الدولة التى تدعى النسبة للعروبة تكتب REFRONDUM CENTER فى الاعلى ثم تكتب مركز تسجيل فى الاسفل

الملاحظ على مراكز التسجيل والاقتراع للاستفتاء، تكتب الدوله التى تدعى ان
اللغة العربيه هى لغة الدولة الرسمية.
REFRONDUM CENER,,POOLING CENTER باللغه الانجليزيه فى الاعلى ثم تترجمها فى الاسفل
لمركز تسجيل او مركز اقتراع باللغة العربية.
اى دولة محترمة فى العالم تكتب فى مثل تلك الاماكن بلغتها الرسمية اولا
لان ذلك جزء من السيادة،ثم تترجم ماكتبت بعد ذلك الى لغات اخرى ان ارادت.
ماعدا دولتنا الفتية ازالها الله ورحمنا من عوراتها وعوارتها.
وهنا يبدو سؤال فارضا نفسه لماذا هكذا عندنا؟؟
هل هو الادعاء الزائف للعربيه وعدم الاقتناع بذلك؟ ام انه الشعور بالدونيه
وعقدة الخواجه؟ام انه عدم المعرفه بمعنى كتابة ذلك؟
ام ان الاستفتاء تم غصبا عن انفهم؟ فان كان الامر كذلك فما بالهم يتشدقون
كلما ظهروا على وسيلة اعلامية، وها نحن ننفذ اخر استحقاقات اتفاقية السلام!!
اين السيادة التى ملاوا بها اذن الريح نباحا وصراخا؟
ام ان استعمالها قاصر كلما كانت هى التعويذةالتى يستدرون بها عطف
المساكين عندما تقع الحكومة فى مطب وما اكثر مطبات تلك الحكومة المتهالكة.
هذه مجرد ملاحظة،،،

Quote: REFRONDUM CENER,,POOLING CENTER

يا ود الموج الناس ديل كتبوها كدي ولا دي منك انت غايتوا لو منك بمررهh لكين لو كتبوها هم ما بخليهم لووووووووووول

بعدين يا ود اختي يا موج مرالكز الاستفتاء او الاقتراع دي لاخوتنا من جنوب الوادي ومعظمهم يجيد الانجليزيه او ملم بها اكثر منا
يمكن عشان كدي كتبت اولا باللغه الانجليزيه وبعدها بالعربيه لان اللغه الانجليزيه فيما اعتقد ستكون اللغه الرسميه لدوله الجنوب

Quote: بعدين يا ود اختي يا موج مرالكز الاستفتاء او الاقتراع دي لاخوتنا من جنوب الوادي ومعظمهم يجيد الانجليزيه او ملم بها اكثر منا يمكن عشان كدي كتبت اولا باللغه الانجليزيه وبعدها بالعربيه لان اللغه الانجليزيه فيما اعتقد ستكون اللغه الرسميه لدوله الجنوب

خالتى دوما ..سلام
لكن الناس الجايين من الخارج ديل جايين يغطوا الحدث فى الدولة
التى لغتها الرسميه هى اللغة العربيه وطلبوا التاشيرات من سفارة
تلك الدوله،يجوا يلقو دوله هى زاتا ما معترفه بلغتها الرسميه؟
والا يقولو شنو؟غايتو جنس شتارة علينا،،،

Quote: REFRONDUM CENER,,POOLING CENTER

يا صديق الموج لمصداقية وكدا

كدي جيب لينا صورة أنّ اللوحة أو اللافتة مكتوبة بالطريقة عنوان البوست أو بالإقتباس أعلاه

يعني بصراحة كدا

الكتابة بالصورة دي من راسك ولا من كرّاسك؟

لو من راسك, حق لمن كتب معناها بالعربية أن يمد رجله

اخي ود الموج

كونها كتبت بالانجليزية هذا اقرار بانها كتبت باللغة الرسمية للدولة الوليده

وبالتالي اقرار واعتراف بان الانفصال واقع لا محاله

Quote: يا صديق الموج لمصداقية وكدا كدي جيب لينا صورة أنّ اللوحة أو اللافتة مكتوبة بالطريقة عنوان البوست أو بالإقتباس أعلاه يعني بصراحة كدا الكتابة بالصورة دي من راسك ولا من كرّاسك؟ لو من راسك, حق لمن كتب معناها بالعربية أن يمد رجله

فرانكلى يا حبيب سلام

انا لا اتحدث عن خطأ لغوى او غيره انا اتحدث
عن ان الاسم مكتوب باللغه الانجليزيه فى الاعلى بينما ان لغة
الدولة الرسميه مكتوبه فى الاسفل وهذا ما لم يكن يحدث فى
اى دولة فى الدنيا..
يبقى انا نقصت ريفيرندوم حرف عشان كولم عمك بكرى ما بشيل
اكتر من كده،،،

Quote: عن ان الاسم مكتوب باللغه الانجليزيه فى الاعلى

تحية طيبة صديق الموج
أنا أتحدث عن الكلمة المكتوبة بالإنجليزية هل هي مكتوبة هكذا REFRONDUM CENTER؟

الاستاذ صديق المووج سلامات .. وانشالله الصحه طيبه والعيال بخير ..


ولاني ما متأكده اني فهمتا المقصود من البوست تماما ,
حبيت استوضح منك , لو المقصود انو الجمله اعلاه كتبت بطريقه خاطئه (spelling) فااا اكيد كلامك صح وبتفق معاك ميه في الميه ,
لانها فعلا ما بتتكتب كدا .. بس الغريبه (ولانني من المتابعين جدا لمراحل الاقتراع وحريصه على حضور معظم نشرات الاخبار التلفزيونيه والالكترونيه)
فقد بحثت عن صوره لاحد واجهات مراكز الاقتراع في جنوب السودان , وكنت اتمنى ان تكون الصوره اوضح من ذلك , بس ممكن دي تفي بالغرض ,






ما عارفه اذا واضحه ولا لا , بس اعتقد انها مكتوبه كـدا (REFERENDUM CENTER)
واذا انجليزيتي لسه كويسه , اعتقد انو دي الكتابه الصاح ليها ..

اما لو كنت تقصد انو ليه اتكتبت بالانجليزي قبل العربي ,
فاعتقد انو السبب هو نفس السبب البيخليهم يكتبوا مفوضيه استفتاء جنوب السودان بالعربي في الاول وبعدها بالانجليزي كما هو واضح بالصوره ,,
خاصه وان معظم مهام الاستفتاء موكله الى الحركه الشعبيه لتحرير السودان والتي لا تعتبر اللغه العربيه هي اللغه الرسميه لجنوب السودان
سواء حدث الانفصال ام لم يحدث ..
وكما تعلم , هنالك الكثير من البلدان المختلفه حول العالم والتي تتنوع لهجاتها ولغاتها بحسب الاقليم ,
واحسب ان السودان بلد متنوع الثقافات والاعراق واللغات , فاااا شنو .. جميله فكره الانجليزي قبل العربي جدا ,,
يعني ما بالضروره يكون كل اهل البلد ناطقين بنفس اللغه , وفي حاجه مهمه وحساسه زي الاستفتاء ,
من واجبات الجهات المنظمه ان تستخدم كل الوسائل التوضيحيه التي تعين المواطن على الادلاء بصوته وهو مستوعب تماما لما يجري سواء من ناحيه
اللغه , او الاشارات , او حتى الخط المكتوب .. وكما تعلم , قله قليله من الاخوه الجنوبيين يتخذون اللغه العربيه لغتهم الام ..

تحياتي وشكرا على قوه ملاحظتكـ .. وعذرا للاطاله ..

والله يا ود الموج بعد مداخلة داليا دي النتيجة عليك
6/0

تكون فاتح البوست دا يا ود الموج عشان حرف الـ E الزايد في كلمة مركز!

لالا اكيد قاصد POOLING CENTER
الكتبوها صاح في الصورة التحت

Quote: ولاني ما متأكده اني فهمتا المقصود من البوست تماما , حبيت استوضح منك , لو المقصود انو الجمله اعلاه كتبت بطريقه خاطئه (spelling) فااا اكيد كلامك صح وبتفق معاك ميه في الميه ,

داليا العزيزة حبابك وزميل المنبر
عساكم بخير..
لوم للركب لكن عارفنكم لقيتو لينا عذر..
انا اقصد يا داليا انو بلد تتخذ اللغة العربيه لغة رسميه
يجب ان تبدأ بكتابة اللغه الرسميه اولا ثم تترجم الى ماتشاء من لغات.
يعنى مثلا وزارة الصحه او اى وزارة اخرى يجب ان يكتب على البوابة
اولا وزارة الصحه باللغه العربيه ثم بعد ذلك تترجم او لا يفرق.
يعنى زى رئيس البلد لما يمشى اى مكان فى العالم يجب ان يتحدث
بلغة بلده مهما كانت اجادته للغة البلد التى يزوره.
بعدين center اوcentre الاثنان صحيحتان لغة..
جاك كلامى انا قاصد شنو.
بعدين ما تكتبى كتير كده لاتغسلى عدة عشان الحنه ما تنسهك
لووووووووول،،،

ود الموج نحن لا عرب عاربه لا مستعربه لكين حكاية الكتابة القلتها دي حتى العربي القح بيكتبها تصدق بفتكروا اللكنة الأجنبية وبخاصة لغة الفرنجة مؤشر على ثقافة قائلها حتى وإن كانت فارغة من محتوها ودائماً ما تكون كذلك بس المهم بتكلم بلكنه أجنبية ، ودا أظن يدعي الإستلاب الثقافي. أها كان العرب الرأسهم عدييييل مستلبين فكرياً وثقافياً ومفتونين بالغرب نحنا ناس قريعتي lost رأس السلبه دي ما بصلنا يا كافي البلا حتى نكون مستلبين ثقافياً ، يا أخي ود النور العفيين داك مرات كده في نص الونسه يقول ليك النايت مير والجم والبارتي وغايتو كان حفظ ليهو عشرين كلمة تاني حقي راح.

لووووووول يا ملا عمر راس السوط هبشني
تصدق انا لي كم وعشرين سنه ما معاي زول بتكلم عربي عشان كدي بتمها انجليزي لو غلبتني
ومرات الماني
ومرات بمش ود بانقا عديل اتمها من هناك
بالجد مرات ما بلقي الكلمه العربيه لا ثقافه لا قرضمه
بس حيره ساكت وانقطاعه راس

..
.

Quote: بعدين يا ود اختي يا موج مرالكز الاستفتاء او الاقتراع دي لاخوتنا من جنوب الوادي ومعظمهم يجيد الانجليزيه او ملم بها اكثر منا يمكن عشان كدي كتبت اولا باللغه الانجليزيه وبعدها بالعربيه لان اللغه الانجليزيه فيما اعتقد ستكون اللغه الرسميه لدوله الجنوب

طبعا انا متأكد انت قاصد وجهة نظر دومه دى
ما مشكلة اسبلنغ ولا خطا

--------

بعد 14 فبراير تاريخ اعلان النتيجة
ترضو ولا يرفض العرب انحنا دولة عربية اسلامية
الما عاجبو يمشى ياخد جنسية فى جوبا ولا اوغندا

برجاء عدم السخرية من صديق الموج!

نموذج لما يعينيه الموج.

إن صح فهمي لمقصده

-
الموج ،
سجل : أنا عربي.

Quote: اخي ود الموج كونها كتبت بالانجليزية هذا اقرار بانها كتبت باللغة الرسمية للدولة الوليده وبالتالي اقرار واعتراف بان الانفصال واقع لا محاله

طارق ميرغنى ده الاحتمال الارجح تصدق؟؟

Quote: والله يا ود الموج بعد مداخلة داليا دي النتيجة عليك 6/0

اساسى يا ظلامى انا رضيان بت اختى دى تدينى 60/0
بس انت اطلع منها،،،

Quote: يا أخي ود النور العفيين داك مرات كده في نص الونسه يقول ليك النايت مير والجم والبارتي

الملا عمر كيف حالك ياخى
ليك وحشه
هسه دولتنا دى ما اعفن من ود النور حقك ده؟
دولة ما محترمه تكتب لغة الفرنجه قبل لغة البلد الاصليه،،،

ابلع يا عمكــ بالهناء والشـــفاء
حــد يصحي ود الصايم يا جدعاااااااان






___
ود الموج مشــتاغووووووووووون والله صحي

التحية للجميع ....

كيفك يا أمين و مشتاقين!!!

Quote: التحية للجميع .... كيفك يا أمين و مشتاقين!!!

بعد إذنك يا صديق

أووووووووووووو حبيبنا أمير عثمان
يـــااااخ بتبالغ عديل كدا وين أنت يا زول
يعلم الله مشتاقين ابقي شمس ما تغيب باللاي
الشباب كلهم بجاي ود المناقل واحمد بن عوف وفتوش .. الخ الخ

تحاياي