Post: #1 Title: ما هو الفافنوس Author: willeim andrea Date: 04-08-2011, 12:13 PM
ماهو الفافنوس ماهو الغليد البوص
ود المك عريس خيلا بجن عركوس
أحيّ علي سيفه البحد الروس
ما دايرالك الميته أم رمادا شح
دايراك يوم لقى بدميك تتوشّح
الميت مسولب والعجاج يكتح
أحيّ علي سيفه البسوي التح
إن وردن بجيك في أول الواردات
مرنا مو نشيط إن قبّلن شاردات
أسد بيشه المكرمد قمزاته متطابقات
وبرضع في ضرايع العنّز الفاردات
كوفيتك الخوده أم عصا بولاد
ودرعك في أم لهيب زي الشمس وقّاد
وسيفك من سقايته إستعجب الحدّاد
وقارحك غير شكال ما بقربه الشدّاد
يا جرعة عقود السم
يا مقنع بنات جعل العزاز من جم
الخيل عركسن ما قال عدادهن كم
فرتاق حافلن ملاي سروجهن دم
Post: #2 Title: Re: ما هو الفافنوس Author: willeim andrea Date: 04-08-2011, 12:30 PM Parent: #1
Post: #3 Title: Re: ما هو الفافنوس Author: willeim andrea Date: 04-08-2011, 12:39 PM Parent: #2
في اعماقي انت يا وطني
Post: #4 Title: Re: ما هو الفافنوس Author: willeim andrea Date: 04-08-2011, 12:57 PM Parent: #3
الله يديك الصحه والعافيه وطول العمر استاذنا الجليل الموقر عبدالكريم الكابلي
Post: #5 Title: Re: ما هو الفافنوس Author: اشرف السر Date: 04-08-2011, 01:46 PM Parent: #4
مساهمة لشرح بعض المفردات التي قد يصعب فهمها:
الفافنوس: من الاعشاب التي تنمو على ضفاف النيل وروافده، وهو عشب رفيع الساق البوص: أيضا من النباتات التي تنمو على ضفاف الانهار ويتميز بغلظ الساق
واعتقد أن الشاعرة هنا قصدت أنه متوسط البنية، فلا هو نحيف مثل الفافنوس، وليس "ثخينا" مثل البوص...
وخير الأمور اوسطها..
والله أعلم
Post: #6 Title: Re: ما هو الفافنوس Author: willeim andrea Date: 04-08-2011, 02:03 PM Parent: #5
الحبيب اشرف شكرا علي المشاركه وعندك تحت الاقتباس والمعاني
وروعة استاذنا الكابلي ومشاركاته القيمه عبر الازمنه والمواقف لتوثيق التراث والموروثات علشان محبوبنا يكون فووووووووووووق كل ضيق تفكير
Quote: إنّها تنفي عن الممدوح أن يكون متل ذلك النبات الرخو (الفافنوس) الذي ينمو على ضفاف النبل ويسهل قطعه وربما كانت الكلمة نوبية قديمة شأنها شأن أكثرية المسميات المتصلة بالنيل. ثم نفت عنه كذلك أن يكون كالقناة أو القصبة الجوفاء التي يسهل كسرها ثم أثبتت أنّه إبن المك بلا نقصان وأنّه عريس خيل وهو تعبير متعامل به بين العرب في جزيرتهم وأحيانا يقولون (إنّه أخو خيل) كناية عن الفروسية. يقول ألشاعر المعروف أحمد بك شوقي في رثائه للثائر عمر المختار: (بطل البداوة لم يكن يغزو على تنك ولم يك يركب الأجواء – لكن أخو خيل حمى صهواتها فأدار من أعرافها الهيجاء) وعركوس كلمة عربية فصيحة تفسرها المعاجم بالكثرة والتجمع. وعركست الخيل أي تجمّعت. وتواصل بنونة رسم صورها الرائعة فتبدي أسفها على تلك الميتة السهلة التي يكون فيها البكاء والعويل وتذري فيها النسوة الرماد على رؤوسهن وهو التفسير الذي أرجّحه على سواه، إذ أنّ البعض قد ذهب إلى رؤية أخرى. ثم تذكر بأنّ الممدوح في كل المعارك في موقف الهجوم أو الورود والضمير هنا (إن وردن) للخيل فهو في المقدمة أمّا في موقف الفر فهو المتأخر المتباطيء على الدوام، أمّا بيشة الواردة في النص فهي المنطقة المعروفة الآن بهذا الإسم في الجزيرة العربية وكانت مأسدة عرفت بضراوة سباعها. ونجد بعض الكلمات التي تتسم بالوضوح كالكوفية والخوده وهي الخوذة وبولاد هي فولاذ وقد قلبت الفاء باء، وربما كانت هي الأصل، وأم لهيب من أسماء الحرب وفي آخر مرثيتها تشبّه الممدوح بجرعة السم المركّ ز وأنّه الستر لكل فتيات قبيلة الجعليين وهي القبيلة التي اشتهرت بالعزّة والفروسية والتصدي للظلم والضيم. وهذا شرح موجز لهذه الأغنية الرائعة التي يمكن الإسترسال المسهب في إيحاءآتها المتعددة ولكننا محكومون بأكثر من متطلب للإيجاز. فقط أود أن أشير إلى ما درجت على ألإشارة إليه في العديد من محاضراتي عن تراثنا الحبيب وهو أن نحفظ الحق وأن نشيد بالدور الإبداعي للجهة التي يصدر عنها ومنها مثل هذا الإبداع التربوي الرائد الرائع وذلك قبل مناداتنا بأن نتعامل معه بوصفه التراث الملك المشاع الذي صدر منا جميعا لنتعامل معه وبه جميعا إذ ما أحوجنا إلى هذه القيم التي تجمعنا فنلتقي في جمالياتها، بعيدا عن العصبية.
Post: #7 Title: Re: ما هو الفافنوس Author: willeim andrea Date: 04-08-2011, 02:17 PM Parent: #6
جرعات في حبك ولي حبك
Post: #8 Title: Re: ما هو الفافنوس Author: willeim andrea Date: 04-08-2011, 02:44 PM Parent: #7
Post: #9 Title: Re: ما هو الفافنوس Author: willeim andrea Date: 04-08-2011, 02:51 PM Parent: #8
مساهر ؛ مساهر ليلك الطول نجوم وهجوع .. وغرقان قمره في جو السحاب مصروع .. بصارع فيك ضلام تمن سنين واسبوع .. واراقب فجرك الآذن زمانه سطوع .. وشايلك سيف نصر لا يطيش ولاهو بزوغ.. ورابطك في حشاي من العطش والجوع .. واســـقيك مــني دم ... ودمـــوع .. واوقــــدلك جحـــيم وشــــموع .
واقش منك دموع الضيم على خدودك بتتحدر .. واقبل فيك جبين مرفوع .. كراية النصر .
وبيرق عزة رفرف في ركاب فاتحين .. واغسل ليك تراب الهجرة باليدين .. ويجيك المجد مدخور لك سنين وسنين .. من حبوبتك الوقفت ترد الدين .. وتطرد حملة الباشا .. ومع الغازين .. حليلة مهيرة كاسرة التوب وحد الزين .
ومن جدك بكبر فوق جبل سرخام.. ودافن ضهره في كرري ومتكنتر ركاب ولجام .. وسال في إيده سيف العود ببعج بيهو كبدة وهام .. وقبال دمعه مايرشح مع البارود ، يكون شتت عليك اجسام .
أجسام من غزاة ما قدروا يسبوك .. ولاكشفولك المقنع ، ولافي الشينة ختوك .. ولاخلولك أحداقم ، ولاهم قدروا يدنوك .. ومما فاتوا لي هسع .. بدوروا رضاك واطروك .
بشوفك في عيون النيل ، وفي الأطفال .. وفي تاريخك الأخضر، على الأجيال .. وفي بحر الدمي ، اللسع بجم سيال .. وفي مستقبلا ، واعد كبار وعيال .. بشوفك بشرى فيك ، شقق جبال ورمال .. وفي حدقاته مفتوحات ، تلاتة ليال .. بترسم لي طريق نجم العشاء الولوال.. وتكشف فيك ، أسرارا كتار واهوال .. ويلقاك ؛ ويلقاك حتى في رمش الغريب الضال .. مهموم في اليمن ، لا الحامدي لا السلال .. ويلاقيك في الخليج ، مشرورة حالك حال .. ويسكّل فيك .. ببيعوك بالدهب والمال !
فلذاتك مبعثرة في البلاد مأجورة .. تبني على الرمال أحلامها ثم قصورها .. خلوك سايبة في أيد الطغاة مأسورة .. شان ما يسلموك الحلبي ، روب في كورة ؟
أبشري ؛ أبشري نحن لسع في الخلا مرابطين .. ونحن عقاب عهود ، أنصار مع مهاجرين .. ونحن سهارى ما بنعرف غمضة العين .. ونحن فداك ، نذود عنك بقالنا سنين .. حالفين بيك قسم ، غالي وعزيز ويمين .. مانضوق راحة ، لانشوف زوجة لا والدين .. ولاندفن رؤوسنا على الرمال خايفين .. حتى نودي من أشلانا ، أعلامك على القصرين .. وحتى نسوي للقصفوك مقبرتين .. زي ماصنع تارا ، علي الألف ألفين .. وحتى نكسر السد ، وينقسم نصين .. ويكون عيدنا الكبيـــر ، في مقرن النيلين . وما بنساك ؛ وما بنساك عشان يطراك في الأزمان .. قريـــــــب منك ، قرابة الحدقة للإنسان .. وجايل فيك ، جولة الدم علي الوردان .. وقيمتك عنده ، زي قيمتك معاه زمان .. بعيشك هضبة ، بتشارف تلال قيسان .. ويحياك موية في دارفور، تبل عطشان .. ويديّم فيك من سنار، ترع خزان .. ويدفق خيره بي عند الرهد بستان .. ويقول للدندر الغاضب ، كفاك قيسان .. ويسهر لي وليداتك ، يعشي الحاري والجيعان ..
منو الزيك ، منو الزيك ولد واستالد الأولاد ؟ منو الزيك ، بجيبم ديمة عشرة اولاد ؟ منو الزيك ، ببز الدنيا موية وزاد ؟ منو الزيك ، ضروع وزروع ونيل مداد ؟ منو الزيك ، بطانة وغابة دون حداد ؟ منو الزيك ، سهول وادي وجبال اوتاد ؟ منو الزيك ، أصل موروث من الأجداد ؟ منو الزيك ، جراتق دم .. قدام وجداد ؟ قشي الدمعة يابت الرجال ، ما بحكموك أولاد .
أطرى السناجك ووقعة الخشخان .. واطرى النحاس وكتين إزم بطران .. ونادي أولاد جعل والينم ينم القرمان .. والخيل عركسن واتروقن ريقان .. وصقر الجو بحلق في السماء جيعان .. يا الكدك بدور.. كبدة ، وكلى ، ومصران.
نادي المك نمر؛ نادي المك نمر، معلم أباة الضيم .. شاي الباشا شي ، خلاي جناهو يتيم .. ودفتردار بدك عند المتمة زميم .. أرفع صوت ، لعل الناسي يبقى فهيم .. أرفع صوت خلاص ، شرطنا شرب الهيم .. وكاد عاقلنا يصبح .. من سكاته بهيم .
مر بالدامر البي ذكرو عز وجل .. واتنوخ فســيح ، وادي المجاذيب طلة .. شوف النارمتلعبه في المساجد ، ولا .. مات نورالضيا ، وجات بعده نار الجلة .. شوف المصحف ، الأربع قرون بدله .. ماسك وردو.. أم سحرتو عين خلق الله .
حبابك عشرة يا بت مقرن النيلين .. حبابك ياأم عجن ، بعد العديل والزين .. حبابك يا المحكرة في المشاعر، والفؤاد ، والعين .. حبابك يا المغسلة ، بي طهور مويتين .. حباب أهلك بلاعبوا الموج ، مع البردين .. حبابن كتفوا بوطليح ، علي اللضنين .. حباب قصرك ضبح غردون من اللضنين .. حباب الخندق .. العجن الجلود بالطين . حباب المهدي فيك ، كبر حرارة ودين .. حباب أسد العرين ، عبد الله ود تورشين .. حباب النور، عقيد الخيل ، عقود الشين .. عنقرة المعزة .. الأصلو ما بتلين . حباب الزاكي أداب النقز في الحين .. حباب ود النجومي القبرو في توشكين .. حباب عثمان سواكن دقنه في الدورين .. حباب يعقوب ؛ حباب يعقوب ، حباب محمود ، وشيخ الدين .. سلام يا البقعة ، مبروكة الإله والدين .. حباب الحرروك ، لا إنتماء لادين .. حباب السودنوك ، خلوك سماره وزين .. حباب الأزهري ، النكس ذرى العلمين .. حباب الراية ، هفهافه وتكيل العين .. قولوا معاي تبارك ، أقول دقر ياعين .. وزغرتي ياام رشوم ، وقولي البطان وين وين .. بركزلما سيطانم تبيد وتلين .. ولما يشوفوا قطع إيدي بالسكين .. ولما تقول حمامة ، كفاك .. دقرياعين .
سلام ياالقلعة بي بدورها وجواهر تاجها.. سلام يااب عنجه خورك لاقى نيلو الناجا .. سلام يااب روف وودنوباوي ضوى سراجها.. سلام ديم أب سعد نارالخيم وجاجه .. سلام - الله أكبر- في الفتح دجاجه .. بسيوفها ورماحها ، ولي الحمد سجاجه .. بحر أبيض فتح أبوابه وقت الحاجه .. زي ما موسي عد .. بلا تعب لا حاجه .
كلـــــك أدباء من عشاق وفنانين .. شالوك في عيونم وصوروك تلوين .. وشاشوبك شعر مطبوع جزيل ورصين .. فيه أم در.. وفيه الأسكلة وستين . وعازة الفي هواك ، نحن الجبال ثابتين .. يا فلق الصباح ، قول لي نهارك وين .. ترعاك في الفؤاد ، بعناية الحارسين .. يا كروان كرومه .. خليل فرح ما يلين . يا ود الرضي القلبه انقطع نصين .. ترى العبادي ماسك الدابي بالليدين.. مع أبو صلاح ونورالكهربائي الزين .. فيك الحاج سرور، غني الفراق لي متين .. وما عارف المفارق ، قدموماش لي وين .. وياعازة الفراق .. طال بي ، وكله حنين .
مطروحة الجبين من سوبا لي سنار .. نيليك من غرامن لبسوك سوار .. أكنافك موطأة فيها ماء وخضار .. ولي عزاز القبائل .. صرتي أحسن دار. محصولك دهب ما بكيلو بالعبار .. مواسمك عدة محسوبات طوال وكتار.. أرضك في الجمال محسوبة بالأشبار.. مشكلة بالتراب .. لكن لجين ونضار.
ترعك زي بحار لبنان طوال وعدال .. واب عشرين يفوق ناس بردى في الأمثال .. لياليك بالقمر رويانه نور وظلال .. مطرزة بالنجوم .. في إحتفال وجمال .
قرآنك بزين من قمت إنت بلاد .. تقاقيبك تضوي الليل زناد في زناد .. ما شقاك ضلالي إلا انشبح وانحاد .. وما جال فيك ظلوم .. إلا انكبح وانقاد . عزك من قديم ، محسوب جدود واحفاد .. عمروك الرجال ، تيلاد قصاد تيلاد .. زرعوك بالسلاليك ومنجل الحصاد .. وجرنك في التقي ، تمتم قرافو وزاد .
ديل أولاد حشاك لا إرتزاق لازيف .. وديل الكلهم صنديد وأصلو شريف .. ديل دخريك لسنين الجفاف والحيف .. وديل دفقة ينابيعك .. شهورالصيف . ديل نيلك وكت قطع البرك والقيف .. وديل ديم السواري الأصلومابتقيف .. ديل الرضعوا حر لبنك بدون تحريف .. وديل البقعوا في نارك .. بدون تكليف . ديل إتباشروبك إنت درقة وسيف .. وديل بفدوك بي ارواحم نقيب وعريف .. ديل أخوان صدق ، في الله دون تحريف .. وديل ياهم .. عيونك ، وقلبك الوليف .
خايضين فيك صحاري تقيد لهيب وشرار.. وطالعين فيك جبال عاليات علي الطيار.. ونعرف أرضك المحدودة بالأشبار.. وننزل في ربوعك لينا مليون دار.. وندخل فيك ضحى ونمرق مع الأسحار.. ماحجبوك علينا حيارى .. أوأغرار. نارك ماانطفت ؛ نارك ما انطفت من يوم رماك الغادر.. وسجنك مافضى وأهلك عليهو تدافر.. وللموت كمبلوا ولادك مغني وشاعر .. وكل عام ليك عيد بالدم موشح وظافر .. خلي عدوك مجهجه في حكومته وحاير .. وقيدك هسه بنكسره .. ونجدلو ضفاير. نحن أولادك العارفانا دون تذكار .. ونحن الجينا في نسلك من الأبكار .. ونحن الليله شمعك في الضلام سهار.. ونحن الفجرلي الليل كان قعد كان طار.. ونحن نضري ورتابتو ونشيلها عصار.. ونحن بلابل الحرية .. تصدح حتى في الأوكار .
أقول فيك تاني يا ست الشرف والطول ؟ وعزك في الأرض تريان فروع وأصول !! أرقدي قفى بنجيك ، مهما زمانا يطول .. ومهما الدهريردم ، في حمولنا حمول .. ومهما نموت فداك ، نترامى زول في زول .. برضو منيعة إنت .. علي القدر والصول . وانت كبيــــرة ؛ كبيرة أكبرمن صغارة العسكر.. وانت عظيمة ما بزلك سلاح البقهر.. وانت عزيمة لا بتلين ولا بتتكسر.. وانت أنوف .. أشم من بيله ، ما بتتعفر. قوديلنا الرسنة وخلفي الأشتام .. خنقي لي دلاليكك وصحي النام .. أرقصي الفاشر الهضليمو كبَّ ونام .. وقولي الليلة شبالكم علي حرام .. لما تكسروا القيد أب عشرأعوام .. ولما تقنعوا الكاشفات وراء وقدام .. ولما تجيبوا سجانكم خزي ومنضام .. ولما اولادي يبقوا جنود .. ومش خدام .
Post: #10 Title: Re: ما هو الفافنوس Author: haroon diyab Date: 04-08-2011, 03:11 PM Parent: #9
سلامات وليم
وفرتيكيت ام لبوس
Post: #11 Title: Re: ما هو الفافنوس Author: Elbagir Osman Date: 04-08-2011, 03:24 PM Parent: #10
أظنها
أسد بيشه البِكُر قمزاته متطابقات
وبرضع في ضروع العنّز الفاردات
كانوا يطلقون إسم العنزة ام قرن على وحيد القرن
ماذا كانوا يقصدون بالعنزة الفاردة؟
هل يقصدون هنا أن الأسد أرضعته وحيدات القرون؟
عموما .. فنيا صورة متفردة .. رهيبة
الباقر موسى
Post: #12 Title: Re: ما هو الفافنوس Author: Asma Abdel Halim Date: 04-08-2011, 08:45 PM Parent: #11
الأساتذة وليم والباقر تحياتي في القصيدة الأولى أظن أن الكابلى فعلا يغنى "ود المك عريس" والصحيح "ود المك عقيد" والعقيد هو من يعقد الخيل في الحرب
العنز الفاردات أنثى الحيوان الفاردة هى من أُخذ منها مولودها الرضيع أو من أضاعت المولود. وعندما تفقد مولودها- لأي سبب - تصيبها حالة كالجنون وتنطح كل من يقرب منها وصفت الشاعرة أخيها خالد ود المك بأسد بيشة القمزاته متطابقات كناية عن الخفة والقوة والثبات فى الحركة تم وصفت هجومه ودفاعه بعدم الخوف واقتحام المصاعب أيا كانت إتخيل أنثى الخرتيت فاردة (ووب علينا)البقدر يصلها منو؟ والله أعلم
Post: #13 Title: Re: ما هو الفافنوس Author: willeim andrea Date: 04-09-2011, 07:06 PM Parent: #10
الحبيب هارون دياب ... شكرا علي المرور الانيق والاضافه وايداك معانا للمزيد من الاضافه
معزتي
Post: #14 Title: Re: ما هو الفافنوس Author: willeim andrea Date: 04-09-2011, 07:17 PM Parent: #13
الاحباب اسماء والباقر شكرا علي المشاركه ... فعلا انها معاني ولوحات متفرده
تقديري واحترامي
Post: #15 Title: Re: ما هو الفافنوس Author: willeim andrea Date: 04-11-2011, 07:50 PM Parent: #14
.
Post: #16 Title: Re: ما هو الفافنوس Author: willeim andrea Date: 04-12-2011, 08:38 AM Parent: #15
.
Post: #17 Title: Re: ما هو الفافنوس Author: قلقو Date: 04-12-2011, 08:57 AM Parent: #16
Quote: الفافنوس: من الاعشاب التي تنمو على ضفاف النيل وروافده، وهو عشب رفيع الساق
شكرا يا أشرف انا كنت حأسأل عن معناها. شكرا وليم.
Post: #18 Title: Re: ما هو الفافنوس Author: willeim andrea Date: 04-12-2011, 05:53 PM Parent: #17