يا معارضي الكيبورد كأنّ على رؤوسكم الطير ... متي موعد المظاهرة القادمة؟؟؟؟؟؟؟

أقول ليكم حاجة


شوفوا ليكم شغلة تانية

ياعمك الناس ديل اشتغلوا شنوا

كيف يا أخي اشتغلوا شنو؟
إنتا قايل التنظير دا بالساهل كدا؟

دي عبقرية

هسّع فكرة مظاهرات الشموع دي كانت ح تخطر ببالك؟

بعد فشلهم فى تعطيل البكاسى ومواتر الامن اسفيريآ - جهاز ...وار المظاهرة ميدانيآ

يا جماعة كدي جرّبوا الإيسكريم عند التعرّض للبمبان فيبدوا أنّ مفعوله أفضل من البسبي كولا والإسبرايت بس على شرط يكون آيسكريم فانيليا يعني بتاع الفراولة والكاكاو ما ينفعوا مع البمبان

كدى رشحو ليهم يوم تانى
خلو ناس فرجينيا ديل يحركو ليهم كم مظاهرة كده عبر الاثير

غايتو مظاهرات امانى العجب الاسفيريه خطيره بشكل....

Quote: دي عبقرية هسّع فكرة مظاهرات الشموع دي كانت ح تخطر ببالك؟

دي زي (شموخ اشجار البلوط المتدثرة بوشاح من الأصداف التي تزين جيد النورس، والذي تبرق عيناه كمفتاح شنطة حبوبتي كلتوم ذو اللون الفضي الصارخ...)
جزيرة كمشتكا خريف 2011

بالمناسبة وين اخونا (حميدة)؟؟

Quote: دي زي (شموخ اشجار البلوط المتدثرة بوشاح من الأصداف التي تزين جيد النورس، والذي تبرق عيناه كمفتاح شنطة حبوبتي كلتوم ذو اللون الفضي الصارخ...)

يا أخي دي روعة

شكراً لحبوبة كلتوم

أنا لو علي
أرشّح ليهم يوم 11 شهر 11 سنة 2011

11/11/11
ويسموها انتفاضة خطين

Quote: أرشّح ليهم يوم 11 شهر 11 سنة 2011

أيه رأيك في 11/11/2111 ؟؟

11/11/111

.المعارضين من اجل المعارضة الذين يعارضون من مكاتبهم هم لايعارضو الا انفسهم .
لايجيدون فنون المعارضة ولايعرفون كيفية معارضة نظام سائد ..
هؤلاء هم الذين يدعون ان نظام الانقاذ فاسد وفاشل دون ان يغيرو او يقدمو اى شئ يذكر..
حكومة الانقاذ الذى يحكم البلاد منذ 1989 لايتأثرو بهتافات من لايدرون انهم لايدرو كيف يعارضون ..
المعارضين من اجل المعارضة لايهمهم راحة الشعب كما يدعون بقدرما يهمهم الوصول الى مبتغاهم وهو الكرسى اللى مجنن الناس جن ؟
مناضلى الاسافير اليوم يقفون فى صف الخونة ومصاصى الدماء ضد ابن الوطن الرئيس البشير ولكن كما قال البشير ان المعارضين هم اعداء الوطن ..
مناضلى هذا الزمن لايعرفون ان يفرقو بين الوطنية ومعارضة نظام حاكم من اجل الوصول الى السيادة ولكن هيهات ؟؟
المناضلين يستخدمون اسلوب العاجزين عن المواجهة والاقناع فى معارضتهم للنظام الحاكم ولكن مثل هكذا اساليب لاتزيد الانقاذين الاقوة وصلابة ..
كلنا يعلم ان للحكومات ايجابيات وسلبيات ولكن مناضلى الاسافير لتيرون الايجابيات فقط يرون السلبيات ..؟
من كثره كرههم للمؤتمر الوطنى يتخيلو بأن المؤتمر الوطنى هو السودان لذا اصبحو لايفرقو بين الوطن وحزب المؤتمر الوطنى ...
امثال هؤلاء هم يعارضون من منزلهم فقط ..
يعارضون من مكاتب مكندشة وضل بارد ..
افيقو للوطن
















UP

ياخ أختشي على دمك إنت وهو ..

على أقل تقدير من أجل زميلنا هنا وهو يواجه آليات القمع والتعذيب
..

موعدنا غداً مع التظاهرة الإسفيرية المليونية

مواكب السلام والحرّية .. 21 فبراير .. كل مدن السودان


فكونوا معنا إسفيرياً سننقل لكم الحدث لحظة بلحظة حال حدوثه الواقع الإفتراضي

تحياتي ياكمال
مؤكد وثابت آتية لا ريبة (لوكوا) الصبر.
أيوب
قلت (هؤلاء هم الذين يدعون ان نظام الانقاذ فاسد وفاشل دون ان يغيرو او يقدمو اى شئ يذكر) نسمع رأيك في كلمتي فاسد وفاشل ..
الشفيع

.










up

من طواقي الجبهة من دقن الترابي
من اباريق تدلق الدم في المواعين والكبابي
من حقوقنا ايتامنا من سبحة مرابي
من صدى اهات سنابل دابها في حوضا بتشابي
من قنابل نازفة في حلق الطوابي
بالقرار الأربعيني رخيص ونابي
جيتنا في اول بيان للعزة والحرية مابي
يا البشير بالشر معمد انقلابي

صوتك المسلوب مطرّق بالاراجيف والخيانة
صوتك المغضوب معلق فوق مصابيح الحزانى
وحبلك المفتول مصنّع من دقون تحت الديانة
جيتنا في تهريج برامج هشة مهدود حيل كيانا
من كتاب عرابي يتاجر بالديانة

والعصابة كلابا تنبح والقوافل ما بتهابا
ماشه وماشه وفي طريها دبمه للوعى ارتهانا
مهما حبلك زاد متانة
مهما مشنقتك تدلت ما حترفعك مكانه
انت ماذاكرت ماضي زمن رفاقتك في الخيانة
يوم هبوب الريح على زمن المهانة
دكت الحصن المحصّن بالزنازين والعيون
بالمكايد والظنون
بالطموحات المهابي





عاش نضال الشعب السوداني
الخزيء والعار لكل كوز دجال
الشعب يدين تجار الدين

أيوا كدا

دا الكلام ولا بلاش

عاش كفاح الطبقة العاملة

وداون داون USA

عاش نضال الشعب السوداني في الأسافير

والتنظير الفطير شعارنا للتغيير

Quote: ياعمك الناس ديل اشتغلوا شنوا

الحاجة الوحيدة العملوها ورطوا بعض الشباب وخلوهم يرموهم في السجون وعملوا نايمين

Up

زى فرانكلى ده حيعمل فيها زى ما عمل عمرو اديب بعد نجاح الانتفاضه السودانيه (180 درجه) يقلب.

تحياتي الشفيع

Quote: مؤكد وثابت آتية لا ريبة (لوكوا) الصبر.

يا أخي اسنان نلوك بيها ذاتو ما فضّلت من اللواكة في الفاضي (سن يحك سن)
بعد دا عايزنها كبوسلات ولا دربات صبر لو ممكن

أنا غيتو وفري فرانكلي منتظر التغيير عبر صناديق الإقتراع

صوناً للأرواح وحقناً للدماء

وتبقى الأسافير مكان وثير للتنظير

تحياتي
كمال

Quote: وتبقى الأسافير مكان وثير للتنظير

هي لمن الاسافير مكان وثير للتنظير

أنت يا فريد عصرك قاعد فيهو مالك

ماتشوف ليك شغل غيروا وخلينا نحنا ننظر

صحي الكوز لا يستحي لكن يخاف

يا مناضل ما تتضايق في الفاضي ساكت

Quote: أنت يا فريد عصرك قاعد فيهو مالك

أنا زول بحب الراحات والضل البارد شديد

وبحب التنظير عايزين نتظروا براكم ولا شنو؟

نظّر يا مناضل قشّة ما تعتّر ليك

وأهو نحن ورانا إيه؟

Quote: يا مناضل ما تتضايق في الفاضي ساكت

الله لا جاب الضيق مادام أني علي قناعه أنكم سوف تذهبون الي مزابل التاريخ وأن طال أنتظارنا .

Quote: أنا زول بحب الراحات والضل البارد شديد وبحب التنظير عايزين نتظروا براكم ولا شنو؟ نظّر يا مناضل قشّة ما تعتّر ليك وأهو نحن ورانا إيه؟

والله برضو برافو أحيي شجاعتك أنت أنسان قنوع جدا كون أنك تكتفي

بس بالراحات والضل البارد باقي أخوانك الكيزان زياده علي الراحات
والضل البارد يحبون أكل السحت ومال اليتامي ويمتصوا دماء الغلابه ويقتلون
ويفسدون في الارض و الخ الخ من بلاويهم التي لا تحصي ولاتعد .

يا شلام عليك يا مناضل يا أصيل

تعرف تحيتك لشجاعتي دي حقو ألبسها دبور او نيشان وأي كوز يتكلم معاي أقول ليهو شوف المناضل داك قال فيني شنو

Quote: والله برضو برافو أحيي شجاعتك أنت أنسان قنوع جدا كون أنك تكتفي

عشا نضال الأسافير المريح ومعاً من أجل ثورة الضل البارد

لن يحمنا الكيزان ولن يخيفنا سجن ولا سجان

أخي فرانكلي، لا تنفعل وتركب الموجة الإستفزازية الموجهة نحو المناضلين وبينهم من يقبع في سجون النظام. فهذه مسئولية كبيرة.

بعدين حتجي تندم على كل كلمة إستهزاء كتبتها هنا، حيث لا ينفع الندم. وده حيكون جزء من تاريخك وموقفك تجاه ما يحدث.

هذه كلمة من أخ محب لك، أرجو أن تقبلها بصدر رحب.

أخي العوض
تحياتي

أنا غير منفعل ولكن متفاعل مع قضية نضال الكيبورد

ليس لي اي استفزاز أو سخرية على النضال الحقيقي في أرض الواقع وأحترم خيارات المناضلين الحقيقيين أيما احترام

ونسأل الله أن يفك أسر من اسر واعتقل ونرجو من الحكومة ارساء دعائم حرية التعبير السلمي ما لم تتقاطع وحريّات الأخرين وعقائدهم

لكن نضال الكيبورد هو الذي يستخف بقدرات وعقول وأفكار وطموحات المناضلين الحقيقيين

وهذا النضال الكيبوردي ليس مستخفاً بدور الشباب الفاعل في أرض الواقع فحسب بل محبط للهممم ومثبّط للعزائم

لأنّه بكل بساطة تغريد خارج السرب تهريف بدون علم على واقع الحال في السودان وحاجات وتطلعات الشباب والمواطنين الحقيقية

وهو أي نضال الكيبورد رفاهية اسفيرية لا تعدوا كونها موهبة وهواية تمارس لإشباع الذات بالفعل السلبي

والإكتفاء بالخمول الفكري والتنظير المنقول من تجارب الغير مع تباين الأفعال والأعمال

ونحن هاهنا فقط نشير لهذا السخف ونضع خطوطاً حمر مع كم هائل من علامات الإستفهام والتعجّب

تحية طيبة وتقدير
أخوك كمال

مناضلي الكيبورد ديل يا كمال هم من دكوا عرش بن علي في تونس

وزلزلوا أقدام الطاغية حسني مبارك وسوف يدكوا ويهزوا عرش دوله

تجار الدين من الجبهجيه الشبعنجيه والزمن بيننا وسوف ندخل الخرطوم دخول الفاتحين شئتم أم أبيتم .

Quote: ونحن هاهنا فقط نشير لهذا السخف ونضع خطوطاً حمر مع كم هائل من علامات الإستفهام والتعجّب

السخف هو تأييدكم لحكومه غير شرعيه أتت في أنصاص الليالي لسده الحكم .
السخف هو أن تهتفوا لنظام مجرم فاشي قتل وشرد وأغتصب وشرذم الوطن الي دولتين وحلايب محتله .
السخف هو أن يغتني بعض رموز النظام علي حساب الفقراء والمساكين والغلابه والكادحين .
وعن ماذا تتعجب ؟؟؟

تتعجب علي خيبة من تأيد يا كمال ؟؟
أم تتعجب علي نفسك الاماره بالسوء كونها تعرف أين الحق ولاتسانده ولاتستحي ؟؟؟

سؤال

هل أنت مناضل كيبورد؟

Quote: سؤال هل أنت مناضل كيبورد؟

أنت شائف شنو ؟؟

ما دام سألتني

أنا شايفك أقرب للمهرّج من المناضل الكيبوردي

وفيك عوارة بتاعة شفّع لا تخفى على أحد

وشابك الناس حكومتك وكيزان والعوارة إيّاها ودي مرحلة طفولية كيبوردية تجاوزها الزمن

لكن نعمل شنو مع عقلية التهاتر الإسفيرية دي

أنا بقول ليك خلّي العوارة بتاعتك دي عشن على الأقل تكون مقبول مناضلاً كيبوردياً

أنا عندي إحساس لا يخيب أغلب المهرّجين الإسفيريين الذين يشبكون الناس حكومتك ورئيسك والعواراة إيّاها هم غواصات بيحاولوا بغباء مستحكم يثبتوا للأخرين العكس

إنت شايف شنو في رايي عنّك؟

Quote: أنا شايفك أقرب للمهرّج من المناضل الكيبوردي وفيك عوارة بتاعة شفّع لا تخفى على أحد

طيب شكرا علي الاطراء

أعيذك بالرحمن من شر كاتب له قلم زان واخر سارق

ماذا تعرفي عني وعن نضالي ؟؟؟ ومن أنت أصلا قيل
قديما لايعرف قدر الرجال الا الرجال
تفاخر ابناء الملوك سفاهه وبولك يجري فوق ساقك والكعب.
، أسع في زمتك
دي مع أني عارف لا ذمه لديك علي من تنطبق هذه الصفات
التي خطتها يداك الناعمه بس في الصفحه الاولي بوستين
وكلهن ضحك شائفك الليله قاعد تضحك زي أم العروس الكبه
نزلت ولاشنو ؟؟
انا أصلا ماعندي زمن أضيعوا مع هلفوت زيك
لقد قتلتك بالهجاء فلم تمت أن الكـلاب طويله الاعمار

Quote: أخي العوض تحياتي أنا غير منفعل ولكن متفاعل مع قضية نضال الكيبورد ليس لي اي استفزاز أو سخرية على النضال الحقيقي في أرض الواقع وأحترم خيارات المناضلين الحقيقيين أيما احترام ونسأل الله أن يفك أسر من اسر واعتقل ونرجو من الحكومة ارساء دعائم حرية التعبير السلمي ما لم تتقاطع وحريّات الأخرين وعقائدهم لكن نضال الكيبورد هو الذي يستخف بقدرات وعقول وأفكار وطموحات المناضلين الحقيقيين وهذا النضال الكيبوردي ليس مستخفاً بدور الشباب الفاعل في أرض الواقع فحسب بل محبط للهممم ومثبّط للعزائم لأنّه بكل بساطة تغريد خارج السرب تهريف بدون علم على واقع الحال في السودان وحاجات وتطلعات الشباب والمواطنين الحقيقية وهو أي نضال الكيبورد رفاهية اسفيرية لا تعدوا كونها موهبة وهواية تمارس لإشباع الذات بالفعل السلبي والإكتفاء بالخمول الفكري والتنظير المنقول من تجارب الغير مع تباين الأفعال والأعمال ونحن هاهنا فقط نشير لهذا السخف ونضع خطوطاً حمر مع كم هائل من علامات الإستفهام والتعجّب تحية طيبة وتقدير أخوك كمال

شكراً أخي كمال على هذا الرد الضافي،
نحن الآن على أرضية مشتركة من التفاهم حول الموقف من المعتقلين والحكومة،
وإن إختلفنا حول جدوى نضال الكيبورد، لكن إختلاف الرأي لا يفسد للود قضية.
ودمت أخي

Quote: يا معارضي الكيبورد كأنّ على رؤوسكم الطير ... متي موعد المظاهرة القادمة؟؟؟؟؟؟؟

بعد ما نخلص من قش الريالة السايلة في المنبر....كويس؟
بعدها نفكر في لحس الكوع
لانو يمكن نلسحو بلسان زول قاعد يتفاصح و يريل من الوهم الفوق ديل بعد مايلف 180 درجة وبرضو ما حيشفع ليه
فالتغير قادم
-------------------
يحيا الكيبورد الذي ارق منامكم و طير رحمن قلبكم وخلاكم تهاتو بسبب وبلا سبب
بعدين الثورة التي نبشر بها لمن تقوم لا بتستاذن مننا لا منكم لكن تأكدوا اننا سنكون اول من يعلم بها وانتم اخر من يعلم
فهكذا دوما يخيب متشعلقي الانظمة المستبدة اللاعقين لاحذية الطغاة المدافعين عنها ببؤس باستخدام كي بورد لايجيدون استخدامه
ويحيا الفيس بوك وريث الرونيو العظيم فخلف الكيبورد تقبع الكلمة وخلف الكلمة تقبع الفكرة و خلف الفكرة ثورة لاتبقى ولا تذر ولا نامت اعين الجبناء الخائفين حتى من استخدام الكيبورد
سنكون نهارا في الشوارع و ليلا خلف الشاشات يحيا الشباب (الغير افتراضي) الذي توهمت سناء حمد انه وهم و افتراض ومن هنا تؤتى هزيمتكم ويتاتي نصر السودان الوطن الرائع العظيم الذي يخجل من عقوقكم له بعد ان تركتم بر الوطن واستبدلتموه بالنظام ونسيتم ان النظام زائل و الوطن باقي

هذا النضال الكي بوردي وفر له زعيم عصابتك ميزانية بالملايين إقتطعها من دم هذا الشعب المغلوب علي أمره
هذا النضال الكي بوردي جعل الجاهل الجهول البشير يفهم بالفيس بوك والتويتر !
هذا النضال الكي بوردي جعلك مجاهدا كي بورديا تترزق منه لإرضاء مخدميك وجعل بقية المطبلاتيه الذين آتوا للبوست يتزاحمون وكأنهم يُسمعون زعيمهم ( ها نحن نجاهد فأرضي عنا!! )
التحية لهؤلاء ( المناضلين ) الذين خلقوا لنا أؤلئك المجاهدون فبدونهم لم ولن يكن هنالك مجاهدي كي بورد .

أنا اقترح عليهم يوم 30 فبراير 2011
رايك شنو يا كمال
موش توقيت مناسب

Quote: أنا اقترح عليهم يوم 30 فبراير 2011 رايك شنو يا كمال موش توقيت مناسب

د. المكاشفي
لكن لقيتك تفتيحا
قلت لي يوم 30 يعني بعد ماتقبض المرتب وزياده الاجور مش كده

خلاص موضوع زياده المرتب أنتهيت منو قبلت علي مواعيد المظاهرات .



مبروك الكتاب الجديد يا مكاشفي القوم .

والله حقيقة يا فرانكى أستغرب أشد الأستغراب من مثل بوستاتكم هذه ،، هل كان يخطر فى بالك مجرد خاطر عابر أن ما حدث فى مصر وتونس والذى سيحدث بعد ايام قليلة وربما بعد لحظات قليلة فى ليبيا واليمن ؟؟ لا أدرى أين ستقبل وجهك إن أمتد هذا الزلزال إلى السودان ؟؟ لماذا تحرق نفسك هكذا ومن يأزرونك هنا.

شىء من أحترام من يخالفونك الرأى مهم جدا فى أعتقادى ،، وشىء من نظرة عقلانية لما يحدث فى بلادى مهم جداَ كذلك ،، لا ضير أن تساند وتعاضد ما تراه الحق ولكن بنفس المقدار لا ضير أن نهجت فى إحترام ما يرون عكس ما تعتقد بدون أن تستفذهم وتسخر منهم هكذا.

حتى أن النظام الحالى نفسه فى تصورى الشخصى لا يقبل منكم مثل هذا الكلام لأنهم يعلمون علم اليقين بأن مثل هذه الكتابات ومثل تصريحات بعض أعوانهم هى التى تؤدى إلى أنفجار الأوضاع ،، هل تذكر البيان او الخطاب الثالث لمبارك ؟؟ ذاك الخطاب هو الذى زلزل عرشه وهو الذى قاد لتدفق الملايين إلى الشارع لأنهم شعروا بأنه خطاب إستفزاذى لم يأخذ ما يجرى فى الشارع بعين الأعتبار .

مع التحية والتقدير ،،

ماهر

يا ماهر استغرابك نابع من عدم فهمك لمثل هذه البوستات
ما حدث في تونس ليس بالضرورة هو ما حدث في مصر وليس بالضرورة ما سيحدث في ليبيا

طبعاً بنظرة سطحية ستقول لي بلى هو كذلك

المهم في الأمر هذا هو رأيي في مناضلي الظل البارد والحاجة الباردة خلف شاشات الحاسوب ينظّرون ولا يفعلون كبر مقتاً أن يقولوا ما لا يفعلون

أنا أحترم نفسي قبل أن أحترم من يخالفني في الرأي وهذا بدوره يقود للإحترام المتبادل لكن احترام الرأي المخالف لا يعني أن لا أقول رأيي بكل حرية ووضوح وصراحة

شاء من شاء وأبى من أبى

إذا كان في رأيي استفزاز للأخرين ففي رأيهم أيضاً استفزاز لي

وهو رأي مقابل رأي

النضال الكيبوردي دون إتباع ذلك عملاً في أرضص الواقع هو مجرّد هراء وونسة ومهاترة

النضال الحقيقي هو أن يناضل المناضل في أرض الواقع ويستخدم الإنترنت كوسيلة للتعبئة تماماً مثل استخدام المنشورات

ولكن ما نعيبه هو نضال الكيبورد لأؤلئك الجالسين خلف الحواسيب في الغربة ويظنون ا،هم يقودون مسيرة التغيير بالفأرة والكيبرود

دا لعب بلي ستيشن ساكت

تحية وتقدير
كمال

Quote: كيف يا أخي اشتغلوا شنو؟ إنتا قايل التنظير دا بالساهل كدا؟ دي عبقرية هسّع فكرة مظاهرات الشموع دي كانت ح تخطر ببالك؟

بالمناسبة ثورة الشموع حصل فيها شنو والله لي فترة عايز اعرف

كان بيع الشموع تجارة رابحة