"ود الصول " اللقب الأكثر شيوعاً على الإطلاق !

"ودالصول" لقب لا تكاد تبحث عنه فى مكان ما إلا و تجده حاضراً
فى كل مدن السودان تقريباً يوجد "ود الصول "
اما على نطاق العاصمة القومية بمدنها الثلاث فتجد "ودالوصل" على مستوى الاحياء!

"الصول" تلك الشخصية الصارمة المهابة لا تكاد نسترجع ذكريات المرحلة الثانوية إلا ونتذكرها
"صديق" كان صولاً شديد الصرامة وخارج حدود تلك الشخصية المرتبطة بالأذهان كان إنساناً عطوف ومربي عظيم أسهم كثيراً فى تعليم الأجيال لما له من "ظبط وربط " قل ما رأيته يحمل "كرباج" فقد كان كثير النصح شديد اللهجة نافذ البصيرة أباً حانياً.

أذكر أن كان له ولدان محمد و بابكر وكن ننادى الإثنان بـ " ود الصول " وكانوا يتشاجرو على هذا اللقب حتى أننا أضطررنا لتسميتهم ود الصول 1 وود الصول 2 كحل تلك المشكلة ...ياااااه ذكريات

رحم الله صديق الصول .

غير انى لا أرى "ودالصول" عضواً فى هذا المنبر!!!!

حمد الله على السلامة يا وليد ..
قلت اخير تجربو في ود الصول دا ..؟
الصول في حد زاتوو يا وليد كان رمزية لي زمن جميل جدا .. لو كان على مستوى الرتبة في الجيش أو الشرطة .. وهو عمك الذي على كامل هندامه يتابط عصاته الصغيرة التي يضمها بكل ترتيب ويلوح بها مصطرا التعليمات وعند تحيته يتحسسها من الامام ثم نتفض في تطبيق كل ادبيات التحية .. وهو الذي تمر من خلاله كل التعليمية التي يجب ان تنفذ كضابط عظيم جدا وزعيم للرتب الصغيرة وهو الحد الفاصل بينها وبين صف الضباط والضباط ..
بالتالي .. عادة ود الصول مقرونة بي امتدادية الضبط والربط اللي مفروض تتجسد في محيط اسرته .. لتنتقل كل ادبياته إلى العامة
الصول في المدرسة مربوط اسمه بالعقاب وبالضبط العام وايضا بالتربية والتقويم .. وبالضبط والربط في التدريب العسكري .. وهو دائما شخصية محبوبة اكتر من انها مهابة او مخيفة ..
اذكر انو عندنا صول يا وليد لما يودونا ليهو علشان يعاقبنا في أولى ثانوي .. كان بيتألم شديد جدا من الحركة دي .. وما يعمله إلا مجبر رغم انها عادة تربوية .. الصول التاني .. ما حصل شفتو ماسك ليهو اداة عقاب في يدو ..
ود الصول .. دائما هو الشخصية التعويضية لي ابوهو .. روح الفكاهة الحلوة .. الضبط والربط .. الشهامة .. شوية شرامية مع فوضى مرتبه .. ود الحلة القضاي .. ضراع الناس .. مقنع الكاشفات الممكن يغنو ليهو عادي جدا ..
غايتو كان عندنا في الحلة وومصداقية لكلامك .. نسختين ود الصول .. وبي اعمار مختلفة جدا عن بعض ..
الاسماء المنافسة لي ود الصول .. وبتلقاها ذات رواج عالي .. منها:
درش .. ودائما بيطلق على مصطفى ..
+
ببــو .. ود ممكن يطلق علي اي اسم ما شرط يكون عماد ببو .. أو محسن ببو

عمك الصول بتاع الكديت في مدرستنا الثانوية كان من اولاد الموردة , المشكلة عمك الصول كان صقراط كبير كرهنا الديش زاتو

لكن يا وليد شكلك تربية اشلاقات

التغيير الرسمي في مسمي الرتبة من (صول) الى (مساعد)

لم يجد قبول وتطبيق الا في المكاتبات الرسمية فقط

اى ضابط حديث عهد بالخدمة لاغني له عن خبرة الصولات

والرقباء اوئل فهولاء هم عصارة الشرطة أو الجيش

ولازلت ادين بالفضل للصولات موسي دار موسي ، موسي محمد موسي

حسين اربيل ، دفع الله عمر العاقب ، بشير ، كباشي ، الكيك ، ابراهيم كجو

مامون تاور ، مامون ، سلمي عطرون ، حسن تية سوكة ، الجدي ، محمد قربينة

دفع الله صبر ، الزقندي ، حسن صالح ، عبدالعزيز ، ............... والكثير من عظماء

الصولات الذين لم تسعفني الذاكرة باسمائهم .............

غايتو البوست دا ممكن يتولاهو صديق الموج لأنو ود عمك الصول الطيب الموج

ودا طبعآ قبل مايتولاه المولى عز وجل فى بوست مجاور

عمر عثمان إزى الحال

شكراً لذكرك لذلك العدد المقدر من "الصولات"
على ذكر الصولات والبوليس ذكرتنى قصة لذيذة جداً طرفها محمد كرودي
انا وجارنا عمر عبدالعزيز لمن خلصنا الجامعة قلنا نشوف المخارجة من موضوع الخدمة الإلزامية ده كيف
عمر قال انا عندى قريبي ضابط كبير قوم أرحك ليهو فى الإشلاق طلع قريبوا منو؟ المعروف لديكم جـدا "عوض بوت"

قام عمر قال ليهو والله يا عوض عايزين نتخارج من الخدمة دى شوف لينا طريقة، المهم بعد ونسة طويلة قام قال لينا " يا خى إنتو ليه ما تقدمو فى البوليس؟ "
قام عمر طوالي ردعليهو " ياخ البوليس ده قالو ما نافع "
عوض بوت بإستغراب (شنو ؟منو القال ليكم ما نافع؟!!)
قام عمر بكل عفوية قال ليهو ( والله الكلام ده قالو محمد كرودي)
عوض بوت : ( محمد محجوب كرودي؟!)
عمر قال ليهو بتردد أيوه

عوض قال ليهو "بحنق كده " (طيب وكت ما نافع مالو قاعد فيهو؟! ) تننننننننننن

بعد ما طلعنا قلت لعمر ياخ حرام عليك جبت لكرودي الهوا
قال لى "عليك الله ؟" D:

طبعا محمد كرودي كان لسه فى الخدمة ، لكن طبعا ما جبنا ليهو اى سيرة D:

دمت

أساسي إزيك ياخ

هسه حلتكم بري دى معقول ما فيها "ود الصول" !

كدى شوف ليناياخ

سلامات يا ولي
بعد إذنكـ بس داير أشوف أخونا أساسي ده
إتعذب عذاب شديد خلاس ما بين الحلبي و الصول

أوووو إزيك يا نوبي
يا زول إذنك معاك




---
ياخ يومداك إنشغلنا مع آبدول
نسينا ناخد تلفونك
أجدعو لى فى الخاص بالله

أرقدعافية

quoteقلت اخير تجربو في ود الصول دا ..؟ quote
قلنا نروق المنقة :))

--
تمبس ما عارف ليه كنت حاسي البوست ده حيجيبك
لا يفوتنى أن أشكرك على إيرادك لاولاد بــبو فى هذا البوست

chao

غايتو "ود الصول" بتاع حلتنا كان مكنيكي