د. كرّار التُُّهامي أمين جهاز المُغْتربين يسْتقْبِل العائدين طوْعاً من لبنان (فيديو)

علاء الدين اريت الوالدة بخير وبلغت الصحة باذن الله


بخصوص طوعا دى,,,,
ياخ شباب زى الورد ما صدقوا مرقوا من السودان
وقد فشلت محاولات بعضهم للسفر لدول اكثر رحمة
من نظامكم ...وحار بهم الدليل واجبروا للعودة لجهنم
بالتنسيق مع الحكومة اللبنانية القذرة.... فيكيف تكون
عودتهم طوعية.... علاء .الكيزان من الدرجة التانية
قاعدين بره ...ما فكروا فى عودة (مطيعة) ولا كيف

معاوية يا حبيب
الوالد بخير لك الشُّكْر أجزله

و لدكتور كرّار آلاف التّحايا
لاهْتمامه بشباب يحتاجه الوطن
بدل ضياعو بالخارج

يا علاءنا،
والإستقبال حيضيف ليهم شنو؟
وهل هم أصلا محتاجين استقبال؟
الشباب ديل إضطروا على ركوب الصعاب، لأن المستقبل أمامهم في سودان الإنقاذ أصعّب..
____
كرار التهامي بتاع الساعة كم؟

والله يا أب تِفّة يا حبيب
إنتو عجيبين ياخ
كِدا ووب و بي هناك ووبيين

هُم أصلاً جو راجعين بعد أن مُرِّغت كرامة مُعْظمهم في الأرض
و أنت تعلم و أنا أعلم
أها جو راجعين
ياخ مُجرّد إهتمام الدّوْلة برعايا لها له مدلول في النّفْس
و د.كرّار التُّهامي مُمثِّل الدّوْلة هذه قد كان في اسْتِقْبالهم كمسئول
و كسوداني أصيل ود بلد

و ليت كُل عائد للبلد وجد مسْئولاً في اسْتِقْباله

Quote: كرار التهامي بتاع الساعة كم؟

بتاع الساعة ستة ونص وخمسة بتوقيت لبنان
ههههههههه


...............
ياخ ياسر بالغت والله
تابعت معاناة هؤلاء الشباب، وبصدقوا تعاملت معهم السلطات والمجتمع بمنتهى القسوة
رغم توسلات الصحف ورجاءات منطمات حقوق الإنسان وغيرها
ونحمد الله الذي فك أسرهم وأعادهم الى وطنهم وسط عز أهلهم ( العز أهل )
وكماهاجمنا السفارة وجهاز المغتربين على التقصير والإهمال سابقا، يجب أن نشكرهم فى جهدهم هذا
ونأمل أن يتواصل الجهد وتكلل المساعي بعودة الجميع أو توفيق أوضاعهم في لبنان وغيرها
شكرا للسفارة السودانية بلبنان
وشكرا لجهاز المغتربين
ومافى داعي ياياسر تكسر المجاديف
قل ( لمن أحسن أحسنت، ولمن أخطأ أخطأت ).. وكدة الحياة بتمشي صاح ... ولاكيف
لك الود

يا سلام عليك يا أُسْتاذ الطّاهِرْ ساتِّي
كلام في الصّميم لي أب تِفّة و من لفّ لفّه


أها يا أب تِفّة وعد ليك لمّن تجي المطار أنا حأكون في إسْتِقْبالك مركِّب مكنة مسئول

شان تشْعُر بي الشّعر بيهو الشّباب العائد دة

و زي ما قال ليك الطّاهِرْ
العِزْ أهل ياخ
أهل و بس

يا علاء كيفنك
عليك الله أسألك لي كرار دة
ياخي الكرت بتاع التجنيد داك ليه ناس تدفع 65 الف وناس تدفع 260 الف
لو لقى ليك اجابة
شنبي دة يقوم في حبوبتي

ساتي يا الطاهر سلامات يا حبيب
الشباب ديل مشكلتهم الأساسية بدأت في السودان، الدولة لا توظِف إلا منسوبيها.. حظهم العاسر ساقهم لدولة لا تعترف بآدميتهم.. الدولة بكرارها التهامي لا تهتم حتى بالذين يدفعون لها الضرائب في بلدان المهجر، فكيف تهتم بمن يحمِل الدولة فاتورة تزاكر عودته؟ فعلتها الدولة حتى لا تُلاك سيرتها إعلامياً، ولم تفعلها إيماناً منها بحل مشاكل هؤلاء الشباب.. أظن - غير آثماً- بأن كرار التهامي لم يفعل شيء غير حضوره للمطار بمعية التلفزيون، حضور إعلامي فقط.. الدولة تعلم سبب خروجهم، هل الدولة قادرة على خلق حياة أفضل لهؤلاء العائدون؟ بالتأكيد لا.. خليك من الشباب المساكين ديل، جهاز المغتربين ذاتو يفترض أن يُحلّ ويُسرّح الموظفين به لأن الأجور التي يأخذونها أولى بها جهات تانية، لأنه جهاز بلا قيمة، لم يقدم أي خدمة لأي مغترب..
__
يا علاء استقبال شنو، الشباب يكونو خجلانين في رقبتهم دي وما دايرين يشوفو زول ذاتو..

Quote: جهاز المغتربين ذاتو يفترض أن يُحلّ ويُسرّح الموظفين به لأن الأجور التي يأخذونها أولى بها جهات تانية، لأنه جهاز بلا قيمة، لم يقدم أي خدمة لأي مغترب..