جاتني مخالفة مـــرورية في صمة خشمي!!

لا حــولااااااااااااا يا جماعة
قبل كم يوم مشـــيت قلت أجــدد رخصة القيادة حقتي
رخصة القيادة أنتهت منذ رمضــان الماضي وكل مـــرة اقول أمشـــي
أكســـل وأطنش الموضـــوع
أها اليوم داك عقدت العـــزم وتوكلت على الله ومشيت ويا ريت لو ما مشيت يااااخ
جيت عايز أســـدد رســـوم تجديد الرخصة إلا كان الاقــيهم ليك ناس ساهر
الله لا كسبهم كاتبين لي مخالفة ســـرعة في صمة خشـــمي
إنا لله يــااااخ

رســـوم تجــديد الرخصة 400 ريال لمدة عشـــر ســـنوات
وعليها مخالفة تأخيــر عن التجـــديد بمبلغ 100 ريال
زائـــداً رسوم كشف النظــر والذي منو 100 ريال
وفي حاجات تانية كدا ملف وما بعرف شـــنو
يعني اجمـــالي مبلغ تجـــديد الرخصة 700 ريال
والمصيبة التانية الطلعوها لي بملبغ 300 ريال ولأني ما ســددتها في وقتها
ارتفعت الى 500 ريال لأني ما كنت عارفها
يعني أســـي مفـــروض أســـدد للحكومة الســـعودية 1200 ريال
إن شـــاء الله ما تنفعهم يــااااخ
أها 1200 ريال دي كم ايصال في السودان عليكم الله

يعني الناس دي ما عارفه إني عريس
والمــره جايه الاســبوع دا
أها اســـي أدفــــع لمنـــو للمره ولا ناس المـــرور؟
عارفين مـــره مشيت اصلح سيارتي ولقيت ليك باكستاني
ميكانيكي المهم قلت ليهو صلح وقال لي الشغلة والعطل بسيط
اها بمجــرد ما بــدا وفك الحاجات يلا قعد يقــــول
صديق هذا خربان لازم غيّــر
وتاني صــديق هذا خــربان لازم غيّــر برضو
ويلا شبكني ليك غيّــر غيّـــر
لامن جاب كثافتي ومن شغلة بسيطة بقيت في اليخارجني منو
اهــا قام قال لي حكمة لغاية اليــوم كل ما أتذكــرها أقعد اضحك
المهم الباكســـتاني قال لي: صـــديق حـــرمه (المـــــره) يبغى فلوس وســـيارة يبغى فلوس

بمعني إنو الســـيارة والمــره دائماً عايزين فلوس
اها أســـي الســـيارة بدت قبل المـــره شفتو المحن دي كيف باللاي
لوووووووووووووووووولز يااااخ

قال شــــنو ســـرعة الطــريق : 70
ســـرعة المركبـــة: 78
يــــاخي تح وتاني تح
انعل ابو الدقـــه زااااتو
فرقت كم 8 كيلو بس
ســـرعة شنو باللاي أنا الأمبير لما يعمل 120 وتجيني ديك الاصوات
برفع رجلي من الابنص اصلن كدا زااااااااااتو ما بحب السرعة
المســـرعين ليها شـــنو عليك ولاحقين شــــنو زااااتو
المخالفة قيمتها 300 ريال ولأني ما جايب ليها خبر تضاعفت للحد الأعلى
لغاية ما وصلت 500 ريال لا وشكلها ماشه تتضاعف أكتر

اللمين ود موسى البشاري

Quote: أها 1200 ريال دي كم ايصال في السودان عليكم الله

أول التبادي
غرامة ساهر دي يكونوا قبضوك في طريق الخرج (حاطي رجلك) ماشي للمرحرب....
ثانياً:
تساوي كم إيصال دي بقول ليك: نصف إيصال
لأنه الـ 600 ريال بالنسبة ليك بتساوي 15 ألف لسائق الرقشة
والباقي قلة أدب عساكر ساي أكتر منها......

كفارة ليك يازول
الجاتك في ريالك سامحتك
أحمد ربك يابا ما بقت ريالة.....
المذكر سمح.....


الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

Quote: كفارة ليك يازول الجاتك في ريالك سامحتك

الشايقي

كيفنك أبوي..
عارف المزعلني أنا أصلا ماني زول ســـرعة ولا بحب الســـرعة
تصدق دي أول مخالفة لي منذ قدومي للسعودية في أواخر التسعينات
وبعدين 8 كيلو يا الشايقي زط قبضو اخوك

تحاياي

طبعا ناسنا ديل الحكاية جديدة عليهم وملوا ليك الشـــوارع كلها كاميرات
ويلا هاك وج وج التقول دايرين يطلعوا ليك صورة للجواز
وهاك يا زعط ونتف ريش عكس في الســودان بالساهلة بتخارج روحك
غايتو تدخل عليهم بالساحق والماحق والبلا المتلاحق
قـــولوا آمين

خلي المرة تتأخر شهر طيب


والله صحي

Quote: خلي المرة تتأخر شهر طيب

عبد اللطيف

كيفك يا زول .. اتا كمان ما تبالغ للدرجة دي يـــاااااخ
أخير تجي هي تأكل باقي القريشات ديل بدل ياكلوها ناس المــرور
والله صحي
والسبب في المخالفة هي زاتها المــــره مشوار البطحاء كان ليها
غايتو تاني شارع البطحاء دا بمشـــي فيهو 20 وأعرقل ليك أبو الحركة زاتو

تحاياي

ود عمي البشاري حبابك يابا
كان سمعك الفاتح الجنيد بجي يعمل ليه فراش بكاء هنا ,,, والله صحي
ما تشوفني ########ة كدة بخاف من كل شىء
الضلمة , المحلات العالية ,الصراصير اي شي يخطر على بالك ,
الا السواقة سبحان الله
شوارع مسقط نضييييييييييييفة ما شاء الله وشوارعها إن فكيت فيها حصحاصة تتدرق
اها خيتك سرعة ’’’ سرعة طوالي رفعت كثافتة الفاتح
والمصيبة ما بحس بي روحي لما اكون سايقة اني مسرعة ,,
بعرف المخالفة بي الكاميرا لما تصورني وبلبد لوولز
لما يجي التجديد بمشي هو يلقى عربيتو نضييييييييفة يحمد سيدو وعربيتى انا ( الحرمه ) على قول البكستاني همها يتلتل
شال مني المفتاح كم مرة بسبب السرعة ,
اخوي زاهر برضو في مسقط لاقاه مرة واحد قال ليه شفت اختك سوما طايرة في الشارع قلت تقع من الجسر
ما تكلموها ياخ تسوق بالراحة !!!!
اتصل بي طوالي اداني شكلة ,,, وما سكت
جرى جري وصل القوالة للفاتح والشكلة قامت وقال لي روحك دي ما بتخافي عليها ؟؟؟
اها آخر مرة ومنها جيت بلد الخواجات دي اشحد في الله ما تحصل حاجة ويشوف سرعتي قدر شنو لامن اسافر
لاني قريب السفر لفحي شديد عشان اخلص مشاويري ,, وكل مره اشوف الكاميرا تصور فيني
اها سافرنا وخليت العربية بي وراي
مشي بعد سفرنا بي 4 شهور للتجديد
رسل لي رسالة من الدغش
قال لي عليك الله ما بتخافي الله ؟؟؟
مخالفات سرعة بس 250 ريال عماني ما يعادل 2500 ريال سعودي !!!
والله صحي
اها يجي يكابرك ود الجنيد ولا تجري إنت تكابرو

ســـوما بت ابوي الجنيـــد

حبابك آ الحنينة جاية تضامني مع أخوك
وانا من يومداك بقـــول الحكاية دي من شـــنو
اتاريها وراثة يا بت عمي
والله صحي
عارفه أنا المزعلني ما كنت ماشي ســـريع
سرعتي كانت اقل من 80 وبرضو أدوني ليك مخالفة
غايتو الفاتح شكلو بجي ادينا في راسنا الاثنين
بس النبي كان تســـوقي براحة يا بت عمي

وربنا يغطي عليك وعلينا يا رب

Quote: جاتني مخالفة مـــرورية في صمة خشمي!!

وانت الخلاك تصم خشمك شنو؟

Quote: وانت الخلاك تصم خشمك شنو؟

من المخالفة ياااااخ

العزيز البشاري
سلامات و الجاتك في مالك سامحتك

Quote: أها 1200 ريال دي كم ايصال في السودان عليكم الله

دي يا اخوي مخالفه وااااحدة بتاعة تظليل مركبة

يعني لو عندك طفل رضيع و حبيت تحميهو من هجير بلدنا و تدي امو الخصوصية اثناء الرضاعة, تدفع للحيكومه قدر المبلغ بتاعك دا مجتمع.

Quote: تدفع للحيكومه قدر المبلغ بتاعك دا مجتمع.

فتوش يا صاحب

كيفك وعســـاك بخير
في السودان بتخارج نفسك بالساهلة مع العسكري
لكن هنا يعلم الله لا في عسكري ولا يحزنون
تلقطك كاميرا ما عندك طريقة غير
الدفع
الدفع
الدفع
الله غالب يا حبيب ونعدها زكاة


تحاياي

تحياتي الاميـن،

***- يازول احـمد ربك كتير انك في السعودية مافي المانيا!!
***- هنا في المانيا في مقولة مشهورة بتقول انو 70% من سكان المانيا العندهم مرض السكري.... جاءتهم من الغرامات!!

Quote: أكســـل وأطنش الموضـــوع

يا الأمين أخوي سلام

في البلد دي تكسل وتطنش في الحاجات دي بتوديك التوج .

التجديدات بكل أنواعها (سيك سيك معلق فيك) ولا تؤجل تجديد اليوم إلى الغد، فعلاً الواحد بينقهر لمن تدفع ليك غرامات أصبحت مفروضة عليك ، وكان بالامكان تفاديها بقليل من الحرص ، تعودت أن أجدد إستمارة السيارة في موعدها وكذلك رخصة القيادة ، أولا للمحافظة على نظاميتي وثانياً أبنائي وأهلي أو أي مشروع خيري أولى بتلك المبالغ .

وعشان ما تمضغ عينيك مع ساهر ، بين الفينة والأخرى تابع من خلال الهاتف 989 موقفك من المخالفات المرورية .

يلا معلش ، الـ 1200 ريال كان جاب ليك أريكة جلوس ( صوفا) .

يا اخوي الجاتك في ال300 سامحتك...

وماب تسمعُو الكلام... أنا زماااااااان فتحت بوست هنا وحذرتكم من أُم (70) دي!!!

ربنا يوصل زوجتك بالسلامة... وتبقى قدَم سعد عليك... ووصيها تراقِب معاك الطَبْلُون زي واحد صاحبي كدي

Quote: ووصيها تراقِب معاك الطَبْلُون زي واحد صاحبي كدي

ابو الحسين

وعليكم الســلام الجماعة ضوقوني يدهم المرة دي
بس حلوة حكاية المره تراقب الطبلون دي
والله صحي
عارف في واحد صاحبنا بدخن دخان شــديد
اها مرتو قالت ليهو شــوف مقابل كل سيجارة
تدفع لي حق سيجارة ولا تسيب التدخين
صاحبنا وافق وبعد سنة كدا المره قالت ليهو ارح السوق
اها مشت اشترت ليها دهب صاحبنا شاف القروش والدهب استغرب
من اليوم داك بطل تدخين حســـاده ساااااي بس

تحاياي

يا الامين

انت واسماء تستاهلوا

هي تحت شعار جلدا ما جلدك جر فيهو الشوك سايقا

اذا كان ود الجنيد بيدفع يللا دوسي ابنصك

وانت الموديك شنو بالسرعه دي في شاؤع البطحاء

هي سبعين كيلو ذاتا كتيره

Quote: يا الامين انت واسماء تستاهلوا

دا شـــنو يا طارق ميرغني يا (صديغ)
الناس جاية تتضامن معاي وانت جاي تشمت فينا انا وسوما
اسي عليك الله 80 دي ســـرعة في الرياض دي؟
بعدين الدنيا صباح والشارع فاضي يعلم الله
غايتو المكتوب ما منو مهروب زي ما بقولوا

تحاياي

Quote: في البلد دي تكسل وتطنش في الحاجات دي بتوديك التوج .

ولياب

وعليكم الســلام ..
عارف يمكن دا درس لي لأني اول مرة اعمل الحكاية دي
كنت طيلة الفترة الماضية زيك بجدد حاجاتي أول بأول
لكن في رمضان الماضي كنت مشغول شغلة جد
حيث كان معي الوالد والوالدة معي هنا في زيارة
وهي نفس الفترة التي انتهت فيها رخصة القيادة وعشان كدا ما جددتها
بس كان الله حيانا قبل ما تنتهي زاتو الواحد يجددها
ويخلي عيونو مساهرة من ساهر دا كل اسبوع تشيك على نفسك
مع العلم انو دي أول مخالفة لي في السعودية بعد 12 سنة

تحاياي

الجاتك في سرعتك (البسيطة) سامحتك
وأحمد ربك إنها ما جاتك في قطعك إشارة ؟!
و هذا دليل على أن (المدام) كراعا خدرا


حمدلله على السلامة .. وافتقدناك أمسية الخميس الماضي
ونحن نرشف كؤوس البهجة والفرح من (ينابيع) الاحتفاء
بالدكتورة داليا وصنو روحها تمبس .


مودتي ،


( ليمو )

Quote: حمدلله على السلامة .. وافتقدناك أمسية الخميس الماضي ونحن نرشف كؤوس البهجة والفرح من (ينابيع) الاحتفاء بالدكتورة داليا وصنو روحها تمبس .

اهلين اخونا عبد الحليم (ليمو)

وأنا والله افتقدكم بشده ولكنني كنت معكم بقلبي
أخوك كان لافي في السوق لغاية الساعة 12 بالليل
الجايات اكتر من الرايحات بإذن الله
عذبتنا في الصور شوية بالتأخير
مرحب بدلوش وعلاء الدين ود حلتنا الجديدة في الرياض


تحاياي

Quote: هنا في المانيا في مقولة مشهورة بتقول انو 70% من سكان المانيا

الحبيب بكـــري الصايغ

ســــلام... والحمد لله من قبل ومن بعد
سمعت والله عنكم في المانيا وبعض الدول الاوربية
تعمل اي حاجة ولا السرعة وقطع الاشارة
قالوا فيها سجن عديل كدا وبهدلة خصوصا قولة اح

سعدت بمرورك يا حبيب

الاستاذ الفاضل الامين موسى ول البشارى


كيف حالك يا امير

و الله دى عوجة كبيرة بالحيل , ها زول القروش دى كتيرة خلاص .

الله يعوضك و يخلف عليك بالبركة .


ابن عم لى و قد احترقت كل اغراضه داخل البيت حيث شب حريق

و كان فى حالة يرثى لها مثلك تماما "Kidding"


و جاءته خالة له و قالت :

الله يعوضك يا ولدى .

فرد عليها بصرامة . لا ... لا ... تعوضونى انتو .

يعني رخصتكـ منتهية وجوالكـ ما مسجّل باسمكـ
وماشي بسرعة وتهوّر .. ودايرنا نتضامن معاكـ!
قوم لف ياخ!!








والله يا عمكـ .. أبو الحسين الفوق دا ولّ منو ما عارف
كان فاتح ليهو بوست عن ساهر، قلت ليهم الحمد لله أخوكم
نظامي وما بتاع جري وقطع إشارات .. تاني يوم من الصباااح
جاتي رسالة: مخالفة مرورية .. تعدي السرعة القانونية!!


نجاهيييييييين أون لاين ياخ!!

Quote: إن شـــاء الله ما تنفعهم يــااااخ

لووووووووول يا مفتري
أول حاجة ان شاء الله ينفعهم
منضفين ليكـ الشوارع
الحفرة تتفتح باليل الصباح تلقاها مغطنها
كل شارع انت فيهو تلقى ليكـ تلاتة مسارات تختار اليعجبكـ .
ده غير " النغنغة " المرطب فيها كان سكنكـ ولا مويتكـ ولا كهربتكـ القطعت آخر مرَة سنة 80
____________
اللفة دي مرت عليا يا البشاري
أكتر من الفين ريال دفعتها من ما بدأ البرنامج
كنت مفتكر الموضوع فيهو لعبة وضاغطين بيهو الأجانب بس
الأسبوع الفات عديلي عايز ينقل كفالة على أمير " كبير "
عليكـ أمان الله الأمير طلع عليهو اربعة وعشرين الف ريال ما قدر يعمل إجراءات النقل لحدي ما اندفعت الفلوس ريال ينطح ريال .

معليش يابو الشباب

انا دفعت
فى اول مخالفة 500
فى شارع صلاح الدين
بعدها واحد شحد العربية مرتين

300+300

ويوم خميس جائى من الخرج الساعة عشرة,,,
وقالت كدا لقتتنى,,,

اماكن تواجد عربة ساهر,,
شارع صلاح الدين,,بعد دوار القاعدة
شارعة المائة,قبل وبعد خروجك من الدائرى
شارع الخرج على اليمين وانت جائى قبل اسواق المجد
شارع البطحاء
مع مطعم النعمة التركى,قبل العود وانت ماشى البطحا,,او مع اسواق المهرجان,وانت ماشى الحراج

عشان تخلص قروشك وتبرد قلبك,,,لو شفتها شغل هزر,,عشان ما تسطاد ضحيةبعدك

والجاتك فى ساهر قللت منامك

Quote: انا دفعت فى اول مخالفة 500 فى شارع صلاح الدين

ابو قوته

ازيك هي الحارة أول مخالفة دي
بعد كدا بتكون كســـرته حاجز الخوف
وما تقول شارع الخــرج دا شـــارعي طوالي ماشي بيهو
غايتو زي ما قال نخلي المـــره تراقب الطبلون تاني
غايتو قروشنا كلها بقت ماشه في الموبايلات والانترنت والكهرباء وأخيرا المخالفات
والله صحي

تحاياي

Quote: كنت مفتكر الموضوع فيهو لعبة وضاغطين بيهو الأجانب بس

عمـــران
أزيك ... غايتو جنس حســـاده
موضوع المخالفات للاجانب دا انتهى زماااان
عمك البدوي زمان جاي سايق الدتسون بتاعو والاشارة حمراء
لا وقف ولا حاجة قطع ليك الاشارة زي السلام عليكم
قام العسكري وقفو ليك وعمل ليهو مخالفه قطع اشارة 900 ريال وسجن
أها لما سألو البدوي قال انو مفتكر الاشارة دي للاجانب بس..
ولا الســوداني القطع الاشارة وقام العسكري وقفو ليك وسألو: يا زول مالك قاطع الاشارة؟
الزول: والله ما كانت محمرة شـــديد
ياااخ الشارع دا اصلا ما ممكن تتوقع فيهو كاميرا موجودة ولا أصلاً فيهو كاميرات
أخيراً عرفته انو الحافلة بتاعتهم بتقيف بالجنبه

غايتو الشكيّة لله

Quote: يعني رخصتكـ منتهية وجوالكـ ما مسجّل باسمكـ وماشي بسرعة وتهوّر .. ودايرنا نتضامن معاكـ! قوم لف ياخ!!

يا عمكــ التضامن مجاني يااااخ
ولا في كشف ولا حاجة فما تخاف اتضامن تضامنك ساااي
شايفك حتتيتو حت شـــديد يوم الخميس
عارف يا ود الصايم انا اكتر زول نظامي في البلد دي
لكن المــرة دي فعلا دقســــته

Quote: نجاهيييييييين أون لاين ياخ!!

لووووووووووولز

تحاياي

Quote: و جاءته خالة له و قالت : الله يعوضك يا ولدى . فرد عليها بصرامة . لا ... لا ... تعوضونى انتو .

هههههههههههههه
الطيب رحمه

وعليكم السلام ..
عارف دي ذكرتني كان زمان في خواجات بدرسو انجليزي في المدارس الثانوية
وكل مرة الخواجة يكلف الطلاب بواجب منزلي (Homework)
والجماعة يقولوا ليهو إن شاء الله ويجوا بكره ما حالين ولا حاجة
المهم الحكاية اتكررت مع الخواجة في النهاية وقت زهج منهم
اي واحد يقول ليهو إن شاء الله الخواجة بدون ما يشعر يقول ليهو:
Don't say inshaa'allah


تحاياي

Quote: نت واسماء تستاهلوا هي تحت شعار جلدا ما جلدك جر فيهو الشوك سايقا اذا كان ود الجنيد بيدفع يللا دوسي ابنصك

سلام يا طارق يا خوي
مالك علي داير صاحبك ود الجنيد يقوم ينط هسي بالشاشة دي وتبقى عوا إسفيرية
وحات الله دي مشكلتي من اخت رجلي في البنزين
تاني يوقفني الجليل الرحيم
هسة المشكلة دي مواجهاني هنا في اوربا
عندهم قوانين تخلي الزول يمشي كداري
والله صحي
السواقة عندهم تكره عديل
وما عندهم دفع بس يا جماعة
ديل عندهم دفع ونقاط سوداء في رخصتك
والحاجة دي لو زادت من 2 ولا 3 بشيلوا الرخصة و بتعتبر
انت زول مهدد سلامة بلدهم
والله صحي
شفتوا المحن دي؟؟؟؟

Quote: وحات الله دي مشكلتي من اخت رجلي في البنزين تاني يوقفني الجليل الرحيم

ســـوما

يا بت عمي الظاهر عليك متعودة على سواقة اللندروبل
الابنص بتاعو ما عاصي وتقيل الا تدوسي شديد
اها ســـوقي براحة في بلد الخواجات ديك
ما يشيلوا رخصتك الفاتح ساهل ودفع قدرتو
الا ما بقدر يجيب ليك رخصة هناك
والله صحي

تحاياي

يا عالم ... الراجل بقول ليكم عريس ... عريس يعني نفض الكيس !!!!!!!!!!!!

يعني بدل ما تعملوا خته واللا كشف وتلحقوهو بيهو تقعدوا تنقو شعيرو

حرام .. والله حرام
خوتكم خوة التابا

ان شاء الله يا ود الناس ... اكان انا ود صالحين ...بي بركة ابوي الشيخ المجذوب تلتميتك دي تدخل عليهم بالساحق والماحق والبلا المتلاحق
وتسلط عليهم ناس ابو البها والبشبها يقلبو ليهم سوق شريف ميدان تحرير لا يخلي بيهم وزير ولا مدير............ قول آمين

Quote: ســـرعة المركبـــة: 78

كان تنزل ( تلزها )...
___________________

الغلط ما منك تب....

انا غايتو بقو مشاركني في المرتب
مما عملو الكامرات دي تلاتة شهور ورا بعض 600 كل شهر
الواحد مفكر يخش ليهو صندوق للمخالفات دي


احتسب احتسب بس آآبوي
وان شاء الله ما تنفعهم كية في ابو محمد دا

Quote: يعني الناس دي ما عارفه إني عريس والمــره جايه الاســبوع دا أها اســـي أدفــــع لمنـــو للمره ولا ناس المـــرور؟

البشاري يا عريس،
الف مبروك.
بسرعة أدفع لناس المرور، المره لآمن تكون جديدة الحاجات دي بتعاين
ليها بطرف عينها، وكلآمها كلوا معاك حايكون، المهم سلآمتك، وسلآمتك
فوق كلوا شي، وهكذا كلآم زي ما بيقولوا مناضلي الكيبورد.
والله صحي.
سلآم وتحايا وتبريكات للعروسة، وربنا يسعدكم...

Quote: سلآم وتحايا وتبريكات للعروسة، وربنا يسعدكم...

تسلم يا معاوية
ونبارك ليك السمح لكن الناس دي مش عملوها ظاهره
اسي عليك الله دا وقت مخالفه
والله صحي
خربوا نظام المرور القديم وضـــيّعوه
تكون قاعد كدي تجيك المخالفات في صمة خشمك

تحاياي يا حبيب

Quote: الواحد مفكر يخش ليهو صندوق للمخالفات دي

غايتو للضمان كدا سجلني معاك في صندوقك دا
الدنيا مي معروفه يا أخوي......... والله صحي
محمد الناس دي التقنية جديدة عليهم
مفروض يكون هناك حته سماح في حكاية السرعة دي
يعني انا تجاوزت السرعة ب 2 كيلو كان ممكن يخالفوني برضو
غايتو الله غالب بس

Quote: الغلط ما منك تب....

80 كم/ساعة هنا في البلد دي زيك وزي الماشي كداري
غايتو تاني الشارع دا بمشي ليهم فيهو 20 واعرقل ليك حركتو

Quote: يعني بدل ما تعملوا خته واللا كشف وتلحقوهو بيهو تقعدوا تنقو شعيرو حرام .. والله حرام خوتكم خوة التابا

آميييييييييييييييييييييييييييين
يا ســـلام عليك يا محمد مصطفى يااااخ
انت كنت وين باللاي من بداية البوست دا
ناس ود الصايم وعمران وطارق ميرغني حتى التضامن الهين دا ما هاين عليهم
غايتو لو طلعت ود صالحين دعوتك دي بتجهجه باكاتهم تب

الحبيب الامين
كيفك يا راجل
غايتو الجاتك في مالك سامحتك وطريقة كشف دي صعبة بلحيل لكن اذكر ان احد الاخوان في الرياض ذهب الى الجوازات لاجراء تاشيرة الخروج والعودة لوالدته المقيمة فقال له عسكري الجوازات ان هذه الاقامة اي اقامة والدته عليها مخالفة مرورية وسط دهشة كل كل الحضور .... !!!

دحين ما تستغرب


فتك بعافية

Quote: الحبيب الامين كيفك يا راجل غايتو الجاتك في مالك سامحتك

أوووووووووو الحبيب علاء الدين

يعلم الله الشـــوق مطر عديل
ويا زول القروش كتيرها رايح وقليلها رايح الله يدي العافية بس
فعلا في حاجات غريبة بتحصل هنا منها حكاية صاحبك دا
عليك الله رسل لي رقمك في الخاص

تحاياي

العريس النفض الكيس

يلا على الكريدت كارد

"" المخالفة ولا صمة الخشم ""

وحات نسيبتك صحي

هوي يا عريس
ما نسيت أقولك

"" خلي خشمك فاتح كذا سقالة البنطون""

وحات قدو قدو صحي

Quote: يلا على الكريدت كارد "" المخالفة ولا صمة الخشم "" وحات نسيبتك صحي

المسافر

ازيك .. وحاتك الكريدت كارت اليومين دي شغال

بس قصاد بت نسيبتي وناس المــرور

دفعناها زماااان يا زول

هنا المخالفة كان خليتها بتروب وبتزيد عليك

تحاياي

ول أبا البشارى
الجاتك فى مالك سامحتك ..

Quote: 80 كم/ساعة هنا في البلد دي زيك وزي الماشي كداري غايتو تاني الشارع دا بمشي ليهم فيهو 20 واعرقل ليك حركتو

قيادة السيارة بهذه السرعة تسمى القيادة بأهمال فى أمريكا .. البوليس يضع ليك ال######اش فى أيديك ويأخذك إلى الحبس .. ويخرب ليك رخستك لسنوات .. وناس التأمين على السيارات يرفعوا ليك التأمين ..

طريق السلامة للحول قريب يا ول أبا ..

بريمة

ول ابا بريمه

كيفك يا زول

Quote: قيادة السيارة بهذه السرعة تسمى القيادة بأهمال فى أمريكا

هنا برضو اسمها القيادة باهمال مع الفرق طبعاً
يعني لو مشيت بالسرعة دي في بعض الشوارع ممكن تتلقى اللعنات
لأنك بتعطل الحركة حسب ســرعة من هم حولك

تحاياي

الامين ..
كمية تبريكات بزواجك الميمون ..
وبخصوص المخالفه - هل كنت رابط حزام الامان ؟
واظن اجابتك .......... لا
معناتا ساهر ذااااااااااااااتو داقس ...!


احمد ربك بس .. وخليك حريف !

الحبيب عبــد الله كع

الله يبارك فيك ومشكور على التهنئة

Quote: وبخصوص المخالفه - هل كنت رابط حزام الامان ؟ واظن اجابتك .......... لا

تصــدق ما رابط الحــزام .. بس انت عرفته كيف؟
عارف في الغربية عموماً مشددين على حكاية ربط الحزام دي
لكن في الرياض هنا ما شغالين بيهو كتير
غايتو بس الحمد لله

تحاياي

[B]ألأمين ..السلام عليكم...وألف حمدآ لله على سلامة وصولك زوجتكم المصون.

Quote: المهم الباكســـتاني قال لي: صـــديق حـــرمه (المـــــره) يبغى فلوس وســـيارة يبغى فلوس بمعني إنو الســـيارة والمــره دائماً عايزين فلوس اها أســـي الســـيارة بدت قبل المـــره شفتو المحن دي كيف باللاي لوووووووووووووووووولز يااااخ

أوعة تصدق الباكستانى ده وتعتبر دى حكمة ..خذوا الحكمة من أفواه ذوى التجارب...

المرأة لو ربنا اكرمك بتوفر ليك صرفك ولو بقت طوالى عايزة فلوس من غير حاجة وما ظاهرة فى صرف يبقى دى عوجة وربنا يعينك بس... ربنا يجعل البركة فى زوجتكم وفيك ويستر عليكم.

Quote: ربنا يجعل البركة فى زوجتكم وفيك ويستر عليكم.

اسماعيل عباس يا شفيف

تسلم على الدعوات والتهاني
أكيد ما ذكرته فيه جزء كبير من الصاح
وبرضو اكيد أني ما أخدته كلام الباكستاني كمسلمة او نظرية
والاما كان جبنا المدام ..ولا شـــنو؟

تحاياي

اللمين مبروك يا اخوي
لكن ات عرسك دا لا خبر لا اتر
ولا امكن اكون انا الماجيت
الف مبروك وخلي الجرسة وانزل من ضهر البيت وشيل حملك
يا دوب دخلت روضة البيت السعيد الله اسعدك واهنيك
وكان كدي ناس ساهر ديل اغنو منك غنا مادام انك مهود كدي من اسع
تمش تجيب الغاز مخالفة 150
تمش تجيب الرغيف مخالفة 150
والعجب العجيب السكر والزيت والبصل والمعجون والبنك ما مضمون امكن اجيبلو سجون
والفاك بالقانون .. الفاك آي يا اللمين .... امش غبيرة اشتري الحلبة والشاف الممتاز
ما تجيب النو الما ممتاز عشان ترجع بيهو تاني والمرة دي غنية وقابلت ناس ساهر وساهور

معقولة حبيبنا الكان زمان عبد الله ود البوش

سبحان من يحي العظام وهي رميم يـــااااخ
اها نقول حمد لله على السلامة ويعلم الله مشتاقين شوق شديد يا صاحب
الغاز والرغيف ساهلات علا اخوك من اسي بدأ يمرق في الزبالة ويعتل في دبات الموية والغاز
شكلي كدا بصل المرحلة القردية قريب

Quote: امش غبيرة اشتري الحلبة والشاف الممتاز ما تجيب النوع الما ممتاز

ديل غايتو المره جابت منهن مؤونة نصف عام من الشاف والحلبه ...الخ الخ

تحاياي يا صاحب