يا ربى هل هو "محمد ابراهيم الفكى" بتاع الاتجاه الاسلامى بجامعة الخرطوم فى 80 (صورة)!!!..

فساد ...تزوير و اختلاس بالبنك ـالزراعى السودانى( توجد وثيقة)

هلا ياريس
ومحمد ابراهيم ده ظل مختفي اعلاميا طيلة زمن الانقاذ واصلا ما شفتو او سمعت بيهو
وهو خريج اقتصاد وهذه الجزئية تجعله قريبا من هذه الدوائر
وعموما سنتابع وقد يوتي من اقصي المدينة بالخبر الاكيد

الأخوان بكري وعبد الكريم

تحياتي - لا أظن أن الإسم المعني هو محمد إبراهيم الفكي بتاع الإقتصاد كادر الإتجاة الإسلامي داك . فحسب علمي المتواضع الرجل دقش السوق في بداية الإنقاذ وإستفاد من علاقاته التنظيمية القديمة وقفز بسرعة . وأرجو أن يفيدنا عصام جبر الله أكتر. ربما نجد عنده إجبابت . فالرجل كان كادر خطابي وبتاع أركان لكنه مارق ليها .

بحيراوي

فساد ...تزوير و اختلاس بالبنك ـالزراعى السودانى( توجد وثيقة)

UP


من هـو مـحمد ابراهيم الـفكي؟!

في الغالب هو محمد ابراهيم الفكي "ود الفكي" طالب الإقتصاد بجامعة الخرطوم في منتصف الثمانينات،
ود الفكي جاء الإقتصاد محول من كلية الزراعة وكان من كوادر الإتجاه الإسلامي الخطابية من الذين يتكلمون
في القضايا السياسة وليس الدينية، يعني ممكن تحضر ليك ركن كامل لود الفكي وما تسمع ولا آية ولا حديث،
وللحقيقة اقول انه ود الفكي كان كوز ظريف وكان يقضي الساعات في غرفتنا في نقاشات حادة مع عبد اللطيف عثمان
وعصام جبر الله وحتى لغة نقاشه في غرفتنا كانت لغة داخليات ما لغة اركان ودائماً ما كنت اقول له هسه كلامك ده
بتقدر تقولو في ركن الكيزان وكان يضحك ويقول كلام الأركان براهو وكلام الداخليات براهو .. و في مكالمة هاتفية
مع ناهد جبر الله قبل حوالي اربعة او خمسة سنوات اخبرتني انه ود الفكي لاقاها ماشة في الشارع فأوقف لها سيارته
واصر اصراراً شديداً ان يوصلها لأي مكان تريده ..
واذكر انه الجبهة الديمقراطية كان عندها ندوة في ميدان كلية القانون وكان المتحدث فيها الأستاذ محمد ابراهيم نقد،
وبالفعل حضر الأستاذ نقد وجلس في منتصف الصف الأمامي ومعه بعض الزملاء قبل بداية الندوة، وكان الزملاء المكلفين بالحماية
منتشرين حول الميدان وفي النشاط وفي كل المداخل التي تؤدي لميدان القانون وفي نوافذ بعض القاعات المطلة على الميدان
وعلى جانبي المنصة وهم بكامل عتادهم وإستعدادهم لصد اي هجوم او شغب من كوادر الإتجاه الإسلامي، واذكر ان ودالفكي جاء داخل
ميدان القانون وماشي علي الأستاذ نقد عدييييل فاوقفه بعض الزملاء وقالوا له يازول حدك الصف الرابع ده اقعد هنا واحضر الندوة بي ادبك،
فقال ليهم انه ما قاصد شر وحلف انه من القطينة وانه نقد خاله وهو ماشي يسلم عليه، وبالفعل اصطحبه زميلين ومشى سلم على الأستاذ نقد
واتضح فعلاً ان هناك علاقة قرابة تربطه بالأستاذ نقد ..

امكن يكون فارق دربــى الهــم ...
بقول إمكــن ..

محمد ابراهيم الفكي


الذي تحول من كلية الزراعة لكلية الاقتصاد من اولاد مدينة القطينة

في سنة 2002 كان عامل محل تجاري في السوق العربي لم يكن له علاقة بالبنوك

ولكن في زمن الانقاذ كل شئ ممكن


لكن بجيب ليكم خبرو لو ده صاحبنا محمد بيزنس

الاخ الصاوي

Quote: فقال ليهم انه ما قاصد شر وحلف انه من القطينة وانه نقد خاله وهو ماشي يسلم عليه، وبالفعل اصطحبه زميلين ومشى سلم على الأستاذ نقد واتضح فعلاً ان هناك علاقة قرابة تربطه بالأستاذ نقد

كلام صحيح محمد ابراهيم نقد خاله


لكن هنالك فرع في الاسرة نفسها تابع لمن ادخل تنظيم الاخوان في السودان علي طالب الله

واتبع محمد ابراهيم الفكي عبد الاله حسن كوكو سكرتير اتحاد الجامعة ونانجي شريف

ناجي قادم ايضا من الزراعة لكلية الاقتصادوعلي طالب الله خالهم فكانو اقرب لشيخ حسن عبدالله

محمد ابراهيم الفكي


لم يترك التنظيم بل وقت الانشقاق وقف الي جانب صديقة علي عثمان محمد طه

دخل السوق لحوجة التنظيم للسوق والسيطرة عليه


فابناء مدينة القطينة معظهم دخلوا التجارة وعلي راسهم عثمان الهادي مدير شركة شيكان للتامينات

فقط عبدالاله ارتبط اسمه ببنك امدرمان الوطني


ناجي شريف كان مسؤلا عن شركة شل للشمال وسمعت عنه قبل فتره اختفي لانه مطلوب

إزيك يا بكري

الحقيقة لاقيت محمد إبراهيم الفكي في بداية التسعينات علي مقربة من عمارة الضرايب الجنب فندق الصفاء والراجل كان قاري وقتها مآلات تجربة جماعته قراية سليمة لأنه شاف إنه من زمن التجاني أبوجديري وعبدالله سليمان العوض وعلي عبدالله يعقوب الكانوا محتكين بعلاقات خارجية وتجربة دعم الأمير محمد الفيصل إنه الناس الشطار من عضوية التنظيم هم الإستفادوا من الإمتيازات التجارية الكانت بتتم بشكبل تجاري طفيلي وتحت غطاءات مختلفة المهم أدرك ود الفكي إنه ما حيغرق في شبر الموية و عرف إنه ما يمكن أن يجنيه تجارياً من سلطة الإخوة في الله يماثل أضعاف ما يجنيه عبر منصب فدخل سوق الله أكبر وإستفاد من التسهيلات وأظن أنه أصبح أحد أعضاء نادي القطط السمان
بمناسبة عبداللطيف عثمانيا أخوانا إنتوا الزول دا هسة وين يا الصاوي

Quote: بمناسبة عبداللطيف عثمانيا أخوانا إنتوا الزول دا هسة وين يا الصاوي

عبداللطيف في الدوحة منذ التسعينات وحتي الآن يا سنارى.

سلام

Quote: فحسب علمي المتواضع الرجل دقش السوق في بداية الإنقاذ وإستفاد من علاقاته التنظيمية القديمة وقفز بسرعة

Quote: في سنة 2002 كان عامل محل تجاري في السوق العربي لم يكن له علاقة بالبنوك

Quote: ناجي شريف كان مسؤلا عن شركة شل للشمال وسمعت عنه قبل فتره اختفي لانه مطلوب

Quote: فدخل سوق الله أكبر وإستفاد من التسهيلات وأظن أنه أصبح أحد أعضاء نادي القطط السمان

انا لا اعرف الشخص الذى تتحدثون عنه ....و لكن ما ذكر اعلاه لايليق ....

قديما قال أحد الحكماء
من راقب الناس مات هما
وفاز باللذة الجسورا

Quote: انا لا اعرف الشخص الذى تتحدثون عنه ....و لكن ما ذكر اعلاه لايليق ....

Quote: بمناسبة عبداللطيف عثمانيا أخوانا إنتوا الزول دا هسة وين يا الصاوي

غايتو عبد الطيف عثمان داك السودان سيظل موجوع فيه إلي مما لا نهاية يعلم الله الزول داك تختلف معاه تتفق فهو سمح أخلاق وشمايل.

بحيراوي


* يا أخوان محمد إبراهيم الفكي داك من حقنا نتبع أخباره فقد أخذ من زمنا الكثير حينما كان يشدنا في الأركان لأكثر من ساعتين . وكمان أخونا أحمد عثمان كادر الجبهة الديمقراطية وعضو المنبر وأخونا عبد اللطيف الله يطراه بالخير.

Quote: تحياتي - لا أظن أن الإسم المعني هو محمد إبراهيم الفكي بتاع الإقتصاد كادر الإتجاة الإسلامي داك .فحسب علمي المتواضع الرجل دقش السوق في بداية الإنقاذ .

صدقت ياأخ بحيراوى فمحمد ابراهيم الفكى بتاع الأقتصاد . نعم , هو دقش السوق ولديه دكان لبيع الأدوات الكهربائية بعمارة الضرائب ويقود عربية بوكس موديل سنة حفرو البحر ويسكن فى منزل بالأيجار , وليس هو بتاع بنك السودان .

Quote: وإستفاد من علاقاته التنظيمية القديمة وقفز بسرعة

بدليل العربة الهكر ومنزل الأيجار .
اقول هذه المعلومة للأخوة المتداخلين حتى لا نأخذ الناس بالشبهات وتشابه الأسماء.
ودمتم.

Quote: صدقت ياأخ بحيراوى فمحمد ابراهيم الفكى بتاع الأقتصاد . نعم , هو دقش السوق ولديه دكان لبيع الأدوات الكهربائية بعمارة الضرائب ويقود عربية بوكس موديل سنة حفرو البحر ويسكن فى منزل بالأيجار , وليس هو بتاع بنك السودان .

النجيضه اتى بها قلقو