بالله عليكم اوقفوا الاستخفاف بنساء بلدي ؟ يوجد بوست يسي لهن!

بما لا يدع مجالاً للشك ( وبالصور ) ..... لا بنعرف نلعب ولا بنعرف نشجع
درج كثير من الاخوان فى هذا المنبر على فتح بوستات تقلل من شان نساء السودان بطريقة مبطنة ، وذلك من خلال بوستات تعتمد على الصور المثيرة لفتيات من دول اخري ، يتغناء المتداخليين فى البوستات بجمال اوليك ويتسابق البعض فى انزال بعض الصورة المثيرة ، مثال على ذلك جميع البوستات التي تحدثت عن جمال الاثيوبيات ، رغم انهن لسنا اجمال من النساء السودانيات ، لكن طريقة التصوير التى تظهر مفاتنهن ، هى التى تثير غريزة الرجل السوداني!
ما هي مقاييس الجمال فى نظر الرجل السوداني؟
هل لون الابيض والشعر الاشقر هي المقاييس الرئيسية للجمال ؟
هل اظهار المفاتن اهم المقاييس ؟
هل نساء بلادي يفتقدنا الي الجمال؟

ملحوظة :
الكلام غايظني شددددددددددددددددددددددددددددددددددددددددددددددددديد
ماعندي وقت لمناقشة الموضوع مع المبهورين بالاخريين.

منو القال كده..؟
والله سماحة بناتناماف زيها..
كل البحصل بعد مرات انو بتكون فى دعابات خفيفة كده
مااكتر..بين الاخوان..
تحياتى

يا معاذ سلامات
ياخ لو قاصد بكلامك دا البوست بتاع أخونا فضل كرار
فمن وجهة نظري ما فيهو حاجة من القاصدو دا
اللهم إلا إذا كان جلب صور بنات ونساء غير سودانيات
في البورد يعني ما تقول في رأيك ..
وقد قيل في هذا المقام :
العارف عزو مستريح .

الاخوان الاعزاء:
محمد عوض ، طلحة عبد الله
لكم التحية والاحترام ،،،
لدي سؤال ما هو شعوركم اذا قامت احدي البوردبيات بفتح بوست تتغزل فيه بوسامة "جورج كلوني " او "راغب علامة"؟
هل سنتقبل هذا السلوك من هذه البوردابية؟
اما نتعتبره سلوك غير قويم يمس الرجل السوداني؟

Quote: ما هو شعوركم اذا قامت احدي البوردبيات بفتح بوست تتغزل فيه بوسامة "جورج كلوني " او "راغب علامة"؟

جورج كلوني ممكن ما فيها حاجة
لكن راغب علامة لا وألف لا .. لانو قبل كدا
قال بنات السودان عندهن كدامير أو قنابير أو ما شابه ..

غايتو يا طلحة..بالغت..

Quote: جورج كلوني ممكن ما فيها حاجة لكن راغب علامة لا وألف لا .. لانو قبل كدا قال بنات السودان عندهن كدامير أو قنابير أو ما شابه

الأخ معاذ

سلام


اعتقد أن البوستات التي تقولها مافيها شئ من الذي ذكرته..
وبعدين كل زول عنده مساحة لقلمه...
وما ممكن يجي زول يسئ لبنت بلده بالصورة القصدتها دي..
ياخي خلي الزعل وأمشي بي رواقة كدا لأي من البوستات إياها وانتقدها.. وكدا بيكون الكلام في محله وله وقع كبير..

تحياتي

بين كل زول عنده مساحة لقلمه...

الأخ عبد العزيز
اعتراضي على هذه النوعية من البوستات لأن هذه النوعية من البوستات تعتمد على ألصورة فقط فالقلم برئ منها

Quote: درج كثير من الاخوان فى هذا المنبر على فتح بوستات تقلل من شان نساء السودان بطريقة مبطنة ، وذلك من خلال بوستات تعتمد على الصور المثيرة لفتيات من دول اخري ، يتغناء المتداخليين فى البوستات بجمال اوليك ويتسابق البعض فى انزال بعض الصورة المثيرة

الاستخفاف هو بالضبط محتوى هذا البوست ، الذي إختزل كل شأن نساء السودان _ على قولك _ في شكلهن الخارجي
و اعتبر ان اي اعجاب من رجل سوداني باي امرأة من جنسية اخرى تقليل من شأنهن .


طريقة تفكير مؤسفة جداً

و قمة في الاستخفاف

الأخت سلمي تأور
تحياني واحترامي
للأسف فكرتي مغايرة لما جاء فى بالك حيث أنني أقصد ان تصوير الاشياء عن قرب يكون أكثر جاذبية ويشد المشاهد للصورة خاصة إذا كان اللتقاط ألصور للجزء الذي يعشقه الرجل من جسد المرأة ، على العكس من ذلك نجد ان المرأة السودانية تتعفف من إظهار مفاتنها أمام الكاميرات.
مودتي
معاذ

انت متأكد انك قريت مداخلتي كويس ؟؟؟؟؟؟؟؟؟؟؟؟؟؟

لأنو كلامك دة

Quote: للأسف فكرتي مغايرة لما جاء فى بالك حيث أنني أقصد ان تصوير الاشياء عن قرب يكون أكثر جاذبية ويشد المشاهد للصورة خاصة إذا كان اللتقاط ألصور للجزء الذي يعشقه الرجل من جسد المرأة ، على العكس من ذلك نجد ان المرأة السودانية تتعفف من إظهار مفاتنها أمام الكاميرات.

لا يمكن يكون بأي حال من الاحوال رد على المداخلة دي

Quote: الاستخفاف هو بالضبط محتوى هذا البوست ، الذي إختزل كل شأن نساء السودان _ على قولك _ في شكلهن الخارجي و اعتبر ان اي اعجاب من رجل سوداني باي امرأة من جنسية اخرى تقليل من شأنهن . طريقة تفكير مؤسفة جداً و قمة في الاستخفاف

تصوير شنو و مفاتن مرأة شنو ؟!!! مين الجاب سيرة الحاجات دي ؟!!!

انا يا سيد بتكلم عن فكرة البوست بتاعك دة عموماً ، إفتراضك الغريب انو إعجاب الرجل السوداني بغيرنا من نساء الجنسيات التانية فيهو تقليل من شأننا و استخفاف بنا كنساء سودانيات ، و كأنما شأننا كلو في الحياة اننا نثير اعجاب الرجل السوداني بشكلنا و مفاتنا الانثوية .
إفتراضك دة في حد زاته فيه استخفاف و ابتذال و اختزال _ و إهانة إن شئت _ للمرأة السودانية
اعلم ان كنت لا تعلم ، و بغض النظر عن حسن نيتك
طريقة تفكير محتاج ان تعتذر عنها لأي امرأة سودانية.


ارجو ان تقرأ مداخلتي جيداً هذه المرة

الاخت سلمي تاور
تحية واحترام ،،،،

اولاً: براحه براحة عشان ما تزعليى مني!
ثانيا:الرجاء التكرم بالاطلاع على البوست الذي اشرت له والمداخلات التي تمت من بعض الاخوات ، ممكن تفهمي انا قاصد شنو؟
الرجاء الاطلاع على هذا البوست هل يقصد التشجيع ام حاجة اخري؟
بما لا يدع مجالاً للشك ( وبالصور ) ..... لا بنعرف نلعب ولا بنعرف نشجع
ثالثاً: انا لا اتكلم عن اعجاب الرجل السوداني بالجنسيات الاخري ، فهذه حالات فردية ، انا اتكلم عن المبالغة فى الحديث عن الجنسيات الاخري فى اكثر من بوست وترويج لهم بصورة هيستيرية ، حيث يتتدافع المتداخلين فى انزال الصور.
رابعاً: انا لم اقلل من جمال المراة السودانية بل ادافع عن جمال المراة السودانية ، وقلت ان المراة السودانية محافظة لا تسمح بتصويرها بصورة مثيرة تظهر فيها مفاتن جسدها"وهذه هي البضاعة الرايجة فى سوق الجمال ".
خامساً: انتي لم تعاني من سخافات الجنسيات الاخري وتفاهاتهم .

معاذ السر ..

تحيات وصباحاتك ندية ..

ما تحمّل الموضوع أكتر من طاقتو .. الموضوع عادي جداً

بالغت والله يا معاذ!

Quote: لكن طريقة التصوير التى تظهر مفاتنهن ، هى التى تثير غريزة الرجل السوداني!

هذا يقره الشرع

سادتي الكرام تحياتي
واسمحوا لى أن اخص الاخت سلمى بالتحية

وأن اشكر لصاحب البوست إحساسه بأن لهذه الصور أثر سيئ حتى ولو لم يكن موفقاً-في نظر البعض وليس عندي- فى التعبيرعن استيائه

نحن في زمن حلت فيه الصور محل الكلمة المكتوبة واتضح فى اكثر من بحث قدمه رجال ونساء أن هذه الصور تؤثر تأثيرا مباشرا على تصرفات الأجيال الجديدة. واتضح بما لا يدع مجالا للشك أن الفتيات -وبهذه المناسبة- شباب الرجال أيضا يسعون لتحقيق ما يرونه فى هذه الصور متحركة كانت أم ساكنة. تكثر الان أمراض الانروكسيا والبوليميا والدبرسة كمان في هذا السباق المحموم لتحقيق أجسام ثبت أيضا بالدليل القاطع أنها مصنوعة بالكومبيوتر. يعنى ببساطة الراس من كارولينا والسيقان من السويد. مش كدة وبس أرجعوا للسايت بتاع Dove عشان تشوفوا كيف يمكن ببرنامج كومبيوتر بسيط رفع الحواجب وتوسيع الفم وتطويل الرقبة لصنع موديل يصعب تحقيقه على الطبيعة.

طيب نجى للمحك الحقيقى ناس كثيرين قالوا المسألة "بسيطة وعادية" أصلو الأولاد البفتشوا فى العضلات والبنات العايزات جسم باربي ديل ما عندهم عقول؟ الجابرهم شنو؟
واضح ان المجتمع ووجهة نظره فى الجمال أو القبح سبب أساسي للجرى ورا ما يغنى له المغنى ويحبه الرجال يعنى لما كنا بنرقص لقول المغني "ديل شلاخك وقفن شهود" ما كان فى تفكير فى ضرر الشلوخ ولما غنينا للخدود السادة اختفت الشلوخ.
أها بعد الكلام الممل ده بمجرد ما نعرف شاباتنا إنه الكلام الفي الصور ده هو "اللعب" ولازم نعرف نلعبه حقو ما نستفرب لو بناتنا نزلوا الملعب!
لكن خلى واحدة تقدر تتشبه بالصور دى وتعالوا شوفوا بوستات البكا على الأخلاق السودانية السمحة وكيف البنات ديل لازم يتأدبن.
وهنا بجى كلام الإبن صاحب البوست "التقليل من شأن المراة السودانية" فى تقليل أكثر من نقول ليها ياها دي السماحة لكن إياك تقربيها؟

قتلت حلاوة بوست اللعب؟ معليش تكبروا تنسوا
أملي كبير أن يستمر النقاش :(-

يامعاذ


تقصد صور خليعة


كلامنا عن النسوان كلو عن المحاسن والصورة اغنت عن الكلام



شوف صورة البنت دي واغنية ميرغني المامون واحمد حسن جمعة ميل ..... سندو الكفل

يامعاذ

يا اخوي صوتنا هناك وهنا مكتوم

فكر في نسوانا غير كده


نسوانا مكافحات عاملات مربيات مهندسات طبيبات

لكن

عندنا رجال عندهم مشكلة في التفكير و السبب فيهو انو كمية الدم في عروقهم

لا تكفي لكل شئ يعني الدم منساب كلو الي الجزء الاسفل من الجسم ووبالتالي

الراس مابتصلو كمية كافية من الاوكسجين التي تساعد علي تحريك الدماغ

لذلك وجب قطع الجهاز التناسلي عشان الدم كلو يتجه الي الراس وبالتالي يفكرو

كويس

لا تحرمونا من كل نعمة يا اهلنا

ههههههههههههههههههههههههه
بالغت والله يا ود عوج الدرب!!

Quote: بالغت والله يا ود عوج الدرب!!

بالغ الشوية دي ....؟؟؟؟

ما إختار إلا الحاجات دي....؟؟؟؟

و الله دي أخير منها حكاية إنو جماعتو على بعد 200 كيلومتر من أم درمان

أخانا سيف.. سلام
كان بالإمكان توصيل فكرتك بدون هذه الصورة.. الخليعة.
ولاّ لأ؟

تحياتي

أها سيف طمبجا ليكـ كلو كلو ..


يا حبيب الموضوع لا يعدو مناكفات بريئة يعني أنت أسه شايف واحد في البوست داكـ عرس ليهو سويدية ؟

يا سيف مساعد
الله يديك العافية ...
انامن الضحك ماقادر اشتغل ولا قادر اتابع البوست ...
يا جماعة انا رفعت يدي من البوست الحكاية باظت خالص ...

يا سيد معاذ
عنوانك بالنص هو :

Quote: بالله عليكم اوقفوا الاستخفاف بنساء بلدي ؟ يوجد بوست يسي لهن!

طبعا انا اول ما قريت العنوان دة دخلت على اساس اني حالاقي بوست فيهو إساءة ، فيهو تمييز ضد المرأة ..... الخ
لكن لقيت انو فكرة البوست دة نفسها فيها إستخفاف بشأن المرأة السودانية

اول حاجة البوست الجبتو و دعيتني اتطلع عليهو و على مداخلات الزميلات فيهو انا قريتو كامل و ضحكت و خلاص ، بوست ظريف و دمو خفيف جداً و افتكر اي وحدة من المتداخلات فيهو دة كان إحساسا ، يعني ما كان في اي احساس باستخفاف او اساءة .
احساس الاستخفاف و الاساءة شعرت به من بوستك دة ، ياخ في رجال شايفين النساء السودانيات شينات عديل ، وين المشكلة؟؟
هل شأن المرأة السودانية هو فقط في جمالها؟؟ و بالتالي يكون الاعجاب بغيرها هو تقليل من شأنها و إساءة لها؟؟
إنت شايف كدة؟؟؟؟

الأخ معاذ

أتفهم جدا أسباب غيظك
أنا دخلت البوست المذكور عن طريق اللنك
وفعلا أعتقد أنه كاتب البوست جانبه الصواب في اختيار العنوان ...يعني لو اكتفى بالصور واختار عنوان ما يحشر فيه المرأة السودانية يمكن كان يطلع البوست مسلي ودمه خفيف
لكنه اختار أن يقارن وجوه وأشكال الأجنبيات بالسودانيات بطريقة- على خلاف ما فهمت الأخت تاور- الغرض منها المقارنة المجحفة و إظهار أن السودانية لا ترقى لتقارن بجمال الأجنبيات أو العربيات "المعروضات" (أو كما قال ..ولا بنعرف نشجع)
وحتى لما حاولت أخت اضافة صور لسودانيات في ميدان برضو أصر على تأكيد وجهة نظره
عموما المستغرب ليه انه بعض الرجال السودانيين يعقد مقارنات زي دي ويتناسى نهائي اننا جايين من رحم واحد وصلب واحد وعلم الوراثة ما فيه استثناءات مستندة على الجنس.. يعني السودانيات لو ما "سمحات" كذلك الرجال من غير شك...إذن على شنوالمقارنات
وبعدين كلام الرجال الكتير ده زاته هو اللي خلى السودانيات – و بحرفية المعنى- يتكالبن على الزواج من الأجانب والعرب ومعاهن ألف حق
وهو برضو السبب انه البنات في السودان هسه بقوا عبارة وجوه أو قول قناع مطلي بالألوان المتناسقة والغير متناسقة في كتير من الأحيان

يا ود ألصايم
البالغ سيف مساعد

Quote: احساس الاستخفاف و الاساءة شعرت به من بوستك دة ، ياخ في رجال شايفين النساء السودانيات شينات عديل ، وين المشكلة؟؟ هل شأن المرأة السودانية هو فقط في جمالها؟؟ و بالتالي يكون الاعجاب بغيرها هو تقليل من شأنها و إساءة لها؟؟ إنت شايف كدة؟؟؟؟

يا طارق الكوتش
تحياتي . . .
رأيك شنو فى كلام الأخوات أسماء و رمانة؟ما بستاهلوا التصفيق برضو؟

من يَهْنْ يَسْهُلُ الهَوَانُ عليْه مَا لِجُرْحٍ بِمَيِّتٍ إيــــلامُ

نحن نمجدهم وهم يستخفون بنا هذا حال جميع المنتديات العربية حيث يتسابقون فى الضحك والاستخفاف وتاليف النكات عن السودانيين:
http://women.bo7.net/girls119833

Quote: سوداني يدرس مسائي انطفت الكهرباء سجلوه غياب. ======== * سوداني إنضم للقاعدة قالهم داير عليكم الله تحطوني في الخلايا النائمة ======== * سألوا سوداني: أيش يعجبك في قصص الأنبياء والصالحين؟ قال: والله كلها عبر وحكم .. وبالزات قصة أسيادنا أهل الكهف يا سلام عليهم... كبسوها نومة تلاتمية سنة. ======== * شاعرسوداني: زاتي انا ماقادر اقيف عن حبك وزاتك انت ماداير تهتم بيهو وزاتي انا برسم ليك خط بدربك وزاتك إنت لازم تمشي عليهو عليك الله ماتحلف بربك حبيبك كيف ما ترفق عليهو ======== * سوداني تثاوب قالت زوجته دامك فاتح فمك صوت للعيال .... ======== * سوداني جالس مع لبنانيات سألوه وش جلسك مع الورد قال والورد ماداير سماد ؟ ======== * سوداني جاله ولد أبيض عيونه زرق شعره أشقر سماه.... المستحيل بزاتو ======== * سوداني جاه شلل مادرى إلا عقب ثلاث أيام <------- كان نايم . ======== * سوداني شاف زيتونه قام يصيح تذكر أيام الطفولة ======== * سوداني كسلان شاف ولده يغرق قال إنقذني قال له أبوه ماداير تموت شهيد ؟ ======== * سوداني مات ليش ماله خلق يتنفس ======== * سوداني يأذن وهو منبطح ليش علشان المايكرفون طايح ======== * سودانية رايحة المدرسة ونافشة شعرها ليه أسبوع الشجرة ======== * سودانية سألوها شلون شعب الكويت قالت طيب وحبوب وينادوني يالخالة ======== * سودانيين سرقوا بنك تعيجزوا عند عد الفلوس قالو آآي بكره نعرف من الجرايد ======== * سودانين قاعدين يفكرون قال واحد ياليت في زر يجيب العالم كله قال الي معه بس مين يضغط الزر ======== * سودانيين يبون يسون فريق كرة قدم تخانقوا على الإحتياط

الحاجة البترفع الضغط والسكري ان زملاء العمل فى الجنسيات العربية خاصة بلاد (الشام) و(الخليج) يتسابقون فى ارسال هذه النكات عبر الايميل الداخلي للشركة

Quote: عموما المستغرب ليه انه بعض الرجال السودانيين يعقد مقارنات زي دي ويتناسى نهائي اننا جايين من رحم واحد وصلب واحد وعلم الوراثة ما فيه استثناءات مستندة على الجنس.. يعني السودانيات لو ما "سمحات" كذلك الرجال من غير شك...إذن على شنوالمقارنات وبعدين كلام الرجال الكتير ده زاته هو اللي خلى السودانيات – و بحرفية المعنى- يتكالبن على الزواج من الأجانب والعرب ومعاهن ألف حق وهو برضو السبب انه البنات في السودان هسه بقوا عبارة وجوه أو قول قناع مطلي بالألوان المتناسقة والغير متناسقة في كتير من الأحيان

يسلم فمك يا رمانة...

بالله يا أخوانا وبكل أمانة في أروع من الفهم ده ؟؟
أتحدى أي جنسية في العالم يكون عمق تفكير نسائها بهذا المستوى ...

هل من مزيد؟