحفا دي ما شفتها دحين الحقنا بالصور
لنري انا كانت لنا نفس الفاخوره
|
أثني الطلب اعلاه
والله يخلي علي ايا كان شكل فاخورته
|
Post: #8
Title: Re: إبني (علي ) ودماغه العالية!!
Author: Emad Abdulla
Date: 04-12-2011, 08:03 AM
Parent: #6
عافية شنو يا شبكة ؟؟ ..
يقول ليك ريسين زي بيضة ابو القدح .. ( كلو من الناشيونال جيوقرافيك البيشوفا دي .. بيكون هو الاتوحم و جا ختاها في الولد و امو ) ..
ابو القدح ده يعني عضم ثابت شرعاً مافي ليهو أي طريقة يستعدل .. سيك سيك معلق فيك ..
ادعي ليهو ياشبكة ياخي .. الزول في ضيقة .
|
Post: #10
Title: Re: إبني (علي ) ودماغه العالية!!
Author: SHIBKA
Date: 04-12-2011, 08:09 AM
Parent: #8
عماد
| Quote: ادعي ليهو ياشبكة ياخي .. الزول في ضيقة . |
رايك شنو ننصحو يمشي لبنان
والولد لما يكبر يكون مسجل خلقة في جامعة الدول العربية
لانو مشكلة علي دي ما مشكلة سودانية فقط دي مشكلة عربية بحتة
|
Post: #19
Title: Re: إبني (علي ) ودماغه العالية!!
Author: معاذ حسن
Date: 04-12-2011, 09:54 AM
Parent: #10
Quote: رايك شنو ننصحو يمشي لبنان
|
يا شبكة وعماد
منو اليمشي هسع
الواد والا الاب المصدر الرئيسي للفاخورة.
|
Post: #11
Title: Re: إبني (علي ) ودماغه العالية!!
Author: معاذ حسن
Date: 04-12-2011, 08:26 AM
Parent: #5
مامادو أبدولا
جنك عينة والله حيرتني عديل
| Quote: .السوريين راسهم غريبة .. كل السوريين ، ريسينهم مجلوطة من ورا .. بلا دومات |
هذه التسطيحة من الخلف يشتركون فيها مع الاتراك
انا غايتو عا########ي بحس انها بتظبط مع المخدة تمام
مش زي روسيننا العجيبة دي.
| Quote: بلا دومات ( جمع دومة : و هي زينب الفحل :) ) |
ذكرتني والله دماغ الواد يشبه البعو البكون جوا الدوم.
| Quote: اتهمت امهم بالخلقنة - فهي من جهة بحر ابيض او أزرق ما عارف .. و قاعدة بلا تاريخ حضاري جيوإثني و لا ابو النوم . و زي ماك عارف طبعا إنه نحنا كدناقلة فنحن جنس سامي و بلا طفرات جينية خلاقية . |
يا سلام ونسيت صاحب اعجب دماغ في التاريخ
وهو كافور الاخشيدي الدنقلاوي الذي ترجع جدوره الى منطقة الغدار
بجيك راجع جاني شغل.
|
Post: #9
Title: Re: إبني (علي ) ودماغه العالية!!
Author: معاذ حسن
Date: 04-12-2011, 08:06 AM
Parent: #3
Quote: يا معاد حسن تحياتي
انا غايتوا بيضه السلحفا دي ما شفتها دحين الحقنا بالصور
لنري انا كانت لنا نفس الفاخوره
|
تحياتي يا خالة
ليس من السهل معرفة أشكال فواخير النسوان وبالتالي تصنيفها
ولكن وكما يقولون (ان داير تعرف فاطنة شوف محمد في السوق)
ولمن ينشد من باب الفضول او من باب السعي لمنفعة او نكاح
من ينشد معرفة شكل فاخورة إمرأة ما فعليه النظر الى فواخير اخوانها وابنائها
دا موضوع مهم جدا للاسف يهمله كثير من العوام عنداختيار شريكة او شريك الحياة
فعلي المرء ان يتأكد اية فاخورة سوف يقضى بجانبها ما تبقي من عمره !!
أمر آخر مهم بالنسبة لفواخير النسوان
وهو القنبور الذي يصير للمرأة عندما (تكوفت) شعرها وتجمعه الى الخلف
وتجعل في نهايته عقدة فيبدو بارزا الى الخلف مثل وتد مدقوق في الراس.
أنا واثق جدا ان بيوت كثيرة خربت بسبب هذا القنبور.
|
Post: #12
Title: Re: إبني (علي ) ودماغه العالية!!
Author: حمد عبد الغفار عمر
Date: 04-12-2011, 08:28 AM
Parent: #9
الاخ معاذ
تحية
ياخي وقعت لي في جرح
والله لي كم يوم بفكر في الشغلانة دي ونفس الشعور ولدي
عندو دقنوس بوراء وأنا لللآن رأسي دا ما شايفو كويس
ولي كم يوم كدا بعاين لرأس الست أمه لحد ما بقت تقول لي
بتعاين لي كدا مالك
لما انزنق بقول ليها معجب (أهو الواحد يضرب عصفورين بحجر)
وبرضو ما لقيت نتيجة لحد أول أمس يجي خال الولد وأشوف ليك نفس
الساطور الما بغباني
كبست ليهو في سري ( يعني مال لقيت تجبدو إلا بالرأس المسوطر دا)
غايتو فشيتني شوية
|
Post: #21
Title: Re: إبني (علي ) ودماغه العالية!!
Author: معاذ حسن
Date: 04-12-2011, 10:21 AM
Quote:
وأشوف ليك نفس
الساطور الما بغباني
كبست ليهو في سري |
يا حمد سلام
هوّن عليك
قال ليك الزيادات دي كلها بتكون مخ زيادة
انظر للأذكياء والنوابغ من حولك ستجدهم اصحاب دقانيس
وماشي بعيد مالك ابدا من الخال المذكور
|
Post: #13
Title: Re: إبني (علي ) ودماغه العالية!!
Author: عمران حسن صالح
Date: 04-12-2011, 08:30 AM
Parent: #9
| Quote: على أية حال – وأخص هنا اخواني بورداب الرياض- اذا تقابلنا ورأيت اني انظر الى هامتك جيدا فلا تحسب اني معجبا بقصة شعرك ..بل تيقن تماما انك تتمتع بفاخورة مثيرة للاهتمام !! |
ياخي ما عارف ليه اتذكرت راس حميضـــة !!
|
Post: #14
Title: Re: إبني (علي ) ودماغه العالية!!
Author: ابو جهينة
Date: 04-12-2011, 08:48 AM
Parent: #13
عزيزي معاذ
تحياتي
وهل سوف يستمر الوضع هكذا أم انها سوف تتغير مع الأيام!! ....نقلت مخاوفي الى طبيب الأطفال الذي عاين دماغ الواد جيدا بينما انا أراقبه تعبيرات وجهه جيدا... من زاوية حادة جدا.. أجاب الطبيب ببرود: كل شيء طبيعي لا داعي للقلق!! .
لا تخف يا أبو علي ، فقد مرت على أخوك دقانيس مثلها و لكنها في النهاية تكورت و إنعدلت و بالأصح صارت بالفعل أدمغة عالية
ربنا يحفظه ليكم
|
Post: #17
Title: Re: إبني (علي ) ودماغه العالية!!
Author: قيقراوي
Date: 04-12-2011, 09:18 AM
Parent: #14
معاذ يا جن
ازيك ياخ
Quote:
إبني (علي ) ودماغه العالية!!
|
لوووووووووول
من العنوان كنت قايلكم عميغين - خاصة لمن لقيت عمدة هنا - كنت قايلكم بتتكلموا عن الدماغ .. زي لمن اولاد بمبا يقول ليك دا عامل دماغ .. يعني مكبر الـG و مروّق الـD .. جي جمجمة و دي دماغ!
لقيتكم قشريين ساااي و ما عميغين كلو كلو!!
مرة خاشي البيت لا الوي على اي طلبات - ياخ معدي اليوم كلو البي في طلبات الكفيل البدينا القروش، كمان نجي للكفلاء الما بدفعو ديل برضو طلبات!! - اها يا سيد الامانتي ليك قابلني ليك " فادي " ولدي و ما شهلني كلو كلو .. قال ايه: عاوز اركب الفيل!!
يا للهول رسمي و شعبي الود دا بايظ مرتين .. بركب الفيل و بدعوا ابوه للانحراف معاهو!!
قلت ليو : يا فادي بما اني زول ديموغراطي .. تركب الفيل عادي ما عندي مشكلة .. لكن تشوف القدرك .. مع اصحابك .. ما مع ابوك .. ياخ ديموغراطية قدر دا لسة الانسانية ما وصلتا ياخ!؟
شوية انتبهت ليك انو امو دي ما شاركت معانا .. و بتكون راقدة فوق رأي .. لمن عاينت في جهتا .. لقيتا ليك ميتة من الضحك .. طلع بتكلم عن فيل جد جد .. شاف في التلفزيون اولاد قدرو في تايلاند راكبين فيل الله و الرسول داك ..
شرعت - ذهنياً - في صياغة نقد ذاتي و تقديم اعتذار فوري عن اشانة السمعة، و فكرت في اني اسعى لي " بامبرز " مقاس فاخورتي المدوقسة دي لحالات الطوارئ البتداهمك فيها القراءات الملاسية دي .. لوووول دي مطاعنة عديل
ماما دوما - في حال الموجة دي ما ظبطت معاك - ركوب الفيل= تكبر الـG و تروّق الـD
و المعنى واضح
------
Quote:
وهي ذات الفاخورة الذي حملها يوما جدك الثلاثمائة وأربعون والذي لم يهتم والداه بأن يطلقا عليه إسما بسبب انهم عاشوا في الغابة معتبرين انفسهم من جملة المعيز والأوابد ولم يجدوا مبرر- وقتها- لإطلاق أسماء على أنفسهم.
|
نحن غايتو نتمتع بدماغ معقولة ..
ما سمحة تطمع فين الناس يسحرونا .. و لا شينة شديد تغريهم بالشمار
لكن عندنا مشكلة في اصبع الرجل الوسطاني
اكيد جدنا الاسمو ايه دا؟ .. آآي الما عندو اسم و[ الثلاثمائة وأربعون ] كان دفع رباعي
|
Post: #28
Title: Re: إبني (علي ) ودماغه العالية!!
Author: معاذ حسن
Date: 04-13-2011, 09:58 AM
Parent: #17
Quote: لكن عندنا مشكلة في اصبع الرجل الوسطاني
|
قيقا..مشتاقون
ضيعت مستقبل العيال الكروي باصبعك العامل زي اصبع البطة دا.
يااخوي ويييييييييين عنتر ابو وليد!
لي منو كم سنة كدا
|
Post: #25
Title: Re: إبني (علي ) ودماغه العالية!!
Author: معاذ حسن
Date: 04-12-2011, 07:26 PM
Parent: #14
Quote: لا تخف يا أبو علي ، فقد مرت على أخوك دقانيس مثلها و لكنها في النهاية تكورت و إنعدلت و بالأصح صارت بالفعل أدمغة عالية
ربنا يحفظه ليكم |
ريسنا الحبوب المحبوب
ربنا يحفظ لكم العيال ويوفقهم
وان شاء الله حال علي يطلع برضو صاحب دماغ عالية ما يبقى دقنوس في الفاضي ساكت.
|
Post: #15
Title: Re: إبني (علي ) ودماغه العالية!!
Author: doma
Date: 04-12-2011, 08:55 AM
Parent: #13
| Quote: إمرأة ما فعليه النظر الى فواخير اخوانها وابنائها |
يجازي محنك يا معاد يا ابني تخيل شلت المرايه وقمت بفج الشعر لرؤيه فاخورتي من الخلف والحمد لله جاءت سليمه لا توجد اي دومه
من الامام الجبهه عريضه مع جلحات محترمه
|
Post: #16
Title: Re: إبني (علي ) ودماغه العالية!!
Author: أحمد الشايقي
Date: 04-12-2011, 09:00 AM
Parent: #15
سلام يا معاذ,
كتابة طاعمة والله لكن الابن علي يوم من الايام حيقرأ الكلام دا .. شكلك ما عملت حساب للموضوع دا ؟
ياخي المواليد ديل كلهم كدا وبعدين بستعدلوا
مع التحية
أحمد الشايقي
|
Post: #29
Title: Re: إبني (علي ) ودماغه العالية!!
Author: معاذ حسن
Date: 04-13-2011, 10:02 AM
Parent: #16
| Quote: لكن الابن علي يوم من الايام حيقرأ الكلام دا .. شكلك ما عملت حساب للموضوع دا |
استاذنا احمد
تحياتي
ما اظن يقراه
الواد ان شاء الله طالع ثقافة فرنسية وكدا
|
Post: #18
Title: Re: إبني (علي ) ودماغه العالية!!
Author: خالد عبد الله محمود
Date: 04-12-2011, 09:20 AM
Parent: #15
يعني الأسم ده إنتحال شخصية و لا شنو يا ماما ؟ نبلغ بكري و لا نعمل نايمين ؟؟
على بابا
شكل الراس ما مهم المهم يكون بيشتغل كويس ؟؟
المدام مشت تشتري حاجات للبيت من منفوحة ضربت لي قالت علبة نيدو الكبيرة بـ 75 ريال لكن في علب زيها و بنفس تاريخ الإنتاج بس مطفقة بـ 60 ريال نجيب ياتها ؟؟
أسه ولدكـ ده لو راسو تاريخ الصلاحية بتاعو باقي فيهو كتير تاني الشكل البره بيهمكـ في شنو ؟
|
Post: #20
Title: Re: إبني (علي ) ودماغه العالية!!
Author: doma
Date: 04-12-2011, 10:17 AM
Parent: #18
| Quote: يعني الأسم ده إنتحال شخصية و لا شنو يا ماما ؟ نبلغ بكري و لا نعمل نايمين ؟؟ |
لوووووووووو ل قلنا من الخلف يا خالد ولدي
لكين ما جبنا سيره الجنبات حيث توجد دومتان .
اما ابني اصغر الجماعه لا توجد دومه من الخلف لكين توجد قوووووووووووره كبييييره قدام
بس من حسن حظه الشعر طلع كويس بغطيها
|
Post: #22
Title: Re: إبني (علي ) ودماغه العالية!!
Author: محمد عبد الماجد الصايم
Date: 04-12-2011, 11:00 AM
Parent: #20
غايتوي يا علي بابا الولد دا سنتين
تاني وبتخارج بخلي ليكـ البيت!!
|
Post: #23
Title: Re: إبني (علي ) ودماغه العالية!!
Author: طارق جبريل
Date: 04-12-2011, 11:40 AM
Parent: #22
الحمد لله بتنا طلعت من الوراثة المكلوجة دي
|
Post: #31
Title: Re: إبني (علي ) ودماغه العالية!!
Author: معاذ حسن
Date: 04-13-2011, 10:10 AM
Parent: #23
| Quote: الحمد لله بتنا طلعت من الوراثة المكلوجة دي |
ود جبرين
بتكم مرقت
لكن والله يا فواخيرا عندكم
يطرشني ويعميني ما شفت زيها
بعدين وانت راجع بالتران لاحظ لفواخير الركاب الجمبك.
|
Post: #27
Title: Re: إبني (علي ) ودماغه العالية!!
Author: معاذ حسن
Date: 04-13-2011, 08:41 AM
Parent: #22
Quote: غايتوي يا علي بابا الولد دا سنتين
تاني وبتخارج بخلي ليكـ البيت!! |
ليك علي اخليهو اشهر من حبوبة صلاح غريبة
|
Post: #30
Title: Re: إبني (علي ) ودماغه العالية!!
Author: معاذ حسن
Date: 04-13-2011, 10:07 AM
Parent: #18
Quote: المدام مشت تشتري حاجات للبيت من منفوحة ضربت لي قالت علبة نيدو الكبيرة بـ 75 ريال لكن في علب زيها و بنفس تاريخ الإنتاج بس مطفقة بـ 60 ريال نجيب ياتها ؟؟
|
وجبتو ياتو!!
الظاهر المنتهي هو تاريخ صلاحية دماغي أنا
|
Post: #24
Title: Re: إبني (علي ) ودماغه العالية!!
Author: معاذ حسن
Date: 04-12-2011, 03:19 PM
Parent: #13
Quote:
ياخي ما عارف ليه اتذكرت راس حميضـــة !! |
عمران يا صديق
ابو الروس دا باكر برجع يجهجهنا
|
Post: #26
Title: Re: إبني (علي ) ودماغه العالية!!
Author: عثمان محمد كرار
Date: 04-12-2011, 09:58 PM
Parent: #24
الاخ معاذ ربنا يحفظو ويغطيه ويعليه ويجعل البركه فيه وفي والديه
الحقنا بصورة ابفاخوره
|
|