ضَحكة وردة للتهديد

عليك بكوس

بين اليابسة و الهدام

بين الصحوة و الكابوس

بين البقيف بي وراك

وبين البمشي لي قدام

هفيف المشية ذي طاوس

رفيق الدرب ود خَيتي

أدندن عِـنية في غنيتي

عُوكازتي و حمار جدي

وتحت جلدي

خنجرك مغروز

عليكي بكوس

بشوفو رهاب عقاب بلدي

وتلمعي في لحي الابنوس

****
انـادي عليك واتأوه ...

وأعبـر بي خيالي مِداك

شــراع ريدك بعـيد لَوح ....

واقولكـ بي ضمير مرتاح

زمنا الجاي ما رَوح ...

نبض إحساسو ما اتلوث

ولا بالجبن اتشوه

زمن ناصع

أبيض من ضمير الطفل

وكَعـك العيد ...

واطعم من رحيلنا المٌر

وضحكة وردة للتهديد

وأحلي من الشقاء العشناه

ودمع الفٌـرقة لما يذيد

أقرب ل اندمال الجرح

ولمــسك يا وطـن باليد ...

أعمق من صـلات الدم

واطول من مسافة الطلقة بالتحديد...

أكبر من الحاصل

أعمق من الفاصل

وقَــدح العٌشرة حارسو مع الدعاء التنهيد .....

محمدالفاتح خالد

هاكي ... ديل

اكييد ... يوم بكرة حا يفرهد شتيل

و مصيرو حا يروق البحر

لو تاني عكر طينو سيل

مصيرو درب الرجعة يَقصر

مهما ذاد مشوارنا ميل

مهما نهار الصبر طال

ما هدا طول المشية حيل

الشمس ... من تبدا تشرق

أعرفي صبحك شلنا شيل

ما .... من عوائد السكة ترفع كل ساقط

و ما بتجر الوقعوا خيل

محمد الفاتح خالد

نومي نومك ..

وشـيلي كومـك

حرة اخترتي الطريق

حرة تحلمي بالدراهم

حرة ادمنتي الضجيج

خالفي رايك وخالفي قومك

اخلطي الحب بي البراهم

أنزعي الحزن العميق

طالما نبض الكتابة

بسري في دمك بقهقه

فينا .. مين عارف الاجابة

فينا .. مين خاض المعارك

وأنا بين حواري اللقية جيتك

وسلمتو ليكـ قلبي البحسك في ارعاش نبضو البشالق

وكان مكان قابلتيني صدفة

في الجو غبار الذكري عالق

في القبلي لاح ... لحظة مجيكـ برق المشارق

وانداح هناك

صوت الطبول النايحة من عنف المطارق

بهتف بحبكـ والسفر

أنا من جٌحر غيبوبتي مارق

تاني ما بتغلبني دمعة

ولا بخاف قمة جمالكــ

محمد الفاتح خالد

وقت انفتح لي نهاري باب

فتشت لي هودج غناك

فريت شراعي علي النجوم

وتكيت قفاي علي السحاب

واتمحنت يا محن العمر

من غير حروف أبدا الكتاب

وأبدا أحسب في السنين

لا نضب فيني اشتياق

ولا خبت ريدي الحنين

واقف علي ضٌل الفراق

فارس وقع سيفو السنين

لاني عارف سكتك

لا بَر ســـواحلك

نورو لَوح للحصين

محمد الفاتح خالد

يوم غبارك فينا هبا

وقمنا من حفرة سكاتكـ

قمنا بي شغب المحبه

وقلنا .... للكتف جناحك

وللغمد في القلب حربه

وللسَجن أمال سراحكـ

وللبريق الوهجو خبا

بكرة من عمق الخواطر

ومضة تكبر حبه .. حبه

يغمر الاركان شعاعا

وفي رصيف الظلمة تحبا

لحظة ما اتوقف غمامكـ

فيضو ذايد وفينا صبا

ومطرو نازل دم جراحكــ

والليل جرحكـ جرحي طبا

مين قدر في سجنو يكتم

نَسمة من نسَمات صباحكـ ؟

لما ريحكــ غضبو عبا

محمد الفاتح خالد