يــا وطــن .. مـن ويــن جِــراحــاتـك عـليـك ؟؟

من وين جراحاتك عليك ؟
يا فجعة الضل البساسق في الخرابات الضياع
وين كنت في رحم الطيوف
ساعة نبت طينك صراع ؟
وأنت في جوف الحزن والالتياع
دفقتْ همومك النازة من إبل الرحيل
الموية والهم العليك
رقراق أساك لامس جراح الناس هناك
سموكَ جُرحَ المستحيل
وقفتَ في نص الطريق مغبون أساك
ولا جرحك تاورو الهم القبيل ؟ّ!
وين مداك ؟
ما لامست رجيلك رجا
وبقيت معلق في رحيل من تال رحيل
حلمك أسى
سكات رجاك مشحونة بالبكاء والعويل
عطشان تفش لي الغيوم
جواك مشن
هزيت سراب الكان رهاب
فاضت عليك غيمةً كضب
عيداً ضهِب ، في سكتك
ما فرحك
ما هان عليو إفرحك
حندك مشاعرك بالفرح
وشق في جواك طريق
عَبِّاهو بي الحزن الوهيط
واتوسدك
من وين جراحاتك عليك
وابل العِينة الحلم
ما مر في خاطر رجاك
ما سار علي ايقاع هواك
سهّر شهاب اللهفة برقاً كان رجاك
وبقالك القشة البتكسر حاجز الشيمة الحواك
ما فاض عليك
كسّر مجادف القشة
آمال الغريق
خلاك في نص الطريق
تنده جراحاتك عليك :
(من وين جراحاتك عليك )

عروة علي موسى ،،،

Quote: من وين جراحاتك عليك ؟ يا فجعة الضل البساسق في الخرابات الضياع وين كنت في رحم الطيوف ساعة نبت طينك صراع ؟ وأنت في جوف الحزن والالتياع دفقتْ همومك النازة من إبل الرحيل الموية والهم العليك رقراق أساك لامس جراح الناس هناك سموكَ جُرحَ المستحيل وقفتَ في نص الطريق مغبون أساك ولا جرحك تاورو الهم القبيل ؟ّ! وين مداك ؟ ما لامست رجيلك رجا وبقيت معلق في رحيل من تال رحيل حلمك أسى سكات رجاك مشحونة بالبكاء والعويل عطشان تفش لي الغيوم جواك مشن هزيت سراب الكان رهاب فاضت عليك غيمةً كضب عيداً ضهِب ، في سكتك ما فرحك ما هان عليو إفرحك حندك مشاعرك بالفرح وشق في جواك طريق عَبِّاهو بي الحزن الوهيط واتوسدك من وين جراحاتك عليك وابل العِينة الحلم ما مر في خاطر رجاك ما سار علي ايقاع هواك سهّر شهاب اللهفة برقاً كان رجاك وبقالك القشة البتكسر حاجز الشيمة الحواك ما فاض عليك كسّر مجادف القشة آمال الغريق خلاك في نص الطريق تنده جراحاتك عليك : (من وين جراحاتك عليك ) عروة علي موسى ،،،

يا الله عليك يا الله عليك يا عروة
عبيت مشاعرنا حد السقف
وهط غناك جوه الحشا لامن نزف
يا مارق من بطن النيل جرف
رويت عروقنا حرف حرف

اهديك الدهشة وغناك البشبهك براك
والتحية للوطن الجريح

ما تتضارا
امرق بره
اكسر حاجز الصمت الحرا..
وكورك فينا.مليون مره.
بى الصاراهو دواخلك..
جوه... وبره
على النبره وشيل العبره
انفض غبار السمح الجوه ..
وازرع فرحك فينا وما تتضارا..
( أسماء الجنيد )

صديقة الحرف والنزف في سبيل الوطن
بتنا الغالية أسماء
سلام ومحبة
هذه الجراحات يا أختاه من كبد المعاناة
من حيث يعتصر الألم نفوس كل الشرفاء
شرفاء بلادي الذين كسروا حاجز الخوف ، وقالوا لا في وجه من قالوا نعم ..
مجرد أن يكون هذا الحراك الرافض لهذا النظام موجوداً فهذا يعني أن بارقة الأمل آخذت في الاتساع
وأن التغيير قادم لا محالة وإن طال الزمن ..
فالليل أشد مايكون حلكة عند طلوع الفجر
وساعتها ستشرق شمس الحرية ...
وسيعرف الذين خانوا الوطن أي منقلب ينقلبون ..
ممنون سيدتي على هذه النصرة الوحيدة لهذه الجراحات
فلا شك أن الجراحات من بعضها
إذن لا غرو أن تكوني هنا ...

*

همست ليك ساعة الصباح

والليل أباح

حزمة الهمس البتمرق من مسام الغيمة

شان تغسل حنينك لي الرجوع

وكتين بقت كل المسافات مسقية بي طعم الهجوع

ومشيت مسافة الهمسة الحنينا معاي

بروق وطلوع

مشيت .. همس الحنين جواي مات مصروع

بكت نجمة الصبح البي توقد في طريقا شموع

توسّع لي مدارك الهمسة في جواي

بي الشغف الحنينو دموع

إلاّ همسك لي المطر

فاتن سنينو سبوع

بان جواك مسدار الحراز مطبوع

وكان حبوبة بي نضم الحنين جواها

توري صغارا...

ليه سيف الحراز في وجه الخريف مرفوع !!

وكانت عزة النفس الوراها الجوع

صمد الحراز واقف

وطفرت سيرتو تختال من ربوع لي ربوع ...

عُروة ،،،

نهار الوقوف على مدى الوطن النازف


نهارك لا بل أوقاتك كلها الشعر
والأمنيات المحققة


عبور للنقل من موقع إلى آخر
وللتحية

دمت خالقا

عروة علي موسى

سلام والقومة ليك

اكتب ودع لنا التصفيق




----------------------------------

وصفقه ليك وقومه ليك يا صاحب..
والله عليك ياعروه.. يا حامل دفء رقيق الكلمه..

العزيز الصديق الحاج د. حاتم
سلام ومحبة
تعرف يا صاحب .. إن أشد ما يؤلم أن هذه الجراحات آخذة في الزيادة ولكن لا وجيع ..
فالبلد دنسها سفهاء القوم ..
وأصحابنا الأشد سفاهة يباركون هذا الدنس بالصمت مرة و المواراة مرات كثر ..
غير أن الأمل ما زال باقياً في شعبنا الذي أصبح بيده حق التقييم ولا بد أنه قائلها ( كلمةً ) تزيح الظلم وتكشف ضعف ساسة اليوم..
عُروة ،،،

العزيز بلة محمد الفاضل
صديق الحرف الشجي
سلمت يا حبيب .. وتحية منك مقبولة ومعناها إني على بالك ..
من هنا حتى لا نهاية لك ما شئت نقلاً وعبوراً وتحياتٍ تشبهك
دمت عارفاً بحب هذا الوطن وإنسانه الكريم
عروة ،،،

عرفة محمد سعيد
وأصدقاء الزمن الجميل ...
سلام ومحبة وشوق
وعبرك للأسرة الكريمة وحبيبنا دكتور سيف
وممنون سيدتي لهذه النصرة المنحازة
وسعيد بهذا النص الذي حرك الكفوف لتزيد من إيقاع موسيقاه
( ويا جمال النيل والخرطوم بالليل ... )
عروة ،،،

نص مطرة
سلامات يا اخي الشاعر عروة
تحية لهذه الرائعة برغم الشجن
وتحية للوطن
مودتي واحترامي

هند محمد
سلام ومحبة
وممنون سيدتي لهذه النصرة وهذا الغمام
وليت المطر القادم يكون وابلاً يكسف عنا رجز من أورثنا هذه الجراحات
ونغني معاً : ومِطرنا بيك وغسلنا إحساس الوجع
عُروة ،،،