Post: #1
Title: جنْا قديم و لا جنا جديد
Author: ابو جهينة
Date: 01-06-2011, 11:24 AM
الخرطوم بحري ( تسعينيات القرن المنصرم )
واجهني دونما سابق معرفة. قال : ممكن أعمل معاك ريبورتاج صحفي ؟ معليش المكان و الوكت ما مناسبين و لكن إنت ما بنلقاك بسهولة. نظرت إليه ، فوجدته أنيقا ..ذي وجه طلق بشوش ، و لكن يشوبه قلق بائن. فوقفت و سلمت عليه بحرارة و أنا أحاول أن أستوعب سبب إختياره لي دون خلق الله في منزل زميلنا و صديقنا في المناسبة التي ضمت الكثيرين بالخرطوم بحري. قلت له : و ليه أنا بالذات ؟ فقال و كأنه مقتنع تماما بأنني سأستجيب لتحقيقه الصحفي : أنا سمعت عنك كتير و عاوزين نعرف خلفياتك و كدة. إنتفختْ أوداجي بهذا الإطراء الذي أتخمني به هذا الذي لا أعرفه. قلت له : طيب إنت بتشتغل في ياتو جريدة ؟ قال و هو يفتح دفترا و يستل قلما من جيبه دون أن يجيب على سؤالى و متجاهلا إياه تماما : أها ممكن نبدأ الأسئلة؟ قلت و قد غاظني تجاهله لسؤالي : جاوبني بالأول.. إنت في ياتو مطبوعة ؟ قال و هو ينظر لي نظرة مباشرة و مخيفة و عيناه تلمعان ببريق مرعب : أسئلتك كتيرة يا أخي. أنا البسأل مش إنت... تغامز الجميع و هم يكتمون الضحك ، كانوا يعرفون من هو. أما أنا فقد فاجأتني إجابته الفظة و حاولت أن أقف لأرد عليه الرد المناسب و أنسحب من أمامه ، إلا أن زميلي وقف خلفه و أشار لي بيديه ، ففهمت أن زولنا ( به شيء ما أو خلل عقلي ) و قال زميلنا : أخونا صحفي جانا عن طريق واحد قريبي. كنت غير مقتنع بمحاورة رجل مختل العقل لا يمكن التكهن بردود أفعاله تجاه أجوبتي و ردودي قلت له ممتعضاً: إتفضل إسأل. فقال و هو ينظر إلى من تحت نظارته : الأخ متزوج ؟ أيوة و لله الحمد. فقال و هو يكتب و كأنه قرفان و مجبر على محاورتي : أهبل جايب واحدة من بيت أهلها و خاتيها معاهو و بيصرف عليها... غالبتُ ضحكة خوفا من أن تخرج مجلجلة فيسيء فهمي هذا (المتصحفن) ، قلت له : تقصد شنو ؟ دي زوجتي و أم عيالي... فقال بحدة : أقصد إنك أهبل و بس. ما علينا. أبوك و أمك عايشين ؟ قلت : لا فقال و هو يكتب : مقطوع من شجرة و يتيم ما عندو ضهر... طيب حبوباتك عايشات ؟ قلت: لا..... الله يرحمهم جميعا فقال و هو يكتب : ما عندو قديم ، و الناس القُدام ما بيتلقوا في السوق الأسود ،، ما علينا. بتشتغل وين ؟ قلت : أنا مغترب قال : هربان من البلد المسجم و المرمد. قلت له : ربنا قال ( أسعوا ) في مناكبها بحثا عن الرزق. فقال : السودان ما فيهو مناكب ؟ طريقة محاورته لي تبدو و كأنه لا يريد التفاهم مع نفسه داخليا ، لذا فإنه يسأل و يجاوب على الأجوبة بمفهومه هو و رأيه الشخصي بصوت عال نظرا للخلل الذي أصاب عقله فأفقده خاصية التحدث إلى نفسه دون الإستعانة بشخص يحاوره. ثم واصل : عندك أولاد ؟ قلت : أيوة ، الحمد لله ............ فقال و هو يكتب : زول ما عندو تلفزيون و لا شغلة بالليل غير التفريخ و ولادة الشفع و بيصرف عليهم و لما يكبروا حيفوتوا يخلوهو في الصقيعة. ما علينا، مين أكتر ناس خدموا السودان ؟ قلت : شهداء الوطن طبعا ............ قال و هو يواصل الكتابة : كضبا كاضب. أكتر ناس خدموا السودان هم الشوايقة و عربات الكومر ، الشوايقة لأنهم أكتر ناس إشتغلوا في العسكرية و الكومر لأنو حام السودان حتة حتة...... هنا ضحكت ، فقال : في حاجة بتضحك ؟ فقلت : الشوايقة عرفناهم ، طيب الكومر ... و قبل أن أكمل قال : الما عارف يقول عدس ، و إنت العدس ذاتو الظاهر بتاكلو و إنت قايلو كاستر بي لبن ............... ثم واصل و أنا أتابع حركات يديه حتى لا يباغتني بضربة من الطفاية أو بطبزة في عيني من القلم الذي في يده : قال بسرعة : الطير بيتكلم وين ؟ فقلت له : الطير البيتكلم هو الببغاء و بيتكلم لما صاحبو يعلمو الكلام في البيت......... فقال : إنت عايش وين ؟ الطير بيتكلم في الباقير ، لاكين بلدكم طيرا عجم و ناسا عجم .... و ضحك ضحكة هستيرية ، ثم قطع الضحكة فجأة و كست وجهه مسحة الجدية و الغضب و قال : الضحك بلا سبب قلة أدب. و الهظار الكتير بيكتل القلب. ما علينا. إنت حبيت قبال دا ؟ قلت : طبعا........... قال بجدية : طعمو كيف ؟ قلت : الحب بيعيشوهو ما بيضوقوهو...... فقال : ما تتفلسف علينا ... خليك في حدودك. الحب حياة ، و الحياة فيها المر و فيها الحلو ، أها عشان كدة الحب عندو طعم الحلو مر ..... كلام منطقي متسلسل ، لا بد أنه ينبع من تجربة مريرة عاشها خلال تمتعه بكامل قواه العقلية............ لعنت زميلي و قريبه و سنسفيل اليوم الذي عرفتهما فيه. دة يوم شنو دة يا جماعة. الراجل زانقني في خانة ( اليك). ثم واصل : الصلاة بتنتظر الوكت ولا الوكت بينتظر الصلاة ؟ فسكت و أنا أفكر في هذه الغلوتية. فقطع صمتي قائلا : الوكت و الصلاة متباريات زى السترة و الفضيحة و زى قواديس الساقية و تروس الساعة. قال : برجك شنو ؟ قلت له بسرعة : العقرب. فقال : كل المسلمين حيغيروا تواريخ ميلادهم. برجهم حيكون برج التجارة العالمي ، و تاريخ ميلادهم حيكون حداشر سبتمبر. ثم وقف مخاطبا الحضور بخطبة عصماء هي عبارة عن خليط من كل المواضيع و الأمور ، و ختمها بشتيمة البشير و قرنق . ثم واصل : السودان ، بلد الموجوعين و ما عندو وجيع ، و بلد السادة و ما عندو سيد. النار إكتشفوها أجدادنا في سنار قبال جدود العالم الأوائل ، عشان كدة عندنا أم سنط و أم دوم و أبو حراز و أبو عشر و حلفا و الحلفاية و قاطعين كهربا ليل نهار. إمامنا المهدي ، أذكى من تشرشل و رومل و هتلر ، لما فكر يعمل دولة إسلامية ، بداها من وسط جبال الغرب، عشان لو سواها في الشمال ، ولَا في الشرق بجوه الجماعة بالبحر و من جهة مصر. نيرون حرق روما و عجوبة خربت سوبا بكيماوي سوداني... سودانا فوق ، عشان كدة ضربوا مصنع الشفا. هلال مريخ ، بن لادن و بوش ، لحم الصاج و فتة بوش ، بترولنا طلع .
عرفت فيما بعد أن زولنا خريج إقتصاد ، و لكنه للأسف تابع تدخين حشيشة البنقو إلى أن آل إلى ما آل إليه مأسوفا عليه. يخلط الجد بالهزل ، و أحيانا تشعر بأنه أعقل إنسان و أحيانا يفاجؤك بكلام غير منطقي ، و أحيانا عطوف و تارة يثور و يحاول الإعتداء عليك بالضرب. أحيانا يقوم بتدريس أولاد الحى الرياضيات الحديثة بكل إقتدار ، و أحيانا يمزق كتبهم و كراساتهم و يخرج ساخطا و لاعنا ثم يهدأ و كأنه لم يفعل شيئا.. شفاه الله و حماكم الله و إيانا.
|
Post: #2
Title: Re: جنْا قديم و لا جنا جديد
Author: عمران حسن صالح
Date: 01-06-2011, 11:39 AM
Parent: #1
جِنَاً قديم ولا واحد جديد ياخي ده منتهى التشاؤم يا ريس
|
Post: #3
Title: Re: جنْا قديم و لا جنا جديد
Author: ابو جهينة
Date: 01-06-2011, 08:59 PM
Parent: #2
أبو محمد العمران المريخابي
سلام
بعض التشاؤم يا أبو محمد يأتي بنفحات تفاؤل غير متوقعة
سؤال : إنت ال في الصورة ال تحت دي : منو ؟ و بيقرض في شنو ؟
|
Post: #4
Title: Re: جنْا قديم و لا جنا جديد
Author: ابو جهينة
Date: 01-08-2011, 07:34 AM
Parent: #3
ثم وقف مخاطبا الحضور بخطبة عصماء هي عبارة عن خليط من كل المواضيع و الأمور ، و ختمها بشتيمة البشير و قرنق . ثم واصل : السودان ، بلد الموجوعين و ما عندو وجيع ، و بلد السادة و ما عندو سيد. النار إكتشفوها أجدادنا في سنار قبال جدود العالم الأوائل ، عشان كدة عندنا أم سنط و أم دوم و أبو حراز و أبو عشر و حلفا و الحلفاية و قاطعين كهربا ليل نهار. إمامنا المهدي ، أذكى من تشرشل و رومل و هتلر ، لما فكر يعمل دولة إسلامية ، بداها من وسط جبال الغرب، عشان لو سواها في الشمال ، ولَا في الشرق بجوه الجماعة بالبحر و من جهة مصر. نيرون حرق روما و عجوبة خربت سوبا بكيماوي سوداني... سودانا فوق ، عشان كدة ضربوا مصنع الشفا. هلال مريخ ، بن لادن و بوش ، لحم الصاج و فتة بوش ، بترولنا طل
|
Post: #5
Title: Re: جنْا قديم و لا جنا جديد
Author: يوسف السماني يوسف
Date: 01-08-2011, 08:27 AM
Parent: #1
ابوجهينة سلام
Quote: هربان من البلد المسجم و المرمد. قلت له : ربنا قال ( أسعوا ) في مناكبها بحثا عن الرزق. فقال : السودان ما فيهو مناكب ؟ |
كانما اراد ان يرسل لك رسالة من طرفي خفي بان السودان به مواكب تهدر ملايين الجنيهات التي يمكن ان تصرف علي معينات حياة المواطن ولكن وا.....اسفاي .
Quote: محاورته لي تبدو و كأنه لا يريد التفاهم مع نفسه داخليا ، لذا فإنه يسأل و يجاوب على الأجوبة بمفهومه هو و رأيه الشخصي بصوت عال نظرا للخلل الذي أصاب عقله فأفقده خاصية التحدث إلى نفسه دون الإستعانة بشخص يحاوره |
هذة مصيبة تقسيم السودان الحقيقة تأليه الذات وتنزيهها
Quote: الطير البيتكلم هو الببغاء و بيتكلم لما صاحبو يعلمو الكلام في البيت......... فقال : إنت عايش وين ؟ الطير بيتكلم في الباقير ، لاكين بلدكم طيرا عجم و ناسا عجم .... و ضحك ضحكة هستيرية ، |
وصف دقيق لحالة اله######## الذين يرددون دون اعمال العقل او التفكير .
|
Post: #6
Title: Re: جنْا قديم و لا جنا جديد
Author: ابو جهينة
Date: 01-08-2011, 10:49 AM
Parent: #5
تحياتي أبو رامي
|
|