Post: #1
Title: اصلو الكفن ارخص كتير .... واعز من هذا العفن.... المجد لك سودانا
Author: عبدالله وداعه الامين
Date: 01-29-2011, 03:36 AM
Parent: #0
وتاني جاب سيرة البحر
والدنيا حر
وما امرّ من المر كمان
الا الحزن وهو الامر.
ونغني ايه
نغني ليه,,,
والليد مسك ايدا الحزن
شربت فتر.
هداها بعد الانتظار
و اولادها تابعين الاتر
وينو الوطن؟
باعوهو تجارنا السجم
وينو الوطن؟!!
باعوهو كيزانا البجم
ما خلوا حت حق الكفن
باعو الرضن
والما رضن
والكملن لحم الجسد
والساسقن لمن حفن
حق الفطور الما لقن
شرف الرجال الما لقن
اتلفحن توب الصبر
واتيقنن مُر الإحن
ولو مرة درويشن رطن
ترجم وبشر سكتن
قال النعيم مالي البلد
والخير مقسّم يا ولد
بي الخوفة دسن حسرتن
باعن دهيبات السجم
والسترة شان حق كسرتن
ماخلن الغالي ونفيث
ما ساومن في عفتن
اتحملن باقي الالم
وادنو من دم جلدتن
وين الرجال وين البنات الولدتن؟
وينو القطن؟
والنيل محسر منكتي
ما لاقي عودا يلقُطن
ما تجيبي ياخ سيرة البلد
شن خلوا غير حسرة واسف
ومزلة ,, خلي يلقّطن
يا حليلو قايل هو الفطن
بالله شن جابوا البجم
واسمنا في الذل منعطن؟
حتى التميرات الربن
بي الطيبة جانا ومعّطن
خيرات بلدنا الشحّطن
لوكان بحن
كان اختشى
من غير ما ايي ارتشى
قشقش عقابو وبس مشى
مشى واندفن
والشعب متبرع يمين
يدوهو بس حق الكفن
اصلو الكفن ارخص كتير
واعز من هذا العفن.
عبدالله وداعه الامين
لندن - 20.01.2011
|
Post: #2
Title: Re: اصلو الكفن ارخص كتير .... واعز من هذا العفن.... المجد لك سودانا
Author: عاطف عبدون
Date: 01-29-2011, 04:33 AM
Parent: #1
وشعرا وشارع وشعب
إيد علي إيد لي نصر اكيد
يا سلام ياصديق
شكرا
شكرا
شكرا
|
Post: #3
Title: Re: اصلو الكفن ارخص كتير .... واعز من هذا العفن.... المجد لك سودانا
Author: حسين نوباتيا
Date: 01-29-2011, 05:12 AM
يا سلام يا سلام..
عبدالله وداعة الامين .. صاحب الحرف الطاعم .. البورد كان مفتقدك بشّدة..
مرحب بك وبشعرك النابض ..
|
Post: #4
Title: Re: اصلو الكفن ارخص كتير .... واعز من هذا العفن.... المجد لك سودانا
Author: عبدالله وداعه الامين
Date: 01-29-2011, 08:51 AM
Quote: وشعرا وشارع وشعب
إيد علي إيد لي نصر اكيد
يا سلام ياصديق
شكرا
شكرا
شكرا |
الاخ العزيز عاطف يا عابدون
المجد للشعب السوداني البطل
والخذي لاعداء الحرية واعداء الوطن
شكرا لك ايها الجميل
ومعا حتى النصر
فمهما كمموا الافواه لن يستطيعوا اسكات الشارع
والنصر آت
|
|