ملوكية

صحيت الصباح , وانا مبسوطة انو انا داكة الدوام الليلة , بمزاج جبت حبيبة قلبى كباية الشاى ومعاها شابورة الرشاقة –فى رحلة رشاقة أن شاءالله ح تنتهى فى القبر ولاعزاء لأى أى زول أوفر ويت- خلال الحدث البهيج بتاع شراب الشاى دة , رصيت لى زى تلتمية مهمة منها ترتيب دولابى الـ كل ماافتح ابوابو تقع هدومى فى الارض وتتوسل , أشيل الريموت دة مرة فى حياتى براااى " بابا مابديك أىىىىىىىىىى فرصة معاهو لما يرجع وعليك التأقلم مع الـ بى بى سى -الشروق-الجزيرة-السودان وبالعكس ولو غيّر بجيب ليك الجزيرة الرياضية , فى غياب بابا , نشاهد براعم ونرقص مع زيد والعلوم زى العجب , وتتبسم مع أحمد وهيا ولا على مزاجك.

إذا ربنا رحمك, من بابا والشباب ديل , تجيك ماما تفتح ليك ساهور ولو بااااالغت النيل الأزرق, قلت بس خلاص الليلة يوم ندى "على وزن الليلة يوم الرجال"
وبعد ماانتهى من الإستمتاع بالريموت , أقوم اعمل لى برنامج تجميلى , لكن تأتى الرياح بسفن الخُدرة على صمة خشمك
سمعت صوت أمى وهى بتنادى : ياندى لو مشيتى جبتى لينا "خُدرة" فركناها والله يكون كويس , طوالى حسيت أنو أحلامى الفوق دى ح تنهار على الرغم من بساطتها .

فكرت بسرعة فى حلول, أتذكرت أنو الأخت الكبرى برة بيتها , أتصلت عليا بسرعة وبمنتهى التملق وكل لطف الدنيا على غير العادة " بالله يارشا مرى جيبى لينا معاك خُدرة " طوالى ردت : أيوا والله أحمد ذاتو قال عايز "خُدرة" وأحمد دة ياكرام يبلغ من العمر 4 سنوات وشوية مولود فى البلد دى , شاف السودان وهو عمرو سنتين , لكن يعشق اللغاويس بكل اشكالها (خُدرة مفروكة, بامية مفروكة, ملاح تقلية وقراصة" ومُصر أنو يشيل معاهو ملاح تقلية وقراصة المدرسة , فتأملوا (بتاعت ملاسى ديك)
بعد زمن سمعت تلفونى يرن , لقيت الأخت الكبرى على الطرف التانى :ة ياندى مافى خُدرة فى كارفور ودة ماموسمها "طبعا دى حسب إفادات المغربى مسئول الخُضار فى كارفور – طبعاً رشا وقفت حوالى العشرة دقايق عشان تفهم بقول ليا فى شنو و فى نهاية الأمر وصلت لأنو مافى ودة ماموسمها " دة طبعا بعد تخريجات من رشا لكلام المغربى (وكل واحد فيهم مُصر أنو بتكلم عربى أحسن من التانى!).

أمشى اى مكان تانى ! أمشى وين ياجماعة وكارفور دة لبن الطير فيو-

بدأت إقتراحات ماما, أمشى المدينة , لو مالقيتى أمشى جاينت , ولا أقول ليك أمشى التخفيضات راسك عديييييل , أجيب الراس العديل من وين بس؟!
أتوكلت وبديت رحلة البحث عن العزيزة , دخلت حوالى 4 سوبرماركتات "والله ماعرفت أجمعا ليكم كيف" وكنت أرجع خاسئة حسيرة , كل الموظفين والكاشيرات يردوا على بالنفى , والظريف فيهم يقول لى دة ما موسم "ملووكية" لكن ياشباب البقنع الأم منو؟! ونحن جايين من بلد "الملوكية" دى ممكن اى زول يزرعا فى بيتو, ممكن تجيبا من أى جزُر فى طرف الحِلة .
دخلت سوبر ماركت , مشيت جهة الخُضار , شفتا ليك ربطة خُدرة وحيييدة , والله فرحت فرح كأنى شفت الملاك, أشتريتها وجرى على الكاشير كأنو ح يجى زول يقلعا منى , لما دخلت البيت , وبفرح مديتا لأمى , قالت لى : هيا ياندى لكن دى صحن مابتسوويهو؟! أها ياأخوانا؟ الحل؟ قالت لى : من الأول قلت ليك أمشى التخفيضات, آآآخ , فكرت فى زحمة الشارع لكن مابيدى شىء, صليت العصر ومرقت , حاولت فى الطريق أطلع من موود "الخُدرة" دة شغلت مايكل بلوتون وسمعت miss you now –ضحت براااى وقلت مايكل دة برضو بتكون امو رسلتو ومالقى المرسال – دخلت التخفيضات , مكان الخُدرة خاااااااااالى, جمبها خُضار يشبهها شديد, ناديت الهندى : رفيق هادا ملوكية؟ لالا ماما هادا مافى ملوكية, ملوكية مافى؟ فى فى ماما, وقال لى تعالى معاى, ساقنى ليك مستودع الخضار , مجموعة من الهنود يقطعو ويرصو ويعبو , من تحت تربيزة كبيييرة مرق شوال , طلع لى منو ربطة كبيرة خُدرة , جرى على الكاشير عشان أصل البيت بسرعة , وانا جمب الكاشير لاقتنى زولة صاحبتنا ممكن عادى نسميها أم الكلام, سالتنى وحكيت ليا انا جيت لى شنو, وبرضو لاهماها شىء حكت لى عن كل شىء الجو, الأسعار, السودان, الدوامات وانا أتململ وأعاين لربطة الخدرة , فكتنى بعد ما قرربت أبكى .

وصلت البيت قريب العشا, وفرحانة أنى ح اضرب خُدرة بكسرة زى العجب, ماما أحبطتنى أيما إحباط , حسة مافى سكة فرك ياندى الدنيا ليلت , بكرة أن شاءالله.

Quote: حسة مافى سكة فرك ياندى الدنيا ليلت , بكرة أن شاءالله.

ههههههههههههههههههههههههههههههههه

ماعارف ليه ياندي امك (الله يديها العافية) ذكرتني التعلمجية في الكلية ......

يزازو بيك اليوم كلو ويطوبروك (من طوابير) ويخلوك دايخ ويمشوا ينوموا عاااااااادي

- صباح الخير يا عزوزي ,,
= صباح الخير يا دلووش .. كيف اخباركـ؟
- والله يا عزوزي منهاره نفسيا عدييل كدا ..(ما تتخلعوا حاتضحكوا علي بعد شويه)
= ليه يا دلوش انشالله خيـر ؟؟
-النعناع ياخ ,,

000000 (البت سكتت مسافه لانها ما استوعبت .. ياربي تكون في ثوره نعناع ولا حاجه؟؟)
-آلـو .. عزوز انتي معاي ؟؟
=ايوه ايوه .. قلتي نعناع ولا شنو ؟؟
-ايوه ياخ ,, النعناع .. اجيبو من بنده , اختو في التلاجه يتعفص , اطلعو برره بينشف , اختو في كبايه مويه بيعفن , ادخلو الفريزر بيجمد !
= هاهاهاهاها اسي مشكلتك العويصه من الصباح النعناع؟؟
- ياخ اي خدرا اخدر كرهني العيشه في البلد دي ,, الملوخيه , السلج , الريحان , الديزي , كلللو ياخ ما بيقعد بيبوظ بسرعه !
=اسمعي يا دلوش , ريحي رقبتك , الملوخيه دي واحده مجمده رهيييبه , اسمها مونتانا , لا تخرتي , لا تفرمي , شوربتكـ, ملوخيتكـ, قدحتكـ,مطوتكـ في جيبكـ, لووول
-اها والنعناع اسوي ليهو شنو ؟؟
= خلاس اقول ليكي قوله يا دلوش؟؟ تعالي نزرع نعناع في البلكونات ,,
- والله فكره !! وريحان وروزماري وديزي واي شي !
=ايوه خلاس اتفقنا .. نبدا من الاسبوع الجاي اوكي ؟؟
-اوكي اوكي يا دلوش .. اتفقنا .. يلا بكلمك بعدين .. تيك كير باي
= باي ..

- الو الو دقيقه دقيقه عزوزي ..
=ايوه يا دلوش في شنو ؟؟
-الرياض ما فيها بلكونات ياخ !!!!

Quote: النعناع ياخ ,,

النعناع دة يامنقا تضربى السودان , للماما تشترى السوق كلو تنشفو وترسلو ليك , وتختيو فى برطمانية وخلاس.

أى أخدر تانى ياهو جنس العذاب الفوق دة

Quote: ماعارف ليه ياندي امك (الله يديها العافية) ذكرتني التعلمجية في الكلية

صاح كلامك ياجنابو, أمى دى زوجة جنابو زيك, زمان أولاد وبنات خالتى بقولو لينا اسمعو إنتو منو العسكرى أمكم ولاأبوكم؟

Quote: , حاولت فى الطريق أطلع من موود "الخُدرة" دة شغلت مايكل بلوتون وسمعت miss you now –ضحت براااى وقلت مايكل دة برضو بتكون امو رسلتو ومالقى المرسال

بكون رسلوه لي ,(هوت دوق) ولا (بيرقر)......ولو مافي الأتنين ديل, قالو ليه جيب..(بيتزا).
لوووووووول




_
إنما (الخُضرة) للناس ما طلبو *** فإن هم وجدو فركو وضربو.

خضرة عينة لكن, بس أتمني تاني يوم, أكلتِ من المفروكة من بعد التعب ده ياخ .ههههههه
تحياتي و إحترامي و كيفنك
الآخبار والإمور.

Quote: خضرة عينة لكن, بس أتمني تاني يوم, أكلتِ من المفروكة من بعد التعب ده ياخ

ولمدة 3 يوم متتالية.

سلامو يا ندى .. وقصتكـ جاطت!!

تعرفي سبب رئيسي في النقة بيني وبين أم روان الخدار!
طبعا كالعادة ـ زي أي واحد مغترب لما أكون راجع البيت من الشغل
بتصل عشان أعرف دايرين شنو .. تديكـ من الآخر: جيب خدار، سلطة، وأهم
حاجة الخُبز (أريتو كان بان دور) والنعناع (انتظري يا دلوش عشان تشوفي طريقة الحفظ)!!
أها نخش في نقاش: دايرة خدار شنو؟ ترد: ياخ أنا ذاتي محتارة .. جيب البتجيبو!!
وأخوكم طبعا غتييييت .. طوالي بشيل ليها رِجلة وملوكية
أول ما تلقاهم قداما النقة تدوّر .. ياخ متين أقعد أورّق وأقطّع!!
طيب ما قلنا ليكـ دايرة شنو أبيتي تتكلمي .. يلاّ خمّي وصري!!
تاني يوم لو قالت دايرة خدار برضو بشيل ليها رِجلة وملوكية

يوم كنا متغدين فتّة رِجلة، ودا طبعا بعد ما أكلناها يومين ورا بعض
واليوم التالت فتّة، أها طالع بالليل قالت لي جيب معاكـ خدار لبكرة
طوالي مشيت اشتريت الرِجلة وعلى الحظ ما لقيت ملوكية
أول ما جيت خاشي شافت الرِجلة .. أدتني النجيضة: إت يا راجل جنيت؟
مش ليكـ تلاتة يوم بتاكل في الرجلة دي؟ .. أخوكم ما دايش .. قلت ليها متين الكلام دا

أها ومازال الحوار دا مستمر من تسعة سنين
.. دايرة خدار شنو: والله محتارة!
زي قصة البامية ما ياها!!

فـ .. أدونا معاكم خيارات جديدة لشراء الخدار باللاي!!



_
بالنسبة للنعناع يا دلوش: بعد الغسيل بالفيري (أي والله أمي قاعدة
تغسّل الخدار بالفيري وبعد التقطيع تجيبي حافظة بلاستيكـ تختي مناديل فيها شويييه
موية لزوم الرطوبة وتقفليها وتختيها في أتحت (من تحت) في التلاجة)!
بس خليها بعيدة من المرتديلا عشان ما تشيل ليكـ الريحة وأخينا
يعمل ليكـ فيها أخا العرب واحرصي على إحكام إغلاق الغطاء!!

Quote: وقصتكـ جاطت!!

جايطة من الليلة؟؟

Quote: وأخوكم طبعا غتييييت .. طوالي بشيل ليها رِجلة وملوكية

ربنا ح يدخلك النار:-) , ويدخل أم روان الجنة (صابرة عليك وبتطبخ رجلة وملوكية), ياخ ديل أصعب طبيخين فى الدنيا.

Quote: فـ .. أدونا معاكم خيارات جديدة لشراء الخدار باللاي!!

نووااى آت ال, يادوبك تزعة سنة, ياخ امى وأبوى ديل ليهم 37 سنة ياها نفس الحاجات, رجلة ملوكية وباتنجان والساقية لسة مدورة, لو حصلت مستجدات بنبركم بيها.

Quote: بالنسبة للنعناع يا دلوش: بعد الغسيل بالفيري (أي والله أمي قاعدة تغسّل الخدار بالفيري وبعد التقطيع تجيبي حافظة بلاستيكـ تختي مناديل فيها شويييه موية لزوم الرطوبة وتقفليها وتختيها في أتحت (من تحت) في التلاجة)! بس خليها بعيدة من المرتديلا عشان ما تشيل ليكـ الريحة وأخينا يعمل ليكـ فيها أخا العرب واحرصي على إحكام إغلاق الغطاء!!

ختيير ولاى ختير.

ثم سلامو شديد لأم روان والبنات والباقى شيلو أنت.

Quote: صحيت الصباح , وانا مبسوطة انو انا داكة الدوام الليلة , بمزاج جبت حبيبة قلبى كباية الشاى ومعاها شابورة الرشاقة –فى رحلة رشاقة أن شاءالله ح تنتهى فى القبر ولاعزاء لأى أى زول أوفر ويت- خلال الحدث البهيج بتاع شراب الشاى دة , رصيت لى زى تلتمية مهمة منها ترتيب دولابى الـ كل ماافتح ابوابو تقع هدومى فى الارض وتتوسل , أشيل الريموت دة مرة فى حياتى براااى " بابا مابديك أىىىىىىىىىى فرصة معاهو لما يرجع وعليك التأقلم مع الـ بى بى سى -الشروق-الجزيرة-السودان وبالعكس ولو غيّر بجيب ليك الجزيرة الرياضية , فى غياب بابا , نشاهد براعم ونرقص مع زيد والعلوم زى العجب , وتتبسم مع أحمد وهيا ولا على مزاجك. إذا ربنا رحمك, من بابا والشباب ديل , تجيك ماما تفتح ليك ساهور ولو بااااالغت النيل الأزرق, قلت بس خلاص الليلة يوم ندى "على وزن الليلة يوم الرجال" وبعد ماانتهى من الإستمتاع بالريموت , أقوم اعمل لى برنامج تجميلى , لكن تأتى الرياح بسفن الخُدرة على صمة خشمك سمعت صوت أمى وهى بتنادى : ياندى لو مشيتى جبتى لينا "خُدرة" فركناها والله يكون كويس , طوالى حسيت أنو أحلامى الفوق دى ح تنهار على الرغم من بساطتها . فكرت بسرعة فى حلول, أتذكرت أنو الأخت الكبرى برة بيتها , أتصلت عليا بسرعة وبمنتهى التملق وكل لطف الدنيا على غير العادة " بالله يارشا مرى جيبى لينا معاك خُدرة " طوالى ردت : أيوا والله أحمد ذاتو قال عايز "خُدرة" وأحمد دة ياكرام يبلغ من العمر 4 سنوات وشوية مولود فى البلد دى , شاف السودان وهو عمرو سنتين , لكن يعشق اللغاويس بكل اشكالها (خُدرة مفروكة, بامية مفروكة, ملاح تقلية وقراصة" ومُصر أنو يشيل معاهو ملاح تقلية وقراصة المدرسة , فتأملوا (بتاعت ملاسى ديك) بعد زمن سمعت تلفونى يرن , لقيت الأخت الكبرى على الطرف التانى :ة ياندى مافى خُدرة فى كارفور ودة ماموسمها "طبعا دى حسب إفادات المغربى مسئول الخُضار فى كارفور – طبعاً رشا وقفت حوالى العشرة دقايق عشان تفهم بقول ليا فى شنو و فى نهاية الأمر وصلت لأنو مافى ودة ماموسمها " دة طبعا بعد تخريجات من رشا لكلام المغربى (وكل واحد فيهم مُصر أنو بتكلم عربى أحسن من التانى!). أمشى اى مكان تانى ! أمشى وين ياجماعة وكارفور دة لبن الطير فيو- بدأت إقتراحات ماما, أمشى المدينة , لو مالقيتى أمشى جاينت , ولا أقول ليك أمشى التخفيضات راسك عديييييل , أجيب الراس العديل من وين بس؟! أتوكلت وبديت رحلة البحث عن العزيزة , دخلت حوالى 4 سوبرماركتات "والله ماعرفت أجمعا ليكم كيف" وكنت أرجع خاسئة حسيرة , كل الموظفين والكاشيرات يردوا على بالنفى , والظريف فيهم يقول لى دة ما موسم "ملووكية" لكن ياشباب البقنع الأم منو؟! ونحن جايين من بلد "الملوكية" دى ممكن اى زول يزرعا فى بيتو, ممكن تجيبا من أى جزُر فى طرف الحِلة . دخلت سوبر ماركت , مشيت جهة الخُضار , شفتا ليك ربطة خُدرة وحيييدة , والله فرحت فرح كأنى شفت الملاك, أشتريتها وجرى على الكاشير كأنو ح يجى زول يقلعا منى , لما دخلت البيت , وبفرح مديتا لأمى , قالت لى : هيا ياندى لكن دى صحن مابتسوويهو؟! أها ياأخوانا؟ الحل؟ قالت لى : من الأول قلت ليك أمشى التخفيضات, آآآخ , فكرت فى زحمة الشارع لكن مابيدى شىء, صليت العصر ومرقت , حاولت فى الطريق أطلع من موود "الخُدرة" دة شغلت مايكل بلوتون وسمعت miss you now –ضحت براااى وقلت مايكل دة برضو بتكون امو رسلتو ومالقى المرسال – دخلت التخفيضات , مكان الخُدرة خاااااااااالى, جمبها خُضار يشبهها شديد, ناديت الهندى : رفيق هادا ملوكية؟ لالا ماما هادا مافى ملوكية, ملوكية مافى؟ فى فى ماما, وقال لى تعالى معاى, ساقنى ليك مستودع الخضار , مجموعة من الهنود يقطعو ويرصو ويعبو , من تحت تربيزة كبيييرة مرق شوال , طلع لى منو ربطة كبيرة خُدرة , جرى على الكاشير عشان أصل البيت بسرعة , وانا جمب الكاشير لاقتنى زولة صاحبتنا ممكن عادى نسميها أم الكلام, سالتنى وحكيت ليا انا جيت لى شنو, وبرضو لاهماها شىء حكت لى عن كل شىء الجو, الأسعار, السودان, الدوامات وانا أتململ وأعاين لربطة الخدرة , فكتنى بعد ما قرربت أبكى . وصلت البيت قريب العشا, وفرحانة أنى ح اضرب خُدرة بكسرة زى العجب, ماما أحبطتنى أيما إحباط , حسة مافى سكة فرك ياندى الدنيا ليلت , بكرة أن شاءالله.

الأخت العزيزة / ندى

لك أندى التحايا الزاكيات ..

صراحة حاولت أن أنتقي جزء من كلامك حتى آتي به هنا فاحترت ... فما كان مني إلا أن نقلته بالكامل ....

من غير مجاملة يا ندى أسلوبك جميل وفي غاية التشويق .. ربما يكمن السر في البساطة والحكي الصادق بالتفاصيل الصغيرة الجميلة .... غايتو من هنا ورايح اعتبريني زبون دائم لبوستاتك .. بس كتر لينا من زي (الملوكيه) دي ....

مع خالص المودة والتقدير ؛؛؛؛

Quote: غايتو من هنا ورايح اعتبريني زبون دائم لبوستاتك .. بس كتر لينا من زي (الملوكيه) دي ....

ياأستاذ إدريس

تسلم على المرور, وبركة والله الكتابة عجبتك , لكن عموما بكتب حين زهجة أو حين شلهتة زى بتاعت الملوكية دى ,وال2 ماحبابن, إن شاءالله يروق المزاج ويروق معاهو القلم.


خالص الإحترام.

أول شي : اطـول مداخله في تاريخ ود الصايم ,,
أسي عادي جدا بتكون فاقد سوايل يا عمكـ ,,
واحتمال كبيير ما تكتب تاني لي مده شهرين كدا ..لوووول (^_^)

Quote: فـ .. أدونا معاكم خيارات جديدة لشراء الخدار باللاي!!

طيب جهز ورقه وقلم واكتب :
- باذنجان وهو الشهير بالاسود : بيعمل سلطه ومصقعه وبالبطاطس بي لحمه مفرومه ومحشي, بس أوعك من ملاح البراطيش (^_^)
- بازلاء وهي الشهير بي البسله : وبتتعمل طبييخ بس لازمها لحمه هبر , وبي الرز , ومع خضار مشكل بي دمعه وبي لحمه مفرومه مع الرز ختيييره ,,
- فاصوليا خضراء : ودي بيكرهها زميل البورد واياك تجيب ليهو سيرتها , حلوه طبييخ وما بتتعمل اي شي تاني غير كدا ,,
- قـرع : ولمن تشتريهو من بنده ما تشتريها كامله , اشتري ربع قرعه , رهييب بالدمعه ,وما ضروري لحمـه ,, بي كسره وسلطه وشطه بث (^_^)
- كوسـا : محشي , لبنيه , صينيه مع الخضار , قوارب محشيه , اوعك من الكوسه طبيخ بس .. طعمها شرابات شرابات كدا (^_^)
- فاصوليا بيضاء : تشتريها ناشفه ,تتنقع اوفر نايت , وتتطبخ بي لحمه ودمعه مسبكه .. ومعاها رز مصري بس شعيريه ..يم يم ..
- باميـه : سااااميه لووول , بي لحمه سمحه , ومسبكه كدا , واهم شي ما بي صلصه , بي طماطم (ما بتاعت المحميات) رهييييبه ياخ ,,
- بطاطس : دا الا اكتب ليك فيهو معلقه .. بي لحمه مفرومه , صينيه بي دجاج , طبييخ , محشي , خياراتو واسعه شديد ,,

وأحب أضيف برضو (انها كانت بترئص) لووول
احب أضيف انو فتت العدس ظرريفه , وكذلك القراصه بي ملاح الويكه حاااااره كدا (زي الانا عاملاها الليله بمناسبه البررد داا)
وبرضو المكرونه بالباشاميل مع الخضار ظرييفه وبت ناس ..

أفتكر ما حرمتك من أي حاجه (^_^)

بالنسبه للنعاع ..فاااا شنو .. شكرا ياخ !
وبي القائمه الفوق دي .. نكون خالصييين .. تمام ؟


----------------
قلتا لي زول في التلفون قبل شويه
ود الصايم كاتب مداخله طوووويله ..
قال لي: أكيد بوست فيهو اكل !! كاااااااااااك

هسي أنا أكتب ولّ أطبع المداخلة دي وأتوجه بيها لأم روان؟

نسيت أقول ليك أطبع المداخله حقتي دي ,
وأتوجـه لي أقـرب مطبخ !

خشبـه (^_^)

يا ندى عليك الله عن اذنك بتاع الرجلـة دا دقيقة بس

Quote: وتختيها في أتحت (من تحت) في التلاجة)! بس خليها بعيدة من المرتديلا عشان ما تشيل ليكـ الريحة

أول حاجة كان الزميلة دي سمعت كلامك وختت البتاع دا في اتحت مكان صدقني ببقى عبارة عن سلوك كهربه وما عيدان خضراء يانعه ومفرهده .. لانو بي صراحة تلاجتنا من النوع المقلوب الديب فريزر بي تحت وباقي العدة بي فوق .. أمنقه حاجة براجع في الكتلوج مع زميلة البورد .. قالت لي سجمي فيها وااين شيلدر قل ليها مالو ما حاجة كويسة دي..
بعدين تعال هنـا .. إنت الملوكيـة دي قاعد تلقاها وووين ..؟
طبعا الزميلة شغاله بالبرمجة بتاعت الخضار بتاع العثيم البجي يوم الاتنين واللحمة البتجي يوم الأربعاء .. في يوم اتنين من ايامات الأسبوع مشورتني ليك زي مشوار ندى دا ..
طلعنا الساعة حداشر بالليل قالت لي نمشي نجيب ملوكيـة ..
بعدما وقفنا في بنده التخصصي دقت لي جرس قالت لي ملوكيتم ما مظبوطه خدارم دا ما ظابط .. يا مؤمن يا صديق دق الخلف واطلع العثيم في أم الحمام .. وكان في شوية طنطنه كدا من العبد لله
وحيات ابتسامتك ما لقينا ولا صفقه من الملوكيـة .. رفعت ليها شوية ليمون وشنو كدا ما عارف .. قلت ليها ولا قرعاية من هنا دا ما بنشيله نمشي نرجع بنده تاني ..
دق الخلف وأرجع بنــده .. ماف ولا ملوكيايه واحده جرجير وهمي جدا .. رجله روحه محرقاها .. بامية (كاوييك) زي ما قال الباشمهندس محمد ابراهيم
المهم في الموضوع كان في كمية بتاعت (سلج) ما يسمى هنا مجازا .. سبانخ .. غايتو اتسبنخنا باقي الليل داك زي الترتيب وشلنا ملوخية مجمدة + مع بامية مجمدة ..
كيسين الملوخية يا ندى عملو حلة ممكن عادي جدا اقوم بيها براي ذات مطره زي الشغاله دي اتحرفنت الزميلة وعملت معاها كم حركة كدا ..
وكيس البامية الأولاني قبل كم يوم الزميلة وديته مشوار سريع كدا .. قامت قالت لي البامية دي ارخي ليها النار شوية .. يا خليها لحدت ما ترجع وتجيبني .. وبذلك انتهت قصة البامية ..
لانو جيت راجع .. وولعت ليك فيها نيران تقيلة ومشيت قلت اديها رقده شوية كدا ... قمت صحيت ليك علي ريحة (العطرابة) وقتها شعرت بي طمأنينة عجيبة خلاص ما عارف ليييه
المهم يا معلم عايز ترتاح من مشوار الملوكية والرجلة والذي منو .. تقوم اقرب مشوار للخدار تجيب ليك باميـة .. وتنتظر الفنشن بتاعه لحظت بيوطو النار ديك تقوم تتسلل للمطبخ وتفتح نيران
هي اي نعم ممكن تريحك من مشوار الخدار .. لكن ربما تكلفك تلاتة اربعة حلل جديدات واحتمال كبير تبيت القووة اليوم داك ..

غايتو الواحد إذا استمر بالحالة الخدرجية دي يا هو البقى زيكم واحد يطلع من الشغل يمشي يجيب العيش ويمر بتاع الخدار واللحمة.. والله الخلقني

البوست ده عائلي ولا نخش عادي ؟!!!






ــــــــــــــ
ندى ..سلامات ..

Quote: البوست ده عائلي ولا نخش عادي

بسؤالك دة يافايز المفروض أمرق أنا دى ذاتى

خش بس برجلك اليمين.



سلامو كتير.

Quote: لانو بي صراحة تلاجتنا من النوع المقلوب الديب فريزر بي تحت وباقي العدة بي فوق

يا زميل البورض , لكن ضغطتا على الزول دا شديد ياخ !
انت داير محمد عبدالماجد الصايم أو ايا كان أسمه يستوعب ليه النظريه دي؟
أسي نبقى في كدي أشرحو لي ؟ وما قادر أستوعب الحاجه دي , وانتو بتتخيلو ..
وعادي يطلع لينا تلاجتنا معاااغه .. وانت عارف طبعا تلاجتنا دي عزيزه علي كيف (^_^)

Quote: طلعنا الساعة حداشر بالليل قالت لي نمشي نجيب ملوكيـة ..

أكيييد ما ذنبي ,
موش انت الأبيت تخليني أركب ليموزين أجيبو براااي بدري بدري ؟
خلاص المره الجايه خلي مفاتيح (بطوطـه) بمشي أجيبو براي وانت تعال بي ليموزين من حي السفارات (^_^)

Quote: غايتو الواحد إذا استمر بالحالة الخدرجية دي يا هو البقى زيكم واحد يطلع من الشغل يمشي يجيب العيش ويمر بتاع الخدار واللحمة

وووين يااا,,
يا زميل البورض , انت موش كل يوم الساعه حداشـر بالليل بتسوقني عشان نجيب عيش ؟؟
كل يوم مطلعنا في الصـقط دا عشان نجيب عيش وطعميـه .. عشان ما بيحب يغشى حته بعد الدوام ,
طيـب أقول ليك كلام ؟؟
الليـله تجيب معاكـ كسـره ولا مافي غـدا زاتوو
أو تقعد تشرب الويكه دي بالمعلقه ,
أنا عامله ملاح ويكه ختيييره جدن جدن .. وما بعوس قراصـه .. أها .. بث (^_^)

متعة والله يا تامبا .. أها أديكـ النجيضة فيما يخص الخدار وكـدا!
بندة شنو وعثيم شنو .. شفت شارع الأربعين أول ما تصل بندة تعمل U تيرن وترجع!
لما تصل التلاجة العالمية (تشيل اللحمة) وبعدها بكم محل كـدا في بتاع خدار
يشيهيكـ الخدار زاتو .. بتلاقي المحل من برا مرسوم كلوووو خدار!!
أها يا عمكـ عندهم تلاجة سااااقطة بي جوه زي حقات السوق العربي ديلاكـ
تخش تشيل الدايرو وتبقى مارق .. وعندهم شطة خدرا .. 330 عديل كـدا!!
بس تعمل حساب الـ أأأحححح! .. خصوصا وإنت زول جاي من عُمرة
عشان بعدين ما نبقى في قصة ما كلّمتني و(الله الخلقني)!!

فيما يخص البامية .. أمورا ماشة معاي كويسة .. لكن الحركة دي
ممكن أطبقا ليكـ في ملاح القرع .. من أول شدّة ليهو ح أفتح ليكـ
فيهو نيران جبخانة تقيلة .. لحدي ما تسمعها سارة كرودي في الخرطوم 2!!


بالنسبة للرجلة .. أتذكرت حاجة .. يوم الجبت فيهو رجلة دا وأدوني النجيضة
اليوم القبليها قالوا لي جيب خدار جبت رجلة .. أها ختتا في التلاجة وعملت
لينا فتة بباقي الرجلة الكانت قاعدة .. تاني يوم برضو جبت ليها الرجلة

غايتو يا ندى البوست دا إعوضك فيه الله



ســـلام للجميع

بوستيكم دا جريمة ضد الانسانية عديل كدة في المطرة الصابة دي والبرد الحاصل ده

ياخي اشتهي عصيدة امي بملاح الشرموط الاخدر و الشطة الخدرا في هذا اليوم بالذات

يا ندى خدرة السودان ما في زيها الفرق في الموية البتتسقي بيها والواطة البتقوم فيها

Quote: يا ندى البوست دا إعوضك فيه الله

انت لسه ما تبتا ؟؟

Quote: انت لسه ما تبتا ؟؟

خليك في نعناعك يحسن....

جيت داخل من العنوان قايلك قاصده ال Monarchy لكن طالما الكلام عن الجننونا بالخدار نديك وجبه أولى.

Quote: ملوكية

أكتر من الملك يا ندوية!
__
عالم تحب اللغاويس بشكل!

Quote: ولمدة 3 يوم متتالية.

سلام يا ندى غايتو عليكم جنس غتاتة.. لا لا دي ما غتاتة ده إفتراء دربو خدرة عديل..
يعلم الله بقينا لمن الواحد فينا يضرب ليهو ملوكية شدة ما بيكون متكيف لمن بغادي بيقرب يجيب شاهدين عدلين!!

قلت لي احبطي ايما إحباط؟

Quote: سلام يا ندى غايتو عليكم جنس غتاتة.. لا لا دي ما غتاتة ده إفتراء دربو خدرة عديل

بعد تعبى دة يافاتح المفروض أقفل الحلة فى دولابى

Quote: قلت لي احبطي ايما إحباط؟

بالغت فى إحباطى الشديد مش؟

Quote: عالم تحب اللغاويس بشكل!

قصدك الجغمسه؟
شوفي يا ندى ،
ياسر دا بتاع سياسة وحا يبوِّظ ليك البوست.

Quote: أكتر من الملك يا ندوية!

والله حسب طريقة تعامل أمى معاها ملك شنو كمان؟

Quote: عالم تحب اللغاويس بشكل!

مرمى الله مابترفع ياياسر.

Quote: بوستيكم دا جريمة ضد الانسانية عديل كدة في المطرة الصابة دي والبرد الحاصل ده

وماجريمة ضد إنسانيتى المشورة العملتا فينى الملوكية دى؟

Quote: ياخي اشتهي عصيدة امي بملاح الشرموط الاخدر و الشطة الخدرا في هذا اليوم بالذات

تدك كنت الدوام وطوالى على البيت عِدل.


سلامو.

ياداليا


ماترحلوا جمبنا ياخ؟

ياعلاء,

حننتنى شديد والله, خلف دى لو إستمريت على كدة , عربيتك ح تكون السنة كلها شغالة خلف

أسالنى من مشاوير الخضار واللحمة دى .

ياأبوحسين

تعال شيل ليك ورقة ملوكية منو

Quote: جيت داخل من العنوان قايلك قاصده ال Monarchy

يامولانا هو فى Monarch أكتر من الملوكية دى؟


الصورة التانية دى صعبة شديييد