أشك... و خمسه نقاط

كواحد قرفان من كل الغثاء السياسي السودانى
وواحد من ناس الله و قريعتي راحت وسط كل هذا الزخم
إلا أننى شخصيا
متأكد من إنو يوم 21 مارس النس ما حتتطلع الشارع
للاسباب الآتيه:

أولا:

الزول القال للناس المره الفاتت نتلاقي فى أبوجنزير
ده زول بليد و حقوا يدوهو بسطونتين فى قرعوعتو الكبيره دى (مافى زول يسألنى من معناها لأنو أنا زاتي ما عارف)
لأنو المظاهرات ما بدعو ليها إنما بتكون تلقائيه
و لأنو ما ممكن الزول يطلع من بيتو مستحمي و متريح
و ناس بيتو يقولوا ليهو ماشي وين ياخينا
يقول ليهم و الله عندى مواعيد الساعه 11 فى ابوجنزير عندنا مظاهره
ياخوانا ده السودان ما لندن
لازم الزول يلقي روحو منفعل مع المظاهره
لكن ما ممكن يواعد المظاهره

تانيا:

ياخ كن ميدان جاكسون أفضل
لأنو ابوجنزير فقد حيويتو و الناس بقت ما عندها علاقه بيهو
يعني الجاي أبو جنزير بيكون جاي قاصدو لكن ما بتجيبوا الصدفه
عشان كده ابوجنزير ما فيهو ناس و المظاهره عاوز ناس يا ناس
يعني اذا عندك الف جوا المظاره عن قصد, و عارفين روحم بيعملوا فى شنو
لازم ينضموا ليهم الفين ساكت من الشارع و الف صعلوق و خمسمية شماشي جابم الدرب عشان المظاهره تنجح
وده كلو ما متوفر فى ابوجنزير

ثالثا:

مواعيد المظاهره غلططططططططط
لأنو الناس بقت ساكه معايشه
يعني ما ممكن بتاع الحافله يخلي شغلو و يمشي فى المظاهره لانو رزق يومو فى يومو
لكن فى طريقتين
يا إما تضيق بيهو و حافلتو اساسا يبقى ركوبه ووقوفه واحد فتلقائيا حيبقي ما فارق معاهو و حينزل المظاهره
يا إما تختاروا وكت مناسب لمعظم شرائح المجتمع عشان تشارك و ده غالبا يكون يوم اجاره ولا نهايه اسبوع و يا حبذا لو نهاية شهر و الناس متضايقه فى المواهي

رابعا:

عجبكم ولا ده
السودانيين ديل ناس الله و بحبوا الدين
و الدين عندهم ما جابوهوا الكيزان
و السودانيين متصوفين بالفطره عشان كده عينم طالعه و حاقرين بيهم فى الدول
ولو عاوزم يتعاطفوا معاك خش ليهم بي الدين دايما
يعني مظاهراتكم دي بالمختصر لازم يكزن عندها علاقة بالجوامع
لأنو 80% من السودانيين ديل بيصلوا الجمعه
و كان ال80% ديل ما شاركوا فى مظاهراتكم دى
و ما أقنعتوهم إنهم لازم يطلعوا معناها فشلت فشلت

خامسا:

ياخ بصراحه
السودانيين ديل زهجوا من حاجه إسمها أولاد المهدى
عدييييييييل كده و من غير لف و دوران
ما ممكن كلوا مره نطلع و نديها ثوره نضيفه عشان يسلموها لينا لى عساكر
و نحنا نعاني و هم يطلعوا بره و يمضوا إتفاقات و يقبضوا قروش كمان
خلوا آل المهدى ديل يطلعوا بيان و ضمانات بي إنهم ما عندهم نيه ترشيح للرئاسه
و صدقونى كل السودان ده حتلقوهو فى الشارع بي الكيزان زاتم
و الله جد .... شفته كيف؟ أو كما قال
و مريم الصادق بالذات لأنو أبوها بيلمع فيها
قولوا ليها
نرفضها و إن كانت مبرأه من كل عيب أو كما قال أبوها
آل المرغني أساسا مضمونين إنهم ما ساعين لحكم و بادروا بي ترشيح حاتم السر قبل كده
بغض النظر عن إنو فى مليون زول حيجي يدافع عنهم هنا
و نحنا عندنا مليون تبرير و ده ما محلوا هنا
لكن ياخ أفرض إنو هم أحسن ناس و نحنا أكعب ناس... برضو ياخ نحن ما عاوزينكم
أنا العفييييين ده كان لقيت الضمان ده بمرق الشارع
و بضمن ليكم ألفين معاي عندهم نفس الفهم و الشعور و القرف كمان حيطلعوا قبل المظاهره بي يوم كمان
نحنا حنطلع الشارع و حنموت و هم حيجوا يمسكوا الحكومه و حيطلعوا ميتينا بعد داك
و حيجي عسكرى وهم حيقلبه تاني و حيقعد عشرين سنه مطلع عينا لحدى ما نقدر نزحو
ما تشبكونا طيب ثوروا و لما تجى صناديق الإنتخابات ما تدوهم أصواتكم
لأنو كلام ما منطقى والسودان مختلف عن مصر و تونس
مصر و تونس ثاروا أساسا لأنهم عارفين مافى زول بديل
و إنو هم الحيختاروا البديل
عشان كده أسه كل الطمعانين فى الرئاسه بيتوددوا للشعب
لكن هنا نصف الشعب يا إما جاهل يا إما طائفى
يعني بعدين ما حيرشح الأصلح لكن حيرشح طائفيا و نحنا حنتركب ياخ
يعني ديل بيجوا بيجوا غصبا عننا
و الدليل إنو زول مثقف زول لنا مهدى ولا خالد عويس
يجي فى الإنترنت يشبكك أخطأ الإمام و نعم للإصلاح داخل الحزب و كاك كاك
و لما بس يلقى ليهو فرقه فى تدشين كتاب ليهم فى حضور الصادق المهدى
تلقاهو متحكحك جنبو و يتصور و هو مبتسم بغباء نظام أنا الصادق المهدى بعرفو
ياخ لو ما عملتو الكلام الفوق ده
و الله لي يوم الدين ما تطلع مظاهره
و أهو كل الناس القرفانين يقولوا ليك
خليهم الكيزان ديل أخير شبعوا
بدل نجيب واحدين جعانين من جديد
و لا يجونا أولاد المهدى يودونا فى داهيه

يتبعععع

Quote: هل فكَّر بنو علمان يوماً لماذا يزهد الناس في مسيراتهم؟! أهديهم هذه الإجابة الصادقة التي لا أرجو منها جزاءً ولا شكوراً كما أرجو أن يُخضعوها للدراسة بغرض التحقُّق من مدى صحتها، وبين يدي هذه الإجابة أود أن أبتدر حديثي ببعض الأسئلة: لماذا يا تُرى خرجت كل مسيرات الغضب في عالمنا العربي بدءاً من تونس ومروراً بمصر وانتهاءً بالبحرين واليمن وليبيا وحتى إيران.. لماذا خرجت جميعها أيام الجمعة وتحديداً عقب صلاة الجمعة انطلاقاً من المساجد ولماذا لم يفكر عرمان وأبوعيسى، ولا ينبغي لهما بالطبع، لماذا لم يفكرا في تظاهرة تنطلق من مساجد الجمعة؟! هل تحتاجون قرائي الكرام إلى إجابة أم أن الأمر واضح؟! دعونا نتصور أن عرمان ذهب ليؤدي الصلاة مرتدياً الجلابية والعمامة حتى ولو بدون وضوء في مسجد الشهيد أو الجامعة أو حلة كوكو أو الهوبجي.. ثم ما إن انتهت الصلاة حتى وقف أمام المصلين حامداً الله ومصلياً على رسوله الكريم صلى الله عليه وسلم «ما مشكلة ممكن يُحفَّظ هذه العبارات» ثم تحدَّث إلى المصلين مستشهداً ببعض أقوال قرنق عن الظلم وانعدام الحريات كما يمكن ترصيع كلامه ببعض الآيات «يمكن أن يحفَّظ آيات من كتاب الله أتبرع له بها والله العظيم!!» ثم طلب عرمان من المصلين أن يخرجوا للمطالبة بحقوقهم وللخروج على الكبت ولإلغاء زيادات الأسعار وهلم جرا!! بالله عليكم ماذا سيحدث؟! هل سيصبر المصلون إلى أن ينتهي عرمان من قول «الحمد لله والصلاة والسلام على رسوله الكريم صلى الله عليه وسلم» أم أنهم سيُمطرونه لكماً وضرباً وربما يكررون فِعلة من ظل يخدمهم في جنوب السودان حين قطعوا أذنه عضًا؟! بل ربما يُقدم بعضُهم على جريمة «نكراء» في حق عرمان ووالله العظيم هناك العشرات ممن يتحرقون شوقاً لذلك وظللنا نصبِّرهم ونحذرهم!! بالطبع سيقوم أحد المصلين ويذكِّر الناس بما اقترفه عرمان في حق شعبه منذ أن كان في المهد صبياً ولن ينسى اعتراضه على إيراد البسملة في صدر الدستور الانتقالي عقب عودته من الغابة كما لن ينسى حديثه عن العقوبات الإسلامية والشريعة الإسلامية وسيذكر الكثير من أفعاله وأقواله. مشكلة عرمان، بعد أن غاب عن الخرطوم نحو عشرين عاماً، أنه لم يفكر عند عودته من الغابة في كيفية التعامل مع أهله من أبناء الشمال لجسر الهُوَّة التي حدثت بينه وبينهم جراء جريمته وأفعاله في الغابة ضد أبناء الشمال بل زاد من استفزازه لشعبه من خلال سلوكه وتصريحاته وعدائه لله ورسوله وزاد من الهُوَّة وأشعل كراهية له أكبر من تلك التي يكنُّها الشماليون لباقان الأمر الذي دمّر مستقبله السياسي وجعله منبوذاً بين أهله وعشيرته وإذا أراد أن يعرف مكانته في قلوب الشماليين فليجرب مخاطبة المصلين وليحاول تسيير تظاهرة من مساجد الجمعة لإسقاط النظام

الموضوع ما عندو علاقه بشيوعيين و ما شيوعيين
الموضوع عندو علاقه بالواقع السوداني و الآليات المناسبه للخروج للشارع
أنا شخصيا لو حيجوا عائلة المهدى من أسه معارضه
أى زول غير كده حبابو
إنشاء الله يكون بي مخاتو
مظاهرات حاكو حاكو ما بتنفع
آليات مناسبه هى الحل الوحيد عشان الناس تطلع الشارع و تلقائيا كمان
التغيير قادم قادم
شاء الكيزان أم أبوا
و عليهم أن يركبوا هذا القطار وإما حيفوتم

تحياتى استاذ ناصر

Quote: الموضوع عندو علاقه بالواقع السوداني و الآليات المناسبه للخروج للشارع

نعم سيدى العزيز لقد صدقت القول اجد الاغلبيه العظمه هنا بعيده
كل البعد عن الواقع السودانى السودانى ماهو بالاضينه البنادو لى اكرام
الضيف ولا لمساعدة الضعيف ولا لنجدة الغريق ولا للخروج للمظاهرات كلها قيم
بداخله وما بتحتاج لترويج لتقديمها ما بقولو ليه تعال نعمل كده من تلقاء
نفسه بيعمل الاشياء دى....ناسك ديل مستحيل يطلعو من المسجد.............

طيب Ok
إنت رايك شنو ؟؟
إنت كزول من عامة الشعب وعندك راي في آل المهدي وعموم الطائفية
ماهي مقترحاتك ؟؟!

ويا ريت البوست يتواصل عشان يكون فيهو كلام مفيد .. من غير اساءات لرموز حزب الأمة أو أي حزب تاني
عشان ما يجوك الناس المنتمين للأحزاب دي والبوست يمشي الخور في النهاية

أو لو إنت أصلا قاصد كده .. فاعفي لينا الأسئلة دي


تحياتي

Quote: ماهي مقترحاتك ؟؟!

مقترحاتي
إنو إيجاد الآليات المناسبه فى الزمن المناسب و الإتصال بالمواطن أكثر من الأسافير
الناس متواجده فى الجوامع و مواقف المواصلات و المدارس و الجامعات و الأحياء الطرفيه
المظاهرات لازم تقوم من هناك
المظاهرات لازم تبدأ و الناس تلقي نفسها تلقائيا فيها
يعني خمسين زول فى ميدان جاكسون ممكن يهيجوا معاهم ألف فى طريقم لي بيوتم و لقوا المظارهرات بالصدفه
مظاهرات فى حته واحده ناي الأمن حيقبضوها حيقبضوها
لازم المظاهرات تكون مشتته عشان تشتت قوى الأمن و الشرطه و فى الآخر عدد اعساكر مقارنه بعدد الشعب ضئيل جدا و الشعب حينجح
الناس القايدين المظاهرات
لما ناس الأمن يجوا يعتقلوهم ما طوالي يركبوا البكاسى عشان يفوزا بشرف الإعتقال
لازم يقاوموا و ينضربوا و يتجرحوا و كمان يموتوا إتنين ولا تلاته
عشان الناس تتفاعل
و كلما كان بطش الشرطه و الأمن أكثر كلما كان حماس المتظارهين أكثر (قاعده قديمه و محفوظه)
لكم كلام أركبوا الناس تركب و نجي نشجب إسفيريا دى ما بتطلع ليها مظاهرات
دى إقتراحاتي... أزيدك؟

إنته إقتراحاتك شنو؟
و برضوا آل المهدى نرفضهم و إن كانوا مبرئين من كل عيب أو كما قال الصادق المهدى


يتببع

موعدنا يوم 22 و سنحشر الإسفيريين ضحي فى هذا البوست

ناصر سلام وحمدا لله ع السلامة
ناس المهدي كان جابهم - وح يجيبهم فعلا - تصويت حر يبقى ما في كلام
وحتى الرفض لا يجب ان يتعدى حدود عدم التصويت لهم وإلا ما يبقى اسمها ديمقراطية
خليك من آل المهدي الهينين ديل الكيزان الإسمهم كيزان بي عولاقهم السووه السنين دي كلها
كان جابهم الصندوق في اقتراع نزيه وحر ما نقدر نقول بغم

أيا كان الحاكم يجب انو يدو ما تكون مطلوقة بل يخضع لرقابة صارمة و محاسبة دقيقة من البرلمان و القضاء و الصحافة و الشعب

Quote: أيا كان الحاكم يجب انو يدو ما تكون مطلوقة بل يخضع لرقابة صارمة و محاسبة دقيقة من البرلمان و القضاء و الصحافة و الشعب

سلامات يا محمد
ياخ ده كلام عين العقل
في ما يسمي بالدستور
شكرا كتير

Quote: موعدنا يوم 22 و سنحشر الإسفيريين ضحي فى هذا البوست

الأستاذ/ ناصر البطل ... إزيك

إذا كان إنت مع الثورة المستمرة لإسقاط النظام ... المفروض
تشارك ... و تنصح ... وتقول المحاولة كويسة لكن فيها
الغلط الفلاني و الفلاني .. موش تقول
موعدنا يوم 22 و سنحشر الإسفيريين

Quote: إذا كان إنت مع الثورة المستمرة لإسقاط النظام ... المفروض تشارك ... و تنصح ... وتقول المحاولة كويسة لكن فيها الغلط الفلاني و الفلاني .. موش تقول موعدنا يوم 22 و سنحشر الإسفيريي

ما هو نحنا أسه مشاركين و بنقول فى الغلط و بنحاول نقول راينا

أما بخصوص يوم 22 فعشان الأمور بتكون أوضح
لأنو أسه مافى زول عاوز يسمع أساسا
لكن يوم 22 الأخطاء بتكون أوضح

شكرا علي المرور عيدروس