في اجراء وقائي الحكومة توقف الكشات ومنع الخطوط التونسية من الهبوط بمطار الخرطوم

خلفية:
بسبب كشة بتاعين المحلية في تونس ومصادرة وسائل الرزق
اشعل بوعزيزي النار في جسده احتجاجا على الظلم
وبعدها تعاطف معه اهل مدينه وكرت حبات المسبحة
كانت النهاية لبن على طريدا ترفض المطارات استقباله

اجتمعت الـThink Tanks بتاعة الحكومة لدراسة الانتفاضة التونسية وخرجت بالموجهات التالية

منع الكشات في جميع انحاء السودان بما في ذلك كشات الليل
منع الخطوط التونسية من الهبوط بمطار الخرطوم
عدم السماح بتسمية اي مواطن باسم بوعزيزي (مع توصية خاصة بايرادها في التعديل الدستوري المزمع)

تم تعيين مستشار خاص تابع لرئيس الجمهورية مهمته مراقبة المحليات
تنشيط الغواصات النائمة في المعارضة واعادة توزيعهاللتحسب من قيام القوى المعارضة بكشات باسم الحكومة
توزيع عدد من الغواصات في شكل ستات شاي وباعة متجولين مع تزويدهم بهوت لاين مفتوح مع المستشار الخاص بالكشات

العصفورة ايضا نقلت لنا بان هنالك قرار بجلد كل مطبلاتي يهتف

عمر البشير بنحبك برشا برشا
وقد تمنع لاحقا استخدام هتافات علي شاكلة
هييييييييع
والدود النتر
وسير سير يا البشير
كونها تتقاطع مع نحبك يا زين العابدين برشا برشا

Quote: عمر البشير بنحبك برشا برشا

هذه بالذات افادنا ودابرق انو صدرت ايضا فتوى من هيئة كبار العملاء انو هذه الكلمة صليبية وتودي بقائلها الى مهالك الجحيم
وكل يقول برشا برشا عليه بالغسل سبع مرات احداهن بالتراب وصلاة ركعتين والتوبة

من الموجهات الوقائية ايضا
تنقية اجهزة المحليات من العناصر الهدامة من مشجعي فريق برشلونة والابقاء فقط على مشجعي ريال مدريد

Quote: وكل يقول برشا برشا عليه بالغسل سبع مرات احداهن بالتراب وصلاة ركعتين والتوبة

عصفورة اخري من نواحي كراكير موغلة الدغمسة
افادات الحكومة قد تمنع الفنانة رشا شيخ الدين من الحضور مرة اخري البلاد
حتي لا تكتب الصحف تقام حفلة (برشا)..
وقد تتخذ اجرات اخري ضد المذيعة رشا كشان...

وقد تواترت اخبار عصفورية اخري من نواحي وزير الرياضة حاج ماجد تفيد
بان الاندية السودانية متنازلة عن الثلاثة نقاط طواعية في حالة برمجة اي مباراة لفريق سوداني في البطولة الافريقية
مع الترجي او البنزرت التونسين
حتي لا تصل للاراضي السودانية فرق تونسية يحتمل ان يصيح من بين جمورها
ترجي نحبك برشا
بنزرت نحبك برشا برشا

مراسلنا الهدهد افادنا قبل قليل ان المعارضة قد دخلت في اجتماعات متتالية منذ الامس وقد استدعت بعض العناصر الناشطة في قطاع ستات الشاي والباعة المتجولين في ميدان جاكسون
المصادر افادت ايضا ان ناشطا من الباعة الجائلين اقترح تغيير اسم ميدان جاكسون الى ميدان البوعزيزي وتسمية ام بدة بسيدي بوزيد وذلك في تسريع لخطوات الثورة
احد الصحفيين الناشطين ايضا تقدم باقتراح المعي بتغيير تسمية سوق المواسير الى سوق الطرابلسية

محمد ابراهيم . . كيفنك والعيال ..

باذن الله ستنتقل العدوه التونسيه الي السودان وكل شعوب العالم المكبوته ..

والنصر قادم قادم بالتونسيه او الصحراء اذا اغلق مطار الخرطوم ..

قول لود الباوقه جهز الكفيل وخليك قريب من المطار للطواري وكدا ..

زي ما انت سادر في التوقعات مقرؤة مع الحالة التونسية
التي تأتي في مواقيتها
لازمن كمان يا محمد إبراهيم علي تنبه التوانسة
سندآ على تجربتنا في سرق الإنتفاضات
بان انتفاضتهم سرقت ومازال سوار الدهب ، اقصد الغنوشي متحكمآ
لازم هتافنا : الثورة مستمرة والسادن يطلع بره
يصل إلى علم الجماهير التونسية

الظاهر انو ود ابرق شغال وردية او شغل عشوشة معاهو لانو جاب خبر عاجل قبل شوية عن توجيه صدر من هيئة العلماء لائمة المساجد بتركيز خطبة الجمعة القادمة عن المصير الرهيب الذي ينتظر المنتحرين واستعمال كل اساليب الترهيب الديني من ذكر لجهنم والثعبان الاقرع الخ الخ
وتوجيه المحليات بتوزيع مناديل ورق لجموع المصلين لكفكفة الدموع وقشقشة المخاخيت
ــــــــــــــــــــ
الزملاء اسامة خليفة و ابوساندرا لم ياتو لحوار ابدا ابدا
نحن عايزين نساعد الحكومة لكي لا تتكرر تجربة سيدي بوزيد ولكي لا نخسر بوعزيزي سوداني

Quote: الظاهر انو ود ابرق شغال وردية

سمعنا تحت تحت كده انه ودبرق بقى بتاع ورنيش{وجه ضاحك}

كيفك يا باشمهندس؟

انتو يا جنابوهات القاعدين تجيبو الكفوة للحكومات دي في صمة خشما
ساي بتاع سيدي بوزيد ده بكون عسكري ولو عارف الحركة بتاعتو دي بتخ بن على دا لافي صينية
يمين الله كان قعد مع بوعزيزي وباع وكوم ليهو الطماطم


ــــــــــ
يعني قصدك انو ود ابرق غواصة؟ طبعا ممكن جدا
ما دام كرار التهامي طلع نفسو غواصة اسلامية من سنة اسكت
احتمال ود ابرق يكون بتاع ورنيش متنكر في شكل طيرة
كيفي ؟ مكتيف للدين من الحاصل ده ومستمتع بالكبكبة الحاصلة

محمد ابراهيم سلامات

رغيم يا ود عمنا عثمان رغيم
تضحك شمسك يا بوي بس ساعدنا بالاقتراحات الزومة ضايقي
عليكم مسؤولية وطنية لكي لا يركب رئيسنا التونسية ونغني نحن بعدو كاليتامى ظلموه يا ولداه (ولداه تقرا بالمصرية)
السادة المشاهدون يمكنكم ارسال مقترحاتكم وليكم على ود ابرق (الطلع غواصة دا) اشيلها ليهو كلها يوديها لحارسنا وفارسنا
الرجل (اللهو بشة ) منفتح ومنتظر اقتراحات تساهم في تجنيبه مصير بن على

اليوم دخل على خط الاجراءات الوقائية اصحاب (الفضيلة) علماء السلطان بفتوى مخيطة بالمقاس

Quote: وقالت الهيئة في بيان أصدرته اليوم تحصلت عليه (smc) إن إباحة قتل النفس حرقاً أو غيره للتعبير عن الرأى وهو أمر يخالف المعلوم من الدين بالضرورة ويدل على ضعف الإيمان وعلى عدم معرفة صريح القرآن فلذا نقول: (إن هذا الأسلوب هو حرام شرعاً ويؤدي إلى الخسران المبين.. خسارة النفس في الدنيا وخلودها في نار جهنم في الآخرة أبد الآبدين إلا بعفو الله تعالى، وأن صحة المقاصد يلزم فيها صحة الوسائل والغاية النبيلة في الإسلام لا تبرر الوسيلة الحرام

نقلا عن الراكوبة ،،،

Quote: بجامعة النيلين..جهاز الأمن يعتقل طالب تونسي إرتدى علم بلاده تفسيرا الى إنه يقوم بتحريض الطلاب على الثورة ..قامت الأجهزة الامنية بإعتقال طالب تونسي يدعى جمال عبد الناصر بن رشيد يدرس بجامعة النيلين دراسات عليا بكلية التجارة بسبب إرتدائه علم تونس وتم إعتقاله من داخل الجامعة من قبل جهاز الأمن وتم تعذيبه بمبابي الحرس بكلية التجارة وضربه مما أدى إلي إصابات في رأسه ونقل تحت حراسة الأمن الى مستشفى الشرطة ببري ولم يعرف مصيره بعد ذلك. الراكوبة.

وماذا بشان اللعب مع الفرق التونسيه ،


في كؤوس الإتحاد الأفريقي ...؟

وانا من جانبي بقترح لاصحاب الفضيلة زيادة مدى التغطية بما يسهل لعزيزي المواطن الدخول للجنة والبعد عن النار
الغيبة والنميمة والنقنقة على الحكومة برضو حرام وبتودي النار
ما تحسد اي زول ربنا فتحها عليهو وهو موظف حكومي وبني ليهو عمارتين وعرس تاني وتالت برضو بتدخل النار
التقشف من صفات الانبياء والصالحين عزيزي المواطن يعني لو ما اكلت وقمت طنطنت ده كفر بنعم الله الاخرى مثل النفس الطالع ونازل
لو مرضت وما لقيت حق العلاج احتسب وامسك خشمك عليك ولو سمعت بواحد من ناس الحكومة ديل عيا وودوه الاردن ولا تركيا قل هي ارزاق يوزعها الله بمعرفته لانو لو ما قلت كدة بتخش النار على طول

اخر الاجراءات الوقائية التي تفتق عنها ذهن الدقون الضلالية هو اخفاء جميع اللساتك المستعملة
يا خي ده اجراء وقائي بن لذينا والزول القال بيه ده مفروض يدوهو وسام ابن السودان الضال لتبذير اموال الشعب السوداني
وردت المعلومة في بوست الاخ علي ميرغني
الخرطوم عاصمة خالية من الاطارات القديمة..