Post: #1
Title: تبت لله ياالصادق ..!
Author: محمد عبدالرحمن
Date: 03-17-2011, 08:56 PM
*
|
Post: #2
Title: Re: تبت لله ياالصادق ..!
Author: بدر الدين الأمير
Date: 03-17-2011, 09:09 PM
Parent: #1
انت وصلت ياالمبروك
|
Post: #3
Title: Re: تبت لله ياالصادق ..!
Author: محمد عبدالرحمن
Date: 03-17-2011, 09:57 PM
Parent: #2
عندى شوق لى نيلنا
والاهل والطيبة
الجريف واللوبيا
وباقى ذكرى حبيبة
عشة الصفصاف
القايمة عاملة الزريبة
هوالمغطى القيف
فوقه روووووووعة عجيبة
|
Post: #4
Title: Re: تبت لله ياالصادق ..!
Author: محمد عبدالرحمن
Date: 03-17-2011, 09:58 PM
Parent: #3
ياسواقى بلدنا
وينو صوتك مالو
وينو قارع مويتك
غنى باسم حالــــــــــــــــو
وين غسيل النيل
و شر هدومو فى رمالو
وينو ماضى الحله
وين ومين الشالو
كان زمان ندلى
لما كنا صغار
من فريع لى فريع
نقطع الاثمار
|
Post: #5
Title: Re: تبت لله ياالصادق ..!
Author: محمد عبدالرحمن
Date: 03-17-2011, 09:59 PM
Parent: #4
كان بحرنا نعومو
ناس كبار و صغار
فينا طيبة القرية
ومافى كان اسرار
وينو صوت الساقية
الكان يشق الليل
وين نخيلنا الرامى
الظلال فى النيل
|
Post: #6
Title: Re: تبت لله ياالصادق ..!
Author: محمد عبدالرحمن
Date: 03-17-2011, 10:00 PM
Parent: #5
وين وين دفيقا
الكنا منو نشيل
وين جداول الموية
الجارية زى السيل
يا بحر حلتنا
فى رمالك ذكرى
لابتشيل الموجه
ولا بتفارق الفكـره
الجريـف و اللوبيـا
|
Post: #7
Title: Re: تبت لله ياالصادق ..!
Author: محمد عبدالرحمن
Date: 03-17-2011, 10:02 PM
Parent: #6
ياسلام ياخ ..يبدو ان هذا الليل لن يطلع فجرا ...
بدرالدين ياخوى انا واصل (خلقه) ..سمعت النكته
بتاعت الزول (العوير) المابخلوهو يحضر (القبعة)
فى (البارتيات) ؟..كان ماسمعتها اتصل بخليل يحكيها
ليك ..
|
Post: #8
Title: Re: تبت لله ياالصادق ..!
Author: محمد عبدالرحمن
Date: 03-17-2011, 10:04 PM
Parent: #7
لو كتب الصادق الياس هذا النص لكفاه ..لوحة
حية معبرة مشحونه بالذكريات والشجن والاسى ...
|
Post: #9
Title: Re: تبت لله ياالصادق ..!
Author: محمد عبدالرحمن
Date: 03-17-2011, 10:08 PM
Parent: #8
*ينحدرالشاعر الصادق الياس من جذور مصرية، فجده لأبيه محمد
اليوسف ابو جلاب رجل مصري جعفري كنزي جاء الى السودان زارعاً
للخضر والفواكه بمقرن الخرطوم، قبل ان ينقل زراعته الى
جرف النيل الأزرق قبالة منطقة الجريف غرب في حي (الشطيطة)
الذي منحه زوجة سودانية رزق منها بخضر والياس وحمزة، قبل
ان يتزوج بأخرى أنجب منها جعفر وأحمدوالعديد من البنات.
في أواخر ثلاثينيات القرن الماضي ولد الصادق الياس بالجريف
،وما ان قوي عظمه واشتد ساعده حتى ألحقه والده بخلوة
الفكي علي في حلة النظام بالجريف، مكث فيها سبع سنوات
وعندما سألناه عن السبب ضحك الرجل وقال ساخراً:
ـــوالله ما عارف.. أنا كنت بليد وللا ولوف
* منقول ..
|
Post: #10
Title: Re: تبت لله ياالصادق ..!
Author: عماد الدين عبدالله
Date: 03-17-2011, 10:09 PM
Parent: #4
Quote:
ياسواقى بلدنا
وينو صوتك مالو
وينو قارع مويتك
غنى باسم حالــــــــــــــــو
وين غسيل النيل
و شر هدومو فى رمالو
وينو ماضى الحله
وين ومين الشالو
كان زمان ندلى
لما كنا صغار
من فريع لى فريع
نقطع الاثمار |
تحياتي اخي محمد عبدالرحمن
ونقول يا حليل ايام زمان
ايام شجر فريق قدام وود اب زيد
وجنينة السني وجنينة الوزير
ايام واماكن لها ايقاع
كووووم تحايا
تخريمة الجماعة جايين متين
|
Post: #11
Title: Re: تبت لله ياالصادق ..!
Author: محمد عبدالرحمن
Date: 03-17-2011, 10:11 PM
Parent: #10
*للشاعر الصادق الياس أكثر من (52) أغنية
بالإذاعة السودانية لعدد كبير من الفنانين
ابرزهم أحمد الجابري، علي ابراهيم، صلاح ابن
البادية، صديق عباس، خوجلي عثمان،
الطيب عبد الله، وزكي عبد الكريم..
* منقول ..
|
Post: #12
Title: Re: تبت لله ياالصادق ..!
Author: محمد عبدالرحمن
Date: 03-17-2011, 10:23 PM
Parent: #11
Quote: ونقول يا حليل ايام زمان
ايام شجر فريق قدام وود اب زيد
وجنينة السني وجنينة الوزير
ايام واماكن لها ايقاع |
ياسلام ياخ ياعماد ..
ايقاع (ساكت) ..ايقاع وخرائد موسيقية على اجمل
مايكون ..(أربجى) اعطاها الله واجزل العطايا ..
نهر يتمايل طربا يخاصرها كما يخاصر المحبوب
محبوبته ..وصالحين ينامون بينها والنهر ..
(الفكى حمد عبدالقادر امام) و(حمد ودابوزيد) و
(فارس الكتاب) و(الشيخ طه البشير) و(الشيخ البكرى)
و(فارس الكتاب ) و(ام جديرى) ...(شفتا) النعمة
دى كيف ..وبين النهر وهؤلاء الصالحين خضرة مد
البصر ..وحدائق وجداول ومياه تجرى ..
نعمة (شديدة والله) ...
اما بخصوص التخريمة (ماباقى كتير يابلادى) ...
|
Post: #13
Title: Re: تبت لله ياالصادق ..!
Author: محمد عبدالرحمن
Date: 03-17-2011, 10:30 PM
Parent: #12
راح زمــان كــــان ليك مكانه
وكنت أقرب منى لى
وفــجــــأة أتــغــيـــــــرت
انــت ورحت تتكبر على
يا ماطال صــبــرى وهديتك
وقلت يوم حالك تسيبه
مانفع فـيـــك الــتــوســـل
انـت زول برخص حبيبه
وابـتــديـت افـكــر لعـمــرى
الـحـق الـفـضـل اجيبه
لو ضميرك راضى سيبنى
قلبى رضيان بى نصيبه
قبل مـا تـغـــيــر دروبــك
كـنــا بنمـاسيـك نصابحك
رحت ترخص بى مقامنا
يلا بيعنا وشوف مصالحك
ما بنعاكـســك فـى طـريــقـك
بالعذاب ما بنصارحك
بالعملته انـت فــيــــــــنـــــــــا
الله يـا ظالم يسامحك
كم سـهـــرت اللــيل شقاوة
وسرت ليك مشوار يفتر
لو بـيـنـفـــع أو بـيـــشــفـــع
شــوقى فى دربك يخدر
كــم غــلطـت وشـوقى
سـامح تانى يوم القاك مقصر
والله مـســكــيـنـه الـمــحــبه
تمشى لى ناس ما بتقدر
النص اعلاه هو (مسكينة المحبة) وهو ايضا من
اشعار الصادق الياس الجميلة ..وغناها الفنان
صاحب الصوت المتفرد الطيب عبدالله ...
|
Post: #14
Title: Re: تبت لله ياالصادق ..!
Author: احمد الامين احمد
Date: 03-17-2011, 10:41 PM
Parent: #11
عنوان البوست صادم ومنحوت ببراعة ودهاء السياسى
تحديدا إيراد الاسم بتلك الطريقة عبر التورية
معنى قريب ظاهر غير مراد
ومعنى بعيد خفى هو المراد ...
لان العصر سياسى دخلنا
بحثا عن صادق معين
فوجدنا صادقا اخر
هو الصادق إلياس ود الجريف كمايكنى فى الوسط الفنى
يكفيه فخرا هذا الشاعر أنه من أعاد الكنار
أحمد الجابرى إلى قفص الغناء
وبستانه بعد ان هجره أمدا معتزلا الغناء لعامين
اثر رحيل امه لمده التى تركها عليله بداره
وذهب ليغنى وعند عودته الفجر للمنزل
وجد الجيران ينصبون صيوانا للعزاء
فى رحيل امه
فهاج الجابرى وماج وكسر عوده المرن
المطواع ومزق اوتاره العذبة اللدنه
وغاب كثيرا عن دنيانا
لكن الشاعر الكبير الصادق الياس ود الجريف
تمكن من اعادته لاحقا الى حديقه الفن عبر كتابه اغنيه
" حكايه ملام"
فراق محبوب على مكتوب
متين ياغيمة ترمى الضل
ونفر جنحينا زى الكل
فلحنها الجابرى على مقام الحزن وبها سلوان وسلوى
بعد أن عادت إليه الكلمات إتزانه الداخلى
وقبوله لرحيل الاعزاء
فذهب بعود جديد للاذاعة
فهب كل العازفين تحية له
وأستضافه علم الدين حامد
فى حلقة كاملة تغنى فيها بتلك الاغنية
لكن أول لقاء Face to face
بين الجابرى وود الجريف
كان بشارع الشنقيطى تحديدا غير بعيد
عن منزل ناس الجابرى فاهداه الصادق إلياس
أغنية " من طرف الحبيب جات أغرب رسايل"
وهى تغطية لاغنية " مافى حتى رسالة واحدة"
التى كتبها سيف الدسوقى للجابرى قبل ذلك بفترة
للصادق إلياس كذلك غنى الجابرى أغنية لم تذاع كثيرا
عنوانها "يوم امبارح" وسعدت برفقة زميلى وصديقى
عبدالله مصطفى بسماع الجابرى يؤديها ببروفة على العود
عندما ذهبنا إليه بمنزله الاخير بالثورة
لطلب إحياء حفل لرابطة كلية الاداب جامعة الخرطوم
للتأريخ رفض الجابرى اجر فقط طلب ان ندفع شيئا للفرقة الموسيقية
المصاحبة له إلى جانب تأجير ساوند معين من شخص حدده لانه موزون على صوته
|
Post: #16
Title: Re: تبت لله ياالصادق ..!
Author: عبدالكريم الامين احمد
Date: 03-17-2011, 11:36 PM
Parent: #14
يا سسسلام ياخي
عندي شوق لنيل
وياريت يا ابو خليل نسمعها ياخ
|
Post: #17
Title: Re: تبت لله ياالصادق ..!
Author: حسبو عكاشة
Date: 03-17-2011, 11:59 PM
Parent: #16
وين انت ما ظاهر يا شاب !!
شوق شديد والله
|
Post: #18
Title: Re: تبت لله ياالصادق ..!
Author: بدر الدين الأمير
Date: 03-18-2011, 06:43 AM
Parent: #17
Quote:
عنوان البوست صادم ومنحوت ببراعة ودهاء السياسى
تحديدا إيراد الاسم بتلك الطريقة عبر التورية
معنى قريب ظاهر غير مراد
ومعنى بعيد خفى هو المراد ...
لان العصر سياسى دخلنا
بحثا عن صادق معين
فوجدنا صادقا اخر
|
احمد الامين
ياخى بتبالغ
الصادق الفى بالك محمد يقدر يجيب اسمو حاف ساي
ياخى دى خليل صاحبو مابقدر يعملها
لكن لوحللنا العنوان من ناحية
نفسة بنصل لتوبة محمد السرية ...
عن الصادق الفى بالى وبالك
|
Post: #19
Title: Re: تبت لله ياالصادق ..!
Author: saif massad ali
Date: 03-18-2011, 07:58 AM
Parent: #18
الله يسعلك في داعي تبكينا من صباحات الرحمن
التحية ليك ولي ضيوفك يا شاب يامحترم ينصر دينك الله ويهدم الانقاذ
|
Post: #20
Title: Re: تبت لله ياالصادق ..!
Author: nadus2000
Date: 03-18-2011, 08:49 AM
Parent: #19
تبت لله
محمد عبدالرحمن وأحمد الأمين
في بوست واحد...فحتما ثالثهم (المؤانسة والامتاع)
|
Post: #21
Title: Re: تبت لله ياالصادق ..!
Author: محمد عبدالرحمن
Date: 03-18-2011, 10:19 AM
Parent: #20
Quote: نفسة بنصل لتوبة محمد السرية ...
عن الصادق الفى بالى وبالك |
تحياتى ياشباب ...عن اذنكم اتجاوز الترتيب
لارد على بدرالدين ..
شوف ياابولبيد لو كنت تبحث عن توبة سرية
او علنية عن الصادق (الامام) فكانك تبحث عن الغول
والعنقاء ...فابحث عنها بعيداعنا ...وتعال
متع نفسك بالصادق الياس والجابرى
واحمد الامين ..
غير كدا ماعندنا ليك حاجة ...
|
Post: #22
Title: Re: تبت لله ياالصادق ..!
Author: محمد عبدالرحمن
Date: 03-18-2011, 01:03 PM
Parent: #14
سلام يااحمد الامين وشكرا على الاضافة الثرة ..
يحكى الاستاذ الصادق الياس عن اغنية رسائل
قائلا :
*أحمد الجابري في تلك الفترة كان في بداياته الفنية وكانت
له أربع أغنيات تذاع بالإذاعة ولكنها كانت تبث عادة في الساعة
الواحده ظهراً الشئ الذي جعل صديقه الراحل الدكتور عوض دكام
يقول له ممازحاً: (والله يا الجابري انت فنان كويس لكن غناك بذيعوهو
وقت النسوان في التكل والرجال في الشغل).
أعجب الجابري إعجاباً شديداً بـ(رسائل) الصادق الياس، وهي تعد
أول أغنية يلحنها الفنان أحمد الجابري، وشارك بها في مسابقة
للتلفزيون كان ينظمهاكل سبت في برنامجه (من الأغنيات الجديدة)
الى جانب (وشاية) ابراهيم عوض، وأغنيةأخرى للفنان صالح سعد،
وكان التلفزيون في تلك الحقبة من الأشياء الجديدة والجميلة
التي أدخلها الرئيس عبود بعد جلبه لعدد من التلفزيونات
الألمانية الكبيرة الحجم وقام بتوزيعها على المؤسسات و
الهيئات الكبيرة والحدائق العامة، وكانت توضع فى ترابيز عالية
ويقف الى جواره رجل متدرب على تشغيله فيما يتجمهر حوله
مئات المشاهدين
* منقول ..
|
Post: #23
Title: Re: تبت لله ياالصادق ..!
Author: محمد عبدالرحمن
Date: 03-18-2011, 01:08 PM
Parent: #22
يواصل الصادق الياس:
ــ *يوم المسابقة دا أنا ما نمت، مشيت باكراً لحديقة
غردون التي منّ عليها الرئيس عبود بتلفزيون كبير.
بعد ان ادىالفنانون الثلاثة اغنياتهم كان الشاعر الصادق
الياس يرجف خوفاً وفرحاً.. خوفاً من (وشاية) ابراهيم عوض
التي كانت المرشحة لنيل المركز الأول، وفرحاً لأن مقدم
البرنامج عندما قدم الفنان أحمد الجابري نطق اسمه قائلاً
(اغنية (رسايل) للشاعرالصادق الياس.
مخرج البرنامج قدم موسيقى طويلة قبل ان يعلن النتيجة
مما جعلالمشاهدين في حالة انتظار وترقب قبل ان يقول
: (بعد مداولات اللجنة اتضح لنا انأغنية (وشاية) وأغنية
(رسايل) في مستوى واحد فاعتبرت اللجنة الأغنيتين فائزتين.
نجاح أغنية (رسايل) أعطى الصادق الياس دفعة قوية لمواصلة
كتابة الشعر،أو كما قال (كانت فاتحة خير عليّ) حيث تم
تسجيلها بالإذاعة وكانت تبث ثلاث مرات في اليوم مما جعله
يكتب للجابري (الجريف واللوبيا – الياسمين - هاتو الأفراح)
فتغنى بها قبل ان يترك الغناء لمدة عامين حزناً
على وفاة والدته التي حدثت في غيابه مشاركاً في حفل بالخرطوم
* منقول ..
|
Post: #24
Title: Re: تبت لله ياالصادق ..!
Author: محمد عبدالرحمن
Date: 03-18-2011, 02:59 PM
Parent: #23
ياخليل
شكرا على مسكين المحبة صوتا ..حاول القى
لينا ال50 نص التى لحنت وغنيت للصادق الياس
وابدا بصاحبك خليهو يديك كشف بممتلكات الصادق
الياس عند الفنان الامين عبدالغفار ..
حباب كيكى ..
كالعادة على طريقة (ياااع) الشهيرة ..اسمع (مكرر)
لكن مابعدم المخرجات 
حسبو ياعكاشه ..
شوق (اشد من شوقك ) ..شايفك بهناك مع الصادق الرضى
و(المجموعة) ..اكيد من حقنا نتعشم فى قادم جديد؟
تشكر على الطله ..
سيف مساعد ..
حبابك والله ..(شميت) ريحة الجزيرة وجروفها وطينها ..
صاح ؟..الانقاذ ربنا سوف يهزمها هزيمة يسير بحديثها
الركبان ..شفتا ايمانا بالله وقدرته كبير كيف ؟..(كبر جد)
نادوس ..اخبارك .
ياخوى المؤانسة والابداع مربوطات فى كيبورد احمد الامين
دا ...اجمل شى يمكن ان تفعله فى المنبر ان تدخل من خلفه
اينما(دخل) ..وسوف لن تندم ...
|
Post: #25
Title: Re: تبت لله ياالصادق ..!
Author: محمد عبدالرحمن
Date: 03-18-2011, 06:26 PM
Parent: #24
يقول الصادق الياس:
ــ كنا قاعدين في بيت الجابري، وطلعت ليهو قصيدة وقلت
ليهو يا الجابري شوف القصيدة دي، مسك الورقة وبدأ
يقرأ لحد ما وصل:
يا ريت اللوم يرجعني
ويرجع حالي لي حالو
وألم الباقي من عمري
وأجيب البال من الشالو
وأخت احزاني وأتريح
فبكى الجابري بكاء حاراً وقال لى:
ــ يا الصادق انا ما كنت داير ارجع للغنا تاني لكن
لقيت الكلام الأنا داير أقولو للناس.
فأمسك الجابري بالعود وقام بتلحينها ثم ذهب بها
للإذاعة فخرجت الإذاعة عن بكرة ابيها لاستقبال احمد
الجابري فرحين بعودته للغناءبعد عامين من الحزن وقال
لهم الجابري عندي أغنية داير اغنيها..
وعندما سألوه عن اسمها قال لهم:
ــ اسمها (حكاية ملام)فتغنى بها في برنامج
صالة العرض الذي كان يقدمه المذيع
علم الدين حامد، وتعتبر (حكاية ملام) نقلة في مسيرة
الصادق والجابرى الفنية.
|
Post: #26
Title: Re: تبت لله ياالصادق ..!
Author: بدر الدين الأمير
Date: 03-19-2011, 08:55 PM
Parent: #25
فوق من اجل الطرب والصاق الياس
|
Post: #27
Title: Re: تبت لله ياالصادق ..!
Author: مها عبد الله
Date: 03-19-2011, 09:15 PM
Parent: #26
قمة الإبداع
تبت لله يا محمد عبد الرحمن
|
|