Post: #1
Title: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 12-31-2010, 11:19 PM
Parent: #0
قصيدة جديدة مُوندوكورو شعر : هاشم صديق (1) مُوندوكورو وانا انفصلتَ وانقسمتَ عديل - ياميرى - قبال الجنوب 00000000 00000000 عشرين سنة وجوايا مندلعا الحروب0 هلكان مقطّع بين مشارق وبين غروب 0 جواى شمال واقِع شَرٍق جواى جنوب ضهبان غَرٍب 00000000 ناشونى ما فَضّل سهم سامونى ذى زفة بَهَم نشلونى فى حبر القلم 0 عصرونى لاذوق 00 لافهم حِس الفرح جوايا نِضِب 0000000 مُنشار اكل فينى وشِرب 0 جلدونى ما قالو الرقم كِمْلَتْ على ضهرى وعَضَاى كل ( الجداول) فى ( الضَرٍب ). 000000000 000000000 000000000 مُوندوكورو زى التقول أنا ما أنا حتى الزمان والأمكنة مشهد ( كريسماس ) و ( راس سنه ) سحر الطقوس الممكنه 0 اتهدّا حيل شَرَف الغُنا جمحت خيول العكننه0 الجوع سكن غُرف الحشا (الدهشة ماتت ) مُدهشه0 عِشق القدم لَسع الحفا0
0000000 0000000 دار الزمان لف الروييس عصف الهوان ِلمس العذاب كتف السما0 00000000 وأنا 000 ما أنا0 (2)
ضاق براح(2) طول المسافة بين لهب غُبن القصيدة وبين زناد البندقية 00000000 الثورة فى رفّ المتاحف0 القادة زاحفين زى سلاحف الوالى مزّق للمصاحف والأُمة فى حمى الأذية 000000000 أدينى يوم وطناً مُفَدّا شديهو فى سرج المخدّه أدّى خيل أحلامى دفرة0 خلى يا روحى الحوافر تطوى ظلم الليل تسافر لى فوانيس المجرّه وبين شفايفك والمسره أطفى كم جرحاُ وجمرة وادفا من تلج العشية 00000000 أدينى يوم وطناَ موالف ينقذنى من جنّ الخواطر ومن تباريح المعارف ومن مراجيح المخاوف 0 00000000 أدينى يوم وطناً شفيف يحمينى من حمى الرغيف يرحمنى من نصل الرصيف (حزن الحقايب ) والنزيف0 من شرود قدم المسافر من مناجاة المنافى ومن دموع سفر الوداع ومن شبابيك التذاكر ومن قطار المغربية0 0000000 أعذرينى أصلى ما بعرف شنو الفرح الموالف الا بس لهب المسارب والمواقف0 (3) منو السرق البلد والقوت ؟!! منو الخَزّن شوال السُكّر المكبوت0 (عيش الكِسرة) (المكرونة) و (الشاى) وحتى قماش كَفن للموت0 00000000 وكم كضاب خطب فى ( الرادى ) و ( التلفاز ) وكان فى أصلو ( زول هلفوت )
000000000 000000000 شوفو الخُلعه يا صابرين قوت الشعب أصبح لعبه لو بالجمله أو فى (بقالة ) أو ( كنتين ) ناس أهل الله خشّوا السوق وسابو الدين 0 تمام فالحييين 00000000 وانت تهاتى يا مسكين 0 بين ( زقلونا ) و (الشقلة) و (الحارات ) بين (المية ) و (السبعين ) . عُصار ساكيكْ تقول ( هايس ) ما خلاك تقيف تِنجمّا فى ( الكاملين )0 00000000 00000000 انت كمان أخير (تِسَْتفتا ) فى حالك تسوى شنو ؟! تَقبّل وييين ؟!! 00000000 وكت (ضاقت بما رحُبت) وفات صبرك عذاب ايوب تفوت لى وين ؟! تهاجر من شمال لجنوب ؟! تفوت لى ( واو ) تسيب ( حنتوب ) ؟!! بدل ( شايقى ) تصير ( زاندى ) ؟!! تكون ( دينكا ) وتسيب ( جعلى ) ؟!!! 00000000 تقول الروووب - انا مهاجر مسافر من ديار أهلى لا لى ( كندا ) لا ( لاهاى ) لا ( للدوحة ) لا ( سدنى )؟!! أنا استفتيت براى حالى مشيت لى (نّومولى ) بى كرعى ؟!! 00000000 هجرت العِمة والطاقية والمركوب. اتسلفت من (سِلفا ) كمان كسكته بالمقلوب . لبست البدله واتفنجرت بى كرفته واتعلمت عربى جوبا0 لا ذاكرتو لا مكتوب0 00000000 واتبدّل عديل الحال بقيت مسؤول فى بير بترول بدل (حسنين ) بقيت ( ملوال )0 00000000 موندوكورو قَلِب أباهو ما يجينا ولا نجيهو 0000000 ما ندورووو0 (4) جابت ليها (3) يا عبد الله كتاحه0 00000000 زيطه وعرضه ذكّارا وشكّارا دق نُقارا مداحين وطمبارا0 0000000 بلد واقع وده الواقع0 بُكره القسمه والتقطيع0 قص الخرطة والتطبيع مافى ( خلاص ) ومافى شفيع 000000 جرايد شوفا طشّ وطاش ودنيا غباش0 صف كورس من الغُربان صِبِح هتيفه فى الأعشاش0 000000 مسّاحين من الأقلام من الأقزام 0 و000 ترزيه فنانين فى قص الكضبه فوق للرُكبه0 و000 غنايين ورقاصين ( هنود أفلام)0 وجزارين محترفين فى قطع العيش وعميانيين0 حطابين يجزو هواك بضربة فاس 000000 000000 شوف الكتمه يا عبدالله زول الله 0 قِل المويه موت النسمة دمع البسمة عدم الزاد0 00000 شوف أوجاعنا كيف صِْبحَت نبيح ومزاد0 شوف واعقل باسم الرب أيا عبدالله كيف ( اتسنسروا) الآيات وكيف اتباقصت أوراد0 00000 حفرتو غريق نشفتو الريق دقيتو الطبلة وشلتو الناى0 قفلتو دَغَشنا بأكبر طبلة زقتّونا كلام فى كلام وصالح عام بقينا زباين ست شاى0 00000 قاضى المِلة باع اتراحنا يا مولاى واتلفّتَ يا عبد الله زول الله جاى بى جاى لقيت حتى المثل مقلوب - الحداس صِبِح سوّاى اتشنقلنا جوه وطنّا اتظلمنا للقاضى شال الباقى واتحاكمنا راح ( فايل ) المظالم ساى0 000000 مسكين الشِعِر مكسور وكت صبح الوزن لافتات0 مسكينه الصُحف سوّت نشاز( ناس هاكا) زى (موزارت ) مسكينة الرفوف بى حالها كان لحسوها كم نصّاب 000000 عفيت منك حيلك لسه يا عبدالله ماشاالله ما رفّس وفَتْفَت مات وما أغناكْ بالقرشين والعراقى والسروال وجُغمة روب وكيس تمباك0 وما ابهاك وانت تشابى للجايات وما اتحسرت لى رايحات وماهماك . ما اقواك 000000 (5) كمْلت سنة سفّاية من حلق الرماد لو كان شرح قلب البيوت قمرا مِصَنقر فى جواد أو نَقْرَش الوتر اليتيم وصّحا عين0 أو رنّ حافر فى خواطر وقمنا من صوم الرقاد0 أو انكسر طوق الكدر وردمنا فى السكه الحُفَر ووقفنا فى وش الخطر كنا0000000 كان000000 صار00000 وغسلنا ذُلنا فى المطر0 0000000 0000000 الا العشم مرات يفرفر فى العدم الشمس تشرق من نغم0 (التيمه) تطلع من ألم 0 الدنيا ترجع للنظر فى شعّه من ومضة وتر0 0000000
(6) كل عام وانتى غيمه تبارى نيمه فى حوش غلابة0 كل عام وانتى وردة فى حُضن عروة وطيره حره تناجى غابة 0000000 0000000 كل عام وانتى لمه وحوش وحاره0 صفقه عرضه ولمبه خضرا على الاشارة0 كل عام وانتى صاحيه وبت شطارة وكلمه طيبه وبشرى ساره. 0000000 0000000 كل عام وانتى شارقة وناضرة مرجيحه وضفيرة0 كل عام وانتى طوق الزفة فى غضب الدميرة كل عام وانتى نخلة فَراش ونحله وصوت بِيهدر فى مسيرة0 15/12/2010
الهوامش :- 1) مُوندوكورو ( تعنى " شمالى " عند أبناء جنوب السودان ) 2) من قصيدة ( شمال شرق الوسادة 000 جنوب غرب اللحاف) 3) من قصيدة ( مرجحية )
|
Post: #2
Title: Re: الاستاذ هاشم صديق و مُوندوكورو .. قصيدة جديدة
Author: حبيب نورة
Date: 01-01-2011, 02:26 AM
Parent: #1
سمحة يا آسيا
سنة سعيدة عليكي يارب
|
Post: #3
Title: Re: الاستاذ هاشم صديق و مُوندوكورو .. قصيدة جديدة
Author: قاسم المهداوى
Date: 01-01-2011, 03:12 AM
Parent: #2
انت و القصيدة
قاسم المهداوى
|
Post: #4
Title: Re: الاستاذ هاشم صديق و مُوندوكورو .. قصيدة جديدة
Author: خالد حامد الجزولي
Date: 01-01-2011, 08:28 AM
Parent: #3
Quote: Quote: سمحة يا آسيا
|
ابداع دائم يا هاشم يا صديق يا ود آمنة بت الجنة شكراً أسويا تحياتي
|
Post: #5
Title: Re: الاستاذ هاشم صديق و مُوندوكورو .. قصيدة جديدة
Author: ismeil abbas
Date: 01-01-2011, 07:52 PM
Parent: #4
تسلمى ياعزيزة..ويسلم ألأستاذ هاشم صديق المبدع الفنان..
|
Post: #9
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-02-2011, 08:32 PM
Parent: #5
الجميل سمعة يارب يكون عام سعيد عليك والاسرة الكريمة ______________________________________
قصيدة انا لاوارغو لا افيانى
|
Post: #8
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-02-2011, 07:14 PM
Parent: #4
عام سعيد اخي .. خالد حامد الجزولي تحياتى ______________
قصيدة الغريب والبحر
الى موقع الاستاذ هاشم http://www.hashimsiddik.com/portal/
|
Post: #7
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-02-2011, 06:00 PM
Parent: #3
اخي العزيز قاسم المهداى عام سعيد وكل سنة وانت طيب ___________________________
قصيدة صالح عام
موقع الاستاذ هاشم http://www.hashimsiddik.com/portal/
|
Post: #6
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-02-2011, 05:51 PM
Parent: #2
اخي العزيز حبيب نورة اتمنى ان يكون عام خير يارب ________________________ قصدة جولب مسجل للبلد الاستاذ هاشم صديق
الى موقع الاستاذ هاشم صديق http://www.hashimsiddik.com/portal/
|
Post: #10
Title: Re: الاستاذ هاشم صديق و مُوندوكورو .. قصيدة جديدة
Author: فاروق عثمان
Date: 01-02-2011, 08:45 PM
Parent: #6
شكراً استاذه اسيا وانتي تمتعينا بهذه السياحه الجميله في اعمال المبدع هاشم صديق التحيه لك وعبرك للاستاذ هاشم صديق
|
Post: #11
Title: Re: الاستاذ هاشم صديق و مُوندوكورو .. قصيدة جديدة
Author: الطيب شيقوق
Date: 01-02-2011, 08:59 PM
Parent: #10
بت الربيع كيييييييييفك؟
|
Post: #17
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-07-2011, 05:27 PM
Parent: #11
اخي العزيز الطيب شيقوق اتمنى ان يكون عام خير عليك والاسرة الكريمة ____________________________
قصيدة .. مشاتر .. الحكاية الاولى ( السماية )
|
Post: #15
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-04-2011, 06:55 AM
Parent: #10
طبيبنا الجميل فاروق عثمان عام سعيد عليك يارب مودتي ________ قصيدة شمار سعدية بت جبريل
|
Post: #12
Title: Re: الاستاذ هاشم صديق و مُوندوكورو .. قصيدة جديدة
Author: عبير خيرى
Date: 01-03-2011, 03:59 AM
Parent: #1
.
آسيا يا بت من دهب
كل سنة إنتي وهاشم بي أجمل ما تتمنو
أريدكم وأريد حنانكم ذاتو شديييييييييييد وخلاص
|
Post: #13
Title: Re: الاستاذ هاشم صديق و مُوندوكورو .. قصيدة جديدة
Author: abdulhalim altilib
Date: 01-03-2011, 07:23 AM
Parent: #12
القومة ليك يا آسيا وإنتي تعطري صباحاتنا بقصائد وصوت إمام المبدعين هاشم صديق ،
شكراً كتير ليك يا بت ربيع ، وجعل الله كل أيامك أفراحاً وربيع.
مودتي ،
( ليمو )
|
Post: #19
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-07-2011, 06:03 PM
Parent: #13
اخي العزيز .. ليمو عام سعيد وكل سنة وانت طيب ________
انتبه
|
Post: #14
Title: Re: الاستاذ هاشم صديق و مُوندوكورو .. قصيدة جديدة
Author: كمال سالم
Date: 01-03-2011, 07:45 AM
Parent: #12
أسويه ,, مشتاقين والله ,, يعنى لازم تهيجى الذكريات ! سلام عليك وعلى هاشم وكل سنه وإنتو طيبين ,,
|
Post: #16
Title: Re: الاستاذ هاشم صديق و مُوندوكورو .. قصيدة جديدة
Author: ismeil abbas
Date: 01-04-2011, 08:59 PM
Parent: #14
الرائعة دومآ....بت عم ربيع أبشر...لكى التحية. وشكرآ على الهدية.
|
Post: #18
Title: Re: الاستاذ هاشم صديق و مُوندوكورو .. قصيدة جديدة
Author: اسيا ربيع
Date: 01-07-2011, 05:31 PM
Parent: #12
اختى الحبيبة عبير .. يا عبير زهر البنفسج عام سعيد ___________
مشاتر .. الحكاية التانية
|
|