خلاص ورمنا ومرارتنا اتفقعت يا ريس.... شكهايااخي ووزع من جديد واللا ادي زولا حريف يوزع ليك

يا ريس
سلام
امبارح القريبه ده جبنا ليك القواله القالت في مصر

Quote: إن الجيش لاحق ست عربات على الأقل لدى محاولتها تهريب أسلحة إلى مصر قادمة من السودان الأسبوع الماضي. وقال مصدر أمني "كانت هناك محاولة تهريب يوم الخميس الماضي ومنعها حرس الحدود" مضيفا أنه تم ملاحقة العربات قرب مدينة أسوان في جنوب مصر. وكانت العربات تحمل ذخيرة وقذائف صاروخية وتم رصدها بينما كانت تسير في طريق صحراوي قديم يربط بين مصر والسودان. وأكد مصدر آخر أن حرس الحدود اعترض طريق العربات بعد دخولها الأراضي المصرية. ويمثل أمن الحدود المصرية الأولوية الكبرى للمجلس الأعلى للقوات المسلحة الذي يحكم البلاد منذ تنحي الرئيس حسني مبارك يوم 11 فبراير شباط.. "رويترز

آي والله ياريس ... الله يكفينا شر قلنا وقالوا...ناس رويتر قالوا ده الكلام كلو
المحيرني انو ناسنا في السودان قالوا يخربهم ... اكان شافوا السلاح البتطاير بي جاي وجاي ده يشوفو العمي. الواحد من الزعل كان داير يقول عمي كباسا .. لكن يبروا ويستبرو من العمي اصلهم هم ما ناقصيين

قريب يومداك ماطول يا ريس د. خليل قام من تشاد او ما جاورها بي 350 عربيه او تزيد ومحمل ومكمل بي سلاحا مغزز زي صواري المولد . ..لامن توش دخل البقعه ..وزولا واحد قال شافو مافي. وبلا خجله نطا النطا لينا وقال يا عيني (رصدناهم لكن خليناهم لغاية ما نعرف نحصرهم ... )
يحصروهم وين ...جمب المستشفي العسكري ..وفركة كعب من القصر الجمهوري
يا عيب الشوم انا ما عارفين كانو راصدنهم ...كايسيين معاهم دواس جوا الحله ...واللا سايقنهم الزياره
هسع غريبة انو زول واحد قدر يشوفو شوية العربات البتتزاوق شيتا بي حلفا .. وشيتا بي الصحرا يمرقو في اسوان وشيتا بي ورا حلايب وسيبك من حكاية مصنع الشفا ديك ...وغيرو كتير ..شيتا بنعرفو.. وشيتا مابنعرفوا
انا النصيحة ياريس ..بدور اصدق اهلي. و زي ما عارف المؤمن صديق ..وانا ود بلد .. عشان كدي انا وابن عمي علي الغريب .. طبعا ده مثل ساي .. عشان مافي زولا يقول الحق .. ود المجاذيب قال الريس ود عمو بدور يتلصق فوقو ...عشان هو جعلينا زيو وكدي ...
لا لآ عيب كدي ...جعليين واللا ما جعليين ...اصلها عمرو العين ما بتعلي علي الحاجب
بس يا ريس انا حماري غلب وداير زول يركبني ..
ما قاصد زول من الجماعه البعزمو الناس وينكرو ..يقولو لا شفنا ولا رأينا ..
ولا فيني عمرا عشان يتشالبوني زي قدر الله ..عشان يركبوني بكسي من البكاسي البعرفوها ناس دفن الليل اب كراعا بره
بدور بالهداوه كدي ..ومن غير زعل واحد يشرح لي ويوريني
ناس استخبارات عسكريه وناس امن دولة وناس مباحث مركزيه وناس مباحث اقتصاديه وناس شرطة نظام عام وناس امن مجتمع وناس كشا مشي العزمناهم فطور جونا عشا ... يتنططو ويتمططو عشان يشوفو شنو؟؟؟؟؟؟؟؟؟؟؟؟
الناس دي فاضين بس لي مبارات البنيات .. دي لابسه بنطلون ... وديك طرحتا واقعه ..والبنيات ديل ماشات صبحيه وياكلن في اللبان؟!
يا ريس الناس دي اكان ما بتخجل ...كلمونا نخجل ليهم
يعني هم دايرين عمر البشير ذاتو بي شحمو ولحمو يركب ليهو تيلسكوبات بعيدة المدي وينصقر فوق راس بيتهم ...يحاحي في الطير الحايم في السما؟
يا ريس الله يديك العافيه ....ما تشوف شغلك مع ناسا اتحاوطوك بي جاي وجاي.. ظنيناهم جابوهم فزعه... بقو ليك ولينا وجعه
وناسا جبتهم بي ايديك الشديده الله يديك العافيه ...طلع شهاب الدين اضرط من اخيه .. البسووا فيهو محنا ومحن ابليس ..وسيبك من حكاية اجاويدك ده .. ديل حمارهم غلب من زمان ..نضموا وفتروا من شيتا فساد وافساد... وشيتا استبداد ...وشي بنقو ومنقو وشيتا كلام شين ود بلد والله ما برضاهو للعدو خليهو لي بنات الناس واللا بنات اهلو
فدحين يا ريس طالبك بي الله سيدي وسيدك
شكها ووزعها من جديد ..
واللا اديها زولا حريف يوزع ف(إن الله لا يغير ما بقوم حتي يغيروا ما بانفسهم) .. وكلام ملك الملوك ده يا ريس عمرو ما بقع واطه
يا اخي الله يكرم والديك ..شكها اكان تنصلح البلد وينصلح حالك وحالنا قبال.. مايوسدونا التراب ...
والوصيه بالمهله .. اكان بقيت علي الشك
خليك من ناس متفولح وفالح .. ما يوسويسو ا ليك ناس صالح ومصالح ...شوف ليك ناسا حرفاء وفالحين اكان ربنا يهديك ويهديهم
خلاص يا ريس
مرارتنا اتفقعت ..
وخلاص فترنا .. وعمرنا قصر ...
دايرين وكت نتخارج من الفانيه دي ..ما دايرين كمان ما نمشي نبلغ بي هناك ..نتشكي ونكتر النقه فوقك وفوق اهلك