رسالة لى محمد سعيد دفع الله

محمد سعيد دفع الله

أعلى الأصوات
حين تصطف قامات الشعر

أجمل الأصوات
حين تتبارى معانى الشعر

أزهى الأصوات
حين تتباهى حروف الشعر

شاعر

ويكفى أن نقول شاعرا لنختصر كل صفات البشر الجميلة
أو لنتوج البشر بصفات الملائكة

كتبت هذه الرسالة ربما قبل اكثر من ست وعشرين سنة، لا اذكر التاريخ تحديدا إذ لا يوجد فيها تاريخ مكتوب
لكن ما اذكره هو أنها قد كتبت فى بداية ثمانينات القرن الماضى

وجدتها وأنا انبش فى بعض الأوراق القديمة اثناء تواجدى فى السودان قبل شهرين

ووددت أن انشرها كما هى، بكل غبارها القديم وبكل طفولتها الشعرية

ربما تغنى قليلا وتشبع شيئا من "نوستالجيا" لزمن وعمر جميل ذهب ولن يعود

ولكنها حتما تعبر عن محبة قديمة لا تشيخ ولا تنتهى لهذا الإنسان الجميل، معنى وشعرا وحضورا وعذوبة

محمد سعيد دفع الله

لك التحية والإجلال والتقدير وكل ما فى النفس من محبة

رسالة لى محمد سعيد دفع الله

يجده بخير وسعادة

=========================

محمد سعيد
ليك المنى
وليك السلام

خضرة غناك
والزول وسيم
روعة بهاك
مطرة بتنقع بالنهار
وسماها غيم
رونق صفاك
فرحا يكسى الليل نضار
خضرة غناك
زى التقول
كلمات رسالة من الحبيب
مكتوبة بى دمع الحنين ومسطره
زى فرحة العيد فى البلد
زى رجعة الغائب سنين
وياداب رجع حضن الديار
زى القمر ساعة
يمد جنحات ضياهو على السديم
زى البحر وكتين
يهابش موجو خد القيف
زى الندى
زى البشارة الجايه مارقه معطره
زى النسيم

محمد سعيد
ليك المنى
وليك السلام

يا زول بالنور مليان
يا معطون فى طيب الدنيا
يا روح الكلام
يا معطر بى اريج
ريحة الجروف
يا مسقى من نبع الوئام

نيل الحروف
المن ضو حسك نابع
فرحا نديان
كعبة هديل
ومقام نبيل
والناس تطوف
ظلا ظليل
جدول تريان
معنى جميل
كامل الوصوف
لمة حبان
جية ضيفان
وهجا يعشرق شوف العين
تضوفو الروح
وكتين تعاين وتنشرح
وكتين تكمل بيك حد الشوف

محمد سعيد
ليك المنى
وليك السلام

يتبارك النيل الحنين
المن شرايينو اتملت
حيضان غناك
يتبارك البلد الأمين
المن سواقيهو ارتوت
جيهات يباسنا وبتقت
بى ريى حروفك من نداك
بتبارك الليل الدفق
جهرة فوانيس المحنة على رباك
تتبارك ايامك وتسعد يا السمح
ويزيدك الخالق سماح
ما امسى ليل
وما اشرق صباح
ما غنى عاشق
ما نم شادى وغنى صاح
ما فاض بحر
وما هبت رياح
ما نادى المنادى
حى على المحبة
حى على الصلاة
وعلى الفلاح