مــــاهــاميـــــــــــــــــــك

اتناوحت والليل هزيع
قمرية في نيمة الفريق
هتنت دموع الشارع المحزون
اتمايلت حيطان بيوت
واتلملم البوم في الطريق
ياعسكري
ماتفتري ..
يالابس الدقن الضلال
فارقت ابواب الحلال
وضحكت في سرك
تنعل في الحلال
تهوى التعدد
والتكنز والبنيات والدلال
والشعب في جيبك
خاطيه بي قلم الدلال
والناس تناهد زي غريق
سكينك الحاد النصال
قسمت خاصر البلد نصين
نزف نيل الشمال كبدو
نزف نيل الجنوب قلبو
وبقت
كابوس سكن في البال
انت تغني ما هاميك
صراخ جوف الجروف المر
وما هاميك
لو جاعت بطون ضمرانة من يوم جيت
وما هاميك
لو يتمت جهال وعيال
وما هاميك
وانت تسير على جثث
الخلوق
تلملم في الحريم والمال
وما هاميك لو قادت وبق حريق
نعلك في الصبر عقدين
نتاوق للنجيمات تنقط لينا حبة ضو
ويترقرق
خيط الضو
من نفاج بكا الاطفال
وتلملم غضب جوانا ليه سنين
وباكر
لما تتكوم مناكر
بمرق الشارع ضحى
وينترس بي كل زول رمل الطريق

Quote: وباكر لما تتكوم مناكر بمرق الشارع ضحى وينترس بي كل زول رمل الطريق

أخى محمد حسن........يا حليل يوم بكره...

والطريق بقى زلط ....وما هاميك..تحياتى.

اسماعين ود عباس
ازيك يل راجل يا انيق
جد مشتاق ليك
زلط لي زلط يفرق

*

مرق مني الكلام مدموم
شان الحال صبح مذموم

ابت شمس الصباح تطلع
ابت غيمة الخريف تدمع
ابى النيل المبيت قدام
وقف في النص

لا جف مدادك يا دوك وتسلم البطن الجابتك يا با
نص معبر تماما عن حال البلد المايل
والغصة تطعن في الحلق

Quote: والغصة تطعن في الحلق ]

ياقمرة ما يتبكي
وتقولي الليل طويل
النيل فقد ريحة المطر
واتكندك التمر التراب
واتمدد الصوت العويل

فوق ر

شعبنا صاابر ليه سنين
ودايما فوق

أصلو يوت درب التُراب بارِد وحاتك وهَيِن
والطريق السفْلتو بِعذابات البشر واضِح وبَيِن
عِنْدك مشاوير؟
بالأماني ظنك دحين تصلْ حَيِن؟!ْ
إنت زارِع حواشه الوهم بِزيفه صعيد وِصَيِنْ
كيف تَمَسِر عاد والغُبْن القديم ماروقِنْ ورَيِنْ!


والله هاماني البلد والله.. عِلا موت القليل خُسران كتير، خلو الديش اللِمات وخجل كُل المُروة الحايمة فينا.. فُراق إتْنين أخير مِن ذُمة رقبة.. المات فات.. والعاش مات.. ما همِية مِين الخات.. ما هداك مات! طلاق إتْنين فوقو حياة.. بدور جِنْياتي يِشِبو دون أحقاد.. كفانا والله كفانا.. عاد لِبْتين.. يا خوي لِبْتين؟