Post: #1 Title: الشاعر هاشم صديق - اقول ليكم كلام انسان بعز نبته......فيديو Author: Medhat Osman Date: 01-19-2011, 08:32 PM Parent: #0
Post: #2 Title: Re: الشاعر هاشم صديق - اقول ليكم كلام انسان بعز نبته......فيديو Author: Medhat Osman Date: 01-19-2011, 09:04 PM Parent: #1
الشاعر: الطاهر أحمد المصطفى ممتل المفصوليين بالشرطة اسم القصيدة: الكيزان ..."أيخادعون الله أم أنفسهم يخدعون؟
Post: #3 Title: Re: الشاعر هاشم صديق - اقول ليكم كلام انسان بعز نبته......فيديو Author: Medhat Osman Date: 01-19-2011, 09:44 PM Parent: #1
هديمك يا وليدمقدود و صابحنا الفقر و الجوع صبح باب التكل مسدود كمل حتي الملح في البيت وشن همّ الملح في البيت وكت ملح الدموع موجود؟! دحين يا وليد هو ديل موُ قالوا ناس إنجاز ؟!! وشن سّولنا مما جونا غير حرقو الفضل بالجاز ؟ كّل شيتا صعب في السوق من الكبريتة للطايوق و كان جانا البخت تموين رطيل سكر و صابونتين نجيب من وين ؟ و اخوك مرفود و عدمان الشهر ملين ؟ أمس زازيت اكوس الدين مشيت لسمية بت مامون لقيت جابولها تلفزيون سمح بالحيل تشوف الصورة بى كم لون
وكت في نشرة ألأخبار ظهر مك البلد يضحك جضومو كبار مزرر الكرش بزرار لا مهموم لا مغموم لا زعلان و شيهو يراري بالألوان.. وقّد في حشايا تباق نار طريت رفد الوليد و الجوع و سال دمع الغبينة الحار اريتك يا ملك فد يوم يخلى الجوع عينيك ما تنوم أريتك يا ملك فد يوم تحس بي غصة المظلوم دحين يا وليد هو ديل ما لهم و مال الدين وكت قولهم كلام الله و فعالهم ما فعال صالحين كتير فيهم عديل حقار و بالقرآن كمان تجار و كضابين
أكان بنزين عدم .. أو جاز وتعبوُ الناس و ضاقو خلاص صفوف واقفين يقولولك إرادة الله وكان عدم الرخيص و الغالى في التموين يقولولك ده . غضب الله و كان الموية صبحت طين يقولولك ده من امريكا والعملا حمونا الشب ولاد الكـــــــــــلب عشان الشعب يحرن تب يقبّل من صراط الدين دحين يا وليد هو ديل ما لهم و مال الدين أكان كنزو الدهب و المال بلايينهم تسوى جبال وعرباتهم تخطف العين و بناياتم قصور في قصور وحاة الله و كتاب الله أكان ادونا طوب فد سور كان سوينا الف أويضة لي مسكين
Post: #4 Title: Re: الشاعر هاشم صديق - اقول ليكم كلام انسان بعز نبته......فيديو Author: ibrahim alnimma Date: 01-20-2011, 00:47 AM Parent: #3
الاخ مدحت تحياتي وهو نرفع البوست ........لمزيد من المشاهدة وسؤالي هل كان هذا الكلام متلفز علي النيل الازرق ؟.........اكيد ماكانو عارفين انو بقول شنو......رأيت من الحاضرين من هو مشدوه وخائف
Post: #5 Title: Re: الشاعر هاشم صديق - اقول ليكم كلام انسان بعز نبته......فيديو Author: خالد العبيد Date: 01-20-2011, 01:14 AM Parent: #4
اريتك يا ملك فد يوم تحس بي غصة المظلوم
ديل مالهم ومال الدين !!
التحية للشاعر هاشم صديق
Post: #8 Title: Re: الشاعر هاشم صديق - اقول ليكم كلام انسان بعز نبته......فيديو Author: Medhat Osman Date: 01-20-2011, 11:09 AM Parent: #4
Quote: .........اكيد ماكانو عارفين انو بقول شنو......رأيت من الحاضرين من هو مشدوه وخائف
ابراهيم تحياتي اكيد دي كانت مباغتة من الاستاذ هاشم صديق والبرنامج كان مباشر ... لو كان مسجل كان شالوا اي كلام ضد الحكومة.
Post: #6 Title: Re: الشاعر هاشم صديق - اقول ليكم كلام انسان بعز نبته......فيديو Author: عبير خيرى Date: 01-20-2011, 01:40 AM Parent: #1
.
صالح عام قام بنشرها الاستاذ هاشم صديق في جريدة الصحافة ووقتها
صودرت الصحيفة وقامت قوات الامن باعتقال هاشم صديق
ومن المفروض ان يأخذ علاج السكري فمنعوه ،
وهم لم يسمحوا له بشربة ماء طيلة 9 ساعات
لم يأكل ولم يشرب وما عارفة قلبهم قال ليهم شنو افرجو عنو.
الله يحفظك يا أستاذي الصديق
تسلم يا مدحت .
صالح عام
هديمك يا وليد مقدود وصابحنا الفقر و الجوع صبح جلد البطن مشدود
شن بتسو و اخيك من شهر مرفود قالو .. صالح عام عشان قال العُوج في العود حمدّ يارب اخير من قول هديك البغلة في الإبريق كان ودوهو بيت الأشباح و كان دوقو زول هلفوت
هديمك يا وليد مقدود و صابحنا الفقر و الجوع صبح باب التكل مسدود كمل حتي الملح في البيت وشن همّ الملح في البيت وكت ملح الدموع موجود؟!
دحين يا وليد هو ديل موُ قالوا ناس إنجاز ؟!! وشن سّولنا مما جونا غير حرقو الفضل بالجاز ؟ كّل شيتا صعب في السوق من الكبريتة للطايوق و كان جانا البخت تموين رطيل سكر و صابونتين نجيب من وين ؟ و اخوك مرفود و عدمان الشهر ملين ؟ أمس زازيت اكوس الدين مشيت لسمية بت مامون لقيت جابولها تلفزيون سمح بالحيل تشوف الصورة بى كم لون وكت في نشرة ألأخبار ظهر مك البلد يضحك جضومو كبار مزرر الكرش بزرار لا مهموم لا مغموم لا زعلان و شيهو يراري بالألوان.. وقّد في حشايا تباق نار طريت رفد الوليد و الجوع و سال دمع الغبينة الحار
اريتك يا ملك فد يوم يخلى الجوع عينيك ما تنوم أريتك يا ملك فد يوم تحس بي غصة المظلوم دحين يا وليد هو ديل ما لهم و مال الدين وكت قولهم كلام الله و فعالهم ما فعال صالحين كتير فيهم عديل حقار و بالقرآن كمان تجار و كضابين أكان بنزين عدم .. أو جاز وتعبوُ الناس و ضاقو خلاص صفوف واقفين يقولولك _ إرادة الله وكان عدم الرخيص و الغالى في التموين يقولولك ده . غضب الله و كان الموية صبحت طين يقولولك ده من امريكا والعملا حمونا الشب ولاد الـ كـ لـ ب عشان الشعب يحرن تب يقبّل من صراط الدين دحين يا وليد هو ديل ما لهم و مال الدين أكان كنزو الدهب و المال بلايينهم تسوى جبال وعرباتهم تخطف العين و بنياتهم قصور في قصور وحاة الله و كتاب الله أكان ادونا طوب فد سور كان سوينا الف أويضة لي مسكين فترنا من الخطب يا وليد و من طيش العقيد و عميد و من قل القرش في الايد و من تعب الوقوف في الصف ومن غبن الرصع بالكف و من حفر الدروب و اللف و من خت الحلم في الرف كل يوماَ نقيحنا يزيد دحين يا وليد هو كم دغشاَ عشان نلقاهو دافرنا و تعبنا شديد؟ و كم حولا صيامنا صبر عشان يشرق هلال العيد ؟! اح ح يا وليد لا حتى الخبيز إنضاق و لا هدما كسنا جديد و شوف المغسة يا وليد سموُ شقانا صالح عام و كل دمعاَ نزل من عين و كل جوعاَ سكت بالدين و كل زيناَ محاهو الشين ختو وقعيتو في الإسلام حرامهم يا وليدي حلال وا نحنا حلالنا كلو حرام يقلبو الدين نصّل سكين و ناسين الحساب قدام اخر زمن يا وليد نشوف كل البشاتن لون يفوت هولاكو دوب نرتاح ينط في الكرسي نابليون
اريتك يا أمير حالي جعيص في الكرسي في الخرتوم و ساويلك الف والي نبايعك للظلم و الجوع نبايعك وكل ضيم مشروع نبايعك و جيتنا جيش و دروع نبايعك و الحكم مقلوع نبايعك و القسم مخدوع نبايعك من سجن عالى أخر زمن يا وليد حصيف العين يلاقى و يشوف زمان ظلم السلف بالسيف و حسه السيف كلاشينكوف غير زمن الهوان و الجوع كمان طالع زمان الخوف ديل ما برتو لى إنسان كم ولداَ وقع نشفان وكم زهراَ كِتل و اتحت في رمضان لا شهراَ حرام إتصان لا كفنا ستر صبيان لا شاهد قبر معروف لا اماَ برد نارها سكت و إرتاح نزيف الجوف دحين يا وليد أ كان حسع ده ديش مصعب و أكان بيرق علي الكرار منو الكفار ؟!!! منو القاصدينو بالتكبير و بالتهليل و ضرب النار؟!
اخاف نحنا و أكان نحنا أخير نضحك كتير سبب الضحك بخته شوف المغسة يا وليدي ديل ما حسه ناس حُقار؟ ده ذى دق الطبول للموت وذي وقد البلد بالنار
إلا نشوف أ كان ساهرين معاك يا جوع و أ كان ضيقنا إتحفر في ضلوع و أ كان صابرين علي الفجار وحاة الله و كتاب الله وكت نغلي و نكوس التار لا سوراَ بقيف في وش و لا لهب الغبن بترش و لا صفاَ يميل بالقش كل ظالماَ يقع و يندش و سيل دمع البلد ينقش لا بحبس حلقنا الخوف و لا بترجع ا كان لعلع كلاشينكوف هديمك يا وليد مقدود و صابحنا الفقر و الجوع صبح جلد البطن مشدود شن بتسو و أخيك من شهر مرفود قالو صالح عام عشان قال العوج في العود
نان ما يقول أريت يقول عديل يا زول هديك البغلة في الابريق ما هامينا -صالح عام- وديش مصعب و لا الحجاج و لا بكتل قلبنا الجوع و موت منقذنا ولا الضاج خلي الضيق يزيد يا وليد بكرة الضيق يخلى الناس تبقى عُصّار علي الحقار و تبقي حريق
قريب يا وليد صيامنا يتم و يهل و يشرق هلال العيد نحس طعم الخبيز و يتبدل هدمنا جديد
Post: #7 Title: Re: الشاعر هاشم صديق - اقول ليكم كلام انسان بعز نبته......فيديو Author: Ahmed Elmardi Date: 01-20-2011, 07:20 AM Parent: #6
