Post: #1
Title: فكـّــــــــت ؟!
Author: محمد عمر جبريل
Date: 03-01-2011, 01:23 PM
تعيش الخرطوم منذ حوالي اسبوعين حالة من الهدوء والاستكانة .. فقد توقفت كشات النظام العام وحملات شرطة المرور وكل أشكال الجبايات من محليات ونفايات ووســـــخ وقرف وكل أشكال المأكلة الأخرى .. عادت البناطلين وانتشرت ستات الشاي في شارع النيل بصورة كبيرة جدا .. حتى عناوين الصحف وأعمدتها الرئيسية تخلت عن غنجها واستحيائها في توجيه النقد هنا وهناك ، والمتتبع لحركة الصحافة هذه الأيام في الخرطوم قد يلاحظ ارتفاعا في تيرمومتر الحقيقة الواضحة بلا زيف وبلا تغليف ورموز .
|
Post: #2
Title: Re: فكـّــــــــت ؟!
Author: محمد عمر جبريل
Date: 03-01-2011, 01:35 PM
Parent: #1
لم نعد نشاهد أولئك العسكر الرابضين على عرباتهم يرمقون الناس في الشارع بعين الشك والريبة فلا يوجد إلا عربات التأمين أوشرطة التأمين .. حالة عامة من السكينة لا أعرف إن كانت بسبب تعليمات من القيادات العليا ام أنها جاءت هكذا بالصدفة مع اكتساح تسونامي البوعزيزي وهزاته الإرتدادية التي ما خرجت من بلد إلا ودخلت آخر .. تذكرني خارطة هذا التسونامي بلعبة كانت تلعبها الفتيات في الطفولة (لا أذكر اسمها) ولكن يرمى فيها بحجر وسط مجموعة من المربعات في الأرض ثم تقوم الفتاة بركل الحجر برجل ووضع الرجل الأخرى في مربع آخر ...
|
Post: #3
Title: Re: فكـّــــــــت ؟!
Author: محمد عمر جبريل
Date: 03-01-2011, 01:41 PM
Parent: #2
حسنا تخيل الخارطة في رأسك الآن تونس ثم الجزائر فمصر فاليمن ثم ليبيا .. البحرين .. ترى أين سيكون المربع القادم !؟ أتمنى أن تستمر هذه اللعبة في محيطنا الجغرافي لنبقى نحن نتفرج ونرى لأي درجة تستطيع الحكومة المحافظة على هذا الهدوء والبعد عن تعكير صفو المواطنين بالجبايات وحملات التفتيش والتضييق على حريات الناس .. إذا دارت هذه الدورة كاملة وطافت كل البلدان فأتوقع أن تحل قضية دارفور في القريب العاجل وتعاد كتابة دستور السودان مرة أخرى ويعود الجنوب لحظيرة الوطن وتتم محاسبة كل الضالعين في قضايا فساد وقيام انتخابات حرة نزيهة بأسرع وقت ممكن.
|
Post: #5
Title: Re: فكـّــــــــت ؟!
Author: محمد عمر جبريل
Date: 03-01-2011, 01:45 PM
Parent: #3
ما حدث في مصر وتونس وما يحدث الآن في ليبيا واليمن دروس مجانية للحكومة وللمؤتمر الوطني ..الحكومة الآن تشاهد (لايف) وترصد كل أخطاء ونقاط ضعف التعامل مع الشعوب الثائرة وتستفيد منها .. هي تجربة عملية بالمجان ولا أعتقد أن أغبى الأغبياء الآن سيقول أن السودان ليس تونس ولا مصر ولا ليبيا ولا اليمن ..
|
Post: #4
Title: Re: فكـّــــــــت ؟!
Author: Amira Elsheikh
Date: 03-01-2011, 01:43 PM
Parent: #2
بلعبة كانت تلعبها الفتيات في الطفولة (لا أذكر اسمها) ولكن يرمى فيها بحجر وسط مجموعة من المربعات في الأرض ثم تقوم الفتاة بركل الحجر برجل ووضع الرجل الأخرى في مربع آخر ...
اسمها اريكا/ة
_________________________________-
انتى جادى بخصوص الفكة دى ؟
|
Post: #6
Title: Re: فكـّــــــــت ؟!
Author: طارق جبريل
Date: 03-01-2011, 01:47 PM
Parent: #4
يا حبيبنا كيفنك
يا زول كل شي عنده نهاية
تليشة:
يا بت الشيخ اللعبة ما اسمها بُربُرة
|
Post: #8
Title: Re: فكـّــــــــت ؟!
Author: Amira Elsheikh
Date: 03-01-2011, 01:52 PM
Parent: #6
يا بت الشيخ اللعبة ما اسمها بُربُرة
ياودجبريل بربرة الا تكون عندكم فى الشمالى ولا شكلى ملخبطاها مع لعبة تانية
|
Post: #11
Title: Re: فكـّــــــــت ؟!
Author: محمد عمر جبريل
Date: 03-01-2011, 02:04 PM
Parent: #6
| Quote: يا زول كل شي عنده نهاية |
هلا يا طارق
الخوف ننتهي نحن .. ولسة الحاجات ما بقت كويسة
|
Post: #9
Title: Re: فكـّــــــــت ؟!
Author: محمد عمر جبريل
Date: 03-01-2011, 02:00 PM
Parent: #4
| Quote: انتى جادى بخصوص الفكة دى ؟ |
عملوها ظاااااهرة يا أميرة
ظاهرة شديد
لكن مالو .. خطوة في الإتجاه الصحيح .. بس الحاجة الخايف منها تريقة باقي الشعوب علينا..
مصر تثور .. والخرطوم تغيير سياساتها الداخلية
النظام الليبي يسقط ... والحكومة السودانية تسارع بحل قضية دارفور
...... إلخ إلخ
|
Post: #7
Title: Re: فكـّــــــــت ؟!
Author: محمد البشرى الخضر
Date: 03-01-2011, 01:48 PM
Parent: #2
| Quote: بلعبة كانت تلعبها الفتيات في الطفولة (لا أذكر اسمها) ولكن يرمى فيها بحجر وسط مجموعة من المربعات في الأرض ثم تقوم الفتاة بركل الحجر برجل ووضع الرجل الأخرى في مربع آخر ... |
أريكا عميا
____________
سلامات يا عمك
|
Post: #10
Title: Re: فكـّــــــــت ؟!
Author: ناصر احمد الامين
Date: 03-01-2011, 02:01 PM
Parent: #7
و دي كيف يا محمد عمر ... لسه مربوطة و اللا شنو؟
|
Post: #13
Title: Re: فكـّــــــــت ؟!
Author: محمد عمر جبريل
Date: 03-01-2011, 02:14 PM
Parent: #10
| Quote: و دي كيف يا محمد عمر ... لسه مربوطة و اللا شنو؟ |
سلامات يا ناصر ..
مع إنو الشيشة ليست من أولويات أي زول هنا لكن دي فرصة كويسة عشان أوضح حاجة صغيرة في الموضوع ده ..
مع قرار وقف محلات تعاطي الشيشة في الخرطوم انتشرت حاجة تانية أشد خطورة على الشباب من المعسل وأبو تفاحة وأبو تفاحتين
انتشرت حاجة اسمها بيوت الشباب !! بقت كل مجموعة من الأصدقاء عندهم بيت أو شقة بتقابلوا فيها بالمساء ويسهروا حتى الساعات الاولى من الصباح
البيوت دي هي البديل لأماكن التجمعات العادية يا ناصر .. يعني زمان الناس لمن تتلاقى في محل شيشة وتتونس في العلن وقدام الناس كلها ما كان في خوف على الشباب .. هسي الونسة بقت بالدس .. وبعيد عن أعين الرقيب الطبيعي "الشارع العام" وأووووعك تتخيل الموضوع ها يقيف على تعاطي الشيشة والونسة في بيوت الشباب دي .. الموضوع مشى على حتات تانية .. ودا ما معناها الناس من زمان ما كانت كدا .. لأ .. أبدا .. كانت في الحاجات دي لكن هسي زادت
بصورة كبيرة جدا ..
الموضوع ده داير ليهو بوست منفصل عديل كده ..
معليش للإطالة
|
Post: #12
Title: Re: فكـّــــــــت ؟!
Author: حاتم كاهن
Date: 03-01-2011, 02:04 PM
Parent: #7
يعني ما إسمها ( الحجله )؟؟؟
محمد عمر سلامات معليش دي إنصرافيه مني أنا وأميرة ومحمد البشرى وطارق جبريل ساي ...
قريتنقس تو اوول ..
التعديل لإضافة طارق جبريل برضو
|
Post: #14
Title: Re: فكـّــــــــت ؟!
Author: طارق جبريل
Date: 03-01-2011, 02:17 PM
Parent: #12
بالله نحن اسم لعبة ما قادرين نتفق عليها
|
Post: #15
Title: Re: فكـّــــــــت ؟!
Author: محمد عمر جبريل
Date: 03-01-2011, 02:17 PM
Parent: #12
هلا بحاتم وود البشرى ..
|
Post: #16
Title: Re: فكـّــــــــت ؟!
Author: Amira Elsheikh
Date: 03-01-2011, 02:23 PM
Parent: #12
يعني ما إسمها ( الحجله )؟؟؟
محمد عمر سلامات معليش دي إنصرافيه مني أنا وأميرة ومحمد البشرى ساي ...
يازول هوووى ما انصرافية ولاحاجة زول كتب ليه سطرين كاملات وبسال من اسم لعبة
يبقى لازم نجاوب >>دى واحدة من الالعاب السمحة ايام الابتدائى والمتوسطة واعتقد مافى زولة من جيلنا ما لعبت>>>>وبعدين نحن ذاتنا لو دولتنا ما فاكة عندنا كم من الالعاب الشعبية يعمل اولمبيادعديل
|
Post: #17
Title: Re: فكـّــــــــت ؟!
Author: محمد عمر جبريل
Date: 03-01-2011, 02:57 PM
Parent: #16
| Quote: يازول هوووى ما انصرافية ولاحاجة زول كتب ليه سطرين كاملات وبسال من اسم لعبة |
أهلين مرة تانية يا بت الشيخ
بالجد ما كنت متذكر اسم اللعبة .. لكن أهو بالصلاة ع النبي طلع عندها اكتر من اسم
حاتم كاهن ده الوحيد الانصرافي هنا
وما جا لي حوار ولا لأي حاجة
وشوف كان أيمن زهير ضرب ليك يا كاهن 
|
Post: #18
Title: Re: فكـّــــــــت ؟!
Author: حاتم كاهن
Date: 03-01-2011, 03:16 PM
Parent: #17
أنا ما داير معاكم ياخ ، وإن شاءالله ما يضرب زاتو...
خلينا نتقابل بالدرب يا حبيب
|
Post: #19
Title: Re: فكـّــــــــت ؟!
Author: محمد عمر جبريل
Date: 03-01-2011, 07:14 PM
Parent: #18
| Quote: أنا ما داير معاكم ياخ ، وإن شاءالله ما يضرب زاتو... |
لعناية الأخ .......
الزول متصفح اساسي للمنبر
ومن المحسوبين على النظام
|
Post: #20
Title: Re: فكـّــــــــت ؟!
Author: ناصر احمد الامين
Date: 03-01-2011, 08:47 PM
Parent: #19
اللعبه اسمها الحجلة و اثناء اللعب بقولو (اريكا) و يرد الباقيين (عميا)
اذا اميره و ودالبشري و كاهن ... صاح
و لا عزاء لود جبريل
|
Post: #21
Title: Re: فكـّــــــــت ؟!
Author: حاتم كاهن
Date: 03-01-2011, 09:19 PM
Parent: #20
ناصر جاب النجيضة ..
سلامات يا ناصر..
محمد عمر صاحبي ..
قلت لي وكمان محسوب مع الجماعه ؟
نخليها البلد دي يعني ولّا نخليها يعني
أخوك أصلاً رسل السي في دبي وما قاعد ليكم زاتو ..
تفك ما تفك ما عندنا ليكم شي ...
تضااااااامن ساااااااااي تاني
|
|