Post: #1
Title: كما تدين تدان مواقف طريفة جدا وحرجة في نفس الوقت وأنا الغلطان
Author: حمد عبد الغفار عمر
Date: 02-15-2011, 03:06 PM
في بداية التسعينات ونحن نتحاوم بحثا عن وظيفة وفلس السنين وزهج شديد
كنت ماشي في شارع الجامعة قريب حتات وزارة الزراعة ديك
والوقت داك ظاهرة الشحادين بدأت في الانتشار
فجأة لفتني رجل كبير في السن وقال لي يا ولدي....
قبل ما يكمل كلامو قلت ليهو الله يدينا وأيدك يا حاج
الراجل أنفجر فيني غاضبايا صعاليق يا قليلين الأدب
انتو قايلين أي زول يسألكم شحاد لو عايز قروش انا بديك وكمية شتائم
شعرت بغلطتي وقعدت أحنس فيهو عشان يهدأ وكمية اعتذارات
المهم هدأ شوية وقال لي أنا كنت عايز أسألك من وصف مكان
وصفت ليهو المكان وإنصرف
لكن ظل الموقف بكل حزنه مخيم على نفسي
وتذكرتو أمس بقو وبنفس السيناريو بس المرة دي على انا شخصيا
يتبع
|
Post: #2
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: SAIF MUstafa
Date: 02-15-2011, 03:45 PM
Parent: #1
لوووول
دى أسمها شلاقة وعمك ما عندو دخل بظروفك ولا بملابسات سقوط هيكل الزراعيين الوظيفى قبل قرابة عقد كامل من الحادثة...
تحياتى
|
Post: #3
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: حمد عبد الغفار عمر
Date: 02-15-2011, 04:16 PM
Parent: #2
سيف الطويل كيفنك ومشتاقين بجيك راجع بس أسمع الكوبليه التاني
في السعودية ظهرت ظاهرة الشحادين في الإشارة
انا جديد نوعا ما في الرياض وبعض الشواراع لسة ما راكزة لي كويس
وطبعا في الرياض لو دخلت في شارع غلط المسألة دي بتكلفك على الأقل ساعة
عشان تجي راجع لي محلك خليك من تصل المحل الماشي ليه عشان كدا
بسأل كل ما القى لي فرصة في الشارع
أمس ركبت العيال وماشين لزيارة واحد قريبنا في محل أول مرة أمشي ليه
وصلت حتة الشوارع جاطت لي لحسن الحظ الأشارة قفلت أحمر قدامي
قلت أسأل العربات الجنبي عاينت يساري مافي واحد مقاصدني عربية متقدمة والتانية متأخرة
بحركة "غريبة طبعا" نزلت ومشيت للعربية القدام كان في واحد غير السواق باليمين
وقافل القزاز حقو لما شافني أول حاجة دخل يدو في جيبو وطلع خمسة ريال فاكرني شحاد
وعايز أفتح القزاز أنا ما اتمالكت نفسي قعدت أضحك الراجل لما شافني أفتكرني مجنون
بسرعة قفل القزاز أشرت ليهو، اشر بيدو على رأسو (يعني انت مجنون؟)
بسرعة رجعت ركبت العربية لأنو الإشارة حتفتح
لقيت الست وعيالها ميتين بالضحك
هنا قصة الراجل بتاع السودان زنننن زنت لي في رأسي
وتأكدت أنو كما تدين تدان
بالله شوفوا الزمن دا دوار كيف؟
|
Post: #4
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: عاطف مكاوى
Date: 02-15-2011, 04:25 PM
Parent: #3
ما ساعد في حكاية الرياض (قصر الجتة) ... وكمان حا يكون معاها زيادة شحوم وشعر (آرتُشي).
|
Post: #5
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: حمد عبد الغفار عمر
Date: 02-15-2011, 04:39 PM
Parent: #4
هلا يا عاطف
كيفنك
شفت الله دا بيأخد حق المساكين كيف؟
بعد شوية لو لقيت طريقة بحكي ليك قصتناأنا وعلي يوسف مع الكمساري
ياخ ديك أيام عجيبة خلاس
|
Post: #6
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: ناصر النعمان البدوي
Date: 02-15-2011, 04:43 PM
Parent: #4
Quote: وقافل القزاز حقو لما شافني أول حاجة دخل يدو في جيبو وطلع خمسة ريال فاكرني شحاد
|
موقف طريف جدا أخي حمد يصلح لأن يكون سيناريو كارب لكاميرا خفية
تخريمة: الخمسة ريال عملت فيها شنو
|
Post: #7
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: حمد عبد الغفار عمر
Date: 02-15-2011, 04:53 PM
Parent: #6
الأخ ناصر النعمان
عساك بخير
| Quote: تخريمة: الخمسة ريال عملت فيها شنو |
ياخ هو لحق يطلعها لما شافني بضحك افتكرني مجنون قفل القزاز بسرعة
لأنو فعلا غريبة زول انزل من سيارة في الإشارة ويسأل لكن كنت محتاج فعلا أسأل الدنيا ليل
وبرد والعيال لو رحت بالليل داك تبقى مسألة
طبعا أن تبت تاني لو أروح يومين في الرياض دي ما بسأل لي زول تاني
|
Post: #8
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: حمد عبد الغفار عمر
Date: 02-15-2011, 06:47 PM
Parent: #7
يا سيف
وينك ما ظاهر ولا في البورد أب عجاجة دا
بالله تذكر الشلهتة البعد التخريج ديك
Quote: دى أسمها شلاقة وعمك ما عندو دخل بظروفك ولا بملابسات سقوط هيكل الزراعيين الوظيفى قبل قرابة عقد كامل من الحادثة...
|
شلاقة ساي العقل الباطني بتاع إنوا انا مفلس وما عندي إمكانية لمساعدة أي زول
اتحرك بسرعة وكانت النتيجة ال########ة دي مع عمك دا
بالنسبة لهيكل الزراعيين طبعا المسألة دي بدأت تتطبق ونحن في سنة ثانية يعني بعد ما تورطنا
انقر أنا من ديك بطني ما طمت؟ لكن نعمل شنو فرحة جامعة الخرطوم كانت طاغية
تسلم
|
Post: #9
Title: Re: كما تدين تدان مواقف طريفة جدا وحرجة في نفس الوقت وأنا الغلطان
Author: عاطف عمر
Date: 02-15-2011, 09:26 PM
Parent: #1
حمد يا فنان
تحيات وسلامات بالكوم
قريباً من قصتك بتاعت إشارات المرور في الرياض
كنت قبل شهرين في إجازتي السنوية في السودان
كنت جالساً ذات أمسية في دكان أحد الترزية بسوق سعد قشرة بالخرطوم بحري وهو ترزي أتعامل معه من سنوات طويلة منتظراً أن أستلم ( الجلاليب والعراريق والسراويل ) التي أفصلها عنده كلما أتيت للسودان . لفت نظري مرور أسرة مكونة من زوج في مقتبل الشباب ومعه زوجته الشابة وبينهما أطفالهما الخمسة ( ما شاء الله ) ،أكبر الأطفال كان في التاسعة أو العاشرة من عمره تقريباً وأصغرهم في الثالثة تقريبًاً ونظراً للزحمة المعتادة في سوق سعد قشرة فقد كانت الأسرة تسير في شكل صف متماسك أوله الوالد وآخره الزوجة وبينهما الأطفال الخمسة حسب أعمارهم .
لفت منظرهم بهذه الصورة رواد سوق سعد قشرة فبدأت التعليقات ( التي لا تذكر اسم الله ) من مثل
"القطر دا .... "
" أعمدة كهرباء مرصوصة .... "
" طقم حلل...... "
شعرت برجفة خوف حقيقي ،وتحرك في دواخلي ( الأب )، فرميت بجلاليبي عند الترزي وسط الذهول الذي اعتراه وأصبح يرقبني ،وذهبت مسرعاً للزوج الشاب ، سلمت عليه ولأنني أعرف توجس وشكوك الناس في الحيل التي يتعرضون لها من المتسولين ، فقد قدمت له نفسي بصورة تبعد عن ذهنه الشكوك ( التسولية ) قلت له بعد السلام الذي رده عليه بفتور واضح
" ياخي أنا ( المهندس ) ..... مقيم في دولة الإمارات .. وأنا الآن في إجازتي السنوية ، أنا كذلك ( والد ) مثلك لأطفال . سمعت تعليقات أدخلت الرعب في دواخلي عن منظرك وأسرتك حفظكم الله ،أرجو أن تعتبرني أخاً ناصحاً وترجع هؤلاء الصغار للمنزل حفاظاً عليهم وتتسوقون بصورة تحفظهم من العين ......"
أدهشني موقفه ،أدخل يده في جيبه وأخرج ورقة نقدية وقدمها لي قائلا
" ملعوبة يا هندسة ...دي بالجد جديدة ... "
تركته ورجعت لمقعدي عند الترزي
لم يتمالك الترزي نفسه وذهب له معرفاً إياه بشخصي مؤكداً له سماعه للتعليقات التي ذكرتها له.
تدخلت الزوجة التي كانت ترقب الحوار
وأخذت أولادها بسرعة وبخوف حقيقي وأرجعتهم لسيارتهم
أسرني موقفها وهى ترجع لي شاكرة بين دموعها الغزيرة ودعواتها التي أرجو أن يتقبلها الله
______________________
نسيت أقول ليك يا حمد
كنت كذلك آخر قيافة
تصدق ؟؟؟؟
|
|