إنتو دعم البشير المباشر الزلقو في الكباشي دا، للشعب ولا لي قوات الشعب؟؟

لأنو في معاش لي زولا بهمنا كان عامل في الخدمة ودا متطابق مع التصنيف الذكرو الجنرال عمر البشير في لقاء نصرتو بالكباشي (نصرتو من شنو؟)، أها المعاش بدل نلقى فوقو زيادة المية القالها البشير، لقينا المعاش عضمو ناقص، تم استفسار عن النقيصة ثم المية بتاعة الدعم المباشر دي، لأنو خلي بالك، "الدعم الغير مباشر" إترفع و الاسعار بقت لظى. الشخص الاتسأل السؤال دا ما أشتغل بي قصة النقيصة لكن عن مية الكباشي قال: والله القصة دي نزلت لكن لي ناس الجيش و الشرطة بس.

http://www.youtube.com/watch?v=02RxOgbpkaM&feature=related

معليش يا جماعة، لا صاحب المعاش ولا السأل من الزيادة ولا الزول الجاوب حا اقول أساميهم، لانو في لقاء النصرة دا زاتو من ضمن الهدايا القدموها للبشير عصا غليدة كدا وقالوا ليه: و لك فيها مآرب أخرى سيدي الرئيس. يقوموا يقعوا في جماعتي ديل نبابيت، نبقا بعدين في الغلاط، هل الضرِب دا تم بي نبوت البشير ولا فبركة؟