قصيدة ممنوعة على قناة النيل الأزرق !

شكلها زاغت من المُخرج
!!

القصيدة طويلة وما تم بثه كان جزءاً قصيراً منها.

تحياتي يا عمران

وناس تصفق !
والوزير قااااااعد
وناس تضحكـ !
وترباس ، الحلنقي ، د. عمر محمود خالد ، كمال آفرو
يعني نجوم مجتمع من الكورة والفن والسياسة
؟؟
؟؟
؟؟
أنا قلت لنفسي ياربي قال ليهم دي كانت في ناس الشعبي ؟؟

عييييييييكـ يا أيمن

Quote: القصيدة طويلة وما تم بثه كان جزءاً قصيراً منها.

هو انا انتظرت ، عليكـ أمان الله جريت النت وكتبت كلمتين حفظتهم سريع :
كتبت لملكـ الشمارات الشيخ قوقال :

وحاة الله
و كتاب الله
أكان ادونا
طوب فد سور
كان سوينا
الف أويضة
لي مسكين

قصيدة عبارة عن عرضحال الغلابى
شكراً زميلتنا عبير خيري فقد أشار الشيخ قوقال إليكـ قبل الكل
هنـــا

وأتاريني ما براي
أخونا القرضابي جاء شايل العدة زاته :)

Quote: أتوقع أن تطير رقاب كتيرة من قناة النيل الأزرق أولا حسن فضل المولى وربما تمّ تنزيل الرتبة من جنرال لعريف معاش الله يستر على صاحبنا عكاشة

يا جماعة اللعب فكاّ في السودان ولا هاشم صديق ده قايم قنع؟

صالح عام

هديمك يا وليد
مقدود
وصابحنا الفقر
و الجوع
صبح جلد البطن
مشدود
* *
شن بتسو
و اخيك
من شهر مرفود
قالو .. صالح عام
عشان قال
العُوج في العود
حمدّ يارب
اخير من قول
هديك البغلة
في الإبريق
كان ودوهو
بيت الأشباح
و كان دوقو
زول هلفوت
* *

هديمك يا وليد
مقدود
و صابحنا الفقر
و الجوع
صبح باب التكل
مسدود
كمل حتي الملح
في البيت
وشن همّ
الملح في البيت
وكت ملح
الدموع موجود؟!
دحين يا وليد
هو ديل
موُ قالوا ناس
إنجاز ؟!!
وشن سّولنا
مما جونا
غير حرقو
الفضل بالجاز ؟
كّل شيتا
صعب في السوق
من الكبريتة
للطايوق
و كان جانا
البخت تموين
رطيل سكر
و صابونتين
نجيب من وين ؟
و اخوك مرفود
و عدمان الشهر
ملين ؟
أمس زازيت
اكوس الدين
مشيت لسمية
بت مامون
لقيت جابولها
تلفزيون
سمح بالحيل
تشوف الصورة
بى كم لون
وكت في نشرة
ألأخبار
ظهر مك البلد
يضحك
جضومو كبار
مزرر الكرش
بزرار
لا مهموم
لا مغموم
لا زعلان
و شيهو
يراري بالألوان..
وقّد في حشايا
تباق نار
طريت رفد
الوليد و الجوع
و سال
دمع الغبينة الحار
* *

اريتك يا ملك
فد يوم
يخلى الجوع
عينيك ما تنوم
أريتك يا ملك
فد يوم
تحس بي غصة المظلوم

Quote: والوزير قااااااعد

يا منو فيهن يا عمران؟

يامنو فيهن كيف يعني يا محمد الأمين ؟
غايتو فهمت تقصد الوزير منو ؟
السمؤال خلف الله وزير الثقافة

والله يا عمران فاتتني بي ثواني

كان هسع نزلتها ليك وانا جني وجن اسجل شي بعد ما يبدا

لكنها قصيده استغربت جد بثها في قناه حكوميه في هذا الزمن الصعب

دحين يا وليد
هو ديل ما لهم
و مال الدين
وكت قولهم
كلام الله
و فعالهم
ما فعال صالحين
كتير فيهم
عديل حقار
و بالقرآن
كمان تجار
و كضابين
أكان بنزين
عدم .. أو جاز
وتعبوُ الناس
و ضاقو خلاص
صفوف واقفين
يقولولك
إرادة الله
وكان عدم الرخيص
و الغالى
في التموين
يقولولك
ده . غضب الله
و كان الموية
صبحت طين
يقولولك
ده من امريكا
والعملا
حمونا الشب
ولاد الكـــــــــــلب

عشان الشعب
يحرن تب
يقبّل
من صراط الدين
دحين يا وليد
هو ديل
ما لهم
و مال الدين
أكان كنزو
الدهب و المال
بلايينهم
تسوى جبال
وعرباتهم تخطف
العين
و بناياتم قصور
في قصور
وحاة الله
و كتاب الله
أكان ادونا
طوب فد سور
كان سوينا
الف أويضة
لي مسكين

فترنا من الخطب
يا وليد
و من طيش العقيد
و عميد
و من قل القرش
في الايد
و من تعب الوقوف
في الصف
ومن غبن الرصع
بالكف
و من حفر الدروب
و اللف
و من خت الحلم
في الرف
كل يوماَ
نقيحنا يزيد
دحين يا وليد
هو كم دغشاَ
عشان نلقاهو
دافرنا
و تعبنا شديد؟
و كم حولا
صيامنا صبر
عشان يشرق
هلال العيد ؟!
اح ح يا وليد
لا حتى الخبيز
إنضاق
و لا هدما
كسانا جديد
و شوف المغسة
يا وليد
سموُ شقانا
صالح عام
و كل دمعاَ
نزل من عين
و كل جوعاَ
سكت بالدين
و كل زيناَ
محاهو الشين
ختو وقعيتو
في الإسلام
حرامهم يا وليدي
حلال
وا نحنا حلالنا
كلو حرام
يقلبو الدين
نصّل سكين
و ناسين
الحساب قدام
اخر زمن
يا وليد
نشوف كل البشاتن
لون
يفوت هولاكو
دوب نرتاح
ينط في الكرسي
نابليون
* *

اريتك يا أمير
حالي
جعيص في الكرسي
في الخرتوم
و ساويلك
الف والي
نبايعك للظلم و الجوع
نبايعك
وكل ضيم مشروع
نبايعك
و جيتنا جيش
و دروع
نبايعك و الحكم
مقلوع
نبايعك
و القسم مخدوع
نبايعك
من سجن عالى
أخر زمن يا وليد
حصيف العين
يلاقى و يشوف
زمان
ظلم السلف
بالسيف
و حسه السيف
كلاشينكوف
غير زمن
الهوان و الجوع
كمان طالع
زمان الخوف
ديل ما برتو
لى إنسان
كم ولداَ
وقع نشفان
وكم زهراَ
كِتل و اتحت
في رمضان
لا شهراَ حرام
إتصان
لا كفنا ستر صبيان
لا شاهد
قبر معروف
لا اماَ
برد نارها
سكت و إرتاح
نزيف الجوف
دحين يا وليد
أ كان حسع
ده ديش مصعب
و أكان بيرق
علي الكرار
منو الكفار ؟!!!
منو القاصدينو
بالتكبير
و بالتهليل
و ضرب النار؟!
* *

اخاف نحنا
و أكان نحنا
أخير نضحك
كتير سبب
الضحك بخته
شوف المغسة
يا وليدي
ديل ما حسه
ناس حُقار؟
ده ذى دق الطبول
للموت
وذي وقد البلد
بالنار
* *
إلا نشوف
أ كان ساهرين
معاك يا جوع
و أ كان ضيقنا
إتحفر في ضلوع
و أكان صابرين
علي الفجار
وحاة الله
و كتاب الله
وكت نغلي
و نكوس التار
لا سوراَ
بقيف في وش
و لا لهب الغبن
بترش
و لا صفاَ
يميل بالقش
كل ظالماَ
يقع و يندش
و سيل دمع البلد
ينقش
لا بحبس حلقنا
الخوف
و لا بترجع
اكان لعلع
كلاشينكوف
هديمك يا وليد
مقدود
و صابحنا الفقر
و الجوع
صبح جلد البطن
مشدود
شن بتسو
و أخيك
من شهر مرفود
قالو صالح عام
عشان قال
العوج في العود
* *
نان ما يقول
أريت يقول
عديل يا زول
هديك
البغلة في الابريق
ما هامينا
-صالح عام-
وديش مصعب
و لا الحجاج
و لا بكتل
قلبنا الجوع
و موت منقذنا
ولا الضاج
خلي الضيق
يزيد يا وليد
بكرة الضيق
يخلى الناس
تبقى عُصّار
علي الحقار
و تبقي حريق
* *
قريب يا وليد
صيامنا يتم
و يهل و يشرق
هلال العيد
نحس طعم الخبيز
و يتبدل هدمنا
جديد

أها يا أخوانا دي قصيدة يقولوها في قناة حكومية ؟



__________________________________
شكلكـ يا معتز قريش منسق مع الراجل في فكـ الِلعب شويه

دي يا طارق ما قصيدة بس عشان نرجع نسمعه تاني وتالت ورابع
دي دراما كاملة الدسم
قصة واقعية حاصلة بيناتنا
بيي شخوصه وأحداثه
قصة وطن كامل مع سلطان ظالم



____________________________________________________
يظل السؤال يا أخي طارق دي زاغت ولا هم فاهمين إنها في ناس الشعبي وليس الوطني ؟



أخطاء إملائية ( سخيفة نوعاً ما )

التحية لشاعر الشعب هاشم صديق الذي بطلاته البهية بدأنا نتنفس نسائم التغيير
وحا تجي البت الحديقة
ولك التحية

Quote: وكت نغلي و نكوس التار لا سوراَ بقيف في وش و لا لهب الغبن بترش و لا صفاَ يميل بالقش كل ظالماَ يقع و يندش و سيل دمع البلد ينقش لا بحبس حلقنا الخوف و لا بترجع اكان لعلع كلاشينكوف

يا عمران إنه نشيد الإنتفاضة القادمة لامحالة...

إنه نشيدثورة المهمشين من بنات وابناء شعبي المسحوقين ضد من نهبوا و عاثوا في الوطن فسادا..

شكرا عمران ...

Quote: اريتك يا ملك فد يوم يخلى الجوع عينيك ما تنوم أريتك يا ملك فد يوم تحس بي غصة المظلوم

أريتو وزير السرور ياعمران، أي والله متكيف منو؟
لأنو شارط الأدباء والمثقفين على ذلك وهو يفي
فكانت الأماسي التي فرحتنا،
بس الله يستر عليه من الجهة الفرزت عيشتها
وبقتلنا آلام ..

مع إني مابدور الكيزان من طرف هههههه
لك التحية .

Quote: فكانت الأماسي التي فرحتنا

ودي المشلكة !!
أخاف نصدق إنو الحكاية تبقى عادية
يضبحو بالنهار والليل ونجي نقرأ القصايد ونصفق
ونمشي نمارس لعبة الجري وراء الرزق البتور النفس ده ، ويزداد التمكين تمكناً حول رقاب العباد

Quote: إنه نشيدثورة المهمشين

يا مرتضى الجوع أكثر ألماً من إحساس التهميش
نفسي كنت أعايش لحظة ميلاد كلام هاشم صديق ده ، رسم الواقع بيي حروف أقرب للناس ومن جوه البيوت

Quote: بدأنا نتنفس نسائم التغيير

مراحب عبد اللطيف
ظهور قاسم صديق في شهر رمضان الماضي بقناة الشروق كان بمثابة مفاجأة ناهيكـ هن إلقائه لقصيدة تدين من يستمعون من أهل النظام
وهم جلوس يبتسمون

اها دي الرجالة الحق

Quote: خلي الضيق يزيد يا وليد بكرة الضيق يخلى الناس تبقى عُصّار علي الحقار و تبقي حريق

حينما رايت الوزير وجهه مكفهر بعد ان القاء محجوب شريف للقصيدة ادركت ان برنامج الحفل لم يره مقص الرقيب الا بعد الفاس ماوقع في راسهم .
القصيدة تختصر مساوي الانقاذ ومحبيها وتبين جهلهم وظلمهم وتكفي مناهضي النظام شر الكتابة الاساءات بالمنبر .


تخريمة
ياعمران اول مادخلت المكتب شغلت القصيدة اسمع فيها وقت انزل بيها بيوست كان اشوف بوستك قلت في نفسي ناس عمران مكوشين علي كل جميل .

Quote: وتكفي مناهضي النظام شر الكتابة الاساءات بالمنبر .

Quote: هو ديل ما لهم و مال الدين أكان كنزو الدهب و المال بلايينهم تسوى جبال وعرباتهم تخطف العين و بناياتم قصور في قصور وحاة الله و كتاب الله أكان ادونا طوب فد سور كان سوينا الف أويضة لي مسكين

العزيز/ عمران


سلام



ياخي دي حاجة لا تةصف بكلمات..
كفاية التنفيس
والهواء الساخن البطلع
مع زفرة فرح وأمل




تحياتي