Post: #1
Title: ونسة معارضة
Author: خدر
Date: 02-03-2011, 11:20 AM
Parent: #0
سألتني شابة في الفيسبوك امس و هي بتتكلم بإنفعال عن مظاهرة اليوم السلمية ( جهاز امن و بوليس نافع طبعا مُصر يتجاهل كلمة سلمية دي ) في ميدان عقرب في بحري , قلت ليها حقو تغيروا تكنيك التظاهر الشغالين بيهو ده , سألتني كيف و شرحت ليها فكرتي بأنو إلاعلان عن مظاهرة سلمية طريقة ما بتتماشي مع نظام خائف و مرعوب زي المؤتمر الوطني , لانو من فرط خوفو حا يحاور مطالبكم بالعصي و الهراوات الغاز المُسيل و الرضاض الحي إن استدعي الامر , عشان كده انا شايف انكم تسيروا مظاهرات سلمية من الاحياء , كل حي يطلع في مظاهرة سليمة في كل السودان و تقدير الخروج من عدمو تتركوهو لاهل الحي وفق تقديراتهم الذاتية , طلبت مني الشابة دقيقة تعمل إتصالات و رجعت لي بعد زمن و قالت فعلا الامن مطوق ميدان عقرب من اسه, ضحكت انا .. سألتني لكن هم عرفوا كيف ؟ قلت ليها من الدعوة لمظاهرتكم الانتو بتنزلوها في مواقع الفيسبوك و التويتر و منابر الحوار و ضربت ليها مثال
نفترض انو عندكم عرس و رسلتوا بطاقات الدعوة لي اقاربكم و اصدقاءكم , يوم العرس حا يجو الناس ديل كلهم , لكن برضو حا يجوا معاهم ناس تانيين كل زول عندو مآرب محتلفة , في ناس بدرالدين اسحق بكونوا جايين للعشاء , يتعشوا و يتخارجوا و في ناس قريعتي راحت بجوا عشان يسمعوا الفنان و في ناس القشرات العاملين فيها حِبيبَة بجوا عشان البنات . اها ناس الامن ديل ختيهم في اي بند يعجبك من الطفيليين اعلاه لانك انت عازمه ناسك لمظاهرة
اواصل 
|
Post: #2
Title: Re: ونسة معارضة
Author: هواري نمر
Date: 02-03-2011, 11:27 AM
| Quote: يتعشوا و يتخارجوا و في ناس قريعتي راحت بجوا عشان يسمعوا الفنان و في ناس القشرات العاملين فيها حِبيبَة بجوا عشان البنات . |
هههههههههه
__
واصل ياخ
وسريع كمان.
|
Post: #3
Title: Re: ونسة معارضة
Author: المسافر
Date: 02-03-2011, 11:37 AM
Parent: #2
Quote:
اها ناس الامن ديل ختيهم في اي بند يعجبك من الطفيليين اعلاه |
ناس قدو قدو ديل ما ظنيتو جايبهم البطان والشبال بي شرو
|
Post: #4
Title: Re: ونسة معارضة
Author: خدر
Date: 02-03-2011, 01:10 PM
Parent: #3
اواصل كيف يا هواري مع الهكر الما بجي الحفلة لكنو بنفس لساتك باص السيرة ده ؟
|
Post: #5
Title: Re: ونسة معارضة
Author: خدر
Date: 02-03-2011, 02:34 PM
Parent: #4
| Quote: ناس قدو قدو ديل ما ظنيتو جايبهم البطان والشبال بي شرو |
يا المسافر, إتحداك كان لقيت كاتوقري لي قدوقدو ده
ده زول حاسد ساي
|
Post: #6
Title: Re: ونسة معارضة
Author: خدر
Date: 02-03-2011, 02:56 PM
Parent: #5
صديق اخر هاتفني منزعجا مما يحدث في سودانيزاونلاين من تهكير و مطاردة الامنجية و فقراء المؤتمر الوطني للشرفاء و تثبيطهم للهمم, قبل ان يسترسل سألتو عن كلمة فقراء القالها دي قاصد بيها شنو ؟ قال لي انو قصدو انهم فقيرين زينا واحد يعني لا عندهم فِلل في كافوري ولا شركات استيراد واقصي التسهيلات الممنوحة ليهم شوال سكر و صفيحة زيت في الاعياد, ضحكتني صفيحة زيت دي و قلت ليهو يا عبدالرحيم يبدو انك ما مشيت قريب السودان , يا فنان اي عبوه في سودان اليوم حِست و كَشت وبقت صغيرونه ما عدا قزازة الكولا, كبرت ماشاء الله (عيني باردة) و تناسلت لحدي ما وصلت مرحلة الفاميلي سايز, قال لي كيف يعني ؟ طولت بالي لي عبدالرحيم و قلت اشارك في تنوير مواطن غيور عشان يكون مواكب كمان في غضبو علي النظام و غيرتو علي بلدو و ما يبقي لينا مناضل تلفوني ساكت يهاجم من طرف و عبدالرحيم ده صراحة انا بحترمو جدا . قلت ليهو شوف يا سيدي حا اديك مثال تاني (للكششان) الحاصل في السودان , تتزكر السودان قريييب ده موش كان فيهو باصات, سياحية و اهلية و حافلات ؟ قال لي ايوة , قلت ليهو تخيل دي كلها اسه كشت ؟ الحافلة المعلومة دي في السودان الكانت بتشيل 24 راكب او 15 راكب ديك حصل ليها ضمور في الشاسي -الله ينعل سياسات عبدالرحيم حمدي- اتحولت فجاة لي مخلوقات غريبة اسمها امجاد و امجاد تناسلت مع موتر اظنها او حاجة بالشكل ده (نسأل الله العفو و السلامة) و جابو ليهم مخلوق تاني اغرب اسمو ركشة (تُنطق رقشة)
اواصل
|
|