دكــان حـبـيـب بـاســطـا..

لمن كنت صغيرة بلعب بالتراب
ساقني ابوي عليه الرحمة الى سوق عطبرة ، لي دكان حبيب باسطاوتخيلوا طفلة كانت دلوعة البيت وبتلعب بي التراب
تلقى نفسها وسط دكان العم حبيب باسطا . دكان فيهو حسب اعلانات زمان ( من الكبريته لي الصاروخ )).شئ اقمشة وعدة تلمع وتبرق وشئ ا
العاب وشختك بختك وعجلات اها انا قعدت في عجلة جميلة تلمع والوانها مبهجة وقلت ما بنزل منها. يا بت شيلي ليك لبسة ! لالالا!!
شيلي ليك حلاوة ! لالالالا!! العجلة !! ما كنت عارفة انو العجلة رمز اهل عطبرة، وفعلا شالوني في عجلتي للبيت ..
الزمن داك كان زمن حبيب باسطا .زمن كلنا عايشين بالمحبة لاعارفين الناس دي جنسه شنو ولا جو من وين كلوا العلموا لينا انو نحن سودانيين واتعايشنا عمرنا كلو سودانيين..
شعارنا زمان : كل شئ في دكان حبيب باسطا ..
تقديري واحتراماتي لكل من ادخل الفرح في طفولتنا واولهم حبيب باسطا ..

ياااه يا احلام وهبي..
دا اتذكرتيهو من وين حبيب باسطا .. والطيــر الأبيض .. ومطعم اليمانية ؟!
اول عجلة اشتريها كانت - ابو حمامة مقاس (26) من حبيب باسطا وانا في اولى ابتدائي
بمناسبة النجاح

غايتو انا الذّ شي عندي كان وقت ازور ابوي في ورشة العمليات انه يجيبني الطير الابيض واشرب قزازة - ليموناضة - باردة..

عطبرة اشتهرت ولا زالت بتمايزها وتمازجها العجيب بين مختلف فئات المجتمع السوداني
واظن انه اكبر مجموعة من الاقباط في السودان بعطبرة

تحياتي

Quote: عطبرة اشتهرت ولا زالت بتمايزها وتمازجها العجيب بين مختلف فئات المجتمع السوداني واظن انه اكبر مجموعة من الاقباط في السودان بعطبرة

حيدر لو زرت الابيض ستجد نفس الشيء او اكثر قليلا

سلام احلام .... واااااااا وجعا على بلدي

سلامات حبيبنا جمال الباقر..

Quote: حيدر لو زرت الابيض ستجد نفس الشيء او اكثر قليلا

كل مدن السودان متميزة بجمال تعايشها ..
ندمي في الدنيا اني ما زرت الابيض.. اتقدمت لي دعوة اجازتي الفاتت اني ازورها بس القدم ما اترفعت
ان شاء الله اول دخلة السودان ستكون محطة رئيسية
تحياتي لكل الاحباب من زملاء الدراسة والاهل بالابيض

تحياتي

ــــــــــــــ

يااااه يا حيدر يا اخي وابن مدينتي
الى هذا الزمن دكان حبيب باسطا بلاوز لي في منامي
كان شئ عجيب وغريب ما عرفناه الا لامن كبرنا . انو دكان حبيب باسطا كان فيهو اقساط وتساهيل للحد البعيد
وكان بوفر كل الاحتياجات المهمة للعائلة بي فهم عال في التجارة والتقدم والنبساط لينا نحن الصغار
زكرتني بي مطعم اليمانية ـ محمد السني ومعاهو المخرج عبدالرحمن نجدي لمن يجو عطبرة ما بياكلوا الفول الا في مطعم الدبل
ويقعدو في مكتبة العم دبورة ينتظروا الجرايد وبقولوا عطبرة فيها سحر زي مدني عارف السني وتعصبوا لي مدني لكن عطبرة بحبها
لي ناسة وكيف بعرفوا كل واحد فيها وكيف بسلموا على بعض وكيف كل واحد سايق عجلة وحافظ تاريخها جيت انت اكدت لي الحكاية دي
قلت لي ـ عجلتك ابو حمامة مقاس 26
السني بقول ليك ابوحمامة اول العجلات الجاتنا من الصين وحبيب باسطا كان احد مورديها لي جمالها وسعرة المعقول لي كل الناس
احتراماتي

الأخت / احلام وهبي وضيوفها الكرام...

تحيات طيبات

المربوع بتاع ناس حبيب باسطا، كان اشهر مربوع في سوق عطبرة : (حبيب باسطا + مطعم الفردوس + حلواني الوادي + كان في مطعم هني في النص عملوا واحد جنقلاوي جاء من السعودية، وكان اول مرة نشوف الشوايات الزجاجية المغلقة، والدجاج يلف داخلها، الكلام ده كان في اول السبعينيات + احمد عبد الله ابو الروس + (....) + سلوي بوتيك ) اما واجهة المربوع من جهة شارع السلك تبدو كالتالي : (صيدلية عمك عبد الرحيم الشوش + عمك بتاع النجادة + فرن عمك كامل + مغلق عمك حلمي شنودة + اشيائ كدة تانية حامياني، ممكن اخونا الريس ابو جهينة يذكرها كويس جدا...سلامي الي عطبرة و لك، وله، ولهم في الرياض، ومنهم خالد سعيد الارباب، والعمدة هيثم سعيد...لن انسي اياما مضت لن انسي ذكراها..

يا احلام قولي للسني حصل اكلت لحمة في مطعم الزهاجة ؟

والا سمك عند على عارفين ؟

لو ما جرب ديل يبقي مافي فايدة ..

رموز عطبرة
الأخ جمال الباقر اهديك الفنان حسن خليفة العطبراوي

كــــــــــــل اجزائه لنا وطن اذ نباهي به ونفتتن
نتغنى بحسنه ابدا دونه لا يروقنا حسن

كااااااااااان كل اجزائه لنا وطن

رحمك الله يا عطبراوي بان لا ترى الوطن تتقطع اوصاله
هدية صباحية مقبولة
شكرا

لك التحية يا أحلام وأنت تهيجين فينا ذكرى عطبرة الجميلة..

إشترى لي والدي عجلة "رالي" من حبيب بسطا بمناسبة نجاحي في الشهادة الإبتدائية .. أذكر سعرها كان 95 جنيه "بالقديم" كان ذلك في أوائل الثمانينيات.. وعندما وعدني أبي بشراء العجلة إذا نجحت .. كثفت تدريباتي في ركوب العجلة قبل سنة من ذلك الوقت حتى أتمكن من قيادة عجلتي باحترافية عند إقتنائها. ومن نفس المحل إشترت لي خالتي قميص وبنطلون أذكر أنهما كانا من أفضل ما أقتنيت من ملابس.
وعلى ذكر حبيب بسطا.. أمشي خطوتين لي قدام ناحية سور السكة الحديد حيث "باتا" و"لاركو".. كانت تستقبلك رائحة "الجلد" المعتقة وأنت تدخل هذه المحلات..
وفي نفس شارع حبيب بسطا كان محل "البان جديد".. وإلى الخلف منه محل "ضمرة" الصائغ.. كانت هناك ذكريات لا زالت تعشعش في مخزون الذاكرة.

خالص الود

عارف نحن حضرنا سمك المطبعجي
لكن السني بكون جايب خبر المطاعم والقهاوي القديمة
اصلوا بحب التاريخ
عطبرة كانت وقتها مميزة في كل شئ

الأخ جمال المنصوري
تحياتي
كان وقتها لمن تنجح بجيبوا ليك قلم تروبن
والبنات بيجيبوليهن طوق وفستان
ولمن تنجح من مرحلة لي مرحلة
عجلة
وكلهم في حبيب باسطا
من رموز عطبرة الفنان المصور السينمائي
الرشيد مهدي ..

الأخت احلام

تحياتي

شالني الحنين
عاد بي سنين
رجعني تاني لعطبره
والدنيا كانت حاله زين

عملت لفترة مع المرحوم برسوم حبيب بسطا بحسابات السكة الحديد
وكان مثالا للتعامل الراقي وظللت اذكره بالخير حتى قرأت نعيه يوما بصحيفة الخرطوم

التحية للأهل ب (عطبره الجميله بلد الحبايب)
كما كان يغني لها الفن الجميل

الاخ مبارك السروجي
لك التحيات شوف الزمن دكان فيهو كل حاجة
قبال نعرف السوير ماركت والاسواقالمتخصصة
كان دكان حبيب باسطا حبيب الاطفال
تشتري من القميص للعجلة
احتراماتي
واصل معانا وزور الدكان

جمعة مباركة يا احلام وهبي

كنت بكلم ابوي وامي قبال شوية وابارك ليهم الجمعة. ذكرت ليهم دكان حبيب باسطا في نص الكلام قام ابوي قال لي :

ياود دا ما الدكان الاشترينا ليك منو العجلة بمية وخمستاشر جنيه ( لاحظي مية وخمستاشر دي في بداية التمانينات ) وعشان اصغر نفسي بقول في نهاياتها هههههه

عارفة يا احلام امس صاحبي قرا البوست دا فدق لي تلفون وقال :
صحيح يا حيدر انت بروتاريا.... ياخ نحن ولاد السودنة كنا بنتعم السواقة في عجلة رالي اصلية.. انت تشتري ابو حمامة مقاس (26) ؟؟

والمسكين ما عرف انه ابو حمامة الاصلي مقاس (26) وقت نزلت في دكان حبيب باسطا كانت اغلي من الرالي الدبل ابو ماسورتين

ــــــــــــ
مبارك السروجي ذكرني بباتا ( وكبكاتم المميزة ) وكرعينا الكبار من المشى حفيانيين فما نلقي جزمة العيد القدرنا الا من باتا

تحياتي حيدر
والوالد والوالدة ليهم طول العمر والعافية يارب
عارف ياحيدر كل حاجة حلوة وجميلة كنا بنشتريها من دكان حبيب باسطا
وانا الايام دي في عطبرة ولقيت كل حاجة فيها اتغيرت حتي السوق
لكن عطبرة جميلة زي ناسا

اجمل حاجة الزونية من بيت المدير في العيد
والليق
وايس كريم الملتقى

__________

انا اتذكرتك يا احلام .اظني كنا جيران

الأخ علي الكرار هاشم
لك تحياتي واحترامي
يا اخي كلنا ساقنا الحنين لي زمن حبيب باسطا
وزمن عطبرة الحديد والنار
والسينما نحجزلوج بالتلفون
ما اجمل ذالك الزمن
وواصل معنا اهديك صورة من عطبرة تذكر النادي ده؟

عذراً للتكرار

احلام وهبي ..ازيك والله اثرتى فينا زكريات رائعة..فعطبره لبساطتها ولجمالها كان لها ان تحوى العديد من الديانات والعديد من الاجناس فقد كنا نسكن حى السوق على ميدان المولد والجامع الكبيروكنانجاور بيت الهندى ديرواجلال والقبطى مكرم تكلا وكنا نمشى الروضه سوا انا وروهين ديرو وكتكوت مكرم وروضتنا كانت فى البلدية ونحنا راجعين من الروضة نقوم نغشى مع روهينى دكان ابوها وكان دكان الهندى من اشهر محلات الريحة والعطور من مسك ومحلب ووووووكل العطور الهندية واشياء اخرى
ويااحلا م من المحلات المعروفة محلات ناس خيال وعلى ما اظن للاجهزة اللكهربيةواول ما ظهر التلفزيون فى عطبره ابوى جاب لينا واحد منه..اما دكان الحاج الصينى كان من اشهر محلات العده الصينى وانا بكتب شايفه صورة اشهر واشهى مطعم سمك فى ذهنى ماقادره اتزكر اسمه ..وبصورة نادى المعلمين والمعلمات زكرتينى مدرسة الشرقيةللبنات ذلك الصرح الشامخ آنذاك بقيادة الجليلة زينب عفيفى.والدة زميلتنا فى المرحلة الابتدائية..اما الحبيب باسطا هذا فكان يدخل البهجة والفرح فى نفوسنالما يشترى لييك ابوك عروسة اولعبة ومااجمل عرايس المولد آنذاك ...ساعود

Quote: وواصل معنا اهديك صورة من عطبرة تذكر النادي ده؟

شكرا علي الجولة الرائعة
وياريت الكاميرا تصور
استديو الرشيد
استديو الزكريات

وكمان لو مشيتو علي ميدان المولد حتلقو بيتنا بتاع العزابه بجوار عيادة العيون
وهو الذي خاطبته من المهجر

كان بيتنا من أحلي البيوت
من غرفين
والصاله حلوه مجيره
مربوطه فيه لمبتين
والحوش وسيع
مشتوله فيه نخلتين
والمزيره
والقلتين
والسراير ديمه برا
والشنط مروده جوه
ونحن كان بيناتنا خوه
وعيش ملح لمدة امتدت سنين
والدنيا كانت حاله زين

الاستاذ احلام وهبى
عاطر التحايا لك وللاهل بعطبرة
الصورة اعلاه لقهوة العم حسن عمر هبرم كانت فى مقابل سوق العيش (العياشة) وشمال مكتبة دبورة وجوار الترزية دكان عمنا عوض خضر رحمه الله .
كنت اداوم على الحضور بحكم ان الاقرباء القادمين من البلد يريدون الذهاب الى المقهى لمقابلة اخرين فقد كانت ملتقى وكان على الحضور كل يوم قطر قادم من الشمال ( قطر كريمة يوم الاثنين ويوم الخميس اضافى الى اكسبريس حلفا الذى يحمل القليل من اهلنا المناصير .. المهم تلك ايام .
هذه القهوة محفورة فى ذاكرتى وستظل فقد تم اعتقالى لاول مرة فى حياتى من هذه القهوة ولاول مرة تتمرمط كرامتى الشخصية واعرف بحق وحقيقة معنى التسلط والاستبداد والعسف فقد كنت صغير فى السن وكانت المدينة تضج بحركة العمال المعارضة للنظام فى سنواته الاولى فقد كان ذلك فى العام 1992م حين اخذت من هذه القهوة ونكلوا بى تنكيلا وعلى الرغم من امتلاكهم للقوة فقد كانوا يفتقدون الى قوة المنطق واذكر اننى حولت مجرى التحقيق الى حوار فى وحول الاسلام والحكم وكانوا من البساطة بمكان حيث استطعت ان القمهم حجرا تلو الاخر وكنت قد ركزت على جوانب الحرية فى الاسلام وكانو يجهلون الكثير.
كما اننى سلمت على اكثر من فرد فى الطريق واخبرته بالاعتقال قبل ان اودع فى مكتب جهاز الامن غرب محطة السكة حديد وجنوب المستشفى وينهالوا على بالضرب بالارجل وفوق القفا.
الاستاذة المحترمة شكرا على انعاش الذاكرة بمدينة وتاريخ يستحق ان يدون ويسجل ويوثق للاجيال القادمة .
عطبرة مدينة عصية على التطويع وصامدة بقوة فى وجه الديكتاتورية .

وانت داخل على السودنة
حيث الحدائق الغناء والورود والآزهار
والأشجار الخضراء
وتعدي على اندية الاسكواتش وملاعب التنس وحمام السباحة
عشان كده كان الكباتن الكبار في السباحة من عطيرة

أحلام وهبي وضويفها الكرام..

من المحلات المشهورة في قلب سوق عطبرة كان محل "أحمد وعلي" لبيع الملابس الجاهزة والأحذية.. وفي الجهة المقابلة له على الناصية محل "متياس" للأقمشة.. كانت فعلاً مدينة تتدفق حياة وروعة..
وبالقرب من الجامع الكبير حلواني "أبو خليل".. وبالقرب منه الحلواني "عبد الفتاح" صاحب ألذ باسطة في عطبرة..
كانت الشوارع والمحلات ذات ملامح تماماً كما الناس.. كل شارع كان له طعم ورائحة ولون.. رزت عطبرة قبل 6 شهور .. بدت مختلفة.. مدينة هائمة .. وجوهها لم تعد مألوفة.. تبدلت ملامحها وشاخت.

خالص التحايا..

الاخت احلام

لك التحية والأشواق

قمت بزيارة سربعة لعطبرة قبل عشرة سنوات اعجبتنى المدينة

وفيها شبه كبير لكتير من مدن السودان التى زرتهاولى فيها زكريات جميلة

الشوارع وحركة الناس والاسواق وطيبة الناس المرسومة على وجوههم تشعرك بارتياح عميق

تمنيت لواقعد كم يوم ازور كل انحاء المدينة لاكن انشاء الله لى عودة لعطبرة قريبا

للتهنئة بقدوم ولى العهد...... لك العافيةو السلامة

تحياتى لكل الاهل فى عطبرة

مدينة لا تغيب عن شمس الذكريات!!
قطار شوق«الاهمال»..متين يرحل..؟

عندما يعانق النيل آخر روافده وينسرب في الصحراء تاركاً خلفه سراب مدينة حاربت التنين طويلاً ولم تقهر بدأت المواجهة منذ منتصف الثلاثينيات حينما ثار العمال ضد اولاد جون القادمين من اسكتلندا وويلز وبعدها تقدم الشهداء الحقيقيون مواكب الفرح الاخضر فكانت افواجاً من المؤمنين بأن الماء والكلأ والنار قسمت بأمر الانبياء والمرسلين بين الناس اجمعين ونهضوا بعدهم السواقين والعطشقية والبرادين والكماسرة وعمال الدريسة خرجوا وعرقهم يتصبب والنسوة تقابل مظاهراتهم بالزغاريد فكانت 1955م ومال الغداء والعم «حسين ود كرجة» القادم من كنور ينزل من على ظهر حماره ويبيعه في السوق متنازلاً عن ثمنه لمال التحرير ومنذ تلك اللحظة كان الرضع يفطمون على الخروج ويتأدبون امام الجماهير شاهرين اسلحتهم«العدالة-المساواة-وقبلها الحرية» الجميع يرفض الطاعة العمياء - كان رجال شرطة السكة حديد اكثر معرفة بحقوق الانسان مثلهم مثل عسكر الامبراطوية التي لا تغيب عنها الشمس ويبكي اغلب السكان على نغمات الفنان بابكر الزكار
ما بنسى ودوام بطرا
الفي نص اسمو حرف الرا
وتهدأ المظاهرات بعد الاستقلال وترقد المدفعية اروع سلاح للجيش السوداني ومعها الضباط ابناء الشعب ، كانوا يرافقون المواطنين في المحافل والمقابر ودار المعلمين تشرق نحو الشمال وترسل اشعتها يوم كان للمعلم الحق في ان يقترب من منزلة الرسل فرفعته المدينة الى مرتبة الصالحين الحاجة«رتيبة» التي تسلف سندويتشات الطعمية والبيض شريطة ان تحلف بالله ، يومها كان القسم امراً مقدساً كانت من رموز المدينة وعلاماتها الباهرة .. كانوا وكانوا وفجأة تحولوا الى باعة للبرسيم ومطاردين للمؤسسات الحكومية والقطاع الخاص والخاص جداً لأنهم مفصولون من السكة حديد طبقاً لإرادة«محمد الحسن الأمين» الذي استكثر عليهم الاعتذار وسوق«الدخولية» سوق البهائم والقش كان يخضع للاشراف الصحي واربعة مراكز صحية للرعاية البيطرية ابرزها معمل الالبان ومركز صحي الرعاية البيطرية جوار مسجد السيد علي الميرغني وبجانبه الهيئة العامة لنقابة عمال سكك حديد السودان يومها كان فقدان البهيمة يستلزم الذهاب الى الملجة واصحاب التاكسي«ابيض اللون»يومها كان طلب التاكسي بالتلفون كان الانجليز «جزاهم الله خيراً» يخططوا ليجعلوا المدينة مطابقة للندن ديري واكشاك الليمون تبعث الخضرة رائحة زكية وتعطر«الموقف العام للمواصلات» ومقهى العم صباح الخير«التي تخصصت في القهوة دون الشاي»ترتكز الى فلسفة جد كبيرة وملعب الجولف والاسكواتش والسينما تتوزع في مثلث الخير والحق والجمال تلكم هي عطبرة مسقط رأس اول فيلم سينمائي سوداني«آمال واحلام» يومها كان نصف الخرطوم مظلم وغابات حقيقية وليس اسمنتية ومقهى العم محمود اللمين ومقهى الرباطاب ومقهى المناصير والعم( حسن عمر) ومقهى (الرشايدة) ويافطات السينماء وبائعي الكتب والعاملين على استبدالها واصحاب اشرطة الكاسيت كل ذلك مع روعة مكتبة دبورة ومكتبة( حنتبلي) ومكتبة (الشبلي )وفي ركن قصي كانت مدرسة العمال التي استقطعت مصروفات تشييدها من عرق الشغيلة تحولت بقدرة قادر الى خولة بنت الازور ثم الى سمية بنت الخياط اللواتي يستحققن مدارس بأسمائهن لكن غير مدرسة العمال والتي تغازل مدرسة«الجلود»والتي يحكي اسمها عما تبقى من الاضحية وكرامة الفداء والسرور السافلابي ومدرسة السعادة الابتدائية بنات ومدرسة الخدمات التابعة للسكة حديد تقبع على مساحة 7 الف متر مربع والاهلية المصرية عنوان الصداقة والاخوة والاقباط بنات وبنين ومدرسة الارسالية الامريكية للبنات والكمبوني كل ذلك تظلله موسيقى الشرطة على نغم اسكتلندي الطابع تحت ظلال الثقافة العمالية وحق الانسان في المعرفة ومحو الامية والتعليم والتعلم والفرق جد كبير لو تعلمون . كذلك وفق صفارة السكة حديد حيث كان الانضباط والتنظيم واروع السواقين كانا العم (حسين ابو رغيفة) وفاكهة موقف حاج الريح يوم سخر من قريبه الريفي حين سأله وكانا وقوفاً امام محلات (الطير الابيض ):عن اسم المحل؟وهل فيه باسطة؟فقال له: اذهب الى صاحبة المحل وقل لها:عمتي الطيرة البيضاء..عندك باسطة؟يومها كانت توجد في المدينة عمارة واحدة وهي عمارة عباس محمود جوار البلدية وساعتها الشهيرة وفي مواجهة كلية الهندسة الميكانيكية منذ السبعينيات من القرن المنصرم وبجوار البوسطة والتلغراف والهاتف يوم كان البريد ينقل لنا«مجلة هنا لندن ومجلة العربي من الكويت» الى ارتال من العمال والموظفين بالورش ومكاتب العموم.كانت عطبرة ام الكل وزولة الكل شارع الحلاقين والاغاني الصادحة من الراديوهات تعطر مساحات الامكنة والتجار تجار الرفق بالانسان«عبد الله الفكي محمود،ابراهيم طلب، ابو القاسم سعد ، خضر ابراهيم العربي ، المأمون فضل الله ، البدوي العجمي ، وعسقلان ، واجزخانة العائلات ، وصيدلية السكة حديد المدعومة ، وسوق الخضار ، والعم بابكرعبد السيد رحمة الله عليه ، وعم الحسين الغفير القادم من جبال النوبة ، والذي قال انه لا يستطيع ان ينام خارج المدينة ، واحب الناس واحبوه ، وقضاة المدينة النزيهين الطاهرين ، ومحكمة العمدة(ا لسرور السافلاوي )، و(حاج الريح )، و(مكي حامد) احد اهم القيادات الوطنية بالمدينة بالقرب من مبنى التوتوكورة حيث يوجد عمنا ابو كدوك الذي ينتج ويصلح الاحذية الرياضية المحلية وشارع الشهداء بالموردة والعياشة وعلى رأسهم (عثمان سعيد) و(خلف الله العاليابي)والتزية المرحوم(عوض خضر) و(الباهي) والعم( نقد) والترزي الافرنجي( منقة) و(سبت)و( برنابا)والتنافس الشريف بين اولاد(البيه) و(ابو خليل) لمنتجات الالبان اللذان تربطهما علاقة الصداقة والاخوة ومحلات الملبوسات والاحذية احمد وعلي القادمين من اليمن السعيد «والعديل والزين» والجوهرة والاجهزة الكهربائية ومحلات (خيال) واولاده واكبر مستورد للعجلات بافريقيا والوطن العربي العم (احمد عبد الله)و(عبد اللطيف) العجلاتي ومحلات المناسبات بواسطة عمنا ابراهيم «دنانة» و(ماندو) صاحب وفني المايكرفونات وواحداً من امهر السودانيين على الاطلاق العم «برنوس» الذي صنع المسدس بالمسبك فتم فصله من السكة حديد على ايام السكة حديد اضافة الى الشاعر الوطني الكبير الطيب حسن وابناءه الافاضل الذين ما زالوا ممسكين بشرف المهنة وعلي منصور بالمنطقة وعلي سعيد وصاحب اكبر ورش للمراكب سلامة للبر والبحر وكرار احمدون وصيانة الوابورات الزراعية وورشة الشاعر الكبير عبد الله بشير حتى البصات كانت لها دلالة المستنيرين لافتاتها الكسولة «بلابل الدوح»«سودانية»«لوليتا»«قارئة الفنجان»«العربي»«المفتخر»«الوحدة»«الفظيعة» «الهبباي»«ابوحافظ»«يا ناس يا اهل ابو حافظ وصل»«ورا البسمات كتمت دموع» واشهر السواقين بالمدينة العم رحمة الله.. محمد طلاق..العم عبد القادر رئيس النقابة..وعباس البشير..وحسين ابو رغيفة..واحمد الكسلان..وعبد الغني..واشهر الكماسرة .. حسين العربي..وابو سبعة..والبعيو..وعثمان مليلمة..واشهر محلات الحلويات«سمرونة فتحي البرول» وباسطة عبد الفتاح واشهر فول فول عمك عوض وكشك الاندلس ولا ننسى ابناء كنور وخليوة التي تحف عطبرة وتكسوها بهاءً يضاف اليها ام الطيور واهلها الذين صدقوا ان الجرادل العابرة لاراضيهم ونهر النيل تعمل من اجل مصلحة الوطن فتنازلوا عن ارضهم «ملك حر» من اجل مصنع الاسمنت الذي صار وبالاً عليهم يضاف الى ذلك المرحوم ابو جنزير فاكهة المدينة وطيبها الذي يعطر سماوات المناسبات ويضفي لحظات الفرح على المجتمع العطبراوي حتى داخل الزوايا وفي بيوت الاحزان..والزوايا لمن لا يعرف هي منازل تبنى في الاحياء يتم فيها فرش افراش البكا لمدة ثلاثة ايام بحيث يأتي الجيران بالطعام لاهل الميت عوضاً عن اشعال النار في الايام الاولى للوفاة والاكتفاء بالميتة دون خراب الديار والآن تحولت الزوايا الى مأتم عريض يبكي مدينة الحديد والنار .. يبكي عطبرة نفسها...!
«عطبرة ام دالات..رباية اليتامى ومقنع العزبات»
يأتيها الريفيون فتمدنهم ويأتيها اهل المدن فتأسرهم كانت عشق لا منتهي عشق ابدي يستقبلك الى العمدة السرور والداخلة العظيمة ولن تشاء الا ان تحل عضواً باحدى انديتها .. الوادي الوطن .. الشاطيء .. الهدف والامل والنسر والفلاح والامير والكوكب والتقدم «الموردة» والجيل والنيل والجلاء والتحرير حتى الاندية ارتبطت بمكافحة الاستعمار يضاف اليها نادي الاتحاد واندية اجتماعية يقف نادي بوهين على قمتها ورحيق وازاهر شارع كسلا وشارع الشهداء وشارع الفكي مدني الذي سمي على الرجل الصالح«الفكي مدني» واقيمت على مقبرته مباني التلفزيون .. تلفزيون عطبرة الريفي ولا اعرف لماذا ريفي؟!لم تكن تعلم يومها ان النبي«ص» امر بأن نستوصي بالاقباط خيراً..كانت دكتورة فانية القبطية واولادها الذين تلقوا تعليمهم بمدرسة العمال مع اخوانهم المسلمين على الرغم من امكانية ان يقطعوا المسافات الطوالت حت ظلال الصليب نحو استراليا وكندا..والدكتور فؤاد جندي ودكتور فلبس مرقص محروس بميدان المولد النبوي ودكتور«بول» اخصائي العيون القادم من الجنوب الحبيب وفتحت له المدينة صدرها وبادلها الحب والوفاء..كم كان الاخوة المسيحيون رائعون جد رائعون..حنا-بطرس بولس وروماني ورزيق صديق الطفولة وسامي يوسف رحال من مسيحيي جبال النوبة ..لكنهم قهروهم حتى هاجروا وهجروهم حتى غابوا .. ليتها ايام تعود ونعود..!

عاودنى الحنين الى مدينة عطبرة فى لحظة انقطاع التيار الكهربائى عن ولاية الخرطوم فة العام 2003م فاشتريت بضعة
شمعات بعد ممانعة الوالدة حفظها الله منحى الفانوس لكتابة شى عن عطبرة فأجتررت الذكريات على ورق من بواقى المطابع
فكانت هذه الكلمات ... ربما تنعش ذاكرة الكثيرين.



عبدالواحد

وتانى شكرا ليك استاذة احلام




عطبره ..مدينة لا تغيب ..عن شمس الذكريات

شكرا احلام ......شكراعبد الواحد فقد انعشت فينا زكريات رائعة منحتنا تلك المدينة اشياء غالية وثمينة فعشقناها فصارت ذكرى

up

الأخت العزيزة منال محمد علي
لك التحيات الندية
كنا وبنات خالتي ، ضحى ومنون واماني واميمة
مشتركين في التنس والسباحةوالكشافة والطلائع
شفت النشاط ده كيف ربما نكون جيران او درسنا في مدرسة واحدة
لكن حكاية الزونيا حكاية لانها الشجرة الوحيدة الما لقيت زول بعرفة الا في مدني
عندهم كترت زونيا وشجرة الزونية شجرة جميلة وظليلة وفيها ثمرة حلوة
شكرا ليك يا منال
امنياتي واحترامي
ويوم نجلس تحت ظل زونية ونتونس

الرشيد مهدي رائد السنما احد رموزنا الخالدة

الأخت احلام زكريات لازالت بالخاطر عطبره مرتع الصبا احيى هذة المدينة الصامدة واحيي كل حى وكل شارع

فيها والتحية لك وانت تعودين بنا الى ذلك الزمن الجميل

هل انت اخت حموده ومعاويه وهبى وعبد الهادى ؟
ودمت بخير

ابوختم

الأخت العزيزة وغالية
ابتهاج عبدالله
عارفه نحن وراكم طوالي جوار الزاوية في ام بكول
البيت الكبير
وبجي بي جنب بيتكم كل يوم وانا ماشة البوسته لمن كنت شغالة في البريد والبرق
الذكريات ابوابه مفتوحة
وعطبرة كانت مليانه حكاوي وافراح
شكرا لمرورك وليك المودة والمكان مفتوح لي ذكرياتك فريحنا
احتراماتي ,
سمحونه وهبي

[
الأخت ابتهاج انا هذه الايام في عطبرة
اتمنى ان تزورينا اذا موجودة في المدينة
تحياتي واحترامي

الأخ العزيز
عبدالواحد ابراهيم
لك الأمنيات الندية
السلام يغشاك وانت تثري هذه المساحة بالمعلومات الجميلة عن عطبرة التي في خاطري
يا سلام كان زمان للمقاهي حضورها في المدينة وكانت مكان للتجمعات والونسة والتعارف
وعطبرة كانت سباقة في كل المناحي اصلو جيوش الاحتلال جات من هنا واستقرت لتصل الخرطومفأسسو كل شئ من المقاهي لدور الرياضة
شكرا لك ونفتح لك الابواب لتحكي لنا عن عطبرة

اختنا احلام

انا لست من عطبره لكن زوجتي فوزيه بت النقابي العطبراوي هاشم السعيد من عطبره الفكي مدني

وكم قضيت فيها اجازات سنويه ممتعه

عطبره يمتاز شبابها بحب التعليم والثقافة والمسرح وكرة القدم والفول

سوقها بجماله ورخصته في الاجازات عندما كنا نغادر من الخرطوم نندهش لسوق عطبره

من ناحية اسعار السمك مثلا كنت اشتريه بالقفه مش بالكيلو زي الخرطوم وتعال شوف الخضار والكوارع

بس المشكله كانت في الانقطاع المستمر للكهرباء

اول برامجي عند الصباح الذهاب لاحد المصانع القريبه لاحضار لوح تلج ثم السوق

بعدين للبقاله الحديثه كنت اذهب للمحلات مقابل كلية عطبره للهندسه جنب الكبري لاحضار السجق والجبنه

المضفره وخلافه

يا لها من ذكريات

عطبرة الحلوة
وفيها ناس حلوين
على غلاف مجلة كابتن ماجد
كتب هذه الكلمات أحد الطلاب الذين سبقونا بدراسة المرحلة الثانوية بعطبرة
كنت في المرحلة المتوسطة
وأمني نفسي بدراسة الثانوي في أحسن حتة يمكنني فعل ذلك فيها
وبرغم أن الدامر أقرب جغرافيا لمسقط الراس
إلا أن حيوية عطبرة التي يحكيها لنامن سبقونا
والخيارات الممتعة التي يجدونهاهناك
تجعلك تفكر بأن تصطاد عصفورين بحجر
دراسة ونقلة مدنية شوية
لود قرية
عاش بين المدرسة
ورعية الغنيمات في سنوات عمره الأولى
ولما ترعرع من يقوم بهذه المهمة من الأخوة
انتقلت تكاليف المساعدة في الحياة
إلى العمل في الحواشة
ما بين مسافات طويلة نقطعها سيرا خلف جوز التيران
حرات وقصابية
وجركانة مخيشة مرفوعة على التقنت لتضربهانسمات الريف البكر
وترنيمات مواكبة لما يسمع حديثا
إن كانت غنية جديدة او مدحة
أو دوبيتة
حياة تبدو متنوعة ولكنها
تحتاج فعلا لنقلة حتى يتسع أفق النظر
كانت عطبرة
الداخلية تجد فيها كل السودان
العصريات تتوزع بين الكورة
ونخل الأحياء العريقة على النيل في زمن التمر
والتسكع في السوق بين المكتبات والقهاوي وبورد إعلانات السينما
والزيارات للأهل في المدينة المثالية
أجمل اللحظات حينماأحد الاقارب زائرا
فحتما ح يعصر لك قريشات
تتيح لك التمتع باسكريم الملتقى الذي يعجب غيري هنا وكمان الباسطة
ندين لعطبرة بالكثير
لك الشكر يا أستاذة

عارف يا اخي عبد الواحد
ناس عطبرة عندهم حاجات بعرفوها براهم
يعني هسي طلتك من الشباك براها حكاية والله جميلة بي جد وفيها عفوية مش عادية وزي الهمبريب هابيك
وما شغال بي زول وشكرا جزيلا على الوصف والتداعي الرائع في وصف عطبرة
واصل البوست ملك كل محبي عطبرة
وشكرا جزيلا
احتراماتي

Quote: بعدين للبقاله الحديثه كنت اذهب للمحلات مقابل كلية عطبره للهندسه جنب الكبري لاحضار السجق والجبنه المضفره وخلافه

دي عمارة عباس محمود .. محلات سوجادو والحرمين .. بقالة الناس المرطبين البيجو عطبرة مغتربين ومرطبين ويتجدعو بعمم كبار بهناك يا طارق ميرغني

يا الله
عطبرة ورائحة الفلنكة وسوق الزيارة
وركاب قطار حلفا في عصاري رحلت بعيد
ودفنها غبار الحياة والسنين المضت كالبرق
فتحتي لينا بوست رهيب الله يديك العافية
برجع ليك بي مهلة استاذة احلام وهبي

Quote: دي عمارة عباس محمود .. محلات سوجادو والحرمين .. بقالة الناس المرطبين البيجو عطبرة مغتربين ومرطبين ويتجدعو بعمم كبار بهناك يا طارق ميرغني

ابدا والله يا حيدر

الوكت داك كنت شغال في شركة الحبوب الزيتيه

يعني بحساب بسيط احسن من الاغتراب

ماما ناجية
مشتاقين
الشوق بحر
والف مبروك الحجة وربنا يتقبل منك
ولمن تجي السودان ما تنسينا لازم نشوفك
وتقبلي مودتنا واحتراماتي
الاماني الندية

لأخت احلام زكريات لازالت بالخاطر عطبره مرتع الصبا احيى هذة المدينة الصامدة واحيي كل حى وكل شارع

فيها والتحية لك وانت تعودين بنا الى ذلك الزمن الجميل

هل انت اخت حموده ومعاويه وهبى وعبد الهادى ؟
ودمت بخير

ابوختم
الأخ الحارث ابو ختم
تحياتي وسلامي
انا اخت عصام وهبي وعماد وهبي وبرضو الذكرتهم اخواني حموده ومعاوية وعبدالهادي قرايبي
ولهم التحية والتجلة
ولك الاحترام

اختنا احلام

انا لست من عطبره لكن زوجتي فوزيه بت النقابي العطبراوي هاشم السعيد من عطبره الفكي مدني

وكم قضيت فيها اجازات سنويه ممتعه

عطبره يمتاز شبابها بحب التعليم والثقافة والمسرح وكرة القدم والفول
الأخ العزيز طارق ميرغني
تحياتي وسلامي
كلامك صاح بس انت اعترفت بالثقافى ةالتعليم والمسرح وكرة القدم
صاحبك السني بس بعترف لينا بالفول والسمك
احتراماتي والأماني الندية
[

الأخت احلام تحياتنا النواضر والتجله لابناء عطبرة الكرام والأخوة د/ حمودة ومعاويه وعبد الهادى ترعرنا سويا بالحصاية شرق

وقد كانت لنا ذكريات جميله للغاية فى ذلك الزمن الجميل ورحم الله العم وهبى رحمة واسعة والتحيه للأخوة عصام وعماد وهبى

فقد نشات بالقرب منكم فى شارع كسلا مع الجيران ابناء المرحوم محمود رمضان احمد ومحمد والأخت عبله فى بيت آل حمرانى لك التحية

ابو ختم

استراحة مع وجبة سمك
ـ كنعد ـ

اختنا احلام

كنا طلبه بجامعة الخرطوم في المنتصف الثاني للسبعينيات وكان اصدقائي اكثرهم من اولاد عطبره فشكلنا جمعية الاداب والفنون وشارك قسم المسرح في اسبوع المسرح السوداني حينذاك وقدمنا مسرحية الانسان والظل وفزنا حينها بجميع الجوائز ما عدا النص لانه كان مسودن رغم اني كنت رئيس قسم الموسيقي الا انني شاركت في المسرحيه مسئول عن الاضاءه في مقطع يطفيء فيه بطل المسرحيه النور فاقوم بتعطيل الاضاءة بالمسرح

فقط هذا ما قمت به وبالمناسبة شاركت قبل ذلك في مسرحية هارون الرشيد بمدرسة الاميريه واحد ببحري ومثلت حينها دور ديك يعني العباسه اخت الرشيد تقول ان الصبح دخل فانا من خلف الكواليس اصيح كما يصيح الديك هههههههههههههه

اما صديقي محمد سني دفع الله فدعيناهم حينذاك في حوالي 1977 م لعرض قدمته فرقة الاصدقاء اقمناه في دار اتحاد طلاب جامعة الخرطوم جوار سينما النيل الازرق سابقا ومرة اخري دعيناهم لاقامة مسرح مفتوح

تحياتي لك وله

محمد ميرغني عبد الحميد
اخي في الذكريات العطبراوية
كل ما قلته كان يدور في عطبرة المدينة التي عبرها تم نقل الحضارة الى بقية الوطن
شكرا جزيلا لمرورك الكريم واصل حكاية عطبرة الجميلة ننتظرك
التحية والاحترام

بوست ممتع يا احلام .. ترجعى بالسلامة ..

صباحكم سعيد يا احلام وجموع العطبراب ..

صورة بكاميرا صديقة زارت عطبرة واهدتنا اللقطة دي :

ودي من خلال كاميرا صديق الماني زار عطبرة في منتصف التسعينات .. واعجبو اكتر شئ
سف الصعوط ولوكاندة نهر عطبرة ( الفاتحة على موقف بربر ) وعندو من داخلها صور كتيرة وصورة ضب عطبراوي خصوصي بجيب ليكم باقي الصور بعدين ..

ضب صاحبنا في باب لكوندة نهر عطبرة ..

قال عليهو ضب حنش شديد ( حنش باللغة الالمانية يعني ولا بيشتغل بيك ولا بيجري ويقطع ضنبو .. انتا تصور وهو يمطق لسانو ) لا بيجري ولا بيعرف الخوف زي العطبراب واحد

الأخ باسط المكي
التحيات والسلام
يا اخوي وينك قلت بترجع علينا والبوستات والصور متواصلة
والحكاية جايبة ليها ذكريات وتداعيات ظريفة وطريفة
لكن كلمة (0 فلنكة ))تكون بهدلت ناس كتيرة
احتراماتي

اختنا الرائعة عفاف الصادق
وينك يا جميلة
شكرا على المرور ومنتظرين مساهمتك وعطبرة الباهرة
تابعي معانا جولة كاميرا اخونا حيدر بهجة وفرحة
ولك التقدير واحتراماتي وامنياتي الندية

الأخت الفاضلة احلام ،

تابعت ذكرياتكم فى عطبرة بشغف .. بينما كنت أخال نفسى
فى تلك المدينة .. مدينة الحديد والنار كما كانوا يسمونها ..

وهذا يذكرنى بحادثة لن أنساها .. عندما سافرت من بورتسودان
الى عطبرة للجلوس لامتحان الثانوية العامة .. وإذ بالملاريا
تهاجمنى أثناء أيام الامتحانات .. الى الدرجة التى قال زملائى
لبعضهم البعض .. ماذا نفعل إن مات عاطف (ارنست) هنا ..
وأذكر بالخير ذاك الطبيب القبطى الذى كان يلازمنى طيلة
أيام الامتحانات .. وذلك نسبة لدرجة الحرارة العالية .. كانت
الملاريا تصحبها حمى خطيرة .. وكم .. وكم من الاشخاص
والزملاء الذين وقفوا بجانبى وقفة أخ لأخيه .. والرب يباركهم ..
لأننى لا أنسى ما فعلوه نحوى .. وكم كان شعورهم النبيل
يفيض بالحب والتحنن ..

وسؤالى يا أختى احلام .. هل مازال دكان حبيب بسطا
يزاول نشاطه .. أم .. كان ذلك فى التاريخ القديم .. ؟؟
أم استمر الأبناء فى العمل الذى بدأه أبوهم ؟؟؟

حقيقة .. أننى أعلم ان الأقباط قد ساهموا مساهمة كبيرة
فى شتى المجالات لانعاش تلك المدينة ..

واصلى .. وأيضاً كل الشكر للمتداخلين الذين أدلوا
بدلوهم لاثراء هذا البوست التاريخى ..

الرب معكم ويحافظ عليكم ..
أخوكم وعمكم العجوز
ارنست

الأخـــت الـكـريــمـة أحــلام وهـــبـى:

تـــحـيــاتـى

والله يــســـامـحــك إنــت وأخـــوى طـارق مــيــرغــنـى.

بـــوظـــتــو أعــصــابــنـا بــهــذا الـمـثــيــر الخــطــيـر

مــن ذكـــريـات الـســـمـك والـســـجــوك الــعـطــبــراوى.



وأنــا أقـــول يــاربــى الإبــداع بــتـاع أخـــوى ود الــســـنـى جــاى مــن ويـــن.

أهــا الليــلـة إنــعــرفــت.

كــتــر الله ألــف خـــيـركــم ودمـــتــم.

اخي بروف عبد الرحمن

خلي بالك صاحبي محمد سني يمزمز في السمك

ويهرينا في اوروبا والدول المتقدمه ...

لا حولالالالالالالا ,, إنتوا لابدين بى بوست زى دا براكم.
نسايم عطبرة الحلوة ,, وماتنسي الضواحى يا إحلام.
سلام على عطبرة ...
الأمل العطبراوى: الرائد الذى لايكذب اهله.
الشاطى: ود عمى على الفنان.
الهدف : عوض الحاج ـ شلوفة ـ كدارى ـ شعوطة.
الأمير العطبراوى : غاندى ـ كمال ريحان
الكوكب : عبدالكريم حماد(ابوديك) ـ رضوان مرسال ـ فاروق كوة تيه.
الوادى: غراب ـ الطيب سند.
والقائمة تطول.

عبد العزيز يا فاضلابي...

هااك البانطون دا :






ــــــــــــ
صورة من مشرع الفاضلاب بكاميرا العطبراوي هيثم سعيد الارباب

الكنارى الزين ولد الزين
سلامات ياخ وشكرا على الكونفرميشن بى هناك.
اكان ما اخاف الكضب فى سابق معرفة بينى
وبين الـ حمار اللى فى البنطون ده.

يالها من ايام رائعة قضيتها في عطبرة ...
ذكريات تمتد من ( حاج الريح ) الى محطة العامودين ...
بجيكم راجع ليها ( برواقة ) ...
شكرا احلام ...

ناس عطبرة الزينين.. صباحاتكم سعيدة..

على ذكر "السجق" في عطبرة..
جزارة "أبو طالب" رحمة الله عليه من أشهر الجزارات في عطبرة التي تعمل السجق.. لا زال أبناءه "مبارك" و"أزهري" يديرون الجزارة بنفس كفاءة والدهم.
وكذلك ناس "يوسف عازر" .. ديل كانوا بيعملوا سجق "خصوصي" يبيعونه في بيتهم بحي المربعات خلف "توتو كورة" ونادي "بوهين".

الأخوان حيدر الزين.. والفاضلابي..
طعباً "البانطون" إتغير وحل محله "كوبري" يؤدي إلى غرب عطبرة..

سلام

الاخ حيدر تحياتي العطبراوية
الاماكن تغيرت وتبدلت ولم يبقى سوى الذكريات
شكرا لصورك الجميلة ومزيد منلعطبرة الحلوة
تكريم السيد امين عبد المجيد من رابطة نهر عطبرة للأداب والفنون
له الرحمة والمغفرة

سؤال لكل ابناء عطبرة من هو ابو كدوك وبماذا اشتهر ؟

اللىى يجاوب صاح سينتقل للسؤال التالى لأنعاش الذاكرة

مع تحيات ابو ختم

سؤال لكل ابناء عطبرة من هو ابو كدوك وبماذا اشتهر ؟

اللىى يجاوب صاح سينتقل للسؤال التالى لأنعاش الذاكرة

مع تحيات ابو ختم

العم ارنست
ايها السوداني العجوز التحيات والاحترام
يااخي اليوم بكيت بكاء مر بكيت على الدكتور العالجك ايام الدراسة وهو دكتور العائلة طبعا دي ما حنكشة لكن
كان في عطبرة في ذالك الزمن انو الناس بكون عنهم دكتورهم الخاص وكان دكتور ( فيلبوس ) هو دكتور العائلة ودكتور معظم اهالي عطبرة لفنه وصبره الجميل
مات الدكتور فيلبوس في مطلع هذا العام له الرحمة في السماوات
ثانيا ذهبت استعيد صور الأخ حيدر وقلت اشوف الامكنة القديمة المرتبطة في دواخلنا باجمل الذكريات مشيت اشوف نادي التنس
ولقيتو بقى مكاتب لي وزارة الصحة تخيل السودان ابو مليون ميل مربع احولو فيهو اندية اتنس لي مكاتب
التحية للكابتن بشرى برسوم معلمي ومدربي للتنس هو والكابتن كمال كمبوني
اليوم عرفت انه مريض وسوف نزوره في الايام الجاية بأذن الله , والتحية للكابتن نببل رزق والكابتن محمد عبده معلميي في السباحة
عارف يا عم ارنست كان قبل ان نقتني مضرب للتنس كنا بنلعب بمضارب جدي ـ عابدين والد امي تخيل جدودنا كانوا بتاعين تنس وسباحة
واليوم تغير الحال ولمن اقتيننا مضرب لكل واحدة فينا من اخواتي وبنات خالتي كنا نطير من الفرحة وكانت الوال\دة تصمم وتخيط لنا ملابس الرياضة البيضاء لهم التحية والتقدير والاعزاز
ولك المودة النقية
وواصل معنا كمان الحارث عمل لينا مسابقة
بالمناسبة اختفى دكان حبيب باسطا وبقى مجرد ذكريات
السني بقول الدكاكين دي زمان كان بقولوا ليها ـ دكاكين المينا فاتورة وهي عبارة عن سوق مصغر
احتراماتي والاماني الندية

عطبرة
ـــــــــــ

إنبجستْ دومة الذهـد اليساري من بئر حصى
للقاطفـين الدوم والسعف ـ حُجّاجاً وعابرين ـ
بشارة غـبار. غـبارٌ أليفٌ يتنزّل في الليل كما
لو كان حلماً تبدّد شمس الصباح جميع فـصوله
فـيما عـدا الفـصل الأخير ــ تصاوير أحلام
النائمين مطبوعةً عـلى شراشف
خريفُ الدومة ـ أمطارٌ طاشة
صريرُ شتائها في خشب البيبان والشبابيك
جلاّبٌ لذرات حصى معبّدٍ لسكك تراب
الصيفُ ـ جالوصٌ فـوّار
يـنـفـيني في أماسي الصيف جالوصٌ فـوّار
كرسيّ خيزران ومنضدة ورواسب عـصير ليمون
وآبري أبيض و مذياع بآخر حي الحَصاية في
الثمانينات
السفـّاية سيّدةُ الصقـيعةِ قـدّام البيت
على اليسار القـريب ـ بقعة تشرّبت ـ حتى الشَـرَق ـ
بماء بلاّعة. تـتمرّغ عـلى البقعة أصواف خـلـّـفها
لسفـّاية الحيّ بعد أعـوام من ملاقاته لحتـفه مخنوقاً
بشوكة سمكة كـ لــب جيران. إلى البعيد جنينة مسوّرة
بطوب أخَضَر يرتـفع عـن الأرض بمقـدار متر،
أنفاسُ حصان و بقايا برسيم على عـربة كارو
لاشيء في يمين المذياع يستوقـف البصرـ فـيضٌ
من الرمل وتلٌ من الأوساخ وحصى زاحف في
كل الإتجاهات
من السماء ـ رمادُ دفـتر ِ سكة حديد رافـقـني من
القاش أضرمتُ فـي أشعاره نارُ اليأس عـندما
هاجر إلى قـرية في أقاصي الشمال خمار،
وبرهانيّة لم أتبحّر فـيها و أفـياءُ ماركـسيّةٍ
هـداني إليها شاعرٌ وشقـيق خرج من بيت
أهـله في حي الإمتداد الشرقي ولم يعد بعدها
للحياة وحاضرون
يختـلـط رماد الدفـتر بالحصى الهائم عـلى
وجهه محاصراً ملعب كرة قـدم وصفـوفاً
من الطندب والحسكـنيت تلازم سكة حديد
عـطبرة ـ هـيا. فـيما وراء السكة مطموساً في
ظلمةٍ سخرية الأحياء القـريبة منه ـ خليوة،
الحصاية والإمتداد الشرقي ـ هـيكلُ حيّ المطار
تتداخل برامج ال BBC بثرثرة عابرين
وصرخات مبهمة نسبتها في حيرتي لأنسام
نيلية منعتها من الوصول لجامع الحصاية
ـ لتتوزّع من هـناك بالتساوي على البيوت
القـريبة من المئذنة فـمحطة رمزي وبيرم
حتى بدايات السوق الكبير ـ حيشان حي
الموردة

بتأخر الوقـت ينقـطع نباح الطوب الأخضر
في سور جنينة الجيران و أنفاس الحصان
وعلكة البرسيم، وثورة الدخان في تـل أوساخ
و زخّات رماد متساقط من دفـتر سكة حديد
و كانون سماء فـيتوقـف المذياع عن البث
ينام الحصى فـتنام الحصاية لينفـتح أمام
الغائب باب العودة للفـراش المهيأ
يا دومةً في جفان ِ رمل ٍ و حصى

عثمان محمد صالح

************************************************************************
الأخت أحلام والعطبراويين وعشاق عطبرة

سلام

أعلاه مشاركة من كتابات ولدنا الفنان وقريبنا(اوسمان مهمد ساله)

نتمنى له كل الخير ، ونحن من عشاق عطبرة لنا فيها أهل وحقيقة لمن كتبتي ( دكان حبيب باسطا) كان إعتقادي أنه دكان حلواني ، وأهلنا في سوق عطبرة مختصين بالباسطا وأشهرهم المرحوم الحاج عبد الفتاح ( صاحب حلواني الوادي) وأيضاً قريبنا حسن خليلون حيث ضاحية المقرن مقر سكنهم الحالي .
ونذكر في السودنة قريبنا الباشمهندس محمد عبد العال رحمه الله ،

Quote: سؤال لكل ابناء عطبرة من هو ابو كدوك وبماذا اشتهر ؟ اللىى يجاوب صاح سينتقل للسؤال التالى لأنعاش الذاكرة مع تحيات ابو ختم

ســــــلآم طوووول شارع السِلِك لأهلنا ناس عطبرة.
هههههههههههههه،
بالغت يالحارث يا أخي مساميرن قددن
كرعينا عددديل كده.

بتعرف الحارث بتاع التسالي؟؟؟

Quote: سؤال لكل ابناء عطبرة من هو ابو كدوك وبماذا اشتهر ؟ اللىى يجاوب صاح سينتقل للسؤال التالى لأنعاش الذاكرة مع تحيات ابو ختم

عندنا واحد كان بيلعب في فلاح كنور .. اسمو عبود ابو العايلة ..
قدر ما فتشو ليهو ( بوما ) تجي مقاسو ما لقو..

آخر شئ اتوكل علي الله وبمسامير النقلتية ابكدود نجدو ..
الا البسويهو ابكدوك في الجلد بيلقوهو لعيبة فريق الدار والجيل من ابوالعايلة في كرعيهم ..

ــــــــــ
انا غايتو مازي قريبي ود المدير دا باتا كنت بطلع منها - بكبك قماش ظهري مجييه - واتفكّ من المشية لابكدوك

Quote: انا غايتو مازي قريبي ود المدير دا باتا كنت بطلع منها - بكبك قماش ظهري مجييه - واتفكّ من المشية لابكدوك

ههههههههههههه،
ود الزين يا قريبي،
غراب كان طبعاً لآعب بارع جداً، وتمّ إختياروا للفريق القومي.
ناس فريق الوادي جابولوا كدارة أديداس جديدة لنج زمن الأديداس دي
في الدعايات ما بنشوفا، تصدق غلبوا يلعب بيها، ووحاتك لمان لبسها
المشي في الوآطة غلبوا ورجع طوالي لإنتاج ابكدوك أصلي بلآدوا.
شفت ناس أتبرا ديل بيريدوا اتبرا كيف!!! لدرجة إنهم المانيا زاتها
عندهم فيها رأي...

ياسلام على هذا البوست الرائع يااحلام
كنا ننتظر الاجازة المدرسية بفارغ الصبر لنسافر من الخرطوم لعطبرة لنقضي جزء من الاجازة فيها مع ابناء عمي (على جبريل )صاحب محلات جبريل للعماري فى سوق عطبرة
وكنا نستمتع جدا بقضاء الاجازة مابين اللعب بالعجلات والذهاب لمزرعة عمنا فى العكد حيث الخضرة والماء والهواء الطلق والطلوع والنزول بالعجلات من منزله فى الحصايا محطة بيرم والى السوق
واذكر انه كان يجاور محل العم على دكان الحنتبلي وكان ذاخرا بكافة الاصناف حتى انه كان يتفوق على محلات العدني فى الخرطوم وكذلك لن ننسي مكتبة الحنتبلي ودكان احمد وعلى وعبداللطيف العجلاتي
ولا انسي ايضا كان بجواره اشهر محل للتسالى وهومحل الحارث فى نفس الشارع
والسينما الوطنية وافلامها المثيرة
وعطبرة فعلا حكاية تحتاج لمجلدات

لما تلاقى زول من ناس عطبره من وسط مجموعة من الناس تستطيع تمييزه دون غيره وده لانه اهل عطبره عندهم صفات وشييم لصيقة بيهم دون غيرهم فى باقى المدن فالحاجات الاتشبعت بيها المدينةآنذاك القت بظلالها على اجيالهافصارت تنضح علما وثقافة وتلاقى الاجيال اجتماعياوروحيا ورياضياجعل الرابط بينهم تميزه سحنة الطيبة والبساطة والوعى التام.....اليوم طوفت بمخيلتى كل احياء عطبره او بعضها .......غادرتها منذ مدة ولم اعد الا متقطعه وحتى هذه المتقطعه لم تعد.. فشكرااحلام للدعوة الكريمة ...شكرا لكل من يتحفنا بالزكريات الجميلة لتلك المدينة العصامية بلد الحديد والنار كما يحلو للبعض تسميتها

الأستاذة والأخت احلام ،

الشكر وكل الشكر لردك الكريم .. والذى أقتبسه كما يلى :

Quote: العم ارنست ايها السوداني العجوز التحيات والاحترام يااخي اليوم بكيت بكاء مر بكيت على الدكتور العالجك ايام الدراسة وهو دكتور العائلة طبعا دي ما حنكشة لكن كان في عطبرة في ذالك الزمن انو الناس بكون عنهم دكتورهم الخاص وكان دكتور ( فيلبوس ) هو دكتور العائلة ودكتور معظم اهالي عطبرة لفنه وصبره الجميل مات الدكتور فيلبوس في مطلع هذا العام له الرحمة في السماوات ثانيا ذهبت استعيد صور الأخ حيدر وقلت اشوف الامكنة القديمة المرتبطة في دواخلنا باجمل الذكريات مشيت اشوف نادي التنس ولقيتو بقى مكاتب لي وزارة الصحة تخيل السودان ابو مليون ميل مربع احولو فيهو اندية اتنس لي مكاتب التحية للكابتن بشرى برسوم معلمي ومدربي للتنس هو والكابتن كمال كمبوني اليوم عرفت انه مريض وسوف نزوره في الايام الجاية بأذن الله , والتحية للكابتن نببل رزق والكابتن محمد عبده معلميي في السباحة عارف يا عم ارنست كان قبل ان نقتني مضرب للتنس كنا بنلعب بمضارب جدي ـ عابدين والد امي تخيل جدودنا كانوا بتاعين تنس وسباحة واليوم تغير الحال ولمن اقتيننا مضرب لكل واحدة فينا من اخواتي وبنات خالتي كنا نطير من الفرحة وكانت الوال\دة تصمم وتخيط لنا ملابس الرياضة البيضاء لهم التحية والتقدير والاعزاز ولك المودة النقية وواصل معنا كمان الحارث عمل لينا مسابقة بالمناسبة اختفى دكان حبيب باسطا وبقى مجرد ذكريات السني بقول الدكاكين دي زمان كان بقولوا ليها ـ دكاكين المينا فاتورة وهي عبارة عن سوق مصغر احتراماتي والاماني الندية

+++
حقيقة يا أختى احلام .. هو الدكتور فيلبس .. والعجيب أنك تذكرت اسمه على الفور ..
وأنا للأسف .. كان اسمه على طرف لسانى .. أو بمعنى آخر لم تسعفنى الذاكرة
لتذكره اثناء كتابة المداخلة .. بالفعل كان طبيباً خلوقاً .. صدقينى كان يأتى الى لجنة
الامتحان كل يوم ..
أنا آسف يا أختاه لتقليب المواجع لجعلك تذرفين الدمع .. ولكن إن دل هذا ..
فانما يدل على شخصك الحنون .. العطوف .. الحساس ..
وهنا .. أقول لكم البركة فيكم ..وهذه حال الدنيا ..
.. عجيب هو الانسان .. الذى يعيش على الأرض مؤقتاً .. فليتنا نتعظ ..
وعجيب هو الله الخالق .. فى توقيتاته .. متى يولد الانسان ومتى تنتقل
نفس ذلك الانسان بعينه ..
بالصدفة قد تذكرنا هذا الطبيب الجميل .. وصادفت الصدفة .. أن يكون
موعد انتقاله .. فى هذه الفترة الحالية .. وفى هذه الأيام القليلة الماضية ..
ألا رحم الله دكتور فيلبس .. الطبيب المحبوب و المعروف فى عطبرة ..
فليرحمة الله رحمة واسعة ويلهم أهله واصدقاءه الصبر والسلوان ..

وشكراً أختى احلام .. والرب يبارك حياتك .. ويجعلك دائماً تجترين
الذكريات الجميلة لسوداننا الحبيب .. أقول الذكريات القديمة ..
لأننى أشك .. بأن أمثال تلك الذكريات ستعود مرة أخرى فى يوم من الأيام ..

مرة أخرى لك منى أسمى كلمات الحب والتقدير والعرفان بالجميل ..
.. الرب يباركك ..
عمك العجوز ..
ارنست

Quote: حقيقة يا أختى احلام .. هو الدكتور فيلبس .. والعجيب أنك تذكرت اسمه على الفور .. وأنا للأسف .. كان اسمه على طرف لسانى .. أو بمعنى آخر لم تسعفنى الذاكرة لتذكره اثناء كتابة المداخلة .. بالفعل كان طبيباً خلوقاً .. صدقينى كان يأتى الى لجنة الامتحان كل يوم ..

ياجماعة معليييش.. دقيقة
عندي كلام .. انتو بتقصدو الدكتور الخلوق - فليبس مرقص محروس - العيادتو في شارع الاطباء قريب من ميدان المولد؟؟؟؟
هذا الطبيب القبطي الخلوق ..!!

لو هو والا ماهو لكن - وقسم بالله - كنت جيت يوم عيادتو مع الوالد وانا في المتوسطة طاقني ملاريا - بالظن وبالع كينين - لي رب السماء ابوي - الله يديهو الصحة والعافية - كان ما عندو دكتور في راسو
غير فليبس مرقص محروس .. ضرسك واجعك .. فلبس مرقص محروس .. عندك وجع اضان .. فليبس مرقص محروس..نظرك ضعيف .. فلبس مرقص محروس..كراعك انكسرت .. فليبس مرقص محروس .. عندك صلعة .. فليبس مرقص محروس ..
وللأمانة اتذكر قبل كم سنة ذهبت لعيادته بعد التخرج قريت لافتتو متخصص باطنية لكنه ملم بكل ضروب العلم الطبي وبيوجهك .. تجيهو محتاج لحاجة هو ما اخصائي فيها فبيقول ليك امشي لدكتور ( فلان ) دا احسن زول بيعالجك.. كان ثقة.. وعرفت ليه ابوي بيحب يمشي عندو لانه لو ما عالجو بيكون دلاهو على احسن زول ممكن يعالجو في عطبرة...
لو بتتكلمو عنه حقيقة ستخنقني العبرة لو مات

اذكر موقف معه وانا ممكون ملاريا السنين - زي ما ظنو - مشيت مع الوالد وعمتي والوالدة... جينا العيادة بتاعت فليبس وكان زمن العمل انتهي
فحصني الدكتور وقال لي انتا هسع تمام بديك حبوب هسسع لكن يلزمك فحوصات - ونق مع ابوي شوية - ابوي قال ليهو يازول والله ما بنقدر نجيك بكرة
هسسع جايين من كنور بتاكسي بعشرين جنيه وبكرة ما بقدر اجيبو بالمبلغ دا .. دحن خلص شغلك هسسع

يمين بالله دكتور فليبس قال ليهو .. يازول ما تخاف مافي حاجة خطيرة بكرة تعال وكشفك مجاني
ونادي البت القاعدة في الطربيزة برة بتستلم الكشف وتنده النمر قال ليها :
رجعي ليهو قروشو بتاعت الكشف..
ثم دخل يدو في جيبو رجع ليهو العشرين جنيه بتاعت التاكسي وعليها عشرين تاني بتاعت تاكسي بكرة
وقال ليهو هسسع امشي اصرف الروشتة دي.. وبكرة جيبو لي الولد دا .. الولد ماعندو ملاريا .. المشكلة تانية بس لغاية بكرة ما ياكل ملح لا زيت لا طبيخ..
ما تهمل الموضوع شيل الكلام دا وبكرة وقت تجي وقت ما تصل تخش على اول زول

جيت وطلعت بالفحص ما عندي ملاريا.. عندي صُفيّير وضعف دم
لكن قصة موقفو دا للآن مستغرب فيها
لانو حسب ما عرفت اتكرر مع ناس كتيرين جداً جداً
ـــــــــ
ربي يجازيهو بقدر ما كان انساني ورجل خيري

دكتور فليبس مرقص محروس كما اذكره

نحييل .. ملامح وجهه دقيقة ..
اهم شئ لاحظته - بعد زيارات متعددة لعيادته - دوماً يرتدي قميص ابيض .. لا يشُك قميصه جيداً بالبنطلون - ولا يرتديه بحزام
طيب اول كلمة يقولها ليك يا - ابني -
وجهه نحيف .. دائماص لا يهتم بحلاقة شعره المشوب سوداه ببياض ..

ـــــــــ
رجل لو كنا نعلم يستحق رمز تمثالي في ميدان المولد .. ليس لموقفي لكن موقف الكثيرين من البسطاء اللذين قد لا يعلمون بوستك هذا ولا ماهو الانترنت
سمعت عن مرضي كان بيحجز ليهم باكاسي من نهر اتبرا عشان يجوهو .. وناس من السلمة جوو بحافلة وكانو جل زبائن عيادتو يوماً وكلهم بالمجان وحساب الحافلة عليهو

له التجلة والاحترام والمغفرة بالاعالي ..رجل ابكي الآن واتذكر فعايله

لذكرى
الطبيب الرائع والأنسان النبيل
فيلبُس ...
المجد والخلود

الأخوة ابناء عطبرة الأماجد الفائز ود المدير بالأجابة الصحيحه والحارث بتاع التسالى احد اعلام المدينه توفى باكرا رغم انه مامن احد ذهب للأستاد او السينما دون التزود بقرطاس رائع من التسالى المملح لى الرحمة والمغفره
وفعلا العم ميرغنى ابو كدوك وابنة فتحى الذى كان يساعدة

فى خياطة الكدارات للأعبين الجدد الا رحم الله عمنا ابو كدوك فقد كان علما من اعلام تلكم المدينة الصامدة

ننتقل للسؤال الثانى

لاعب لم يكن من ابناء عطبرة تميز بتشكيل ثنائى رائع مع اميز ابناء عطبرة فى ذلك الزمن واحرز معهم انتصارات رائعة\

وعشقه ابناء عطبرة كلهم و فى اميز احيائها غم انه لم يكن من ابنائها فمن هو ؟

مع تحيات ابو ختم

صبحكم الله بالخير...بالله اللحظة الفتحت البوست اسمع ليك البلابل يصدحن باغنيتهم الرائعة.
نسايم عطبره الحلوه تهدينا وترسينا
نقابل فيها ناااااس طيبببببببن ... ويالها من صدفة فى هذا الصباح

إهـداء للأخت إحلآم وهبي وجميع المشاركين والزوار، مع تحياتي.

عــــطــــبــــرة...

يا غالية ريدك في مسارب
روحي إسرّب سرى
ومازج دمايَ معاها
في الشريان جرى
ما إنت يا حبي الكبير
داخل قليبي محكرا
وبلاك ما بطيق الحياة
تصبح رِويحتي معكّرا
يا حلوة يا مصدر غُناي
وشموخي وأكبر مفخرا
من جوف مشاعري الهايمة بيك
بهديك حروفي معطرا
وأنا ما نسيتك لحظة
شان أطراك يوم يا عطبرة
سيالة يا مرتع صِباى
أوتار غُناي
ينبوع سعادتي ومصدرا
أنا ببدا مِنّك شوط طوافي
على المدينة وبندرا
بطرا الجزيرة نواوي
كيف زمن التسآب
النيل حواها وحاصرا
والعارفين ناس ود نواوي
أهل العِلِم
ورثوا الصلاح من الورى
الداخلة في جوارهم أمان
روعة وحنان
ما أحلى ناسها ومنظرا
السكة الحديد والسودنة
آيات جمال، وكرم خِصال
جلّ البرا
في حِلة الصاج
الكنيسة ومدرسة
ودار الرياضة وجمهرة
في القيقر السوق القديم
والمدفعيّة وعسكرا
حوش المخازن والوِرش
ومبنى العموم
آيات فخار ما أظهرا
في ساحة المولد
فرح في كل عآم
بمولد النور السرى
الجامع الكبير وشارع السلك
وللهندسة كلية فيك ما أشهرا
وبين أُمبكول والسوق دوام
أجمل حديث ومناظره
الأتبراوي مع الطليح
والقلعة نورا وجوهرا
بيهدي الحصايا أجمل غرام
وبنورو دايماً يجهرا
ليك يالغُريبة مكانة
في داخل قلوبنا مسطّرا
ومين فينا بس مدني الفكي
يا أهلنا ما بيذكرا
يا إمتدادنا الشرقي فيك
أطياف جمال
تسري الخيال ما أكثرا
منسابة من حي المطار
وفيض الشمالي
معينا دافق ومصدرا
وحِلة الصنفور بتفتح
للقطر هيمان جرى
إنت يا قلعة نضالنا
فيك حي عُمال مفخرة
في عمومك بنهى الطواف
والجمال والذوق حاصرا
ليك خليوة منارة ثقافة
فيض فنون ومآذرا
بشبابها وبرحابها
تعلو بيك فوق الثرى
فيك قضيت أحلى السنين
ليها طاري وبذكرا
وكيف كان لياليك الحُنان
العطبراوي بيسكرا!
يشجيها بالنغم الطروّب
بريدو هايمة مخدّرا
أعلام شموخك عآلية
فوقك وآضحة
للبيك مادرا
المحطة رصيفها وناظِرا
النقابة عرين أُسد الشرا
الوِرش وعيون ساهرا
حاج الريّح والمُلتقى
العمارة ورفعة مِنبرا
وكُبري للحُريّة إنبرا
الجبابرة رقابهم كسرا
النضال سيرتك طهرا
بالحديد والنار سطرا
وفي سِجِل تاريخك حكرا
وأنا ما نسيك لحظة
شآن أطرآك يوم يا اتبرا...

ود المدير...

الـسـيـآلـة...

Quote: الحارث بتاع التسالى احد اعلام المدينه توفى باكرا رغم انه مامن احد ذهب للأستاد او السينما دون التزود بقرطاس رائع من التسالى المملح لى الرحمة والمغفره

نسأل الله له الرحمة والمغفرة.
تسالي الحارث كان من الأشياء التي تميزت بها أتبرا.
يعني تدي منوا خمشة لوآحد في مدني يقوليك دا تسالي
الحارث بتاع عطبرة، زيّو زي باسطة عبد الفتاح،
وصعوط قنديل، وزبادي ود البيه...

Quote: لاعب لم يكن من ابناء عطبرة تميز بتشكيل ثنائى رائع مع اميز ابناء عطبرة فى ذلك الزمن واحرز معهم انتصارات رائعة\ وعشقه ابناء عطبرة كلهم و فى اميز احيائها غم انه لم يكن من ابنائها فمن هو

سلآم يا ابو ختم.
غايتو اللآعب دا انا ما عارف المدينة الجا منها، لكن يبدو أنّ السبب الذي أتى به
لمدينة عطبرة هو ظروف العمل، وأظن انه كان أحد ضباط المدفعية عطبرة.
غايتو حكاية ضابط دي متأكد منها، اما المدفعية فلا. الضابط دا أثرى ميادين
عطبرة، وكان لآعب ذو مهارات عالية، وكان مشهوا بأنه دائماً بيلبس سروال
تحت الركبة، ومن المباريات التي لا تزال عالقة بذهني مباراة فريقه ضد فريق
الأمل الذي إشتهر مشجعيه بالتشجيع الجميل الحماسي المصحوب بالمزيكا.
أحرز فريق الأمل إصابة، وراح مشجعيه يغنوا في محاولة لإغاظة هذا
الضابط مرددين:
الضابط ابسروآل أنا يا ليلي
يلعب مع العيال أنا يا ليلي
فما كان من هذا الضابط إلآ ان قام بصحبة عوض الحاج الذي كان زميله في تشكيلة
أخطر ثنائي في عطبرة ببهدلة فريق الأمل وهزيمته هزيمة أخرست السنة
مشجعيه.
الضابط يالحارث إسمو شاكر، وكان يمثل ثنائي خطير مع اللآعب المميز الفنان
عوض الحاج في فريق الهدف، وكان ناس عطبرة يسموهم كتالين الكـلآب.
واظن حارس مرمى الأمل في تلك المبارآة كان جوهرة، وكانت آخر مبارآة
له مع فريق الأمل.
عليك الله كلآمي مُو صُح؟؟؟

سمحونة ازيك
صورة حاجة فاطمة عبدين منورة البورد
دكان حبيب باسطا اشترينا منو التلاجة الكولدير سنة واحد وسبعون ولي الليلة شغالة تش
دة حسب افادة الوالد

الأخ الزبير صالح الزبير
التحيات والاحترام
تسلم وربنا يدي الوالد الصحة والعافية ويخلي ليكم تلاجتكم المن زمن حبيب باسطا
الصورة للوالدة الحبيبة( فائزة) .. فايزة عابدين وفاطمة خالتي (تاتا) كما نحب ان ننادي كل فاطمة بخير وتهديك السلام
ربنا يخلي لينا كبارنا ويحميهم ويغطيهم
احتراماتي

البروفسير عبدالرحمن ابراهيم محمد
التحيات الطيبات
ليك السلام
كنا منتظرينك وكنت موعود بالسجك والسمك والفول المنزلي
لكن ما تشيل هم صاحبك السني طباخ وشيف محترف ، وكل طبق بعملو عندو ليهو اسم
يعني عندو سـلطة حلفا وسلطة امدرمان
وعندو فول مصلح على طريقة ملك الفول مدني وده بسميه ( مدناوي )
والصواني من البازنجان لي صينية البطاطس يعني ما بتجيك عوجة ، وبحب الأكل يعمل فيهو الوان يعني السلطة بشكلها من كل نوع ولون
وقال لي السني انو صاحبك طارق ميرغني عازف ساكسفون اول وانت ابو التاريخ والسني عاشق الموسيقى والتاريخ والتشكيل
يعني تتلموا في حتة واحدة ..
مافي زول يلقى معاكم فرقة
تتلموا في الخير

ان سرد ذكريات الطفولة تكاد تكون مشابهة رغم اختلاف المدن





يالها من ذكريات جميلة وممتعة




والتحية لأهل عطبره

واصلي سردك


أبومصطفى

ابناء عطبرة الحلوين والله تحلو الونسة معاكم الله يحفظكم جميعا والتحية الى ود المدير الفائز معنا برحله الى عطبرة

على متن المحلى يوم الخميس القادم وفعلا اللاعب هو شاكر وقد كان ضابط فى الجيش ولعب وابدع مع لاعب ام بكول والهدف

الرائع قريبى عوض الحاج وداعة له ولكم التحية

اغنية لفنان الشباب فى ذلك الوقت وفنان الأحلام مصطفى مضوى يستهل بها حفلاته عشقها ابناء عطبرة وما ان يجن الليل وتسمعها

حتى لو كنت فى منزلك تسارع لسماعها على الفور وفيها رمز للعروس لذلك يبتدىء بها وصلته الغنائية

غايتوا ياود المدير لو جاوبت دى قد تكون من نفس جيل اخوك ابو ختم حيث كان الشباب فى ذلك الوقت وخاصة ابناء عطبرة ميولهم

واهواءهم تتشابة الى حد كبير مع تحياتى الى جميع ابناء وبنات عطبرة ام دالات .

ابو ختم

الاخ عبد العزيز الفاضلابي
لك التحيات الطيبة
والسلام
طيب وقت ذكرت لينا اللعيبة الزمان
انا خالي عليه رحمة الله ورضوانه
كان احمد عابدين ( حكومة ) واللقب ده جاهو من الكورة
كان بلعب في ياتو فريق وحدثنا عنو لو عندك معلومات رياضية
تكون بريتنا بتاريخو
اصلوا اخونا الحارث فتح لينا درب للمسابقات
لك تحياتي والضواحي ما ناسنها لكن كل حتة بنجيها بالرواقة
احتراماتي

الخ عوض عكاشة
التحيات والسلام منتظرين رجعتك
شكرا للمرور الطيب
احتراماتي

احلام تحياتي وتقديري
غلطة اسم الوالدة دي غلط نادية ما مني بقت نساية من غلبة الشفع
لو في طريقة صور للرست هاوس اصل المكان دة عندو ذكريات حلوة عندي

يا جماعة النجدة
كل ما انزل اغنية قطار الشوق
ما راضية تنزل معاي
خبير اجنبي يساعدنا
مودتي

الأخ مبارك السروجي
المطاعم كتيرة والبقالات متعددة وعمارة سوجابو
لكن لايوجد افضل من اكل البيت
واصل ورينا الفروقات في المقاهي والمطاعم العطبراوية
احتراماتي

سلامات يا عطبراوية
صور البنطون دي خلاس إنتهت بعد الكبري

هسي محلها بقت قعدة فوق للشاي و القهوة
و مكان البنطون زي البكاء علي الأطلال.

سلامات احلام وهبي .. والتحية للسني الشيف ههههه ( عارفة انا احب اطبخ ولا آكل من مطعم )

عندي اغنية قطار الشوق بصوت البلابل..
وبصوت حسين شندي والامين البنا ( للامانة حسين شندي ساطها وخربها خراب السنين ) ما حبيتها منو
وتسجيل قديييييم جداً للذكار ( بتعرفيهو) مبدع خليوة والمحطة الشهيرة باسمه لو ركبتي باصات خليوة
المساعد يكورك
الزكار الزكاار .. في نازل

بابكر الذكار راجل تحفة وليهو طرايف عديدة
اخونا الاستاذ محمد ميرغني - ود عطبرة - ليهو مقابلات عديدة مع مبدعي عطبرة واهل الشهرة فيها
نشر مقابلة حصرية ليهو مع بابكر الذكار ونشرها في عطبرة نت
www.atbara.net
حا اكلمو بالاذن وبعدين انشرها هنا
ولينا موضوع طويل عرريض مع الرشيد مهدي بقلم هيثم سعيد الارباب..
ومع جوقة
ومع بتاع المقولة الشهيرة ( مااا بالسمنة وكدة ) بمحطة قطاار عطبرة
وغيرها

بجيك بيها راجع بعد ادق لاصحابها وياذنو لي


ــــــــ
اما اغنية قطار الشوق كنت قايل نفسي شفت .. بكري غير وبدل في موقعو وانا قعدت سااي

** يا اهل المعرفة ورونا كيفية ادراج فيديو من اليوتوب وادراج ملف صوتي

بقينا نتفرج بس


*** قاتلك الله يا تمبس يعني مستكثر فينا المعرفة يا وغد

الأخت احلام السلام عليكم ورحمة الله

ارجو ان لااكون قد انحرفت بمسار البوست الرائع والهدف هو فقط لأثراء البوست والتشويق فقط لااكثر وان كنا قد اثقلنا عليك

فسوف ننسحب على الفور ونترك البوست فى المسار الذى تريدينه فالغرض هو التشويق وانعاش الذاكرة بزكريات مدينتنا الرائعه

ولك التحيه

ابو ختم

نيابة عن احلام وهبي لغاية ما تجي ..

Quote: ارجو ان لااكون قد انحرفت بمسار البوست الرائع والهدف هو فقط لأثراء البوست والتشويق فقط لااكثر وان كنا قد اثقلنا عليك فسوف ننسحب على الفور ونترك البوست فى المسار الذى تريدينه فالغرض هو التشويق وانعاش الذاكرة بزكريات مدينتنا الرائعه

سجمممممي ..
حرفتو كيف يا ختم .. ما تراهو البوست ماشي كويس وات جبت حاجات جميلة وذكرتا اسماء عظيمة في عطبرة
انتا قايل يا ختم اني نسيت ارد عليك..
لا لا والله يا ود امي .. يخربني ويحرق سريري بالنار لو قاصدة .. بس ماشة بالدور للمشاركين

انا هسسع في اتبرا.. يعني النت في تلتلة .. وساعة زيين من الجوال بالفيين جنيه
اخت الف فوق الف بعدين اشوف الحاصل

** عليك الله يا ختم هسسع انا لو بت نجييضة مش كنت جبت كاميرا من قطر - حتي لو ا\لسني بطل روبيان لي اسبوع بس - وبدل كدة انزل ليكم صور طازة من عطبرة لاني قاعدة فيها هسسع
علا لقافتي دي ما بخليها .. ريت من قطر وجيت عطبرة والكاميرا ما شلتها

دحين يا ختم واصل اسئلتك كلامك سمح

ــــــــــالملقوف حيدر الزين بلسان الملقوفة احلام وهبي هههههه

سلام يا احلام

Quote: يا جماعة النجدة كل ما انزل اغنية قطار الشوق ما راضية تنزل معاي خبير اجنبي يساعدنا مودتي

ياخي حاضريييييييييييييين....

بس...

شيلي الصبر

هاروناسلاميييي الكتيييير ليك
وبالله بسرعة نزل الاغنية

وحلي بالك من صاحبك

الاخ فيصل نوبي
تحياتي
لكن الكبري ما رهيييب
وريح الناس كتير

الاخ ابوختم... تحياتي
يااخ البوست بوستيك وحرفو زي ما عايز
وانت جبتة لينا حاجات جميلة

ودالزين يا زين ....
شوفتةالسني شيف خطير لكن المطبخ بكون حالتو عجيبة كأنو كان في حرب في المطبخ
وبرضو من الكلمات المشهورة في عطبرة كلمة بطول وتاخد مدة
وبعدين البوست دة بتاعك . والنت في عطبرة بطئ وغالي .
وانشالله لما ارجع لازم انت والمدام تشرفونا


مع تحيات الملقوفة احلام وهبي
الي الملقوف ود الزين الزين

Quote: من الكلمات المشهورة في عطبرة كلمة بطول وتاخد مدة

يا إحلآم قصة بطوّل دي أصلوا قالوا عمر البشير مشى عطبرة،
والناس طالبوهو بالكهرباء، فقام قال ليهم: بنجيبها ليكم لكن
بطوّل. والناس مسكوا فيها من باب السخرية، والإستهذا...
بالله العبارة دي لهسع شغالة؟؟؟

Quote: يا إحلآم قصة بطوّل دي أصلوا قالوا عمر البشير مشى عطبرة، والناس طالبوهو بالكهرباء، فقام قال ليهم: بنجيبها ليكم لكن بطوّل. والناس مسكوا فيها من باب السخرية، والإستهذا... بالله العبارة دي لهسع شغالة؟؟؟

لا
اعتقد ياا قريبي ود المدير القصة دي حصلت في بيوت البنك العقاري جنب الطليح وشرق الامتداد الشرقي وقت جاء يفتتحها المرحوم الزبير نائب الرئيس..
وفيها كان ابوي مستلم تركيب كواليين الابواب للمشروع دا بعد احالوهو للصالح العام فقام الزبير قال .. :
الكهرباء بتجيكم يا ناس عطبرة ( دا بعد قطعت زي اربعة سنة كدة ) قام ابوي قال ليهو تجي كيف وانتو بتجلدو في الدنما ركيين عشان سكرو .. دي تشموها قدحة
قام الزبير ناداهو ... وقال ليهو قصدك المقدم عبد الكريم دا بيعمل غلط؟؟
ابوي قال ليهو غلطو اكبر من فقرتك دي الما بيشيلها السيف..
الزبير قال ليهو تعال اخالييك.. وعضاهوفي اضانو لمن ورمت بعدها قال :
يا ناس عطبرة .. انسوو الشيوعية ديل .. الكهرباء جايياكم جاييكم بس بتطول وتاخد مدة ..


ـــــــــــ
وبقت مقولة الزبير مثل ولغاية هسسع طولنا واخدنا مدة ههههههه

Quote: ابوي قال ليهو غلطو اكبر من فقرتك دي الما بيشيلها السيف.. الزبير قال ليهو تعال اخالييك.. وعضاهوفي اضانو لمن ورمت بعدها قال : يا ناس عطبرة .. انسوو الشيوعية ديل .. الكهرباء جايياكم جاييكم بس بتطول وتاخد مدة ..

ههههههههههههههههه،
مشكور يا قريبي علي تصحيح المعلومة، غايتو إنتو يا أهلنا
الكنارة يوم بتكتلولكم زول.
والله صحي...

ولياب قريبي
العزيز
شكرا على المشاركة الراقية والشعر الجميل
وعطبرة كل يوم ينكتبها جمال وسماح
وعطبرة خير الدنيا فيها من بساطة الناس
لك احتراماتي
وتعال ومعاك الذكريات

الأخ معاوية محمد الحسن
االتحيات وايامكم اعياد شايفاكم الايام دي الأستاذ عادل التجاني عمل منتدى جديد
اماسي الدوحة مشتاقين لي المنتديات وايام الجمع المبهجة
شكرا ليك ومنتظرين الذكريات الخاصة بيك وعطبرة
تحياتي للدوحة

اختي العزيزة المندسية ابتهاج
منتظرينك والدعوة مفتوحة
قسما عندنا جنس ونسة
وشاي وقهوة مظبوطة
تعالي تجدينا فرحانين بيك
ما تنزلوا لينا اغنية قطار الشوق
يا هارونا
ولا تطول وتاخد ليها مده

اخونا الحارث ابو ختم
ما قلنا ليك البوست ده حقك وانت سيدو
اظهر وبان عليك الامان
مزيد من المعلومات والمسابقات والصور الجميلة لست المداين عطبرة
مع الاماني الندية
احتراماتي

الأخت احلام وهبى شكرا كتير وكما تعلمين عطبرة دائما فى الخاطر وكل ابنائها وبناتها اخوة اعزاء لنا مع التحيى للأخ حيدر الزين

وانت ماملقوف وحاشاك اللقافه ياخ ولك شكرى

وللأخ ود المدير والأخوة المتابعين لم يجب احد على سؤالنا السابق لذا فسوف احجل السؤال لوحدى فالأغنية المقصودة هى

جات تبارك عيده راسمه حته فى ايدة للفنان المبدع مصطفى مضوى

ننتقل لسؤال آخر يركب عجله بدون رفارف ويقلد على حد قوله اولاد الخرطوم فى ركوب العجلات يضحك له الكثيرون ويهابه آخرون

لأشاعات تحوم حوله سمعت انه قد توفى منذ فترة طويله فمن هو ؟؟؟؟

مع التحايا لست البوست

ابو ختم

الحارث اخوي وكل الذين مروا من هنا لكم محبتي الابدية
وانت تستعدوا الذكريات عن المدينة الصامدة عطبرة
الحارث اخوي دي صورة عبدالله الرجل الظريف خفيف الدم مضحك ميادين الكرة والذي لظروف نفسية تحول الى رجل مرعب قصته لابد ان نعملها دراما وهذا ما نخطط له وابن عطبرة الوفي وفنان جعفر سعيد الريح السيناريست الكبير
لك محبتي وجايكم بالمهلة

احلام
رابط صورة الرست هاوس ما شغالة ياريت تعدلية
تقديري

من ظرفاء عطبرة .. ماندو ،،،،،


ماندو
حقيقةً لااعلم اسمه الحقيقي ولكن كان سائق باص في خط الحصايا نهاراً ، ومعد حفلات ليلاً ، تجده يقوم بتوصيل الاسلاك والانوارة الابرة والقلوز ومكبرات الصوت في الحفلة بمنتهي النشاط ، وكان من ابناء الحصايا ويلعب كورة في نادي الكواكب ، ذكرني به الاخ كاكا وقد وعدني بجلب صور له من عطبرة ، ففتحت بوست باسمه حتي لايتراجع كاكا عن كلامه .
التحايا لماندو وكل اهل عطبرة الظرفاء


شكرا اخى ...
اسمه الحقيقى خلف الله

وبرغم انه كان يعمل فى بصات الحصايه البصات اليابانيه(لهسه شغاله)
ويعمل مع العم ابراهيم(كراسى) بيتهم فاتح فى زلط الشهدا ولديه محل
لتأجير الكراسى والصيوانات ولمبات الزينه ويلعب لنادى الكواكب بالحصايه
الا انه كان يسكن الطليح

واشتهر اكتر حاجه بتركيب لمبات الزينه فى الاعراس وتركيب المكرفونات
وشغلو ده طبعا اندثر بعد ظهور الساوند سيستم واللمبات الزئبقيه وحالو وقف
واشتهر فى تلك الفتره وقد كان خفيف الظل وزول نكته


http://atbara.net/forum/index.php/topic,4177.msg2999.html#msg2999