طوقْ النجوم ......

طوقْ النجوم ......

كُلّ السَّنة
تلقاكَ خاتيك الجنون
والخيبة تبرى خطِوْتَك الـْ ....
المابية تبْ ما تنعدل
تلقاكَ مبسوط بي حِساب
قَدر البيمسح دمعتك
باقي الفرح زي أي شي
لامن يفوت حدّو الجميل
بِرتدَّ في داخلو العويل

كُلّ السَّنة
تغشاك سكينة كما الدعاش
وقتين يكون صاحي المزاج
يغشاك مطَر
يغسل مواجعك مرَّتين
والحزنِ دمّاع الهطول
يغشاك عزِم
وتشيل طُغاتك في خبر
تمحاها بي جرَّة قلم

كُلّ السَّنة
تمسِك نِجيماتك عليك
فِترتْ كفاها مِن الكتوف
خليها تسرح في السَّما
وأسرح معاها علي مَهَل
شان ما تقع
يلقاها ضُل
ويسومها في عِزّ الضُهر:
- علينا جاي
النجمة بي كومين تُراب ....
أسرح معاها علي مَهَل
ومرّة مرّة تعِدها
زي طفلِ شاطِر في الضياءْ
وإيدهو بِتزين السَّنة
كلّ السنة
بي طوقْ نجوم .....

عصام عيسى رجب – الثلاثاء 1 يناير 2008 م
أو
السبت 1 يناير 2011 م