ظاهرة غريبة فى السودان بس اللهم يجعلها خير

يتخيل لى موضوع المتسولين دا عادى جدآ،

لكن الظاهرة الغريبة العاوزة ليها اجابة هى وجود ناس بسترزقوا من المتسولين ديل،

فى ميدان جاكسون فى مجموعة كبيرة منهم مرصوصين على طول الطريق بنظام ،

شاهد عيان شاف عربية كبييرة بتنزل المتسولين ديل كلهم مع أذان الصبح وبشيلهم فى وقت متأخر ليلآ،

سألت من الموضوع دا قالوا دى تجارة من نوع جديد ومربح ،دى شكلها عصابة بتوفر السكن والمأكل والمواصلات مقابل جمع المال الاتحصلوا عليه فى يومهم الشاق دا،

والله حاجة تجنن اطفال دون الرابعة خاتين ليهم صناديق صغيرة ما فاضل ليهم الا يكتبوا عليه محلية الخرطوم،،

والله انا محتارة وعاوزة أعرف الحقائق من الكلام البنسمع فيه عنهم،،

الخلانى افتح البوست دا فى جماعة لابسين ليهم ذى لبنى مكتوب عليه مكافحة التسول وشفتهم بعينى دى عاملين ليهم كشة فى بحرى ،،الحاجة الخلتنى اسأل ماشفتهم عملوا كشة لجماعة ميدان جاكسون ديل ليه ماعارفة،،،

ومن هو صاحب الدفار البجيب الاطفال ديل الصبح ويشيلهم اخر اليوم؟؟؟؟ مايجى واحد يقول لى دا ترحيل جماعى تابع ل .........

Quote: شاهد عيان شاف عربية كبييرة بتنزل المتسولين ديل كلهم مع أذان الصبح وبشيلهم فى وقت متأخر ليلآ،

يا لطيف

سلام اخى ابراهيم والله البلد دى فيها عجائب تشيب الرأس والناس مشغولة فى روحه وما جايبين خبر ،،بس نقول يالطيف والله يكضب الشينة ،،

Quote: سألت من الموضوع دا قالوا دى تجارة من نوع جديد ومربح ،دى شكلها عصابة بتوفر السكن والمأكل والمواصلات مقابل جمع المال الاتحصلوا عليه فى يومهم الشاق دا،

الظاهرة دي موجودة في مصر (على حسب افلامهم ومسلسلاتهم)

لكن لو بقت موجودة في السودان فعلى الدنيا السلام

ونقول الله إكضب الشينة


سلام يا نجاة

سلام يا نجاة
الظاهرة دي ذي ما قالت سامية في الافلام المصرية
وخصوصا في فيلم المتسول.
واللة الحالة بقت تخوف كتير واستخدام اطفال من اجل
التسول دلالة علي اشياء كثيرة تجافي مجتمعنا اليوم
ولكن الباب مفتوح لمليون سؤال و سؤال
وربنا يلطف

Quote: الظاهرة دي موجودة في مصر (على حسب افلامهم ومسلسلاتهم) لكن لو بقت موجودة في السودان فعلى الدنيا السلام ونقول الله إكضب الشينة سلام يا نجاة

سلام يا سامية والله مما عرفت الموضوع دا انا حزينة وقلت لو تأكد الكلام دا والله انا ح أوصلو حدو وأحقق فيهو ومحل الرهيفة تتقدا،،

أول مرة اسمع انو الظاهرة دى فى القاهرة،

برضو نقول الله يكضب الشينة،

تسلمى يا سامية

,اقعدي فتشي لي في الظواهر الجديده

لمن الطياره تفوتك







بعد داك اقوم افتش علي ابوحسين وود عمو

Quote: ,اقعدي فتشي لي في الظواهر الجديده لمن الطياره تفوتك

والله انا جادة جدآ موضوع خطير وأخطر من المطالبة برحيل النظام عشان لما النظام دا يرحل انحنا بنقعد نفتش فى كرامتنا واطفالنا الضايعين ،،

الاخت بت سيداحمد المحترمة

* حيتما كنت في السودان بين نوفمير الماضي ويناير كنت قد استمعت الى حوار في الاذاعة مع وزيرة الرعاية الاجتماعية بولاية الخرطوم وقد ذكرت حقائق في غاية الخطورة عن هذه الحكاية ولكن الذي اتذكره بالكاد انهم قبضوا على هذه العصابة التي تشغل هؤلاء الاطفال، تجلبهم في الصباح وتجمعهم في الليل وينامون في مكان لا يمكن ان بتحمل العدد الذي يضعهم فيه .. وان لم تكن ذاكرتي خربة أن افراد العصابة من دولة افريقية ...

* والشئ الذي فهمته أيضاً أن هنالك فريق بحث مفرغ لهذا العمل ...يعمل على دراسة الظاهرة واثارها ... الخ

* إذا كان هنالك صحفي شاطر بالخرطوم يمكنة ان يقابل الوزيرة ويخرج لنا بالاجابات على الاسئلة التي في الاذهان.

تحياتي

سلامات يا نجاة

تعرفي ا لسودان دا فيه حاجات كثيرة بتحصل والناس ما جايبة خبرها لانها بتخص فئات مستضعفة في المجتمع

التسول والتشرد مشكلة اجتماعية كبيرة خاصة حين يكون في اطفال داخلين في هذا الامر..

وزارات الشؤون الاجتماعية المتعاقبة لم تفلح في حل هذه المشكلات مهم ابدا لم يكونوا عمل مؤسسي
يحاصر هذه الظاهرة..حتى اينعت وصارت بزنس

وزارة الشؤون الاجتماعية تحتاج لميزانية ممتازة حتى تقوم بعمل بيوت ايواء
تستوعب المشردين. ومن ثم تختفي ظاهرة استغلال الاطفال في التسول

مع التحية

الظاهرة دي لفتت انتباه الكثير ..بتذكر لمن كنا طلبة في جامعة النيلين كان لدينا بعض الزملاء من كلية الإجتماع عملوا دراسة عن الظاهرة

و من بعض النتائج الوصلوا ليها انه المتسوليين منظميين بطريقة ملفتة فوجدوا مثلاً المجموعة البتتسول في السوق العربي في منطقة معينة عندهم
ايام معينة بتواجدوا فيها في السوق العربي بعدها بتواجدوا في ايام مختلفة في جاكسون اسكوير و الفي جاكسون اسكوير بجوا للسوق العربي و ذكراوا
ايضاً حكاية الترحيل البجي بنزلم و بلمهم بالليل ده

لكن انا اكتر موضوع محيرني في قصة التسول دي .. واحد كان بتسول في احدى عيادات الخرطوم ..كنتا دائما بشوفوا في العيادة بتسول و إذا بي القاهو
طالب معانا بجامعة النيلين ..سألت عنه اصدقائه المقربين عن حالته المادية لأنه الأمر حز في نفسي و حزنت عليهو - لكن المقربيين اكدوا على انه حالته
المادية جيدة جداً - مع العلم ويشهد الله اني ما قلت لي اي شخص عن الموضوع..بس الموضوع ما لاقية ليهو اي نفسير!!!!!!

الاخت نجاة

سلام


انعدام التكافل الاجتماعي واهمال جوانب كثيرة في المجتمع يسوده الفقر , الجهل والمرض سيكون الناتج انهيار كامل للبلد..
نظام الفساد القائم هو المسبب الرئيسي للظواهر السالبة في المجتع..
واستمراره هو أس المشكلة..

التغيير هو الحل الامثل للخروج من دائرة الخوازيق الكثيرة التي أدخلنا فيها هذا النظام البائس..

تحياتي

Quote: التغيير هو الحل الامثل للخروج من دائرة الخوازيق الكثيرة التي أدخلنا فيها هذا النظام البائس..

الجوع الجوع والفقر يا نجاة............
بطريقتك دى بتخلى الكيزان يفكروا فى وضع
شروط للتسول ووضع جبايات ورسوم بكان
لكل متسول ومتشرد....
ياخ ديل كانوا مفكرين يعملوا رسوم للمقابر..



نجاة وصلتى..هناك ولا لا....شايفو داقى جرس هههههههههه

سلام يا نجاة
وتحياتي
انا اشتغلت مع الشماسة فترة طويلة
ومعاي ام سهى زميلة البورد
التقليد ده كان عند الشماسة
عندهم ما يعرف بـ "الجوكي " وهو قائد المجموعة عند ابناء شمس
الجوكي كلمتو مسموعة ومهاب جدا
وبيقسم الاولاد والبنات على مواقع محددة في السوق
عشان " يدقو كورة " ودق الكورة ده ياها الشحدة زاااته
في نهاية اليوم كلهم بيجمعو عند الجوكي وبطلعوا الحصيلة
وهو بيقوم بتقسيم العائد بعد ما يشيل نصيبوا اولا

وسلام حتى مطلع الفجر

Quote: لكن انا اكتر موضوع محيرني في قصة التسول دي .. واحد كان بتسول في احدى عيادات الخرطوم ..كنتا دائما بشوفوا في العيادة بتسول و إذا بي القاهو طالب معانا بجامعة النيلين ..سألت عنه اصدقائه المقربين عن حالته المادية لأنه الأمر حز في نفسي و حزنت عليهو - لكن المقربيين اكدوا على انه حالته المادية جيدة جداً - مع العلم ويشهد الله اني ما قلت لي اي شخص عن الموضوع..بس الموضوع ما لاقية ليهو اي نفسير!!!!!!

التفسير هو أن التسول أصبح عند البعض عمل ووظيفة ومصدر دخل
في الثمانينات أيام المجاعات الصعبة كنا نخرج للعمل مع صلاة الصبح ونعود مع صلاة العشاء وكنت أمر بالطريق وألاحظ أن أسرة تسكن في منزل من دورين ويبدو عليهم مظاهر الحياة المريحة ولكن يركبون المواصلات في الصباح الباكر إلى الخرطوم للعمل في التسول بمجرد أن تطأ أرجلهم ميدان أبوجنزير وأحياناً أقابل بعض أفراد الأسرة في العودة إلى منطقة السكن في المساء وكنت أمر بهذه الفيلا التي تضج بالحياة مواصلا طريقي إلى غرفة في وسط حوش جانبه على الطريق قد رمته الأمطار لمواصلة بقية الليل في العراء ،

أما السبب الأهم هو الإضطرار ( ويسمى التسول لدى بعض الشعوب بالطرار ويقصد بها الإضطرار)
فقد ذكر أحد أعضاء المنبر أنه شاهد أحد أعيان البلد قد عاد للمكتب وهو يبكي وسأله لماذا يبكي قال له أنه وفي طريقه إلى المكتب من ناحية شارع الجامعة شاهد أحد الأشخاص كان من الضباط العظام وهو يشحد في الطريق ...وأن هذا الشخص لا يمكن أن يقوم بذلك لولا أهتز جبل التوباز....

كذلك ذكر أحد أعضاء المنبر أن أحد أفراد أسرته من كبار السن قد ذكر له أنه شاهد منظر أهتزت له أركان جسمه وما كان يحسب أن يطول به العمر ليرى مثله وتمنى أنه قد رحل قبل مشاهدته، قال له أنه عندما كان يمر باكرا بسوق أمدرمان شاهد زميل له بروفسيور ومدرس جامعي مخضرم ينام متشرداً في إحدى البرندات وحالته تدل على أنه قد وصل مرحلة نهائية من التشرد والهلاك ولهول ذلك المنظر لم يستطع التحرك في موقعه لوهلة ووقف مشدوعاً وعاد قافلا تاركا لمشواره وشغلت فكره هذه الحادثة...ما هو السبب الذي بموجبه تغير حال هذا الأستاذالجامعي ...

أصبح التسول والتشرد حالة قريبة ومحتملة الحدوث لمن هم في مستويات كان يعتقد أنها في مأمن وحصن حصين وكل ذلك الواقع قابل للدراسة والتمحيص.

ما تم ذكره عن الطالب الجامعي هنا يضاف لمثل هذه الملاحظات.

Quote: * حيتما كنت في السودان بين نوفمير الماضي ويناير كنت قد استمعت الى حوار في الاذاعة مع وزيرة الرعاية الاجتماعية بولاية الخرطوم وقد ذكرت حقائق في غاية الخطورة عن هذه الحكاية ولكن الذي اتذكره بالكاد انهم قبضوا على هذه العصابة التي تشغل هؤلاء الاطفال، تجلبهم في الصباح وتجمعهم في الليل وينامون في مكان لا يمكن ان بتحمل العدد الذي يضعهم فيه .. وان لم تكن ذاكرتي خربة أن افراد العصابة من دولة افريقية ...

+


سلام يا القلب النابض، أنا ما بتفق معاك ان أفراد العصابة من دولة افريقية دى،

دا بزنس ميد ان سودان ،والدليل انا قلت حتى بوليس مكافحة التسول ما بعمل كشة للاطفال ديل تحديدا فى ميدان جاكسون، دا بخلينى اسأل ليه؟؟؟؟؟؟؟؟؟؟؟؟؟؟؟؟؟؟؟؟؟؟

الا فى حالة البوليس يكون أفريقى برضو دى محتملة،،

يا عزيزتى حوار مع وزيرة التربية من نوفمبر الماضى وبتقول قبضوا على العصابة الافريقية واين الان وزيرة التربية من الاطفال الموجدين فى كل مكان وخاصة موضوع ميدان جاكسون لانو دا الوحيد الانا سمعت عن ترحيل الاطفال بواسطة دفار ،،

والله انا بتمنى أنو وزيرة التربية تجى بنفسها وتشوف اطفال فى عمر ثلاثة سنوات قاعدين صف وماعارفين بعملوا فى شنو غير المصيبة الخاتنها ليهوم قدامهم دى مرة يدفق الفكة الفيها ومرة يجرى يخليها ،،المشهد دا انا شفتوا باأم عينى

برضو ربنا يكضب الشينة

Quote: وزارات الشؤون الاجتماعية المتعاقبة لم تفلح في حل هذه المشكلات مهم ابدا لم يكونوا عمل مؤسسي يحاصر هذه الظاهرة..حتى اينعت وصارت بزنس

سلام يا دكتورة نجاة، الوزارات للشؤون الاجتماعية لم ولن تفلح فى الحل،لكن الظاهرة موضوع البوست اخطر من تصورنا

لان الفئة اطفال فى عمر ثلاثة سنة والله ،دى حاجة جديدة فى السودان وكل يوم عندنا طفرة مابتحصل الا فى السودان،


بس قولوا يا لطيف من الجاى

Quote: الظاهرة دي لفتت انتباه الكثير ..بتذكر لمن كنا طلبة في جامعة النيلين كان لدينا بعض الزملاء من كلية الإجتماع عملوا دراسة عن الظاهرة و من بعض النتائج الوصلوا ليها انه المتسوليين منظميين بطريقة ملفتة فوجدوا مثلاً المجموعة البتتسول في السوق العربي في منطقة معينة

الاخت سناء سلام ،الظاهرة دى لفتت انتباه الكثيرين ما عدا القايمين بالامر ودى الحاجة الغريبة،

المتسولين منظمين دا موضوع واستعمالهم للكسب الحرام دا موضوع البوست،

موضوع اليوم عاوز ليهو دراسة جديدة وح تكون فريدة فى نوعه لان الضحايا ما ممكن تاخد منهم اى معلومة لصغر سنهم ودا بيت القصيد،،

Quote: انعدام التكافل الاجتماعي واهمال جوانب كثيرة في المجتمع يسوده الفقر , الجهل والمرض سيكون الناتج انهيار كامل للبلد.. نظام الفساد القائم هو المسبب الرئيسي للظواهر السالبة في المجتع.. واستمراره هو أس المشكلة.. التغيير هو الحل الامثل للخروج من دائرة الخوازيق الكثيرة التي أدخلنا فيها هذا النظام البائس..

تسلم يا عبد العزيز دا كلام تمام وياريت قبل ما كلنا نكون عديمى اخلاق او متسولين.

Quote: عندهم ما يعرف بـ "الجوكي " وهو قائد المجموعة عند ابناء شمس الجوكي كلمتو مسموعة ومهاب جدا وبيقسم الاولاد والبنات على مواقع محددة في السوق

سلام يا ود العبيد،،
دا ماجوكى دا موضوع غير ذلك،

الجوكى دا واحد من الشحاذين وهو المنظم ودى قديمة لكن الظاهرة موضوع البوست ترحيل ودفار ومنزل وسواق بنزل الشفع ديل
ويجى يشيلهم انصاص الليالى ،،يعنى الاطفال ديل ممكن يكون بتحصل ليهم حاجات تانية غير استعمالهم للشحذة وبس ،تسلم

Quote: التفسير هو أن التسول أصبح عند البعض عمل ووظيفة ومصدر دخل في الثمانينات أيام المجاعات الصعبة كنا نخرج للعمل مع صلاة الصبح ونعود مع صلاة العشاء وكنت أمر بالطريق وألاحظ أن أسرة تسكن في منزل من دورين ويبدو عليهم مظاهر الحياة المريحة ولكن يركبون المواصلات في الصباح الباكر إلى الخرطوم للعمل في التسول بمجرد أن تطأ أرجلهم ميدان أبوجنزير وأحياناً أقابل بعض أفراد الأسرة في العودة إلى منطقة السكن في المساء وكنت أمر بهذه الفيلا التي تضج بالحياة مواصلا طريقي إلى غرفة في وسط حوش جانبه على الطريق قد رمته الأمطار لمواصلة بقية الليل في العراء ،

سلام يا المسافر ،،التسول كا وظيفة دا موضوع قديم،موضوع اليوم استعمال الاطفال كا مصدر دخل لاشخاص لا ينتمون اليهم لذلك ممكن الاطفال ديل يكونوا ضحايا لاشياء اخرى غير التسول،،

بس قول يالطيف

Quote: حياة «أطفال الشوارع» في الخرطوم.. سرقة وتسول وشم صمغ وهروب دائم من ملاحقات الشرطة 35 ألف طفل اختاروا التشرد في العاصمة السودانية بسبب الفقر والإيدز.. وأخيرا دارفور الخرطوم: إيميلي واكس مع ترديد أذان صلاة الفجر في أحياء المدينة، استيقظ أحمد عبد الرحمن، 14 سنة، من نومه وسط بقايا ورق وكرتون يستخدمها كفراش للنوم داخل واحد من مجاري تصريف المياه. قبل الانطلاق إيذانا ببداية يوم جديد تبادل احمد وخمسة من رفاقه شم قطعة مبللة بالصمغ، وهي ظاهرة واسعة الانتشار وسط الأطفال المشردين، الذين يطلق عليهم أيضا أطفال الشوارع. شق أحمد ومجموعته طريقهم عبر أرض منحدرة صوب خطوط سكك حديدية يبدو عليها القِدم قبل أن يدخلوا منتصف مدينة الخرطوم الذي تميزه الاختناقات المرورية المستمرة. أحمد، الذي يعرف بين رفاقه بلقب «الفأر»، واحد من حوالي 35000 مشرد يعيشون ويعملون في شوارع الخرطوم. بعض هؤلاء، مثل أحمد، وصلوا الى الخرطوم قبل اقل من عام هربا من النزاع في إقليم دارفور، إلا أن معظمهم إما جاءوا الى الخرطوم هربا من الفقر الذي ضرب مناطق الريف السوداني أو أجبروا على العيش والعمل في شوارع العاصمة لدعم أسرهم، أو فقد الوالدين نتيجة مرض نقص المناعة المكتسبة (الإيدز). وطبقا لدراسات أجراها صندوق رعاية الطفولة التابع للأمم المتحدة (اليونيسيف) ومنظمة Save the Children، فان هؤلاء يشكلون جزءا من ظاهرة تشرد الأطفال على نحو متزايد وغير مسبوق في مدن القارة الأفريقية. ولم تصدر إحصائيات دقيقة بعد للعدد الكلي للأطفال والصبية المشردين في شوارع مدن وعواصم هذه الدول، إلا أن عددهم قدر في بعض الدراسات بحوالي المليون. النظم الاجتماعية التقليدية ذات الصلة بالأسرة الممتدة كانت من السمات المميزة لمجتمعات الدول الأفريقية التي تحرص على إيواء ورعاية أطفالها حتى في ظروف الفقر والعوز، إلا أن السنوات الـ25 السابقة شهدت عددا من المشاكل من بينها الجفاف والحروب ومرض الإيدز والانهيار الاقتصادي، وهي عوامل أدت الى تفكك الأسر واضطرار مئات الآلاف من الأطفال للعيش كمشردين بلا مأوى أو أسر توفر لهم الرعاية. وورد في تقرير لمنظمة بريطانية تعنى بدراسة ظاهرة تشرد الأطفال أن هذه المشكلة باتت أكثر وضوحا خلال عقد الثمانينات من القرن الماضي عندما انهارت أسعار البن وتراجعت صادرات محاصيل القمح والقطن. وكثير من الأطفال في الأسر التي تقطن مناطق الريف على وجه الخصوص وجدوا أنفسهم أمام واحد من خيارين، إما الالتحاق بعمل يساعد في توفير جزء من الاحتياجات المعيشية للأسرة، أو مغادرة منزل الأسرة التي لم تعد قادرة على توفير لقمة العيش لأطفالها.

انا الفاقع مرارتى الناس البشحدوا فى الاشارات ديل معظمهم اجانب والحكايه ماشه زايده و المحليات ضاربه طناش
يعنى شغل المحليات بقي عذاب البشريه بالجبايات وبس

يا اخي ده حصل لي انا شخصياو الله العظيم
مرة و انا ماشي البيت نزلت لسبب ما في السوق الشعبي
ماشي بكل هدؤ فجاء نادي علي واحد جالس في المظلة الجنب طلمبة ( ما عارف اسمها) تقاطع شارع الصحافة ظلط السوق الشعبي بيوت البنك العقاري.
الكلام ده قبل ما باب جامعة السودان يكون في المكان ده يعني تجمع مافي
انا واقف زي ما قلتا للمواصلات نادي علي شخص باسمي
عاينت قدرما عاينت ما لقيت غير شخص بملابس مهترية جالس في المظلة
التفتا نفس الشخص نادي علي
اللهم اجعله خير
مشيت عليه
الشخص الفي المظلة حالته صعبه و ما ممكت اقول مشترد او غير
لقيته احد اصدقائي و كان دفعة قبلنا بي جامعة الخرطوم
ذهلت سلمت عليه و انفجرتا بكاء
بكت بدون ما أحس
و الله الزول ده خجل هو لي و الظاهر انسحب
دخلتا انا في هيستريا عديل.
فتشتا ليهو لقيتو
قلتا ليه تمشي معاي البيت
اعتذر قال لي دي حالة زول يمشي معاك البيت
اصر و انسحب
و الله عشت كم يوم في حالة صعبة
فتشتا لي احد زملاؤنا المشتركين علشان اعرف الحاصل
بكي الزميل و الصديق المشترك
و الان سالت دمعة
لك الله يا صديقي
و لله في عبيده شئون

سلام يانجاة .....

فى بداية التسيعينات ..المخرج محمد نعيم سعد اخرج مسلسل يتناول قضايا التشرد والتسول اسمو(الاقدام الحافية )
المسلسل كان جرئ جدا وتعرض للكثير من المسكوت عنه فى هذا الجانب... اعتقد بعد عرض ثلاث او اربعة حلقات...
المسلسل صار حديث الشارع ..هل تعلمى تم ايقاف بث هذه المسلسل من قبل السلطات ؟؟
والسبب كان انو الظاهرة دى غير موجود بالسودان ودى كلو مجرد خيال من الكتاب واجتهاد للمخرج .....
دى الطريقة البتعالج بيها القضايا عندنا ...يعنى بدل ما يبنتظرو ويشاهدو المسلسل ويبدو فى دراسة الظواهر السالبة ووضع الحلول المناسبة ليها يقول ليك لا..
وينكروها حمرة عين ومن غير مبرارات موضوعية غير الغتغتة ودفن الرؤؤس فى الرمال ..ويقول ليك الكلام دا ما حاصل ...
يعنى لو مشيتى وتعبتى وفتشتى يانجاة ماحتطلعى باى نتيجة ..
لانو دا عمل دولة وشغل وزارات بياخدو عليهو رواتب واحوافز وبدلات ,,,,
برضو بتم فيهو مساومات وتسويات بين الوزراء والوزارت المختلفة ..
مصلحة الوطن والمواطن تاتى فى اخر السلم .......

الاعزاء جميعا ح اجيكم صادة اخر اليوم البيت بيتكم والموضوع ظاهرة خطيرة والضحايا اطفالنا ،،

التسول مشكلة اجتماعية قديمة قدم الوجود وهي آخذة بالازدياد مع انتشار حالات البطالة والفقر والتشرد في البلد وما يعانيه إنسانها من ضعف في المردود التعليمي الذي أصبح للصفوة دون سواهم عدا عن الحروب والتطاحن بين ظهرانينا والسنة السيئة التي سنتها الإنقاذ ممثلة في قانون الصالح العام هذا الوباء الذي زاد الطين بله بالإضافة إلى أن الكثير من البلدان المجاورة للسودان تعاني نفس معاناتنا وتمر بظروف ربما أسوأ من ظروفنا.
زمان الواحد بشيل إبريقو وعكازو ويحوم من بيت لي بيت يدقدق في الأبواب أو ينادي متسلحاً بثياب رثة تمثل واقعه وعاهة حقيقية وغير مصطنعة ربما خلفها مرض منفر كالبرص أو الجزام ، وغالباً ما كانت حاجة هذا المتسول لا تتعدي قوت يومه أو حتى وجبته فما أن يتحصل عليها حتى يزهد في سؤال الناس ، وكانت نظرة المجتمع للمتسول أنه إنسان يحتاج للمساعدة ربما غير أنها كانت تري في أن هناك خللا في محيطه الأسري فلا يعقل أن تتك عمك أو خالتك أو حبوبتك تتسول لتأكل. المهم زادت كميات المتسولين والمحتاجين وكان لا بد أن تظهر طائفة إن شئت سمها المستهبلين أو ربما المجرمين فدخل المجال نسوة وأطفال وأصبح الأمر أكثر تنظيماً فإختيار المسرح مهم وإختيار شخوص الموضع أكثر أهمية خاصة وأن هذه الننشاط أصبح يدر دخلا جيداً للمنظمين له ويبقي الفتات للأدوت ممثلة في شخصيات المسرح من الشحاذين والمتسولين فهم يكفيهم الأكل والشرب والمسكن وكل الأرباح تذهب للذي يدير هذه الجريمة.
حتى في دول الخليج الغنية تطل هذه الظاهرة خاصة وأن تلك الدول تضم الكثير من الجنسيات وبخاصة الأسيوية التي تمارس هذه المهنة وتدر لها دخلا جيدا.
الظاهرة عندنا يمكن تقسيمها إلي شحادين زمان أب سبحه وكفتيره وعصايه ودا أكيد واحد محتاج وإفراز طبيعي لظلم الإنسان لأخيه الإنسان خاصة في القسمة الضيزي لثروات البلاد وأن مثل هؤلاء عادة ما يأتون من الأقاليم للمدن الكبيرة. أيضاً الأطفال الشماشه واللقطاء الذي أفرزتهم الحروب والمجاعات والفقر فهؤلاء يمكن أن يكونوا أناس عاملين في المجتمع لو أحسن المجتمع التعامل معهم وإستغلالهم وتأهيلهم وتوجيههم فهم ضحية وهم إفراز طبيعي لأحداث وظروف لا ناقة لهم فيها ولا جمل.
ثم يأتي إلى المسرح الذي يطلب حق الدواء أو المواصلات أو أى مبلغ عجز عن الوفاء به وإن كانت هيئه لا توحي بأنه متسول ومحتاج وهنا يكون من يقف أمامك إما صادقاً فيما يقول أو محترفاً للتسول.
وهناك فئة تمثل اخوتنا في دول الجوار الذين ضاقت عليهم الأرض بما رحبت وتقطعت بهم السبل.
أخير وليس آخراً تأتي الفئة التي تطرق لها المقال ممثلة في عصابات منظمة تقوم بتوزيع المتسولين على نقاط معينة تراقبهم عن كثب وتحصي أنفاسهم والغلة التي يتحصلون عليها من المارة ، وهم ثلة غليظة لا رحمة لها تستطيع أن تقتل وتشوه إذا حاول أى من الصبية أو النسوة التلاعب في الحصيلة اليومية للتسول.

ياجماعة هذه الأشياء منظمة ومرتبة بطريقة لاتدعو للإستغراب
بل للدهشة
ولو وجدنا مثل هذه التنظيمات المرتبة جداً في الخدمة المدنية
لأصبحنا من أكثر الشعوب تطوراً في هذا المجال
اعني مجال الخدمة المدنية
فهنا توجد عصابات خلف هذا التخطيط المبرمج بعناية فائقة
وليس هؤلاء هم من يعملون على هذا النسق
فالنشالين الذين ترونهم في الخرطوم
هؤلاء لديهم تنظيم مخطط بطريقة مدروسة
يعني النشال بتاع بحري ليس من السهولة ان تجده في ام درمان
الا اذا حدثت هيكلة مع بداية السنة المالية الجديدة
او توزيع في الوظائف
أو إحالة بعض النشالين الى المعاش
اسرد هذه الواقعة حينما تعرض أحد الأصدقاء للنشل بالمهندسين
المهم لو مشيت الشرطة قيامتك قامت
عاوز ليك بلاغات وملفات وسجلات
ويقوم يمشي معاك عسكري ياكل قدر قروش المحفظة المنشولة
المهم يوجد رئيس وزعيم النشالين وهم ايضا زي المحافظين
كل منطقة ولها زعيمها
ذهبنا له وبعد اتصالات ومشاورات اتضح أن من نشل المحفظة
ليس النشال المخصص له منطقة المهندسين
بل نشال بحري !!!!
وهذه المشكلة خلقت اشكالية كبيرة في النظام !!!
وعملت ربكة ولخبطة كبيرة
واعتبروه بلغة اليوم { هكر }
المهم استدعوا النشال ليعاقبوه
ليس بالطبع لأنه نشل المحفظة 00 فهذا واجبه القومي
وانما لأنه نشل في منطقة ليست له
وقد رد لهم بانه أتى مع صديق بالمواصلات
ووجد هذا الرجل ومحفظته تكاد ترمي جيبه
وقال انها فرصة سانحة
ورغم هذا ذكر أنه بحث عن نشال المهندسين ليوبخه على انو مش شايف شغله
لكنه لم يجده
وهم يعرفون بعضهم جيداً
قال نشال المهندسين قال
المحفظة ارجعوها لنا بعد خصم الضريبة

تحياتي يا نجاة سيد أحمد ولضيوفك

بالله تعالي شوفي ديل كيف يصفهم المعتمد بالمتعجلين وهم يسلكون سلوكاً حضارياً للمطالبة بحقوقهم يعني دون تسول ما جايبه همها وبتسول الله يستر!! والمعتمد راتبه سبعة مليون وما ينتظر خمسة يوم في الشهر الجديد يعني أول بأول ومعاها عربيه لاندكروزر . وبعد دا يقول عليهم متعجلين ! خلاص لما يفوت فيهم الفوات ويتسولوا حتى يكونوا ناس رايقين!!


بحيراوي

Quote: للمرة الثانية خلال شهر مائتا خريج يتظاهرون بالفولة احتجاجاً على البطالة الخرطوم: الفولة: محمد سعيد: تظاهر نحو مائتي خريج بمدينة الفولة حاضرة القطاع الغربي لولاية جنوب كردفان امس، احتجاجا على تجاهل حكومة الولاية لمطالبهم المتمثلة في توظيف الخريجين، وذلك للمرة الثانية خلال شهر، بيد ان تظاهرة الامس انضم اليها عاطلون عن العمل من لقاوة وكاودا وبابنوسة، بحسب محتجين لـ»الصحافة». وطالب المحتجون بمعالجة الاضرار البالغة التي نجمت من مخلفات استخراج النفط بالمنطقة، وطالبوا بإنشاء مكتب تنفيذي لصندوق الخريجين اسوة بمنطقة كادوقلي عاصمة الولاية، لكن معتمد الفولة رفض التظاهر ووصف المحتجين بالمتعجلين. وحمل المحتجون، لافتات تطالب بالتوظيف ودعم مشاريع الخريجين وعدم تجزأة الحلول وارساء العدالة في توزيع الفرص، وتسخير عائدات النفط المنتج بالولاية للخدمات الصحية والتعليمية، وجابوا شوارع الفولة وانتظموا في وقفة احتجاجية صامتة لمدة ساعة وحذروا من تجاهل قضاياهم، وقالوا ان الصمت لن يستمر للابد وان اساليبهم ستتطور حال استمرار ازمتهم على حد تعبيرهم. وفي هذه الاثناء وصف معتمد محلية الفولة ناصر علي في تصريح لـ»الصحافة» الاحتجاجات بغير المقبولة والمبررة، وكشف عن وضع خطة من قبل حكومة الولاية لاعلان وظائف للخدمة العامة وسيتم اختيار الخريجين وفقا لاحرازهم المؤهل المناسب في امتحانات ستعدها احدى الجامعات، بجانب الاستيعاب في شركات النفط العاملة بالولاية في شهر يونيو القادم، مؤكدا ان الخريجين لديهم زمام المبادرة للتقدم بمشاريع ستطرح في زيارة امين عام صندوق تشغيل الخريجين قرشي بخاري في التاسع من ابريل الجاري للفولة، واعتبر مزاعم المحتجين مجافية للمنطق والحقيقة. وقال المعتمد ان قضية الخريجين تعدت المحلية الى اهتمام المركز بنفس الشأن وزاد «ليس هناك تهميش لقضايا الخريجين بالقطاع الغربي ولكن خريجي الفولة «مستعجلين» للقفز فوق النتائج المأمولة مباشرة دون وضع اعتبار لترتيبات حكومة الولاية». واعتبر المتحدث الرسمي باسم رابطة الخريجين، الدخري عيسى، الوعود التي اطلقتها حكومة الولاية تجاه الخريجين زائفة ومسكنة لا تحمل حلولا حقيقية للازمة، لافتا الى ان الامين العام لصندوق تشغيل الخريجين تجاهل زيارة منطقة الفولة بعد انتظامهم في دورات تدريبية تمهيدا لاستيعابهم بمشاريع تمويل الخريجين. وقال عيسى لـ»الصحافة» ان التظاهرة جابت شوارع الفولة واختتمت بوقفة احتجاجية صامتة لايصال رسالة للسلطات بأن قضاياهم يجب ان تجد حظها من النقاش، وكشف عن خريجين من مناطق اخرى مثل لقاوة وكاودا وبابنوسة انضموا للمحتجين، مؤكدا ان الشرطة لم تتعرض للمتظاهرين. وحذر من ان صبرهم حيال وعود التوظيف بدأ ينفد في ظل اوضاع قاسية يعيشها الخريجون، وقال ان المسيرات الصامتة ستتحول الى مسيرات ذات طابع غير مقبول حال تجاهل قضاياهم. [/B

سلامات يانجاة
وشكرآ على الجرس ولفت الإنتباه لهذه الظاهرة الغريبة بالجد!!!

أين عضو المنبر الصحفي القدير الأستاذ الطاهر ساتي من هذا
الموضوع الشائك المحزن، والذي يحتاج لتقصي ومتابعة وسبر غور؟!

ليت الأستاذ رأى هذا البوست وإطلع عليه ...

مع التحية له ولك ولكل المتداخلين الكرام

السلام عليكم ورحمة الله
فعلا ظاهرة غريبة إن وقعت بهذا الشكل
لكن الخطير فعلا هو تصدي البورداب -بمجرد طقطقة لوحات المفاتيح-وتبرعهم
لتحديد الأسباب التي تقف خلف هذه الظاهرة
أو غيرها من الظواهر !

Quote: ومن هو صاحب الدفار البجيب الاطفال ديل الصبح ويشيلهم اخر اليوم؟؟؟؟ مايجى واحد يقول لى دا ترحيل جماعى تابع ل .........

احتمال كبير اتخيلي ...وكمان احتمال فيها شبهه فساد ..

الله كريم عليهم ...

التحيه لكم جميعا
التسول ثلاثه انواع
محتاج
تاجر
مريض
يوجد بعض الناس التسول عندهم مرض وراثى ، اعرف رجل كان محاسب بمركز النورى بمكه المكرمه وله راتب محترم جدا (7000ريال) الا انه يمارس التسول و المصيبه يصطحب معه زوجته وحكى لى صاحب بقاله سودانى بمكه المكرمه ان اسرته الكبيره تحضر الى مكه خصيصا فى موسم الحج و العمره لممارسه هذه المهنه و القصه الثانيه كنت بموقف البيجو بالزقازيق جمهوريه مصر العربيه وتصادف رجل عجوز وكذلك امرأه عجوز وقد حصل بينهم نقاش فكل منهم افشى سر الاخر فالرجل له ثلاث عماير مستأجره و العجوزه لها اربعه ابناء اطباء متخصصين وخارج مصر ،
نسأل الله الخير الوافر للسودان وان لا نرى عوز او فاقه وان لا تمتد يد شعبه الا للسلام و النفوس طيبه

Quote: يوجد بعض الناس التسول عندهم مرض وراثى

دي وجهة نظر بس أم حقيقة علمية معروفة لدى المختصين ؟

Quote: ولم تصدر إحصائيات دقيقة بعد للعدد الكلي للأطفال والصبية المشردين في شوارع مدن وعواصم هذه الدول، إلا أن عددهم قدر في بعض الدراسات بحوالي المليون

سلام يا ود الصايم،،

ديل ما متشردين ديل ضحايا للجماعة ظالمين استعملوهم لجمع مال واشياء اخرى،يعنى استغلوا البراءة بتاعتهم.

بعدين الموضوع دا فرق كبير من المتشردين الاختاروا التشرد للظروف المذكورة فى مداخلتك يا معاوية،


لكن موضوعى دا عندوا ابعاد اخرى لو ما اتلحق واتعرف منو الذى من خلف هؤلاء،

Quote: انا الفاقع مرارتى الناس البشحدوا فى الاشارات ديل معظمهم اجانب والحكايه ماشه زايده و المحليات ضاربه طناش يعنى شغل المحليات بقي عذاب البشريه بالجبايات وبس

سلام اخى محمد سيد ياريت لو الجماعة ديل وقفوا على حيلهم وشحدوا فى اشارات المرور،، ديل عمر 3 سنوات يعنى احتمال مايعرف القروش دى لشنو.تسلم

Quote: الشخص الفي المظلة حالته صعبه و ما ممكت اقول مشترد او غير لقيته احد اصدقائي و كان دفعة قبلنا بي جامعة الخرطوم ذهلت سلمت عليه و انفجرتا بكاء

سلام اخى دمدم،

دى بقت ظاهرة مزعجة ومحزنة والله يكون فى العون، تسلم وشكرآ للمرور

(دي وجهة نظر بس أم حقيقة علمية معروفة لدى المختصين ؟)

تحياتى
وذكرت الشئ فقط عن مشاهدات لعده حالات وروايات عن اسلافهم لهم نفس الممارسه
وعند المختصين الخبر اليقين

Quote: وينكروها حمرة عين ومن غير مبرارات موضوعية غير الغتغتة ودفن الرؤؤس فى الرمال ..ويقول ليك الكلام دا ما حاصل ... يعنى لو مشيتى وتعبتى وفتشتى يانجاة ماحتطلعى باى نتيجة .. لانو دا عمل دولة وشغل وزارات بياخدو عليهو رواتب واحوافز وبدلات ,,,, برضو بتم فيهو مساومات وتسويات بين الوزراء والوزارت المختلفة .. مصلحة الوطن والمواطن تاتى فى اخر السلم .......

سلام يا اميرة للمرور، كلامك عين الحقيقة بس لكن نقعد نعاين لو الدولة رفعت يدها وشكيناها لى الله من الطفولة الضائعة والامراض المتفشية من ايدز وسرطانات بسبب الجهل وعدم الاهتمام بالصحة،،

وزارات شنو رعاية اجتماعية ومعاها مكافحة التسول،، هو لو فى رعاية اجتماعية كان بكون فى مكافحة تسول ولا اطفال مجدعين فى الشوارع ياخى فى قرف اكتر من كدا،

تسلمى يا غالية

Quote: أخير وليس آخراً تأتي الفئة التي تطرق لها المقال ممثلة في عصابات منظمة تقوم بتوزيع المتسولين على نقاط معينة تراقبهم عن كثب وتحصي أنفاسهم والغلة التي يتحصلون عليها من المارة ، وهم ثلة غليظة لا رحمة لها تستطيع أن تقتل وتشوه إذا حاول أى من الصبية أو النسوة التلاعب في الحصيلة اليومية للتسول.

والله الاخيرة دى موضوع نقاشنا اخى مولة،

عاوزين الوزارات المختصة والدولة بدل ما تعين جماعة لمكافحة المتسولين تقبض العصابات دى ودا مطلب مهم وجاد.

Quote: ياجماعة هذه الأشياء منظمة ومرتبة بطريقة لاتدعو للإستغراب بل للدهشة ولو وجدنا مثل هذه التنظيمات المرتبة جداً في الخدمة المدنية لأصبحنا من أكثر الشعوب تطوراً في هذا المجال اعني مجال الخدمة المدنية

سلام اخى أبو حراز،،

والله اول مرة أعرف انها أشياء منظمة ومرتبة كمان ،

يعنى الموضوع سهل كدا ،،بعدين الاطفال ديل غير المتشردين ديل اطفال صغار منظمين ومرصوصين بفعل فاعل وين امهاتهم؟

ياخى ديل بتبولوا فى ملابسهم أمام المارة وانا شاهدت ذلك ،،يعنى فى فرق بين المواضيع الكتبت عن المتشردين أو الشحاذين من الاطفال لكن دى ظاهرة لازم تتعرف ليه ومنو وراء هؤلاء الزقب الموجودين فى ميدان جاكسون

Quote: سلامات يانجاة وشكرآ على الجرس ولفت الإنتباه لهذه الظاهرة الغريبة بالجد!!! أين عضو المنبر الصحفي القدير الأستاذ الطاهر ساتي من هذا الموضوع الشائك المحزن، والذي يحتاج لتقصي ومتابعة وسبر غور؟! ليت الأستاذ رأى هذا البوست وإطلع عليه ... مع التحية له ولك ولكل المتداخلين الكرام

سلام يا بت الزين،،

وشكرآ للكلام المفيد ونحن فى انتظار اى متابعة وحلول للموضوع دا،

والله ما قدرتة التقط صورة لطفلة منهم فى الصباح الباكر عترت تحت اقدامى وهى تجلس ببراءة الاطفال وعلى رأسها حجاب لا أدرى من البرد ام استدرار لعطف المسلمين وهى دون الرابعة عمرآ ومن وضع هذا الغطاء على رأسها له هدف دنئى لجمع مزيد من المال واستدرار لعطف المارة فى هذا الميدان المكتظ بالبشر طول اليوم،،

تسلمى

Quote: السلام عليكم ورحمة الله فعلا ظاهرة غريبة إن وقعت بهذا الشكل لكن الخطير فعلا هو تصدي البورداب -بمجرد طقطقة لوحات المفاتيح-وتبرعهم لتحديد الأسباب التي تقف خلف هذه الظاهرة أو غيرها من الظواهر !

مشكور اخى محمد للمرور والاضافة

Quote: تحياتي يا نجاة سيد أحمد ولضيوفك بالله تعالي شوفي ديل كيف يصفهم المعتمد بالمتعجلين وهم يسلكون سلوكاً حضارياً للمطالبة بحقوقهم يعني دون تسول ما جايبه همها وبتسول الله يستر!! والمعتمد راتبه سبعة مليون وما ينتظر خمسة يوم في الشهر الجديد يعني أول بأول ومعاها عربيه لاندكروزر . وبعد دا يقول عليهم متعجلين ! خلاص لما يفوت فيهم الفوات ويتسولوا حتى يكونوا ناس رايقين!! بحيراوي

تسلم اخى البحراوى، اصلها خربانة من كباره ح يمشوا وين يوم الحساب .

Quote: تحياتي يا نجاة سيد أحمد ولضيوفك بالله تعالي شوفي ديل كيف يصفهم المعتمد بالمتعجلين وهم يسلكون سلوكاً حضارياً للمطالبة بحقوقهم يعني دون تسول ما جايبه همها وبتسول الله يستر!! والمعتمد راتبه سبعة مليون وما ينتظر خمسة يوم في الشهر الجديد يعني أول بأول ومعاها عربيه لاندكروزر . وبعد دا يقول عليهم متعجلين ! خلاص لما يفوت فيهم الفوات ويتسولوا حتى يكونوا ناس رايقين!! بحيراوي

تسلم اخى البحراوى، اصلها خربانة من كباره ح يمشوا وين يوم الحساب .

Quote: احتمال كبير اتخيلي ...وكمان احتمال فيها شبهه فساد .. الله كريم عليهم ...

تسلم اخى احمد محمد للمرور والتعليق،

الأخ موسي الراجل
تحياتي
أنت كتبت:

Quote: التسول ثلاثه انواع محتاج تاجر مريض يوجد بعض الناس التسول عندهم مرض وراثى. ----------------------- موسي الراجل

فسألتك :

Quote: دي وجهة نظر بس أم حقيقة علمية معروفة لدى المختصين ؟

فكان ردك :

Quote: وذكرت الشئ فقط عن مشاهدات لعده حالات وروايات عن اسلافهم لهم نفس الممارسه وعند المختصين الخبر اليقين

ما فهمت ردك بصراحة !
يعني هل هي مجرد وجهة نظر أم معلومة طبية
؟؟؟؟؟؟؟؟؟؟؟؟؟

Quote: التحيه لكم جميعا التسول ثلاثه انواع محتاج تاجر مريض

سلام اخى محمد ،،موضوعنا ليس التسول فى حد ذاتو ،،دى ظاهرة بتاعة استقطاب اطفال اعمارهم دون الرابعة واستعمالهم لجلب المال ودى اخطر من التسول بكتير،،


تسلم يا اخى موسى الراجل ومشكور للاضافة

Quote: الخرطوم: حسام بدوى تحقق المباحث الجنائية بالخرطوم مع سيدة باعت ثلاثة من اطفالها الستة لاثريا مقابل مبالغ مالية متفاوته لسد احتياجات بقية ابنائها وتمت (البيعة) بحسب مصادر مطلعة بموافقة زوجها. وعلمت (حكايات) من مصدر موثوق امس ان السيدة تم توقيفهاالاسبوع الماضى ضمن المتهمين بخطف الطفلة (ملاذ) من ضاحية الكلاكلة لتقر اثناء التحرى معها ببيع اطفالها الثلاثة. وكشفت خلال التحريات معها ان زوجها متقدم فى السن ومن اصحاب الدخل اليومى (رزق اليوم باليوم) وغير قادر على العمل ما دفعها للاتفاق على بيع ثلاثة من ابنائها لاثريا لتوفير مال يسد رمق بقية افراد االسرة.وقالت السيدة فى التحريات ان زوجها وافق على الفكرة وتم تفيذها واشارت بعد ذلك للمنازل التى تأوى الاطفال المباعين. وعثرت على الاطفال داخله قبل استعادتهم. و وجهت النيابة للام عدة تهم وحبستها مع متهمات اخريات رهن التحقيق.

ماعارفة ذى الموضوع دا فيهو حاجة مشتركة مع البوست بتاعى دا ،،


يعنى اطفال غير امهات بيع او اجار كلوا جايز،،


موضوع البوست بتاعى ممكن ايجار الاطفال لصاحب الدفار والامهات بقبضوا القروش+ الام موضوع بوست الاخ محمد المختار بيع عديل كدا،


ديل مواضيع ممكن تودى الحكومة فى ستين الف داهية عشان عندها وزارات بتصرف عليها دم قلبتا وما عاملين حاجة ،،

Quote: تسلم يا عبد العزيز دا كلام تمام وياريت قبل ما كلنا نكون عديمى اخلاق او متسولين.

العزيزة/ نجاة سيداحمد

سلام

هنالك واجب للسلطة والمسؤولين في البلد لابد للقيام به في البحث وراء أسباب الظاهرة وليس معالجة الظاهرة..
الغوث في منبع المشكلة هو طريق الحل الامثل لها..

بلد فيها ديوان للزكاة وبلغ عمره عقودا من الزمن.. فمن المفترض أن تكون له عين فاحصة في المجتمع وتحسس الثغرات من خلال أناس ذوي كفاءة وأخلاق ويعملون وفق حوجة المواطن فقط المواطن المحتاج بغض النظر عن انتمائه الجهوي, العرقي او الديني..
نتطلع لليوم الذي تكون في الدولة لها ضمير المسؤولية الاخلاقية تجاه شرائح المجتمع الفقيرة المحتاجة بتقديم المشاريع الصغيرة والمهن التي تخلق من المحتاج عضو فاعل في المجتمع..


تحياتي

Quote: نتطلع لليوم الذي تكون في الدولة لها ضمير المسؤولية الاخلاقية تجاه شرائح المجتمع الفقيرة المحتاجة بتقديم المشاريع الصغيرة والمهن التي تخلق من المحتاج عضو فاعل في المجتمع..

أوعدنا يارب باليوم دا،

فقدنا الثقة فى كل شئى ممكن يكون ذى كلامك الفوق دا يا عبد العزيز،

دولة فيها بترول ما عملت الحاجات الفوق دى، بس قطعت السودان وقعدنا نتلفت والحال ياهو الحال،












ن

عزيزتنا بت الشيخ
سلامات
في جارتنا المكسيك التسول منظم جدا .
المتسول هناك زول ظريف ويتحدث اسباني انجليزي فرنسي عربي .
متسول عارف نفسو بعمل في شنو .
بس في بلدنا أمريكا التسول انتهي زمان بدري . القصة اصبحت بالمسدسات
يعني تاكل نار معناتو تاكل نار .
ناس ميدان جاكسون ناس مساكين ومحتاجين بس علاج من الحكومة المجنونة .
تحياتي

الحبيبة نجاة وكل القرآء الكرام
رجاء اقروا رواية دكتور عبد اللطيف البوني (( حلوم ))
وتشوفوا العجب العجيييييييييب
من واقع ملمووووووس
وحقائق بالأرقام
والله ود البوني ابدع ابدع ابدع ابدع حد الدهشة في تصوير الشخوص لحد الشوف والسمع
والله ما باقي ليه إلا يكتب اسماء من واقعنا النحن فيهو ده ,,,

للمعلومية الكتاب إصدار جديد عام 2008
يعني حاااااار من نارو والشخوص حايمين وسطكم هسة في زمنا وكمان محكرين في مراكز مرموقة ....!!!
يعني قطع شك يا نجاة صاحب الدفار اصغر موظف فيهم ,,,

من هنا اهنيئ الكاتب المبدع الدكتور عبد اللطيف البوني في روايته حلوم

شكرا نجاة لفتح الطاقة الحااااارة دي
لكن لابد من فتحها عشان تهوي شوية حتى لو حرقتنا بي هبوبها البتكوي الجوف ,,,

لي عوده للموضوع

يا ست البوست انتي ما بتشوفي المسنجر ولا مطنشاني؟

Quote: لي عوده للموضوع يا ست البوست انتي ما بتشوفي المسنجر ولا مطنشاني؟

والله يادانيا مامشيت عليهو قبل يومين دى كانت اول واخر مرة ،اختك برلومة وكدا الا يذكرونى ،،معليش نتلاقى هناك، تسلمى ياستى

Quote: عزيزتنا بت الشيخ سلامات في جارتنا المكسيك التسول منظم جدا . المتسول هناك زول ظريف ويتحدث اسباني انجليزي فرنسي عربي . متسول عارف نفسو بعمل في شنو . بس في بلدنا أمريكا التسول انتهي زمان بدري . القصة اصبحت بالمسدسات يعني تاكل نار معناتو تاكل نار . ناس ميدان جاكسون ناس مساكين ومحتاجين بس علاج من الحكومة المجنونة . تحياتي

شكر يا عثمان ، ناس ميدان جاكسون اطفال دون الرابعة ومشكلتهم ما عارفين هم بعملوا فى شنو؟؟ ياريت لو كان عندهم مسدسات كان الامر اختلف بالنسبة لى، تسلم وشكرآ للمرور

Quote: الحبيبة نجاة وكل القرآء الكرام رجاء اقروا رواية دكتور عبد اللطيف البوني (( حلوم )) وتشوفوا العجب العجيييييييييب من واقع ملمووووووس وحقائق بالأرقام والله ود البوني ابدع ابدع ابدع ابدع حد الدهشة في تصوير الشخوص لحد الشوف والسمع والله ما باقي ليه إلا يكتب اسماء من واقعنا النحن فيهو ده ,,,

سلامات يا شاعرتنا العظيمة بت الجنيد،

شكرآ للمعلومات القيمة عن الكتاب ،

كيف اتحصل على نسخة منو؟

والله انا مهتمة شديد بمشاكل الصغار بس عشان لاحول لهم ولا قوة عشان يدافعوا بيها عن انفسهم ودائما هم ضحايا فى كل العالم،

تسلمى وشرفتى البوست

Quote: ,اقعدي فتشي لي في الظواهر الجديده لمن الطياره تفوتك بعد داك اقوم افتش علي ابوحسين وود عمو

أبو حسين ما عايز تفتيش موجود دائماً

بعدين إنت منتظر لم الطيارة تفوتها ليه....؟؟؟؟ خير البر عاجله

صاحبة البوست سلام

.

Quote: أبو حسين ما عايز تفتيش موجود دائماً بعدين إنت منتظر لم الطيارة تفوتها ليه....؟؟؟؟ خير البر عاجله

ههههه يا ابو جبص انت معاى ولا مع الاسد،

خاب ظنى فيك يا الجعلى افو انا كنت مفتكرة ح احتمى بالجعلى كان ابن عمك تدخل وحسم الامر،،