اهلنا ديل شئ خربهم غير تحويلاتنا ما في الجماعه ديل بيمرقوا الشارع براهم الجوع كافر

Quote: عارف زينب عندها اليوم كلام يختلف تماما وبتقول للناس تاني ما ترسلوا تب وقفوا النقاطه دي سته شهور بس الجماعه ديل بيمرقوا الشارع براهم الجوع كافر اهلنا ديل شئ خربهم غير تحويلاتنا ما في في سنوات الانقاذ الاولي قبل استخراج بترول الجنوب وسنوات الجهاد الاولي وكتبن نسافر الوزن كله بنشيله دويات القحه للاطفال وحبوب الاسبرين والملاريا والقرحه والضغط اجزخانه بس اها بعد فرجت شويه بقروش البترول بقت المشكله القوه الشرائيه التي توفرت لجماعتهم وفطت الناس المساكين . الجوابات وكتين تجينا فلان ما عنده حق تسجيل الاولاد في المدارس وفلان بدور يطهر ولاده ووفلان داير يمش السعوديه حجه وزوغه وفلان مرضان وفلان بيتو شالو السيل خلاه في الصقيعه ونحن نشيل ونرقع في القدود اها الناس الفوق الحكايه دي عاجباهم تب ويتبجحوا الشعب راضي عننا وما بطلع الشارع . وكلامهم صاح ما بطلع ويطلع لي شنو ؟؟؟!!! المغتربون برسلوا وبتموا الناقصه

بماان االامر اتخذ منحي اخر عليه اسحب كل مخاطباتي لمحمد اي سليمان ناقل الموضوع

هذه بالضبط خطة ود زايد

ود زايد رجل يدعى أنه مفكر القرية ويفتخر بأفكاره الناجحة..

حكى: لما اختى اتزوجوها, ناس العريس مادونا سد مال كتير, واتفاجأنا بالسيرة تسد عين الشمش, أمى شفقت وابوى يسوى ياربى تسترنا..
انا قعدت افكر لحدى ماربنى الهمنى لفكرة..
جبت لى حجر كبير وعاينت لى أمى ومن بعيد فلقتها فى راسا..
أمى وقعت والدم ملا الحتة والنسوان بقن يصرخن..

اتلموا الناس كلهن وشالوا امى ودوها المستشفى وانشغلوا معاها الليل كلو..
أها ناس السيرة تلات ارباعن رجعوا وابوى يحلف عليهن وهم يقولوا يازول خلى بالك من الحاجة..
لما جدعت الحجر مافى زول شافنى لكن بعد اسبوع كلمت ابوى وقلت ليهو قلت اساعدكم..
المهم ابوى دقانى لكن الفكرة نجحت.

الجوابات دي كانت زمان اسع في عصر السرعه والتكنلوجيا كل زول فيهم ساعيلو موبايل

ساقتني اقداري لجزيره نائيه
وهناك عرفت ان اRemittance Economy معطل للتفكير والتقدم .

Quote: ود زايد رجل يدعى أنه مفكر القرية ويفتخر بأفكاره الناجحة..

لووووووول غايتوا كونه المدعي التفكير دا ود زايد ومي بت زايد خارجتك مني يا دكتور بله .
احتمال يكون تفكير سجمان وبزيدالطين بله لكن ممكن نتناقش حوله

عليك دينك زينب دى انتى يادوما؟

والله انا قايل دى زينب الغزالى القالت الكلام دا أصلى الأيام دى مركز مع اولاد بمبه.

الكلام دا يا قريبي انا قلته في مداخله في بوست ولدنا عزام حسن فرح
وهو يستنفر الناس ليتبرعوا بالمال لاجل من يتظاهرون
واختتم حديثه بقول اركزوا زينب وراكم
اها انا الشلاقه ما بتريح علي

لووووووول الادعاء اصلوا بسويها في الزول

Quote: اهلنا ديل شئ خربهم غير تحويلاتنا ما في الجماعه ديل بيمرقوا الشارع براهم الجوع كافر

هههههههههههها

طيب حق المواصلات ان شا الله






ثورة ثورة حتى النصر

Quote: طيب حق المواصلات ان شا الله

مواصلات شنو يا محمد النيل ولدي الزول ما يصحي فجر ويبداها من شارعو عشان الناس تلتف حوله
وتبقي المحاصره ذاتها صعبه علي البوليس
لكين اسع انتوا تقولوا ليهم نحن جاينكم في المحل الفلاني الساعه الفلانيه
دي مظاهره ولا حفله ؟؟!!

Quote: والله انا قايل دى زينب الغزالى القالت الكلام دا أصلى الأيام دى مركز مع اولاد بمبه

Quote: توفيت الداعية الإسلامية زينب الغزالي، أحد أركان العمل الإسلامي النسائي في الوطن العربي، يوم الأربعاء 3 أغسطس 2005 في القاهرة عن عمر يناهز 88 عاما بعد أن أمضت نحو 53 عاما في حقل الدعوة الإسلامية عبر أنحاء عديدة من العالم الإسلامي. وتم تشييع جنازتها يوم الخميس 4 أغسطس 2005 في مسجد رابعة العدوية بحي مدينة نصر (شرق القاهرة)

Quote: في عهد الثورة رفضت مقابلة الرئيس جمال عبد الناصر، ورفضت أن تخضع جمعيتها "السيدات المسلمات" لإشراف الاتحاد الاشتراكي، فصدر قرار حكومي بحل الجمعية وإيقاف مجلتها، ثم اعتقلت في أغسطس 1965 وسجنت 6 سنوات تعرضت خلالها لاضطهاد شديد سجلته في كتابها "أيام من حياتي". توسط الملك السعودي فيصل بن عبد العزيز للإفراج عنها فتم له ذلك في عهد الرئيس الراحل أنور السادات في أغسطس 1971.

http://ar.wikipedia.org/wiki/%D8%B2%D9%8A%D9%86%D8%A8_%...B2%D8%A7%D9%84%D9%8A

اخونا دكتور بله يسخر مني فقط
فهل يعقل انه لا يعرف من هي زينب الغزالي ؟؟!!

Quote: Remittance Economy

جزاك الله خير يا بت الفحل.
مشينا على مصيبتك دي قوقلناها و عرفنا شي جديد و الحمد لله .

غايتو البركه في دعوتك لي دي يا سيف االنصر ياها بس الطلعنا بيها من هنا
مع كميات من النعوت السمحه من ادعاء و فساله وكعوبيه وعيب واشياء اخري

Quote: والله انا قايل دى زينب الغزالى القالت الكلام دا أصلى الأيام دى مركز مع اولاد بمبه.

عاد يا دكتور بله كورتك فكت علي قول ود جمعه
دا كلام ولاد بمبه في ظمتك دي ؟؟ لوووول
شن عرفهم بحجه وزوغه ولا البيت الشاللو ا السيل خلا الناس في الصقيعه

جوّع ######ك يتبعك .. آخر أفكار مناضلي الكيبورد لإخراج الجماهير للشارع

ههههههههه ود القريش يا مسنوح بوستك دا مشي وين ؟؟
بس الزول ما يغمت هنا يلقي البوست فره

Quote: اهلنا ديل شئ خربهم غير تحويلاتنا ما في الجماعه ديل بيمرقوا الشارع براهم الجوع كافر

لاحول ولا قوة إلا بالله
دى آخر حاجة وصلتوا ليها ؟
أوتمتنون على أهلكم بما أنعم الله عليكم من نعمة ؟
إنتو فكت منكم ولّ شنو؟
معقول عاوزين تجوعوا أهلكم عشان يطلعوا الشارع ؟
عيب والله عيب !

ههههههههههههههههههههه

حلوة وملعوبة

لكن يا محمد الحسن سليمان نحن دومة دي في الأيام العادية ما بنقبل في حاجة أبداً




لكن نسبة للظرف الإستثنائي في البلاد وكونها بتعلب لعب خشن في الفريق المنافس ما تخلي ليها جنبة ترقد عليها ولا تأخذك فيها لومة لائم


هههههههههههههههههههههه

مهرج القريش يا بهلوان انت
اخونا فرانكلي دا ذات نفسه يعلم حيث يقيم وتحترم الدوله مواطنيها
انها تلتزم بالضمان الاجتماعي لهم وتوفر لهم التعليم والصحه والاعانات الماديه للطبقات الفقيره

Quote: لاحول ولا قوة إلا بالله دى آخر حاجة وصلتوا ليها ؟ أوتمتنون على أهلكم بما أنعم الله عليكم من نعمة ؟ إنتو فكت منكم ولّ شنو؟ معقول عاوزين تجوعوا أهلكم عشان يطلعوا الشارع ؟ عيب والله عيب !

اي نجوعهم حكومتك قاعده تعمل في شنو وكت ما قادره تاكلهم ؟؟

اعرفوا مسئوليه الدوله تجاه مواطنيها اولا وتعالوا اتكلموا .

Quote: بينى و بين الإنتفاضة... وبين بنك فيصل الإسلامى السودانى خواطر من زمن الانتفاضة بيني وبين الانتفاضة... وبين بنك فيصل الاسلامى د. إبراهيم الكرسنى

Quote: لكن نسبة للظرف الإستثنائي في البلاد وكونها بتعلب لعب خشن في الفريق المنافس ما تخلي ليها جنبة ترقد عليها ولا تأخذك فيها لومة لائم هههههههههههههههههههههه

ووول كدا يا فرانكلي برضو تنسوا الجيره والخوه
لوووووووول انتظر بقنص ليك واعوقك.

شكرا لتنبيهي لموضوع دكتور الكرسني قوقلته
وليت الجماعه يطلعون عليه ليعرفوا حجم فساد الجبهه الاسلاميه
وما الانقاد الا فرع من الشجره الفاسده .

Quote: عليك دينك زينب دى انتى يادوما؟ والله انا قايل دى زينب الغزالى القالت الكلام دا أصلى الأيام دى مركز مع اولاد بمبه.

يا دكتور الايام دى بت الفحل قاطعه ليها نضال من راسه وقطع شك المرأة دى خرفت . نسأل الله السلامه

Quote: يا دكتور الايام دى بت الفحل قاطعه ليها نضال من راسه وقطع شك المرأة دى خرفت . نسأل الله السلامه

لوووووووووول حتي انت يا بروتس االجماعه ديل عندهم معاي تار انت مالك ؟؟ !!!!
ولا ياها خوة البورد الما بتقوت الكي بورد .

غايتوا في ناس مخهم كان غداهم ما بعشيهم
انتوا مش قلتوا الشعب دا راضي عن الحكومه ومبسوط منها اربعه وعشرين قيراط وكل زول بجيه تموينه لعند باب البيت ؟؟؟!!!
اها المناداه بتوقيف التحويلات دي مالها حرقتكم ؟؟
ام احسستم بانه الخطر الحقيقي فصرتم تتحوقلون وتستعيذون
لانه لو نفد الجماعه سيخرجون وجماعتكم سيسقطون .

تحياتي يا محمدسليمان ..

بالمناسبة الفكرة الرهيبة دي اخترعها جِنِّي وقريتها قبل كم يوم كده .. استغربت غاية الإستغراب من درجة الفسالة الممكن يصلها البني آدم .. ضربت كفاً بكف وسكتت .. الزول ناسي إنو رزقه السايقه ليهو الله إحتمال كبير يكون بسبب دريهمات يرسلها لوالد أو أم أو أخ أو أخت .. زول يفكر يحرم أهله عشان يجوعوا ويتظاهروا ، ده يقولوا عليه شنو ؟؟ .. في فسالي أكتر من كدي ..؟؟ ..

أنا ساعة قريت الإقتباس كنت قايلك جبت كلام جِنِّي، تقوم الحكاية تطلع كلام خالتو دومة شخصياً ؟؟ ..

Quote: تحياتي يا محمدسليمان .. بالمناسبة الفكرة الرهيبة دي اخترعها جِنِّي وقريتها قبل كم يوم كده .. استغربت غاية الإستغراب من درجة الفسالة الممكن يصلها البني آدم .. ضربت كفاً بكف وسكتت .. الزول ناسي إنو رزقه السايقه ليهو الله إحتمال كبير يكون بسبب دريهمات يرسلها لوالد أو أم أو أخ أو أخت .. زول يفكر يحرم أهله عشان يجوعوا ويتظاهروا ، ده يقولوا عليه شنو ؟؟ .. في فسالي أكتر من كدي ..؟؟ .. أنا ساعة قريت الإقتباس كنت قايلك جبت كلام جِنِّي، تقوم الحكاية تطلع كلام خالتو دومة شخصياً ؟؟ ..

يا منير وين العقلانيه اليوم؟؟؟؟ انا احسبك ممن يحكمون المنطق
المغترب يا منير يدفع ضرائب للدوله الانقاذيه ورونا وين الضرائب دي يتمش ؟؟

ورونا وين التزامات الدوله تجاه مواطنيها وين دورها في مجانيه التعليم والصحه ودعم السلع الاساسيه الدقيق والسكر للمساكين .؟؟؟!!
ايوه اجوع اهل بيتي عشان يطلعوا لاجل المالاقين حق الاكل والمالاقين حق العلاج متلهم


ولا فيكم زول برسل لك مساكين السودان ؟؟؟!!
لو فيكم زول يرفع يده يقول انا.
لوووووووووول انا واخوي جني لو بنعرف الفساله كان بقينا من اصحاب العمارات والشركات .
دا ما بسموه فساله يا منير بسموه التضحيه الكبيره وعظيمه وصعبه علي حساب اهلي لاجل كل اهل السودان .

تغيير النظام الفاسد واجب كل من يمتلك ضميرا وصوتا لا يهاب قول الحق في وجه سلطان جائر
لانه لا يخدم مصالح المساكين وانا بكل فخر جيت منهم وابدا ما بنيت برج عاجي وابتعدت عنهم .

الكلام العاطفي دا ما جايب تمنه يا رفاق ويا ابناء
اي دوله محترمه عندها التزامات تجاه مواطنيها خاصه من الطبقات الفقيره وهم غالبيه اهل السودان

التعليم الاساسي الصحه ودعم السلع الضروريه مطالب عادله وواجبه
اي حكومه لا تقوم بها يحب ان تفسح المجال لغيرها طواعيه او مكرهه .

Quote: ... الأستاذة الإنسانة دومة أطلعت علي مداخلتك وقرأتها بصورة تنسجم مع فهمي لدوما التي أعرف مواقفها ومبادئها وأعرفها جوهرها ... كلامك فيه سخرية ومزاح وتركيز علي المفارقة لا أكثر!! وحتي ولو أخذ ناالمداخلة محمل الجد فهي لاتعدو أن تكون تفـكير بصوت عال ومحاولة للأخذ والرد وليست رأي قاطع ونهائي إنها تسآؤل ومحاولة فهم~! :_ كيف نحاصر النظام دون أن نزيد معاناة أهلنا ? كيف تصل مساهمتنا للأهل دون يستفيد النظام من ذلك ودون أن نساهم في إطالة عمره ? ثانيا تجاربنا في أكتوبر وإبريل تقول إنه في اللحظات الحاسمة حدث عصيان مدني وتوقف دولاب الدولة وتعطل الانتاج والعمل وذلك تصعيدا لوتائر النضال وتعجيلا بسقوط النظام ! فهل ماتم وقتها خيانة هل كان تجويع وزيادة لمعاناة الشعب إم أنه كان خطة تكتيكية قادت لإسقاط النظام ? ..... أختي الكبيرة دومة لن نكون بحاجة لإلهاب الجماهير وتذكيرها بسوء أحوالها فالمعاناة في أزدياد والحكومة هي التي تجوع وتذل وتزيد الأسعار وتطبق روشتة إفقار منظم.. ترفع يدها عن دعم التعليم والعلاج وتحول جل الميزانية لتمويل أجهزة الامن وحماية وجودها ! ....... دومة لم ترفع الدعم عن الخبز والسكر والوقود -- دومة لم تلغي مجانية التعليم والعلاج والسكن الجامعي ولم تنتزع لقمة الخبز من أفواه الطلاب - ولم تنهب ثروة الشعب ولم تمارس الاختلاس والفساد من كان حريصا علي شعبه فليقف ضد من إجاع الشعب وأذله ......... نعم يادومة الحكومة متكفلة تماما بكل من شأنه إستفزاز الشعب وقهره ومصادرة حرياته وتجويعه فها قد ذهب البترول ونهبت موارد البلد ولم يتبقي للحكومة سوي عصر وضغط ثدي الشعب المتيبس ليدر عليها دخلا توظفه في المزيد القهر........ عفوا دومة لايمكن المزائدة علي مواقفك طالما أنتي إنسانة حقيقية و دوما في صف الشعب وخير الشعب ومع حريته وديموقراطيته وتحسين أوضاعه .......... الخاسر هو من يراهن علي الشمولية والاستبداد والفساد ويقف ضد مطالب شعبه ...... ......

شكرا كمال عباس لمواقفك المسانده والداعمه دوما
كنت اتصفح احداث ما تم في شارع القصر والدي كتبه العشاري ما حكاه لنا كان الصدق والامل والعزيمه ولم يكن مخذلا .
تعجبت لعدم تجاوب الشارع
وسرعان ما تذكرت نقاشات دارت وتدور بيني وبين اهلي لعل عبد المنعم سليمان يتذكر انه شهد احدي تلك المواجهات ونحن نقف علي طرفي نقيض
سالت نفسي لمادا لا يرون عوج اللانقاذ الذي لا تخطئه عين مبصره ؟؟!!
لمادا الدعم لها وحتي شكواهم تكون علي استحياء ؟؟
كمافعل الاخ عمر صديق عندما كتب مناشدا الريس علي استحياء بالنظر في امر الغلاء .
الحقوق لا تستجدى بل يطالب بها جهره وبقوه .
افهم مواقف اهل الانقاد والمؤتمر الوطني واالمنتفعين لانهم اصحاب المصلحه الحقيقه من بقاء النظام
لكين ما الدي يجعل من لا ينتمون لهذه الفئات ذات المصلحه الحقيقه الماديه والمباشره يقفون موقف غير مساند لمصالح الطبقه الافقر حالا منهم ؟؟؟!!!
هل وصل بنا الحال الانفكر الي في انفسنا واهل بيتنا وقرابه دمنا ومبدا اولي لك فاولي ؟؟
لمادا يرون الباطل ويصمتون ؟؟؟ه
هل يعرف معني الجوع من لم يذقه ؟؟
هل يحس الم المرض من لم يعانيه ؟؟
هل يعلم قهر الحاجه والعوز من لم يكابدها ؟؟؟
هل يجب ان يذوق اهلنا طعم المعناه ليعرفوا حال من هم اضعف اجتماعيا واقتصاديا منهم

كي يساندوا مطالبهم ويجهرون بقول الحق في وجه السلطان الجائر ؟؟؟

هل شاركنا ونشارك كداعمين لاهلنا في الجريمه بعدم الاحساس بمعاناه الاخرين فيغضون الطرف عن الفساد والمفسدين ؟؟؟

Quote: كمافعل الاخ عمر صديق عندما كتب مناشدا الريس علي استحياء بالنظر في امر الغلاء .

لم يكن الامر كذلك الاخت دوما


ارجوا ان تراجعيه جيدا

Quote: بالمناسبة الفكرة الرهيبة دي اخترعها جِنِّي وقريتها قبل كم يوم كده .. استغربت غاية الإستغراب من درجة الفسالة الممكن يصلها البني آدم .. ضربت كفاً بكف وسكتت .

تصدق بالله يا منير لم اقراها
اؤكد لكل الناس وحسب معرفتي لابو الجنون
ليس فيكم من رجل يمكنه ان يزايدعلي مواقفه الوطنيه او كرمه علي الاطلاق

Quote: معقول عاوزين تجوعوا أهلكم عشان يطلعوا الشارع ؟

أنت الصادق مافى زول بجوع أهلوا

لكن قعدنا وفكرنا نحن المشتتين بره دولارات وريالات أهلنا لن تنقطع

فقط ليس عبر أجهزتكم المصرفية

التحويل خارج الجهاز المصرفى ووووب عليكم أنتم البند الأول فى الميزانية كيف يتغطى

والبترول خرج ولم يعد عراب النظام الأقتصادى بعضمة لسانة قال ليس هنالك حلول قريبة

بعضمة لسانو البياكلو الدود قال المشكلة فى الصرف على جيوش الحكومات المحلية وتنابلتها ده منى

والمقصود بيها انتم حاتروحوا فى الرجلين وموظفى البترول قيامتم قامت

Quote: لكن قعدنا وفكرنا نحن المشتتين بره دولارات وريالات أهلنا لن تنقطع فقط ليس عبر أجهزتكم المصرفية

لكنهم يا عبد الحافظ اكثر مكرا ودهاءا وليس هناك من مليم تمر الي اهلنا دون ان ياخذوا منها النصيب الاكبر فان لم يتحصلوا عليها عبر مصارفهم فسياخذونها في شكل ضرائب باهظه علي الوارد وخاصه السلع التموينيه والدواء
ويدفع اهلنا زيادات كبيره في الاسعار يعني ما عملنا شئ يلمها النمل ياطاها الفيل الانقاذي
المسكنات ليست حلا بل اجتثاث الداء من اصله
ومهما يكون الثمن ولو بجوع اهلنا ليخرجوا الي الشوارع كي يري او يسمع العمي الصم من اهل الانقاد ما حاق بالعباد والبلاد جرا ء الفساد المالي والاداري بكل مرافقهم .

Quote: تحياتي يا محمدسليمان .. بالمناسبة الفكرة الرهيبة دي اخترعها جِنِّي وقريتها قبل كم يوم كده .. استغربت غاية الإستغراب من درجة الفسالة الممكن يصلها البني آدم .. ضربت كفاً بكف وسكتت .. الزول ناسي إنو رزقه السايقه ليهو الله إحتمال كبير يكون بسبب دريهمات يرسلها لوالد أو أم أو أخ أو أخت .. زول يفكر يحرم أهله عشان يجوعوا ويتظاهروا ، ده يقولوا عليه شنو ؟؟ .. في فسالي أكما تحياتىتر من كدي ..؟؟ .. أنا ساعة قريت الإقتباس كنت قايلك جبت كلام جِنِّي، تقوم الحكاية تطلع كلام خالتو دومة شخصياً ؟؟ ..

والله دا موش ممكن يديهم دايركت من السودان انتوا موش جيتوا تنقذوهم!
هنا الناس بدوهم مرتبات لى نفسهم فقط يعنى مرتبات ثابتة موش فيها علاوات محمول!
النافع ابو العفين موش قال يرزق من يشاء بغير حساب!
من بشاء ديل المغتربين بس!
دومة تحياتى
جنى

جني كتب:

Quote: من بشاء ديل المغتربين بس!

Quote: من يقوم بالعصيان المدنى هم المغتربين وليس المواطنين! كل مغترب عايش ليه عشرين من اهله ومعاهم وزير وناسي نفسه! يمين الله توقفوا التحويل تلاتة شهور ا لا تتقلب قلبة ركشة فى خور! مغتربين طابور خامس ليس الا تاكلوا وتشربوا وتعلموا وتعالجوا وتسكنوا شن لازمت الحيكومة! جنى

والغريبة ان منير قرا البوست ولم يتداخل فيه لياتى ويتهمنى بالفسالة !
يا منير انا لت الايقاف لمدة 3 شهور فقط ولا برضها كتيرة عليكم عارفنها بتقلبكم قلبة فلكسواجن!
جنى

لووووول ابو الجنون
يا اخي اريتها فسالتنا فساله السرور . اي شئ يمس نظامهم بيكون فساله وكعوبيه وعيب علينا
لكين البسوا فيه جماعتهم ما عيب لا كعب لا ظلم
كان عرفت محل شرايه ضمائرهم دي كان مشيت اشتريت لي وليك يا شقيق

Quote: يا منير انا قلت الايقاف لمدة 3 شهور فقط ولا برضها كتيرة عليكم عارفنها بتقلبكم قلبة فلكسواجن! جنى

لول طبعا يا جني منير ولدنا لا يعوزه الدكاء بنقشها وهي طائره
هبشنا عصب حساس فكان تعليق منير علي غير العاده في شكل استجداء للعواطف والوعظ الديني

Quote: هبشنا عصب حساس فكان تعليق منير علي غير العاده في شكل استجداء للعواطف والوعظ الديني

لا حولا يا دومة .. ده كلام شنو ده ؟؟ .. الظاهر إني أحسنت الظن ساكت ..

يادومة سلامات ..
تعرفي أنا طبعاً عارف أن الفكرة الرهيبة دي أنتم لستم جادِّين فيها - لا إنتي ولا جني - وأنها فقط ربما للدعابة والسخرية حسب قول كمال عباس .. لم أسيئ بكم الظن لهذه الدرجة - إنما بما إنكم تمزحون فاستعدوا للمزاح الخشن برضو ههه ..
ولكن الفكرة ذاتها فيها كمية من الفسالة والغتاتة لدرجة أنها كان يجب أن تظل في الضرا من باب خطايا الخواطر .. لأنه بصراحة ، وقياساً علي المعارضة السعرانة الشفناها اليومين ديل في واحدين عوزينها فرصة لإدخالها أحد أساليب النضال الحديث ..

بالمناسبة برضو شوفي زي كلام عبدالحافظ ده بخصوص التحويلات .. أها قال حيحوِّل خارج القنوات الرسمية نكاية في الحكومة .. وذلك نوع من الحرب ضد الدولة ، كما إنه يساعد في تنشيط السوق الأسود .. وغرضه زيادة العائد المادي الشخصي متجاهلاً الضرر الكبير الذي يلحقه بأهله بطريقة غير مباشرة .. هو يظن أنه بذلك يناضل ضد الحكومة وينسي أنه بالجري وراء منفعته التي تقنصر عليه وبعض أهله فإنه يشجع تجارالسوق الاسود وهؤلاء سيجلبون البضاعة لأهله بأسعار مضاعفة تأخذ منه بالشمال ما اعطته إياه باليمين ..
الشئ التاني هو لماذا تروح ميزانية الدولة للصرف علي الجيش والأمن ؟ السبب هو أنكم تهللون لكل حامل سلاح ضد الدولة، وأصبح التمرد وقتل الجيش السوداني شرف وبطولة يهلل له المعارضون ويحثون التمرد علي المزيد ..

السودان بلد شاسع ، أنا أعتقد أن إتشار الجيش فيه في كل هذه المساحة وتأمينه للبلاد في كل الجهات وعلي إمتداد حدود لا متناهية ضد حركات تمرد تنبت كقطع الشياطين في كل البقاع ، أعتبر ذلك معجزة للجيش عديل كده ..

يا خالة بعد ازنك والله غلبني




مبالغة

__________

الافضل بدل وقف التحويلات وتبقى عليهم انتو والحكومة
تعالوا راجعين حرروها ليهم وارجع لاغترابكم تاني

يا وليد يا ابني قد يبدو الكلام غريبا وشاذا ومضحكا وساذجا
لكن الحلول الفرديه في نظري قاصره عن حل مشكله شعب يعيش 90 في الميه منه تحت خط الفقر
لو حل وليد محمد المبارك مشكلته بالاغتراب فمن الدي سيحل مشكله عبد الجبار الذي لا يمتلك مؤهلا ينافس به في سوق العمل العالمي ؟؟
مشكلتنا تتركز حول التفكير في الحلول الفرديه ما عندنا الاحساس بالمجتمع العريض ؟؟
لو تمكنت مجموعه من المحسنيين من حل مشكله مريض او يتيم من الدي سيحل مشكله الآف المرضي واليتامي ؟؟؟
مشكله المجتمع السودا ني ككل لا يمكن حلها عن طريق اغتراب الافراد والتحويلات بل التغيير في نظام الحكم واداره الاقتصاد ومحاربه الفساد ؟ افتكر انا ما في زول قادر يفهمني .
وليس كل دواء حلو المذاق . وانا بفتكر جاده انه الرمتنس له اثار سالبه ويساعد في اطاله عمر الانظمه الفاسده كالانقاد مثلا .

Quote: الافضل بدل وقف التحويلات وتبقى عليهم انتو والحكومة تعالوا راجعين حرروها ليهم وارجع لاغترابكم تاني

المحرش ما بكاتل يا وليد
عشان كدا انا ما بحرض زول يخرج الشارع
انتوا اسيا د الوجعه لو ما حسيتوها براكم وطلعتوا انا ما بحرضكم لا بدعم دعوه التبرعات لاجل ان تخرج الناس للشوارع تطالب بحقها .
فلا احد يستطيع ان ياجرني كي اطالب بحقي في الحياه الكريمه
لازم يكون الدافع والفعل من تلقاء نفسي .

Quote: ام احسستم بانه الخطر الحقيقي فصرتم تتحوقلون وتسيتعيذون لانه لو نفد الجماعه سيخرجون وجماعتكم سيسقطون .

خطر حقيقى ؟
قولى إنت الشغلة غلبتك وبقت خطر عليك ودايرة تشوفى ليك مخرج
عليك الله لو عندك زول بتحولى ليهو قروش وقرأ الكلام ده يقول شنو؟
ده إذا إنتى قاعدة تحولى وما أظن !!!

Quote: لم يخرجوا بسبب وجود 3 ملايين اهبل خارج السودان يطلق عليهم مجازا مغتربين يقتطعون من دمهم واعصابهم ومستقبلهم قرابة ال 300 دولار امريكى فى المتوسط شهريا لارسالها للوطن ولولاهم ل دفن المؤتمرجية احياءا فى مقابر جماعية ولما جعجع النافع قائلا يرزق من يشاء بغير حساب! لغتك استفزازية لاناس يسامون خسفا فقدوا جزءا عزيزا من وطنهم بسبب اغبياء ومعتوهى المؤتمر الوطنى جنى

المداخلة دى رد على الشفيع
والله يا منير بحس انه المغترب السودانى برده قدر غطاهو!
يعنىواقعة علينا نكة الدفار كلما صاحب يلقط ليهو قريشات تنكسر فيهو حاجة بقيمة المبلغ الذى جمعه
I get a hell of money but I cannot save a cent
يا منير والله يمكن لى رؤيتى الساخرة التى يعرفها الكثيرين فى جدة لقد وصفت المغترب الذى ليس له اعباء او مسئولية بان شكله شاذ اشبه براس الشاحنة بدون مقطورة والاسرة التى بدون مغترب اشبه بمقطورة بدون راس ساحب وقلت ان الانسان الذى بدون اعباء شخص لا قيمة له لان لا شخص يفتقده
كلما اردته ان هذه الحكومة ليس لها حتى اجر المناولة حتى اسعارها للتحويل ظالمة لا تغرى باستخدام قنواتها ناهيك عن اقرارها بان المغتربين هم ساعدها الايمن فهى تنظر اليهم كبقرة حلوب لا تقدم لها العلف وتضربها وربما تستكثر عليها رصاصة الرحمة عندما تشيخ
جنى

يا جني ليس المغترب وحده الذي يجاهد من أجل الأهل .. بل إن القاعدين في البلد برضو يفنون أعمارهم في خدمة أهلهم الذين يعتمدون علي القليل الذي يكسبونه .. تلقي الشاب يضيِّع شبابه بدون زواج لأن أولوياته دعم أهله ..
وخلينا بس نتذكر أن لقمة خبز تقع في جوف طفل جائع لربما تكون هي السبب الذي يسوق لنا الله به رزقنا سواءً في الغربة أو في البلد ..

ولربما خاطر زي ده ينزع البركة مننا عديل ..
أها كلام زي ده تجيك دومة تقول ليك عامل فيها واعظ .. بعد كده ما حأستغرب وحأتوقع منها أي حاجة ..

Quote: ولربما خاطر زي ده ينزع البركة مننا عديل .. أها كلام زي ده تجيك دومة تقول ليك عامل فيها واعظ .. بعد كده ما حأستغرب وحأتوقع منها أي حاجة ..

هههههههههها منير والله اتخيلتك في شكل و واعظ لكين لقيتها ما خايله عليك لووووووووووول

انت زعلت ولا شنو ؟؟؟
يا ابني انا هظاري خشن لكين اكيد ما زوله شريره فمما تتوقع مني الا الخير

Quote: عارف زينب عندها اليوم كلام يختلف تماما وبتقول للناس تاني ما ترسلوا تب وقفوا النقاطه دي سته شهور بس الجماعه ديل بيمرقوا الشارع براهم الجوع كافر اهلنا ديل شئ خربهم غير تحويلاتنا ما في

خايفين نوقف التحويلات دي يقومو يبقو مؤتمر وطني مع صناديق الكيزان الكتيرة دي

Quote: خايفين نوقف التحويلات دي يقومو يبقو مؤتمر وطني مع صناديق الكيزان الكتيرة دي

هههيه يا العوض الطيب يا ولدي نان يبقن علينا اتنين ورده ووجع عينين ؟!!
وكت اهلنا اصلهم خاتين الخمسه فوق الاتنين
والجماعه قاعدين ومتفوججين
ما نخليهم يدافروا في الصناديق اكان يلقوا شئ .
يا ولدي الصناديق دي فتات ما فيها
الناس ديل غير ناسهم ما في زول بلقي شئ
تلف كي لما تحفى ترجع فاضي .

اهلا يا منير يا ابني اي مزاح او كلام ذكي مرحب بيه شديد لا شئ يحبطني غير الكلام البلـــــــــــــــــــيد
يا منير انا قلبي علي الناس التعبانه الغبش الانا جيت منهم
وضعي الحالي او وضع اسرتي القريبه مني ليذهب الي الجحيم لو كان علي حساب الناس المطحونه دا موقفي نمره واحد
حكومه الانقاد او المؤتمر الوطني من افشل وافسد الحكومات التي مرت علي السودان الي الان
صبر عليهم الشعب طويلا يا منير فلم يتغير حاله الي الاحسن بل ظل التغيير محصورا في طبقه الحكام واهلهم ومن والاهم بصوره فاحـــــــــشه وهدا ليس باسلام ولا عدل حسب فهمي لجوهر الاسلام .
الفكره لو فيها كميه من الفساله والغتاته وهي تجويع الناس الم تسبقنا عليها ا الجبهه الاسلاميه حينما قاموا باحتكار شراء محصول الذره بواسطه بنك فيصل الاسلامي باسعار زهيده وباعوه باسعار عاليه الامر الدي ادي الي موت اعداد هائله من اهل دارفور عندما ضربت سنوات من القحط ارضهم
وان كانت فكره عبد الحافظ هي الاخري تنشيط للسوق الاسود الم يؤسس لها الجبهجيه منذ ذاك الوقت ؟؟؟
اليس من الحكمه ان يقوموا بتكوين حكومه ذات قاعده عريصه لا تستثني احدا بدلا من الكنكشه علي كراسي الحكم والمكاسب الشخصيه علي حساب خبز وصحه وتعليم شعبهم ؟؟
وبدا تنحسر الحروب وتقل المنصرفات علي الجيش وبدلا عن الخراب يتجهوا للاعمار والتنميه

Quote: خطر حقيقى ؟ قولى إنت الشغلة غلبتك وبقت خطر عليك ودايرة تشوفى ليك مخرج عليك الله لو عندك زول بتحولى ليهو قروش وقرأ الكلام ده يقول شنو؟ ده إذا إنتى قاعدة تحولى وما أظن !!!

لا حولا يا اخي انت ما ناقش كلو كلو يا صلاح اب ديه
يا اخي انا احول شنو ؟؟؟!!
انا ما مغتربه وما شغاله وبالمعاش لي 24 سنه وما بحول ولا مليم احمر ولا عندي زول في السودان بحول ليه
ما تركز علي الجانب الشخصي
انا كلامي عام للناس المغتربه الطابور الخامس القال عليه جني
من يساعدون باطاله عمر الانظمه الفاسده بدعمها عن طريق الRemittance وتحمل مسئوليتها نيابه عنها بحسن النيه منهم طبعا

تعرفوا يا ... (دوما وجني) الكلام ده ممكن ينفع بالنسبة لي واحد بيرسل يساعد أخوهو أختو .. خالتو .... أي حاجة ....

لكن يبقى الحال شنو لما واحد قاعد براهو .... والعيال وأمهم في السودان ... مطلوب منو يرسل ليهم مصاريف أكل وشراب وتعليم و .. و.. و ....

أو واحد مُلزم (شرعاً وقانوناً وعُرفاً) إنو يرسل مصاريف لوالدته.

المثلين ديل نتصرّف معاهم كيف؟ ...... ودي بالمناسبة نسبة ما شوية.

لو لقيتو حل لي ديل ........ الباقيين إنشاء الله تقطعوا منهم الهواء.

Quote: لكن يبقى الحال شنو لما واحد قاعد براهو .... والعيال وأمهم في السودان ... مطلوب منو يرسل ليهم مصاريف أكل وشراب وتعليم و .. و.. و .... أو واحد مُلزم (شرعاً وقانوناً وعُرفاً) إنو يرسل مصاريف لوالدته. المثلين ديل نتصرّف معاهم كيف؟

يا محمد ابو العزائم تحياتي
اسرتك الماعندها مصدر دخل غيرك ترسل ليها بحيث لا يزيد ما يرسل لهم عن اسره يعمل من يكفلها في الداخل عشان الفوارق البتخلي الناس في بروج عاجيه دي ما تكون حاده.
يا اخي من شده ما الناس طغت بقوا ييعملوا اعياد الميلاد في النوادي والصالات بينما في بشر متلهم بتفتش اكلها في صناديق القمامه
التربيه شئ مهم .
اولادي من ثقافه تحتفل بعيد الميلاد لم يحدث قط ان اقمنا الاحتفال خارج نطاق بيتنا وعارف دي لما كانوا اطفال وموضوع التاثر بمجتمع المدرسه بالذات البت واول ما وصلت عمر 12 سنه
she grew out
of it she understood that her mum doesn't support such unnecessary expenses
الولد لانه مما وعي ما لقي في اهتمام بالموضوع دا بيقتصر الاحتفال علي قبله من الام والاب ونقول ليه كل سنه وانت طيب ونجيب ليه هديه صغيرونه وبس . عرفت انه بعض الناس اولادهم بيرفضوا الذهاب لبيوت حبوباتهم او الاسره الاصل لمجرد انه بيت الاسره الاصل ما طابقين وما مبني بصوره حديثه بيت عادي . هو الانفصال عن مجتمعك دا بيكون كيف اكثر من كدا
وبرضو راجين منهم يطلعوا ويتجابوا مع نبض شارع المساكين !!!!

دوما قريبتى ... صدقينى كلاممابيشبهك ... مهما كانت التبريرات ...

ومهما كانت الظروف والحال والمواقف .. ما أعتقد فى شئ بيخليك والساندوك فى رأيك دا يقولوا كدا

فى حق ناس هم دمكم ولحمكم أو من الأهل العشمانين فيكم تقولوا كدا ... حتى ولو فى موضع الهزار ..

والحمد لله فى ناس هنا بتشييل هموم الناس من غير مايفتحوا خشمم .. لانوا دا واجبم ...

وما أعتقد المسألة عندها علاقة بالنضال والحكومة والمعارضة ... دا واااجبكم ...

فبالله أرجوا أن تسحبوا البوست إحتراما لمشاعر ناس قد يكون ساعدتيهم من زملاء المنبر او القراء ، غذا قلنا المعنيين من الأهل ما مروا هنا

وأنا واثق فى مية واحد من زملاء المنبر بتجيهوا مساعدات أو قروش سواء منك أو من غيرك من الزملاء اللفى الخارج ...


المهم ده كلام ما كويس .... ناضلوا بى ايى شئ إلا مشاعر الناس والأهل ....



محي الدين جبريل

انا لله علي قول عماد عبد الله
يا اخي يبدو انه حتي مخي دا بقي ما متل مخكم !!!
الموضوع دا ما شئ شخصي
راي عام ان نظام التحويل او راحه اهلك دون عامه الناس
بتخليهم منفصلين من المجتمع الحولهم يكونوا ما حاسين بحال غيرهم ( المجتمع الحولهم دا ما بقصد بيه الناس الفي الحي او الاهل والاصدقاء بل كل اهل من تبقي من السودان )
عشان كدي لا بجدعوا لا بجيبوا ا الطوب
لا بمرقوا في مظاهره لا بطالبوا بازاله نظام فاسد
وبكدا انت ايها المغترب بتساعد في اطاله عمر النظام دا
الكلام الغير جاد والدي اغضبك يا محي الدين مسحته
واحب اوضح لك ليس هناك اي نضال بمشاعر انسان في كلامي
دي وجهه نظرك انت احترمها لكني لا اوافق عليها .

دوما نحن والله بنفهما طايره ... كلامك ماشرط يكون حالة شخصية أو كما قلتى ...

وما أعتقد اليوم فى مغترب بيرسل لناس بيتم وبس ... وزى ما قلت ليك فى مية واحد هنا بيستقبل مساعدات

من الخارج سواء كان من الزملاء أوغيرم ... ,انا شخصيا إستقبلت مساعدات من زملاء لزملاء بالداخل هسى ديل يكون شعورم شنو

كلامك واضح وكلامى واضح أعتقد ... وبعدين فهامات وما ابو كديس وما ابو فيل دى ما أعتقد بتناسب جدية طرحى للموضوع ..

وبرضو يظل الناس منتظرينكم حتى ولو جاء نظام من القمر وحكمنا ...

Quote: الجوابات وكتين تجينا فلان ما عنده حق تسجيل الاولاد في المدارس وفلان بدور يطهر ولاده ووفلان داير يمش السعوديه حجه وزوغه وفلان مرضان وفلان بيتو شالو السيل خلاه في الصقيعه ونحن نشيل ونرقع في القدود اها الناس الفوق الحكايه دي عاجباهم تب

ده مش كلامك يا البصيرة أم حمد ؟؟

بالحيل كلامي يا صلاح ابو ديه وواقفه ليهو دغري ورافعه راسي فوق
وكل زول يفهم بالطريقه العايزها والبتخدم غرضه .
ما في حجر علي فهم زول من ناحيتي تب

Quote: دوما نحن والله بنفهما طايره ... كلامك ماشرط يكون حالة شخصية أو كما قلتى ... وما أعتقد اليوم فى مغترب بيرسل لناس بيتم وبس ... وزى ما قلت ليك فى مية واحد هنا بيستقبل مساعدات

يا محي ا لدين يا ابني الكلام الانا بقول فيه دا ابدا لايقدح في حق اي زول يستقبل مساعده من مغترب بطلب منه او بغير طلب
بل هي محاوله لتفسير ظاهره الرمتنس وسلبياتها
في خلق نوع من المواطن المنفصل عن بقيه مجتمعه ومايحدث حوله خاصه تحت النظم الفاسده والفاشله كالانقاد .
يا جماعه قلت الرووب لاني فشلت افهمكم وجهه نظري وما في زول قدر يفهمني غير بت الحسين .

ما قادره افهم الناس دي قايمه في ماما دومه وجنّي علي شنو.. ! وبي أي حق بتزايدو في كرمهم ولا انتماءهم لأهلهم... المسألة ببساطة تحليل بسيط لمشكلة واقعية... المغتربين كل واحد فيهم ماسك ناس بيتهم... كان اكل كان شراب كان علاج ... وحتى الكماليات... المغترب بسد الشي المفروض تعمله الحكومة، انا لو ما عندي قروش أعلّم اولادي وبجيني دعم من برّه، ما بشوف عوجة الحكومة.. ما خلاص أمري مقضي... المغترب السوداني هو المغترب الوحيد البطلع برّه البلد بدون خطّة عودة.. المصريين ديل القايمين في رئيسهم... الواحد فيهم يجي يقعد خمسة سنين بالتمام والكمال، يبني ليه بيت... ويجري جري لبلده... احنا الواحد فينا بجي وبكون كسر جسر العودة تماماً.. لأنه اي هدف من الاغتراب صعب يحققه... لا بقدر يحوّش عشان يشتري بيت مع الاسعار الما طبيعية للبيوت والاراضي... ولا بقدر يرجع يقطع التحويلات من اهله لانه بكون على حسّه مفتوح اكتر من بيت... دي حقيقة... واي زول يجي يقول غير كده، بتكلم بمنطق المشاعر والاحساسيس... مافينا زول بقدر يحرم أهله من التحويل ده... لكن عدم قدرتنا دي هي البتغذّي الشعور بعدم الاكتراث في السودانيين... وهي البتتغذى عليها الحكومة وتطلع بكل قوة عين وتقول انه الشعب السوداني مبسوط منهم... !

الشعب السوداني لما طلع سنة 1985 ضد نميري، ما كان عدد المغتربين زي حسي... اي بيت عنده مغترب... والمغترب ده ما بالضرورة يكون دكتور ولا مهندس ولا غيره... ممكن يكون شغال في مطعم.. وبرضه يرسل كان لأمه ولا أخته ولا حتى زوجته الماقادر يجيبها معاه! كل مغترب شهرياً برسل عشان الاساسيات... ويدعي الله الشهر يعدّي من غير ما تحصل كفوة ولا زول يمرض... لانه العيّان ده بدفعوا ليه حق المستشفى بس للسرير، وباقي الحاجات اهل المريض بشتروها، من الله خلقني ما شفته لي مستشفيات بترسل الناس تشتري شاش وانبوبة اكسجين وحقن!

في سنين الانقاذ الاولى، كنا بنشيل معانا السكر والشاي وعلب الصلصة والماجي والأدوية ونمشي نطعّم للملاريا والتايفويد... ونرجع من السودان قبل اسبوع من المدارس عشان بنكون عيّانين وضعاف ومقطّعين... بالله زول ماشي اجازه ياخد تطعيم! اصحابنا المصريين والسوريين، يجوا راجعين بي نظافتهم زاتها وبي صحّتهم زاتها... ده لو ما سمنوا!

تحياتي

وعليكم السلام ورحمة الله وبركاته

-----------

Quote: ما قادره افهم الناس دي قايمه في ماما دومه وجنّي علي شنو.. ! وبي أي حق بتزايدو في كرمهم ولا انتماءهم لأهلهم... المسألة ببساطة تحليل بسيط لمشكلة واقعية... المغتربين كل واحد فيهم ماسك ناس بيتهم... كان اكل كان شراب كان علاج ... وحتى الكماليات... المغترب بسد الشي المفروض تعمله الحكومة، انا لو ما عندي قروش أعلّم اولادي وبجيني دعم من برّه، ما بشوف عوجة الحكومة.. ما خلاص أمري مقضي... المغترب السوداني هو المغترب الوحيد البطلع برّه البلد بدون خطّة عودة.. المصريين ديل القايمين في رئيسهم... الواحد فيهم يجي يقعد خمسة سنين بالتمام والكمال، يبني ليه بيت... ويجري جري لبلده... احنا الواحد فينا بجي وبكون كسر جسر العودة تماماً.. لأنه اي هدف من الاغتراب صعب يحققه... لا بقدر يحوّش عشان يشتري بيت مع الاسعار الما طبيعية للبيوت والاراضي... ولا بقدر يرجع يقطع التحويلات من اهله لانه بكون على حسّه مفتوح اكتر من بيت... دي حقيقة... واي زول يجي يقول غير كده، بتكلم بمنطق المشاعر والاحساسيس... مافينا زول بقدر يحرم أهله من التحويل ده... لكن عدم قدرتنا دي هي البتغذّي الشعور بعدم الاكتراث في السودانيين... وهي البتتغذى عليها الحكومة وتطلع بكل قوة عين وتقول انه الشعب السوداني مبسوط منهم... ! الشعب السوداني لما طلع سنة 1985 ضد نميري، ما كان عدد المغتربين زي حسي... اي بيت عنده مغترب... والمغترب ده ما بالضرورة يكون دكتور ولا مهندس ولا غيره... ممكن يكون شغال في مطعم.. وبرضه يرسل كان لأمه ولا أخته ولا حتى زوجته الماقادر يجيبها معاه! كل مغترب شهرياً برسل عشان الاساسيات... ويدعي الله الشهر يعدّي من غير ما تحصل كفوة ولا زول يمرض... لانه العيّان ده بدفعوا ليه حق المستشفى بس للسرير، وباقي الحاجات اهل المريض بشتروها، من الله خلقني ما شفته لي مستشفيات بترسل الناس تشتري شاش وانبوبة اكسجين وحقن! في سنين الانقاذ الاولى، كنا بنشيل معانا السكر والشاي وعلب الصلصة والماجي والأدوية ونمشي نطعّم للملاريا والتايفويد... ونرجع من السودان قبل اسبوع من المدارس عشان بنكون عيّانين وضعاف ومقطّعين... بالله زول ماشي اجازه ياخد تطعيم! اصحابنا المصريين والسوريين، يجوا راجعين بي نظافتهم زاتها وبي صحّتهم زاتها... ده لو ما سمنوا!

أستاذ محمد سليمان.. معليش ياخي ما سلّمته

لكن ما عرفته، دي داير تمسكها لي بعدين ولا شنو؟ والدليل قالولو

تحياتي ليك... ومعذره تاني على عدم السلام!

Quote: تحياتي ليك... ومعذره تاني على عدم السلام! مريم بنت الحسين 02-02-2011, 11:26 ص

Quote: تحياتي ------------------- مريم بنت الحسين 02-02-2011, 10:49 ص

الله يكملك بي عقلك يا مريم يا بت الحسين

مشكلتنا تتركز حول التفكير في الحلول الفرديه ما عندنا الاحساس بالمجتمع العريض ؟؟
لو تمكنت مجموعه من المحسنيين من حل مشكله مريض او يتيم من الدي سيحل مشكله الآف المرضي واليتامي ؟؟؟
مشكله المجتمع السودا ني ككل لا يمكن حلها عن طريق اغتراب الافراد والتحويلات بل التغيير في نظام الحكم واداره الاقتصاد ومحاربه الفساد ؟ افتكر انا ما في زول قادر يفهمني .
وليس كل دواء حلو المذاق . وانا بفتكر جاده انه الرمتنس له اثار سالبه ويساعد في اطاله عمر الانظمه الفاسده كالانقاد مثلا .



عارفين دي ثمره كلامي دحين ارمو البتاب غادي
والعندو كلام منطقي يجي يقوله ونتناقش حوله
العندو كلام عاطفي اليقوله لكين ما هو موضوعي هنا ولا مقصدي .

محمد E
انت نذرت للرحمن صوما و للا شنو يا اخوي ؟

لا أعتقد أن دوما أو جني قد توقفا يوما واحدا عن دعم من يدعمونهم في السودان. كل ما في الأمر أن لهما أسلوبهما في تبسيط وجهة نظرهما و طرحها بصورة ساخرة و قابلة للفهم. يعني دوما جزاها الله خيرا في البوست دا نقلت لي شخصيا مفهوم معقد جدا بصورة مبسطة تتناسب و مقدراتي... هسع أنا فاهم يعني شنو Remittance Economy بدون ما أقرا لي كتاب و لا مقال معقد. القالته دوما دا تحليل ممتاز جدا لحال الاقتصاد السوداني و لو كان هناك لوم فهو على هؤلاء المجرمين ممن يحكموننا الذين ينظرون إلى من يقعون تحت مسئوليتهم و هم لا يجدون لقمة أو جرعة علاج أو مقعد في المدرسة لأبنائهم.
مهما أرسل المغتربون لأهلهم فهم لن يوفوا الدين الذي عليهم و هذا أمر شخصي لكن هذا لن ينفي أبدا مسئولية الدولة و تقصيرها الفادح.

شكرا يا محمد اي سليمان
وشكرا لدوما وجني لو هم فكروا كده بالجد.
انا كثيرا ما ناقشت هذا مع كثيرين
انه المغتربين و اللاجئين مثلوا تخفيف ضغط على شعبنا بالداخل
فلم ينتبهوا لبشاعة هذه الحكومه.


التحويلات كانت بمثابة مخدر موضعي لجرح غائر.


الكلام البتكتب هنا ليس منى ولا أذى
ولكنه حقيقي.
ترابطنا الاجتماعي يؤدي لتأخير الثورات.



وعايزه اضرب لكم مثل بضربة سوق المواسير بالفاشر
لو تذكرونها ولانها مست اهل عاصمه شمال دارفور في ارزاقهم
ثاروا وهاجوا وتظاهروا ...رغم انهم لم يتظاهروا يوما لكل القتل المدور
في الريف الدارفوري!!


يبقى موضوع لقمة العيش ده هو الاساس.

ثانيا:
ضغطت الحكومه المغتربين و المنفين
برفع تكاليف الحياه بالداخل فصار كل واحد لازم يلقى وظيفيتن
عشان بس يوفي بمتطلبات اهله,وبالتالي قل الزمن الممكن يوظفه لمحاربة النظام!

يبقى الحكومه ضاربه كم عصفور بحجر واحد
تضغط اهلنا بالداخل بالغلاء فتلهي معارضه الخارج
عن المعارضه بتلبية احيتاجات اهلهم فقط!!وهكذا...دواليك
الناس تدور في ساقية جحا دي.

I fully agree with sister Tragie

شكرا يا العوض كثيرا
والله بقيت افرح لما زول يقدر يفهمني بصوره صحيحه .
my idea is so simple and by no means ill driven
لكين اقول شنو الله غالب .
عارف هي ممكن تكون قريبه لفكره ايقاف المعونات للدول الافريقيه ذات النظم الفاسده وهي الغالبيه العظمي
لانها للا تخدم غرض التعابه بل هي اطاله لامد معانا تهم وتمكين للحكام والحكومات الفاسده والحركات المسلحه .
في كتابات جيده في المجال دا لمن اراد الاطلاع
Dead Aid by Dambisa Moyo

The End of Poverty by Jeffrey Sachs
كتاب هام ويطرح معالجه مغايره لمويو
The Bottom Billion by Paul Collier

محمد سليمان - ازيك يا اخي بوست حلو كتلنا بالضحك

دكتور بلة

قلت لي صقع امو بالحجر؟ هههههههههههههههههههههههههها


دوما

Quote: الجوابات دي كانت زمان اسع في عصر السرعه والتكنلوجيا كل زول فيهم ساعيلو موبايل

وللمسكولات بس

ههههههههههههههههههههههههههها

Quote: وللمسكولات بس ههههههههههههههههههههههههههها

حباب ود شيقوق لالا اختك شيطانه اكتر منهم
ما سعيت لي موبايل والداهي الليلي ما بوريني النمره
تلفون من سنه حفروا البحر .
اها انا البمسكلليهم .
وبارك الله فيهم خيراتهم يوت عندنا كان ويكه كان دويات ملاح
اكان لوبيا ولا زيت للمسوح

Quote: يا جني ليس المغترب وحده الذي يجاهد من أجل الأهل .. بل إن القاعدين في البلد برضو يفنون أعمارهم في خدمة أهلهم الذين يعتمدون علي القليل الذي يكسبونه .. تلقي الشاب يضيِّع شبابه بدون زواج لأن أولوياته دعم أهله ..

وهل هذا امر طبيعى ان تتزوج الفتاة بغد ان تتجاوز الثلاثين ويتجاوز الرجل الاربعين ! عريس ا م نبي مرسل!
فى الخمسين يقود طفلا فى الثانية لا تدرى هو ابنه ام حفيده!
يارجل الرجال يتزوجون فى السودان بعد ان يبلغوا من العمر عتيا ويكون بعضهم قد اجرى عملية البروستاتا والنساء يحبلن بشق الانفس ويضعن احمالهن بشق الانفس!
يا رجل لقد احالوا الوطن الى مسخ!
يا منير التناول ساخر الغرض منه ايصال الفكرة بان هذه الحكومة لا تفعل شيئا وتوصيل الفكرة الى مناصرى النظام بان الشعب فى السودان لا يعتمد على حكومته ولكن على حكومة الظل المسماة بالمغتربين!
جنى

Quote: يا دكتور الايام دى بت الفحل قاطعه ليها نضال من راسه وقطع شك المرأة دى خرفت . نسأل الله السلامه

إحترم نفسك ياهذا....فإمرأة مثل زينب لا تخاطب هكذا.....

الخالة دومة تبثين حكمتك علي موجات عالية فلا تلومي من لا يملك العقل المتفتح لإستقبالها.....

رعاك اللة ياصاحبة القلب الطيب والضمير الحي....

ا الابن هيثم الصديق
والله تعجز لغتي عن الاحتفاء بك
شاكره كثيره
اتمني ان اكون عند حسن ظنكم

والله يا دوما كلامك واقع لي لمن مدفّق بي غادي.

بس المثلين الذكرتهم ديل بنود لا يمكن تجاهلها .. وفي نفس الوقت، بتفتح طاقة لدعم الأسر بحيث تبعد عنهم المعاناة المقصودة هنا، وبالتالي تبعدهم عن الفئة الممكن تمثّل ضغط على الحكومة الأصلاً رافعة إيدا من إلتزاماتها.

العايز أقولو .. إنو ما كل الناس بيقدروا يحصروا تحويلاتهم في الضروريات .. خاصةً لما أولادهم يكونوا بعيدين منهم.

حاولوا حاولوا يا محمد ابو العزائم في شريحه في المجتمع اتبرجزت شديد
وبعدت عن واقعها وعن الطبقات المسحوقه فيه

.

فنجره مني ما تعتل براك

.

ماما دوما

Quote: ما سعيت لي موبايل والداهي الليلي ما بوريني النمره تلفون من سنه حفروا البحر . اها انا البمسكلليهم . وبارك الله فيهم خيراتهم يوت عندنا كان ويكه كان دويات ملاح اكان لوبيا ولا زيت للمسوح

عييييييييييك اكان كدى لما ترجعي السودان ما بتلقي حد يستقبلك في المطار علا تركبي تاكسي وتجي شاقة الخرطوم زى المدرسة النقلوها لمدرسة جديدة

Quote: وهل هذا امر طبيعى ان تتزوج الفتاة بغد ان تتجاوز الثلاثين ويتجاوز الرجل الاربعين ! عريس ا م نبي مرسل! فى الخمسين يقود طفلا فى الثانية لا تدرى هو ابنه ام حفيده! يارجل الرجال يتزوجون فى السودان بعد ان يبلغوا من العمر عتيا ويكون بعضهم قد اجرى عملية البروستاتا والنساء يحبلن بشق الانفس ويضعن احمالهن بشق الانفس!

ياجني العرس ده الشئ الوحيد الماعنده دخل بالإقتصاد .. العرس حالة اجتماعية وحالة نفسية .. المرأة لو رايداك ممكن تعيش معاك في راكوبة ..
يعني نحن أهلنا الكانوا عايشين في الرواكيب وبيربطوا الغنماية في كراع العنقريب ديل مالهم ماقالوا المعيشة حارة ؟؟ ..
ولماذا ترتفع سن الزواج كذلك في دول الخليج وتتصاعد نسبة العنوسة ؟؟ رغم بحبوحة العيش، حيث أنه كلما زادت ثرواتهم تأخرت سن زواجهم ..
.. ما تقعد تعمل المعايش شماعة .. الجمهوريين بيتزوجوا بجنيه ..

واحد صديق علي قدر حاله قال عاوز يتزوج .. فقلت له ماذا أعددت لها - فقال لي زير وعندي عنقريب .. فقلت ليهو أها والمرأة عنقريبها كيف ؟ قال لي تجيبه من بيتهم .. أصلو هي كانت في بيتهم بترقد في الواطة ؟؟
.
.
.

هو زاتو عنقريبين لزومهن شنو؟ لو النفوس اتطايبت العنقريب يشيل ألف ..
تقول لي شنو؟ ..

حكيمة البورد زينوبه السمحه جوه و بره
أقرا كل ما تكتبين و دائما تعبرين عني تمامآ
والله يا دومه انتي و تماضر بت شيخ الدين من افضل الكتاب علي الاطلاق في هذا المنبر
الكاتب الصومالي نور الدين فارح الذي كان يحاضر في جامعة الخرطوم و الحائز علي العديد من الجوائز العالميه
كتب رواية تحت العنوان Gift يعالج فيها الاثر السئ للمنح و الاعانات الدوليه التي في محصلتها النهائيه تطيل
من عمر الانظمه المستبده و تساهم في إفقار و تخلف تلك الدول حيث يقول
"Foreign food donations create a buffer zone between corrupt leaders and the starving masses.
Foreign food donations also sabotage the African's ability to survive with dignity."
ولا يخفي وجه الشبه بين الاعانات الدوليه و الاعانات الاهليه في إطاله و تمديد عمر الانظمه الفاسده
الفرق الوحيد هو ان الاعانات الاهليه شر لابد منه



وفي الاخير نقول ليك واثقين منك و لا يهمك
تحياتي للجميع

.

Quote: عييييييييييك اكان كدى لما ترجعي السودان ما بتلقي حد يستقبلك في المطار علا تركبي تاكسي وتجي شاقة الخرطوم زى المدرسة النقلوها لمدرسة جديدة

هييييع هييع يا ود شيقوق دومه الحيكومه والناس اهالي
العربات القاهن واقفات بالصف واحدات يشيلن العفش واحدات يشيلن الحيكومه
انت بتلعب دي زينوبه يا اخي لوووووووووول

الابن الحبيب ناصر جامع تحياتي

شكرا علي متابعه مااكتب من ونسات وهي بالتاكيد لا ترقي لمستوى كتابات البنت الحديقه تماضر شيخ الدين نادره الحضور .
شكرا كثيرا .
اتمناك دوما بخير ايها الجميل

.