Post: #1
Title: من مفارقات مجتمعنا السوداني
Author: عادل الباهي عبدالرازق
Date: 02-13-2011, 11:16 AM
عليكم الله شوفوا المفارقات دي كيف
(1)
تدخل بت النعمة بيت العزاء وشاقا حلقوما وهاك ياردحي الليله يا حليل زينه الرجال ، الليله ياحليل دراج الوليه ، أووب أوووب يا الصغير وجاهل ويشيلوها خمسه نسوان ويختوها خمسه نسوان يابت النعمة أستغفري ربك يقوم النسوان يهجروها في العنقريب بالقوة، دقائق وتجي صينيه الفطور بت النعمه تقعد ليك سنتر في الصينيه تقضي علي الاخضر واليابس وتقوم ترفع ليك صحن وتتلفت زي سواق التاكسي وتقعد تكورك هوي يا بنيه هوي يابت الرضيه تعالي لي يا أمي أنتي .تقوم البت تجيها وتقول ليها نعمين يا خالتوا تقول ليها نعم الله عليك ياحبيبتي أمشي أمليء لينا الصحن دا لحمه وركزي لي خالتك علي السنكيت أصلوا خالتك سنونا كعبات.. دي حاله دي بلاهي .
(2)
تجيك مره من حريم الخليج في أجازه معنكشه دهب التقول راجلا شغال حرامي تمشي تعزي في وفايات قديمه تلبس ليك
الدهب للكوع وتوب الهمر وتمشي تشبك لي بنات وزوجه المتوفي أههي أههي أههي تقعد تعاين ليها في عيونا بلاهي دمعه واحده مافي. عيونا بيضاء زي البصله في ملاح الرووب . أسع في زمتكم دي لو قالت الفاتحه وقرأت سوره الفاتحه للمتوفي مش يكون أحسن .
(3)
تكون قاعد في الحله عاطل بلاهي الحله كلها تكون شاماك تقول لبت الجزار بحبك تقول ليك يحبك برص وعشره خرص
ياعاطل ياباطل عاوز تعرسني عشان قروش أبوي لمن تسمع قروش أبوي تقول بت النفيدي ، هو أبوها زاتوا لو جمع قروشوا كلها مابتجيب ليك 20 كيلو لحمه، تقيف في الشارع عاوز تركب ملح يجيء طالع من الحله عباس الاعور ماشي الخرطوم تقول ليهوا يا عبس ماماشي الخرطوم يلولح ليك رأسوا ويقول ليك ماشي سوبا ، تقوم كده الدنيا تفتحا عليك وتسافر تغترب ترجع بعد سنه بلاهي الحله كلها البتعاين ليهوا ساكت يبتسم ليك زي أم العروس شن جدا للمخده الكيس ولا القطن .حاجه تحيير .
(4)
يقوم ود التايه يجيب شيلتوا ويجي للعرس أخواتوا يفكوا الشمار وبنات الحله الاعمي يشيل المكسر كلهم لبيت التايه ويشبكوها ليك ياخالتوا حمدلله علي سلامه المحروس ولدك وهاك يامكوه وهاك ياغسيل مع بنات التايهه كل واحده عاوزا
تفك البوره وبنات التايه غتيتا غته يدن ليك كل بت عشم والبنات المسكينات هاك يا جلبطه في الوشي لايخلن زبادي ولا عجور يقوم كده ود التيه يخطب من بره الحله بلاهي بنات الحله يشمن ليك التايه وبنات التايه ويجن حفله الحنه ويقعدن في اخر كراسي لا بيجاملن ولابيشاركن في الرقيص تجيهم بت التايه يابنات ماتجن ترقصن تقوم واحده تقول ليها عندنا ملاريا زاتوا وتقوم تطنطن بي تحت أنتي وأمك تكاكوا هنا وتبيضوا هناك .
(5)
تقوم تشوف ليك بت تحبها أجمل منها ماتشوف جمال مابعدوا جمال أناقه مابعدها أناقه بدكير ومنكير وميكب يحيرك زاتوا
بلاهي لو فتحت الخرطوش في وشها ينزل ليك جنس جير من الوش التقول الوان الطيف ، أها تقوم تمشي بيتهم فجاءه وبدون سابق أنذار تلاقيها الشعر منكوش زي الشيطان ولابسا ليك قميص جناح أم جكوا وريحتا توم توم تحلف تقول حله فاصوليا ولافه فالحاله دي أحسن تكمل تعليمك وبلاش منها عرسه .
(6)
تقوم تركب المواصلات تلاقيك حاجه بخيته وحاجه بخيته قتلت خمسه رجال حسره ساكت كلاما كتير وفاطا شبكه زاتوا وتقعد تشبكك يا ود الهديه مبروك لخالتك العرست بركه الربنا فكا ليها بورتا. وانت أختك طلقوها مالا؟ وجارتكم بت عزيزه قالوا حامل صحي؟ . يأخي أنا دايه قانونيه، انت قالوا لي سقطت في الامتحانات ماتشيل هم السنه الجايه شد حيلك؟ بلاهي شويتين كدة البص كلوا يعرف المخفي عن حياتك .
بجيكم صادي
|
Post: #2
Title: Re: من مفارقات مجتمعنا السوداني
Author: عادل الباهي عبدالرازق
Date: 02-13-2011, 11:30 AM
Parent: #1
(7) سعاد بايره بورهة عدوكم بلاهي مافي زول قاعد يعبرا ولاحتي بالمزاح قام شقي الحال حمد ود أبراهيم شاف فيها فتاة أحلاموا مش بيقولوا حب الناس مذاهب لكن ود أبراهيم مفلس فلسه قام صارحا بحبوا سعاد شافت الدنيا فرحت ليها وبقت تساهر تعد النجوم نجمه نجمه بس بعد يومين جاءت لود أبراهيم شوف ياحمد وأن بقول ليك بصراحه أنا في واحد متقدم لي وجاهز من مجاميعوا وأهلي ضاغطني فبلاهي أعمل ليك خطوه جادة . يأخي كاااااك دي كضبه أبريل ولاشنو .
(8) البنت في أيام الحب والخطوبه تشبك ليك حبيبا بعيش معاك تحت شجره وبنوم معاك في واطه الرحمن دي وبأكلا معاك كسره بي موية نظام جر رجل وكده والبت تلاقي خشما صغير بلاهي البلحه تدخل بي صعوبه بس حبيب الغفله يمد رأسوا للزواج البت تشبكوا ليك حجز الصاله والفنان والكوافير وفستان الزفاف وجيب جيب جيب لمن خشما يصل أضنينا والعريس يصلع ويشيب هم ساكت قبل ليلة الزفاف . دي حاله أحسن منها حالتنا دي .
|
Post: #3
Title: Re: من مفارقات مجتمعنا السوداني
Author: ياسر السر
Date: 02-13-2011, 12:06 PM
Parent: #2
سنين راحت والحال ياهوا زاتو الحال ،،، تسلم يا عادل الباهي على التصوير الدقيق ده ،، لكن الحل شنو ؟؟
تحياتي : ياسر العيلفون
|
Post: #4
Title: Re: من مفارقات مجتمعنا السوداني
Author: عادل الباهي عبدالرازق
Date: 02-13-2011, 04:03 PM
Parent: #3
العزيز ياسر العيلفون
حياك الله
المجتمع السوداني مفارقاته كثيره كان بالداخل او الخارج
عفويه وبساطه في التعامل لدرجه السذاجة .
شكرا للمرور المقدر .
|
|