Post: #1
Title: القرين..تراجيديا الإلتباس والتبديل ..رفع الستار عن صراع خاسر .. نص مسموع
Author: awad hassan
Date: 03-31-2011, 08:10 PM
Parent: #0
|
Post: #2
Title: Re: القرين..تراجيديا الإلتباس والتبديل ..رفع الستار عن صراع خاسر .. نص مسموع
Author: osama elkhawad
Date: 03-31-2011, 08:17 PM
Parent: #1
عزيزي عوض
سلامات
لم استطع الاستماع إلى النص.يا ترى أين المشكلة؟هل هي تتعلق بي ام بطريقة انزال النص في البوست؟
مع خالص الاحترام
|
Post: #3
Title: Re: القرين..تراجيديا الإلتباس والتبديل ..رفع الستار عن صراع خاسر .. نص مسموع
Author: awad hassan
Date: 03-31-2011, 08:22 PM
Parent: #1
القــــــــــــــــــــرين
تراجــــيديا الإلتباس والتبديل
رفع الستارعن صراع خاسر
_____________________
رقد شدر الحراز
انشّر فوق درب الخلا الضّلمان
دفق سراب في الليل
لبس جلد أم لهيب قدل حفيان
خمد شوق أم رعيد في الجوف
كتم معناهو مات شرقان
حرن هيم الصعيد سدّر
مدّ لسانو للغيمة انشحط عريان
لا ضُلك وقف طوّل
لا ريحك صدق قوّل
.............
شن معناك....
يا زولي البقيت معناك ؟؟
شن بتدور .....
من النجمة المصاقرة قفاك ؟؟
وشن بتدور...
من العينة الرَمت
ضل السحابة وراك ؟؟
............
كرفتَ دروب مسالب الغيب ؟؟
تمور وتفور؟؟
كل ما اقول معاك مستور
تلف وتدور ..
تدودر فيني زي عصفور
بقيت مأسور
علي شركك
اسك مجبور!!
شنو الجابرني غير صبري
ومطال حبلي ؟؟
تراك شيتاً
محيرني وملك امري !!
أسيبك في الكلام نايم
ألقاك في غناي حايم؟؟
لا عرفتك عزيفاً
حلّ في راسي
لا جناً ملكني وبدل احساسي؟؟
كبرت معاي يازولي
كبرت معاي يا زولي البقيت كلي؟؟؟
............
مشيت دربك
لقيتك صيِ
أكلت ثمر
غرورك ني
مليت من ريح
نفوك ايدي
............
ضل غناي
حرفي ودر
أدمنتك..
كلامي كتر
غنيتك....
لساني خدر
شنو الراجيهو
من تعبي
وخلف شِعَبي ؟؟
يا ريح السَواد هبي
نشي كلامي من قلبي
يا نار الرَماد شبي
حفي عماي من دربي
يا غيم السَجم صبي
بلي حشاي من غلبي
.............
حكايتو معاي في نومي !!
مرة سمعني في حلمي
أحكي واشكي من ظلمي!!
هزَ كتيفو لي سدّر
زمَ خشيمو واتكدّر
صرَ وجيهو واتندر
قلب عينيهو لي حدّر
ختّ حروفو في حروفي
سرح فيني...
سرحت معاهو في خوفي
نبت في دمي واتجذَر
لا ريحني من عمري الحرق قلبي
ورقد جنبي...
لا نجاني من قلبي السَرق عمري
وشرد مني.!!!
كسر في الرَوح جناح الشَوق
شهق معناي
من الحسرة مات مخنوق
دفنتو هناك ..
مع الأنات
في الدَمعة
الورا الآهات
حزنت عليهو زي ضحكي
ضحك عليهو زي حزني!!
رجعت وحيد
قلت خلاص رميتو بعيد
لقيتو معاي
في تولاي
............
كشفت غناي
لي شدراً براري صباح
ونومو خزاز
نفّ غناي
نشف حلق الشدر
مدّ شخالبو للكزاز!!
كشفت غناي لي ليلاً
شرب دمع السَراب
طرش ألغاز
نزّ غناي
من دمع السرَاب
نزف في الليل
نزيفو مجاز!!
كشفت غناي
لي ريحاً قرح
قطّع قلب السحابة رزاز
فسد الرَيح
هجر قلب السحاب
رقد منحاز!!
...........
سرقت خطاي من مرماي
شايلو معاي في معناي
...........
سريت بالليل براري التَيه
سبع وهاد .. وسبع بحور
نزلت ودي مرابع الصّي
سندتَ لساني في قلبي
كشفت غناي
للسحرة البسايسوا الرّيح
بعرفوا سر مسارب الضَي
فركوا النار علي الحجار
شالوا رماده من قلبي
قطعة لكنة من حلقي
معاها ندم وحفنة هم
جسَوا ترابة شموا خطاي
عوجوا لساني رطنوا معاي
" فيك حسرة
وعليك حسرة
ركبت دروب
سرج مقلوب
أنا(ك) نكره
وغناك نكره
شن راجيهو من بكره
وصدي الذكري ؟؟
بلا حزناً مزج معناك
سكن دمك!!
شن راجيهو من بكره
وصدي الذكري ؟؟
بلا غماً طفح في الروح
كتل معناك
لجم فمك!!
شن راجيهو من بكره
وصدي الذكري ؟؟
بلا هماً ...
غمض عينيهو
نام فرحان
سرق حلمك!!
مغرَب وين؟؟
يا مرنَق تحت
ضل الحجر في الصيف؟؟
مشنق وين معاك زولك؟؟
تزازي وراهو
دافن سرو في قولك؟؟
مشرق وين
يا راحل
فوق موجاً بلا ساحل؟؟
تبقي الحسرة والوجعة
لو حرقت مراكب الرَجعة للداخل
تبقي الحسرة والوجعة
لو حرقت مراكب الرَجعة للداخل"
______________________
عوض شيخ ادريس حسن
بعض الكلمات التي وردت في القصيدة
1- هيم: صوت المطر
2- انشحط : وقف منتصب القامة
3- المصاقرة: الملازمة
4- العينة: خاصة بفصل الخريف
5- كرفتَ: كرف تعني استنشق – يكرف اي يشم
6- تدودر: دودر الطائر- استدرجه للمصيدة
7- عزيفاً: العزيف لغة الجن
8- نفوك: غبارك
9- شِعَبي: خلف العصي أو الصلب أو الطرق المتقاطعة التي تضل السائر
10- سدّر: مد الصدر الي الامام نوع من التحدي
11- اتكدّر: ا تعكر دلالة علي الغضب
12- اتندر: تحدي
13- تولاي: دلالة علي الملازمة
14- الكزاز: كلمة كز تعني جف او تصلب
15- قرح: بمعني تعنت
16- مشنق: شنق رأسه اي نظر إلي أعلي
|
Post: #4
Title: Re: القرين..تراجيديا الإلتباس والتبديل ..رفع الستار عن صراع خاسر .. نص مسموع
Author: awad hassan
Date: 03-31-2011, 09:13 PM
Parent: #3
Quote: عزيزي عوض
سلامات
لم استطع الاستماع إلى النص.يا ترى أين المشكلة؟هل هي تتعلق بي ام بطريقة انزال النص في البوست؟
مع خالص الاحترام |
الاخ الأستاذ أسامة الخواض
تحياتي وتقديري
لست ادري اين تقع المشكلة.. حتي انا لم استطع الاستماع ..لقد اتبعت الطريقة
الصحيحة في انزال النص ..لا ادري اين الخلل ..كتبت للاخ بكري لمعالجة هذه المشكلة
اشكرك كثيرا علي الأهتمام
مع خالص الود
|
Post: #5
Title: Re: القرين..تراجيديا الإلتباس والتبديل ..رفع الستار عن صراع خاسر .. نص مسموع
Author: awad hassan
Date: 03-31-2011, 10:15 PM
Parent: #4
|
Post: #6
Title: Re: القرين..تراجيديا الإلتباس والتبديل ..رفع الستار عن صراع خاسر .. نص مسموع
Author: awad hassan
Date: 04-02-2011, 08:13 PM
Parent: #5
.
|
Post: #7
Title: Re: القرين..تراجيديا الإلتباس والتبديل ..رفع الستار عن صراع خاسر .. نص مسموع
Author: عادل نجيلة
Date: 05-24-2011, 08:19 AM
Parent: #5
up up
|
|