هذه الأيام وصلت لمراحل متقدمة فى تعلم العزف على آلة العود ووجدت تشجيع كبير من الأصدقاء الذين أكدوا جزالة صوتى وقدراتى التطريبية العالية وللحقيقة بداءت بحفظ مجموعة من الأغنيات استعداداً لدخول عالم الغناء ولما كنا حتى الأن فى طور القعدات أو الجلسات الدكاكينية كما يطلق عليها.. فقد طلب منى معجب لحوح اغنية يادمعى الأتشتت وغلبوا اللقاط وظل يلح عليها فى كل جلسة استماع , أعتقد انها اغنية للفنان عبدالعزيز داؤود لكنى كنت قد سمعتها ايضاً من قبل بصوت الفنان الشاب مصطفى حمزة وقد أداها بشكل جميل ومميز بحثت عن الكاست الذى غنى فيه مصطفى حمزة هذه الأغنية ولم اعثر عليه..
الرجاء مساعدتنا فى مشوارنا الفنى بأنزالها هنا بصوت مصطفى حمزة لو أمكن
يا حاتم ، بعد تحميل الأغنيه بنجاح جاءتني رساله بأن (الكليب) خربان ولايمكن تشغيله، شوف بالله السياسه مباريانا حتى في الغنا، بجيك راجع بي تحميل تاني وشحنه جديده ،
يا دمعي الاتشتت اااه دمعى وغلب اللقاط *********** يا سيد ريدي وسيد روحي أشكو ليك أنت مجروحي يا سيد روحي رد لي روحي *********** يا بر يا أبو البتول يا جليس يا الساكن السور فوق زولى اب ساسا محفور *********** يا دمعي السرا بلاني الحبيب فات وخلاني خلاني اشكو آلامي *********** حبيبي يالفراقك حار اسير حبك أنا ليل ونهار *********** يا دمعي الاتشتت اااه اتشتت وغلب اللقاط
Post: #6 Title: Re: ياجماعة كايس لى أغنية...الرجاء المساعدة Author: خضر حسين خليل Date: 03-15-2011, 08:16 PM Parent: #5
ياحاتم بداية مبروك العود وعقبال الطمبور
ياخ عايزينك في جلسة (دكاكينية) برضو الواحد عايز ينتهز فرصة انك لسع واعد ويسمعك قبل تشتهر ونبقي في مقابضة التذاكر
الغنيه دي يا حاتم سمعتها بصوت أبوداؤود وعزالدين أحمد المصطفى ومصطفى السني، ووالله كل منهم أجاد الأداء وطالما الكليب بصوت عبدالعزيز طلع مؤتمر وطني قلنا نجيبا ليك بصوت الأخ الصديق مصطفى والشكر مبذول للموقع المائز www.sudanesesongs.net وكان حنستني ممكن أتوسط ليك عند صديقي المهندس يحيى قباني عشان تتشتت وتلقِّط أغاني الدنيا والآخره..
يا حاتم، كان عصلجت معاك كلمني حاول حس بي، حا أنقلا ليك من ميدان ابوجنزير لميدان التحرير، والله الغنيه عذبتني عذاب الهدهد ، أجري وازازي لقيتا في بنغازي،
_
ودالشيخ إزيَّك، أحمد القرشي الأغنيه دي عندو قبل ما الدمع إتشتت وقبل ما يشتغل اللقاط في البلديه.
Post: #9 Title: Re: ياجماعة كايس لى أغنية...الرجاء المساعدة Author: عبد الواحد أبراهيم Date: 03-15-2011, 08:48 PM Parent: #7
Quote: ولما كنا حتى الأن فى طور القعدات أو الجلسات الدكاكينية
ههههههههههها والله الليلة ضكت جنس ضحك انت حاتم زاتو البعرفك انا صوت شنو وغناء
شنو ؟
بالمناسبة لدى تسجيلات نادرة للفنان ابوداوؤد فى عطبرة سنة 1981م فى اول منزل
شيد بحى المطارعطبرة وفيها اغنيات عجيبة تدخلك النار والجنة فى زمن واحد
وطبعا انت راجل تقيل يعنى الا تدفع ... بعدين عرفت ليك كل ناس القعدة
ومعظمهم من عطبرة الى حدود عمودية مختار ود رحمة فى العبيدية
وبعضم احياء يرزقون
هى قعدة ولا احلى قعدة تعجبك وتسر بالك
بس ما تقول داير الاسماء وحركات المحامين ومحاولاتك التوثيقية الفاشلة.
أبوالحسين تشكر ياجميل على النص الجميل والأغنية فى عضمها المكتوب ختم الله عليك بالرضا والعافية
__ ياخضر سلامات تعرف الفنان فى بداياتو بلاقى صعوبات كثيرة حتى يثبت أقدامو الفنية زى عبدالواحد البيجى يشكك فى مقدرات الزول ده افتكر مافى حل فى المرحلة الفنية الحساسة دى غير تسمى نفسك (فريد الأطرش) ثم بعد داك تختار اسم فنى رائج..أنت ياصديق من خواص المستمعين ولاتحتاج لتزكرة بس ورينى القعدة وين وكتر اللبن..الفنان محمد كرم الله لايشرب اٍلا اللبن فى حفلاته بديار الشايقية وغيرها وأنا أجد نفسى فلسفياً يعنى..على خطاه
حاتم الفاضل..شفته أداء الشاب ده كيف للأغنية اشكرك يأخ لقد أثريت وجدانى عن حق __ رواية ..تسجيل جميل والسيدات القاعدات ديل لو ماالمساحة الوطنية المخنوقة على الدين على شفا نقرة من الهجيج الشديد عشان كدا أنا بفتكر لازم يجى يوم نعيد الرقص لساحاتنا وماتقف بيننا وبينه موانع غبية..
هل تقصدين...الرسيت النضالى
مع تحياتى وتحيات شركة زين
الأهداءات
عماد عبدالله..عصام جبرالله (ارجو أن يختاروا أسماء علمانية شوية) طارق أبوعبيدة تبارك شيخ الدين تضامناً معه ضد القمع الأسرى واختنا أميرة الشيخ بقطر والأهل بالباوقة وفتوار والجول
Post: #14 Title: Re: ياجماعة كايس لى أغنية...الرجاء المساعدة Author: علي الكرار هاشم Date: 03-16-2011, 10:20 AM Parent: #13
يا ود الياس جهجهتنا كنت مفتكرك بتفتش في اغنية سيده ألمتنابالعيون ...لود الحوري ساهله وممكن تبدأ بيها برضو
مودتي
Post: #15 Title: Re: ياجماعة كايس لى أغنية...الرجاء المساعدة Author: عبد الواحد أبراهيم Date: 03-16-2011, 10:40 AM Parent: #14
Quote: ياخضر سلامات تعرف الفنان فى بداياتو بلاقى صعوبات كثيرة حتى يثبت أقدامو الفنية زى عبدالواحد البيجى يشكك فى مقدرات الزول ده افتكر مافى حل فى المرحلة الفنية الحساسة دى غير تسمى نفسك (فريد الأطرش) ثم بعد داك تختار اسم فنى رائج..أنت ياصديق من خواص المستمعين ولاتحتاج لتزكرة بس ورينى القعدة وين وكتر اللبن
يا حاتم انا اصلا ما عارف ليك مقدرات وحتى الان تبدو دفوعات لا تستقيم على اى قاعدة فنية على النحو
المتعارف عليه فى الوسط الفنى ..
المهم غيتو اللبن شى جميل وهو عوضا عن حاجات تانية وكدة
وخلى البوست للفن بالتحديد فى الحتة بتاعتكم الجينا زاحمناكم فيها
من عطبرة والى حدود النعمان ود قمر فى برتى
وجايك برواقة فن وفن وفن .
Post: #16 Title: Re: ياجماعة كايس لى أغنية...الرجاء المساعدة Author: عبد الواحد أبراهيم Date: 03-16-2011, 10:50 AM Parent: #15
تعلمت الفن من خلال آدائى للمديح ( الفنان بابكر الزكار فنان قطار الشوق للاحداث) : بابكر الحسن الزكار «بابكر الزكار» من مواليد ام الطيور ريفي عطبرة في العام 1946م درس بام الطيور وتعلق بفن الغناء من خلال يوم المواهب في المدارس الاولية الذي ينظمه مجلس الاباء. بدأ كمادح باسلوب الطريقة القادرية وزاوج بين المديح والغناء وسبب له ذلك الكثير من المشاكل الا ان استقامته ضمنت له الاستمرار في الغناء. تبث له اذاعة وتلفزيون عطبرة اغنياته وظلمته الاذاعة والتلفزيون (القوميين) التقيناه في دردشة هدفها التوثيق لحياة انسان فنان لطالما اطرب مدينة عطبرة وما حولها من ارياف.
حوار: عبد الواحد ابراهيم
البداية
بدأت من خلال ترديد المائح النبوية على درب الطريقة القادرية وذلك من خلال تقديمها في يوم الاباء بمدرسة ام الطيور الاولية التي كانت تخصص يوما للمواهب وكنت اذهب الى كدباس غرب بربر مركز الطريقة القادرية ثم تطور الامر في المدرسة وطلبوا منا ترديد الاغاني واشتركت باغنية سمسم القضارف في المسابقات الطلابية وكان ذلك في بداية الستينيات.
الاعلام ظلمني يقول الزكار ان البعد من العاصمة يجعل الفرد بعيدا عن وسائل الاعلام خاصة الاذاعة والتلفزيون ولكن رغما عن ذلك فقد سجلت للاذاعة والتلفزيون القوميين من خلال المشاركة في الاغاني القومية وكذلك تلفزيون عطبرة واذاعتها التي لا تزال تكرر اغانينا وكذلك مسرح عطبرة ولدي اغنية وطنية بمناسبة السلام تردد كل اسبوع وهي للشاعر عبد الله محمد زين شاعر ((انا ام درمان انا السودان)).
الزكاروالحقيبة
كنت اتناول كل اغاني الحقيبة من عبيد عبد الرحمن, ود الرضي وسيد عبد العزيز ومعظم الحان كرومة واغلب اغاني الحقيبة من الحانه وسرور ايضا بجانب اغانينا الخاصة حيث كنا نغني الحقيبة وبعدها اغنية خاصة بي ومن ثم اغنية سيرة وكذلك تدور الاغنية.
لقاء الكبار
يقول الزكار انه التقى شعراء كثر اولهم محمد بشير عتيق الذي عمل بعطبرة وود الرضي في آواخر عمره واكثر من جالسته هو محمد على عبد الله الامي في السبعينيات وهو شاعر اغنية «ما بخاف من شئ برضي خابر المقدر لابد يكون» ، وهي من الاغني التي افضلها.
شعراء
تعاملت مع على محجوب فتح الرحمن الذي غنيت له اغنية قطار الشوق واغنية لما رحلتو يا حلوين واغنية الاحزان وحظيت قطار الشوق بالقبول الكبير وكذلك عطاء احمد فضل الله ومحجوب عبد الله «شفتك مارقة مدرستك تطوف احلى عطور حواليك» وغنيت للمادح الكبير مهدي العبد وهو الآن من كبار الصوفية عميد طبيب بالسلاح الطبي وكذلك الشاعر احمد النور «قطر المشترك» وهي تنظم حسب محطات القطار ومن شعراء المنطقة الكثيرين ولدي اكثر من عشرة قصائد.
قطار الشوق
يقول الزكار عن قصيدة قطار الشوق ان كل السودان يعرف هذه القصيدة لكن اغلب الناس لا يعرفون ان شاعرها الاستاذ على محجوب فتح الرحمن وقصة الاغنية بدات منذ اواخر الستينيات لحظة دخولي عطبرة, حيث سكنت بالقرب من نادي الامل بالموردة عطبرة وكان الشاعر على محجوب زميل لابناء اخي عمر ادريس وعبد الماجد ادريس وطلب منهم ان يعطوني قصائده وجاء بها في دفتر واخذت منه قطار الشوق وعلى محجوب يركز على الرحيل «قطار الشوق متين ترحل - لما رحلتو يا حلوين – رحلتي وجيت يا رمانة» واخذت قطار الشوق ولحنتها برفقة الكورس على ضفاف العطبراوي عصرا ومعنا مسجل «ابو طارات» وكان حينها الشاعر على محجوب طالبا بمدرسة عطبرة القديمة ، وكانت الاغنية يطلبها الجمهور مرات عديدة في الحفلات العامة والخاصة ومن ثم غنيت هذه الاغنية في مهرجان الثقافة الاول بالخرطوم في اليوم الاول بمركز الشباب بحري ومعي من الفنانين «عبدو كدباس» والامام حسن صالح وزمراوي وثنائي الكعد ومن ثم تغنى اليوم الثاني في حدائق بحري في منافسة ومن بعدها اذا احرزت درجات تغني في شارع النيل وفي حدائق القرشي ومن ثم تذهب الى مهرجان الثقافة وكانت الجائزة الاولى من نصيب النور الجيلاني في اغنية «مادلينا» وقطار الشوق كانت الجائزة الثانية لبابكر الزكار والثالثة لثنائي القنا وفي الفن الحديث خوجلي عثمان والثانية في الفن الحديث فاروق صاحب «جارتنا وبت حارتنا» والثالث عبد الله احمد من عطبرة وعبد الله عن موسيقى الجاز.
البلابل وقطار الشوق
اللواء الباقر وزع الجوائز ومن ثم غنى كل فنان الاغنية التي فاز بها وحضرن البلابل ومعهمن مسجل ومن ذلك اليوم تغنين بها في ذلك الزمن لم تكن هناك مصنفات وحقوق ملكية وقامت البلابل بتسجيلها في الاذاعة والتلفزيون وحجتهم في ذلك انهم بنات عطبرة وهذا صحيح وكذلك حسين شندي اعطيتها له لمدة ثلاث سنوات ولكنه مستمر وهناك فنان اخذها منا اسمه محمد حسن اعطانا حقنا المادي والادبي وكانت لمدة ثلاث سنوات ومن ثم اوقف ترديدها ونحن نشكره على تقدير الفن والالتزام.
النهاية
يقول الزكار «نتمنى من الاخوات البلابل وقبل ان نرفع دعوة ضدهم في المصنفات الفنية للمطالبة بحقوقنا ونحن لا نزال نقول انهن بنات عطبرة ولكنهن لم يلتزمن بالاتفاق الذي بيننا عبر التلفون انا وعلى محجوب الذي وعدنه باعطائه مستحقاته عبر الفاكس ولم يحدث منذ سنة والآن نحن نعرض عليهن الاتفاق وان نمنحهن الاغنية لمدة ثلاث سنوات فقط مقابل دفع المستحقات ونحن في مقام والدهن.
Post: #17 Title: Re: ياجماعة كايس لى أغنية...الرجاء المساعدة Author: عبد الواحد أبراهيم Date: 03-16-2011, 11:16 AM Parent: #16
على الكرار سلامات ..من أحب أغانى ود الحورى لقلبى هى أغنية (سيدة ألمتنا وبالعيون جننتنا سيده) ..وفى محطة كبوشية كنا مسطحين فى راس قطر والدنيا مضلمة اٍلا من بعض لمبات الباعة هنا وهناك سمعتها وأنا فى تلك الليلة الصيفية من فنان فى كبوشية كان يعزف على الطنبور وكنا قد طلبناها منه نحن ابناء الباوقة بالدرجة الفاخرة أعلى القطار فغناها لنا بصوت رخيم وشجئ كسر حدة تلك الظلمة الكثيفة فى كبوشية واقسم أن غناءه غادر معنا لقلب الفيافى فى رفقة التراب والرمل والظلمة..
عبدالواحد..فى حلتنا بين التاسعة والسابعة فى الثورة والحارات بعد جديدة وتحاول أن تجمع هوايات ساكنيها لعمل مجال فنى وثقافى كان هنالك جارنا الذى توفاه الله ويعمل وقتها بالسكة حديد ويقتنى عود ودراجة مزركشة وجميلة كان هو فنان الحلة المعتمد وشاعرها فى أمسيات الحارة ولديه أغانى خاصة بالمكان
السابعة فيها البلدية لكنها ناقصة الردمية
أما أغنيته العاطفية المحببة فهى
ياعجلتى الحبيبة الطلطاشر قريبة
فقد كان له علاقة عاطفية مع شابة تسكن الطلطاشر..من جهة أخرى هذا بوست حداثى جداً فارجو أن تتخارج منهو تشوف ليك بوغة أندفن فيها ولالوري سوقو أنا قلت عايز ابقى فنان حديث مافنان من عهد الطنباره.
Quote: وجدت تشجيع كبير من الأصدقاء الذين أكدوا جزالة صوتى وقدراتى التطريبية العالية
الأخ حاتم, هناك دعاء مأثور يقول : اللهم احمنى من اصدقائى اما اعدائى فأنا كفيل بهم . فأرجوك ياحاتم واتوسل اليك ان تنسى الموضوع , فوالله الشعب السودانى ماناقص . مع امنياتى لك بمستقبل عملى ناجح بس بعيدا من مسألة الغنا دى .
شوف مآثوراتك وماسوراتك الجايبه من مجلة المختار دى مابتقسم معاناعارفك بتكون حافظه من زمن المدرسة.. ناس اتق شر من أحسنت أليه والقرش الأبيض لليوم الأسود وأعظم ثروة التواضع الى نهايتو من المأثورات التى قالها عاطلون عن الموهبة..أعرف أصدقائى ماقاعدين يكضبوا واثق فى صوتى الطروب حد الثقة...
حكمة أخيرة..الفنان من غير اعداء زى الشرا من غير قندول
نجاة ..عليك الله شفته الأغنية دى كيف أما المواهب المتأخرة دى غالباً التشخيص السليم بيكشف الفرق بينها وبين البارنويا وبيحدداٍن كانت موهبة ولافلكبه وسلوك ضاربه هههه
خدر فنانى المفضل على رؤوس الأشهاد والله البوست ده اصلاً لأستدراجك لهذه الأغنية طال الزمن أو قصر ياريت لونسمعها منك بعد ماتنتهى من ونسة الشيوعيين وهى ونسة نتمنى أن تثمر خيراً ..أجمل اغنية يمكن ان تعنى لذلك الرجل الضخم الذى اضحك ابوجنزير فى ضريحه بتلك العبارة الرهيبة..حضرنا ولم نجدكم
أهليين ياحاتم أنا قصدي الايصال بتاع الشراء عشان في حالة نسمعك ومانقتنع تقوم ترجع العود وماتخسر قروشك ساكت
Post: #30 Title: Re: ياجماعة كايس لى أغنية...الرجاء المساعدة Author: د.نجاة محمود Date: 03-19-2011, 04:05 AM Parent: #29
غياتو يا حاتم حنقوم نعمل عملية جراحية لفصل فرح منك ما يقوم بكرة يجينا مصور بلبس كورة ويقول اكتشف انه لاعب كورة ختري..
شلتكم دي شلة ما تمام البتودي التهلكة دي اسعتية انت تصدق كلام اصحابك ديل وتطلع من موضوع القعدات معروف انه ما بتحتاج لموهبة كبيرة عشان ترقصهم.. تخش في وهمة انك فنان وتقوم تحي لينا حفلة في حي وتدفا دق العيش والعريس يقوليك فنان اونطة ادينا قروشنا.
كلامك دا خلاني اعمل فلاش باك لفنان مرة سمعتو في عطبرة في حلة مجاورة بغني بصوت كعب عدبل كدا
